Yoˇhaˬ 21 - Akha

Zaˬ lahˇ shiꞈ gʼaˬ-ahˇ Yeˬsuˇ gʼawˇ mawˇ bi mawˇ le-euˬ

¹ Kʼoeˇ naˇ, Deˬbeˬliˇ lah lah dzeˇ, zaˬ lahˇ deuˬ jawˇ gaˇ Yeˬsuˇ tiˬ poˆ paˇ doˆ le-euˬ meh. Gaˇ kawˆ kʼoeˇ-aˬ, heu loꞈ-ehˇ meh.

² Siˇmoˬ Beˬtuˆluˆ, nyiˬ gʼaˬ dehꞈ le-euˬ lehˇ kuˇ-eu Toˇmaˆ, Gaˬliˬlehˇ miˇ kʼahˬ Gaˬnaˬ meuˬ-ahˇ jawˇ-eu Naˬdaˬneˬlaˇ, Zeˬbeˬdehˇ-euˬ aˬ li nyiˬ li, kʼoeˇ maˬ ngeuˇ-eu Yeˬsuˇ-euˬ zaˬ lahˇ nyiˬ gʼaˬ, heu deuˬ tiˬ kawˆ loꞈ-ehˇ jawˇ luꞈ-eu meh.

³ “Ngaˇ za dzeh-iˇ la” lehˇ Siˇmoˬ Beˬtuˆluˆ aˬ yawˬ maꞈ-ahˇ ehˇ nehˬ ngeh, “Nga maꞈ gʼeh nawˬ nehˬ-ehˇ iˇ ma” lehˇ aˬ yawꞈ maˬ ehˇ-eu meh. Kʼoeˇ naˇ, aˬ yawꞈ maꞈ lawˬ dziˬ-awˇ doˆ-iˇ-euˬ meh. Ehˇ kʼawꞈ, kʼoeˇ ngeh miˇ miˇ lah-ehˇ, aˬ yawꞈ maꞈ ngaˬ shaˬ tiˬ mawˇ-iˬ maˬ dzeh mi nya-a.

⁴ Uˬ shawˬ paw nahˇ ma doˆ laˇ ngeh, Yeˬsuˇ lah lah dzeˇ yawꞈ luꞈ-eu meh. Ehˇ kʼawꞈ, Yeˬsuˇ nga lehˇ zaˬ lahˇ deuˬ maˬ haw siˬ-aˬ.

⁵ “Zaˬ guˬ deuˬ-oˇ, ngaˬ shaˬ dzeh mi maˬ loˇ” lehˇ Yeˬsuˇ naˇ haˬ ngeh, “Maˬ dzeh mi-aˬ” lehˇ aˬ yawꞈ maꞈ ehˇ kʼoꞈ nehˬ-euˬ meh.

⁶ “Lawˬ-euˬ aˇ maˇ paw dzeh ahˇ gʼeh-awˬ. Ngaˬ shaˬ mi laˇ tehꞈ-a” lehˇ Yeˬsuˇ aˬ yawꞈ maꞈ-ahˇ ehˇ nehˬ ngeh, aˬ yawꞈ maꞈ dzeh ahˇ gʼeh-awˇ, ngaˬ shaˬ paꞈ dui dui leˇ-euˬ miˇ neh, za maˬ gʼeu kʼoꞈ coeˇ-a.

⁷ Yeˬsuˇ gaˬ dui dui-eu zaˬ lahˇ kʼoeˇ gʼaˬ Beˬtuˇluˆ-ahˇ, “Tsawˇ haˬ kʼoeˇ gʼaˬ Sahˬpaˬ Yeˬsuˇ nga” lehˇ ehˇ nehˬ-euˬ meh. Sahˬpaˬ Yeˬsuˇ nga lehˇ ehˇ gaˇ Beˬtuˆluˆ ya gaˬ ngeh, mehˬ tsoeˬ gʼeu dm-awˇ iˇ cuꞈ-ahˇ tsawˬ puꞈ-euˬ meh. Aˬ jeˬ miˇ neh ehˇ naˇ, aˬ yawꞈ mehˬ tsoeˬ maˬ dm ni za dzeh luꞈ-eu meh.

⁸ Zaˬ lahˇ nui deuˬ-aˬ, lawˬ heu-awˇ, ngaˬ shaˬ tiˬ byah ni paꞈ leˇ taˬ-euˬ za-ahˇ lah lah dzeˇ gʼeu doˆ laꞈ-eu meh. Aˬ yawꞈ maꞈ za dzeh-euˬ kʼoeˇ-aˬ, lah lah dzeˇ-ahˇ neh ngaˬ tseˇ lmˇ ehˇ gʼaˬ ni kaˬ-eu tehꞈ meh.

⁹ Aˬ yawꞈ maꞈ dahˇ taˆ daˆ doˆ laˇ ngeh, kʼaˬ gʼeuˬ baw doꞈ taˬ-euˬ gaˇ ngaˬ shaˬ tehˬ ba taˬ-awˇ, kaˬ muˇ gʼeh jaˆ luˬ gaˇ ya mawˇ-euˬ meh.

¹⁰ “Naw maꞈ neh nymˬ-mˇ dzeh mi-euˬ ngaˬ shaˬ teu ui cuiˆ hehˇ laꞈ-awˬ” lehˇ, aˬ yawꞈ maꞈ-ahˇ Yeˬsuˇ ehˇ nehˬ-euˬ meh.

¹¹ Siˇmoˬ Beˬtuˆluˆ lawˬ-ahˇ uˇ-iˇ-awˇ, ngaˬ shaˬ yaw huiˬ tiˬ byah ni paꞈ leˇ taˬ-euˬ za-ahˇ lah lah dzeˇ gʼeu doˆ laꞈ-euˬ meh. Ngaˬ shaˬ yaw huiˬ kʼoeˇ dawˬ tawˆ luꞈ tiˬ yaˇ ngaˬ tseˇ smˬ mawˇ byah-eu meh. Ngaˬ shaˬ kʼoeˇ myaˆ myaˆ-ehˇ dzeh paꞈ-euˬ kʼawꞈ, za kʼoeˇ kahˇ maˬ pyaˬ-iˇ ni jaˆ-eu meh.

¹² Yeˬsuˇ aˬ yawꞈ maꞈ-ahˇ “Shawˬ hawˬ dzaˬ laˇ-awˬ” lehˇ ehˇ nehˬ-euˬ meh. Zaˬ lahˇ kʼoeˇ deuˬ aˬ yawꞈ-ahˇ “Nawˇ aˬ suˇ gʼaˬ te” lehˇ tiˬ gʼaˬ-iˬ maˬ naˇ haˬ peuˬ-a. Aˬ jeˬ miˇ neh ehˇ naˇ, aˬ yawꞈ Sahˬpaˬ Yeˬsuˇ meh lehˇ aˬ yawꞈ maꞈ siˬ nya-eu meh.

¹³ Yeˬsuˇ kaˬ muˇ yuˇ laˬ-iˇ-awˇ, aˬ yawꞈ maꞈ-ahˇ biˇ nehˬ-euˬ meh. Ngaˬ shaˬ tehˬ ba-euˬ kʼoeˇ kʼawꞈ paˇ yuˇ laˬ-iˇ-awˇ biˇ nehˬ-euˬ meh.

¹⁴ Heu-aˬ, Yeˬsuˇ gʼoꞈ dehꞈ laˇ gʼaˬ miˇ tsa, zaˬ lahˇ deuˬ jawˇ gaˇ doˆ le-euˬ smˬ poˆ tiˬ poˆ pyeuꞈ-eu meh.

“Nawˇ ngaˬ-ahˇ gaˬ ma loˇ” lehˇ Beˬtuˆluˆ-ahˇ Yeˬsuˇ naˇ haˬ-euˬ

¹⁵ Aˬ yawꞈ maꞈ dzaˬ gʼaˬ dawˇ gʼaˬ ngeh, Siˇmoˬ Beˬtuˆluˆ-ahˇ Yeˬsuˇ naˇ haˬ-eu, “Yoˇhaˬ-euˬ aˬ li Siˇmoˬ-oˇ, tsawˇ haˬ heu deuˬ ngaˬ-ahˇ gaˬ-eu naˆ maˬ tseˇ nawˇ ngaˬ-ahˇ gaˬ ma loˇ.” Beˬtuˆluˆ ehˇ-eu, “Gaˬ ma Sahˬpaˬ-oˇ. Ngaˇ nawˬ-ahˇ gaˬ-eu nawˇ siˬ nya meh.” Yeˬsuˇ aˬ yawꞈ-ahˇ ehˇ nehˬ-eu, “Yawˇ zaˬ-ahˇ bo saˆ-eu loꞈ-ehˇ, ngaˬ-euˬ yawˇ deuˬ-ahˇ bo saˆ-awˬ.”

