Yeˬsaˬgeˬlaˇ 45 - Akha

Sahˬpaˬ Miˬyehˇ-euˬ miˇ tsaˬ

¹ Iˇsaˬleˬlaˆ tsawˇ jeuˬ aˬ yawꞈ jeuˬ yawꞈ-ahˇ miˇ kʼahˬ biˇ ngeh, Sahˬpaˬ Miˬyehˇ-ahˇ miˇ tsaˬ tiˬ tsahˇ ya a nehˬ-eu meh. Miˇ tsaˬ kʼoeˇ tsahˇ yaw mahˇ paw koꞈ heˇ nyiˬ yaˇ ngaˬ tseˇ lmˇ hawˇ-eu, yaw jeˇ paw ngaˬ heˇ lmˇ ya bi byah meh. Miˇ tsaˬ kʼoeˇ tsahˇ tsahˇ lah-ehˇ, muiˬ-eu shawˇ-eu pehˇ tsahˇ pyeuꞈ-eu meh.

² Miˇ tsaˬ kʼoeˇ tsahˇ laꞈ kʼoeˇ, Uˬ duˬ tahˬ nymˇ nymˇ ma gʼaˇ duˬ tiˬ yaˇ nyiˬ tseˇ ngaˬ lmˇ oeˬ bawˬ byah-eu miˇ tsaˬ tiˬ tsahˇ ya bi jaˆ-awˇ, miˇ tsaˬ kʼoeˇ tsahˇ-euˬ tiˬ jawˬ, yaw jeˇ paw tseˇ nyiꞈ lmˇ nui paˆ byah-eu pu kaˬ ya taˬ doˆ meh.

³ Muiˬ-eu shawˇ-eu miˇ tsaˬ kʼoeˇ-euˬ tiˬ paˆ pyeuꞈ-eu, yaw mahˇ paw koꞈ heˇ nyiˬ yaˇ ngaˬ tseˇ lmˇ hawˇ-eu, yaw jeˇ paw nyiˬ heˇ ngaˬ yaˇ lmˇ byah-eu pehˇ tsahˇ ya dehˬ doˆ meh. Dehˬ doˆ taˬ-euˬ miˇ tsaˬ pehˇ tsahˇ kʼoeˇ tsahˇ laꞈ kʼoeˇ, dawˬ tawˆ luꞈ naˆ maˬ tseˇ muiˬ dui shawˇ dui dui-eu jawˇ duˬ pyeuꞈ-eu Uˬ duˬ tahˬ nymˇ nymˇ ma ya bi jaˆ meh.

⁴ Miˇ tsaˬ pehˇ tsahˇ kʼoeˇ tsahˇ-aˬ, miˇ kʼahˬ heu kʼahˬ laꞈ kʼoeˇ muiˬ-eu shawˇ-eu pehˇ tsahˇ pyeuꞈ-awˇ, Uˬ duˬ tahˬ nymˇ nymˇ ma laꞈ kʼoeˇ Sahˬpaˬ Miˬyehˇ-euˬ gaˇ mˇ-eu piˇ ma deuˬ gʼaˇ duˬ meh. Miˇ tsaˬ kʼoeˇ tsahˇ laꞈ kʼoeˇ, piˇ ma deuˬ-euˬ nymˇ hawˇ-eu Uˬ duˬ tahˬ nymˇ nymˇ ma ya bi jaˆ meh.

⁵ Dzeˇ-eu miˇ tsaˬ tiˬ paˆ-aˬ, Uˬ duˬ tahˬ nymˇ nymˇ ma laꞈ kʼoeˇ mˇ myawˬ mˇ-eu Leˬbiˇ tsawˇ haˬ deuˬ-ahˇ oꞈ-eu meh. Aˬ yawꞈ maꞈ jawˇ-eu meuˬ, kʼoeˇ gaˇ ya bi jaˆ meh.

⁶ Muiˬ-eu shawˇ-eu miˇ tsaˬ kʼoeˇ tsahˇ-ahˇ tawꞈ-ehˇ, yaw mahˇ paw koꞈ heˇ ngaˬ yaˇ ngaˬ tseˇ lmˇ hawˇ-eu, yaw jeˇ paw tiˬ heˇ nyiˬ yaˇ ngaˬ tseˇ lmˇ byah-eu miˇ tsaˬ tiˬ tsahˇ ya dehˬ doˆ meh. Kʼoeˇ gaˇ kʼaˇ jawˇ mawꞈ-eu Iˇsaˬleˬlaˆ tsawˇ haˬ yawˬ gʼaˬ na luꞈ jawˇ nya ni, meuˬ tiˬ meuˬ ya bi jaˆ meh.

