Zaˬkaˬliˇ 9 - Akha

Dawˬ peh jawˇ-eu tsawˇ jeuˬ deuˬ-ahˇ yaˇ kʼaˬ daˇ-eu

¹ Haˬdaˬlaˆ miˇ kʼahˬ-ahˇ maˬ ehˇ, Daˬmaˬsehˇ meuˬ kʼoeˇ meuˬ maˬ ehˇ, Sahˬpaˬ Miˬyehˇ kʼehˬ-eu jaˆ meh. Iˇsaˬleˬlaˆ tsawˇ jeuˬ uˬ taꞈ, Suˇliˆ meuˬ meuˬ ma kʼoeˇ meuˬ kʼawꞈ, Sahˬpaˬ Miˬyehˇ-ahˇ taꞈ-eu meh.

² Haˬdaˬlaˆ-ahˇ miˇ kʼahˬ taꞈ-eu, Haˬmaˆ meuˬ kʼoeˇ meuˬ ahˇ leˇ-ehˇ, zaˬ siˬ tsawˇ gahˇ ahˇ dui dui-eu, Duˇlu hawˇ-eu Siˇdoˬ meuˬ kʼawꞈ, Sahˬpaˬ Miˬyehˇ-ahˇ taꞈ-eu meh.

³ Duˇlu-euˬ taˆ gawˬ ziꞈ taˬ-awˇ, pyuˇ hawˇ-eu shuiˇ pu cu cu kʼawꞈ,

⁴ aˬ yawꞈ kʼaˇ jaˆ-eu jeˬ dawˬ tawˆ, Sahˬpaˬ Miˬyehˇ yuˇ kʼoꞈ jiˇ-awˇ, pyuˇ shuiˇ laˆ shaˆ-ahˇ tahˬ dzeh-awˇ, meuˬ-ahˇ miˬ dzaˬ puiˆ byoˆ tehꞈ-a.

⁵ Kʼoeˇ loˇ pyeuꞈ laˇ-euˬ gaˇ mawˇ ngeh, Aˬshaˇgaˬloˇ meuˬ guˆ-iˇ-awˇ, Gaˬzaˬ meuˬ shaˬ zahˬ naꞈ leˇ-awˇ, Eˇkaˬloˬ meuˬ laˇ baˇ-iˇ-awˇ, noeˬ tmˬ-euˬ jeˬ byoˆ jiˇ tehꞈ-a. Gaˬzaˬ meuˬ sahˬ paˬ maˬ baw-ehˇ, Aˬshaˇgaˬloˇ byoˆ-iˇ tehꞈ-a.

⁶ Aˬshaˬdoˇ meuˬ tsawˇ keuˬ keuˬ-awˇ, Piˇliˇtiˆ nui ma huiˬ-eu jeˬ, aˇ saˬ saˬ ni ngaˇ zuiˆ nehˬ ma.

⁷ Shiˬ maˬ dzeˇ-eu shaˬ jiˇ hawˇ-eu, maˬ dzaˬ kʼmˬ-eu dzaˇ dawˬ tawˆ luꞈ, aˬ yawꞈ maꞈ maˬ paˇ bi dzaˬ ma. Kʼaˇ dehꞈ kʼaˇ dzeuˇ-iˇ-euˬ dawˬ tawˆ, Yuˇdaˆ tsawˇ jeuˬ tiˬ jeuˬ loꞈ-ehˇ, ngaˬ-euˬ tsawˇ haˬ bi pyeuꞈ laˇ ma. Eˇkaˬloˬ tsawˇ haˬ kʼoeˇ deuˬ kʼawꞈ, Yeˬbuˇ tsawˇ haˬ deuˬ-ahˇ duˇ ni, ngaˬ-euˬ tsawˇ haˬ bi pyeuꞈ laˇ ma.

⁸ Ngaˬ-euˬ miˇ kʼahˬ ngaˇ loꞈ piˇ-awˇ, iˇ tsehˆ laˇ tsehˆ-eu maˬ bi jaˆ. Ngaˇ haw tsoˆ-awˇ loꞈ-eu miˇ neh, kʼehˬ dzaˬ kʼaˆ dzaˬ-eu tsawˇ haˬ deuˬ, aˬ yawꞈ maꞈ-ahˇ maˬ toeˬ ciˆ-a.

Ziˇoˬ-euˬ sahˬ paˬ

⁹ Ziˇoˬ tsawˇ haˬ laˬ kʼaˬ cehˇ-awˬ. Yeˬluˇsaˬlehˬ meuˬ-euˬ tsawˇ haˬ, laˬ kʼaˬ cehˇ-awˇ guˇ dui dui-awˬ. Naw maꞈ-euˬ sahˬpaˬ oe luꞈ meh. Aˬ yawꞈ baoˬ kʼahˬ sehˇ huiˬ-eu kʼawꞈ, nui nahˬ nui yu ahˇ-eu laꞈ kʼoeˇ, mahˬ tahˬ laˆ zaˬ-ahˇ dziˬ-eu meh.

