ܒ ܩܘܪ̈ܢܬܝܐ 11 - ܕܝܬܩܐ ܚܕܬܐ ܕܡܪܢ ܝܫܘܥ ܡܫܝܚܐ ܘܡܙܡܘܪ̈ܐ ܒܠܫܢܐ ܐܬܘܪܝܐ

ܦܘܠܘܣ ܘܫܠܝܚ̈ܐ ܕܓܠ̈ܐ

¹ ܒܗܹܒ݂ܝܼ ܝܘܸܢ ܒܸܬ ܩܲܒܠܝܼܬܘܿܢ ܡܸܢܝܼ ܚܲܕܟ̰ܵܐ ܣܲܟ݂ܠܘܼܬܵ‌ܐ، ܗܹܐ، ܩܘܼܒܠܘܼܗ̇ ܝܬܘܿܢ.

² ܣܵܒܵܒ ܒܲܚܘܼܠܹܐ ܝܘܸܢ ܒܝܼܵܘܟ݂ܘܿܢ ܒܲܚܲܠܬܵ‌ܐ ܐܲܠܵܗܵܝܬܵ‌ܐ، ܣܵܒܵܒ ܩܵܡ ܛܵܠܒܹܢܵܘܟ݂ܘܿܢ ܠܚܲܕ ܓܲܒ݂ܪܵܐ، ܠܡܫܝܼܚܵܐ، ܕܡܲܩܪܸܒܸܢܵܘܟ݂ܘܿܢ ܒܬܘܼܠܬܵ‌ܐ ܕܟ݂ܝܼܬܵ‌ܐ ܐܸܠܹܗ.

³ ܐܝܼܢܵܐ ܒܸܙܕܵܥܵܐ ܝܘܸܢ ܗܲܪ ܕܵܐܟ݂ܝܼ ܕܚܘܼܘܹܐ ܡܘܼܚܠܸܛ ܠܹܗ ܠܚܵܘܵܐ ܒܝܲܕ ܦܲܢܕܘܼ̈ܗ‌ܝ،ܗܵܕܟ݂ܵܐ ܦܵܝܫܝܼ ܡܘܼܩܠܸܒܹܐ ܚܝܼܵܠܵܘ̈ܟ݂ܘܿܢ ܡ̣ܢ ܦܫܝܼܛܘܼܬܵ‌ܐ ܘܕܸܟ݂ܝܘܼܬܵ‌ܐ ܕܠܟܸܣ ܡܫܝܼܚܵܐ.

⁴ ܣܵܒܵܒ ܐܸܢ ܐܵܬܹ‌ܐ ܐܢܵܫܵܐ ܠܟܸܣܠܵܘܟ݂ܘܿܢ ܘܡܲܟܪܸܙ ܒܚܲܕ ܝܼܫܘܿܥ ܐܚܹܪܢܵܐ، ܗ̇ܘ ܕܐܲܚܢܲܢ ܠܵܐ ܡܘܼܟܪܸܙ ܠܲܢ، ܝܲܢ ܐܸܢ ܩܲܒܠܝܼܬܘܿܢ ܚܕܵܐ ܪܘܼܚܵܐ ܐܚܹܪܬܵ‌ܐ ܫܒ݂ܘܿܩ ܡ̣ܢ ܗ̇ܝ ܕܩܘܼܒܸܠ ܠܵܘܟ݂ܘܿܢ، ܝܲܢ ܚܲܕ ܐܹܘܲܢܓܲܠܝܼܘܿܢ ܐܚܹܪܢܵܐ ܫܒ݂ܘܿܩ ܡ̣ܢ ܗ̇ܘ ܕܩܘܼܒܸܠ ܠܵܘܟ݂ܘܿܢ، ܟܡܵܐ ܓ̰ܲܠܕܹܐ ܒܸܛܥܵܢܵܐ ܝܬܘܿܢ.

