Zaˬkaˬliˇ 6 - Akha

Yaw sahˇ laꞈ kʼoeˇ ya mawˇ-euˬ mahˬ laˆ lawˬ oeˬ laˇ

¹ Yaw sahˇ laꞈ kʼoeˇ, ngaˇ heu loꞈ-ehˇ paˇ ya mawˇ-euˬ ma. Guiˬ shuiˇ gawˬ jawˬ nyiˬ jawˬ yaw kaˬ-ahˇ mahˬ laˆ lawˬ oeˬ laˇ doˆ le gaˇ ngaˇ mawˇ-euˬ ma.

² Laˆ lawˬ yaw beh laˇ-ahˇ mahˬ mahˬ neˇ gʼeu-awˇ, nyiˬ laˇ tiˬ laˇ-ahˇ mahˬ mahˬ naˆ gʼeu luꞈ-eu meh.

³ Smˬ laˇ tiˬ laˇ-ahˇ mahˬ mahˬ pyuˇ gʼeu-awˇ, oeˬ laˇ tiˬ laˇ-ahˇ mahˬ mahˬ byaꞈ gʼeu luꞈ-eu meh.

⁴ Kʼoeˇ naˇ, “Mahˬ laˆ lawˬ teu deuˬ-euˬ dawˬ tsuiꞈ aˬ jeˬ-a” lehˇ, ngaˬ-ahˇ dawˬ ngehˬ cawˬ-eu mˬ taˆ gʼaˬ kʼehˇ kʼoeˇ gʼaˬ-ahˇ ngaˇ naˇ haˬ-euˬ ma.

⁵ Mˬ taˆ gʼaˬ kʼehˇ kʼoeˇ gʼaˬ ehˇ-eu, “Heu-aˬ, jaˬ lehˇ oeˬ bahˬ-ahˇ ehˇ mawꞈ-eu meh. Aˬ yawꞈ maꞈ-aˬ, miˇ tsaˬ dawˬ tawˆ luꞈ-ahˇ uˆ lahˇ-eu gʼaˬ pyeuꞈ-eu Sahˬpaˬ Miˬyehˇ jawˇ gaˇ neh oe-euˬ meh.

⁶ Mahˬ mahˬ naˆ neh gʼeu-euˬ laˆ lawˬ kʼoeˇ laˇ-aˬ, laꞈ taˆ paw pyawˬ-ahˇ jaˆ-eu Baˬbuˇloˬ miˇ kʼahˬ paw le-awˇ, mahˬ mahˬ pyuˇ neh gʼeu-euˬ laˆ lawˬ kʼoeˇ laˇ-aˬ, nahˇ ma ga kʼehˬ paw pyawˬ-ahˇ jaˆ-eu miˇ kʼahˬ paw iˇ-eu meh. Mahˬ mahˬ byaꞈ neh gʼeu-euˬ laˆ lawˬ kʼoeˇ laˇ-aˬ, laꞈ oˆ paw pyawˬ-ahˇ jaˆ-eu miˇ kʼahˬ paw iˇ-eu meh.”

⁷ Mahˬ mahˬ byaꞈ kʼoeˇ deuˬ doˆ laˇ ngeh, mehˬ hu paw maˬ iˇ mawꞈ ni, miˇ tsaˬ tahˬ kʼawˇ doe ni pyehˆ tseˇ-eu lehˇ gʼeh-awˇ, “Miˇ tsaˬ tahˬ kʼawˇ doe ni pyehˆ tseˇ-iˇ-awˬ” lehˇ mˬ taˆ gʼaˬ kʼehˇ kʼoeˇ gʼaˬ ehˇ nehˬ ngeh, aˬ yawꞈ maꞈ pyehˆ tseˇ-iˇ-euˬ meh.

⁸ Kʼoeˇ ngeh, “Laꞈ taˆ paw pyawˬ-ahˇ jaˆ-eu Baˬbuˇloˬ miˇ kʼahˬ paw le-euˬ mahˬ kʼoeˇ deuˬ, Sahˬpaˬ Miˬyehˇ nui ma pehˇ-eu taˬ leˇ ni jahˇ-euˬ meh” lehˇ, mˬ taˆ gʼaˬ kʼehˇ kʼoeˇ gʼaˬ ngaˬ-ahˇ guˇ-awˇ ehˇ-eu meh.

Yawˇshuˆ gʼaˇ duˬ shuiˇ uˬ kʼoˆ

⁹ Sahˬpaˬ Miˬyehˇ-euˬ dawˬ ngaˇ jawˇ gaˇ heu loꞈ-ehˇ keuˆ le-euˬ meh.

