ܐ ܩܘܪ̈ܢܬܝܐ 9 - ܕܝܬܩܐ ܚܕܬܐ ܕܡܪܢ ܝܫܘܥ ܡܫܝܚܐ ܘܡܙܡܘܪ̈ܐ ܒܠܫܢܐ ܐܬܘܪܝܐܗܩܘܝܬ̈ܐ ܕܫܠܝܚ̈ܐ 1 ܠܹܐ ܝܘܸܢ ܚܹܐܪܵܐ؟ ܠܹܐ ܝܘܸܢ ܫܠܝܼܚܵܐ؟ ܠܹܐ ܝܘܸܢ ܚܸܙܝܹܗ ܝܼܫܘܿܥ ܡܵܪܲܢ؟ ܘܠܹܐ ܝܬܘܿܢ ܐܲܚܬܘܿܢ ܦܘܼܠܚܵܢܝܼ ܒܡܵܪܲܢ؟ 2 ܐܘܼܦ ܐܸܢ ܠܐܚܹܪ̈ܢܹܐ ܠܹܐ ܝܘܸܢ ܫܠܝܼܚܵܐ، ܐܝܼܢܵܐ ܐܸܠܵܘܟ݂ܘܿܢ ܝܼܘܸܢ، ܣܵܒܵܒ ܐܲܚܬܘܿܢ ܝܼܬܘܿܢ ܚܵܬܡܵܐ ܕܫܠܝܼܚܘܼܬܝܼ ܒܡܵܪܲܢ. 3 ܓ̰ܘܼܘܵܒܝܼ ܠܐܵܢܝܼ ܕܒܸܕܝܵܢܝܼ ܝܢܵܐ ܐܵܗܵܐ ܝܠܹܗ: 4 ܠܲܝܬ ܠܲܢ ܗܵܩܘܼܬܵܐ ܠܹܐܟ݂ܵܠܵܐ ܘܠܸܫܬܵܝܵܐ؟ 5 ܠܲܝܬ ܠܲܢ ܗܵܩܘܼܬܵܐ ܠܸܫܩܵܠܵܐ ܒܲܟ݂ܬܵܐ ܡܗܘܼܡܸܢܬܵܐ ܕܗܵܘܝܵܐ ܥܲܡܲܢ ܐܲܝܟ݂ ܫܠܝܼܚܹ̈ܐ ܐܚܹܪ̈ܢܹܐ، ܐܲܝܟ݂ ܐܲܚܘܿܢܘܵܬܹ̈ܐ ܕܡܵܪܲܢ ܘܐܲܝܟ݂ ܫܸܡܥܘܿܢ ܟܹܐܦܵܐ؟ 6 ܝܲܢ ܐܲܚܟ̰ܝܼ ܐܵܢܵܐ ܘܒܲܪܢܒ݂ܵܐ ܣܢܝܼܩܹܐ ܝܘܲܚ ܕܦܵܠܚܲܚ؟ 7 ܡܵܢܝܼ ܟܹܐ ܥܵܒܹܕ ܦܲܠܚܘܼܬܵܐ ܒܢܲܦܩܵܬܹ̈ܐ ܕܓܵܢܹܗ؟ ܡܵܢܝܼ ܟܹܐ ܢܵܨܹܒ݂ ܟܲܪܡܵܐ ܘܠܵܐ ܐܵܟܹܠ ܡ̣ܢ ܛܥܘܼܢܬܹܗ؟ ܡܵܢܝܼ ܟܹܐ ܡܲܪܥܹܐ ܥܸܪ̈ܒܹܐ ܘܠܵܐ ܫܵܬܹܐ ܡ̣ܢ ܚܲܠܒ݂ܵܐ ܕܥܸܪ̈ܒܹܐ؟ 8 ܒܸܚܫܵܒ݂ܵܐ ܝܬܘܿܢ ܕܐܲܝܟ݂ ܒܲܪܢܵܫܵܐ ܗܲܡܙܘܼܡܹܐ ܝܘܸܢ؟ ܝܲܢ ܠܹܐ ܝܠܹܗ ܐܘܼܦ ܢܵܡܘܿܣܵܐ ܒܹܐܡܵܪܵܐ ܗܵܕܟ݂ܵܐ؟ 9 ܣܵܒܵܒ ܟܬܝܼܒ݂ܵܐ ܝܠܹܗ ܒܢܵܡܘܿܣܵܐ ܕܡܘܼܫܹܐ: ܠܵܐ ܐܵܣܪܹܬ ܦܘܼܡܵܐ ܕܬܵܘܪܵܐ ܕܝܼܠܹܗ ܒܸܕܘܵܪܵܐ. ܒܘܼܬ ܬܵܘܪܵܐ ܬܲܚܡܘܼܢܹܐ ܝܠܹܗ ܐܲܠܵܗܵܐ؟ 