Yeˬsaˬgeˬlaˇ 40 - Akha

Yeˬsaˬgeˬlaˇ-ahˇ Yeˬluˇsaˬlehˬ meuˬ-ahˇ sheuˬ gʼeh-euˬ

Aˬ KAˇ KAˇ ZIˇ-EUˬ Uˬ DUˬ TAHˬ NYMˇ NYMˇ MA GAˇ KAWˆ YA SIˬ YA MAWˇ-EUˬ

¹ Yeˬluˇsaˬlehˬ meuˬ bi deuˆ gʼaˬ-euˬ tseˇ oeˬ kʼoꞈ kʼawˆ laˇ-awˇ, nga maꞈ-ahˇ aˬ cawˬ miˇ kʼahˬ-ahˇ bi nyehꞈ gʼeh-awˇ jawˇ luꞈ-eu nyiˬ tseˇ ngaˬ kʼoꞈ tiˬ kʼoꞈ, kʼoꞈ shuiꞈ tseˇ nah-ahˇ, Sahˬpaˬ Miˬyehˇ-euˬ baoˬ ngaˬ-euˬ kʼoeˇ taˆ keuˆ le-awˇ ngaˬ-ahˇ ciˬ gʼeh-euˬ meh.

² Yaw sahˇ laꞈ kʼoeˇ ya siˬ ya mawˇ-eu jeˬ laꞈ kʼoeˇ, Miˬyehˇ ngaˬ-ahˇ Iˇsaˬleˬlaˆ miˇ kʼahˬ laꞈ kʼoeˇ sheuˬ gʼeh-awˇ, gawˬ jawˬ yaw goˇ tiˬ jawˬ kʼoeˇ taˆ ciˬ taˬ nehˬ laꞈ-euˬ meh. Ngaˬ-euˬ mehˬ shi nymˇ tiˬ deuˬ jaˆ-awˇ, meuˬ-ahˇ duˇ gaˇ ya mawˇ-euˬ ma.

³ Aˬ yawꞈ ngaˬ-ahˇ kʼoeˇ gaˇ paˇ sheuˬ peh gʼeh-awˇ, guiˬ shuiˇ loꞈ-ehˇ guiˇ nyiˬ ni gʼeh-eu tsawˇ haˬ tiˬ gʼaˬ-ahˇ ya mawˇ-euˬ ma. Tsawˇ haˬ kʼoeˇ gʼaˬ, shawˇ jehˆ ni gʼeh-eu saˬ paˇ neh jahˇ taˬ-eu daˇ dza aˇ caˆ tiˬ caˆ hawˇ-eu, daˇ dza daˇ kawˬ tiˬ kawˬ yuˇ-awˇ, meuˬ lahˇ kʼehˬ dawˬ peh yawꞈ luꞈ-eu meh.

⁴ Aˬ yawꞈ ngaˬ-ahˇ ehˇ-eu, “Tsawˇ haˬ zaˬ-oˇ, haw taˬ-awˬ. Naˬ bawˇ yaw muiˬ paˬ-ehˇ ciˬ kʼmˇ-awˇ, ngaˇ nawˬ-ahˇ kʼaˇ mehˬ nehˬ laꞈ-eu jeˬ-ahˇ yaw muiˬ paˬ-ehˇ haw duˬ taˬ-awˬ. Aˬ jeˬ miˇ neh ehˇ naˇ, heu loꞈ-ehˇ bi haw taˬ-eu gʼaˇ duˬ nawˬ-ahˇ heu gaˇ sheuˬ laꞈ-euˬ meh. Nawˬ neh kʼaˇ ya mawˇ-euˬ yawˬ jeˬ na luꞈ Iˇsaˬleˬlaˆ tsawˇ haˬ deuˬ-ahˇ nawˇ ya dzawˇ nehˬ-iˇ meh.”

Nahˇ ma doˆ kʼehˬ paw pyawˬ-ahˇ jaˆ-eu lahˇ kʼehˬ

⁵ Ngaˬ neh ya mawˇ-euˬ-aˬ, Uˬ duˬ tahˬ nymˇ nymˇ ma pyeuꞈ-awˇ, jawˬ jawˬ-ehˇ lahˇ gawˬ taˬ-euˬ meh. Tsawˇ haˬ kʼoeˇ gʼaˬ, koꞈ caˆ byah-eu daˇ dza yuˇ-awˇ, lahˇ kʼoeˇ lahˇ-ahˇ dza haw-euˬ meh. Daˇ dza kʼoeˇ hmˬ-euˬ tiˬ caˆ-aˬ, tiˬ caˆ uˬ taꞈ laꞈ zaˬ tiˬ daˬ byah-eu meh. Daˇ dza kʼoeˇ neh dza ngeh, lahˇ kʼoeˇ-aˬ, tiˬ lmˇ nui paˆ goˇ-awˇ, yaw tuˇ paw kʼawꞈ tiˬ lmˇ nui paˆ byah-eu meh.

⁶ Kʼoeˇ naˇ, nahˇ ma doˆ kʼehˬ paw pyawˬ-ahˇ jaˆ-eu lahˇ kʼehˬ-ahˇ aˬ yawꞈ iˇ-euˬ meh. Aˬ yawꞈ dawˬ dzm-ahˇ daˆ leˇ-awˇ, lahˇ kʼehˬ uˬ gʼmˬ-ahˇ jawˇ-awˇ dza haw ngeh, lahˇ kʼehˬ yaw goˇ tiˬ lmˇ nui paˆ byah-eu meh.

⁷ Kʼoeˇ-euˬ nui paw gaˇ ma tiˬ kahˇ dahˇ doˆ-awˇ, gaˇ ma kʼoeˇ paˆ ma paˆ-ehˇ, tiˬ paw-euˬ loꞈ-eu kuˆ lawˆ smˬ lawˆ jaˆ-eu meh. Kuˆ lawˆ kʼoeˇ deuˬ oeˬ coeˇ oeˬ bawˬ-ehˇ gʼeh-awˇ, kaˇ pyawˇ tiˬ pyawˬ-euˬ tiˬ lmˇ nui paˆ byah-eu meh. Kuˆ lawˆ tiˬ lawˆ tiˇ lawˆ yaw kaˬ jaˆ-eu kaˇ pyawˇ kʼoeˇ tiˬ lmˇ uˬ taꞈ tiˬ caˆ tuˇ-eu meh. Loꞈ-eu kuˆ lawˆ kʼoeˇ deuˬ-euˬ kʼoeˇ paw dzeˇ, Uˬ duˬ tahˬ nymˇ nymˇ ma mehˬ shi jaˆ-eu kuˆ lawˆ lawˆ ma-ahˇ keuˆ ni, tiˬ lmˇ nui paˆ mahˇ-eu gaˇ ma tiˬ kahˇ bi dahˇ-euˬ meh.

^8-9 Kuˆ lawˆ lawˆ ma kʼoeˇ lawˆ-ahˇ aˬ yawꞈ dza haw ngeh, nyiˬ lmˇ byah-eu meh. Kuˆ lawˆ kʼoeˇ-aˬ, Uˬ duˬ tahˬ nymˇ nymˇ ma-ahˇ kʼaˇ peh dzehˬ-eu lahˇ kʼehˬ gaˇ ma iˇ dzaˬ saˬ-eu tsahˇ-ahˇ jaˆ-awˇ, kʼoeˇ-euˬ kʼoeˇ paw dzeˇ dzaˬ kaˇ pyawˇ yaw tuˇ nyiˬ caˆ byah-eu meh.

¹⁰ Gaˇ ma kʼoeˇ dzeˇ heu dzeˇ jaˆ-eu loꞈ-eu kuˆ lawˆ kʼoeˇ deuˬ-aˬ, tiˬ kawˆ hui ni ahˇ-awˇ, kuˆ lawˆ kʼoeˇ deuˬ-ahˇ taw lawˆ taˬ-euˬ kaˇ pyawˇ deuˬ kʼawꞈ, tiˬ kawˆ naˆ ni tuˇ-eu meh.

¹¹ Kʼoeˇ naˇ, tsawˇ haˬ kʼoeˇ gʼaˬ lahˇ kʼehˬ-ahˇ dahˇ-eu gaˇ ma-euˬ yaw jeˇ paˇ dza haw-euˬ meh. Gaˇ ma kʼoeˇ smˬ lmˇ uˬ taꞈ tiˬ caˆ jeˇ-awˇ, lahˇ kʼehˬ laˇ gʼoˆ kʼoeˇ nyiˬ lmˇ nui paˆ jeˇ-eu meh.

¹² Loꞈ-eu kuˆ lawˆ aˬ yawꞈ lawˆ yawꞈ mehˬ shi yaw goˇ paw tiˬ caˆ byah-awˇ yaw tuˇ paw kʼawꞈ tiˬ caˆ byah-eu kaˇ pyawˇ yaw awˆ taw taˬ-euˬ meh. Kuˆ lawˆ kʼoeˇ deuˬ tiˬ kawˆ hui ni ahˇ-awˇ, tiˬ lmˇ nui paˆ oeˬ bawˬ byah-eu meh.