Sahˬ paˬ zaˬ yo-ahˇ oꞈ-eu miˇ tsaˬ

⁷ Dzoeˬ dzaˬ oꞈ-eu sahˬ paˬ zaˬ yo gʼaˇ duˬ kʼawꞈ, miˇ tsaˬ tiˬ tsahˇ ya dehˬ doˆ nehˬ meh. Muiˬ-eu shawˇ-eu miˇ tsaˬ kʼoeˇ tsahˇ-euˬ nahˇ ma ga kʼehˬ miˇ kaˬ-ahˇ neh, nahˇ ma ga kʼehˬ paw gʼahˇ ceh-euˬ iˬ ma laˆ shaˆ-ahˇ keuˆ ni maˬ ehˇ, muiˬ-eu shawˇ-eu miˇ tsaˬ kʼoeˇ tsahˇ-euˬ nahˇ ma doˆ kʼehˬ miˇ kaˬ-ahˇ neh, Iˇsaˬleˬlaˆ miˇ kʼahˬ-euˬ nahˇ ma doˆ kʼehˬ miˇ kaˬ-ahˇ keuˆ ni maˬ ehˇ, dzoeˬ dzaˬ oꞈ-eu sahˬ paˬ zaˬ yo gʼaˇ duˬ ya dehˬ doˆ nehˬ meh. Miˇ tsaˬ kʼoeˇ-euˬ yaw mahˇ paw-aˬ, Iˇsaˬleˬlaˆ tsawˇ jeuˬ aˬ yawꞈ jeuˬ yawꞈ-ahˇ biˇ nehˬ-euˬ miˇ tsaˬ deuˬ mah ni ahˇ-eu meh.

⁸ Miˇ tsaˬ pehˇ tsahˇ kʼoeˇ tsahˇ-aˬ, dzoeˬ dzaˬ oꞈ-eu sahˬ paˬ zaˬ yo-euˬ miˇ tsaˬ pyeuꞈ-awˇ, miˇ kʼahˬ zaˬ deuˬ-ahˇ aˬ yawꞈ maˬ paˇ kʼaˆ geuꞈ ni, tsawˇ jeuˬ aˬ yawꞈ jeuˬ yawꞈ-ahˇ, yawˬ ha-ahˇ kʼaˇ oꞈ-eu miˇ tsaˬ bi geuꞈ tehꞈ-a.

Sahˬ paˬ zaˬ yo-ahˇ taꞈ-eu zahˇ sahˇ kʼoꞈ

⁹ Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ heu loꞈ-ehˇ ehˇ-eu meh. “Iˇsaˬleˬlaˆ tsawˇ jeuˬ-ahˇ uˆ lahˇ-eu sahˬ paˬ sahˬ ma deuˬ-oˇ, naw maꞈ iˬ baˇ mˇ luꞈ-eu myahˇ dui dui laˇ-euˬ meh. Yaw haiˬ jeˬ hawˇ-eu nawˬ dzaˬ kʼaˆ dzaˬ-eu jeˬ-ahˇ byehˇ-awˇ, yaw tsaˬ yaw dawˇ jeˬ mˇ paˇ-awˬ. Ngaˬ-euˬ tsawˇ haˬ deuˬ-ahˇ, aˬ yawꞈ maꞈ-euˬ miˇ kʼahˬ laꞈ kʼoeˇ neh naw maꞈ tiˬ jawˇ-iˬ maˬ paˇ ya teh doˆ meh. Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ pyeuꞈ-eu ngaˇ, naw maꞈ-ahˇ heu loꞈ-ehˇ ehˇ-eu ma.”

¹⁰ “Yawˬ gʼaˬ na luꞈ tsaˬ-eu cehˇ pehˬ hawˇ-eu tsaˬ-eu daˇ leuˇ ya zmˬ meh.

¹¹ “Dzaˬ la gʼo cehˇ pehˬ-eu eˇpaˬ‘tiˬ eˇpaˬ’-aˬ, iˇ cuꞈ koꞈ gaˬ laˬ ehˇ gʼaˬ ni deˇ leˇ-eu cehˇ daˇ kʼaˆ puˬ meh.* lehˇ kuˇ-eu cehˇ pehˬ hawˇ-eu dzaˇ uiˇ pehˬ-eu baꞈ‘baꞈ’ lehˇ kuˇ-eu dzaˇ uiˇ pehˬ-eu bahˬ keuˆ-aˬ, koꞈ gaˬ laˬ ehˇ gʼaˬ ni deˇ leˇ-eu meh.* lehˇ kuˇ-eu bahˬ tsahˬ-aˬ, tiˬ kawˆ hui ni ya bi ahˇ-eu meh. Hawˇmeuˬ lehˇ kuˇ-eu bahˬ keuˆ-ahˇ cehˇ daˇ bahˬ keuˆ geuꞈ-awˇ, tseˇ eˇpaˬ-euˬ tiˬ hawˇmeuˬ lehˇ sawˇ-awˇ, tseˇ baꞈ-euˬ tiˬ hawˇmeuˬ lehˇ ya sawˇ-eu meh.