¹⁶ Yeˬsuˇ aˬ yawꞈ-ahˇ nyiˬ poˆ tiˬpoˆ paˇ naˇ haˬ-eu, “Yoˇhaˬ-euˬ aˬ li Siˇmoˬ-oˇ, nawˇ ngaˬ-ahˇ gaˬ ma loˇ.” Aˬ yawꞈ ehˇ-eu, “Gaˬ ma Sahˬpaˬ-oˇ. Ngaˇ nawˬ-ahˇ gaˬ-eu nawˇ siˬ nya meh. Yeˬsuˇ aˬ yawꞈ-ahˇ ehˇ nehˬ-eu, “Ngaˬ-euˬ yawˇ deuˬ-ahˇ bo saˆ-awˬ.”

¹⁷ Yeˬsuˇ aˬ yawꞈ-ahˇ smˬ poˆ tiˬ poˆ paˇ naˇ haˬ-eu, “Yoˇhaˬ-euˬ aˬ li Siˇmoˬ-oˇ, nawˇ ngaˬ-ahˇ gaˬ ma loˇ.” “Nawˇ ngaˬ-ahˇ gaˬ ma loˇ” lehˇ Yeˬsuˇ aˬ yawꞈ-ahˇ smˬ poˆ naˇ haˬ keuˆ laꞈ-euˬ miˇ neh, Beˬtuˆluˆ nui ma maˬ saˇ-ehˇ, heu loꞈ-ehˇ ehˇ kʼoꞈ nehˬ-euˬ meh. “Sahˬpaˬ-oˇ, nawˇ yawˬ jeˬ na luꞈ siˬ nya meh. Ngaˇ nawˬ-ahˇ aˇ naˆ ni gaˬ-eu nawˇ siˬ nya meh.” Yeˬsuˇ aˬ yawꞈ-ahˇ ehˇ nehˬ-eu, “Ngaˬ-euˬ yawˇ deuˬ-ahˇ bo saˆ-awˬ.

¹⁸ Ngaˇ nawˬ-ahˇ maˇ jawˆ ni ehˇ nehˬ nyaˇ. Nawˇ zaˬ guˬ pyeuꞈ ngeh, yawˬ haˇ yawˬ ha joꞈ paꞈ paꞈ deuˇ-awˇ, yawˬ ha kʼaˇ iˇ mawꞈ gaˇ iˇ-euˬ meh. Ehˇ kʼawꞈ, nawˇ tsawˇ mawˬ mawˬ le ngeh, nawˬ-euˬ aˬ laꞈ cawˬ diˇ nehˬ-awˇ, aˬ cawˬ neh joꞈ paꞈ bi paꞈ-awˇ, yawˬ ha maˬ iˇ mawꞈ gaˇ bi tsahˇ gʼeh tehꞈ-a.”

¹⁹ (Yeˬsuˇ kʼoeˇ loꞈ-ehˇ ehˇ-eu kʼoeˇ-aˬ, Miˬyehˇ-euˬ yaw shehꞈ kʼahˬ sehˇ-ahˇ aˬ cawˬ ya mawˇ ni, aˬ kaˇ Beˬtuˆluˆ aˬ joˆ-ehˇ ya shiˇ-eu gaˇ kawˆ-ahˇ toeˬ mehˬ mawꞈ-euˬ jeˬ pyeuꞈ-eu meh.) Kʼoeˇ naˇ, Beˬtuˆluˆ-ahˇ Yeˬsuˇ ehˇ nehˬ-eu, “Ngaˬ-euˬ mehˬ nah laˇ gʼeh laꞈ-awˬ.”