¹⁰ Sahˬpaˬ Miˬyehˇ ehˇ-eu, “Iˇsaˬleˬlaˆ-euˬ guiˇ laˆ lawˬ, Yeˬluˇsaˬlehˬ-euˬ guiˇ dziˬ mahˬ, dawˬ tawˆ luꞈ ngaˇ yuˇ byoˆ jiˇ-awˇ, Guiˇ deuˆ gaˇ geuꞈ-eu kaˆ myaˬ deuˬ, dawˬ tawˆ luꞈ ngaˇ laˆ cawˆ jiˇ ma. Naw maꞈ-ahˇ uˆ lahˇ-eu sahˬ paˬ, miˇ kʼahˬ tsawˇ jeuˬ-ahˇ tsaˬ leˇ-awˇ, laˆ shaˆ nyiˬ dzeˇ uˆ lahˇ gʼmˇ-awˇ, Uˇpaˬlaˇ lawˇ baˬ-ahˇ neh naˇ, mˬ dzeˇ miˇ dzeˇ dzoeˬ keuˆ tehꞈ-a.”

Miˬyehˇ-euˬ tsawˇ haˬ dehꞈ dzaˬ poˆ laˇ-eu

¹¹ Sahˬpaˬ Miˬyehˇ ehˇ-eu, “Ngaˬ neh naw maꞈ-ahˇ dzaˬ taˬ-euˬ, dawˬ ma saˇ jaˇ shiˬ baˬ da neh, duˬ kʼahˬ naꞈ gaˇ bi paꞈ taˬ-euˬ, naw maꞈ tsawˇ haˬ ngaˇ puiˇ pyehˬ ma.

¹² Aˬ cawˬ neh bi nyehꞈ lahˇ-euˬ kʼawꞈ, noeˬ tmˬ kʼaˇ za laˇ-euˬ deuˬ-oˇ, naw maꞈ-euˬ taˆ-ahˇ gʼoꞈ leˇ-awˬ. Nyiˬ bymˇ bi dehꞈ dzaˬ laˇ ma lehˇ, iˬ nah ngaˇ dawˬ tsehˆ ngehˬ-eu ma.

¹³ Yuˇdaˆ miˇ kʼahˬ kaˆ poˆ geuꞈ-awˇ, Iˇsaˬleˬlaˆ kaˆ myaˬ geuꞈ ma. Ziˇoˬ tsawˇ haˬ mi cehˇ geuꞈ-awˇ, Heˬlaˬshaˆ tsawˇ jeuˬ-ahˇ deuˆ ma.”

¹⁴ Aˬ yawꞈ-euˬ tsawˇ haˬ deuˬ kʼoeˇ taˆ, Sahˬpaˬ Miˬyehˇ doˆ le tehꞈ-a. mˬ jeˬ tsawˬ tehˆ tehˆ-eu loꞈ-ehˇ, aˬ yawꞈ kaˆ myaˬ beuˆ leꞈ tehꞈ-a. Dawˬ tawˆ kʼoeˇ taˆ uˆ lahˇ luꞈ-eu, Sahˬpaˬ Miˬyehˇ daˇ heh baw-awˇ, laꞈ oˆ paw neh baw daˆ laꞈ-euˬ, jaˬ lehˇ lehˇ ma dziˬ laꞈ tehꞈ-a.

¹⁵ Baoˬ huiˬ-eu Sahˬpaˬ Miˬyehˇ-aˬ, yawꞈ-euˬ tsawˇ haˬ-ahˇ haw piˇ-awˇ, aˬ yawꞈ-euˬ tsawˇ haˬ kʼoeˇ deuˬ-aˬ, muiˇ-eu deuˬ-ahˇ laˆ cawˆ tehꞈ-a. Jiˇ baˬ yehꞈ-eu tsawˇ haˬ loꞈ-ehˇ, guiˇ deuˆ luꞈ ngeh yawꞈ maꞈ guˇ-awˇ, muiˇ-eu deuˬ-ahˇ shiˬ sehꞈ doˆ ngeh, naˬ bo-ahˇ dahˬ-eu lawˇ-euˬ shiˬ, lawˇ guiˇ kʼoeˇ taˆ shehˆ doˆ gʼeh ngeh, yoeˇ kʼaˇ le gaˇ duˇ leˇ tehꞈ-a.

¹⁶ Aˇ nah kʼoeˇ nah keuˆ le ngeh jawˇ, yawˇ bo-eu gʼaˬ yawˇ yawˇ maꞈ-ahˇ, haw piˇ-awˇ ka kʼoꞈ-eu loꞈ-ehˇ, aˬ yawꞈ-euˬ tsawˇ haˬ kʼoeˇ deuˬ-ahˇ, Sahˬpaˬ Miˬyehˇ ka kʼoꞈ tehꞈ-a. shuiˇ uˬ kʼoˆ kʼoeˇ taˆ bya luꞈ-eu, poeˬ-eu kʼaˬ lo sehˇ deuˬ loꞈ-ehˇ, aˬ yawꞈ-euˬ miˇ kʼahˬ kʼoeˇ uˬ du, aˬ yawꞈ maꞈ yaw shehꞈ bya tehꞈ-a.

¹⁷ Aˬ yawꞈ-euˬ miˇ kʼahˬ kʼoeˇ kʼahˬ-aˬ, aˇ naˆ haw muiˬ-eu miˇ kʼahˬ nga. Dzaˬ la gʼo cehˇ aˬ gaꞈ dzaˇ uiˇ, zaˬ guˬ aˬ lmˬ bi mehˇ tehꞈ-a.