Zaˬkaˬliˇ 8 - Akha

Yeˬluˇsaˬlehˬ meuˬ-ahˇ guiˬ lahˬ biꞈ ma lehˇ Sahˬpaˬ Miˬyehˇ saˇ jaˇ dzaˬ-euˬ

¹ Baoˬ huiˬ-eu Sahˬpaˬ Miˬyehˇ-euˬ dawˬ, Zaˬkaˬliˇ jawˇ gaˇ heu loꞈ-ehˇ keuˆ le-euˬ meh.

² “Yeˬluˇsaˬlehˬ meuˬ-ahˇ ngaˇ gaˬ dui dui-eu miˇ neh, caw ba nehˬ mawꞈ-eu nui ma jaˆ-eu ma. Aˬ yawꞈ-ahˇ ngaˇ gaˬ-eu miˇ neh, aˬ yawꞈ-ahˇ muiˇ-eu deuˬ-ahˇ ngaˇ nui ma pehˇ-euˬ ma.

³ Ngaˬ-euˬ muiˬ-eu shawˇ-eu meuˬ pyeuꞈ-eu Yeˬluˇsaˬlehˬ meuˬ-ahˇ ngaˇ gʼoꞈ jawˇ le ma. Meuˬ kʼoeˇ-ahˇ saˇ jaˇ ziꞈ-eu meuˬ lehˇ aˬ cawˬ kuˇ-awˇ, Baoˬ huiˬ-eu Sahˬpaˬ Miˬyehˇ-euˬ gawˬ jawˬ-ahˇ muiˬ-eu shawˇ-eu gawˬ jawˬ lehˇ kuˇ tehꞈ-a.

⁴ Tsawˇ mawˬ mawˬ dui dui laˇ-awˇ, gawˬ yoeˬ toˆ toˆ-ehˇ cah-eu deuˬ, meuˬ-euˬ poˆ ka nuiˇ luꞈ gaˇ tiˬ poˆ paˇ ya mawˇ tehꞈ-a.

⁵ Meuˬ-euˬ lehˆ kawˆ doe ni, aˬ buˇ aˬ li deuˬ aˬ mui mui luꞈ gaˇ paˇ ya mawˇ tehꞈ-a.

⁶ “Kʼoeˇ loꞈ-ehˇ maˬ paˇ pyeuꞈ laˇ nya-aˇ lehˇ, miˇ kʼahˬ heu kʼahˬ laꞈ kʼoeˇ dzeˇ yaꞈ-euˬ tsawˇ haˬ deuˬ noeˬ tehꞈ-a. Ehˇ kʼawꞈ, ngaˬ-euˬ gʼaˇ duˬ maˬ pyeuꞈ laˇ nya-eu jeˬ maˬ jaˆ.

⁷ Aˬ cawˬ miˇ kʼahˬ-ahˇ bi nyehꞈ byoˆ gʼeh-euˬ ngaˬ-euˬ tsawˇ haˬ deuˬ-ahˇ ngaˇ ka kʼoꞈ doˆ laꞈ ma.

⁸ Nahˇ ma doˆ kʼehˬ ga kʼehˬ paw neh aˬ yawꞈ maꞈ-ahˇ ngaˇ sheuˬ kʼoꞈ uiˬ laꞈ-awˇ, Yeˬluˇsaˬlehˬ meuˬ-ahˇ bi jawˇ ma. Aˬ yawꞈ maꞈ ngaˬ-euˬ tsawˇ haˬ pyeuꞈ-awˇ, ngaˇ aˬ yawꞈ maꞈ-euˬ Miˬyehˇ pyeuꞈ-eu laꞈ kʼoeˇ, yaw tsaˬ yaw dawˇ jeˬ hawˇ-eu saˇ jaˇ ziꞈ-eu jeˬ neh aˬ yawꞈ maꞈ-ahˇ ngaˇ uˆ lahˇ ma.

⁹ “Naw maꞈ gʼaˬ byehˆ taˬ byehˆ. Uˬ duˬ tahˬ nymˇ nymˇ ma tsoˆ muiˬ-eu lehˇ kʼaˬ lo gawˬ dahˬ beh ngeh, Miˬyehˇ gʼaˇ duˬ ngehˬ dah-euˬ deuˬ neh ehˇ-euˬ dawˬ kʼoeˇ, iˬ nah naw maꞈ paˇ ya gaˬ poˆ luꞈ-eu meh.

