Yoˇhaˬ 18 - Akha

Yeˬsuˇ-ahˇ nyehꞈ-euˬ

¹ Yeˬsuˇ kʼoeˇ loꞈ-ehˇ guiˬ lahˬ shaˇ gʼaˬ ngeh, aˬ yawꞈ-euˬ zaˬ lahˇ deuˬ sheuˬ-awˇ, Giˇdaˬloˬ lawˇ gawˆ nui baˬ paw iˇ-euˬ meh. Kʼoeˇ gaˇ yaˇ kmˇ tiˬ kmˇ jaˆ-awˇ, Yeˬsuˇ hawˇ-eu aˬ yawꞈ-euˬ zaˬ lahˇ deuˬ yaˇ kmˇ kʼoeˇ kmˇ laꞈ kʼoeˇ uˇ leˇ-euˬ meh.

² Yeˬsuˇ-ahˇ ahˬ dzaˬ-euˬ Yuˇdaˆ kʼoeˇ gʼaˬ kʼawꞈ, yaˇ kmˇ kʼoeˇ kmˇ jaˆ-eu jawˇ duˬ siˬ nya-eu meh. Aˬ jeˬ miˇ neh ehˇ naˇ, Yeˬsuˇ aˬ yawꞈ-euˬ zaˬ lahˇ deuˬ-ahˇ yaˇ kmˇ kʼoeˇ kmˇ laꞈ kʼoeˇ gʼawˬ mya poˆ mawˇ dzoeˇ haw-euˬ meh.

³ Yuˇdaˆ-aˬ, Loˇmaˆ yehˇ yehˇ maꞈ tiˬ maꞈ hawˇ-eu, piˇ ma aˬ yuiꞈ deuˬ hawˇ-eu Paˬliˬsehˇ deuˬ neh kʼehˇ gʼeh leꞈ-euˬ Uˬ duˬ tahˬ nymˇ nymˇ ma-ahˇ loꞈ-eu yehˇ deuˬ sheuˬ-awˇ, yaˇ kmˇ kʼoeˇ kmˇ-ahˇ iˇ-euˬ meh. Aˬ yawꞈ maꞈ-aˬ, guiˇ deuˆ-eu keu ka yuˇ-awˇ, tsiˇ kʼmˬ hawˇ-eu tsiˇ du keuˬ-awˇ iˇ-euˬ meh.

⁴ Yeˬsuˇ-aˬ, aˬ yawꞈ-euˬ kʼoeˇ taˆ keu le luꞈ-eu yawˬ jeˬ na luꞈ-ahˇ siˬ nya-eu miˇ neh, mehˬ hu paw le doˆ-awˇ, “Naw maꞈ aˬ suˇ gʼaˬ-ahˇ poˆ te” lehˇ ehˇ nehˬ-euˬ meh.

⁵ “Naˬzaˬlehˇ meuˬ-ahˇ jawˇ-eu Yeˬsuˇ-ahˇ poˆ-eu ma” lehˇ aˬ yawꞈ maꞈ ehˇ-eu meh. “Ngaˇ Yeˬsuˇ ma” lehˇ aˬ yawꞈ ehˇ kʼoꞈ nehˬ-euˬ meh. Yeˬsuˇ-ahˇ ahˬ dzaˬ-euˬ Yuˇdaˆ gʼeh, tsawˇ haˬ kʼoeˇ deuˬ nehˬ-ehˇ yawꞈ luꞈ-eu meh.

⁶ “Ngaˇ Yeˬsuˇ ma” lehˇ aˬ yawꞈ maꞈ-ahˇ Yeˬsuˇ ehˇ nehˬ ngeh, aˬ yawꞈ maꞈ naˇ kʼah paw jiˆ kʼoꞈ-iˇ-awˇ sehˇ pyaˆ-ehˇ coˬ-iˇ-euˬ meh.

⁷ “Naw maꞈ aˬ suˇ gʼaˬ-ahˇ poˆ te” lehˇ Yeˬsuˇ tiˬ poˆ paˇ naˇ haˬ-euˬ meh. “Naˬzaˬlehˇ meuˬ-ahˇ jawˇ-eu Yeˬsuˇ-ahˇ poˆ-eu ma” lehˇ aˬ yawꞈ maꞈ paˇ ehˇ-eu meh.