10 ܠܹܐ ܝܠܹܗ ܗܲܪ ܒܘܼܬ ܕܝܼܲܢ ܗܲܡܙܘܼܡܹܐ؟ ܗܹܐ، ܒܘܼܬ ܕܝܼܲܢ ܝܼܠܹܗ ܦܝܼܫܵܐ ܟܬܝܼܒ݂ܵܐ ܕܐܝܼܡܲܢ ܕܙܵܪܥܵܢܵܐ ܛܵܪܹܐ ܦܕܵܢܵܐ، ܘܕܵܘܪܵܢܵܐ ܕܵܘܹܪ، ܟܹܐ ܥܵܒ݂ܕܝܼ ܗܵܕܟ݂ܵܐ ܒܗܹܒ݂ܝܼ ܕܫܲܪܸܟܝܼ ܒܕܲܚܠܵܐ. 11 ܐܸܢ ܐܲܚܢܲܢ ܙܪܝܼܥ ܠܲܢ ܒܲܪܙܲܪܥܵܐ ܪܘܼܚܵܢܵܝܵܐ ܓܵܘܵܘܟ݂ܘܿܢ، ܪܵܒܵܐ ܝܠܵܗ̇ ܐܸܢ ܚܵܨܕܲܚ ܚܸܨܕܵܐ ܗܘܼܠܵܢܵܝܵܐ ܡܸܢܵܘܟ݂ܘܿܢ؟ 12 ܐܸܢ ܐܚܹܪ̈ܢܹܐ ܐܝܼܬ ܠܗܘܿܢ ܗܵܩܘܼܬܵܐ ܥܲܠܵܘܟ݂ܘܿܢ، ܠܵܐ ܒܘܼܫ ܙܵܘܕܵܐ ܐܝܼܬ ܠܲܢ ܐܲܚܢܲܢ؟ ܐܝܼܢܵܐ ܐܲܚܢܲܢ ܠܹܐ ܝܘܲܚ ܡܘܼܦܠܸܚܘܼܗ̇ ܐܵܗܵܐ ܗܵܩܘܼܬܵܐ، ܐܝܼܢܵܐ ܟܠ ܡܸܢܕܝܼ ܩܘܼܒܠܹܐ ܝܘܲܚ ܕܠܵܐ ܗܵܘܲܚ ܬܲܪܩܲܠܬܵܐ ܠܐܹܘܲܢܓܲܠܝܼܘܿܢ ܕܡܫܝܼܚܵܐ. 13 ܠܹܐ ܝܵܕܥܝܼܬܘܿܢ ܕܐܵܢܝܼ ܕܟܹܐ ܦܵܠܚܝܼ ܓܵܘ ܗܲܝܟܠܵܐ ܟܹܐ ܐܵܟ݂ܠܝܼ ܡ̣ܢ ܓܵܘ ܗܲܝܟܠܵܐ؟ ܘܐܵܢܝܼ ܕܟܹܐ ܦܵܠܚܝܼ ܒܡܲܕܒܚܵܐ ܟܹܐ ܫܲܪܸܟܝܼ ܒܩܘܼܪ̈ܒܵܢܹܐ ܡܘܼܩܪܸܒܹܐ ܥܲܠ ܡܲܕܒܚܵܐ؟ 14 ܗܵܕܟ݂ܵܐ ܐܘܼܦ ܡܵܪܲܢ ܦܩܝܼܕ ܠܹܗ، ܕܐܵܢܝܼ ܕܡܲܟܪܸܙܝܼ ܐܹܘܲܢܓܲܠܝܼܘܿܢ، ܡ̣ܢ ܐܹܘܲܢܓܲܠܝܼܘܿܢ ܚܵܝܝܼ. 15 ܐܝܼܢܵܐ ܐܵܢܵܐ ܠܹܐ ܝܘܸܢ ܥܒ݂ܝܼܕܵܐ ܐܘܼܦ ܚܲܕ ܡ̣ܢ ܐܲܢܹܐ، ܘܠܹܐ ܝܘܸܢ ܒܸܟܬܵܒ݂ܵܐ ܗܵܕܟ݂ܵܐ ܒܗܹܒ݂ܝܼ ܕܥܵܒ݂ܕܝܼܬܘܿܢ ܐܲܢܹܐ ܐܸܠܝܼ. ܣܵܒܵܒ ܒܘܼܫ ܨܦܵܝܝܼ ܝܠܵܗ̇ ܕܡܵܝܬܹܢ ܘܐܢܵܫܵܐ ܠܵܐ ܒܲܛܸܠ ܠܹܗ ܫܘܼܒ݂ܗܵܪܝܼ. 