Zaˬkaˬliˇ 1 - Akha

Sahˬpaˬ Miˬyehˇ aˬ yawꞈ-euˬ tsawˇ haˬ deuˬ-ahˇ kuˇ kʼoꞈ-eu

¹ Paˇshaˇ miˇ kʼahˬ-ahˇ Daˬliˇ uˆ lahˇ-euˬ nyiˬ kʼoꞈ tiˬ kʼoꞈ ba la yehꞈ siˬ-ahˇ, Iˇdoˬ-euˬ oeˬ paˬ pyeuꞈ-eu Beˬleˬkiˇ-euˬ aˬ li Zaˬkaˬliˇ jawˇ gaˇ, Sahˬpaˬ Miˬyehˇ-euˬ dawˬ keuˆ le-euˬ meh.

² Iˇsaˬleˬlaˆ tsawˇ haˬ deuˬ-ahˇ bi ehˇ nehˬ-eu gʼaˇ duˬ, Baoˬ huiˬ-eu Sahˬpaˬ Miˬyehˇ Zaˬkaˬliˇ-ahˇ heu loꞈ-ehˇ ehˇ nehˬ-euˬ meh. “Sahˬpaˬ Miˬyehˇ pyeuꞈ-eu ngaˇ, naw maꞈ-euˬ aˬ poeˬ aˬ bawˇ deuˬ-ahˇ nui ma pehˇ-euˬ ma.

³ Ehˇ kʼawꞈ, nymˬ-mˇ naw maꞈ ngaˇ jawˇ gaˇ gʼoꞈ laˇ-awˬ. Ngaˇ kʼawꞈ naw maꞈ jawˇ gaˇ gʼoꞈ le ma lehˇ ngaˇ ehˇ-eu ma.

⁴ Naw maꞈ-euˬ aˬ poeˬ aˬ bawˇ deuˬ loꞈ-ehˇ taˬ dehꞈ. Aˇ hu ba, Miˬyehˇ gʼaˇ duˬ ngehˬ dah-euˬ tsawˇ haˬ deuˬ, yaw haiˬ jeˬ maˬ mˇ ni dehꞈ-awˬ lehˇ, aˬ yawꞈ maꞈ-ahˇ mehˬ nehˬ tsoˆ nehˬ-euˬ meh. Ehˇ kʼawꞈ, aˬ yawꞈ maꞈ maˬ naˇ haˬ geuꞈ-aˬ.

⁵ Naw maꞈ-euˬ aˬ poeˬ aˬ bawˇ kʼoeˇ deuˬ hawˇ-eu, Miˬyehˇ gʼaˇ duˬ ngehˬ dah-eu kʼoeˇ deuˬ iˬ nah maˬ paˇ dehꞈ meh.

⁶ Miˬyehˇ gʼaˇ duˬ ngehˬ dah-eu ngaˬ-euˬ zaˬ kʼaˆ deuˬ-ahˇ kʼehˇ-awˇ, naw maꞈ-euˬ aˬ poeˬ aˬ bawˇ deuˬ-ahˇ ngaˬ-euˬ dawˬ biꞈ-eu laꞈ kʼoeˇ, dehꞈ paˇ-eu gʼaˇ duˬ yaw kʼaˆ kʼaˆ-ehˇ mehˬ nehˬ-euˬ kʼawꞈ, aˬ yawꞈ maꞈ maˬ naˇ haˬ geuꞈ-euˬ miˇ neh, yaw kʼaˆ-ehˇ ya shaˬ-euˬ meh. Kʼoeˇ naˇ, aˬ yawꞈ maꞈ iˬ baˇ noeˬ poˆ-awˇ, Baoˬ huiˬ-eu Sahˬpaˬ Miˬyehˇ pyeuꞈ-eu ngaˇ-aˬ, ngaˬ neh noeˬ tsehˆ taˬ-euˬ loꞈ-ehˇ, aˬ yawꞈ maꞈ-ahˇ oꞈ-eu geuˇ-eu kʼehˬ-eu kʼaˆ-eu jeˬ bi keuˆ le-euˬ meh lehˇ, aˬ yawꞈ maꞈ noeˬ siˬ noeˬ mawˇ-euˬ meh.”

Yaw sahˇ laꞈ kʼoeˇ ya siˬ ya mawˇ-euˬ mahˬ deuˬ

⁷ Daˬliˇ sahˬ paˬ geuꞈ-euˬ nyiˬ kʼoꞈ tiˬ kʼoꞈ ba la tseˇ tiꞈ siˬ tiˬ siˬ pyeuꞈ-eu Sheˬbaˆ ba la nyiˬ tseˇ oeˬ nah-ahˇ, uˬ ciꞈ paw yaw sahˇ laꞈ kʼoeˇ ya siˬ ya mawˇ-eu jeˬ laꞈ kʼoeˇ, Sahˬpaˬ Miˬyehˇ-euˬ dawˬ ngaˇ jawˇ gaˇ keuˆ le-euˬ meh.