⁸ Yeˬsuˇ ehˇ-eu, “Ngaˇ Yeˬsuˇ ma lehˇ naw maꞈ-ahˇ ehˇ nehˬ luꞈ-eu ma tawˇ. Naw maꞈ ngaˬ-ahˇ poˆ-eu ngeuˇ naˇ, ngaˬ-euˬ mehˬ nah caw teh-eu tsawˇ haˬ heu deuˬ-ahˇ maˬ nyehꞈ ni bi goꞈ-iˇ-awˬ.”

⁹ Yeˬsuˇ kʼoeˇ loꞈ-ehˇ ehˇ-eu kʼoeˇ-aˬ, “Aˬda-oˇ, nawˬ neh ngaˬ-ahˇ biꞈ laꞈ-euˬ tsawˇ haˬ tiˬ gʼaˬ-iˬ maˬ bi byoˆ-iˇ-aˬ” lehˇ, aˬ yawꞈ neh ehˇ taˬ-euˬ dawˬ kʼoeˇ dawˬ bi byah laˇ-eu gʼaˇ duˬ pyeuꞈ-eu meh.

¹⁰ Siˇmoˬ Beˬtuˆluˆ mi cehˇ tiˬ kahˇ ahˇ-eu meh. Aˬ yawꞈ mi cehˇ kʼoeˇ kahˇ gʼawˇ doˆ-awˇ, Piˇ ma Yaw huiˬ gʼaˬ-euˬ zaˬ kʼaˆ-ahˇ coeˇ-awˇ, naˬ paꞈ aˇ maˇ pyawˬ coeˇ tsehˆ dzeh-euˬ meh. Zaˬ kʼaˆ kʼoeˇ gʼaˬ-euˬ tsawˇ myahˇ-aˬ, Maˬlaˬkuˇ meh.

¹¹ Beˬtuˆluˆ-ahˇ Yeˬsuˇ ehˇ nehˬ-eu, “Nawˬ-euˬ mi cehˇ paˇ soeˬ ahˇ kʼoꞈ-awˬ. Nga Da neh ngaˬ-ahˇ bi dawˇ laꞈ-euˬ kʼaˬ dui dui-eu kʼmˬ maˬ heu-ahˇ ngaˇ maˬ dawˇ-aˇ lehˇ nawˇ noeˬ te loˇ.”

Yeˬsuˇ-ahˇ Aˬna mehˬ shi sheuˬ ha leˇ-euˬ

¹² Kʼoeˇ ngeh, Loˇmaˆ yehˇ kʼoeˇ maꞈ hawˇ-eu aˬ yawꞈ maꞈ kʼoeˇ taˆ uˆ lahˇ-eu yaw huiˬ yaw mahˇ kʼoeˇ gʼaˬ, Uˬ duˬ tahˬ nymˇ nymˇ ma-ahˇ loꞈ-eu yehˇ deuˬ nehˬ-ehˇ tiˬ kawˆ loꞈ-ehˇ, Yeˬsuˇ-ahˇ nyehꞈ-awˇ paꞈ-euˬ meh.

¹³ Kʼoeˇ naˇ, Aˬna jawˇ gaˇ jeˬ huˬ sheuˬ gʼeh-euˬ meh. Aˬ na-aˬ, kʼoeˇ ngeh kʼoꞈ-ahˇ Piˇ ma Yaw huiˬ gʼaˬ geuꞈ luꞈ-eu Gaˬyaˬpaˇ-euˬ tsawˇ mawˬ meh.

¹⁴ Tsawˇ jeuˬ tiˬ jeuˬ jeuˬ lah ni ya cawˆ-iˇ-eu dah zaˇ tsawˇ haˬ tiˬ gʼaˬ bi shiˇ dah-eu muiˬ dzehˬ meh lehˇ, Yuˇdaˆ tsawˇ haˬ aˬ yuiꞈ aˬ tsu deuˬ-ahˇ ja noeˬ nehˬ-euˬ gʼaˬ-aˬ, Gaˬyaˬpaˇ meh.

