ܐ ܩܘܪ̈ܢܬܝܐ 15 - ܕܝܬܩܐ ܚܕܬܐ ܕܡܪܢ ܝܫܘܥ ܡܫܝܚܐ ܘܡܙܡܘܪ̈ܐ ܒܠܫܢܐ ܐܬܘܪܝܐܩܝܡܬܐ ܕܡܫܝܚܐ 1 ܐܵܕܝܼܵܐ ܐܲܚܘܿܢܘܵܬܝܼ̈، ܒܵܥܹܝܢ ܕܡܲܕܥܸܢܵܘܟ݂ܘܿܢ ܒܘܼܬ ܐܹܘܲܢܓܲܠܝܼܘܿܢ، ܗ̇ܘ ܕܡܘܼܟܪܸܙ ܠܝܼ ܐܸܠܵܘܟ݂ܘܿܢ ܘܕܐܲܚܬܘܿܢ ܩܘܼܒܸܠ ܠܵܘܟ݂ܘܿܢ ܘܐܵܕܝܼܵܐ ܟܸܠܝܹܐ ܝܬܘܿܢ ܒܝܼܹܗ، 2 ܘܒܝܼܹܗ ܦܝܼܫ ܠܵܘܟ݂ܘܿܢ ܦܪܝܼܩܹܐ ܐܸܢ ܕܵܒ݂ܩܝܼܬܘܿܢ ܒܗܹܡܸܙܡܵܢ ܕܡܘܼܟܪܸܙ ܠܝܼ ܐܸܠܵܘܟ݂ܘܿܢ. ܐܸܢ ܠܵܐ ܕܵܒ݂ܩܝܼܬܘܿܢ، ܒܵܣ ܣܪܝܼܩܵܐܝܼܬ ܗܘܼܡܸܢܵܘܟ݂ܘܿܢ. 3 ܣܵܒܵܒ ܣܘܼܦܹܐ ܠܝܼ ܐܸܠܵܘܟ݂ܘܿܢ ܡܸܢܕܝܼ ܒܘܼܫ ܐܵܢܲܢܩܵܝܵܐ ܕܩܘܼܒܸܠ ܠܝܼ، ܕܝܼܠܹܗ ܕܡܫܝܼܚܵܐ ܡܝܼܬ ܠܹܗ ܒܘܼܬ ܚܛܝܼܵܬܲܢ̈ ܕܵܐܟ݂ܝܼ ܕܟܬܝܼܒ݂ܵܐ ܝܠܹܗ. 4 ܘܦܝܼܫ ܠܹܗ ܩܒ݂ܝܼܪܵܐ، ܘܩܝܼܡ ܠܹܗ ܒܝܵܘܡܵܐ ܕܬܠܵܬܵܐ ܕܵܐܟ݂ܝܼ ܕܟܬܝܼܒ݂ܵܐ ܝܠܹܗ، 5 ܘܦܝܼܫ ܠܹܗ ܚܸܙܝܵܐ ܠܫܸܡܥܘܿܢ ܟܹܐܦܵܐ، ܘܗ̇ܝܓܵܗ ܠܬܪܸܥܣܲܪ ܬܲܠܡܝܼ̈ܕܹܐ. 6 ܡ̣ܢ ܒܵܬܪ ܡܸܢܵܝܗܝ ܦܝܼܫ ܠܹܗ ܚܸܙܝܵܐ ܠܙܵܘܕܵܐ ܡ̣ܢ ܚܲܡܸܫܡܵܐܐ ܐܲܚܘܿܢܘܵܬܹ̈ܐ ܒܚܕܵܐ ܓܵܗܵܐ، ܣܵܗܡܵܐ ܙܵܘܕܵܐ ܡܸܢܵܝܗܝ ܚܵܝܹܐ ܝܢܵܐ ܘܚܲܕܟܡܵܐ ܡܸܢܵܝܗܝ ܕܡܝܼܟܹܐ ܝܢܵܐ. 7 ܗ̇ܝܓܵܗ ܦܝܼܫ ܠܹܗ ܚܸܙܝܵܐ ܠܝܲܥܩܘܿܒ݂، ܘܡ̣ܢ ܒܵܬܪ ܡܸܢܹܗ ܠܟܠܵܝܗܝ ܫܠܝܼܚܹ̈ܐ. 8 ܒܚܲܪܬܵܐ ܕܟܠܵܝܗܝ، ܐܲܝܟ݂ ܕܠܡܘܼܪܚܸܫܵܐ، ܦܝܼܫ ܠܹܗ ܚܸܙܝܵܐ ܐܘܼܦ ܐܸܠܝܼ. 