Yeˬsaˬgeˬlaˇ 41 - Akha

¹ Kʼoeˇ naˇ, muiˬ-eu shawˇ-eu jawˇ duˬ pyeuꞈ-eu gʼahˇ ceh lawˆ-ahˇ, tsawˇ haˬ kʼoeˇ gʼaˬ ngaˬ-ahˇ sheuˬ uˇ gʼeh nehˬ laꞈ-euˬ meh. Aˇ lawˆ kʼoeˇ lawˆ-ahˇ uˇ leˇ-eu gaˇ ma-ahˇ tsawˇ haˬ kʼoeˇ gʼaˬ dza haw ngeh, yaw mahˇ paw tiˬ lmˇ nui paˆ byah-eu meh.

² Yaw jeˇ paw nyiˬ lmˇ nui paˆ byah-awˇ, nyiˬ paw dzeˇ pyawˬ luꞈ jaˆ-eu kaˇ pyawˇ tiˬ lmˇ uˬ taꞈ tiˬ caˆ byah-eu meh. Aˇ lawˆ kʼoeˇ lawˆ-ahˇ aˬ yawꞈ dza haw ngeh, yaw mahˇ paw tseˇ lmˇ byah-awˇ, yaw jeˇ paw ngaˬ lmˇ byah-eu meh.

³ Kʼoeˇ naˇ, laꞈ kʼoeˇ kʼoeˇ saˬ jaˆ-eu lawˆ-ahˇ aˬ yawꞈ le-euˬ meh. Kʼoeˇ lawˆ-ahˇ le-eu gaˇ ma aˬ yawꞈ dza haw ngeh, yaw mahˇ paw nyiˬ caˆ byah-awˇ, yaw jeˇ paw tiˬ lmˇ nui paˆ byah-eu meh. Nyiˬ paw dzeˇ pyawˬ luꞈ jaˆ-eu kaˇ pyawˇ yaw tuˇ tiˬ lmˇ nui paˆ uˬ taꞈ tiˬ caˆ byah-eu meh.

⁴ Aˇ lawˆ kʼoeˇ lawˆ-ahˇ aˬ yawꞈ dza haw ngeh, ngaˬ lmˇ oeˬ bawˬ byah-eu meh. Kʼoeˇ naˇ, “Heu-aˬ, muiˬ dui shawˇ dui dui-eu jawˇ duˬ meh” lehˇ, aˬ yawꞈ ngaˬ-ahˇ ehˇ-eu meh.

Uˬ duˬ tahˬ nymˇ nymˇ ma-euˬ kaˇ pyawˇ-ahˇ tsoˆ tawꞈ taˬ-euˬ kuˆ lawˆ deuˬ

⁵ Tsawˇ haˬ kʼoeˇ gʼaˬ Uˬ duˬ tahˬ nymˇ nymˇ ma -euˬ kaˇ pyawˇ-ahˇ dza haw ngeh, tiˬ lmˇ nui paˆ tuˇ-eu meh. Kaˇ pyawˇ kʼoeˇ caw caw-ehˇ, Uˬ duˬ tahˬ nymˇ nymˇ ma-euˬ tiˬ jawˬ, tiˬ lmˇ byah-eu kuˆ lawˆ lawˆ zaˬ deuˬ tsoˆ tawꞈ taˬ-euˬ meh.

⁶ Kuˆ lawˆ lawˆ zaˬ heu deuˬ smˬ tiˆ baw-awˇ, tiˬ tiˆ-ahˇ smˬ tseˇ lawˆ byah-eu meh. Uˬ duˬ tahˬ nymˇ nymˇ ma-euˬ kaˇ pyawˇ laꞈ nyiˇ pyawˬ-aˬ, tiˬ tiˆ saˇ-iˬ tiˬ tiˆ baˬ dzehˬ-eu meh. Tsoˆ tawꞈ taˬ-eu kuˆ lawˆ kʼoeˇ deuˬ kaˇ pyawˇ-ahˇ tahˇ byoe-awˇ tsoˆ tawꞈ-eu maˬ loˬ ni ziꞈ leˇ paˬ-ehˇ, kʼoeˇ loꞈ-ehˇ jahˇ taˬ-euˬ meh.