Yeˬsuˇ-ahˇ maˬ siˬ lehˇ Beˬtuˆluˆ pyehˇ-euˬ

¹⁵ Siˇmoˬ Beˬtuˆluˆ hawˇ-eu zaˬ lahˇ yawˬ gʼaˬ yawˬ Yeˬsuˇ mehˬ nah caw teh gʼeh-euˬ meh. Zaˬ lahˇ kʼoeˇ gʼaˬ Piˇ ma Yaw huiˬ gʼaˬ-ahˇ yaw muiˬ paˬ-ehˇ siˬ nya-eu miˇ neh, Piˇ ma Yaw huiˬ gʼaˬ-euˬ nymˇ-ahˇ kmˇ cehˇ gawˬ lahˇ taˬ-euˬ laꞈ kʼoeˇ, Yeˬsuˇ mehˬ nah caw teh uˇ gʼeh-euˬ meh.

¹⁶ Beˬtuˆluˆ-aˬ, laꞈ nyiˇ paw lahˇ kʼehˬ dawˬ peh jawˇ yaꞈ-euˬ meh. Zaˬ lahˇ kʼoeˇ gʼaˬ paˇ gʼoꞈ poˆ-iˇ-awˇ, lahˇ kʼehˬ-ahˇ loꞈ-eu zaˬ miˬ zaˬ-ahˇ ehˇ nehˬ-awˇ, Beˬtuˆluˆ-ahˇ sheuˬ uˇ gʼeh-euˬ meh.

¹⁷ Lahˇ kʼehˬ-ahˇ loꞈ-eu zaˬ miˬ zaˬ kʼoeˇ gʼaˬ Beˬtuˆluˆ-ahˇ ehˇ-eu, “Nawˇ gʼeh tsawˇ haˬ kʼoeˇ gʼa-euˬ zaˬ lahˇ deuˬ laꞈ kʼoeˇ ahˇ-eu maˬ ngeuˇ loˇ.” Beˬtuˆluˆ ehˇ-eu, “Ngaˇ maˬ ahˇ.”

¹⁸ Yaw gaˆ gaˆ-eu miˇ neh, zaˬ kʼaˆ deuˬ hawˇ-eu loꞈ luꞈ-eu yehˇ deuˬ kʼaˬ gʼeu baw doꞈ-awˇ, tiˬ jawˬ yawꞈ-awˇ yaw gaˆ lmˇ-euˬ meh. Beˬtuˆluˆ gʼeh, kʼoeˇ gaˇ yawꞈ leˇ-awˇ aˬ yawꞈ maꞈ nehˬ-ehˇ yaw gaˆ lmˇ-euˬ meh.

Piˇ ma Yaw huiˬ gʼaˬ Yeˬsuˇ-ahˇ pyehˆ tseˇ naˇ haˬ-euˬ

¹⁹ Piˇ ma Yaw huiˬ gʼaˬ Yeˬsuˇ-ahˇ, aˬ yawꞈ-euˬ zaˬ lahˇ deuˬ gaˇ kawˆ hawˇ-eu aˬ yawꞈ neh mehˬ-euˬ tsoˆ-euˬ gaˇ kawˆ deuˬ pyehˆ tseˇ naˇ haˬ-euˬ meh.

²⁰ Yeˬsuˇ ehˇ-eu, “Ngaˇ aˬ cawˬ-ahˇ dawˬ kʼaˇ ngehˬ cawˬ ngeh, tsawˇ haˬ gʼawˬ mya ni jawˇ-eu mehˬ shi bya cehˆ ni ngehˬ cawˬ-euˬ ma. Tsawˇ haˬ dawˬ tawˆ luꞈ uiˬ laˇ-eu jawˇ duˬ pyeuꞈ-eu uˬ duˬ tahˬ nymˇ deuˬ hawˇ-eu, Uˬ duˬ tahˬ nymˇ nymˇ ma laꞈ kʼoeˇ tehꞈ-ehˇ ngaˇ mehˬ-euˬ tsoˆ-euˬ ma. Yaw zaꞈ-ahˇ ngehˬ kʼoeˬ tmˇ kʼoeˬ-euˬ tiˬ jeˬ-iˬ maˬ jaˆ.

