Zaˬkaˬliˇ 11 - Akha

Nui ma huiˬ-eu deuˬ coˬ-iˇ-euˬ

¹ Leˬbaˬnoˬ-oˇ, laˇ gʼoˆ pah-awˬ. Nawˬ-euˬ shuˬ liˇ aˇ bawˇ kʼoeˇ deuˬ, miˬ dzaˬ bi puiˆ sehꞈ-eu gʼaˇ duˬ, nawˬ-euˬ laˇ gʼoˆ pah dzeh jiˇ-awˬ.

² Guˇ baˬ luˇ aˇ bawˇ deuˬ ngoeˇ-awˬ. Shuˬ liˇ aˇ bawˇ coˬ jiˇ-euˬ meh. Muiˬ-eu poeˬ-eu aˇ bawˇ kʼoeˇ deuˬ, byoˆ-iˇ cawˆ-iˇ jiˇ shaw-euˬ meh. Baˬshaˬ tsuiꞈ kaˆ aˇ bawˇ deuˬ-oˇ, sahˬ kʼaˆ kʼaˆ ma teˬ byoˆ-euˬ gaˇ, myaˆ biˇ doˆ-awˇ ngoeˇ dui dui-awˬ.

³ Sahˬ paˬ sahˬ ma geuꞈ luꞈ-eu deuˬ, yaw shehꞈ kʼahˬ sehˇ byoˆ jiˇ-euˬ gaˇ, noeˬ shaˬ dui dui-awˇ ngoeˇ luꞈ meh. Yawˇdaˬ gawˆ taw sahˬ kʼaˆ kʼahˬ jeˬ, byoˆ laˇ-aˬ, jawˇ zaˇ shaˬ laˇ-awˇ, aˇ laˬ jaˬ shiˇ deuˬ joeˬ luꞈ meh.

Yawˇ bo yaw sahˇ nyiˬ sahˇ

⁴ Ngaˬ-euˬ Miˬyehˇ pyeuꞈ-eu Sahˬpaˬ Miˬyehˇ ngaˬ-ahˇ heu loꞈ-ehˇ ehˇ-eu meh. “Sehꞈ-eu gʼaˇ duˬ cu taˬ-eu yawˇ deuˬ-ahˇ bo-eu gʼaˬ geuꞈ haw sheˇ.

⁵ Zeuˇ-eu tsawˇ haˬ deuˬ yawˇ kʼoeˇ deuˬ-ahˇ sehꞈ kʼawꞈ, yaˇ kʼaˬ daˇ gaˇ maˬ ya daˬ-a. Aˬ yawꞈ maꞈ shaˬ jiˇ sehꞈ ahˬ-awˇ, ‘Nga maꞈ smˇ muiˬ muiˬ laˇ-euˬ miˇ neh, Sahˬpaˬ Miˬyehˇ-ahˇ ja ceuˬ ma’ lehˇ ehˇ-eu meh. Yawˇ kʼoeˇ deuˬ-ahˇ bo-eu yaw sahˇ gʼaˬ kʼawꞈ, yawˇ kʼoeˇ deuˬ-ahˇ gʼawˬ shaˬ maˬ gaˬ-a.

⁶ Miˇ tsaˬ zaˬ tiˬ gʼaˬ-ahˇ-iˬ ngaˇ gʼawˬ shaˬ maˬ paˇ gaˬ ma. Tsawˇ haˬ dawˬ tawˆ luꞈ, uˆ lahˇ-eu sahˬ paˬ sahˬ ma deuˬ-euˬ laꞈ-ahˇ ngaˇ a nehˬ ma. Sahˬpaˬ sahˬ ma kʼoeˇ deuˬ miˇ tsaˬ tahˬ kʼawˇ heu-ahˇ kʼaˇ kʼehˬ mawꞈ-eu kʼehˬ ngeh, tiˬ gʼaˬ-ahˇ-iˬ ngaˇ maˬ ka kʼoꞈ nehˬ.”

⁷ Yawˇ gaꞈ-eu deuˬ neh sehꞈ-eu gʼaˇ duˬ zeuˇ taˬ-euˬ yawˇ deuˬ-ahˇ ngaˇ bo-euˬ ma. Daˇ cuiˇ nyiˬ cuiˇ ngaˇ tuˆ tehˬ taˬ-euˬ ma. Tiˬ cuiˇ-ahˇ “Gʼawˬ shaˬ gaˬ-eu jeˬ” lehˇ myahˇ-awˇ, biˬ cuiˇ-ahˇ “nui ma gm-eu jeˬ” lehˇ myahˇ-euˬ ma. Kʼoeˇ naˇ, yawˇ kʼoeˇ deuˬ-ahˇ ngaˇ bo-euˬ ma.

⁸ Yawˇ bo-eu yaw sahˇ smˇ gʼaˬ nehˬ-ehˇ ngaˇ maˬ tsaˬ leˇ-ehˇ, ba la tiˬ siˬ laꞈ kʼoeˇ aˬ yawꞈ maꞈ-ahˇ ngaˇ byehˇ dzeh-euˬ ma.

⁹ Kʼoeˇ naˇ, yawˇ yawˇ maꞈ-ahˇ heu loꞈ-ehˇ ehˇ nehˬ-euˬ ma. “Ngaˇ naw maꞈ-ahˇ maˬ paˇ bo ma. Shiˇ-eu deuˬ ehˬ-ehˇ shiˇ luꞈ-uˇ. Cawˆ-iˇ-eu deuˬ kʼawꞈ, ehˬ-ehˇ cawˆ-iˇ jiˇ luꞈ-uˇ. Maˬ shiˇ-ehˇ dzeˇ-eu deuˬ kʼawꞈ, tiˬ gʼaˬ tiˇ gʼaˬ shaˬ jiˇ dzaˬ luꞈ-uˇ.”