⁷ Kʼoeˇ miˇ neh, Uˬ duˬ tahˬ nymˇ nymˇ ma-euˬ kaˇ pyawˇ-ahˇ laꞈ nyiˇ paw jawˇ-awˇ haw ngeh, dawˬ pehˬ-ahˇ neh uˬ duˬ-ahˇ keuˆ ni, aˬ yawꞈ tiˬ kawˆ naˆ ni tuˇ gaˇ duˇ-eu meh. Laꞈ oˆ oˆ saˬ tiˆ-ahˇ jaˆ-eu kuˆ lawˆ deuˬ-ahˇ neh, gʼahˇ ceh tiˆ hawˇ-eu laꞈ taˆ taˆ saˬ tiˆ-ahˇ jaˆ-eu kuˆ lawˆ deuˬ-ahˇ le nya ni, kuˆ lawˆ kʼoeˇ deuˬ-euˬ laꞈ nyiˇ paw dzeˇ-ehˇ, Uˬ duˬ tahˬ nymˇ nymˇ ma-euˬ kaˇ pyawˇ laꞈ nyiˇ paw, jeˇ lo ni gʼeh-eu dawˬ dzm dzm ma nyiˬ dzm tsoꞈ daˆ taˬ-euˬ meh.

^8-11 Kuˆ lawˆ heu deuˬ-euˬ laꞈ nyiˇ paw pyawˬ kaˇ pyawˇ-aˬ, tiˬ lmˇ uˬ taꞈ tiˬ caˆ byah-eu meh. Uˬ duˬ tahˬ nymˇ nymˇ ma-euˬ laꞈ taˆ paw pyawˬ-ahˇ jaˆ-eu kuˆ lawˆ kʼoeˇ deuˬ-ahˇ uˇ leˇ-eu laˇ gʼoˆ tiˬ gʼoˆ hawˇ-eu, laꞈ oˆ paw pyawˬ-ahˇ jaˆ-eu kuˆ lawˆ deuˬ-ahˇ uˇ leˇ-eu laˇ gʼoˆ tiˬ gʼoˆ dahˇ-eu meh. Uˬ duˬ tahˬ nymˇ nymˇ ma-euˬ tsawˬ dahˬ tiˬ jawˬ, yaw jeˇ paw tiˬ lmˇ uˬ taꞈ tiˬ caˆ byah ni gawˬ goˇ taˬ-euˬ gaˇ ngaˇ mawˇ-euˬ ma. Miˇ tsa neh tiˬ lmˇ nui paˆ gawˬ goˇ taˬ-awˇ, Uˬ duˬ tahˬ nymˇ nymˇ ma-euˬ kaˇ pyawˇ-ahˇ tsoˆ tawꞈ taˬ-euˬ kuˆ lawˆ kʼoeˇ deuˬ uˬ zaˬ kʼawˬ taˬ-euˬ nehˬ-ehˇ di-eu meh. Laˆ goˇ taˬ-euˬ tsawˬ dahˬ kʼoeˇ hawˇ-eu, piˇ ma deuˬ zmˬ-eu kuˆ lawˆ deuˬ jaˆ-eu yaw kaˬ-ahˇ ngaˬ lmˇ byah-eu pu kaˬ jaˆ-eu meh.

Nahˇ ma ga kʼehˬ paw pyawˬ-ahˇ tsoˆ taˬ-euˬ nymˇ

¹² Uˬ duˬ tahˬ nymˇ nymˇ ma-euˬ nahˇ ma ga kʼehˬ paw jaˆ-eu pu kaˬ-euˬ kʼoeˇ paw dzeˇ dzaˬ-ahˇ yaw mahˇ paw nyiˬ tseˇ nyiꞈ lmˇ nui paˆ hawˇ-eu yaw jeˇ paw tseˇ shiꞈ lmˇ nui paˆ byah-eu nymˇ tiˬ nymˇ tsoˆ taˬ-euˬ meh. Nymˇ kʼoeˇ nymˇ-euˬ kaˇ pyawˇ yawˬ pyawˬ na luꞈ, yaw tuˇ paw tiˬ lmˇ uˬ taꞈ tiˬ caˆ byah-eu meh.