16 ܐܝܼܢܵܐ ܒܡܲܟܪܲܙܬܝܼ ܒܐܹܘܲܢܓܲܠܝܼܘܿܢ ܠܹܐ ܥܵܒ݂ܕܹܢ ܫܘܼܒ݂ܗܵܪܵܐ، ܣܵܒܵܒ ܡܸܫܬܲܐܠܵܢܘܼܬܵܐ ܝܠܵܗ̇ ܥܲܠܝܼ. ܘܵܝ ܥܲܠܝܼ ܐܸܢ ܠܵܐ ܡܲܟܪܸܙܸܢܹܗ. 17 ܐܸܢ ܡܲܟܪܸܙܸܢ ܒܨܸܒ݂ܝܵܢܝܼ، ܐܝܼܬ ܠܝܼ ܦܘܼܪܥܵܢܵܐ؛ ܐܝܼܢܵܐ ܐܸܢ ܠܹܐ ܝܠܵܗ̇ ܒܨܸܒ݂ܝܵܢܝܼ، ܐܲܚܟ̰ܝܼ ܘܵܠܝܼܬܝܼ ܒܸܥܒ݂ܵܕܘܼܗ̇ ܝܘܸܢ. 18 ܒܵܣ ܡܘܼܕܝܼ ܝܠܹܗ ܦܘܼܪܥܵܢܝܼ؟ ܐܵܗܵܐ ܝܠܹܗ، ܕܡܲܟܪܸܙܸܢ ܐܹܘܲܢܓܲܠܝܼܘܿܢ ܚܘܼܪܵܝܝܼ، ܘܠܵܐ ܛܵܠܒܹܢ ܗܵܩܘܼܬܝܼ ܒܡܲܟܪܲܙܬܵܐ ܕܐܹܘܲܢܓܲܠܝܼܘܿܢ. 19 ܣܵܒܵܒ ܐܘܼܦ ܐܸܢ ܕܚܹܐܪܵܐ ܝܘܸܢ ܡ̣ܢ ܟܠܵܝܗܝ ܐܢܵܫܹ̈ܐ، ܒܸܥܒ݂ܵܕܘܼܗ̇ ܝܘܸܢ ܓܵܢܝܼ ܥܲܒ݂ܕܵܐ ܩܵܐ ܟܠܵܝܗܝ ܕܩܵܢܹܝܢ ܠܪܵܒܵܐ. 20 ܠܝܗܘܼܕܵܝܹ̈ܐ ܗܘܹܐ ܠܝܼ ܐܲܝܟ݂ ܝܗܘܼܕܵܝܵܐ ܕܩܵܢܹܝܢ ܠܝܗܘܼܕܵܝܹ̈ܐ. ܠܐܵܢܝܼ ܬܚܘܿܬ ܢܵܡܘܿܣܵܐ ܗܘܹܐ ܠܝܼ ܐܲܝܟ݂ ܬܚܘܿܬ ܢܵܡܘܿܣܵܐ، ܐܘܼܦ ܐܸܢ ܕܐܵܢܵܐ ܒܓܵܢܝܼ ܠܹܐ ܝܘܸܢ ܬܚܘܿܬ ܢܵܡܘܿܣܵܐ، ܕܩܵܢܹܝܢ ܠܐܵܢܝܼ ܕܝܼܢܵܐ ܬܚܘܿܬ ܢܵܡܘܿܣܵܐ. 21 ܠܐܵܢܝܼ ܕܠܲܝܬ ܠܗܘܿܢ ܢܵܡܘܿܣܵܐ ܗܘܹܐ ܠܝܼ ܐܲܝܟ݂ ܕܠܵܐ ܢܵܡܘܿܣܵܐ، ܐܘܼܦ ܐܸܢ ܕܠܹܐ ܝܘܸܢ ܚܹܐܪܵܐ ܡ̣ܢ ܢܵܡܘܿܣܵܐ ܕܐܲܠܵܗܵܐ، ܐܝܼܢܵܐ ܬܚܘܿܬ ܢܵܡܘܿܣܵܐ ܕܡܫܝܼܚܵܐ ܝܘܸܢ، ܕܩܵܢܹܝܢ ܠܐܵܢܝܼ ܕܠܲܝܬ ܠܗܘܿܢ ܢܵܡܘܿܣܵܐ. 22 ܠܙܲܒܘܼܢܹ̈ܐ ܗܘܹܐ ܠܝܼ ܙܲܒܘܼܢ ܕܩܵܢܹܝܢ ܠܙܲܒܘܼܢܹ̈ܐ. ܗܘܹܐ ܠܝܼ ܟܠ ܡܸܢܕܝܼ ܠܟܠܵܝܗܝ ܐܢܵܫܹ̈ܐ، ܕܒܟܠ ܐܘܼܪܚܵܐ، ܦܲܪܩܸܢ ܠܚܲܕܟܡܵܐ. 23 ܒܸܥܒ݂ܵܕܵܐ ܝܘܸܢ ܐܲܢܹܐ ܟܠܵܝܗܝ ܒܘܼܬ ܐܹܘܲܢܓܲܠܝܼܘܿܢ، ܕܗܵܘܹܝܢ ܫܲܪܝܼܟܵܐ ܒܝܼܹܗ. 24 ܠܹܐ ܝܬܘܿܢ ܒܝܼܕܵܥܵܐ ܕܐܵܢܝܼ ܕܪܵܚܛܝܼ ܓܵܘ ܡܲܝܕܵܢ ܟܠܵܝܗܝ ܟܹܐ ܪܵܚܛܝܼ، ܐܝܼܢܵܐ ܐܲܚܟ̰ܝܼ ܚܲܕ ܟܹܐ ܫܵܩܹܠ ܦܘܼܪܥܵܢܵܐ؟ ܗܵܕܟ݂ܵܐ ܪܚܘܿܛܘܼܢ ܕܫܵܩܠܝܼܬܘܿܢ ܓ݂ܵܠܹܒܘܼܬܵܐ. 25 ܟܠ ܐܢܵܫܵܐ ܕܥܵܒܹܕ ܐܵܓ݂ܘܿܢܵܐ ܟܹܐ ܕܵܒܹܩ ܠܵܗ̇ ܓܵܢܹܗ ܒܟܠ ܡܸܢܕܝܼ. ܐܵܢܝܼ ܟܹܐ ܥܵܒ݂ܕܝܼ ܗܵܕܟ݂ܵܐ ܕܩܲܒܠܝܼ ܟܠܝܼܠܵܐ ܚܵܪܒ݂ܵܢܵܐ، ܐܝܼܢܵܐ ܐܲܚܢܲܢ ܟܹܐ ܥܵܒ݂ܕܲܚ ܗܵܕܟ݂ܵܐ ܕܩܲܒܠܲܚ ܟܠܝܼܠܵܐ ܠܵܐ ܚܵܪܒ݂ܵܢܵܐ. 26 ܒܵܣ ܐܵܢܵܐ ܠܹܐ ܪܵܚܛܹܢ ܐܲܝܟ݂ ܚܲܕ ܕܪܵܚܹܛ ܕܠܵܐ ܢܝܼܫܵܐ. ܘܠܹܐ ܦܵܠܫܹܢ ܐܲܝܟ݂ ܚܲܕ ܕܒܸܡܚܵܝܵܐ ܝܠܹܗ ܠܗܵܘܵܐ. 27 ܐܝܼܢܵܐ ܟܹܐ ܙܲܒܛܸܢܸܢܹܗ ܦܲܓ݂ܪܝܼ ܘܥܵܒ݂ܕܹܢܹܗ ܪܹܓܝܼ، ܕܐܝܼܡܲܢ ܕܡܘܼܟܪܸܙ ܠܝܼ ܠܐܚܹܪ̈ܢܹܐ ܒܓܵܢܝܼ ܠܵܐ ܦܵܝܫܹܢ ܡܘܼܣܠܝܼܵܐ. |
© 2014, Aramaic Bible Translation, Inc. All rights reserved.
Aramaic Bible Translation, Inc.