Yeˬsaˬgeˬlaˇ 43 - Akha

Sahˬpaˬ Miˬyehˇ Uˬ duˬ tahˬ nymˇ nymˇ ma-ahˇ gʼoꞈ jawˇ le-euˬ

¹ Tsawˇ haˬ kʼoeˇ gʼaˬ ngaˬ-ahˇ nahˇ ma doˆ kʼehˬ paw pyawˬ-ahˇ jaˆ-eu lahˇ kʼehˬ-ahˇ sheuˬ gʼeh nehˬ laꞈ-euˬ meh.

² Kʼoeˇ tsahˇ-ahˇ, Iˇsaˬleˬlaˆ Miˬyehˇ-euˬ yaw shehꞈ kʼahˬ sehˇ nahˇ ma doˆ kʼehˬ paw neh oe gʼeh leꞈ gaˇ ngaˇ ya mawˇ-euˬ ma. Miˬyehˇ-euˬ teˇ saˇ-aˬ, iˬ ma laˆ shaˆ iˇ kʼawˇ mahˇ gaˇ duˇ-awˇ, guiˇ nyiˬ ni gʼeh-eu yaw shehꞈ kʼahˬ sehˇ miˇ tsaˬ-ahˇ bya-eu meh.

³ Nymˬ-mˇ poˆ ngaˇ ya siˬ ya mawˇ-euˬ heu-aˬ, Yeˬluˇsaˬlehˬ meuˬ-ahˇ Miˬyehˇ laˆ cawˆ le ngeh poˆ hawˇ-eu Ceˬbaˬ lawˇ baˬ dawˬ peh mawˇ-euˬ poˆ-ahˇ duˇ-eu meh. Baˬ ba miˇ tsaˬ tuˆ ni ngaˇ awˆ byaˆ-euˬ ma.

⁴ Yaw shehꞈ kʼahˬ sehˇ kʼoeˇ nahˇ ma doˆ kʼehˬ paw jaˆ-eu lahˇ kʼehˬ kʼoeˇ kʼehˬ-ahˇ neh, Uˬ duˬ tahˬ nymˇ nymˇ ma laꞈ kʼoeˇ uˇ-iˇ-euˬ meh.

⁵ Sahˬpaˬ Miˬyehˇ-euˬ yaw sahˇ ngaˬ-ahˇ ciˬ diˇ-awˇ, laꞈ kʼoeˇ pu kaˬ-ahˇ ciˬ taˬ neh laꞈ-euˬ meh. Uˬ duˬ tahˬ nymˇ nymˇ ma laꞈ kʼoeˇ, Sahˬpaˬ Miˬyehˇ-euˬ yaw shehꞈ kʼahˬ sehˇ byah luꞈ-eu meh.

⁶ Tsawˇ haˬ kʼoeˇ gʼaˬ ngaˬ-euˬ dawˬ peh yawꞈ luꞈ-awˇ, Uˬ duˬ tahˬ nymˇ nymˇ ma laꞈ kʼoeˇ paw neh, Sahˬpaˬ Miˬyehˇ ngaˬ-ahˇ dawˬ ngehˬ-eu ngaˇ gaˬ-euˬ ma.

⁷ “Tsawˇ haˬ zaˬ-oˇ, ngaˬ-euˬ nuiˇ mahˬ heu gaˇ jaˆ-eu ma. Heu gaˇ Iˇsaˬleˬlaˆ tsawˇ haˬ nehˬ-ehˇ ngaˇ jawˇ-awˇ, aˬ yawꞈ maꞈ-ahˇ mˬ maˬ maˬ byaˆ zaˇ ziˇ uˆ lahˇ ma. Iˇsaˬleˬlaˆ tsawˇ haˬ deuˬ maˬ kaˬ, aˬ yawꞈ maꞈ-euˬ sahˬ paˬ deuˬ maˬ kaˬ, miˬ yehˇ nui deuˬ-ahˇ uˬ duˬ tahˬ-eu laꞈ kʼoeˇ maˬ ehˇ, jawˇ duˬ heu tsahˇ-ahˇ sahˬ paˬ deuˬ-euˬ mawˇ kawˇ ka tuˇ-eu laꞈ kʼoeˇ maˬ ehˇ, ngaˬ-euˬ tsawˇ myahˇ-ahˇ laˆ cawˆ-eu jeˬ tiˬ jawˇ-iˬ maˬ paˇ mˇ-aˇ.