²¹ Aˬ jeˬ miˇ neh nawˇ ngaˬ-ahˇ pyehˆ tseˇ naˇ haˬ te. Ngaˬ-euˬ dawˬ-ahˇ ya gaˬ-euˬ tsawˇ haˬ deuˬ-ahˇ ngaˇ aˬ jeˬ ehˇ ta lehˇ naˇ hawˬ-awˬ.”

²² Yeˬsuˇ kʼoeˇ loꞈ-ehˇ ehˇ ngeh, kʼoeˇ gaˇ loꞈ luꞈ-eu yehˇ tiˬ gʼaˬ aˬ yawꞈ-euˬ baˬ ba-ahˇ tehˆ-awˇ ehˇ-eu, “Nawˇ Piˇ ma Yaw huiˬ gʼaˬ-ahˇ teu loꞈ-ehˇ ehˇ kʼmˬ ta loˇ.”

²³ Piˇma Yaw huiˬ gʼaˬ-ahˇ Yeˬsuˇ ehˇ-eu, “Ngaˬ neh ngehˬ-euˬ maˬ ngeuˇ naˇ, maˬ ngeuˇ-a lehˇ heu gaˇ jawˇ-eu tsawˇ haˬ yawˬ gʼaˬ na luꞈ mehˬ shi ehˇ duˬ-awˬ. Ehˇ kʼawꞈ, ngaˬ neh ngehˬ-euˬ ngeuˇ naˇ, aˬ jeˬ miˇ neh ngaˬ-euˬ baˬ ba-ahˇ bi tehˆ te.”

²⁴ Kʼoeˇ naˇ, aˬ yawꞈ-ahˇ paꞈ tawꞈ taˬ-euˬ maˬ puiˇ nehˬ ni, Aˬna neh aˬ yawꞈ-ahˇ Piˇ ma Yaw huiˬ gʼaˬ pyeuꞈ-eu Gaˬyaˬpaˇ jawˇ gaˇ bi sheuˬ ha-iˇ-euˬ meh.

Yeˬsuˇ-ahˇ maˬ siˬ lehˇ Beˬtuˆluˆ tiˬ poˆ paˇ pyehˇ-euˬ

²⁵ Beˬtuˆluˆ-aˬ, kʼoeˇ gaˇ yawꞈ-awˇ yaw gaˆ lmˇ luꞈ-eu meh. Aˬ cawˬ a yawꞈ-ahˇ naˇ haˬ-eu, “Nawˇ gʼeh tsawˇ haˬ kʼoeˇ gʼaˬ-euˬ zaˬ lahˇ maˬ ngeuˇ loˇ.” Beˬtuˆluˆ tsawˇ pyehˇ pyehˇ-awˇ ehˇ-eu, “Ngaˇ maˬ ngeuˇ.”

²⁶ Beˬtuˆluˆ neh naˬ paꞈ bi coeˇ tsehˆ-euˬ gʼaˬ-ahˇ aˬ yuiꞈ aˬ nyiˇ taꞈ-eu, Piˇ ma Yaw huiˬ gʼaˬ-euˬ zaˬ kʼaˆ tiˬ gʼaˬ Beˬtuˆluˆ-ahˇ ehˇ-eu, “Nawˇ gʼeh Yeˬsuˇ nehˬ-ehˇ yaˇ kmˇ laꞈ kʼoeˇ jawˇ luꞈ-eu ngaˇ mawˇ-euˬ ma.”

²⁷ Beˬtuˆluˆ tsawˇ pyehˇ paˇ pyehˇ-awˇ ehˇ-eu, “Maˬ ngeuˇ.” Aˬ yawꞈ kʼoeˇ loꞈ-ehˇ ehˇ gʼaˬ-eu maˬ dah ni, ya poeˇ doeˇ doˆ laˇ-euˬ meh.

