Yeˬsaˬgeˬlaˇ 8 - Akha

Yeˬluˇsaˬlehˬ meuˬ laꞈ kʼoeˇ tahˬ pahˬ aˬ ma mawˇ kawˇ-ahˇ uˬ duˬ tahˬ-eu

YAW SAHˇ LAꞈ KʼOEˇ MIˬYEHˇ-AHˇ Yeˬsaˬgeˬlaˇ MAWˇ-EUˬ NYIˬ POˆ TIˬ POˆ

¹ Nga maꞈ aˬ cawˬ miˇ kʼahˬ-ahˇ bi nyehꞈ gʼeh-euˬ shiꞈ kʼoꞈ tiˬ kʼoꞈ ba la koꞈ siˬ tiˬ siˬ, ngaˬ nah tiˬ nah-ahˇ, Yuˇdaˆ miˇ kʼahˬ-ahˇ neh bi nyehꞈ daˆ laꞈ-euˬ aˬ yuiꞈ aˬ tsu deuˬ ngaˬ-euˬ nymˇ-ahˇ nuiˇ luꞈ ngeh, Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ-euˬ baoˬ ngaˬ-euˬ kʼoeˇ taˆ ja pyuˬ ni keuˆ le-euˬ meh.

² Ngaˇ gʼawˇ leuˇ haw ngeh, tsawˇ haˬ-ahˇ duˇ-eu tiˬ jeˬ mawˇ-euˬ ma. Joꞈ-ahˇ neh laꞈ oˆ tsehˆ miˬ dzaˬ-ahˇ duˇ leˇ-awˇ, joꞈ-ahˇ neh laꞈ taˆ tsehˆ guiˇ nyiˬ ni gʼeh-eu guiˬ shuiˇ-ahˇ duˇ-eu meh.

³ Aˬ laꞈ-ahˇ duˇ leˇ-eu jeˬ aˬ yawꞈ cawˬ doˆ leꞈ-awˇ, ngaˬ-euˬ uˬ duˬ tsehˇ kahˇ-ahˇ tsuˆ tehˬ-euˬ meh. Yaw sahˇ laꞈ kʼoeˇ kʼoeˇ loꞈ-ehˇ mawˇ laˇ-eu laꞈ kʼoeˇ Miˬyehˇ-euˬ yaw sahˇ ngaˬ-ahˇ yaw goˇ-ahˇ ciˬ diˇ-awˇ, Yeˬluˇsaˬlehˬ meuˬ-ahˇ sheuˬ gʼeh nehˬ laꞈ-euˬ meh. Miˬyehˇ-ahˇ nui ma bi pehˇ-euˬ tahˬ pahˬ aˬ ma mawˇ kawˇ jaˆ-eu tsahˇ pyeuꞈ-eu, Uˬ duˬ tahˬ nymˇ nymˇ ma-euˬ laꞈ taˆ pyawˬ lahˇ kʼehˬ laˇ gʼoˆ laꞈ kʼoeˇ gʼoˆ-ahˇ, ngaˬ-ahˇ sheuˬ gʼeh nehˬ laꞈ-euˬ meh.

⁴ Kʼoeˇ tsahˇ-ahˇ, Ceˬbaˬ lawˇ baˬ dawˬ peh yaw beh ngaˬ neh ya mawˇ-euˬ loꞈ-ehˇ, Iˇsaˬleˬlaˆ Miˬyehˇ-euˬ yaw shehꞈ kʼahˬ sehˇ guiˇ nyiˬ ni jaˆ gaˇ ngaˇ ya mawˇ-euˬ ma.

⁵ “Tsawˇ haˬ zaˬ-oˇ, laꞈ taˆ paw pyawˬ-ahˇ haw gʼeh-iˬ sheˇ” lehˇ Miˬyehˇ ngaˬ-ahˇ ehˇ-awˇ, ngaˇ haw ngeh, Miˬyehˇ-ahˇ nui ma bi pehˇ-euˬ tahˬ pahˬ aˬ ma mawˇ kawˇ kʼoeˇ hmˬ, lahˇ kʼehˬ laˇ gʼoˆ dawˬ peh jaˆ luꞈ gaˇ ya mawˇ-euˬ ma.