⁸ Ngaˬ-euˬ Uˬ duˬ tahˬ nymˇ nymˇ ma gʼoˆ kʼehˬ dahˇ-eu gaˇ dzeˇ, aˬ yawꞈ maꞈ-euˬ sahˬ paˬ deuˬ-euˬ hawˇ nymˇ gʼoˆ kʼehˬ bi dahˇ-awˇ, gʼahˇ ceh aˇ kaˬ-ahˇ lahˇ tiˬ lahˇ kaˇ-eu tehꞈ meh. Aˬ yawꞈ maꞈ nui daˆ daˆ laˇ paˬ-ehˇ gʼeh-eu jeˬ mˇ-awˇ, ngaˬ-euˬ tsawˇ myahˇ laˆ cawˆ-euˬ miˇ neh, ngaˇ nui ma pehˇ-awˇ aˬ yawꞈ maꞈ-ahˇ ngaˇ laˆ cawˆ nehˬ-euˬ ma.

⁹ Nymˬ-mˇ miˬ yehˇ nui deuˬ-ahˇ uˬ duˬ tahˬ-eu jeˬ aˬ yawꞈ maꞈ ya byehˇ-awˇ, sahˬ paˬ deuˬ-euˬ mawˇ kawˇ aˬ yawꞈ maꞈ ya baꞈ dzeh tehꞈ-a. Aˬ yawꞈ maꞈ kʼoeˇ loꞈ-ehˇ jahˇ naˇ, aˬ yawꞈ maꞈ nehˬ-ehˇ ngaˇ mˬ maˬ maˬ byaˆ zaˇ ziˇ jawˇ ma.”

¹⁰ “Tsawˇ haˬ zaˬ-oˇ, Iˇsaˬleˬlaˆ tsawˇ haˬ deuˬ-ahˇ Uˬ duˬ tahˬ nymˇ nymˇ ma gaˇ kawˆ dzawˇ duˬ nehˬ-awˇ, aˬ joˆ-ehˇ ya tsoˆ-eu gaˇ kawˆ bi shaˇ noeˬ-awˬ. Aˬ yawꞈ maꞈ neh mˇ-euˬ iˬ baˇ-ahˇ aˬ yawꞈ maꞈ shaꞈ dawˇ-iˇ ni ja nehˬ-awˬ.

¹¹ Aˬ yawꞈ maꞈ neh mˇ dzeuˇ shaˇ dzeuˇ yaꞈ-euˬ jeˬ-ahˇ aˬ yawꞈ maꞈ shaꞈ dawˇ laˇ naˇ, Uˬ duˬ tahˬ nymˇ nymˇ ma aˬ joˆ-ehˇ tsoˆ-eu gaˇ kawˆ mehˬ duˬ nehˬ-awˬ. Jawˇ duˬ jawˇ zaˇ, uˇ leˇ kʼehˬ doˆ-iˇ kʼehˬ, pyawˬ naˬ aˇ gʼehˇ hawˇ-eu, taˬ duˬ taˬ zaˇ uˬ taꞈ, mˇ-eu shaˇ-eu zahˇ sahˇ kʼoꞈ dawˬ tawˆ luꞈ gʼoˆ shaw nya ni mehˬ duˬ nehˬ-awˬ. Aˇ duˬ aˇ deuˆ, taˬ duˬ taˬ zaˇ hawˇ-eu zahˇ sahˇ kʼoꞈ dawˬ tawˆ luꞈ aˬ yawꞈ maꞈ mˇ byah nya ni, kʼoeˇ deuˬ dawˬ tawˆ luꞈ sahˬ boꞈ duꞈ yawˇ ni boꞈ doˆ nehˬ-awˬ.

¹² Uˬ duˬ tahˬ nymˇ nymˇ ma-ahˇ taꞈ-eu zahˇ dawˬ kʼoꞈ dawˬ-aˬ, heu loꞈ-ehˇ meh. Uˬ duˬ tahˬ nymˇ nymˇ ma jawˬ jawˬ-ehˇ jaˆ-eu gawˬ jawˬ uˬ du miˇ tsaˬ dawˬ tawˆ luꞈ, muiˬ-eu shawˇ-eu pehˇ tsahˇ meh.”

