ܐ ܩܘܪ̈ܢܬܝܐ 8 - ܕܝܬܩܐ ܚܕܬܐ ܕܡܪܢ ܝܫܘܥ ܡܫܝܚܐ ܘܡܙܡܘܪ̈ܐ ܒܠܫܢܐ ܐܬܘܪܝܐ

ܕܒ݂ܚ̈ܐ ܠܨܢܡ̈ܐ

¹ ܐܵܕܝܼܵܐ، ܒܘܼܬ ܕܸܒ݂ܚܹ̈ܐ ܠܨܵܢܲܡܹ̈ܐ، ܟܹܐ ܝܵܕܥܲܚ ܕܟܠܲܢ ܐܝܼܬ ܠܲܢ ܝܕܵܥܬܵ‌ܐ. ܝܕܵܥܬܵ‌ܐ ܟܹܐ ܒܵܪܝܵܐ ܚܬܝܼܪܘܼܬܵ‌ܐ، ܐܝܼܢܵܐ ܚܘܼܒܵܐ ܟܹܐ ܒܵܢܹܐ.

² ܐܸܢ ܐܢܵܫܵܐ ܚܵܫܹܒ݂ ܕܒܝܼܕܵܥܵܐ ܝܠܹܗ ܡܸܢܕܝܼ، ܗܸܫ ܠܹܐ ܝܵܕܹܥ ܐܲܝܟ݂ ܕܘܵܠܹܐ ܝܠܵܗ̇ ܕܝܵܕܹܥ.

³ ܐܝܼܢܵܐ ܗ̇ܘ ܕܡܲܚܸܒ ܠܐܲܠܵܗܵܐ ܟܹܐ ܦܵܐܹܫ ܝܕܝܼܥܵܐ ܒܝܲܕ ܐܲܠܵܗܵܐ.

⁴ ܒܵܣ ܒܘܼܬ ܐܟ݂ܵܠܬܵ‌ܐ ܕܡܹܐܟ݂ܘܼܠܬܵ‌ܐ ܡܘܼܩܪܸܒ݂ܬܵ‌ܐ ܠܨܵܢܲܡܹ̈ܐ، ܟܹܐ ܝܵܕܥܲܚ ܕܨܵܢܲܡ ܠܹܐ ܝܠܹܗ ܡܸܢܕܝܼ ܓܵܘ ܕܘܼܢܝܹܐ، ܘܠܲܝܬ ܐܲܠܵܗܵܐ ܐܸܠܵܐ ܚܲܕ.

⁵ ܐܘܼܦ ܐܸܢ ܕܐܝܼܬ ܕܦܵܝܫܝܼ ܩܸܪܝܹܐ ܐܲܠܵܗܹ̈ܐ، ܝܲܢ ܒܫܡܲܝܵܐ ܝܲܢ ܒܐܲܪܥܵܐ، ܕܵܐܟ݂ܝܼ ܕܐܝܼܬ ܐܲܠܵܗܹ̈ܐ ܪܵܒܵܐ ܘܡܵܪ̈ܵܘܵܬܹ‌ܐ ܪܵܒܵܐ،

⁶ ܐܝܼܢܵܐ ܐܸܠܲܢ ܐܝܼܬ ܐܲܚܟ̰ܝܼ ܚܲܕ ܐܲܠܵܗܵܐ، ܒܵܒܵܐ، ܗ̇ܘ ܕܟܠ ܡܸܢܕܝܼ ܡ̣ܢ ܠܟܸܣܠܹܗ ܝܠܹܗ، ܗ̇ܘ ܕܐܸܠܹܗ ܒܸܚܵܝܵܐ ܝܘܲܚ. ܘܐܝܼܬ ܐܲܚܟ̰ܝܼ ܚܲܕ ܡܵܪܝܵܐ، ܝܼܫܘܿܥ ܡܫܝܼܚܵܐ، ܕܟܠ ܡܸܢܕܝܼ ܒܝܼܹܗ ܝܠܹܗ، ܘܐܲܚܢܲܢ ܕܝܼܹܗ ܝܘܲܚ.