⁵ ܐܵܢܵܐ ܠܹܐ ܝܘܸܢ ܒܸܚܫܵܒ݂ܵܐ ܕܒܘܼܫ ܒܵܨܘܿܪܵܐ ܝܘܸܢ ܡ̣ܢ ܐܵܢܝܼ ܫܠܝܼܚܹ̈ܐ ܕܟܹܐ ܚܵܫܒ݂ܝܼ ܪܵܒܵܐ ܥܸܠܵܝܹ̈ܐ ܝܢܵܐ.

⁶ ܐܘܼܦ ܐܸܢ ܕܠܹܐ ܝܘܸܢ ܬܘܼܠܡܸܕܵܐ ܒܗܹܡܸܙܡܵܢ، ܐܝܼܢܵܐ ܐܝܼܬ ܠܝܼ ܝܕܵܥܬܵ‌ܐ. ܐܵܗܵܐ ܦܝܼܫܬܵ‌ܐ ܝܠܵܗ̇ ܓܠܝܼܬܵ‌ܐ ܐܸܠܵܘܟ݂ܘܿܢ ܒܟܠ ܐܘܼܪܚܵܐ.

⁷ ܝܲܢ ܩܵܡܘܿ ܚܛܹܐ ܠܝܼ ܕܡܘܼܟܸܦ ܠܝܼ ܓܵܢܝܼ ܕܐܲܚܬܘܿܢ ܦܵܝܫܝܼܬܘܿܢ ܡܘܼܪܡܹܐ، ܟܲܕ ܡܘܼܟܪܸܙ ܠܝܼ ܚܘܼܪܵܝܝܼ ܐܸܠܵܘܟ݂ܘܿܢ ܐܹܘܲܢܓܲܠܝܼܘܿܢ ܕܐܲܠܵܗܵܐ؟

⁸ ܣܠܝܼܒ ܠܝܼ ܥܹܕܵܬܹ̈‌ܐ ܐܚܹܪ̈ܢܹܐ، ܕܫܵܩܠܹܢ ܗܘܵܐ ܗܲܝܲܪܬܵ‌ܐ ܡܸܢܵܝܗ‌ܝ ܕܥܵܒ݂ܕܹܢ ܗܘܵܐ ܚܸܠܡܲܬ ܐܸܠܵܘܟ݂ܘܿܢ،

⁹ ܘܐܝܼܡܲܢ ܕܝܼܘܸܢ ܗܘܵܐ ܠܟܸܣܠܵܘܟ݂ܘܿܢ ܘܣܢܝܼܩ ܠܝܼ ܠܡܸܢܕܝܼ، ܠܵܐ ܗܘܹܐ ܠܝܼ ܝܘܼܩܪܵܐ ܠܐܘܼܦ ܚܲܕ، ܣܵܒܵܒ ܐܲܚܘܿܢܘܵܬܹ̈‌ܐ ܕܐܬܹ‌ܐ ܠܗܘܿܢ ܡ̣ܢ ܡܵܩܹܕܘܿܢܝܼܵܐ ܡܠܹܐ ܠܗܘܿܢ ܠܣܢܝܼܩܘܼܬ‌ܝܼ. ܠܹܐ ܝܘܸܢ ܗܘܝܼܵܐ ܝܘܼܩܪܵܐ ܠܐܘܼܦ ܚܲܕ، ܘܐܘܼܦ ܠܹܐ ܗܵܘܹܝܢ.

¹⁰ ܐܲܝܟ݂ ܕܫܪܵܪܵܐ ܕܡܫܝܼܚܵܐ ܒܝܼܝܼ ܝܠܹܗ، ܐܵܗܵܐ ܫܘܼܒ݂ܗܵܪܵܐ ܠܹܐ ܦܵܐܹܫ ܫܩܝܼܠܵܐ ܡܸܢܝܼ ܓܵܘ ܐܘܼܚܕܵܢܵܐ ܕܐܵܟ݂ܵܐܝܼܵܐ.