9 ܣܵܒܵܒ ܐܵܢܵܐ ܒܘܼܫ ܒܵܨܘܿܪܵܐ ܝܘܸܢ ܓܵܘ ܫܠܝܼܚܹ̈ܐ، ܘܠܹܐ ܚܵܫܚܹܢ ܕܦܵܝܫܹܢ ܩܸܪܝܵܐ ܫܠܝܼܚܵܐ، ܣܵܒܵܒ ܟܘܼܡܸܪܝܼ ܠܥܹܕܬܵܐ ܕܐܲܠܵܗܵܐ. 10 ܐܝܼܢܵܐ ܒܫܵܦܵܩܲܬ ܕܐܲܠܵܗܵܐ ܝܼܘܸܢ ܡܸܢܕܝܼ ܕܝܼܘܸܢ، ܘܫܵܦܵܩܲܬܹܗ ܒܝܼܝܼ ܠܵܐ ܗܘܹܐ ܠܵܗ̇ ܒܲܛܝܼܠܬܵܐ. ܣܵܒܵܒ ܦܠܝܼܚ ܠܝܼ ܒܘܼܫ ܩܸܫܝܵܐ ܡ̣ܢ ܟܠܵܝܗܝ؛ ܠܵܐ ܐܵܢܵܐ ܐܸܠܵܐ ܫܵܦܵܩܲܬ ܕܐܲܠܵܗܵܐ ܕܒܝܼܝܼ ܝܠܵܗ̇. 11 ܒܵܣ ܐܸܢ ܐܵܢܵܐ ܝܲܢ ܐܵܢܝܼ، ܗܵܕܟ݂ܵܐ ܡܲܟܪܘܼܙܹܐ ܝܘܲܚ ܘܗܵܕܟ݂ܵܐ ܗܘܼܡܸܢܵܘܟ݂ܘܿܢ. ܩܝܡܬܐ ܡ̣ܢ ܡܝ̈ܬܐ 12 ܘܐܸܢ ܡܫܝܼܚܵܐ ܦܝܵܫܵܐ ܝܠܹܗ ܡܘܼܟܪܸܙܵܐ ܕܩܝܼܡ ܠܹܗ ܡ̣ܢ ܓܵܘ ܡܝܼ̈ܬܹܐ، ܕܵܐܟ݂ܝܼ ܐܢܵܫܹ̈ܐ ܓܵܘܵܘܟ݂ܘܿܢ ܒܹܐܡܵܪܵܐ ܝܢܵܐ ܕܠܲܝܬ ܩܝܵܡܬܵܐ ܕܡܝܼ̈ܬܹܐ؟ 13 ܐܸܢ ܠܲܝܬ ܩܝܵܡܬܵܐ ܕܡܝܼ̈ܬܹܐ، ܒܵܣ ܐܘܼܦ ܡܫܝܼܚܵܐ ܠܹܐ ܝܠܹܗ ܩܝܼܡܵܐ ܡ̣ܢ ܓܵܘ ܡܝܼ̈ܬܹܐ. 14 ܘܐܸܢ ܡܫܝܼܚܵܐ ܠܹܐ ܝܠܹܗ ܩܝܼܡܵܐ، ܒܲܛܝܼܠܬܵܐ ܝܠܵܗ̇ ܟܵܪܘܿܙܘܼܬܲܢ ܘܒܲܛܝܼܠܬܵܐ ܝܠܵܗ̇ ܐܘܼܦ ܗܲܝܡܵܢܘܼܬܵܘܟ݂ܘܿܢ، 15 ܘܐܲܚܢܲܢ ܒܹܗܘܵܝܵܐ ܝܘܲܚ ܣܵܗܕܹ̈ܐ ܕܲܓܵܠܹ̈ܐ ܕܐܲܠܵܗܵܐ، ܣܵܒܵܒ ܣܗܝܼܕ ܠܲܢ ܕܐܲܠܵܗܵܐ ܡܘܼܩܸܡ ܠܹܗ ܠܡܫܝܼܚܵܐ ܡ̣ܢ ܡܝܼ̈ܬܹܐ. ܐܝܼܢܵܐ ܠܵܐ ܡܘܼܩܸܡ ܠܹܗ ܐܸܢ ܡܝܼ̈ܬܹܐ ܠܹܐ ܩܵܝܡܝܼ. 