ܐ ܩܘܪ̈ܢܬܝܐ 2 - ܕܝܬܩܐ ܚܕܬܐ ܕܡܪܢ ܝܫܘܥ ܡܫܝܚܐ ܘܡܙܡܘܪ̈ܐ ܒܠܫܢܐ ܐܬܘܪܝܐ

ܡܟܪܘܙܐ ܡܫܝܚܐ ܡܚܝܐ ܠܙܩܝܦܐ

¹ ܐܲܚܘܿܢܘܵܬ‌ܝܼ̈، ܐܝܼܡܲܢ ܕܐܬܹ‌ܐ ܠܝܼ ܠܟܸܣܠܵܘܟ݂ܘܿܢ ܡܲܟܪܘܼܙܹܐ ܐܸܠܵܘܟ݂ܘܿܢ ܐܪܵܙܵܐ ܕܐܲܠܵܗܵܐ، ܠܵܐ ܐܬܹ‌ܐ ܠܝܼ ܒܡܲܡܠܠܵܐ ܓܘܼܪܵܐ ܘܠܵܐ ܒܚܸܟ݂ܡܬܵ‌ܐ ܓܘܼܪܬܵ‌ܐ،

² ܣܵܒܵܒ ܩܛܝܼܥ ܠܝܼ ܒܚܝܼܵܠܝܼ، ܟܲܕ ܐܵܢܵܐ ܥܲܡܵܘܟ݂ܘܿܢ ܕܠܹܐ ܝܵܕܥܹܢ ܡܸܢܕܝܼ ܫܒ݂ܘܿܩ ܡ̣ܢ ܝܼܫܘܿܥ ܡܫܝܼܚܵܐ، ܘܐܸܠܹܗ ܡܸܚܝܵܐ ܠܙܩܝܼܦܵܐ.

³ ܗܘܹܐ ܠܝܼ ܠܟܸܣܠܵܘܟ݂ܘܿܢ ܒܙܲܒܘܼܢܘܼܬܵ‌ܐ، ܘܒܙܕܘܼܥܬܵ‌ܐ ܘܒܪܲܬܪܲܬܬܵ‌ܐ ܓܘܼܪܬܵ‌ܐ.

⁴ ܘܗܹܡܸܙܡܵܢܝܼ̈ ܘܟܵܪܘܿܙܘܼܬ‌ܝܼ ܠܹܐ ܝܗܘܵܘ ܠܡܲܨܒ݂ܘܼܥܹܐ ܐܸܠܵܘܟ݂ܘܿܢ ܒܚܸܟ݂ܡܬܵ‌ܐ، ܐܝܼܢܵܐ ܒܡܲܚܙܲܝܬܵ‌ܐ ܕܪܘܼܚܵܐ ܘܕܚܲܝܠܵܐ،

⁵ ܩܵܐ ܕܗܲܝܡܵܢܘܼܬܵܘܟ݂ܘܿܢ ܠܵܐ ܗܵܘܝܵܐ ܒܢܝܼܬܵ‌ܐ ܥܲܠ ܚܸܟ݂ܡܬܵ‌ܐ ܕܒܢܲܝ̈ܢܵܫܵܐ، ܐܸܠܵܐ ܥܲܠ ܚܲܝܠܵܐ ܕܐܲܠܵܗܵܐ.

ܓܠܝܢܐ ܒܝܕ ܪܘܚܐ ܕܐܠܗܐ

⁶ ܟܹܐ ܗܲܡܙܸܡܲܚ ܗܹܡܸܙܡܵܢܹ̈ܐ ܕܚܸܟ݂ܡܬܵ‌ܐ ܒܹܝܠ ܓܡܝܼܪܹ̈ܐ، ܐܝܼܢܵܐ ܠܵܐ ܚܸܟ݂ܡܬܵ‌ܐ ܕܐܵܗܵܐ ܙܲܒ݂ܢܵܐ ܘܠܵܐ ܕܓܘܼܪ̈ܵܢܹܐ ܕܐܵܗܵܐ ܙܲܒ݂ܢܵܐ، ܐܵܢܝܼ ܕܦܝܵܫܵܐ ܝܢܵܐ ܒܘܼܛܠܹܐ.

