Yoˇhaˬ 3 - Akha

Yeˬsuˇ hawˇ-eu Niˇgawˇdeˬ

¹ Niˇgawˇdeˬ lehˇ myahˇ-euˬ Yuˇdaˆ tsawˇ haˬ aˬ yuiꞈ aˬ tsu tiˬ gʼaˬ jawˇ-eu meh. Aˬ yawꞈ-aˬ, Paˬ liˬ sehˇ aˇ muˇ-ahˇ uˇ-eu tsawˇ haˬ tiˬ gʼaˬ meh.

² Tiˬ miˇ-aˬ, Yeˬsuˇ jawˇ gaˇ aˬ yawꞈ le-awˇ, heu loˬ-ehˇ ehˇ nehˬ-euˬ meh. “Saˬ laˬ-oˇ, nawˇ-aˬ Miˬyehˇ neh kʼehˇ gʼeh leꞈ-euˬ saˬ laˬ tiˬ gʼaˬ meh lehˇ nga maꞈ siˬ nya ma. Miˬyehˇ aˬ yawꞈ laꞈ kʼoeˇ maˬ jawˇ naˇ, tsawˇ haˬ tiˬ gʼaˬ-iˬ nawˬ neh mˇ-euˬ kʼaˆ jeˬ-ehˇ gʼeh-eu heu jeˬ maˬ mˇ mehˬ nya-aˇ.”

³ Yeˬsuˇ ehˇ-eu, “Ngaˇ nawˬ-ahˇ maˇ jawˆ ni ehˇ-eu ma. Tsawˇ haˬ tiˬ gʼaˬ-iˬ nyiˬ poˆ tiˬ poˆ maˬ dehꞈ paˇ naˇ, Miˬyehˇ miˇ kʼahˬ-ahˇ maˬ ya mawˇ-aˇ.”

⁴ Niˇgawˇdeˬ ehˇ-eu, “Tsawˇ kʼaˆ aˬ da tiˬ gʼaˬ nyiˬ poˆ tiˬ poˆ aˬ joˆ-ehˇ paˇ dehꞈ paˇ nya nmˇ. Yawˬ ha aˬ ma-euˬ uˬ maˆ laꞈ kʼoeˇ paˇ uˇ poˆ leˇ-awˇ, nyiˬ poˆ tiˬ poˆ paˇ dehꞈ doˆ le nya tehꞈ-a loˇ.”

⁵ Yeˬsuˇ ehˇ-eu, “Ngaˇ nawˬ-ahˇ maˇ jawˆ ni ehˇ-eu ma. Iˇ cuꞈ laꞈ kʼoeˇ hawˇ-eu Yaw sahˇ Miˬyehˇ laꞈ kʼoeˇ maˬ dehꞈ le-euˬ tsawˇ haˬ-aˬ, Miˬyehˇ Miˇ kʼahˬ laꞈ kʼoeˇ maˬ ya uˇ leˇ-a.

⁶ Tsawˇ haˬ tiˬ gʼaˬ-euˬ shiˬ shaˬ jiˇ gʼawˇ mawˇ-aˬ, aˬ da aˬ ma baˬ da neh dehꞈ le-euˬ jeˬ pyeuꞈ-eu meh. Ehˇ kʼawꞈ, aˬ yawꞈ-euˬ laꞈ kʼoeˇ ahˇ-eu yaw sahˇ-aˬ, Yaw sahˇ Miˬyehˇ baˬ da neh dehꞈ le-euˬ jeˬ pyeuꞈ-eu meh.

⁷ Nyiˬ poˆ tiˬ poˆ paˇ ya dehꞈ paˇ meh lehˇ nawˬ-ahˇ ngaˇ ehˇ-eu baˬ da neh taˬ zahˬ leˇ.

⁸ Jaˬ lehˇ-aˬ, yawˬ ha kʼaˇ baw mawꞈ-eu paw baw gʼeh-eu meh. Jaˬ lehˇ baw-eu teˇ saˇ-ahˇ nawˇ gaˬ nya kʼawꞈ, aˬ gaˇ neh oe-awˇ aˬ geu paw iˇ-eu nawˇ maˬ siˬ nya-a. Yaw sahˇ Miˬyehˇ laꞈ kʼoeˇ dehꞈ le-eu tsawˇ haˬ yawˬ gʼaˬ na luꞈ kʼoeˇ gaˇ duˇ-eu meh.”

⁹ Niˇgawˇdeˬ ehˇ-eu, “Teu loꞈ-ehˇ aˬ joˆ-ehˇ pyeuꞈ nya ta.”