Uˬ duˬ tahˬ nymˇ nymˇ ma hmˬ lah-ehˇ daˇ dza dehˬ-euˬ

¹³ Tsawˇ haˬ kʼoeˇ gʼaˬ, Uˬ duˬ tahˬ nymˇ nymˇ ma-ahˇ laꞈ nyiˇ jawˇ-awˇ daˇ dza dehˬ haw ngeh, yaw mahˇ paw nyiˬ tseˇ ngaˬ lmˇ byah-eu meh. Uˬ duˬ tahˬ nymˇ nymˇ ma-euˬ naˇ kʼah pyawˬ-ahˇ neh, pu kaˬ nyiˬ tsehˆ-ehˇ, nahˇ ma doˆ kʼehˬ paw dzeˇ tsoˆ taˬ-euˬ nymˇ kʼoeˇ nymˇ-euˬ kaˇ pyawˇ naˇ kʼah paw keuˆ ni dehˬ haw ngeh, nyiˬ tseˇ ngaˬ lmˇ byah-eu meh.

¹⁴ Uˬ duˬ tahˬ nymˇ nymˇ ma-euˬ mehˬ shi paw dzeˇ pu kaˬ dawˬ tawˆ luꞈ ahˇ leˇ-ehˇ daˇ dza dehˬ haw ngeh, nyiˬ tseˇ ngaˬ lmˇ byah-eu meh.

¹⁵ Uˬ duˬ tahˬ nymˇ nymˇ ma-ahˇ, nahˇ ma ga kʼehˬ paw dzeˇ-ehˇ, tsawˬ dahˬ mehˬ dzaˬ kʼoeˇ dzeˇ heu dzeˇ ahˇ leˇ-ehˇ daˇ dza dehˬ haw ngeh, yaw mahˇ nyiˬ tseˇ ngaˬ lmˇ byah-eu meh. Uˬ duˬ tahˬ nymˇ nymˇ ma-ahˇ uˇ leˇ duˬ-ahˇ jaˆ-eu lawˆ, Muiˬ-eu shawˇ-eu jawˇ duˬ lehˇ kuˇ-eu lawˆ hawˇ-eu, muiˬ dui shawˇ dui dui-eu jawˇ duˬ lehˇ kuˇ-eu lawˆ,

Uˬ duˬ tahˬ nymˇ nymˇ ma laꞈ kʼoeˇ paw jahˇ ahˇ taˬ-euˬ deuˬ

¹⁶ kʼoeˇ smˬ lawˆ luꞈ-ahˇ, dawˬ dah teˇ byaꞈ kʼawˬ-awˇ, laˇ gʼoˆ zaˬ-ahˇ keuˆ ni teˇ byaꞈ taw taˬ-euˬ meh. Laˇ gʼoˆ zaˬ kʼoeˇ deuˬ piˬ tehˬ-awˇ bi jaˆ nya-eu meh.

¹⁷ Uˬ duˬ tahˬ nymˇ nymˇ ma-euˬ kaˇ pyawˇ laꞈ kʼoeˇ pyawˬ pyawˬ lah-ehˇ laˇ gʼoˆ gʼoˆ ma dzeuˇ gaˇ keuˆ ni,

¹⁸ daoˇ aˇ bawˇ aˇ baˇ hawˇ-eu jeˬluˇbeˬ-euˬ aˇ baˇ taꞈ boꞈ byah taˬ-euˬ meh. Daoˇ aˇ bawˇ tiˬ bawˇ tiˇ bawˇ aˇ kaˬ-ahˇ jeˬluˇbeˬ tiˬ mawˇ ahˇ-ehˇ, laꞈ kʼoeˇ kaˇ pyawˇ tiˬ jawˬ taꞈ boꞈ byah taˬ-euˬ meh. Jeˬluˇbeˬ tiˬ mawˇ-euˬ myaˆ pyawˬ nyiˬ pyawˬ tsoꞈ-eu meh.

