Yeˬsaˬgeˬlaˇ 42 - Akha

Uˬ duˬ tahˬ nymˇ nymˇ ma gaˇ dzeˇ jaˆ-eu nymˇ nyiˬ nymˇ

¹ Kʼoeˇ naˇ, tsawˇ haˬ kʼoeˇ gʼaˬ ngaˬ-ahˇ laꞈ nyiˇ pu kaˬ paw sheuˬ doˆ gʼeh-awˇ, Uˬ duˬ tahˬ nymˇ nymˇ ma-euˬ laꞈ taˆ paw dzeˇ pyawˬ-ahˇ jaˆ-eu nymˇ tiˬ nymˇ-ahˇ sheuˬ gʼeh nehˬ laꞈ-euˬ meh. Nymˇ kʼoeˇ nymˇ-aˬ, uˬ duˬ tahˬ nymˇ nymˇ ma-euˬ nahˇ ma ga kʼehˬ paw dzeˇ dzeˇ saˬ jaˆ-eu nymˇ nehˬ-ehˇ maˬ kaˬ maˬ kaˇ-ehˇ jaˆ-eu meh.

² Nymˇ kʼoeˇ nymˇ-aˬ, yaw mahˇ paw nyiˬ tseˇ ngaˬ lmˇ byah-awˇ, yaw jeˇ paw tseˇ nyiꞈ lmˇ nui paˆ byah-eu meh.

³ Nymˇ kʼoeˇ nymˇ-euˬ pyawˬ ma tiˬ pyawˬ mehˬ shi, Uˬ duˬ tahˬ nymˇ nymˇ ma caw caw-ehˇ ngaˬ lmˇ jeˇ-eu pu kaˬ jaˆ-awˇ, pyawˬ ma yawˬ pyawˬ yawˬ-euˬ mehˬ shi, kʼaˬ lo teˇ byaꞈ kʼawˬ taˬ-euˬ laꞈ nyiˇ pu kaˬ jaˆ-eu meh. Nymˇ kʼoeˇ nymˇ-aˬ, dawˬ dzm loꞈ-ehˇ smˬ tiˆ jahˇ taˬ-euˬ uˬ kʼawˬ kʼoeˇ taˆ tsoˆ taˬ-euˬ meh.

⁴ Nymˇ kʼoeˇ nymˇ-euˬ pyawˬ ma laꞈ taˆ paw pyawˬ caw caw-ehˇ, yaw jeˇ paw nyiˬ lmˇ nui paˆ hawˇ-eu yaw mahˇ paw nyiˬ tseˇ ngaˬ lmˇ byah-eu gaˇ ma jahˇ taˬ-awˇ, laˇ gʼoˆ deuˬ kʼawꞈ kʼoeˇ pyawˬ-ahˇ jahˇ ahˇ taˬ-euˬ meh.

⁵ Kʼoeˇ taˆ tiˆ-ahˇ jaˆ-eu aˇ lawˆ deuˬ-aˬ, gʼahˇ ceh tiˆ hawˇ-eu laꞈ oˆ oˆ saˬ tiˆ-ahˇ jaˆ-eu aˇ lawˆ deuˬ naˆ maˬ tseˇ nyiˇ dzehˬ-eu meh. Aˬ jeˬ miˇ neh ehˇ naˇ, aˬ yawꞈ tiˆ yawꞈ tsoˆ daˆ leꞈ ngeh, kaˇ pyawˇ-ahˇ laꞈ kʼoeˇ paw teh jiˆ-awˇ tsoˆ-euˬ miˇ neh meh.

⁶ Smˬ tiˆ luꞈ kʼoeˇ taˆ tsoˆ ahˇ taˬ-euˬ aˇ lawˆ kʼoeˇ deuˬ-aˬ, dawˬ dzm dawˬ tehꞈ loꞈ-ehˇ jahˇ taˬ-euˬ kaˇ pyawˇ kʼoeˇ taˆ tsoˆ taˬ-awˇ, Uˬ duˬ tahˬ nymˇ nymˇ ma-euˬ lahˇ laꞈ kʼoeˇ tsoˆ taˬ-euˬ nymˇ nui deuˬ loꞈ-ehˇ kʼawˇ zeuˇ maˬ ahˇ-a.