¹⁰ Yeˬsuˇ ehˇ-eu, “Nawˇ-aˬ, Iˇsaˬleˬlaˇ miˇ kʼahˬ laꞈ kʼoeˇ saˬ laˬ yaw huiˬ tiˬ gʼaˬ pyeuꞈ-eu kʼawꞈ, ngaˇ ehˇ gaˇ aˬ joˆ-ehˇ maˬ gʼoˆ shaw nya-eu nya.

¹¹ Ngaˇ nawˬ-ahˇ aˬ diˇ aˬ maˇ ngeuˇ-eu jeˬ ehˇ nehˬ luꞈ-eu ma. Nga maꞈ ya siˬ-euˬ jeˬ ja mehˬ-awˇ, nga maꞈ ya mawˇ-euˬ jeˬ dzawˇ mehˬ-eu kʼawꞈ, naw maꞈ tiˬ gʼaˬ-iˬ nga maꞈ neh ehˇ-euˬ jeˬ-ahˇ maˬ ha geuꞈ mawꞈ-a.

¹² Miˇ tsaˬ heu kʼoeˇ taˆ pyeuꞈ luꞈ-eu gaˇ kawˆ deuˬ ngaˇ ja mehˬ gaˇ naw maꞈ maˬ jah-eu-aˬ, mˬ kʼoeˇ taˆ pyeuꞈ luꞈ-eu gaˇ kawˆ deuˬ ngaˇ ja mehˬ gaˇ naw maꞈ aˬ joˆ-ehˇ paˇ jah coeˇ nmˇ.

¹³ Mˬ kʼoeˇ taˆ neh zaꞈ ka le-euˬ gʼaˬ pyeuꞈ-eu Tsawˇ haˬ-euˬ Zaˬmaˇ maˬ ngeuˇ naˇ, tsawˇ haˬ tiˬ gʼaˬ-iˬ mˬ kʼoeˇ taˆ maˬ le keuˆ haw-aˬ.”

¹⁴ Moˇseˬ neh bawˇ tsahˬ-ahˇ guiˬ shuiˇ aˇ lawˇ mawˇ kawˇ kʼoeˇ kawˇ ka tuˇ-euˬ loꞈ-ehˇ, Tsawˇ haˬ-euˬ Zaˬmaˇ-ahˇ aˬ cawˬ kʼoeˇ loꞈ-ehˇ ka tuˇ tehꞈ-a.

¹⁵ Kʼoeˇ miˇ neh, aˬ yawꞈ-ahˇ kʼaˇ jah-eu tsawˇ haˬ yawˬ gʼaˬ na luꞈ, aˬ yawꞈ laꞈ kʼoeˇ mˬ maˬ maˬ byaˆ zaˇ ziˇ dehꞈ-eu jeˬ za tehꞈ-a.

¹⁶ Miˬyehˇ miˇ tsaˬ zaˬ-ahˇ gaˬ dui dui-eu miˇ neh, aˬ yawꞈ-euˬ Zaˬmaˇ tiˬ gʼaˬ tehꞈ kʼawꞈ biꞈ nehˬ leꞈ-euˬ meh. Zaˬmaˇ-ahˇ kʼaˇ jah-eu tsawˇ haˬ maˬ ya cawˆ-iˇ-eu uˬ taꞈ, mˬ maˬ maˬ byaˆ zaˇ ziˇ dehꞈ-eu jeˬ za-eu meh.

¹⁷ Aˬ jeˬ miˇ neh ehˇ naˇ, Miˬyehˇ neh aˬ yawꞈ-euˬ Zaˬmaˇ-ahˇ kʼehˇ gʼeh leꞈ-euˬ kʼoeˇ-aˬ, miˇ tsaˬ zaˬ deuˬ-ahˇ yaˇ kʼaˬ bi daˇ-eu gʼaˇ duˬ maˬ ngeuˇ-a. Bi ka kʼoꞈ-eu gʼaˇ duˬ meh.

¹⁸ Zaˬmaˇ-ahˇ kʼaˇ jah-eu tsawˇ haˬ-aˬ, yaˇ kʼaˬ daˇ gaˇ maˬ ya daˬ-a. Ehˇ kʼawꞈ, maˬ jah-eu tsawˇ haˬ-aˬ, Miˬyehˇ-euˬ Zaˬmaˇ-ahˇ maˬ jah-eu kʼoeˇ baˬ da neh, nymˬ-mˇ mi naˆ-ehˇ yaˇ kʼaˬ daˇ tsehˆ taˬ-euˬ gaˇ ya daˬ luꞈ meh.