¹¹ ܩܵܡܘܿܕܝܼ؟ ܣܵܒܵܒ ܠܹܐ ܡܲܚܸܒܸܢܵܘܟ݂ܘܿܢ؟ ܐܲܠܵܗܵܐ ܟܹܐ ܝܵܕܹܥ ܕܟܹܐ ܡܲܚܸܒܸܢܵܘܟ݂ܘܿܢ.

¹² ܘܒܸܬ ܥܵܒ݂ܕܹܢ ܡܸܢܕܝܼ ܕܒܸܥܒ݂ܵܕܵܐ ܝܘܸܢ ܕܩܵܛܥܹܢ ܟܠ ܦܸܪܣܲܬ ܥܲܠ ܐܵܢܝܼ ܕܒܸܛܥܵܝܵܐ ܝܢܵܐ ܠܦܸܪܣܲܬ ܕܚܵܫܒ݂ܝܼ ܠܵܗ̇ ܓܵܢܵܝܗ‌ܝ ܫܵܘܝܹ̈ܐ ܥܲܡܲܢ ܒܡܸܢܕܝܼܵܢܹ̈ܐ ܕܒܸܥܒ݂ܵܕܵܐ ܝܢܵܐ ܫܘܼܒ݂ܗܵܪܵܐ ܒܝܼܵܝܗ‌ܝ.

¹³ ܐܲܢܹܐ ܐܢܵܫܹ̈ܐ ܫܠܝܼܚܹ̈ܐ ܕܲܓܵܠܹ̈ܐ ܝܢܵܐ، ܦܲܠܵܚܹ̈ܐ ܦܟ̰ܝܼܠܹ̈ܐ، ܕܡܲܕܡܘܼܝܘܼܗ̇ ܝܢܵܐ ܓܵܢܵܝܗ‌ܝ ܠܫܠܝܼܚܹ̈ܐ ܕܡܫܝܼܚܵܐ.

¹⁴ ܠܹܐ ܝܠܵܗ̇ ܡܲܥܓ̰ܸܒܵܢܬܵ‌ܐ، ܣܵܒܵܒ ܐܘܼܦ ܣܵܛܵܢܵܐ ܟܹܐ ܡܲܕܡܹܐ ܠܵܗ̇ ܓܵܢܹܗ ܠܡܲܠܲܐܟ݂ܵܐ ܕܒܲܗܪܵܐ.

¹⁵ ܒܵܣ ܠܹܐ ܝܠܹܗ ܚܲܕ ܡܸܢܕܝܼ ܓܘܼܪܵܐ ܕܐܸܢ ܐܘܼܦ ܥܵܒ݂ܕܵܢܹ̈ܐ ܕܚܸܠܡܲܬܹܗ ܡܲܕܡܝܼ ܠܵܗ̇ ܓܵܢܵܝܗ‌ܝ ܠܥܵܒ݂ܕܵܢܹ̈ܐ ܕܚܸܠܡܲܬ ܕܙܲܕܝܼܩܘܼܬܵ‌ܐ. ܐܝܼܢܵܐ ܚܲܪܬܵܝܗ‌ܝ ܒܸܬ ܗܵܘܝܵܐ ܐܲܝܟ݂ ܦܘܼܠܚܵܢܵܝ̈ܗ‌ܝ.

ܓ̰ܘܢܓ̰ܪ̈ܐ ܕܦܘܠܘܣ ܫܠܝܚܐ

¹⁶ ܡܸܢܕܪܸܫ ܒܹܐܡܵܪܵܐ ܝܘܸܢ، ܐܢܵܫܵܐ ܠܵܐ ܚܵܫܹܒ݂ ܠܝܼ ܐܲܝܟ݂ ܣܲܟ݂ܠܵܐ. ܐܝܼܢܵܐ ܐܸܢ ܚܵܫܹܒ݂ ܠܝܼ ܗܵܕܟ݂ܵܐ، ܩܲܒܠܘܼܢ ܠܝܼ ܐܲܝܟ݂ ܚܲܕ ܣܲܟ݂ܠܵܐ ܕܥܵܒ݂ܕܹܢ ܚܲܕܟ̰ܵܐ ܫܘܼܒ݂ܗܵܪܵܐ.