¹⁰ Aˇ yamˬ kʼoeˇ yamˬ-ahˇ keuˆ ni, tsawˇ haˬ hawˇ-eu jeˬ zaˬ poˆ-awˇ gaˇ bi mˇ-eu gʼaˇ duˬ, pyuˇ yuˇ doˆ nya-eu tiˬ gʼaˬ-iˬ maˬ jawˇ-eu uˬ taꞈ, muiˇ-eu deuˬ kʼehˬ laˇ gaˇ maˬ guˆ-ehˇ dehꞈ-euˬ tiˬ gʼaˬ-iˬ maˬ jawˇ-a. Tsawˇ haˬ tiˬ gʼaˬ tiˇ gʼaˬ muiˇ ni ngaˇ jahˇ-euˬ ma.

¹¹ Ehˇ kʼawꞈ, miˇ kʼahˬ heu kʼahˬ laꞈ kʼoeˇ dzeˇ yaꞈ-euˬ tsawˇ haˬ deuˬ-ahˇ, nymˬ-mˇ ngaˇ kʼoeˇ loꞈ-ehˇ maˬ paˇ jahˇ ma.

¹² Aˬ yawꞈ maꞈ nui saˇ oꞈ-eu laꞈ kʼoeˇ siˬ yoeˬ ya sehˬ dzaˬ tehꞈ-a. Aˬ yawꞈ maꞈ-euˬ aˬ gaꞈ baw duˆ aˇ siˬ siˬ le-awˇ, dzaˬ la gʼo cehˇ za le-eu uˬ taꞈ, uˬ yehˇ jaˆ tehꞈ-a. Ngaˬ-euˬ miˇ kʼahˬ heu laꞈ kʼoeˇ kʼaˇ dzeˇ-eu tsawˇ haˬ deuˬ-ahˇ, guiˬ lahˬ kʼoeˇ deuˬ dawˬ tawˆ luꞈ ngaˇ biꞈ ma.

¹³ Yuˇdaˆ tsawˇ haˬ hawˇ-eu Iˇsaˬleˬlaˆ tsawˇ haˬ deuˬ-oˇ, dzeuˇ laˇ-euˬ aˇ yamˬ laꞈ kʼoeˇ aˬ cawˬ tsawˇ jeuˬ deuˬ tiˬ gʼaˬ tiˇ gʼaˬ yaˬ kʼehˇ yaˬ ngeh, ‘Yuˇdaˆ tsawˇ haˬ hawˇ-eu Iˇsaˬleˬlaˆ tsawˇ haˬ loꞈ-ehˇ guiˬ lahˬ doeˇ luꞈ-uˇʼ lehˇ ehˇ-awˇ yaˬ-euˬ meh. Ehˇ kʼawꞈ, naw maꞈ-ahˇ ngaˇ ka kʼoꞈ nehˬ ma. Kʼoeˇ ngeh jawˇ, ‘Yuˇdaˆ tsawˇ haˬ hawˇ-eu Iˇsaˬleˬlaˆ tsawˇ haˬ loꞈ-ehˇ guiˬ lahˬ za luꞈ-uˇʼ lehˇ, aˬ cawˬ tsawˇ jeuˬ kʼoeˇ deuˬ tiˬ gʼaˬ tiˇ gʼaˬ ehˇ tehꞈ-a. Teu miˇ neh, gʼaˬ byehˆ maˬ byehˆ-ehˇ, maˬ guˆ ni dehꞈ-awˬ.”

¹⁴ Baoˬ huiˬ-eu Sahˬpaˬ Miˬyehˇ ehˇ-eu, “Naw maꞈ-euˬ aˬ poeˬ aˬ bawˇ deuˬ ngaˇ nui ma pehˇ ni dehꞈ haw ngeh, aˬ yawꞈ maꞈ kʼoeˇ taˆ luˬ-iˇ seˇ-iˇ-eu jeˬ keuˆ le ni mˇ ma lehˇ ngaˇ noeˬ tsehˆ-awˇ, ngaˬ-euˬ nui ma maˬ noeˬ paˇ ni kʼoeˇ loꞈ-ehˇ jahˇ nehˬ-euˬ ma.