¹⁰ “Baˬbuˇloˬ miˇ kʼahˬ-ahˇ bi nyehꞈ gʼeh-awˇ gʼoꞈ doˆ laˇ-euˬ, Heˬlaˬdehˇ, Tawˇbiˇyaˆ, Yeˬdehˇyaˬ aˬ ha smˇ gʼaˬ neh biꞈ laꞈ-euˬ pyuˇ hawˇ-eu shuiˇ yuˇ-awˇ, tiˬ poˆ tehꞈ-ehˇ Zeˬpaˬniˇ-euˬ aˬ li Yawˇshuˆ jawˇ gaˇ le-awˬ.

¹¹ Pyuˇ hawˇ-eu shuiˇ kʼoeˇ deuˬ neh shuiˇ uˬ kʼoˆ jahˇ-awˇ, Yeˬhawˇzaˬdaˆ-euˬ aˬ li piˇ ma yaw huiˬ gʼaˬ pyeuꞈ-eu Yawˇshuˆ-ahˇ bi kʼoˆ-awˬ.

¹² Baoˬ huiˬ-eu Sahˬpaˬ Miˬyehˇ heu loꞈ-ehˇ ehˇ-eu meh lehˇ aˬ yawꞈ-ahˇ ehˇ nehˬ-awˬ. ‘Uˬ laꞈ lehˇ myahˇ-euˬ tsawˇ haˬ kʼoeˇ gʼaˬ-aˬ, aˬ yawꞈ kʼaˇ jawˇ gaˇ huiˬ dui mahˇ dui dui-awˇ, Sahˬpaˬ Miˬyehˇ-euˬ Uˬ duˬ tahˬ nymˇ nymˇ ma tsoˆ muiˬ tehꞈ-a.

¹³ Aˬ yawꞈ-aˬ, Uˬ duˬ tahˬ nymˇ nymˇ ma tsoˆ muiˬ-awˇ, sahˬ paˬ loꞈ-ehˇ taˬ huiˬ taˬ mahˇ nehˬ gaˇ ya daˬ-awˇ, aˬ yawꞈ-euˬ tsawˇ haˬ deuˬ-ahˇ ya uˆ lahˇ tehꞈ-a. Piˇ ma tiˬ gʼaˬ aˬ yawꞈ-euˬ dzoeˬ dzaˬ nuiˇ mahˬ dawˬ peh yawꞈ-awˇ, aˬ yawꞈ nyaꞈ tiˬ gʼaˬ tiˇ gʼaˬ nui noeˬ taꞈ-eu laꞈ kʼoeˇ gaˇ mˇ tehꞈ-aʼ lehˇ ehˇ nehˬ-awˬ.

¹⁴ Shuiˇ uˬ kʼoˆ kʼoeˇ siˬ-aˬ, Sahˬpaˬ Miˬyehˇ-euˬ Uˬ duˬ tahˬ nymˇ nymˇ ma laꞈ kʼoeˇ , Heˬlaˬdehˇ, Tawˇbiˇyaˆ, Yeˬdehˇyaˬ, Yawˇshuˆ aˬ ha oeˬ gʼaˬ-ahˇ noeˬ mawˇ-euˬ jeˬ pyeuꞈ tehꞈ-a.”

¹⁵ Gaˇ mahˇ kaˬ gaˇ jawˇ-eu tsawˇ haˬ deuˬ laˇ-awˇ, Sahˬpaˬ Miˬyehˇ-euˬ Uˬ duˬ tahˬ nymˇ nymˇ ma tsoˆ muiˬ gaˇ caw ba laˇ tehꞈ-a. Uˬ duˬ tahˬ nymˇ nymˇ ma kʼoeˇ tsoˆ muiˬ gʼaˬ ngeh jawˇ, Baoˬ huiˬ-eu Sahˬpaˬ Miˬyehˇ neh, ngaˬ-ahˇ naw maꞈ jawˇ gaˇ pyehˬ gʼeh leꞈ-euˬ nga lehˇ, naw maꞈ ya siˬ duˬ tehꞈ-a. Naw maꞈ-euˬ Miˬyehˇ pyeuꞈ-eu Sahˬpaˬ Miˬyehˇ-euˬ dawˬ-ahˇ naw maꞈ yaw muiˬ paˬ-ehˇ naˇ haˬ-awˇ caw teh naˇ, kʼoeˇ loꞈ-ehˇ pyeuꞈ laˇ tehꞈ-a.