¹⁷ ܡܸܢܕܝܼ ܕܗܲܡܙܘܼܡܹܐ ܝܘܸܢ ܠܹܐ ܝܘܸܢ ܗܲܡܙܘܼܡܹܗ ܐܲܝܟ݂ ܡܵܪܲܢ ܒܵܥܹܐ ܕܗܲܡܙܸܡܸܢܹܗ، ܐܸܠܵܐ ܐܲܝܟ݂ ܚܲܕ ܣܲܟ݂ܠܵܐ ܒܐܵܗܵܐ ܒܸܣܬܵܝܘܼܬܵ‌ܐ ܕܫܘܼܒ݂ܗܵܪܵܐ.

¹⁸ ܒܗ̇ܝ ܕܪܵܒܵܐ ܟܹܐ ܥܵܒ݂ܕܝܼ ܫܘܼܒ݂ܗܵܪܵܐ ܡ̣ܢ ܟܝܵܢܵܝܗ‌ܝ ܐܢܵܫܵܝܵܐ، ܐܘܼܦ ܐܵܢܵܐ ܒܸܬ ܥܵܒ݂ܕܹܢ ܫܘܼܒ݂ܗܵܪܵܐ.

¹⁹ ܒܚܲܕܘܼܬܵ‌ܐ ܟܹܐ ܩܲܒܠܝܼܬܘܿܢ ܠܣܲܟ݂ܠܹ̈ܐ ܣܵܒܵܒ ܚܲܟܝܼܡܹ̈ܐ ܝܬܘܿܢ.

²⁰ ܟܹܐ ܩܲܒܠܝܼܬܘܿܢ ܠܗ̇ܘ ܕܥܵܒܹܕ ܠܵܘܟ݂ܘܿܢ ܪܹ̈ܓܵܘܵܬܹ‌ܐ، ܠܗ̇ܘ ܕܡܲܦܠܸܚ ܠܵܘܟ݂ܘܿܢ ܠܝܘܼܬܪܵܢܵܐ ܕܓܵܢܹܗ، ܠܗ̇ܘ ܕܫܵܩܹܠ ܡܸܢܵܘܟ݂ܘܿܢ، ܠܗ̇ܘ ܕܡܲܪܸܡ ܓܵܢܹܗ، ܠܗ̇ܘ ܕܡܵܚܹܐ ܥܲܠ ܦܵܬܵܘܟ݂ܘܿܢ.

²¹ ܗܲܡܙܘܼܡܹܐ ܝܘܸܢ ܒܢܟܸܦܬܵ‌ܐ ܐܲܝܟ݂ ܕܐܸܢ ܗܵܘܲܚ ܗܘܝܼܹܐ ܡܚܝܼܠܹ̈ܐ. ܐܝܼܢܵܐ ܐܸܢ ܚܲܕ ܚܲܦܸܛ ܠܸܥܒ݂ܵܕܵܐ ܫܘܼܒ݂ܗܵܪܵܐ ܒܚܲܕ ܡܸܢܕܝܼ، ܐܘܼܦ ܐܵܢܵܐ ܒܸܬ ܚܲܦܛܸܢ ܕܥܵܒ݂ܕܹܢ ܫܘܼܒ݂ܗܵܪܵܐ. ܠܲܐܟ݂ܵܐ ܗܲܡܙܘܼܡܹܐ ܝܘܸܢ ܐܲܝܟ݂ ܣܲܟ݂ܠܵܐ.