¹⁹ Tsawˇ haˬ-euˬ myaˆ pyawˬ hmˬ-aˬ, tiˬ paw dzeˇ jaˆ-eu daoˇ aˇ bawˇ paw ciˬ pyawˇ taˬ-awˇ, aˇ laˬ jaˬ shiˇ-euˬ myaˆ pyawˬ hmˬ-aˬ, yawˬ paw yawˬ jaˆ-eu daoˇ aˇ bawˇ aˇ baˇ paw ciˬ pyawˇ taˬ-euˬ meh. Kaˇ pyawˇ dawˬ tawˆ luꞈ-ahˇ kʼoeˇ loꞈ-ehˇ taꞈ boꞈ taˬ-euˬ meh.

²⁰ Uˬ kʼawˬ-ahˇ neh laˇ gʼoˆ dzeuˇ gaˇ keuˆ ni, kʼoeˇ loꞈ-ehˇ taꞈ boꞈ taˬ-euˬ meh.

²¹ Muiˬ-eu shawˇ-eu jawˇ duˬ-ahˇ jaˆ-eu laˇ gʼoˆ bahˬ deuˬ-aˬ, oeˬ bawˬ-ehˇ gʼeh-eu meh. Muiˬ dui shawˇ dui dui-eu jawˇ duˬ lehˇ kuˇ-eu lawˆ mehˬ shi

Daˇ kawˬ neh jahˇ-euˬ lawˇ duˬ

²² daˇ kawˬ neh jahˇ taˬ-euˬ lawˇ duˬ-ahˇ duˇ leˇ-eu tiˬ hmˬ jaˆ-eu meh. Yaw goˇ paw smˬ caˆ byah-awˇ, yaw jeˇ paw nyiˬ caˆ byah-eu meh. Laꞈ coeˇ-ahˇ jahˇ tsoꞈ taˬ-euˬ aˬ kuiˇ hawˇ-eu dawˬ dah nuiˇ daˬ-aˬ, daˇ kawˬ pyeuꞈ-awˇ, byaˇ gʼaˇ yawˬ pyawˬ na luꞈ daˇ kawˬ neh jahˇ taˬ-euˬ meh. “Heu-aˬ, Sahˬpaˬ Miˬyehˇ-euˬ mehˬ shi jaˆ-eu hawˬ jeh meh” lehˇ, tsawˇ haˬ kʼoeˇ gʼaˬ ngaˬ-ahˇ ehˇ-eu meh.

Laˇ gʼoˆ deuˬ

²³ Muiˬ-eu shawˇ-eu jawˇ duˬ-ahˇ le-eu gaˇ ma le dzaˬ saˬ leˇ-euˬ gaˇ laˇ gʼoˆ tiˬ gʼoˆ dahˇ-awˇ, Muiˬ dui shawˇ dui dui-eu jawˇ duˬ-ahˇ le-eu gaˇ ma le dzaˬ saˬ leˇ-euˬ gaˇ kʼawꞈ, laˇ gʼoˆ tiˬ gʼoˆ dahˇ-eu meh.

²⁴ Laˇ gʼoˆ kʼoeˇ nyiˬ gʼoˆ-aˬ, laˇ gʼoˆ paꞈ nyiˬ paꞈ tsoꞈ-eu laˇ gʼoˆ meh.

²⁵ Kaˇ pyawˇ-ahˇ kʼaˇ taꞈ boꞈ taˬ-eu loꞈ-ehˇ, Muiˬ-eu shawˇ-eu jawˇ duˬ-ahˇ le uˇ-eu laˇ gʼoˆ-ahˇ kʼawꞈ, daoˇ aˇ bawˇ aˇ baˇ hawˇ-eu jeˬluˇbeˬ aˇ baˇ taꞈ boꞈ taˬ-euˬ meh. Uˬ duˬ tahˬ nymˇ nymˇ ma-ahˇ uˇ leˇ duˬ-ahˇ jaˆ-eu lawˆ-euˬ gʼoˆ kʼehˬ laꞈ nyiˇ paw teˇ byaꞈ joe taˬ-euˬ meh.

²⁶ Aˇ lawˆ kʼoeˇ lawˆ-euˬ pyawˬ ma nyiˬ pyawˬ luꞈ-ahˇ laˇ gʼoˆ gʼoˆ zaˬ jahˇ ahˇ taˬ-awˇ, kaˇ pyawˇ-ahˇ daoˇ aˇ bawˇ aˇ baˇ toeˬ boꞈ taˬ-euˬ meh.