⁷ ܐܝܼܢܵܐ ܟܹܐ ܗܲܡܙܸܡܲܚ ܚܸܟ݂ܡܬܵ‌ܐ ܕܐܲܠܵܗܵܐ ܒܐܪܵܙܵܐ، ܗ̇ܝ ܕܝܼܗܘܵܐ ܡܘܼܟܸܣܬܵ‌ܐ، ܗ̇ܝ ܕܐܲܠܵܗܵܐ ܦܪܝܼܫܵܐ ܠܹܗ ܡ̣ܢ ܩܲܕܡ ܫܘܼܪܵܝܵܐ ܕܙܲܒ݂ܢܵܐ ܠܚܸܩܪܵܐ ܕܝܼܲܢ،

⁸ ܗ̇ܝ ܕܐܘܼܦ ܚܲܕ ܡ̣ܢ ܓܘܼܪ̈ܵܢܹܐ ܕܐܵܗܵܐ ܙܲܒ݂ܢܵܐ ܠܵܐ ܝܕܝܼܥܵܐ ܠܹܗ. ܐܸܢ ܗܵܘܝܼ ܗܘܵܘ ܝܕܝܼܥܘܼܗ̇، ܠܹܐ ܙܵܩܦܝܼ ܗܘܵܘ ܠܡܵܪܵܐ ܕܬܸܫܒܘܿܚܬܵ‌ܐ.

⁹ ܐܲܝܟ݂ ܕܝܼܠܹܗ ܟܬܝܼܒ݂ܵܐ: ܥܲܝܢܵܐ ܠܹܐ ܝܠܵܗ̇ ܚܙܝܼܬܵ‌ܐ، ܘܢܵܬܵ‌ܐ ܠܹܐ ܝܠܵܗ̇ ܫܡܝܼܥܬܵ‌ܐ، ܘܓܵܘ ܗܵܘܢܵܐ ܕܒܲܪܢܵܫܵܐ ܠܹܐ ܝܢܵܐ ܥܒ݂ܝܼܪܹܐ، ܡܸܢܕܝܼܵܢܹ̈ܐ ܕܐܲܠܵܗܵܐ ܗܘܼܕܪܵܝ ܠܹܗ ܠܐܵܢܝܼ ܕܡܲܚܸܒܝܼ ܠܹܗ.

¹⁰ ܐܝܼܢܵܐ ܐܲܠܵܗܵܐ ܓܸܠܝܵܝ ܠܹܗ ܐܸܠܲܢ ܒܝܲܕ ܪܘܼܚܹܗ، ܣܵܒܵܒ ܪܘܼܚܵܐ ܠܟܠ ܡܸܢܕܝܼ ܟܹܐ ܨܲܚܨܹܐ، ܐܘܼܦ ܠܡܸܢܕܝܼܵܢܹ̈ܐ ܥܲܡܘܼܩܹ̈ܐ ܕܐܲܠܵܗܵܐ.

¹¹ ܣܵܒܵܒ ܡܵܢܝܼ ܡ̣ܢ ܒܢܲܝ̈ܢܵܫܵܐ ܟܹܐ ܝܵܕܹܥ ܪܸ̈ܥܝܵܢܹܐ ܕܐܢܵܫܵܐ ܫܒ݂ܘܿܩ ܡ̣ܢ ܪܘܼܚܵܐ ܕܐܢܵܫܵܐ ܕܝܼܠܵܗ̇ ܓܵܘܹܗ؟ ܗܵܕܟ݂ܵܐ ܐܘܼܦ ܚܲܕ ܠܹܐ ܝܵܕܹܥ ܪܸ̈ܥܝܵܢܹܐ ܕܐܲܠܵܗܵܐ ܫܒ݂ܘܿܩ ܡ̣ܢ ܪܘܼܚܵܐ ܕܐܲܠܵܗܵܐ.