²² ܥܸܒ݂ܪ̈ܵܝܹܐ ܝܢܵܐ؟ ܐܘܼܦ ܐܵܢܵܐ ܥܸܒ݂ܪܵܝܵܐ ܝܘܸܢ. ܝܼܣܲܪ̈ܠܵܝܹܐ ܝܢܵܐ؟ ܐܘܼܦ ܐܵܢܵܐ ܝܼܣܲܪܠܵܝܵܐ ܝܘܸܢ. ܒܢܘܿܢܹ̈ܐ ܕܐܲܒ݂ܪܵܗܵܡ ܝܼܢܵܐ؟ ܐܘܼܦ ܐܵܢܵܐ.

²³ ܪܹ̈ܓܵܘܵܬܹ‌ܐ ܕܡܫܝܼܚܵܐ ܝܢܵܐ؟ - ܗܲܡܙܘܼܡܹܐ ܝܘܸܢ ܐܲܝܟ݂ ܚܲܕ ܫܹܐܕܵܢܵܐ - ܐܵܢܵܐ ܒܘܼܫ ܙܵܘܕܵܐ. ܦܠܝܼܚ ܠܝܼ ܒܘܼܫ ܩܸܫܝܵܐ، ܗܘܹܐ ܠܝܼ ܓܵܘ ܒܹܝܬ ܐܲܣܝܼܪܹ̈ܐ ܒܘܼܫ ܙܵܘܕܵܐ، ܒܡܲܚܘܵܬܹ̈‌ܐ ܒܘܼܫ ܙܵܘܕܵܐ، ܪܵܒܵܐ ܓܵܗܹ̈ܐ ܩܘܼܪܒܵܐ ܠܡܵܘܬܵ‌ܐ.

²⁴ ܚܲܡܸܫ ܓܵܗܹ̈ܐ ܦܝܼܫ ܠܝܼ ܡܸܚܝܵܐ ܒܝܲܕ ܝܗܘܼܕܵܝܹ̈ܐ، ܟܠ ܓܵܗܵܐ ܬܠܵܬ‌ܝܼ ܬܸܫܥܵܐ ܫܵܘܛܹ̈ܐ.

²⁵ ܬܠܵܬ ܓܵܗܹ̈ܐ ܒܚܘܼܛܪܹ̈ܐ ܦܝܼܫ ܠܝܼ ܡܸܚܝܵܐ، ܚܕܵܐ ܓܵܗܵܐ ܦܝܼܫ ܠܝܼ ܪܓ̰ܝܼܡܵܐ، ܬܠܵܬ ܓܵܗܹ̈ܐ ܫܡܝܼܛ ܠܵܗ̇ ܒܝܼܝܼ ܓܵܡܝܼ، ܚܲܕ ܝܵܘܡܵܐ ܘܚܲܕ ܠܲܝܠܹܐ ܗܘܹܐ ܠܝܼ ܥܲܠ ܦܵܬܵ‌ܐ ܕܡ̈ܝܼܵܐ ܓܵܘ ܝܵܡܵܐ.

²⁶ ܒܐܘܼܪ̈ܚܵܬܹ‌ܐ ܪܵܒܵܐ ܓܵܗܹ̈ܐ، ܒܩܹܘܲܢܕܹܢܘܿܣܹ̈ܐ ܕܢܲܗܪ̈ܵܘܵܬܹ‌ܐ، ܒܩܹܘܲܢܕܹܢܘܿܣܹ̈ܐ ܕܫܲܠܚܵܢܹ̈ܐ ܕܐܘܼܪ̈ܚܵܬܹ‌ܐ، ܒܩܹܘܲܢܕܹܢܘܿܣܹ̈ܐ ܡ̣ܢ ܐܢܵܫܹ̈ܐ ܕܓܵܢܝܼ، ܒܩܹܘܲܢܕܹܢܘܿܣܹ̈ܐ ܡ̣ܢ ܐܸܡܘܵܬܹ̈‌ܐ، ܒܩܹܘܲܢܕܹܢܘܿܣ ܓܵܘ ܡܕܝܼܢܵܬܹ̈‌ܐ، ܒܩܹܘܲܢܕܹܢܘܿܣ ܓܵܘ ܒܲܪܝܼܵܐ، ܒܩܹܘܲܢܕܹܢܘܿܣ ܕܝܵܡܵܐ، ܘܒܩܹܘܲܢܕܹܢܘܿܣ ܡ̣ܢ ܐܲܚܘܿܢܘܵܬܹ̈‌ܐ ܕܲܓܵܠܹ̈ܐ.