Yeˬsuˇ gaˬ dui dui-eu zaˬ lahˇ gaˇ kawˆ Yeˬsuˇ ehˇ-eu

²⁰ Beˬtuˆluˆ zeuˆ pyawˇ haw ngeh, Yeˬsuˇ gaˬ dui dui-eu zaˬ lahˇ kʼoeˇ gʼaˬ aˬ yawꞈ-euˬ mehˬ nah cah luꞈ gaˇ ya mawˇ-euˬ meh. Zaˬ lahˇ kʼoeˇ gʼaˬ-aˬ, ciꞈ hawˬ dzaˬ taꞈ ngeh miˇ Yeˬsuˇ-euˬ dawˬ peh tah tehˬ leˇ-awˇ, “Sahˬpaˬ-oˇ, nawˬ-ahˇ ahˬ dzaˬ-eu lehˇ gʼeh-eu aˬ suˇ gʼaˬ-a” lehˇ naˇ haˬ-euˬ kʼoeˇ gʼaˬ meh.

²¹ Beˬtuˆluˆ zaˬ lahˇ kʼoeˇ gʼaˬ-ahˇ mawˇ ngeh, Yeˬsuˇ-ahˇ heu loꞈ-ehˇ naˇ haˬ-euˬ meh. “Sahˬpaˬ-oˇ, heu gʼaˬ toe. Aˬ yawꞈ-euˬ gʼaˇ duˬ mehˬ hu paw aˬ joˆ-ehˇ jaˆ ta.”

²² Yeˬsuˇ ehˇ-eu, “Ngaˇ oe ngeh keuˆ ni aˬ yawꞈ-ahˇ ngaˇ bi dehꞈ keuˆ mawꞈ lawˬ naˇ, nawˇ aˬ jeˬ kʼahˇ kʼoꞈ kʼaˇ za ta. Ngaˬ-euˬ mehˬ nah laˇ gʼeh laꞈ-awˬ.”

²³ Kʼoeˇ ngeh jawˇ, zaˬ lahˇ kʼoeˇ gʼaˬ shiˇ-eu maˬ paˇ baw meh jeˇ lehˇ, Yeˬsuˇ-euˬ mehˬ nah caw teh luꞈ-eu tsawˇ haˬ deuˬ yaw kaˬ ja byah taˬ-euˬ meh. Ehˇ kʼawꞈ, zaˬ lahˇ kʼoeˇ gʼaˬ maˬ shiˇ-a lehˇ Yeˬsuˇ ehˇ mawꞈ-eu maˬ ngeuˇ-a. “Ngaˇ oe ngeh keuˆ ni aˬ yawꞈ-ahˇ bi dehꞈ keuˆ mawꞈ lawˬ naˇ, nawˇ aˬ jeˬ kʼahˇ kʼoꞈ kʼaˇ za ta” lehˇ ehˇ-euˬ tehꞈ meh.

²⁴ Zaˬ lahˇ kʼoeˇ gʼaˬ-aˬ, gaˇ kawˆ heu deuˬ saˇ kiˇ kamˬ-euˬ gʼaˬ pyeuꞈ-eu uˬ taꞈ, boꞈ doˆ-euˬ gʼaˬ kʼawꞈ pyeuꞈ-eu meh. Aˬ yawꞈ neh ehˇ-euˬ gaˇ kawˆ heu deuˬ maˇ maˇ ni ngeuˇ meh lehˇ aˬ dui siˬ nya-eu ma.

Yeˬsuˇ neh mˇ-euˬ jeˬ maˬ boꞈ doˆ jiˇ coeˇ-a

²⁵ Yeˬsuˇ neh mˇ-euˬ gaˇ gʼawˬ mya ni jaˆ-a siˬ. Aˬ yawꞈ neh kʼaˇ mˇ-euˬ gaˇ deuˬ tiˬ jeˬ saˇ-iˬ tiˬ jeˬ boꞈ doˆ jiˇ naˇ, boꞈ doˆ-euˬ sahˬ boꞈ paˇ dmˬ kʼoeˇ deuˬ miˇ tsaˬ heu kʼoeˇ taˆ maˬ deˇ leˇ-aˇ lehˇ ngaˇ noeˬ-eu ma.