Yeˬsaˬgeˬlaˇ 7 - Akha

Iˇsaˬleˬlaˆ miˇ kʼahˬ gʼaˇ duˬ aˇ saˬ saˬ-eu aˇ yamˬ keuˆ le luꞈ meh.

¹ Sahˬpaˬ Miˬyehˇ ngaˬ-ahˇ heu loꞈ-ehˇ ehˇ-eu meh.

² “Tsawˇ haˬ zaˬ-oˇ, Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ pyeuꞈ-eu ngaˇ, Iˇsaˬleˬlaˆ miˇ kʼahˬ-ahˇ heu loꞈ-ehˇ ehˇ nehˬ-eu lehˇ gʼeh-eu ma. Heu-aˬ, miˇ kʼahˬ heu kʼahˬ kʼahˬ lah ni gʼaˇ duˬ aˇ saˬ saˬ-eu aˇ nah aˇ yamˬ meh.

³ “Iˇsaˬleˬlaˆ-oˇ, aˇ saˬ saˬ-eu jeˬ keuˆ le-euˬ meh. Nawˬ neh kʼaˇ mˇ kʼaˇ shaˇ-euˬ loꞈ-ehˇ, nawˬ-ahˇ ngaˇ yaˇ kʼaˬ daˇ-eu miˇ neh, ngaˇ nui ma pehˇ-eu jeˬ nawˬ-ahˇ siˬ laˇ tehꞈ-a. Nawˇ dehꞈ cawˆ-euˬ aˇ poeˬ, nawˬ-ahˇ ngaˇ paˇ biꞈ kʼoꞈ nehˬ ma.

⁴ Nawˬ-ahˇ ngaˇ maˬ taˬ nehˬ. Gʼawˬ shaˬ kʼawꞈ maˬ gaˬ nehˬ. Ngaˇ Sahˬpaˬ Miˬyehˇ pyeuꞈ-eu gaˇ kawˆ nawˬ-ahˇ siˬ leˇ ni, nawˬ neh mˇ-euˬ nui daˆ daˆ laˇ paˬ-ehˇ gʼeh-eu jeˬ aˇ poeˬ, nawˬ-ahˇ ngaˇ kʼehˬ nehˬ kʼaˆ nehˬ ma.”

⁵ Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ heu loꞈ-ehˇ ehˇ-eu meh. “Luˬ-iˇ seˇ-iˇ-eu jeˬ tiˬ hmˬ saˇ-iˬ tiˬ hmˬ nawˬ-euˬ kʼoeˇ taˆ keuˆ le tehꞈ-a.

⁶ Aˇ saˬ saˬ-eu jeˬ keuˆ le-euˬ meh. Aˇ yamˬ jiˇ le-euˬ meh. Nawˬ-euˬ guiˬ lahˬ teu naˆ ni tehꞈ meh.

⁷ Miˇ kʼahˬ heu kʼahˬ laꞈ kʼoeˇ jawˇ-eu tsawˇ haˬ deuˬ-oˇ, naw maꞈ gʼaˇ duˬ aˇ saˬ saˬ-eu jeˬ keuˆ le luꞈ meh. Gawˬ jawˬ-ahˇ jaˆ-eu uˬ duˬ tahˬ-eu jawˇ duˬ deuˬ-ahˇ byawˬ gʼa-eu aˇ yamˬ jiˇ le-awˇ, guˆ-eu gaˆ-eu jeˬ keuˆ le-eu aˇ yamˬ peh laˇ-euˬ meh.

⁸ “Gʼawˬ myahˇ maˬ gʼeh-ehˇ, ngaˇ nui ma pehˇ-eu jeˬ aˇ naˆ ni gʼeh-eu gaˇ kawˆ naw maꞈ-ahˇ siˬ laˇ tehꞈ-a. Naw maꞈ neh kʼaˇ mˇ kʼaˇ shaˇ-euˬ loꞈ-ehˇ, naw maꞈ-ahˇ ngaˇ yaˇ kʼaˬ daˇ-awˇ, naw maꞈ nui daˆ daˆ laˇ paˬ-ehˇ dehꞈ-eu aˇ poeˬ, ngaˇ paˇ biꞈ kʼoꞈ nehˬ ma.