¹² “Naw maꞈ-euˬ daˇ leuˇ-aˬ, heu loꞈ-ehˇ ya bi tsaˬ meh. Nyiˬ tseˇ geˬlahˬ-euˬ tiˬ sheˬgeˬ, koꞈ tseˇ sheˬgeˬ-euˬ tiˬ miˇ naˆ meh.

^13-15 Naw maꞈ lawˇ-eu shehˇ-eu jeˬ mˇ ngeh, heu loꞈ-ehˇ ya lawˇ meh. Cehˇ hawˇ-eu lawˬ loeˇ-aˬ, koꞈ tseˇ daˇ-euˬ tiˬ daˇ ya lawˇ meh. Saˬ loˬ tsiˇ-aˬ, tiˬ yaˇ bymˇ tiˬ bymˇ ya lawˇ meh. (Cehˇ daˇ bahˬ keuˆ-aˬ, heu loꞈ-ehˇ meh. Tseˇ baꞈ-euˬ tiˬ ‘hawˇ meuˬ’ byah-awˇ, tiˬ hawˇmeuˬ-euˬ ‘tiˬ gawˬ’ byah-eu meh.) Yawˇ lawˇ-eu-aˬ, nyiˬ yaˇ mawˇ-euˬ tiˬ mawˇ ya lawˇ meh. Naw maꞈ-euˬ iˬ baˇ ya buˬ-iˇ ni, dzaˬ la gʼo cehˇ lawˇ-eu jeˬ, jeˬ zaˬ mawˇ lah-ehˇ miˬ dzaˬ-ahˇ dzah puiˆ-awˇ lawˇ-eu jeˬ hawˇ-eu, cawˬ cawˬ taꞈ-eu jeˬ zaˬ lawˇ-eu jeˬ ya lawˇ meh lehˇ, Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ pyeuꞈ-eu ngaˇ dawˬ biꞈ-eu ma.

¹⁶ “Miˇ kʼahˬ heu kʼahˬ laꞈ kʼoeˇ kʼaˇ jawˇ-eu tsawˇ haˬ dawˬ tawˆ luꞈ, lawˇ-eu shehˇ-eu heu deuˬ Iˇsaˬleˬlaˆ tsawˇ jeuˬ-ahˇ uˆ lahˇ-eu sahˬ paˬ zaˬ yo jawˇ gaˇ ya yuˇ laꞈ meh.

¹⁷ La shuiꞈ lah-eu bawˬ-iˬ gʼeh gaˇ maˬ ehˇ, jawˇ nah lah gaˇ maˬ ehˇ, bawˬ-iˬ nui deuˬ jahˇ gaˇ maˬ ehˇ, mawˇ lah-ehˇ miˬ dzaˬ-ahˇ dzah puiˆ-awˇ lawˇ-eu gʼaˇ duˬ jeˬ zaˬ, dzaˬ la gʼo cehˇ lawˇ-eu jeˬ hawˇ-eu, aˬ gaꞈ dzaˇ uiˇ lawˇ-eu jeˬ heu deuˬ, Iˇsaˬleˬlaˆ miˇ kʼahˬ kʼahˬ lah ni-ahˇ biˇ nehˬ-eu gʼaˇ duˬ, aˬ yawꞈ-ahˇ doˇ-eu meh. Iˇsaˬleˬlaˆ tsawˇ haˬ deuˬ iˬ baˇ shawˇ laˇ ni ya lawˇ-eu, iˬ baˇ shawˇ-eu lawˇ-eu jeˬ, dzaˬ la gʼo cehˇ lawˇ-eu jeˬ, mawˇ lah-ehˇ dzah puiˆ-awˇ lawˇ-eu jeˬ, cawˬ cawˬ taꞈ-eu lawˇ-eu jeˬ heu deuˬ, aˬ yawꞈ ya biꞈ nehˬ-eu meh.

Zahˇ sahˇ kʼoꞈ bawˬ-iˬ deuˬ

¹⁸ Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ heu loꞈ-ehˇ ehˇ-eu meh. “Ba la yaw beh siˬ aˇ nah yaw beh nah-ahˇ, maˇ byawꞈ maˬ baw-eu mawˇ neˇ mawˇ gaw tiˬ mawˇ lawˇ-awˇ, Uˬ duˬ tahˬ nymˇ nymˇ ma ya shawˇ meh.