¹³ Gaˇ ma heu paw paˆ jaˆ-eu kuˆ lawˆ kaˇ pyawˇ naˇ kʼah neh, gaˇ ma nyiˬ tsehˆ-ehˇ dehˬ gʼeh-awˇ, gaˇ ma kʼoeˇ paw paˆ jaˆ-eu kuˆ lawˆ kaˇ pyawˇ naˇ kʼah keuˆ ni dehˬ haw ngeh, koꞈ lmˇ uˬ taꞈ tiˬ caˆ byah-eu meh.

¹⁴ Gaˇ ma iˇ dzaˬ saˬ-iˇ-euˬ kuˆ lawˆ-ahˇ neh iˇ doˆ ngeh, Uˬ duˬ tahˬ nymˇ nymˇ ma-euˬ pu ka keuˆ le-eu meh. Kuˆ lawˆ kʼoeˇ lawˆ-ahˇ aˬ yawꞈ dza haw ngeh, yaw jeˇ paw ngaˬ tseˇ lmˇ byah-eu meh.

¹⁵ Lahˇ-euˬ laꞈ nyiˇ pyawˬ-ahˇ neh, gaˇ ma iˇ dzaˬ saˬ-iˇ-euˬ gaˇ jaˆ-eu kuˆ lawˆ kʼoeˇ lawˆ-euˬ kaˇ pyawˇ laꞈ nyiˇ pyawˬ-ahˇ keuˆ ni dza haw ngeh, gaˇ ma kʼoeˇ kahˇ-euˬ yaw mahˇ tseˇ nyiꞈ lmˇ nui paˆ byah-eu meh.

¹⁶ Kuˆ lawˆ kʼoeˇ deuˬ dawˬ tawˆ luꞈ-euˬ naˇ kʼah paw pyawˬ kaˇ pyawˇ-ahˇ laˇ gʼoˆ zaˬ dahˇ-awˇ, kuˆ lawˆ tiˬ lawˆ tiˇ lawˆ yaw kaˬ-ahˇ jaˆ-eu kaˇ pyawˇ-ahˇ kʼawꞈ, laˇ gʼoˆ zaˬ dahˇ-eu meh. Gaˇ ma-ahˇ ciˬ daˬ-awˇ jaˆ-eu kaˇ pyawˇ laꞈ kʼoeˇ pyawˬ-ahˇ, daoˇ aˇ bawˇ aˇ baˇ taꞈ boꞈ taˬ-euˬ meh.

Laꞈ nyiˇ pu kaˬ

¹⁷ Tsawˇ haˬ kʼoeˇ gʼaˬ ngaˬ-ahˇ gaˇ ma kʼoeˇ kahˇ law caw sheuˬ gʼeh-awˇ, uˬ duˬ tahˬ nymˇ nymˇ ma-euˬ pu kaˬ-ahˇ sheuˬ keuˆ nehˬ laꞈ-euˬ meh. Laꞈ nyiˇ lahˇ-ahˇ tsoˆ tawꞈ taˬ-euˬ kuˆ lawˆ smˬ tseˇ lawˆ jaˆ-awˇ, kuˆ lawˆ kʼoeˇ deuˬ-euˬ mehˬ shi kʼaˬ lo teˇ byaꞈ kʼawˬ taˬ-euˬ pehˇ tsahˇ jaˆ-eu meh.

¹⁸ Kʼaˬ lo teˇ byaꞈ kʼoeˇ, pu kaˬ tiˬ jawˬ kʼawˬ taˬ-awˇ jaˆ-eu meh. Laꞈ nyiˇ pu kaˬ kʼoeˇ-aˬ, laꞈ kʼoeˇ pu kaˬ taꞈ-ehˇ awˆ dzehˬ-eu meh.

¹⁹ Kʼoeˇ gaˇ neh naˇ, laꞈ kʼoeˇ pu kaˬ-ahˇ uˇ leˇ-eu lahˇ kʼehˬ ui cuiˆ yaw goˇ-ahˇ jaˆ-eu meh. Tsawˇ haˬ kʼoeˇ gʼaˬ lahˇ kʼehˬ nyiˬ kʼehˬ yaw kaˬ daˇ dza dehˬ haw ngeh, nyiˬ tseˇ ngaˬ lmˇ byah-eu meh.