¹⁰ Kʼoeˇ naˇ, Sahˬpaˬ Miˬyehˇ neh miˇ kʼahˬ tsawˇ jeuˬ dawˬ tawˆ luꞈ-ahˇ dzaˬ taˬ-euˬ dawˬ ma saˇ jaˇ bi cawˆ-iˇ-eu gʼaˇ duˬ, “Gʼawˬ shaˬ gaˬ-eu jeˬ” lehˇ kuˇ-eu daˇ cuiˇ kʼoeˇ ngaˇ ngawˬ kʼehꞈ-euˬ ma.

¹¹ Kʼoeˇ miˇ neh, dawˬ ma saˇ jaˇ kʼoeˇ hmˬ kʼoeˇ ngeh nah cawˆ-iˇ-euˬ meh. Yawˇ gaꞈ-eu tsawˇ haˬ kʼoeˇ deuˬ ngaˇ mˇ gaˇ haw tsoˆ taˬ-awˇ, ngaˬ neh mˇ-euˬ jeˬ laꞈ kʼoeˇ Sahˬpaˬ Miˬyehˇ dawˬ ngehˬ luꞈ-eu nga lehˇ haw siˬ-euˬ meh.

¹² “Naw maꞈ nui ma keuˆ naˇ, ngaˬ-ahˇ gʼaˬ gaˇ poeˬ biꞈ laꞈ-awˬ. Nui ma maˬ keuˆ naˇ, tiˬ jeˬ-iˬ maˬ ngeuˇ-aˇ” lehˇ, aˬ yawꞈ maꞈ-ahˇ ngaˇ ehˇ nehˬ-euˬ ma. Kʼoeˇ ngeh, ngaˬ-euˬ gʼaˬ gaˇ poeˬ pyuˇ maˇ byaˆ smˬ tseˇ byaˆ aˬ yawꞈ maꞈ biꞈ laꞈ-euˬ meh.

¹³ “Pyuˇ kʼoeˇ deuˬ Uˬ duˬ tahˬ nymˇ nymˇ ma laꞈ kʼoeˇ pyuˇ jeˬ hmˬ duˬ-ahˇ dawˆ ahˇ-awˬ” lehˇ, Sahˬpaˬ Miˬyehˇ ngaˬ-ahˇ ehˇ-eu meh. Kʼoeˇ naˇ, ngaˬ-ahˇ geuˇ ni biꞈ laꞈ-euˬ gʼaˬ gaˇ poeˬ pyuˇ maˇ byaˆ kʼoeˇ smˬ tseˇ byaˆ yuˇ-awˇ, Uˬ duˬ tahˬ nymˇ nymˇ ma laꞈ kʼoeˇ pyuˇ jeˬ hmˬ duˬ-ahˇ dawˆ-euˬ ma.

¹⁴ Kʼoeˇ naˇ, “Nui ma gm-eu jeˬ” lehˇ kuˇ-eu daˇ cuiˇ kʼoeˇ ngaˇ paˇ ngawˬ kʼehꞈ-awˇ Yuˇdaˆ miˇ kʼahˬ hawˇ-eu Iˇsaˬleˬlaˆ miˇ kʼahˬ yaw kaˬ-ahˇ jaˆ luꞈ-eu, mehˇ nmˇ yaw kaˬ nui ma gm-eu jeˬ bi cawˆ-iˇ-euˬ ma.

¹⁵ Kʼoeˇ naˇ, Sahˬpaˬ Miˬyehˇ ngaˬ-ahˇ heu loꞈ-ehˇ ehˇ-eu meh. “Gaˇ dahˇ maˬ tsoeˬ-eu yawˇ bo-eu yaw sahˇ tiˬ poˆ paˇ geuꞈ haw sheˇ.

¹⁶ Yawˇ bo-eu yaw sahˇ tiˬ gʼaˬ-ahˇ kʼehˇ-awˇ, ngaˬ-euˬ yawˇ bi bo-eu lehˇ gʼeh-eu ma. Ehˇ kʼawꞈ shaˬ zahˬ naꞈ-eu yawˇ deuˬ-ahˇ ngehˬ maˬ gʼeh-ehˇ, byoˆ-iˇ-euˬ yawˇ maˬ poˆ kʼoꞈ-eu uˬ taꞈ, naˇ luꞈ-eu yawˇ-ahˇ maˬ laˆ taˬ ni, jawˇ saˇ doˆ-eu yawˇ deuˬ-ahˇ kʼawꞈ dzaˇ maˬ bi dzaˬ-aˇ. Tsuˇ dui dui-eu yawˇ deuˬ-ahˇ aˬ yawꞈ sehꞈ dzaˬ-awˇ, kuiˇ sehˬ toˆ paˆ dzeh tehꞈ-a.

¹⁷ Yawˇ yawˇ maꞈ-ahˇ byehˇ dzeh taˬ-eu, doeˇ dui dui-eu yawˇ bo-eu gʼaˬ, shaˬ dui zahˬ dui ya dui tehꞈ-a. Myaˆ nuiˆ aˇ maˇ paw nuiˆ hawˇ-eu, aˬ laꞈ-ahˇ mi cehˇ deuˆ luꞈ-uˇ. Aˬ laꞈ kʼoeˇ koˆ-iˇ buꞈ-iˇ-awˇ, aˇ maˇ paw nuiˆ behꞈ tsehˆ luꞈ-uˇ.”