²⁷ ܦܠܝܼܚ ܠܝܼ ܘܟܟ̰ܝܼܚ ܠܝܼ ܪܵܒܵܐ، ܘܒܠܲܝܠܵܘܵܬܹ̈‌ܐ ܠܵܐ ܛܠܝܼܥ ܠܝܼ. ܗܘܹܐ ܠܝܼ ܒܟܸܦܢܵܐ ܘܨܵܗܘܵܐ، ܘܒܨܵܘܡܵܐ ܪܵܒܵܐ ܓܵܗܹ̈ܐ، ܘܒܩܲܪܬܵ‌ܐ ܘܒܫܘܼܠܚܵܝܘܼܬܵ‌ܐ.

²⁸ ܫܒ݂ܘܿܩ ܡ̣ܢ ܡܸܢܕܝܼܵܢܹ̈ܐ ܕܠܒܲܕܲܪ، ܟܠ ܝܘܿܡ ܒܸܛܥܵܢܵܐ ܝܘܸܢ ܝܘܼܩܪܵܐ ܕܟܠܵܝܗ‌ܝ ܥܹܕܵܬܹ̈‌ܐ.

²⁹ ܡܵܢܝܼ ܝܠܹܗ ܡܚܝܼܠܵܐ ܘܐܵܢܵܐ ܠܹܐ ܝܘܸܢ ܡܚܝܼܠܵܐ؟ ܡܵܢܝܼ ܝܠܹܗ ܦܝܼܫܵܐ ܬܘܼܪܩܸܠܵܐ ܒܚܛܝܼܬܵ‌ܐ ܘܐܵܢܵܐ ܠܹܐ ܝܵܩܕܹܢ ܒܓܵܘܝܼ؟

³⁰ ܐܸܢ ܘܵܠܹܐ ܝܠܵܗ̇ ܕܫܲܒ݂ܗܸܪܸܢ ܒܸܬ ܫܲܒ݂ܗܸܪܸܢ ܒܙܲܒܘܼܢܘܼܝܵܬ‌ܝܼ̈.

³¹ ܐܲܠܵܗܵܐ ܕܝܼܠܹܗ ܒܵܒܵܐ ܕܡܵܪܲܢ ܝܼܫܘܿܥ، ܕܡܒܘܼܪܟ݂ܵܐ ܝܠܹܗ ܠܥܵܠܲܡ، ܟܹܐ ܝܵܕܹܥ ܕܠܹܐ ܝܘܸܢ ܕܲܓܘܼܠܹܐ.

³² ܓܵܘ ܕܲܪܡܣܘܿܩ، ܪܲܒ ܚܲܝܠܵܐ ܬܚܘܿܬ ܫܘܼܠܛܵܢܵܐ ܕܐܵܪܹܛܘܿܣ ܡܲܠܟܵܐ ܒܸܢܛܵܪܵܐ ܝܗܘܵܐ ܡܕܝܼܢ݇ܬܵ‌ܐ ܕܕܲܪ̈ܡܣܘܿܩܵܝܹܐ ܠܸܕܒ݂ܵܩܝܼ.

³³ ܐܝܼܢܵܐ ܦܝܼܫ ܠܝܼ ܡܘܼܫܪܸܛܵܐ ܓܵܘ ܩܸܪܛܵܠܵܐ ܡ̣ܢ ܟܵܘܹܐ ܡܥܲܠ ܫܘܼܪܵܐ ܘܦܪܝܼܩ ܠܝܼ ܡ̣ܢ ܐܝܼܕܵܬܘܼ̈ܗ‌ܝ.