Yeˬsuˇ-ahˇ saˬ paˬ Piˇlaˆ mehˬ shi sheuˬ gʼeh-euˬ

²⁸ Yawˬ nah yawˬ uˬ shawˬ yaw naꞈ-ehˇ, Yeˬsuˇ-ahˇ Gaˬyaˬpaˇ-euˬ nymˇ-ahˇ neh sheuˬ doˆ gʼeh-awˇ, sahˬ paˬ-euˬ hawˇ nymˇ-ahˇ sheuˬ gʼeh-euˬ meh. Yuˇdaˆ tsawˇ haˬ aˬ yuiꞈ aˬ tsu deuˬ-aˬ, Baˬsaˬkaˬ Bawˬ-iˬ dzaˬ gaˇ uˇ leˇ-eu gʼaˇ duˬ yawˬ ha-euˬ gʼawˇ mawˇ maˬ bi jawꞈ-iˇ-ehˇ shawˇ jehˆ ni bi jaˆ mawꞈ-eu miˇ neh, sahˬ paˬ-euˬ hawˇ nymˇ laꞈ kʼoeˇ maˬ uˇ keuˆ leˇ ni jawˇ-euˬ meh.

²⁹ Kʼoeˇ miˇ neh, sahˬ paˬ-euˬ mawˇ do laꞈ nyiˇ doˆ le-awˇ ehˇ-eu, “Tsawˇ haˬ heu gʼaˬ aˬ geu jeˬ lehˬ nga lehˇ naw maꞈ ehˇ te.”

³⁰ Aˬ yawꞈ maꞈ ehˇ-eu, “Tsawˇ haˬ heu gʼaˬ yaw haiˬ jeˬ mˇ taˬ-euˬ maˬ jaˆ law nmˇ-aˬ, aˬ yawꞈ-ahˇ nawˇjawˇ gaˇ nga maꞈ maˬ sheuˬ ha laˇ nya-aˇ.”

³¹ Sahˬ paˬ Piˇlaˆ ehˇ-eu, “Toˆ-ehˇ ngeuˇ naˇ, naw maꞈ aˬ yawꞈ-ahˇ sheuˬ kʼoꞈ gʼeh-awˇ, naw maꞈ-euˬ zahˇ sahˇ kʼoꞈ kʼaˇ jaˆ-eu loꞈ-ehˇ yaˇ kʼa daˇ-awˬ.” Aˬ yawꞈ maꞈ ehˇ-eu “Nga maꞈ tsawˇ haˬ maˬ sehꞈ kʼmˬ-a.”

³² Yeˬsuˇ aˬ yawꞈ aˬ joˆ-ehˇ ya shiˇ-eu gaˇ kawˆ aˬ yawˇ yawꞈ ehˇ taˬ-euˬ jeˬ byah laˇ nya ni, aˬ yawꞈ maꞈ dawˬ kʼoeˇ jeˬ-ehˇ ngehˬ-eu jeˬ pyeuꞈ-eu meh.

³³ Sahˬ paˬ Piˇlaˆ hawˇ nymˇ laꞈ kʼoeˇ paˇ gʼoꞈ kʼoꞈ leˇ-awˇ, Yeˬsuˇ-ahˇ kuˇ-awˇ naˇ haˬ-eu, “Nawˇ Yuˇdaˆ tsawˇ haˬ-euˬ Sahˬ paˬ ma loˇ.”

³⁴ Yeˬsuˇ ehˇ-eu, “Dawˬ teu dawˬ maˇ maˇ ni nawˬ-euˬ dawˬ ma loˇ. Maˬ ngeuˇ naˇ, ngaˬ-euˬ gaˇ kawˆ aˬ cawˬ neh nawˬ-ahˇ ehˇ nehˬ laꞈ-euˬ dawˬ-ahˇ gʼoe-awˇ ngehˬ loˇ.”