^7-8 Laꞈ oˆ tiˆ-euˬ kaˇ pyawˇ-ahˇ nymˇ kʼoeˇ nymˇ-euˬ yaw mahˇ tiˬ kʼehˆ kʼehˆ ni, maˇ kʼehˬ maˬ bi dahˇ ni maˇ jiˇ-awˇ dzeˇ-eu tseˇ nyiꞈ lmˇ nui paˆ-ahˇ aˇ lawˆ tsoˆ ahˇ taˬ-euˬ meh. Nymˇ kʼoeˇ nymˇ-euˬ pyawˬ ma yaw mahˇ tiˬ kʼehˆ-euˬ tseˇ nyiꞈ lmˇ nui paˆ byah-eu meh. Laꞈ taˆ taˆ saˬ tiˆ-ahˇ-aˬ, nymˇ nymˇ lah-ehˇ aˇ lawˆ tsoˆ byah ta-euˬ meh.

^9-10 Nymˇ kʼoeˇ nymˇ-euˬ nahˇ ma doˆ kʼehˬ paw dzeˇ dzaˬ kaˇ pyawˇ mehˬ dzaˬ saˬ-iˇ-euˬ gaˇ, aˇ lawˆ kʼoeˇ nyiˬ lawˆ-euˬ uˬ moˆ, laꞈ nyiˇ pu kaˬ-ahˇ iˇ doˆ-eu laˇ gʼoˆ dahˇ-eu meh. Uˬ duˬ tahˬ nymˇ nymˇ ma-euˬ laꞈ oˆ pyawˬ-ahˇ kʼoeˇ loꞈ-ehˇ duˇ-eu nymˇ tiˬ nymˇ Uˬ duˬ tahˬ nymˇ nymˇ ma-euˬ nahˇ ma ga kʼehˬ paw jaˆ saˬ saˬ-eu nymˇ nehˬ-ehˇ maˬ kaˬ maˬ kaˇ-ehˇ tsoˆ taˬ-euˬ meh.

¹¹ Nymˇ kʼoeˇ nymˇ-euˬ aˇ lawˆ deuˬ-euˬ mehˬ shi, laꞈ taˆ paw pyawˬ-ahˇ tsoˆ taˬ-euˬ aˇ lawˆ deuˬ-euˬ mehˬ shi, nymˇ loꞈ-ehˇ gaˇ ma dahˇ-eu meh. Yaw mahˇ hawˇ-eu yaw jeˇ paw maˬ ehˇ, nymˇ-euˬ aˇ gʼehˇ maˬ ehˇ, gʼoˆ kʼehˬ deuˬ maˬ ehˇ, laꞈ taˆ paw pyawˬ-ahˇ jaˆ-eu nymˇ-ahˇ duˇ-eu meh.

¹² Nymˇ-euˬ pyawˬ ma laꞈ oˆ pyawˬ nahˇ ma doˆ kʼehˬ paw kaˇ pyawˇ mehˬ dzaˬ saˬ-iˇ-euˬ gaˇ, aˇ lawˆ deuˬ-euˬ uˬ moˆ laˇ gʼoˆ tiˬ gʼoˆ dahˇ-eu meh.