⁸ Sahˬpaˬ Miˬyehˇ-euˬ mˬ taˆ gʼaˬ kʼehˇ tiˬ gʼaˬ mahˬ yaw neˇ dziˬ luꞈ gaˇ ngaˇ mawˇ-euˬ ma. Deh kʼawꞈ-ahˇ jaˆ-eu muˇtuˇlaˆ aˇ bawˇ bawˇ yaˇ-ahˇ aˬ yawꞈ naˬ le-awˇ, aˬ yawꞈ-euˬ mehˬ nah paw, mahˬ mahˬ neˇ, mahˬ mahˬ puiˇ hawˇ-eu, mahˬ mahˬ pyuˇ dziˬ luꞈ-eu deuˬ ahˇ-eu meh.

⁹ “Yaw huiˬ yaw mahˇ gʼaˬ-oˇ, mahˬ teu deuˬ-euˬ dawˬ tsuiꞈ aˬ jeˬ-a” lehˇ ngaˬ-ahˇ dawˬ ngeh cawˬ-eu gʼaˬ pyeuꞈ-eu mˬ taˆ gʼaˬ kʼehˇ yawˬ gʼaˬ yawˬ-ahˇ ngaˇ naˇ haˬ ngeh, “Mahˬ heu deuˬ-euˬ dawˬ tsuiꞈ ngaˇ nawˬ-ahˇ mehˬ nehˬ ma.

¹⁰ Miˇ tsaˬ-ahˇ bi pyehˆ tseˇ haw-eu gʼaˇ duˬ, Sahˬpaˬ Miˬyehˇ neh pyehˬ gʼeh leꞈ-euˬ mahˬ deuˬ meh” lehˇ ehˇ-eu meh.

¹¹ Kʼoeˇ ngeh, mahˬ dziˬ luꞈ-eu kʼoeˇ deuˬ muˇtuˇlaˆ aˇ bawˇ bawˇ yaˇ-ahˇ naˬ luꞈ-eu mˬ taˆ gʼaˬ kʼehˇ kʼoeˇ gʼaˬ-ahˇ, “Nga maꞈ miˇ tsaˬ dawˬ tawˆ luꞈ cah doe jiˇ-awˇ, dawˬ tawˆ luꞈ ciˬ cuˇ ni jaˆ gaˇ ya mawˇ-euˬ ma” lehˇ ehˇ nehˬ-euˬ meh.

¹² Kʼoeˇ ngeh, mahˬ yaw neˇ dziꞈ luꞈ-eu mˬ taˆ gʼaˬ kʼehˇ kʼoeˇ gʼaˬ ehˇ-eu, “Baoˬ huiˬ-eu Sahˬpaˬ Miˬyehˇ-oˇ, Yeˬluˇsaˬlehˬ meuˬ hawˇ-eu Yuˇdaˆ miˇ kʼahˬ laꞈ kʼoeˇ jaˆ-eu meuˬ deuˬ-ahˇ nawˇ nui ma pehˇ luꞈ-eu shiꞈ tseˇ kʼoꞈ byah laˇ-euˬ meh. Aˬ yawꞈ maꞈ-ahˇ nawˇ gʼawˬ shaˬ maˬ gaˬ nehˬ ni aˇ myah keuˆ ni paˇ byehˇ taˬ-eu gʼeh te.”

¹³ Yaw beh ngaˬ-ahˇ dawˬ ngehˬ cawˬ-euˬ mˬ taˆ gʼaˬ kʼehˇ kʼoeˇ gʼaˬ nui ma saˇ ni Sahˬpaˬ Miˬyehˇ ehˇ kʼoꞈ nehˬ-euˬ meh.

¹⁴ Kʼoeˇ naˇ, Baoˬ huiˬ-eu Sahˬpaˬ Miˬyehˇ neh ehˇ-euˬ dawˬ kʼoeˇ deuˬ dzawˇ gaˬ-iˇ-eu gʼaˇ duˬ, ngaˬ-ahˇ dawˬ ngehˬ cawˬ-eu mˬ taˆ gʼaˬ kʼehˇ kʼoeˇ gʼaˬ ngaˬ-ahˇ kʼehˇ-eu meh. Sahˬpaˬ Miˬyehˇ ehˇ-euˬ dawˬ-aˬ, heu loꞈ-ehˇ meh. “Ngaˬ-euˬ muiˬ-euˬ shawˇ-eu meuˬ pyeuꞈ-eu Yeˬluˇsaˬlehˬ meuˬ-ahˇ ngaˇ gaˬ dui dui-awˇ, maˬ ngehˇ leˇ coeˇ nya.