¹⁹ Yaˇ kʼaˬ daˇ-eu kʼoeˇ-aˬ, heu loꞈ-ehˇ meh. Yaw shehꞈ kʼoeˇ miˇ tsaˬ kʼoeˇ taˆ oe-euˬ kʼawꞈ, tsawˇ haˬ zaˬ deuˬ yaw shehꞈ-ahˇ naˆ maˬ tseˇ yaw zahˇ-ahˇ gaˬ-eu meh. Aˬ jeˬ miˇ neh ehˇ naˇ, aˬ yawꞈ maꞈ yaw haiˬ jeˬ mˇ-eu meh.

²⁰ Yaw haiˬ jeˬ mˇ-eu tsawˇ haˬ-aˬ, yaw shehꞈ-ahˇ bye-awˇ, yaw shehꞈ jaˆ gaˇ maˬ laˇ-a. Aˬ jeˬ miˇ neh ehˇ naˇ, aˬ yawꞈ neh mˇ-euˬ yaw haiˬ jeˬ-ahˇ aˬ cawˬ mawˇ gaˇ guˆ-eu meh.

²¹ Ehˇ kʼawꞈ, yaw tsaˬ yaw dawˇ jeˬ mˇ-eu tsawˇ haˬ-aˬ, aˬ yawꞈ neh mˇ-euˬ jeˬ Miˬyehˇ nui kʼahˇ shiˇ-eu jeˬ pyeuꞈ-eu gaˇ kawˆ yaw shehꞈ laꞈ kʼoeˇ bya cehˆ ni bi doˆ laˇ-eu gʼaˇ duˬ, yaw shehꞈ jaˆ gaˇ laˇ-eu meh.

Yeˬsuˇ huiˬ dzehˬ meh lehˇ Yoˇhaˬ ehˇ-eu

²² Kʼoeˇ naˇ Yeˬsuˇ hawˇ-eu aˬ yawꞈ-euˬ zaˬ lahˇ deuˬ Yuˇdaˆ miˇ kʼahˬ-ahˇ iˇ-awˇ, aˬ yawꞈ maꞈ nehˬ-ehˇ kʼoeˇ gaˇ heu myaˆ jaw jawˇ-awˇ, aˬ cawˬ-ahˇ iˇ cuꞈ shawˇ nehˬ-euˬ meh.

²³ Yoˇhaˬ kʼawꞈ, Saˬliˬ meuˬ-ahˇ yaw kʼaˆ-ehˇ maˬ kaˬ-eu Eˇnoˬ lehˇ kuˇ-eu jawˇ duˬ-ahˇ iˇ cuꞈ shawˇ nehˬ luꞈ-eu meh. Aˬ jeˬ miˇ neh ehˇ naˇ, jawˇ duˬ kʼoeˇ tsahˇ iˇ cuꞈ yaw yehꞈ meh. Aˬ cawˬ aˬ yawꞈ jawˇ gaˇ iˇ iˇ-ehˇ, aˬ yawꞈ neh iˇ cuꞈ bi shawˇ nehˬ-eu meh.

²⁴ (Kʼoeˇ-aˬ, Yoˇhaˬ-ahˇ paꞈ kuˆ laꞈ kʼoeˇ maˬ nyehꞈ ahˇ mi naˆ-ehˇ meh.)

²⁵ Yoˇhaˬ-euˬ zaˬ lahˇ tiˬ paˆ na deuˬ Yuˇdaˆ tsawˇ haˬ tiˬ gʼaˬ nehˬ-ehˇ, gʼawˇ mawˇ shawˇ-eu zahˇ jahˇ-eu gaˇ kawˆ tsawˇ pyehˇ pyehˇ luꞈ-eu meh.

²⁶ Kʼoeˇ miˇ neh, aˬ yawꞈ maꞈ Yoˇhaˬ jawˇ gaˇ le-awˇ ehˇ nehˬ-eu, “Saˬ laˬ-oˇ, Yawˇdaˬ lawˇ baˬ nahˇ ma doˆ kʼehˬ paw baˬ-ahˇ nawˬ nehˬ-ehˇ oe-awˇ, nawˇ aˬ yawꞈ gaˇ kawˆ saˇ kiˇ kamˬ-euˬ tsawˇ haˬ kʼoeˇ gʼaˬ nymˬ-mˇ iˇ cuꞈ shawˇ nehˬ luꞈ meh. Tsawˇ haˬ gʼawˬ mya ni aˬ yawꞈ jawˇ gaˇ iˇ luꞈ meh.”