⁷ ܐܝܼܢܵܐ ܟܠ ܚܲܕ ܠܹܐ ܝܵܕܹܥ ܐܵܗܵܐ. ܚܲܕܟܡܵܐ ܗܲܠ ܐܵܕܝܼܵܐ ܝܠܝܼܦܹܐ ܝܢܵܐ ܠܨܵܢܲܡܹ̈ܐ، ܘܐܝܼܡܲܢ ܕܟܹܐ ܐܵܟ݂ܠܝܼ ܗܵܕܟ݂ܵܐ ܡܹܐܟ݂ܘܼܠܬܵ‌ܐ ܟܹܐ ܚܵܫܒ݂ܝܼ ܕܗ̇ܘ ܕܸܒ݂ܚܵܐ ܦܝܼܫܵܐ ܝܗܘܵܐ ܡܘܼܩܪܸܒ݂ܵܐ ܠܨܵܢܲܡ. ܘܣܵܒܵܒ ܐܸܢܝܲܬܵܝܗ‌ܝ ܙܲܒܘܼܢ ܝܼܠܵܗ̇، ܛܲܡܐܘܼܬܵ‌ܐ ܝܠܵܗ̇ ܐܸܠܵܝܗ‌ܝ.

⁸ ܡܹܐܟ݂ܘܼܠܬܵ‌ܐ ܠܹܐ ܩܲܪܒܸܢܵܐ ܠܲܢ ܠܐܲܠܵܗܵܐ. ܐܸܢ ܠܵܐ ܐܵܟ݂ܠܲܚ ܠܹܐ ܝܘܲܚ ܒܘܼܫ ܚܸܪܒܵܐ، ܘܐܸܢ ܐܵܟ݂ܠܲܚ ܠܹܐ ܝܘܲܚ ܒܘܼܫ ܨܦܵܝܝܼ.

⁹ ܐܝܼܢܵܐ ܗܘܹܝܡܘܼܢ ܗܸܫܝܲܪ ܕܠܵܐ ܗܵܘܝܵܐ ܚܹܐܪܘܼܬܵܘܟ݂ܘܿܢ ܟܹܐܦܵܐ ܕܬܘܼܪܩܵܠܵܐ ܠܙܲܒܘܼܢܹ̈ܐ.

¹⁰ ܣܵܒܵܒ ܐܸܢ ܚܲܕ ܙܲܒܘܼܢ ܒܐܸܢܝܲܬܹܗ ܚܵܙܹܐ ܠܵܘܟ݂ܘܿܢ، ܐܲܚܬܘܿܢ ܕܐܝܼܬ ܠܵܘܟ݂ܘܿܢ ܐܵܗܵܐ ܝܕܵܥܬܵ‌ܐ، ܕܒܹܐܟ݂ܵܠܵܐ ܝܬܘܿܢ ܓܵܘ ܗܲܝܟܠܵܐ ܕܨܵܢܲܡܹ̈ܐ، ܠܹܐ ܒܘܼܫ ܙܵܘܕܵܐ ܦܵܐܹܫ ܚܘܼܠܸܢܵܐ ܕܐܵܟܹܠ ܕܸܒ݂ܚܵܐ ܡܘܼܩܪܸܒ݂ܵܐ ܠܨܵܢܲܡܹ̈ܐ؟

¹¹ ܗܵܕܟ݂ܵܐ ܐܵܗܵܐ ܐܲܚܘܿܢܵܐ، ܕܒܘܼܬ ܕܝܼܹܗ ܡܝܼܬ ܠܹܗ ܡܫܝܼܚܵܐ، ܒܸܛܠܵܩܵܐ ܝܠܹܗ ܒܝܕܵܥܬܘܼܟ݂.

¹² ܘܐܝܼܡܲܢ ܕܚܵܛܹܝܬ ܥܲܠ ܐܲܚܘܿܢܘܼܟ݂ ܒܐܵܗܵܐ ܐܘܼܪܚܵܐ، ܘܕܲܪܒܸܢܸܬ ܐܸܢܝܲܬܹܗ ܙܲܒܘܼܢ، ܒܸܚܛܵܝܵܐ ܝܘܸܬ ܥܲܠ ܡܫܝܼܚܵܐ.

¹³ ܒܘܼܬ ܐܵܗܵܐ، ܐܸܢ ܡܹܐܟ݂ܘܼܠܬܵ‌ܐ ܕܐܵܟ݂ܠܹܢܵܗ̇ ܒܸܬ ܗܵܘܝܵܐ ܬܲܪܩܲܠܬܵ‌ܐ ܠܐܲܚܘܿܢܝܼ، ܠܹܐ ܐܵܟ݂ܠܹܢ ܒܸܣܪܵܐ ܗܲܠ ܥܵܠܲܡ، ܕܠܵܐ ܬܲܪܩܸܠ ܐܲܚܘܿܢܝܼ.