Lawˇ duˬ

¹³ Uˬ duˬ tahˬ nymˇ nymˇ ma-ahˇ dza ngeh zmˬ-euˬ daˇ dza kʼoeˇ hmˬ neh dza haw ngeh, lawˇ duˬ kʼoeˇ heu loꞈ-ehˇ byah-eu meh. (Tiˬ caˆ ehˇ-eu kʼoeˇ-aˬ, tiˬ caˆ uˬ taꞈ laꞈ zaˬ tiˬ daˬ byah-eu meh.) Lawˇ duˬ-euˬ dawˬ peh tiˬ jawˬ gawˬ taˬ-euˬ dawˇ lawˇ kawˆ-aˬ, daˇ bahˇ yaw naꞈ paw tiˬ caˆ, yaw tuˇ paw tiˬ caˆ byah-awˇ, gaˇ dzeˇ jawˬ jawˬ-ehˇ tiˬ toˇ byah-eu daˇ bahˇ jahˇ tsoꞈ taˬ-euˬ meh.

¹⁴ Dawˬ pehˬ-ahˇ neh yaw awˆ tiˆ-ahˇ keuˆ ni nyiˬ caˆ goˇ-eu meh. Nyiˬ tiˆ tiˬ tiˆ-ahˇ laꞈ oˆ tiˆ-euˬ daˇ bahˇ mehˬ dzaˬ-ahˇ neh, yawˬ pyawˬ na luꞈ laꞈ kʼoeˇ paw tiˬ caˆ teh jiˆ kʼoꞈ-awˇ jahˇ taˬ-euˬ meh. Yaw goˇ paw tiˬ lmˇ byah-eu meh.

¹⁵ Lawˇ-eu shehˇ-eu jeˬ dzah puiˆ duˬ pyeuꞈ-eu kʼoeˇ taˆ taˆ saˬ kʼoeˇ tiˆ kʼawꞈ, tiˬ lmˇ goˇ-eu meh. Kʼoeˇ tiˆ-euˬ laꞈ coeˇ oeˬ coeˇ-ahˇ, tiˬ caˆ goˇ-eu uˬ coeˇ oeˬ kahˬ jahˇ tsoꞈ taˬ-euˬ meh.

¹⁶ Lawˇ duˬ-euˬ kʼoeˇ taˆ taˆ saˬ tiˆ-aˬ, smˬ lmˇ oeˬ bawˬ byah-eu meh.

¹⁷ Gʼahˇ ceh tiˆ-aˬ, smˬ lmˇ nui paˆ oeˬ bawˬ byah-awˇ, mehˬ dzaˬ caw caw-ehˇ tiˬ toˇ byah-eu daˇ bahˇ tsoꞈ-eu meh. Lawˇ duˬ-euˬ nuiˇ daˬ yaw tuˇ tiˬ caˆ byah-eu meh. Lawˇ duˬ-ahˇ daˆ leˇ-eu dawˬ dzm nahˇ ma doˆ kʼehˬ paw dzeˇ pyawˬ-ahˇ tsoꞈ taˬ-euˬ meh.

Lawˇ duˬ Miˬyehˇ-ahˇ a nehˬ-eu

¹⁸ Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ ngaˬ-ahˇ heu loꞈ-ehˇ ehˇ-eu meh. “Tsawˇ haˬ zaˬ-oˇ, ngaˇ ehˇ gaˇ naˇ haˬ-awˬ. Lawˇ duˬ tsoˆ gʼaˬ ngeh, miˬ dzaˬ dzah puiˆ-awˇ lawˇ-eu jeˬ kʼoeˇ-euˬ kʼoeˇ taˆ lawˇ-awˇ, lawˇ-eu jeˬ zaˬ-euˬ shiˬ kʼoeˇ gaˇ byaˆ shehˬ-eu laꞈ kʼoeˇ, lawˇ duˬ kʼoeˇ ngaˬ-ahˇ a nehˬ-eu zahˇ nawˇ ya jahˇ meh.

¹⁹ Ngaˬ-euˬ gaˇ mˇ-eu gʼaˇ duˬ ngaˇ jawˇ gaˇ uˇ laˇ kʼmˬ-euˬ tsawˇ haˬ deuˬ-aˬ, Leˬbiˇ tsawˇ jeuˬ Zaˬdoˆ-euˬ zaˬ deuˬ uˆ deuˬ tehꞈ meh. Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ pyeuꞈ-eu ngaˇ heu loꞈ-ehˇ dawˬ biꞈ-eu ma. Iˬ baˇ shawˇ-eu lawˇ-eu jeˬ bi lawˇ-eu gʼaˇ duˬ, mawˇ neˇ mawˇ gaw zaˬ tiˬ mawˇ aˬ yawꞈ maꞈ-ahˇ nawˇ ya biꞈ meh.