³⁵ Sahˬ paˬ Piˇlaˆ ehˇ-eu, “Ngaˇ Yuˇdaˆ tsawˇ haˬ nga loˇ. Nawˬ-euˬ tsawˇ jeuˬ hawˇ-eu piˇ ma aˬ yuiꞈ deuˬ neh nawˬ-ahˇ ngaˬ-euˬ aˬ laꞈ laꞈ kʼoeˇ a nehˬ laꞈ-euˬ meh. Nawˇ aˬ jeˬ mˇ teˬ.”

³⁶ Yeˬsuˇ ehˇ-eu, “Ngaˬ-euˬ miˇ kʼahˬ-aˬ, miˇ tsaˬ heu-ahˇ taꞈ-eu jeˬ maˬ ngeuˇ. Ngaˬ-euˬ miˇ kʼahˬ miˇ tsaˬ heu-ahˇ taꞈ-eu jeˬ law nmˇ-aˬ, ngaˬ-ahˇ Yuˇdaˆ tsawˇ haˬ aˬ yuiꞈ aˬ tsu deuˬ neh maˬ bi nyehꞈ ni ngaˬ-euˬ tsawˇ haˬ deuˬ guiˇ deuˆ tehꞈ-a. Ngaˬ-euˬ miˇ kʼahˬ-aˬ, miˇ tsaˬ heu-ahˇ maˬ taꞈ.”

³⁷ Kʼoeˇ ngeh, sahˬ paˬ Piˇlaˆ aˬ yawꞈ-ahˇ naˇ haˬ-eu, “Nawˇ sahˬ paˬ ngeuˇ ma loˇ.” Yeˬsuˇ ehˇ-eu, “Ngaˇ sahˬ paˬ nga lehˇ ehˇ-euˬ-aˬ, naw maꞈ meh. Ngaˇ miˇ tsaˬ heu kʼoeˇ taˆ zaꞈ le-awˇ dehꞈ le-euˬ-aˬ, yaw tsaˬ yaw dawˇ jeˬ ngehˬ le tmˇ le-euˬ tehꞈ ma. Yaw tsaˬ yaw dawˇ jeˬ-ahˇ kʼaˇ taꞈ-eu tsawˇ haˬ-aˬ, ngaˬ-euˬ dawˬ naˇ haˬ geuꞈ-eu meh.”

³⁸ Sahˬ paˬ Piˇlaˆ ehˇ-eu, “Yaw tsaˬ yaw dawˇ ehˇ-eu aˬ jeˬ-a.”

Yeˬsuˇ-ahˇ sehꞈ-eu gʼaˇ duˬ daˇ tsehˆ-euˬ

³⁹ Kʼoeˇ naˇ, hawˇ nymˇ-euˬ laꞈ nyiˇ jawˇ-eu deuˬ jawˇ gaˇ sahˬ paˬ Piˇlaˆ iˇ-awˇ, heu loꞈ-ehˇ ehˇ nehˬ-euˬ meh. “Tsawˇ haˬ heu gʼaˬ-euˬ yaw lehˬ ngaˇ maˬ poˆ mawˇ nya nya. Ehˇ kʼawꞈ, Baˬsaˬkaˬ Bawˬ-iˬ kʼaˇ keuˆ le ngeh, naw maꞈ gʼaˇ duˬ tsawˇ haˬ tiˬ gʼaˬ ngaˇ ya pyehˬ nehˬ-eu zahˇ sahˇ kʼoꞈ jaˆ-eu ma. Naw maꞈ gʼaˇ duˬ Yuˇdaˆ tsawˇ haˬ-euˬ Sahˬ paˬ heu gʼaˬ-ahˇ bi pyehˬ nehˬ mawꞈ-eu nya loˇ.”

⁴⁰ Aˬ yawꞈ maꞈ yaw kʼaˆ-ehˇ guˇ-awˇ ehˇ-eu, “Aˬ yawꞈ-ahˇ taˬ pyehˬ. Baˬlaˬbaˇ-ahˇ pyehˬ-awˬ.” Baˬlaˬbaˇ-aˬ, Loˇmaˆ sahˬ paˬ-ahˇ puiˬ-euˬ tsawˇ haˬ tiˬ gʼaˬ pyeuꞈ-eu meh.