⁹ Naw maꞈ-ahˇ ngaˇ maˬ taˬ nehˬ. Gʼawˬ shaˬ kʼawꞈ maˬ gaˬ nehˬ. Ngaˇ Sahˬpaˬ Miˬyehˇ pyeuꞈ-awˇ, naw maꞈ-ahˇ kʼehˬ-eu gʼaˬ pyeuꞈ-eu naw maꞈ-ahˇ siˬ leˇ ni, naw maꞈ neh mˇ-euˬ nui daˆ daˆ laˇ paˬ-ehˇ gʼeh-eu jeˬ aˇ poeˬ naw maꞈ-ahˇ ngaˇ kʼehˬ nehˬ ma.”

¹⁰ Iˇsaˬleˬlaˆ ya luˬ ya seˇ-iˇ-eu aˇ nah keuˆ le luꞈ meh. Yaw haiˬ mˇ-eu jeˬ myaˬ laˇ luꞈ-awˇ, nui ma huiˬ-eu jeˬ aˇ dzehˬ dzeuˇ laˇ taˬ-euˬ meh.

¹¹ Yaw haiˬ jeˬ laꞈ kʼoeˇ doeˇ dui dui-eu jeˬ doˆ laˇ taˬ-euˬ meh. Aˬ yawꞈ maꞈ gʼaˇ duˬ tiˬ jeˬ-iˬ maˬ dzeˇ ni pyeuꞈ-iˇ tehꞈ-a. Aˬ yawꞈ maꞈ-euˬ pyuˇ shuiˇ myawˬ gahˬ maˬ ehˇ, yaw shehꞈ kʼahˬ sehˇ maˬ ehˇ, myaˆ pyawꞈ naˇ mehˇ maˬ ehˇ, tiˬ pawꞈ-iˬ maˬ jaˆ ni pyeuꞈ-iˇ tehꞈ-a.

¹² Aˇ yamˬ peh le luꞈ meh. Miˬyehˇ kʼehˬ-eu kʼaˆ-eu jeˬ yawˬ gʼaˬ na luꞈ kʼoeˇ taˆ tiˬ kawˆ loꞈ-ehˇ keuˆ le-eu miˇ neh, ahˬ taꞈ zeuˇ taꞈ-eu jeˬ tiˬ pawꞈ-iˬ gaˇ dahˇ maˬ tsoeˬ ni pyeuꞈ-iˇ-eu aˇ nah keuˆ le luꞈ meh.

¹³ Miˬyehˇ-euˬ nui pehˇ yawˬ gʼaˬ na luꞈ kʼoeˇ taˆ tiˬ kawˆ loꞈ-ehˇ keuˆ le-eu miˇ neh, baw gaꞈ tiˬ gʼaˬ-iˬ yawˬ ha neh laˆ sm-euˬ jeˬ paˇ gaꞈ kʼoꞈ nya gaˇ keuˆ ni maˬ ya dehꞈ keuˆ-aˇ.

¹⁴ Miˬyehˇ-euˬ nui pehˇ yawˬ gʼaˬ na luꞈ kʼoeˇ taˆ tiˬ kawˆ loꞈ-ehˇ keuˆ le-eu miˇ neh, daˇ heh teˇ saˇ mahˇ laˇ-awˇ, yawˬ gʼaˬ na luꞈ lehˬ hmˬ dah taˬ-euˬ kʼawꞈ, guiˇ deuˆ-iˇ-eu tiˬ gʼaˬ-iˬ maˬ jawˇ-aˇ.

Iˇsaˬleˬlaˆ-euˬ iˬ baˇ gʼaˇ duˬ kʼehˬ nehˬ kʼaˆ nehˬ-eu

¹⁵ Meuˬ-euˬ gaˇ ma doe ni guiˇ deuˆ-awˇ, nymˇ laꞈ kʼoeˇ naˇ-eu gawˇ-eu jeˬ hawˇ-eu mehꞈ-eu shuꞈ-eu jeˬ byah tehꞈ-a. Meuˬ-euˬ laꞈ nyiˇ deh ga-ahˇ kʼaˇ jawˇ-eu deuˬ guiˇ bi deuˆ sehꞈ-awˇ, meuˬ laꞈ kʼoeˇ kʼaˇ jawˇ-eu tsawˇ haˬ deuˬ, naˇ gawˇ hawˇ-eu mehꞈ-eu shuꞈ-eu jeˬ baˬ da neh ya shiˇ tehꞈ-a.

¹⁶ Tiˬ paˆ na deuˬ-aˬ, deh ga-ahˇ bi teh tuˇ-euˬ kʼaˬ kʼoeˬ loꞈ-ehˇ, gawˬ jawˬ paw cehˆ dzeuˇ tehꞈ-a. Yawˬ gʼaˬ na luꞈ yawˬ ha-euˬ iˬ baˇ gaˇ kawˆ toˇ toˇ-ehˇ ya jawˇ tehꞈ-a.

¹⁷ Yawˬ gʼaˬ na luꞈ laꞈ shiˇ shiˇ laˇ-awˇ, aˬ kuiˇ pawˬ tsuiꞈ yaw dzuˬ dzuˬ tehꞈ-a.

¹⁸ Aˬ yawꞈ maꞈ guˬ daˇ pehˇ zeuˇ mehˬ tsoeˬ dm-awˇ, yaw dzuˬ dzuˬ tehꞈ-a. Aˬ yawꞈ maꞈ uꞈ jehˆ bi jehˆ dzeh jiˇ-awˇ, daˬ ga dui dui tehꞈ-a.

¹⁹ Sahˬpaˬ Miˬyehˇ nui ma pehˇ-eu jeˬ shehˆ tehˬ leꞈ ngeh, pyuˇ hawˇ-eu shuiˇ neh maˬ ka kʼoꞈ nya-eu baˬ da neh, pyuˇ hawˇ-eu shuiˇ deuˬ-ahˇ yaw jawꞈ yaw laꞈ biˬ dzeh-eu loꞈ-ehˇ, gaˇ ma doe ni byaˆ dzeh taˬ tehꞈ-a. Aˬ yawꞈ maꞈ loˬ-eu jeˬ gʼaˇ duˬ hawˇ-eu uˬ maˆ dehˆ laˇ-eu gʼaˇ duˬ, pyuˇ hawˇ-eu shuiˇ gaˇ dahˇ maˬ tsoeˬ-ehˇ pyeuꞈ-iˇ tehꞈ-a. Pyuˇ hawˇ-eu shuiˇ baˬ da neh, aˬ yawꞈ maꞈ iˬ baˇ mˇ-euˬ meh.

²⁰ Aˇ hu, muiˬ dui dui-eu pyuˇ shuiˇ myawˬ guˇ deuˬ-ahˇ aˬ yawꞈ maꞈ kʼahˬ sehˇ jehˆ-euˬ meh. Ehˇ kʼawꞈ, kʼoeˇ deuˬ yuˇ-awˇ aˬ yawꞈ maꞈ tahˬ pahˬ aˬ ma mawˇ kawˇ tehˆ-euˬ meh. Kʼoeˇ miˇ neh, aˬ yawꞈ maꞈ-euˬ pyuˇ shuiˇ myawˬ gahˬ deuˬ aˬ yawꞈ maꞈ-ahˇ paˇ bi laˆ jawꞈ ni, Sahˬpaˬ Miˬyehˇ jahˇ-euˬ meh.

²¹ Sahˬpaˬ Miˬyehˇ ehˇ-eu, “Aˬ cawˬ tsawˇ jeuˬ deuˬ neh aˬ yawꞈ maꞈ-ahˇ tahˇ joe bi joe dzaˬ ma. Haiˬ dui dui-eu tsawˇ haˬ deuˬ aˬ yawꞈ maꞈ-euˬ pyuˇ shuiˇ myawˬ gahˬ dawˬ tawˆ luꞈ yuˇ geuꞈ jiˇ-awˇ, laˆ jawꞈ jiˇ tehꞈ-a.