¹⁵ Nui saˇ oꞈ-awˇ ciˬ cuˇ ni jawˇ luꞈ-eu miˇ kʼahˬ deuˬ-ahˇ ngaˇ nui ma pehˇ dui dui nya. Ngaˬ-euˬ tsawˇ haˬ deuˬ-ahˇ ngaˇ nui ma pehˇ-eu jeˬ ui cuiˆ tehꞈ kʼawꞈ, aˬ yawꞈ maꞈ ngaˬ-euˬ tsawˇ haˬ deuˬ-ahˇ aˇ dzehˬ dzeuˇ ni kʼehˬ-euˬ kʼaˆ-euˬ meh.

¹⁶ Kʼoeˇ miˇ neh, Yeˬluˇsaˬlehˬ meuˬ-ahˇ gʼawˬ shaˬ gaˬ nehˬ-eu gʼaˇ duˬ ngaˇ paˇ gʼoꞈ le-euˬ ma. Ngaˇ nui ma pehˇ-eu jeˬ byoˆ-iˇ-awˇ, ngaˬ-euˬ Uˬ duˬ tahˬ nymˇ nymˇ ma tsoˆ muiˬ-awˇ, meuˬ paˇ gawˬ ziꞈ ma.”

¹⁷ “Ngaˬ-euˬ meuˬ deuˬ paˇ dehꞈ dzaˬ poˆ laˇ-awˇ, Yeˬluˇsaˬlehˬ meuˬ-ahˇ ngaˇ caw ba-awˇ, ngaˬ-euˬ meuˬ paˇ bi geuꞈ ma” lehˇ, Sahˬpaˬ Miˬyehˇ neh ehˇ-euˬ dawˬ kʼoeˇ dawˬ kʼawꞈ dzawˇ gaˬ-iˇ-eu gʼaˇ duˬ, mˬ taˆ gʼaˬ kʼehˇ kʼoeˇ gʼaˬ ngaˬ-ahˇ ehˇ-eu meh.

Yaw sahˇ laꞈ kʼoeˇ ya mawˇ-euˬ uˬ coeˇ deuˬ

¹⁸ Yaw sahˇ laꞈ kʼoeˇ ya siˬ ya mawˇ-eu jeˬ laꞈ kʼoeˇ, mawˇ neˇ uˬ coeˇ oeˬ kahˬ ngaˇ paˇ mawˇ-euˬ ma.

¹⁹ “Uˬ coeˇ teu deuˬ-euˬ dawˬ tsuiꞈ aˬ jeˬ-a” lehˇ, ngaˬ-ahˇ dawˬ ngehˬ cawˬ luꞈ-eu mˬ taˆ gʼaˬ kʼehˇ kʼoeˇ gʼaˬ-ahˇ ngaˇ naˇ haˬ ngeh, “Uˬ coeˇ teu deuˬ-aˬ, Yuˇdaˆ miˇ kʼahˬ, Iˇsaˬleˬlaˆ miˇ kʼahˬ hawˇ-eu, Yeˬluˇsaˬlehˬ meuˬ-ahˇ jawˇ-eu tsawˇ haˬ deuˬ-ahˇ teh byaˆ-euˬ miˇ kʼahˬ deuˬ meh” lehˇ, aˬ yawꞈ ehˇ-eu meh.

²⁰ Kʼoeˇ naˇ, diˬ puˬ baꞈ luꞈ-eu ba jiˬ oeˬ gʼaˬ, Sahˬpaˬ Miˬyehˇ ngaˬ-ahˇ bi mawˇ laꞈ-euˬ meh.

²¹ “Tsawˇ haˬ heu deuˬ aˬ jeˬ gʼeh le-euˬ ta” lehˇ ngaˇ naˇ haˬ ngeh, “Yuˇdaˆ miˇ kʼahˬ-ahˇ geuꞈ-eu jeˬ maˬ ahˇ gaˇ keuˆ ni laˆ cawˆ nehˬ-awˇ, miˇ kʼahˬ zaˬ deuˬ-ahˇ teh byaˆ-euˬ miˇ kʼahˬ kʼoeˇ deuˬ-euˬ baoˬ-ahˇ laˆ guˆ-awˇ bi ga-iˇ ni jahˇ-eu gʼaˇ duˬ, aˬ yawꞈ maꞈ oe-euˬ meh” lehˇ ehˇ-eu meh.