Laꞈ taˆ paw pyawˬ-ahˇ jaˆ-eu lahˇ kʼehˬ

²⁰ Kʼoeˇ naˇ, laꞈ taˆ paw pyawˬ-ahˇ neh Uˬ duˬ tahˬ nymˇ nymˇ ma-euˬ pu kaˬ-ahˇ uˇ leˇ-eu lahˇ kʼehˬ kʼoeˇ kʼehˬ-ahˇ, tsawˇ haˬ kʼoeˇ gʼaˬ dza haw-euˬ meh.

²¹ Gaˇ ma kʼoeˇ paˆ ma paˆ-ehˇ jaˆ-eu loꞈ-eu kuˆ lawˆ smˬ lawˆ, kuˆ lawˆ kʼoeˇ deuˬ-ahˇ taw paˆ-euˬ kaˇ pyawˇ hawˇ-eu, kuˆ lawˆ lawˆ ma kʼoeˇ deuˬ dawˬ tawˆ luꞈ, nahˇ ma doˆ kʼehˬ paw pyawˬ-ahˇ jaˆ-eu lahˇ kʼehˬ-ahˇ jaˆ-eu deuˬ loꞈ-ehˇ, tiˬ kawˆ hui ni ahˇ-eu meh. Lahˇ kʼehˬ gaˇ ma yaw mahˇ tseˇ nyiꞈ lmˇ nui paˆ byah-awˇ, yaw jeˇ paw koꞈ lmˇ uˬ taꞈ tiˬ caˆ byah-eu meh.

²² Kuˆ lawˆ lawˆ ma maˬ ehˇ, laˇ gʼoˆ zaˬ deuˬ maˬ ehˇ, daoˇ aˇ bawˇ aˇ baˇ taꞈ boꞈ taˬ-euˬ maˬ ehˇ, dawˬ tawˆ luꞈ nahˇ ma doˆ kʼehˬ paw pyawˬ-ahˇ jaˆ-eu lahˇ kʼehˬ-ahˇ jahˇ taˬ-euˬ gaˇ duˇ-eu meh. Heu tsahˇ-ahˇ, lahˇ kʼehˬ-ahˇ le uˇ-eu dawˬ dzm shiꞈ tehꞈ jaˆ-awˇ, gaˇ ma iˇ dzaˬ saˬ-euˬ gaˇ, kuˆ lawˆ lawˆ ma kʼoeˇ lawˆ pu kaˬ paw pyawˇ-ehˇ jaˆ-eu meh.

²³ Laꞈ taˆ paw pyawˬ-ahˇ jaˆ-eu lahˇ kʼehˬ heu kʼehˬ-ahˇ neh pu kaˬ nyiˬ tsehˆ-ehˇ iˇ naˇ, nahˇ ma doˆ kʼehˬ paw pyawˬ-ahˇ jaˆ-eu lahˇ kʼehˬ kʼoeˇ kʼehˬ-ahˇ kʼaˇ jaˆ-eu loꞈ-ehˇ, laꞈ kʼoeˇ pu kaˬ-ahˇ uˇ leˇ-eu lahˇ kʼehˬ tiˬ kʼehˬ paˇ jaˆ-eu meh. Lahˇ kʼehˬ kʼoeˇ nyiˬ kʼehˬ yaw kaˬ tsawˇ haˬ kʼoeˇ gʼaˬ daˇ dza dehˬ haw ngeh, nyiˬ tseˇ ngaˬ lmˇ byah-eu meh.

Laꞈ oˆ paw pyawˬ-ahˇ jaˆ-eu lahˇ kʼehˬ

²⁴ Kʼoeˇ naˇ, tsawˇ haˬ kʼoeˇ gʼaˬ ngaˬ-ahˇ laꞈ oˆ paw pyawˬ-ahˇ sheuˬ gʼeh nehˬ laꞈ-awˇ, lahˇ kʼehˬ tiˬ kʼehˬ jaˆ gaˇ paˇ ya mawˇ-euˬ ma. Lahˇ kʼehˬ kʼoeˇ kʼehˬ-ahˇ aˬ yawꞈ daˇ dza dehˬ haw ngeh, yawˬ jeˬ na luꞈ lahˇ kʼehˬ nui deuˬ kʼaˇ byah-eu naˆ ni byah-eu meh.

²⁵ Lahˇ kʼehˬ nui deuˬ-ahˇ kʼaˇ jahˇ taˬ-euˬ loꞈ-ehˇ, lahˇ kʼehˬ gaˇ ma-ahˇ jaˆ-eu kuˆ lawˆ deuˬ-ahˇ laˇ gʼoˆ zaˬ deuˬ jahˇ ahˇ taˬ-euˬ meh. Lahˇ kʼehˬ gaˇ ma kʼoeˇ yaw mahˇ paw tseˇ nyiꞈ lmˇ nui paˆ byah-awˇ, yaw jeˇ paw koꞈ lmˇ uˬ taꞈ tiˬ caˆ byah-eu meh.

