Zeˬpaˬniˇ 1 - Akha

¹ Heu-aˬ, Aˬmo-euˬ aˬ li Yawˇshiˆ sahˬ paˬ geuꞈ-awˇ Yuˇdaˆ miˇ kʼahˬ-ahˇ uˆ lahˇ-eu aˇ nah aˇ yamˬ laꞈ kʼoeˇ Zeˬpaˬniˇ jawˇ gaˇ keuˆ le-euˬ Sahˬpaˬ Miˬyehˇ-euˬ dawˬ meh. (Sahˬ paˬ Heˬsaˬgiˇ-ahˇ neh gui ka leꞈ-euˬ Zeˬpaˬniˇ -euˬ tsuiꞈ-aˬ, Heˬsaˬgiˇ, Aˬmaˬliˇ, Geˬdaˬliˇ, Kuˇshi, Zeˬpaˬniˇ lehˇ meh.)

Sahˬpaˬ Miˬyehˇ yaˇ kʼaˬ daˇ-eu aˇ nah

² Sahˬpaˬ Miˬyehˇ ehˇ-eu, “Miˇ tsaˬ kʼoeˇ taˆ kʼaˇ jaˆ-eu jeˬ, dawˬ tawˆ luꞈ ngaˇ laˆ byoˆ jiˇ ma.

³ Tsawˇ haˬ hawˇ-eu jeˬ zaˬ maˬ ehˇ, ho zaˬ nga jiˇ dawˬ tawˆ maˬ ehˇ, ngaˬ shaˬ ngaˬ deˇ deuˬ-ahˇ maˬ ehˇ, dawˬ tawˆ luꞈ ngaˇ laˆ byoˆ jiˇ ma. Haiˬ-eu tsawˇ haˬ bi ga-iˇ-awˇ, miˇ tsaˬ heu kʼoeˇ taˆ kʼaˇ jawˇ-eu, tsawˇ jeuˬ dawˬ tawˆ laˆ byoˆ ma lehˇ, ngaˇ Sahˬpaˬ Miˬyehˇ ehˇ-eu ma.

⁴ Yuˇdaˆ miˇ kʼahˬ-ahˇ laˆ cawˆ-awˇ, Yeˬluˇsaˬlehˬ-ahˇ kʼaˇ jawˇ-eu, tsawˇ haˬ deuˬ-ahˇ kʼehˬ-eu gʼaˇ duˬ, ngaˬ-euˬ aˬ laꞈ ngaˇ cawˬ doˆ ma. Maˬ byoˆ maˬ laˆ ni dzeˇ luꞈ-eu, Baˬlaˇ-ahˇ uˬ duˬ tahˬ-eu jeˬ, ngaˇ laˆ luˬ laˆ seˇ byoˆ jiˇ-awˇ, aˬ yawꞈ-euˬ piˇ ma kʼoeˇ deuˬ-euˬ, tsawˇ myahˇ maˬ paˇ ya gaˬ haw-aˇ.

⁵ Nymˇ mˬ kʼoeˇ taˆ pawˬ dmˬ dmˬ-awˇ, nahˇ ma ba la aˬ guiˇ deuˬ-ahˇ, uˬ duˬ kʼaˇ tahˬ-eu tsawˇ haˬ deuˬ, ngaˇ laˆ cawˆ gaˇ ya daˬ tehꞈ-a. Ngaˬ-ahˇ uˬ duˬ tahˬ-eu geuꞈ-awˇ, Miˇlaˬkoˬ-ahˇ kʼaˇ gʼoe-euˬ deuˬ, laˆ cawˆ nehˬ gaˇ ya daˬ tehꞈ-a.

⁶ Sahˬpaˬ Miˬyehˇ-ahˇ byehˇ dzeh-awˇ, aˬ yawꞈ-ahˇ maˬ gʼoe-eu tsawˇ haˬ, laˆ cawˆ nehˬ gaˇ ya daˬ tehꞈ-a.”

⁷ Miˇ tsaˬ zaˬ deuˬ ciˬ cuˇ jawˇ-awˬ. Sahˬpaˬ Miˬyehˇ huiˬ-eu aˇ nah, Miˬyehˇ kʼehˬ-eu kʼaˆ-eu kʼoeˇ nah, dawˬ peh peh le tehˇ tehˬ luꞈ meh. Jeˬ zaˬ sehꞈ-awˇ lawˇ-eu loꞈ-ehˇ, Sahˬpaˬ Miˬyehˇ-euˬ tsawˇ haˬ-ahˇ, Sahˬpaˬ Miˬyehˇ sehꞈ le tehꞈ-a.”

⁸ Sahˬpaˬ Miˬyehˇ ehˇ-eu, “Ngaˇ tsawˇ haˬ sehꞈ-eu aˇ nah-ahˇ, sahˬ paˬ sahˬ ma deuˬ-ahˇ hawˇ-eu, aˬ cawˬ-euˬ zahˇ tawˬ-eu deuˬ-ahˇ, ngaˇ yaw kʼaˆ kʼaˆ-ehˇ kʼehˬ nehˬ ma.