¹³ Tsawˇ haˬ kʼoeˇ gʼaˬ ngaˬ-ahˇ heu loꞈ-ehˇ ehˇ-eu meh. “Nymˇ heu nyiˬ nymˇ luꞈ muiˬ-eu shawˇ-eu meh. Sahˬpaˬ Miˬyehˇ-euˬ mehˬ shi le uˇ-eu piˇ ma deuˬ nymˇ kʼoeˇ nyiˬ nymˇ laꞈ kʼoeˇ muiˬ dui shawˇ dui dui-eu lawˇ dzaˇ dzaˬ-eu meh. Aˇ lawˆ kʼoeˇ deuˬ muiˬ-eu shawˇ-eu miˇ neh, muiˬ dui shawˇ dui dui-eu lawˇ-eu jeˬ pyeuꞈ-eu, dzaˬ la gʼo cehˇ lawˇ-eu jeˬ, iˬ baˇ shawˇ-eu lawˇ-eu jeˬ hawˇ-eu dziˇ dzoˆ tsoeˬ-eu lawˇ-eu jeˬ, kʼoeˇ loꞈ-ehˇ gʼeh-eu deuˬ-ahˇ, piˇ ma deuˬ kʼoeˇ gaˇ taˬ-euˬ meh.

¹⁴ Piˇ ma deuˬ Uˬ duˬ tahˬ nymˇ nymˇ ma-ahˇ neh laꞈ nyiˇ pu kaˬ-ahˇ doˆ-iˇ mawꞈ ngeh, aˬ yawꞈ maꞈ Sahˬpaˬ Miˬyehˇ mehˬ shi gaˇ mˇ ngeh dm-euˬ muiˬ-eu shawˇ-eu dm gʼaˬ dm lmˇ deuˬ-ahˇ, aˇ lawˆ kʼoeˇ deuˬ laꞈ kʼoeˇ ya lehˆ taˬ yaꞈ-eu meh. Miˇ kʼahˬ zaˬ deuˬ uiˬ leˇ duˬ-ahˇ aˬ yawꞈ maꞈ maˬ iˇ doˆ mi naˆ-ehˇ mehˬ tsoeˬ ya dm paˇ-eu meh.

Uˬ duˬ tahˬ nymˇ nymˇ ma-euˬ lahˇ laꞈ nyiˇ paw daˇ dza dehˬ-euˬ

¹⁵ Tsawˇ haˬ kʼoeˇ gʼaˬ Uˬ duˬ tahˬ nymˇ nymˇ ma laꞈ kʼoeˇ daˇ dza dehˬ gʼaˬ ngeh, nahˇ ma doˆ kʼehˬ paw pyawˬ-ahˇ jaˆ-eu lahˇ kʼehˬ-ahˇ neh aˬ yawꞈ ngaˬ-ahˇ sheuˬ doˆ gʼeh-awˇ, lahˇ laꞈ nyiˇ paw daˇ dza paˇ dehˬ-euˬ meh.

¹⁶ Aˬ yawꞈ daˇ dza yuˇ-awˇ, nahˇ ma doˆ kʼehˬ paw pyawˬ-ahˇ dehˬ haw ngeh, tiˬ yaˇ nyiˬ tseˇ ngaˬ lmˇ byah-eu meh.

¹⁷ Kʼoeˇ naˇ, aˬ yawꞈ paˇ le gʼeh-awˇ, laꞈ taˆ paw pyawˬ-ahˇ daˇ dza dehˬ haw ngeh, tiˬ yaˇ nyiˬ tseˇ ngaˬ lmˇ byah-eu meh.

¹⁸ Aˬ yawꞈ paˇ iˇ gʼeh-awˇ laꞈ oˆ paw dzeˇ pyawˬ-ahˇ dehˬ haw ngeh, tiˬ yaˇ nyiˬ tseˇ ngaˬ lmˇ byah-eu meh.

¹⁹ Kʼoeˇ naˇ, nahˇ ma ga kʼehˬ paw pyawˬ-ahˇ iˇ-awˇ paˇ dehˬ haw ngeh, tiˬ yaˇ nyiˬ tseˇ ngaˬ lmˇ byah-eu meh.

²⁰ Lahˇ kʼoeˇ-aˬ, tiˬ yaˇ nyiˬ tseˇ ngaˬ lmˇ oeˬ bawˬ byah-awˇ, muiˬ-eu shawˇ-eu jeˬ hawˇ-eu maˬ muiˬ maˬ shawˇ-eu jeˬ-ahˇ taw paˆ taˬ-eu lahˇ pyeuꞈ-eu meh.