¹⁹ Piˇ ma gʼaˬ iˬ baˇ shawˇ-eu lawˇ-eu jeˬ lawˇ gaˇ sehꞈ-euˬ jeˬ zaˬ-euˬ shiˬ yuˇ-awˇ, Uˬ duˬ tahˬ nymˇ nymˇ ma-euˬ laˇ gʼoˆ bahˬ, lawˇ duˬ-euˬ laꞈ coeˇ oeˬ coeˇ hawˇ-eu, laꞈ kʼoeˇ pu kaˬ-ahˇ uˇ leˇ-eu laˇ gʼoˆ bahˬ-ahˇ ya lehꞈ meh.

²⁰ Ba la kʼoeˇ siˬ shiꞈ nah tiˬ nah-ahˇ kʼawꞈ, maˬ noeˬ maˬ duˇ-ehˇ iˬ baˇ mˇ-euˬ deuˬ hawˇ-eu, maˬ siˬ nya-ehˇ mˇ bahˬ-euˬ deuˬ gʼaˇ duˬ, naw maꞈ kʼoeˇ loꞈ-ehˇ paˇ ya lawˇ meh. Kʼoeˇ loꞈ-ehˇ jahˇ-eu laꞈ kʼoeˇ, Uˬ duˬ tahˬ nymˇ nymˇ ma aˬ myah luꞈ ya bi muiˬ ya bi shawˇ meh.

²¹ “Ba la yaw beh siˬ tseˇ oeˬ nah-ahˇ, Baˬsaˬkaˬ bawˬ-iˬ aˇ dahˬ ya beh meh. Shiꞈ nah keuˆ ni yawˬ gʼaˬ na luꞈ dehˬ tseˬ maˬ ahˇ-eu kaˬ muˇ ya dzaˬ meh.

²² Bawˬ-iˬ gʼeh-eu aˇ dahˬ beh ngeh nah, dzoeˬ dzaˬ oꞈ-eu sahˬ paˬ zaˬ yo gʼaˬ-aˬ, aˬ yawꞈ-euˬ iˬ baˇ hawˇ-eu miˇ kʼahˬ zaˬ dawˬ tawˆ luꞈ-euˬ iˬ baˇ shawˇ-eu gʼaˇ duˬ, mawˇ neˇ mawˇ gaw tiˬ mawˇ ya lawˇ meh.

²³ Bawˬ-iˬ gʼeh luꞈ-eu kʼoeˇ shiꞈ nah laꞈ kʼoeˇ, aˬ yawꞈ nah yawꞈ maˇ byawꞈ maˬ baw-eu mawˇ neˇ mawˇ gaw shiꞈ mawˇ hawˇ-eu yawˇ aˬ buˬ shiꞈ mawˇ, mawˇ lah-ehˇ miˬ dzaˬ-ahˇ dzah puiˆ-awˇ, Sahˬpaˬ Miˬyehˇ-ahˇ aˬ yawꞈ ya lawˇ nehˬ meh. Iˬ baˇ shawˇ-eu lawˇ-eu jeˬ gʼaˇ duˬ kʼawꞈ, aˬ yawꞈ nah yawꞈ ciꞈ myehꞈ ciꞈ buˬ tiˬ mawˇ aˬ yawꞈ ya lawˇ meh.

²⁴ Mawˇ neˇ mawˇ gaw hawˇ-eu yawˇ aˬ buˬ kʼaˇ lawˇ ngeh, tiˬ mawˇ-ahˇ cehˇ tiˬ eˇpaˬ‘tiˬ eˇpaˬ’-aˬ, ‘6 gaˬ laˬ’ ehˇ gʼaˬ ni byah-eu meh. (‘Tiˬ gaˬlaˬ’-euˬ ‘4 liˆ’ byah-eu meh.)’* hawˇ-eu saˬ loˬ tsiˇ tiˬ heˬ‘oeˬ heˬ’-euˬ ‘tiˬ eˇpaˬ’ byah-eu meh.* byah ni ya lawˇ caw meh.

²⁵ “Ba la shiꞈ siˬ tiˬ siˬ tseˇ ngaˬ nah-ahˇ neh dahˬ beh-awˇ, shiꞈ nah keuˆ ni ya gʼeh-eu sehˬ gʼawˆ-euˬ bawˬ-iˬ gʼeh ngeh kʼawꞈ, iˬ baˇ shawˇ-eu lawˇ-eu jeˬ, mawˇ lah-ehˇ miˬ dzaˬ-ahˇ dzah puiˆ-awˇ lawˇ-eu jeˬ, dzaˬ la gʼo cehˇ lawˇ-eu jeˬ hawˇ-eu, saˬ loˬ tsiˇ deuˬ, Baˬsaˬkaˬ bawˬ-iˬ gʼeh ngeh kʼaˇ lawˇ-euˬ myaˆ ni, dzoeˬ dzaˬ-eu sahˬ paˬ zaˬ yo gʼaˬ ya lawˇ meh.”