²⁰ Mawˇ neˇ kʼoeˇ mawˇ-euˬ shiˬ ui cuiˆ yuˇ-awˇ, lawˇ duˬ-euˬ uˬ coeˇ oeˬ kahˬ-ahˇ maˬ ehˇ, gʼahˇ ceh tiˆ-euˬ laꞈ coeˇ oeˬ coeˇ hawˇ-eu daˇ bahˇ caw caw-ehˇ maˬ ehˇ, nawˇ lehꞈ doe-eu laꞈ kʼoeˇ, lawˇ duˬ kʼoeˇ bi shawˇ laˇ-awˇ a nehˬ-eu zahˇ nawˇ ya jahˇ meh.

²¹ Iˬ baˇ shawˇ-eu gʼaˇ duˬ lawˇ-euˬ mawˇ neˇ kʼoeˇ mawˇ nawˇ yuˇ-awˇ, Uˬ duˬ tahˬ nymˇ nymˇ ma-euˬ lahˇ laꞈ nyiˇ paw, tsaˬ tsoˆ taˬ-euˬ tsahˇ-ahˇ nawˇ ya dzah puiˆ meh.

²² Yawˬ nah yawˬ maˇ byawꞈ maˬ baw-eu ciꞈ myehꞈ ciꞈ buˬ tiˬ mawˇ tsahˇ-awˇ, iˬ baˇ shawˇ-eu lawˇ-eu jeˬ nawˇ ya lawˇ meh. Mawˇ neˇ-euˬ shiˬ neh kʼaˇ shawˇ-euˬ loꞈ-ehˇ, ciꞈ myehꞈ kʼoeˇ mawˇ-euˬ shiˬ neh lawˇ duˬ kʼoeˇ paˇ ya shawˇ meh.

²³ Kʼoeˇ loꞈ-ehˇ nawˇ mˇ gʼaˬ ngeh, maˇ byawꞈ maˬ baw-eu mawˇ neˇ mawˇ gaw zaˬ tiˬ mawˇ hawˇ-eu, yawˇ aˬ buˬ zaˬ tiˬ mawˇ ya lawˇ meh.

²⁴ Jeˬ zaˬ kʼoeˇ nyiˬ mawˇ ngaˬ-euˬ mehˬ shi nawˇ ya yuˇ laꞈ meh. Piˇ ma deuˬ jeˬ zaˬ kʼoeˇ nyiˬ mawˇ-ahˇ saˬ deuꞈ byaˆ-awˇ, miˬ dzaˬ dzah puiˆ-awˇ lawˇ-eu jeˬ ngaˬ-ahˇ ya lawˇ meh.

²⁵ Iˬ baˇ shawˇ-eu lawˇ-eu jeˬ gʼaˇ duˬ, shiꞈ nah keuˆ ni, aˬ yawꞈ nah yawꞈ ciꞈ myehꞈ tiˬ mawˇ, mawˇ neˇ mawˇ gaw tiˬ mawˇ hawˇ-eu, yawˇ aˬ buˬ tiˬ mawˇ ya lawˇ meh. Aˬ yawꞈ nah yawꞈ lawˇ ngeh, maˇ byawꞈ maˬ baw-eu jeˬ shawˇ tehꞈ-ehˇ ya lawˇ meh.

²⁶ Lawˇ duˬ kʼoeˇ-euˬ kʼoeˇ taˆ lawˇ-eu shehˇ-eu jeˬ mˇ nya ni, shiꞈ nah keuˆ ni piˇ ma deuˬ lawˇ duˬ shawˇ-eu zahˇ jahˇ-awˇ, ngaˬ-ahˇ ya a nehˬ meh.

²⁷ Kʼoeˇ shiꞈ nah dzeuˇ ngeh jawˇ, miˇ kʼahˬ zaˬ deuˬ neh yuˇ laꞈ-euˬ miˬ dzaˬ dzah puiˆ-awˇ lawˇ-eu jeˬ hawˇ-eu, cawˬ cawˬ taꞈ-eu lawˇ-eu jeˬ piˇ ma deuˬ ya lawˇ daˆ leꞈ meh. Kʼoeˇ ngeh jawˇ, naw maꞈ dawˬ tawˆ luꞈ-ahˇ ngaˇ ha geuꞈ ma lehˇ, Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ pyeuꞈ-eu ngaˇ ehˇ-eu ma.”