²⁷ Yoˇhaˬ ehˇ-eu, “Tsawˇ haˬ aˬ geu gʼaˬ maˬ kaˬ, Miˬyehˇ neh maˬ biꞈ-euˬ gaˇ tiˬ jeˬ-iˬ maˬ za nya-a.

²⁸ ‘Ngaˇ-aˬ, Ka li maˬ ngeuˇ. Ka li-euˬ mehˬ hu Miˬyehˇ neh kʼehˇ gʼeh leꞈ-euˬ gʼaˬ tehꞈ ma’ lehˇ ehˇ-eu naw maꞈ gaˬ duˬ taˬ-euˬ meh.

²⁹ Smˇ miˇ iˇ-eu zaˬ miˬ-aˬ, miˬ zaˬ laˬ-eu zaˬ yo-ahˇ oꞈ-eu meh. Miˬ zaˬ sheuˬ-eu gʼaˬ-euˬ dawˬ peh yawꞈ caw nehˬ-awˇ naˇ haˬ luꞈ-eu aˬ yawꞈ-euˬ cawˬ kʼoeˇ gʼaˬ-aˬ, miˬ zaˬ sheuˬ-eu gʼaˬ-euˬ dawˬ-ahˇ ya gaˬ ngeh, laˬ kʼaˬ cehˇ-eu meh. Kʼoeˇ gaˇ duˇ ni, nymˬ-mˇ ngaˇ laˬ kʼaˬ cehˇ-eu jeˬ byah miˇ-a.

³⁰ Aˬ yawꞈ-euˬ mehˬ nah caw teh-eu tsawˇ haˬ deuˬ ya myaˬ laˇ-awˇ, ngaˬ-euˬ mehˬ nah caw teh-eu tsawˇ haˬ deuˬ ya cuiˆ-iˇ tehꞈ-a.”

Mˬ-ahˇ neh oe-euˬ gʼaˬ huiˬ dui mahˇ dui dui-eu

³¹ Mˬ-ahˇ neh oe-euˬ gʼaˬ-aˬ, dawˬ tawˆ kʼoeˇ taˆ huiˬ dzehˬ-eu meh. Miˇ tsaˬ kʼoeˇ taˆ jawˇ-eu gʼaˬ-aˬ, miˇ tsaˬ-ahˇ taꞈ-awˇ, miˇ tsaˬ kʼoeˇ taˆ-euˬ gaˇ kawˆ tehꞈ-ehˇ ngehˬ-eu tmˇ-eu meh. Ehˇ kʼawꞈ, mˬ-ahˇ neh oe-euˬ gʼaˬ-aˬ, dawˬ tawˆ luꞈ kʼoeˇ taˆ huiˬ dzehˬ-eu gʼaˬ meh.

³² Aˬ yawꞈ neh ya gaˬ ya mawˇ-euˬ jeˬ aˬ yawꞈ ja mehˬ-eu meh. Ehˇ kʼawꞈ, aˬ yawꞈ ehˇ gaˇ tiˬ gʼaˬ-iˬ maˬ jah-a.

³³ Aˬ yawꞈ ehˇ gaˇ kʼaˇ jah-eu tsawˇ haˬ-aˬ, Miˬyehˇ-euˬ dawˬ tsaˬ meh lehˇ jah gaˇ duˇ-eu meh.

³⁴ Miˬyehˇ neh kʼehˇ gʼeh leꞈ-euˬ gʼaˬ-aˬ, Miˬyehˇ-euˬ dawˬ ngehˬ-eu meh. Aˬ jeˬ miˇ neh ehˇ naˇ, aˬ yawꞈ-ahˇ Miˬyehˇ-euˬ Yaw sahˇ tiˬ byah ni biꞈ taˬ-euˬ meh.

³⁵ Aˬda-aˬ, Zaˬmaˇ-ahˇ gaˬ-eu miˇ neh, yawˬ jeˬ na luꞈ aˬ yawꞈ-ahˇ a nehˬ jiˇ taˬ-euˬ meh.

³⁶ Zaˬmaˇ-ahˇ kʼaˇ jah-eu tsawˇ haˬ-aˬ, mˬ maˬ maˬ byaˆ zaˇ ziˇ dehꞈ-eu jeˬ za-eu meh. Zaˬmaˇ-ahˇ maˬ jah-eu tsawˇ haˬ-aˬ, dehꞈ-eu jeˬ maˬ za-ehˇ, Miˬyehˇ kʼehˬ nehˬ kʼaˆ nehˬ-eu uˬ moˆ ya jawˇ tehꞈ-a.