16 ܣܵܒܵܒ ܐܸܢ ܡܝܼ̈ܬܹܐ ܠܹܐ ܩܵܝܡܝܼ، ܒܵܣ ܐܘܼܦ ܡܫܝܼܚܵܐ ܠܹܐ ܝܠܹܗ ܩܝܼܡܵܐ، 17 ܘܐܸܢ ܡܫܝܼܚܵܐ ܠܹܐ ܝܠܹܗ ܩܝܼܡܵܐ، ܗܲܝܡܵܢܘܼܬܵܘܟ݂ܘܿܢ ܒܲܛܝܼܠܬܵܐ ܝܠܵܗ̇، ܘܗܸܫ ܐܲܚܬܘܿܢ ܓܵܘ ܚܛܝܼܵܬܵܘ̈ܟ݂ܘܿܢ ܝܼܬܘܿܢ، 18 ܘܐܵܢܝܼ ܕܕܡܝܼܟܹܐ ܝܢܵܐ ܒܡܫܝܼܚܵܐ ܛܠܝܼܩܹܐ ܝܢܵܐ. 19 ܐܸܢ ܐܲܚܟ̰ܝܼ ܒܐܲܢܹܐ ܚܲܝܹ̈ܐ ܐܝܼܬ ܠܲܢ ܗܹܒ݂ܝܼ ܒܡܫܝܼܚܵܐ، ܐܲܚܢܲܢ ܒܘܼܫ ܫܲܩܝܼ ܝܘܲܚ ܡ̣ܢ ܟܠܵܝܗܝ ܐܢܵܫܹ̈ܐ. 20 ܐܝܼܢܵܐ ܐܵܕܝܼܵܐ ܡܫܝܼܚܵܐ ܩܝܼܡܵܐ ܝܠܹܗ ܡ̣ܢ ܓܵܘ ܡܝܼ̈ܬܹܐ ܘܗܘܹܐ ܠܹܗ ܛܥܘܼܢܬܵܐ ܩܲܕܡܵܝܬܵܐ ܕܐܵܢܝܼ ܕܕܡܝܼܟܹܐ ܝܢܵܐ. 21 ܣܵܒܵܒ ܕܵܐܟ݂ܝܼ ܕܡܵܘܬܵܐ ܐܬܹܐ ܠܹܗ ܒܝܲܕ ܚܲܕ ܐܢܵܫܵܐ، ܗܵܕܟ݂ܵܐ ܗܘܹܐ ܠܵܗ̇ ܩܝܵܡܬܵܐ ܕܡܝܼ̈ܬܹܐ ܒܝܲܕ ܚܲܕ ܐܢܵܫܵܐ. 22 ܣܵܒܵܒ ܕܵܐܟ݂ܝܼ ܕܒܐܵܕܵܡ ܟܠܵܝܗܝ ܟܹܐ ܡܵܝܬܝܼ، ܗܵܕܟ݂ܵܐ ܒܡܫܝܼܚܵܐ ܟܠܵܝܗܝ ܒܸܬ ܦܵܝܫܝܼ ܡܘܼܚܝܼܹܐ. 23 ܐܝܼܢܵܐ ܟܠ ܚܲܕ ܒܪܹܐܙܵܐ ܕܓܵܢܹܗ، ܡܫܝܼܚܵܐ ܛܥܘܼܢܬܵܐ ܩܲܕܡܵܝܬܵܐ، ܗ̇ܝܓܵܗ ܐܵܢܝܼ ܕܝܼܢܵܐ ܕܡܫܝܼܚܵܐ ܐܝܼܡܲܢ ܕܐܵܬܹܐ. 24 ܗ̇ܝܓܵܗ ܒܸܬ ܗܵܘܹܐ ܚܘܼܬܵܡܵܐ، ܐܝܼܡܲܢ ܕܣܲܦܹܐ ܡܲܠܟܘܼܬܵܐ ܠܐܲܠܵܗܵܐ ܒܵܒܵܐ، ܡ̣ܢ ܒܵܬܪ ܕܒܲܛܸܠ ܟܠ ܪܹܝܫܵܢܘܼܬܵܐ ܘܟܠ ܫܘܼܠܛܵܢܵܐ ܘܟܠ ܚܲܝܠܵܐ. 25 ܣܵܒܵܒ ܘܵܠܹܐ ܝܠܵܗ̇ ܕܗܲܟܸܡ ܗܲܠ ܕܡܲܬܸܒ݂ ܟܠܵܝܗܝ ܕܸܫ̃ܡܸܢܘܼ̈ܗܝ ܬܚܘܿܬ ܐܲܩܠܵܬܘܼ̈ܗܝ. 26 ܗ̇ܘ ܕܸܫ̃ܡܸܢ ܐܚܵܪܵܝܵܐ ܕܒܸܬ ܦܵܐܹܫ ܒܘܼܛܠܵܐ ܡܵܘܬܵܐ ܝܠܹܗ. 27 ܣܵܒܵܒ ܡܘܼܬܸܒ݂ ܠܹܗ ܟܠ ܡܸܢܕܝܼ ܬܚܘܿܬ ܐܲܩܠܵܬܘܼ̈ܗܝ. ܐܝܼܢܵܐ ܐܝܼܡܲܢ ܕܐܡܝܼܪܹܗ: ”ܟܠ ܡܸܢܕܝܼ ܦܝܼܫ ܠܹܗ ܡܘܼܬܒ݂ܵܐ ܬܚܘܿܬ ܐܲܩܠܵܬܘܼ̈ܗܝ،“ܕܠܵܐ ܫܸܟ ܠܹܐ ܝܠܹܗ ܒܸܚܒ݂ܵܫܵܐ ܐܲܠܵܗܵܐ ܠܓܵܢܹܗ ܒܟܠ ܡܸܢܕܝܼ ܕܡܘܼܬܸܒ݂ ܠܹܗ ܬܚܘܿܬ ܐܲܩܠܵܬܹ̈ܐ ܕܡܫܝܼܚܵܐ. 28 ܐܝܼܡܲܢ ܕܟܠܵܝܗܝ ܡܸܢܕܝܼܵܢܹ̈ܐ ܦܵܝܫܝܼ ܥܒ݂ܝܼܕܹܐ ܙܲܒܛ ܐܸܠܹܗ، ܗ̇ܝܓܵܗ ܒܪܘܿܢܵܐ ܒܓܵܢܹܗ ܒܸܬ ܦܵܐܹܫ ܥܒ݂ܝܼܕܵܐ ܙܲܒܛ ܠܗ̇ܘ ܕܡܘܼܬܸܒ݂ ܠܹܗ ܟܠ ܡܸܢܕܝܼ ܬܚܘܿܬ ܐܲܩܠܵܬܘܼ̈ܗܝ، ܕܗܵܘܹܐ ܐܲܠܵܗܵܐ ܟܠ ܒܟܠ. 29 ܐܸܢ ܠܲܝܬ ܩܝܵܡܬܵܐ، ܡܘܼܕܝܼ ܒܸܬ ܥܵܒ݂ܕܝܼ ܐܵܢܝܼ ܕܒܸܦܝܵܫܵܐ ܥܡܝܼܕܹܐ ܡ̣ܢ ܓܹܒܵܐ ܕܡܝܼ̈ܬܹܐ؟ ܐܸܢ ܡܝܼ̈ܬܹܐ ܗܲܪ ܠܹܐ ܩܵܝܡܝܼ، ܩܵܡܘܿܕܝܼ ܝܢܵܐ ܒܸܥܡܵܕܵܐ ܡ̣ܢ ܓܹܒܵܝܗܝ؟ 30 ܘܩܵܡܘܿܕܝܼ ܐܲܚܢܲܢ ܡܲܬܒܲܚ ܠܵܗ̇ ܓܵܢܲܢ ܓܵܘ ܩܹܘܲܢܕܹܢܘܿܣ ܟܠ ܣܵܥܲܬ؟ 31 ܫܲܪܝܼܪܵܐܝܼܬ، ܐܲܚܘܿܢܘܵܬܝܼ̈، ܗܲܪ ܐܲܝܟ݂ ܕܝܼܘܸܢ ܒܸܥܒ݂ܵܕܵܐ ܫܘܼܒ݂ܗܵܪܵܐ ܒܝܼܵܘܟ݂ܘܿܢ ܒܝܼܫܘܿܥ ܡܫܝܼܚܵܐ ܡܵܪܲܢ، ܟܠ ܝܘܿܡ ܒܸܡܝܵܬܵܐ ܝܘܸܢ. 32 ܐܸܢ ܐܲܝܟ݂ ܒܲܪܢܵܫܵܐ ܦܠܝܼܫ ܠܝܼ ܥܲܡ ܗܲܝܘܵܢܹ̈ܐ ܟܹܘܝܼܹ̈ܐ ܓܵܘ ܐܵܦܸܣܘܿܣ، ܡܘܼܕܝܼ ܝܘܼܬܪܵܢܵܐ ܐܝܼܬ ܠܝܼ ܐܸܢ ܡܝܼ̈ܬܹܐ ܠܹܐ ܩܵܝܡܝܼ؟ ܐܵܟ݂ܠܲܚ ܘܫܵܬܲܚ، ܣܵܒܵܒ ܩܲܝܕܵܡܬܵܐ ܒܸܬ ܡܵܝܬܲܚ. 33 ܠܵܐ ܦܵܝܫܝܼܬܘܿܢ ܡܘܼܚܠܸܛܹܐ، ܫܵܘܬܵܦܘܼܬܵܐ ܣܪܝܼܬܵܐ ܟܹܐ ܡܲܚܪܸܒ݂ܵܐ ܕܘܼܒܵܪܹ̈ܐ ܫܲܦܝܼܪܹ̈ܐ. 34 ܬܥܘܿܪܘܼܢ ܠܙܲܕܝܼܩܘܼܬܵܐ، ܘܫܠܹܝܡܘܼܢ ܡ̣ܢ ܚܛܝܼܬܵܐ، ܣܵܒܵܒ ܐܝܼܬ ܐܢܵܫܹ̈ܐ ܕܠܲܝܬ ܒܝܼܵܝܗܝ ܝܕܵܥܬܵܐ ܕܐܲܠܵܗܵܐ. ܒܹܐܡܵܪܵܐ ܝܘܸܢ ܐܵܗܵܐ ܠܡܲܢܟ݂ܘܼܦܵܘܟ݂ܘܿܢ. ܦܓ݂ܪܐ ܕܩܝܡܬܐ 35 ܩܵܘܡܵܐ ܚܲܕ ܒܲܩܸܪ: ”ܕܵܐܟ݂ܝܼ ܒܸܬ ܩܵܝܡܝܼ ܡܝܼ̈ܬܹܐ؟ ܒܡܘܼܕܝܼ ܦܲܓ݂ܪܵܐ ܒܸܬ ܩܵܝܡܝܼ؟“ 36 ܝܵܐ ܣܲܟ݂ܠܵܐ، ܡܸܢܕܝܼ ܕܙܵܪܥܹܬ ܠܹܐ ܚܵܝܹܐ ܐܸܢ ܠܵܐ ܡܵܐܹܬ. 37 ܡܸܢܕܝܼ ܕܒܸܙܪܵܥܵܐ ܝܘܸܬ ܠܹܐ ܝܠܹܗ ܗ̇ܘ ܦܲܓ݂ܪܵܐ ܕܒܸܬ ܗܵܘܹܐ، ܐܸܠܵܐ ܕܲܢܕܸܟܬܵܐ ܫܘܼܠܚܵܝܬܵܐ، ܩܵܘܡܵܐ ܕܚܸܛܹ̈ܐ ܝܲܢ ܒܲܪܙܲܪܥܵܐ ܐܚܹܪܢܵܐ. 38 ܐܝܼܢܵܐ ܐܲܠܵܗܵܐ ܟܹܐ ܝܵܗܒܹܠ ܠܹܗ ܦܲܓ݂ܪܵܐ ܐܲܝܟ݂ ܕܒܵܣܡܵܐ ܠܹܗ. ܠܟܠ ܚܲܕ ܫܸܟܠܵܐ ܕܒܲܪܙܲܪܥܵܐ ܟܹܐ ܝܵܗܒܹܠ ܦܲܓ݂ܪܵܐ ܕܓܵܢܹܗ. 39 ܟܠ ܒܸܣܪܵܐ ܠܹܐ ܝܠܹܗ ܚܲܕ ܬܸܓ݂ܡܵܐ ܕܒܸܣܪܵܐ. ܐܝܼܬ ܒܸܣܪܵܐ ܕܐܢܵܫܹ̈ܐ، ܐܝܼܬ ܒܸܣܪܵܐ ܕܗܲܝܘܵܢܹ̈ܐ، ܐܝܼܬ ܒܸܣܪܵܐ ܕܛܲܝܪܹ̈ܐ ܘܐܝܼܬ ܒܸܣܪܵܐ ܕܢܘܼܢܹ̈ܐ. 40 ܐܝܼܬ ܦܲܓ݂ܪܹ̈ܐ ܫܡܲܝܵܢܵܝܹ̈ܐ ܘܐܝܼܬ ܦܲܓ݂ܪܹ̈ܐ ܐܲܪ̈ܥܵܢܵܝܹܐ، ܐܝܼܢܵܐ ܚܸܩܪܵܐ ܕܦܲܓ݂ܪܵܐ ܫܡܲܝܵܢܵܝܵܐ ܚܲܕ ܡܸܢܕܝܼ ܝܠܹܗ ܘܚܸܩܪܵܐ ܕܦܲܓ݂ܪܵܐ ܐܲܪܥܵܢܵܝܵܐ ܚܲܕ ܡܸܢܕܝܼ ܐܚܹܪܢܵܐ. 41 ܐܝܼܬ ܚܸܩܪܵܐ ܕܫܸܡܫܵܐ ܘܐܝܼܬ ܚܸܩܪܵܐ ܕܣܲܗܪܵܐ. ܐܝܼܬ ܚܸܩܪܵܐ ܕܟܵܘܟ݂ܒܹ̈ܐ، ܘܟܵܘܟ݂ܒ݂ܵܐ ܡ̣ܢ ܟܵܘܟ݂ܒ݂ܵܐ ܦܪܝܼܫܵܐ ܝܠܹܗ ܒܚܸܩܪܵܐ. 42 ܗܵܕܟ݂ܵܐ ܒܸܬ ܗܵܘܝܵܐ ܐܘܼܦ ܩܝܵܡܬܵܐ ܕܡܝܼ̈ܬܹܐ. ܦܲܓ݂ܪܵܐ ܕܦܝܵܫܵܐ ܝܠܹܗ ܙܪܝܼܥܵܐ ܚܵܪܒ݂ܵܢܵܐ ܝܠܹܗ، ܒܸܬ ܦܵܐܹܫ ܡܘܼܩܸܡܵܐ ܕܠܵܐ ܚܪܵܒ݂ܵܐ. 43 ܟܹܐ ܦܵܐܹܫ ܙܪܝܼܥܵܐ ܒܢܟܸܦܬܵܐ، ܟܹܐ ܦܵܐܹܫ ܡܘܼܩܸܡܵܐ ܒܚܸܩܪܵܐ، ܟܹܐ ܦܵܐܹܫ ܙܪܝܼܥܵܐ ܒܙܲܒܘܼܢܘܼܬܵܐ، ܘܟܹܐ ܦܵܐܹܫ ܡܘܼܩܸܡܵܐ ܒܚܲܝܠܵܐ. 44 ܟܹܐ ܦܵܐܹܫ ܙܪܝܼܥܵܐ ܦܲܓ݂ܪܵܐ ܟܝܵܢܵܝܵܐ، ܟܹܐ ܦܵܐܹܫ ܡܘܼܩܸܡܵܐ ܦܲܓ݂ܪܵܐ ܪܘܼܚܵܢܵܝܵܐ. ܐܸܢ ܐܝܼܬ ܦܲܓ݂ܪܵܐ ܟܝܵܢܵܝܵܐ، ܐܝܼܬ ܐܘܼܦ ܦܲܓ݂ܪܵܐ ܪܘܼܚܵܢܵܝܵܐ. 45 ܐܲܝܟ݂ ܕܝܼܠܹܗ ܟܬܝܼܒ݂ܵܐ: ”ܐܵܕܵܡ، ܒܲܪܢܵܫܵܐ ܩܲܕܡܵܝܵܐ، ܗܘܹܐ ܠܹܗ ܓܵܢܵܐ ܚܵܝܬܵܐ،“ܘܐܵܕܵܡ ܐܚܵܪܵܝܵܐ ܪܘܼܚܵܐ ܡܲܚܝܼܵܢܵܐ. 46 ܐܝܼܢܵܐ ܪܘܼܚܵܢܵܝܵܐ ܠܵܐ ܐܬܹܐ ܠܹܗ ܩܲܕܡܵܝܬܵܐ، ܐܸܠܵܐ ܢܲܦ̮ܫܵܢܵܝܵܐ، ܘܗ̇ܝܓܵܗ ܪܘܼܚܵܢܵܝܵܐ. 47 ܒܲܪܢܵܫܵܐ ܩܲܕܡܵܝܵܐ ܡ̣ܢ ܐܲܪܥܵܐ ܝܗܘܵܐ، ܐܲܪܥܵܢܵܝܵܐ؛ ܒܲܪܢܵܫܵܐ ܕܬܪܹܝ ܡ̣ܢ ܫܡܲܝܵܐ ܝܗܘܵܐ. 48 ܐܲܝܟ݂ ܕܝܼܗܘܵܐ ܒܲܪܢܵܫܵܐ ܐܲܪܥܵܢܵܝܵܐ، ܗܵܕܟ݂ܵܐ ܝܢܵܐ ܐܘܼܦ ܐܵܢܝܼ ܕܡ̣ܢ ܐܲܪܥܵܐ. ܐܲܝܟ݂ ܕܝܼܠܹܗ ܒܲܪܢܵܫܵܐ ܫܡܲܝܵܢܵܝܵܐ، ܗܵܕܟ݂ܵܐ ܝܢܵܐ ܐܘܼܦ ܐܵܢܝܼ ܕܡ̣ܢ ܫܡܲܝܵܐ. 49 ܐܲܝܟ݂ ܕܠܒ݂ܝܼܫ ܠܲܢ ܕܡܘܼܬܵܐ ܕܒܲܪܢܵܫܵܐ ܐܲܪܥܵܢܵܝܵܐ، ܗܵܕܟ݂ܵܐ ܒܸܬ ܠܵܒ݂ܫܲܚ ܕܡܘܼܬܵܐ ܕܒܲܪܢܵܫܵܐ ܡ̣ܢ ܫܡܲܝܵܐ. 50 ܒܹܐܡܵܪܵܐ ܝܘܸܢ ܐܸܠܵܘܟ݂ܘܿܢ ܐܲܚܘܿܢܘܵܬܝܼ̈، ܒܸܣܪܵܐ ܘܕܸܡܵܐ ܠܹܐ ܡܵܨܝܼ ܝܵܪܬܝܼ ܡܲܠܟܘܼܬܵܐ ܕܐܲܠܵܗܵܐ، ܘܚܪܵܒ݂ܵܐ ܠܹܐ ܝܵܪܹܬ ܠܵܐ ܚܵܪܒ݂ܵܢܘܼܬܵܐ. 51 ܫܡܹܥܡܘܼܢ ܕܐܵܡܪܹܢܵܘܟ݂ܘܿܢ ܐܪܵܙܵܐ: ܟܠܲܢ ܠܹܐ ܕܵܡܟܲܚ، ܐܝܼܢܵܐ ܟܠܲܢ ܒܸܬ ܦܵܝܫܲܚ ܫܘܼܚܠܸܦܹܐ، 52 ܡܸܢܫܸܠܬܵܢܹܐ، ܒܛܲܪܦܲܛܬܵܐ ܕܥܲܝܢܵܐ، ܐܝܼܡܲܢ ܕܡܵܚܝܵܐ ܩܲܪܢܵܐ ܐܚܵܪܵܝܬܵܐ، ܣܵܒܵܒ ܩܲܪܢܵܐ ܒܸܬ ܡܵܚܝܵܐ ܘܒܸܬ ܩܵܝܡܝܼ ܡܝܼ̈ܬܹܐ ܕܠܵܐ ܚܪܵܒ݂ܵܐ، ܘܐܲܚܢܲܢ ܒܸܬ ܦܵܝܫܲܚ ܫܘܼܚܠܸܦܹܐ. 53 ܣܵܒܵܒ ܘܵܠܹܐ ܝܠܵܗ̇ ܕܐܵܗܵܐ ܚܵܪܒ݂ܵܢܵܐ ܠܵܒܹܫ ܠܵܐ ܚܵܪܒ݂ܵܢܘܼܬܵܐ، ܘܐܵܗܵܐ ܡܵܝܘܿܬܵܐ ܠܵܒܹܫ ܠܵܐ ܡܵܝܘܿܬܘܼܬܵܐ. 54 ܐܝܼܡܲܢ ܕܐܵܗܵܐ ܚܵܪܒ݂ܵܢܵܐ ܠܵܒܹܫ ܠܵܐ ܚܵܪܒ݂ܵܢܘܼܬܵܐ، ܘܐܵܗܵܐ ܡܵܝܘܿܬܵܐ ܠܵܒܹܫ ܠܵܐ ܡܵܝܘܿܬܘܼܬܵܐ. ܗ̇ܝܓܵܗ ܒܸܬ ܦܵܐܹܫ ܬܘܼܡܸܡܵܐ ܡܸܢܕܝܼ ܕܟܬܝܼܒ݂ܵܐ ܝܠܹܗ: ܦܝܼܫ ܠܹܗ ܒܠܝܼܥܵܐ ܡܵܘܬܵܐ ܒܓ݂ܵܠܹܒܘܼܬܵܐ. 55 ܐܲܝܟܵܐ ܝܠܵܗ̇ ܓ݂ܵܠܹܒܘܼܬܘܼܟ݂ ܝܵܐ ܡܵܘܬܵܐ؟ ܐܲܝܟܵܐ ܝܠܹܗ ܢܸܟܣܘܼܟ݂ ܝܵܐ ܩܲܒ݂ܪܵܐ؟ 56 ܢܸܟܣܵܐ ܕܡܵܘܬܵܐ ܚܛܝܼܬܵܐ ܝܠܹܗ، ܘܚܲܝܠܵܐ ܕܚܛܝܼܬܵܐ ܢܵܡܘܿܣܵܐ ܝܠܹܗ. 57 ܐܝܼܢܵܐ ܫܲܟܘܼܪܹܐ ܝܘܸܢ ܠܐܲܠܵܗܵܐ ܕܟܹܐ ܝܵܗܒܹܠ ܠܲܢ ܓ݂ܵܠܹܒܘܼܬܵܐ ܒܝܲܕ ܡܵܪܲܢ ܝܼܫܘܿܥ ܡܫܝܼܚܵܐ. 58 ܗܵܕܟ݂ܵܐ، ܐܲܚܘܿܢܘܵܬܝܼ̈ ܡܘܼܚܸܒܹ̈ܐ، ܟܠܹܝܡܘܼܢ ܩܸܘܝܹܐ ܘܠܵܐ ܫܵܥܫܝܼܬܘܿܢ، ܚܲܠܘܼܢܹܐ ܒܟܠ ܙܲܒ݂ܢܵܐ ܒܦܘܼܠܚܵܢܵܐ ܕܡܵܪܝܵܐ، ܟܲܕ ܝܵܕܥܝܼܬܘܿܢ ܕܥܲܡܠܵܘܟ݂ܘܿܢ ܠܹܐ ܝܠܹܗ ܒܲܛܝܼܠܵܐ ܒܡܵܪܝܵܐ. |
© 2014, Aramaic Bible Translation, Inc. All rights reserved.
Aramaic Bible Translation, Inc.