¹² ܐܝܼܢܵܐ ܐܲܚܢܲܢ ܠܵܐ ܩܘܼܒܸܠ ܠܲܢ ܪܘܼܚܵܐ ܕܐܵܗܵܐ ܕܘܼܢܝܹܐ ܐܸܠܵܐ ܪܘܼܚܵܐ ܕܡ̣ܢ ܐܲܠܵܗܵܐ، ܩܵܐ ܕܝܵܕܥܲܚ ܠܡܵܘܗܒ݂ܵܬܹ̈‌ܐ ܕܐܲܠܵܗܵܐ ܝܘܼܗܒ݂ܵܝ ܠܹܗ ܐܸܠܲܢ.

¹³ ܘܐܘܼܦ ܐܲܚܢܲܢ ܟܹܐ ܗܲܡܙܸܡܲܚ ܒܘܼܬ ܐܵܢܝܼ ܡܸܢܕܝܼܵܢܹ̈ܐ، ܠܵܐ ܒܗܹܡܸܙܡܵܢܹ̈ܐ ܡܘܼܠܦܹܐ ܐܸܠܲܢ ܒܝܲܕ ܚܸܟ݂ܡܬܵ‌ܐ ܕܒܲܪܢܵܫܵܐ، ܐܸܠܵܐ ܒܗܹܡܸܙܡܵܢܹ̈ܐ ܡܘܼܠܦܹܐ ܒܝܲܕ ܪܘܼܚܵܐ، ܘܗܵܕܟ݂ܵܐ ܦܲܫܩܲܚ ܫܪܵܪܵܐ ܪܘܼܚܵܢܵܝܵܐ ܒܝܲܕ ܚܲܒܪܹ̈ܐ ܪ̈ܘܼܚܵܢܵܝܹܐ.

¹⁴ ܐܢܵܫܵܐ ܕܠܵܐ ܦܲܪܡܲܝܬܵ‌ܐ ܪܘܼܚܵܢܵܝܬܵ‌ܐ ܠܹܐ ܡܵܨܹܐ ܩܲܒܸܠ ܡܸܢܕܝܼܵܢܹ̈ܐ ܕܟܹܐ ܐܵܬ‌ܝܼ ܡ̣ܢ ܪܘܼܚܵܐ ܕܐܲܠܵܗܵܐ، ܣܵܒܵܒ ܣܲܟ݂ܠܘܼܬܵ‌ܐ ܝܢܵܐ ܠܟܸܣܠܹܗ، ܘܠܹܐ ܡܵܨܹܐ ܦܲܪܡܹܐ ܠܗܘܿܢ ܣܵܒܵܒ ܒܪܘܼܚܵܐ ܟܹܐ ܦܵܝܫܝܼ ܕܝܼܢܹܐ.

¹⁵ ܐܢܵܫܵܐ ܪܘܼܚܵܢܵܝܵܐ ܟܹܐ ܕܵܐܹܢ ܟܠܵܝܗ‌ܝ ܡܸܢܕܝܼܵܢܹ̈ܐ، ܐܝܼܢܵܐ ܒܓܵܢܹܗ ܠܹܐ ܝܠܹܗ ܬܚܘܿܬ ܕܝܵܢܬܵ‌ܐ ܕܐܘܼܦ ܚܲܕ.

¹⁶ ܣܵܒܵܒ ܡܵܢܝܼ ܟܹܐ ܝܵܕܹܥ ܪܸܥܝܵܢܵܐ ܕܡܵܪܝܵܐ ܩܵܐ ܕܡܲܠܸܦ ܠܹܗ؟ ܐܝܼܢܵܐ ܐܲܚܢܲܢ ܐܝܼܬ ܠܲܢ ܪܸܥܝܵܢܵܐ ܕܡܫܝܼܚܵܐ.