²² Ngaˬ-euˬ Uˬ duˬ tahˬ nymˇ nymˇ ma -ahˇ yehˬ bawˬ sehˇ lu-ehˇ gʼeh-awˇ, tahˇ joe deuˬ uˇ leˇ-awˇ laˆ jawꞈ leˇ ngeh, ngaˇ ngehˬ maˬ gʼeh ni bi jaˆ ma.

²³ “Yawˬ jeˬ na luꞈ geuꞈ-eu maˬ paˇ ahˇ meh. Miˇ kʼahˬ laꞈ kʼoeˇ tsawˇ haˬ sehꞈ-eu jeˬ byah -awˇ, meuˬ deuˬ laꞈ kʼoeˇ yaw haiˬ jeˬ byah-eu meh.

²⁴ Haiˬ dui dui-eu tsawˇ jeuˬ deuˬ-ahˇ ngaˇ kuˇ ahˇ-awˇ, naw maꞈ-euˬ nymˇ laꞈ kʼoeˇ bi jawˇ geuꞈ ma. Naw maꞈ uˬ duˬ tahˬ-euˬ jawˇ duˬ kʼoeˇ deuˬ-ahˇ aˬ cawˬ tsawˇ jeuˬ deuˬ neh ngaˇ yehˬ bawˬ-ehˇ bi jahˇ ngeh, gʼaˬ kʼaˆ dui dui-eu naw maꞈ-euˬ tsawˇ haˬ deuˬ laˇ baˇ-iˇ tehꞈ-a.

²⁵ Noeˬ shaˬ dui dui-eu jeˬ keuˆ le luꞈ meh. Nui saˇ oꞈ-eu jeˬ-ahˇ naw maꞈ poˆ sehꞈ leꞈ kʼawꞈ, maˬ poˆ mawˇ nya-aˇ.

²⁶ Luˬ-iˇ seˇ-iˇ-eu jeˬ tiˬ hmˬ saˇ-iˬ tiˬ hmˬ keuˆ le-awˇ, doeˇ dui dui-eu gaˇ kawˆ deuˬ lawˇ gawˆ yoeˇ-eu loꞈ-ehˇ maˬ tsehˆ leˇ ni gaˬ keuˆ le tehꞈ-a. Aˬ yawꞈ maꞈ neh mawˇ taˬ-euˬ gaˇ kawˆ ehˇ nehˬ laꞈ lehˇ, Miˬyehˇ gʼaˇ duˬ ngehˬ dah-eu deuˬ-ahˇ naw maꞈ ya shaˇ tehꞈ-a. Piˇ ma deuˬ maˬ mehˬ maˬ tsoˆ nya-ehˇ pyeuꞈ-iˇ-awˇ, tsawˇ mawˬ tsawˇ kʼaˆ deuˬ maˬ ja noeˬ maˬ ja duˇ nya ni pyeuꞈ-iˇ tehꞈ-a.

²⁷ Miˇ kʼahˬ sahˬ paˬ tsawˇ ngoeˇ ngoeˇ-awˇ, sahˬ paˬ zaˬ yo deuˬ nui ma ga ka jiˇ-awˇ, miˇ kʼahˬ zaˬ deuˬ yaw dzuˬ dzuˬ tawˆ tawˆ tehꞈ-a. Naw maꞈ neh kʼaˇ mˇ-euˬ loꞈ-ehˇ naw maꞈ-ahˇ ngaˇ kʼehˬ nehˬ kʼaˆ nehˬ-awˇ, naw maꞈ neh aˬ cawˬ-ahˇ yaˇ kʼaˬ daˇ-euˬ loꞈ-ehˇ, naw maꞈ-ahˇ ngaˇ yaˇ kʼaˬ daˇ poˆ ma. Heu-aˬ, ngaˇ Sahˬpaˬ Miˬyehˇ pyeuꞈ-eu gaˇ kawˆ, naw maꞈ-ahˇ bi siˬ bi mawˇ-eu tiˬ jeˬ ma.”