⁶ Miˬyehˇ ngaˬ-ahˇ ehˇ-eu, “Tsawˇ haˬ zaˬ-oˇ, aˬ joˆ-ehˇ pyeuꞈ luꞈ-eu gaˇ kawˆ nawˇ mawˇ duˬ maˬ loˇ. Iˇsaˬleˬlaˆ tsawˇ haˬ deuˬ neh mˇ-euˬ nui daˆ daˆ laˇ paˬ-ehˇ gʼeh-eu jeˬ-ahˇ haw sheˇ. Tiˬ jawˇ saˇ-iˬ tiˬ jawˇ, ngaˬ-euˬ muiˬ-eu shawˇ-eu jawˇ duˬ-ahˇ neh gaˇ mahˇ kaˬ gaˇ, aˬ yawꞈ maꞈ ngaˬ-ahˇ teh doˆ luꞈ-eu meh. Heu naˆ maˬ tseˇ nui daˆ daˆ laˇ paˬ-ehˇ gʼeh-eu jeˬ-ahˇ nawˇ paˇ ya mawˇ tehꞈ-a.”

⁷ Uˬ duˬ tahˬ nymˇ nymˇ ma-euˬ laꞈ nyiˇ lahˇ-ahˇ uˇ leˇ-eu lahˇ kʼehˬ dawˬ peh, ngaˬ-ahˇ aˬ yawꞈ sheuˬ gʼeh-awˇ, lahˇ-ahˇ byoe-eu maˇ byoe tiˬ byoe mehˬ nehˬ laꞈ-euˬ meh.

⁸ “Tsawˇ haˬ zaˬ-oˇ, lahˇ heu tsahˇ-ahˇ duˬ pehꞈ-awˬ” lehˇ ngaˬ-ahˇ ehˇ-eu meh. Lahˇ kʼehˬ duˬ pehꞈ haw ngeh, gʼoˆ kʼehˬ tiˬ kʼehˬ dahˇ-eu ngaˇ mawˇ-euˬ ma.

⁹ “Laꞈ kʼoeˇ uˇ-iˇ-awˇ, aˬ yawꞈ maꞈ neh mˇ taˬ-euˬ haiˬ dui jawꞈ dui dui-eu jeˬ-ahˇ haw-iˇ-awˬ” lehˇ, ngaˬ-ahˇ ehˇ-eu meh.

¹⁰ Ngaˇ laꞈ kʼoeˇ uˇ-iˇ haw ngeh, kaˇ pyawˇ-ahˇ, aˇ lawˇ mawˇ kawˇ hawˇ-eu maˬ shawˇ-eu jeˬ zaˬ deuˬ-euˬ mawˇ kawˇ deuˬ maˬ ehˇ, Iˇsaˬleˬlaˆ tsawˇ haˬ deuˬ, uˬ duˬ tahˬ-eu jeˬ-euˬ mawˇ kawˇ deuˬ boꞈ taˬ-euˬ meh.

¹¹ Sahˬ paˬ-euˬ aˬ li Yaˬzaˬniˇ ahˇ leˇ-ehˇ, Iˇsaˬleˬlaˆ tsawˇ haˬ aˬ yuiꞈ aˬ tsu shiꞈ tseˇ gʼaˬ kʼoeˇ gaˇ jawˇ-eu meh. Aˬ yawꞈ gʼaˬ yawꞈ yaw saw jeˬ doꞈ damˬ duˬ tiˬ gʼaˬ tiˬ hmˬ yuˇ luꞈ-awˇ, yaw saw jeˬ doꞈ taˬ-euˬ uˬ kʼoeˬ uꞈ uꞈ-ehˇ jaˆ-eu meh.

¹² Miˬyehˇ ngaˬ-ahˇ heu loꞈ-ehˇ naˇ haˬ-eu meh. “Tsawˇ haˬ zaˬ-oˇ, Iˇsaˬleˬlaˆ tsawˇ haˬ aˬ yuiꞈ aˬ tsu deuˬ ciˬ cuˇ ni mˇ kʼoeˬ luꞈ-eu jeˬ nawˇ mawˇ maˬ loˇ. Tahˬ pahˬ aˬ ma mawˇ kawˇ tiˬ byah ni jaˆ-eu kuˆ lawˆ laꞈ kʼoeˇ, aˬ yawꞈ maꞈ uˬ duˬ tahˬ luꞈ-eu meh. ‘Sahˬpaˬ Miˬyehˇ aˬ dui-ahˇ maˬ paˇ mawˇ nya meh. Aˬ yawꞈ miˇ kʼahˬ heu kʼahˬ-ahˇ byehˇ dzeh yaꞈ-euˬ meh’ lehˇ aˬ yawꞈ maꞈ ehˇ-eu meh.”

¹³ Kʼoeˇ naˇ, “Aˬ yawꞈ maꞈ kʼoeˇ naˆ maˬ tseˇ jawꞈ-eu jeˬ mˇ luꞈ gaˇ nawˇ paˇ ya mawˇ tehꞈ-a” lehˇ, Sahˬpaˬ Miˬyehˇ ngaˬ-ahˇ ehˇ-eu meh.

¹⁴ Uˬ duˬ tahˬ nymˇ nymˇ ma-euˬ laꞈ taˆ paw pyawˬ lahˇ kʼehˬ-ahˇ aˬ yawꞈ ngaˬ-ahˇ sheuˬ gʼeh-awˇ, Taˬmuˆ miˬyehˇ shiˇ-euˬ gaˇ tsawˇ ngoeˇ ngoeˇ luꞈ-eu zaˬ miˬ zaˬ deuˬ-ahˇ bi haw laꞈ-euˬ meh.

¹⁵ Aˬ yawꞈ ehˇ-eu, “Tsawˇ haˬ zaˬ-oˇ, aˬ joˆ-ehˇ jahˇ luꞈ-eu nawˇ mawˇ maˬ loˇ. Kʼoeˇ naˆ maˬ tseˇ jawꞈ-eu jeˬ mˇ luꞈ gaˇ nawˇ paˇ ya mawˇ tehꞈ-a.”

¹⁶ Kʼoeˇ naˇ, Uˬ duˬ tahˬ nymˇ nymˇ ma-euˬ laꞈ kʼoeˇ lahˇ-ahˇ aˬ yawꞈ ngaˬ-ahˇ paˇ sheuˬ ahˇ gʼeh nehˬ laꞈ-euˬ meh. Muiˬ-eu shawˇ-eu jawˇ duˬ-ahˇ uˇ leˇ-eu gʼoˆ kʼehˬ dawˬ peh, lawˇ duˬ hawˇ-eu gaˇ ma yaw kaˬ-ahˇ, tsawˇ haˬ nyiˬ tseˇ ngaˬ gʼaˬ jawˇ luꞈ gaˇ ya mawˇ-euˬ ma. Muiˬ-eu shawˇ-eu jawˇ duˬ-ahˇ aˬ yawꞈ maꞈ naˇ kʼah pyawˇ-awˇ, nahˇ ma doˆ kʼehˬ paw mehˬ shi pyawˇ-awˇ awˆ byaˆ-eu laꞈ kʼoeˇ, nahˇ ma doˆ laˇ gaˇ uˬ duˬ tahˬ luꞈ-eu meh.

¹⁷ Sahˬpaˬ Miˬyehˇ ngaˬ-ahˇ ehˇ-eu, “Tsawˇ haˬ zaˬ-oˇ, aˬ joˆ-ehˇ jahˇ luꞈ-eu nawˇ mawˇ maˬ loˇ. Yuˇdaˆ tsawˇ haˬ heu deuˬ-aˬ, heu gaˇ nawˬ neh ya mawˇ-euˬ jawꞈ dui dui-eu gaˇ heu deuˬ hawˇ-eu, miˇ kʼahˬ doe ni yaw haiˬ jeˬ mˇ byah-eu tehꞈ-ehˇ nui kʼahˇ maˬ shiˇ-a. Uˬ duˬ tahˬ nymˇ nymˇ ma laꞈ kʼoeˇ kʼoeˇ loꞈ-ehˇ gʼeh-eu jeˬ paˇ mˇ-eu laꞈ kʼoeˇ ngaˇ nui ma pehˇ dzehˬ laˇ ni jahˇ luꞈ-eu meh. Ngaˬ-ahˇ kʼaˇ jahˇ doeˇ nehˬ nya-eu loꞈ-ehˇ jahˇ doeˇ nehˬ laꞈ gaˇ haw sheˇ.

¹⁸ Ngaˇ nui ma pehˇ saˬ pehˇ li li laˇ-euˬ jeˬ-ahˇ aˬ yawꞈ maꞈ ya daˬ tehꞈ-a. Aˬ yawꞈ maꞈ-ahˇ ngaˇ maˬ taˬ nehˬ. Gʼawˬ shaˬ kʼawꞈ maˬ gaˬ nehˬ. Aˬ yawꞈ maꞈ kʼaˇ guˇ coeˇ-eu guˇ-awˇ ngaˬ-ahˇ guiˬ lahˬ shaˇ kʼawꞈ, ngaˇ maˬ naˇ haˬ nehˬ.”