¹⁵ Ehˇ kʼawꞈ, Yeˬluˇsaˬlehˬ meuˬ hawˇ-eu Yuˇdaˆ miˇ kʼahˬ laꞈ kʼoeˇ jawˇ-eu tsawˇ haˬ deuˬ-ahˇ guiˬ lahˬ biꞈ-eu lehˇ, nymˬ-mˇ ngaˇ lehˬ hmˬ taˬ-euˬ ma. Kʼoeˇ miˇ neh, gʼaˬ taˬ baˬ.

¹⁶ Naw maꞈ heu loꞈ-ehˇ mˇ-awˬ. Tiˬ gʼaˬ tiˇ gʼaˬ yaw tsaˬ yaw dawˇ jeˬ ngehˬ-awˬ tmˇ-awˬ. Yaˇ kʼaˬ daˇ ngeh, yaw tsaˬ yaw dawˇ dawˇ-ehˇ daˇ nehˬ-awˬ.

¹⁷ Tiˬ gʼaˬ tiˇ gʼaˬ laˆ coeˬ laˆ ciˆ-eu jeˬ taˬ mˇ. Maˬ tsaˬ maˬ dawˇ-eu laꞈ kʼoeˇ taˬ kamˬ. Jaˬ myawꞈ mehˇ shuiˇ hawˇ-eu, maˬ tsaˬ maˬ dawˇ-eu jeˬ, yaw haiˬ jeˬ, heu deuˬ mˇ gaˇ ngaˇ maˬ haw nahˇ nya.”

¹⁸ Baoˬ huiˬ-eu Sahˬpaˬ Miˬyehˇ-euˬ dawˬ Zaˬkaˬliˇ jawˇ gaˇ keuˆ le-euˬ-aˬ, heu loꞈ-ehˇ meh.

¹⁹ “Ba la oeˬ siˬ tiˬ siˬ, ngaˬ siˬ tiˬ siˬ, shiꞈ siˬ tiˬ siˬ hawˇ-eu, tseˇ siˬ tiˬ siˬ laꞈ kʼoeˇ, maˬ dzaˬ-eu zahˇ jahˇ-eu bawˬ-iˬ gʼeh-eu kʼoeˇ-aˬ, Yuˇdaˆ tsawˇ haˬ gʼaˇ duˬ laˬ kʼaˬ cehˇ-eu bawˬ-iˬ pyeuꞈ laˇ tehꞈ-a. Yaw tsaˬ yaw dawˇ jeˬ hawˇ-eu tsaˬ leˇ dzoeˇ leˇ-eu jeˬ-ahˇ naw maꞈ ya gaˬ meh.”

²⁰ Baoˬ huiˬ-eu Sahˬpaˬ Miˬyehˇ ehˇ-eu, “Meuˬ gʼawˬ mya meuˬ-ahˇ jawˇ-eu tsawˇ haˬ deuˬ Yeˬluˇsaˬlehˬ meuˬ-ahˇ laˇ-eu aˇ yamˬ keuˆ le tehꞈ-a.

²¹ ‘Nga maꞈ nehˬ-ehˇ laˇ-awˬ. Baoˬ huiˬ-eu Sahˬpaˬ Miˬyehˇ-ahˇ uˬ duˬ tahˬ leˇ-awˇ, guiˬ lahˬ shaˇ geuꞈ leˇ ma’ lehˇ, tiˬ meuˬ tiˇ meuˬ ehˇ tehꞈ-a.

²² Tsawˇ jeuˬ gʼawˬ mya ni hawˇ-eu, baoˬ huiˬ-eu miˇ kʼahˬ deuˬ Baoˬ huiˬ-eu Sahˬpaˬ Miˬyehˇ-ahˇ uˬ duˬ tahˬ-awˇ, guiˬ lahˬ shaˇ geuꞈ laˇ-eu lehˇ, Yeˬluˇsaˬlehˬ meuˬ-ahˇ laˇ tehꞈ-a.

²³ Aˇ nah aˇ yamˬ kʼoeˇ keuˆ le ngeh, Yuˇdaˆ tsawˇ haˬ tiˬ gʼaˬ jawˇ gaˇ aˬ cawˬ tsawˇ jeuˬ tseˇ gʼaˬ laˇ-awˇ, ‘Miˬyehˇ nawˬ nehˬ-ehˇ jawˇ meh lehˇ nga maꞈ ya gaˬ-euˬ miˇ neh, nga maꞈ-ahˇ nawˬ nehˬ-ehˇ bi taꞈ laꞈ-awˬ’ lehˇ ehˇ tehꞈ-a.”