⁹ Ngaˇ kʼehˬ nehˬ kʼaˆ nehˬ le ngeh nah, lawˇ ciꞈ zahˇ tawˬ-eu deuˬ hawˇ-eu, yawˬ ha sahˬ paˬ pyuˇ shuiˇ jaˆ ni, aˬ cawˬ-ahˇ nawˬ dzaˬ-eu deuˬ-ahˇ, ngaˇ yaw kʼaˆ kʼaˆ-ehˇ kʼehˬ nehˬ ma.”

¹⁰ Sahˬpaˬ Miˬyehˇ ehˇ-eu, “Aˇ nah kʼoeˇ nah keuˆ le ngeh jawˇ, ngaˬ shaˬ lahˇ kʼehˬ paw dzeˇ coeˇ-ahˇ, meuˬ yaw shuiꞈ tsoˆ lahˬ-euˬ coeˇ-ahˇ, guˇ-eu teˇ saˇ gaˬ doˆ laˇ-awˇ, gawˬ jawˬ gawˬ duˇ paw dzeˇ coeˇ-ahˇ, deh byaˆ-eu jeˬ gaˬ le tehꞈ-a.

¹¹ Meuˬ laꞈ oˆ pyawˬ-ahˇjawˇ-eu deuˬ, teˇ saˇ kʼoeˇ deuˬ gaˬ doˆ laˇ ngeh, yaw kʼaˆ-ehˇ guˇ guˇ-ehˇ ngoeˇ-awˬ. Aˬ jeˬ miˇ neh ehˇ naˇ, baw gaꞈ deuˬ ya shiˇ jiˇ tehꞈ-a.

¹² “Kʼoeˇ ngeh jawˇ ngaˇ tsiˇ kʼmˬ keuˬ-awˇ, Yeˬluˇsaˬlehˬ meuˬ poˆ doe ma. Yawˬ haˇ yawˬ ha nui kʼaˬ tsmˬ-awˇ, yaw muiˬ maˬ ehˇ, yaw doeˇ maˬ ehˇ, Sahˬpaˬ Miˬyehˇ maˬ mˇ-aˇ lehˇ, yawˬ haˇ yawˬ ha ehˇ-eu tsawˇ haˬ, ngaˇ kʼehˬ nehˬ gaˇ ya daˬ tehꞈ-a.

¹³ Aˬ yawꞈ maꞈ tahˇ joe bi joe-awˇ, nymˇ deuˬ bi deh pyaˆ jiˇ tehꞈ-a. Yawˬ ha neh tsoˆ taˬ-euˬ nymˇ muiˬ, yawˬ ha maˬ ya jawˇ gaˇ keuˆ-awˇ, yawˬ ha mˇ-euˬ aˬ gaꞈ yaˇ kmˇ, aˬ gaꞈ dzaˇ uiˇ maˬ ya dawˇ-aˇ.”

¹⁴ Sahˬpaˬ Miˬyehˇ aˇ nah nah huiˬ, yaw kawˇ kawˇ-ehˇ keuˆ le luꞈ meh. Aˇ nah kʼoeˇ kʼaˬ jehꞈ ni gʼeh-awˇ, kʼaˬ duˬ ni gʼeh-eu yehˇ deuˬ kʼawꞈ, guˇ guˇ-ehˇ ngoeˇ gaˇ keuˆ tehꞈ-a.

¹⁵ Nui pehˇ shehˆ dzeh leꞈ-eu aˇ nah, shaˬ zahˬ tahˬ kʼaˇ leꞈ-eu aˇ nah, laˆ byoˆ laˆ cawˆ jiˇ-eu aˇ nah, mˬ zahˇ miˇ zahˇ zahˇ-eu aˇ nah, mˬ naˆ miˇ naˆ naˆ-eu aˇ nah,

¹⁶ daˇ heh baw dui dui-eu aˇ nah guˇ guˇ-ehˇ guiˇ deuˆ-eu aˇ nah, meuˬ yaw ziꞈ-ahˇ deuˆ-eu aˇ nah taˆ yaw goˇ-ahˇ deuˆ-eu aˇ nah yaw kawˇ kawˇ-ehˇ keuˆ le luꞈ meh.

¹⁷ Sahˬpaˬ Miˬyehˇ ehˇ-eu, “Ngaˬ-ahˇ mˇ bahˬ taˬ-euˬ miˇ neh, aˬ yawꞈ maꞈ-ahˇ bi noeˬ shaˬ-awˇ, myaˆ behꞈ maˬ cah nya-eu loꞈ-ehˇ, kuiˇ toꞈ ciˬ zaˇ bi saˇ sawˇ ma. Iˇ cuꞈ loꞈ-ehˇ shiˬ bi yoeˇ-awˇ, miˇ tsa shiˇ buꞈ-awˇ bi ga ma.”

¹⁸ Sahˬpaˬ Miˬyehˇ nui ma pehˇ-eu, aˇ nah nah huiˬ kʼoeˇ keuˆ le ngeh, yawˬ ha-euˬ pyuˇ kʼoˇ shuiˇ kʼoˇ neh, yawˬ ha-ahˇ maˬ ka kʼoꞈ nya-a. Nui ma pehˇ-eu miˬ dzaˬ miˬ lmˇ, miˇ tsaˬ tahˬ kʼawˇ-ahˇ myoꞈ ahˇ-awˇ, miˇ tsaˬ kʼoeˇ taˆ kʼaˇ jawˇ-eu deuˬ, ja pyuˬ ni ya cawˆ jiˇ tehꞈ-a.