²⁶ Gaˇ ma kʼoeˇ kahˇ-ahˇ daˆ keuˆ leˇ-eu dawˬ dzm shiꞈ tehꞈ jaˆ-awˇ, aˬ cawˬ taꞈ-ehˇ huiˬ dzehˬ-eu kuˆ lawˆ kʼoeˇ lawˆ-aˬ, gaˇ ma iˇ dzaˬ saˬ-iˇ-euˬ gaˇ jaˆ-awˇ, Uˬ duˬ tahˬ nymˇ nymˇ ma-euˬ pu kaˬ mehˬ shi nyiˬ paˆ-ehˇ jaˆ-eu meh. Gaˇ ma paw pyawˇ-eu kaˇ pyawˇ deuˬ-euˬ laꞈ kʼoeˇ paw, daoˇ aˇ bawˬ aˇ baˇ taꞈ boꞈ taˬ-euˬ meh.

²⁷ Heu tsahˇ-ahˇ kʼawꞈ, laꞈ kʼoeˇ pu kaˬ-ahˇ uˇ leˇ-eu lahˇ kʼehˬ jaˆ-eu meh. Laˬ oˆ paw pyawˬ-ahˇ jaˆ-eu lahˇ kʼehˬ laꞈ nyiˇ kʼehˬ-ahˇ neh, lahˇ kʼehˬ heu kʼehˬ-ahˇ keuˆ ni tsawˇ haˬ kʼoeˇ gʼaˬ daˇ dza dehˬ haw ngeh, nyiˬ tseˇ ngaˬ lmˇ byah-eu meh.

Laꞈ oˆ paw pyawˬ lahˇ kʼehˬ-ahˇ neh uˇ leˇ-eu, laꞈ kʼoeˇ pu kaˬ

²⁸ Laꞈ oˆ paw pyawˬ-ahˇ jaˆ-eu lahˇ kʼehˬ gaˇ ma-ahˇ neh laꞈ kʼoeˇ pu kaˬ-ahˇ, tsawˇ haˬ kʼoeˇ gʼaˬ ngaˬ-ahˇ sheuˬ uˇ gʼeh nehˬ laꞈ-euˬ meh. Lahˇ kʼehˬ gaˇ ma kʼoeˇ tsahˇ aˬ yawꞈ daˇ dza dehˬ haw ngeh, laꞈ nyiˇ lahˇ kʼehˬ gaˇ ma deuˬ hui ni ahˇ-eu meh.

^29-30 Kʼoeˇ gaˇ jaˆ-eu loꞈ-eu kuˆ lawˆ deuˬ maˬ ehˇ, kuˆ lawˆ lawˆ ma kʼoeˇ lawˆ maˬ ehˇ, laꞈ kʼoeˇ kaˇ pyawˇ deuˬ maˬ ehˇ, lahˇ kʼehˬ nui deuˬ-ahˇ kʼaˇ jaˆ-eu deuˬ nehˬ-ehˇ tiˬ kawˆ mahˇ ni ahˇ-awˇ, tiˬ kawˆ hui ni ahˇ-eu meh. Lahˇ kʼehˬ gaˇ ma kʼoeˇ tsahˇ-ahˇ jaˆ-eu kuˆ lawˆ deuˬ-ahˇ kʼawꞈ, laˇ gʼoˆ zaˬ jahˇ ahˇ taˬ-euˬ meh. Lahˇ kʼehˬ gaˇ ma kʼoeˇ tiˬ li, yaw mahˇ paw tseˇ nyiꞈ lmˇ nui paˆ byah-awˇ, yaw jeˇ paw kʼoꞈ lmˇ uˬ taꞈ tiˬ caˆ byah-eu meh.

³¹ Lahˇ kʼehˬ gaˇ ma kʼoeˇ tsahˇ-ahˇ jaˆ-eu kuˆ lawˆ lawˆ ma kʼoeˇ lawˆ-aˬ, pu kaˬ yawˬ hmˬ yawˬ-euˬ mehˬ shi nyiˬ paˆ-ehˇ tsaˬ-awˇ, gaˇ ma gaˇ dzeˇ jaˆ-eu kaˇ pyawˇ dawˬ tawˆ luꞈ-ahˇ, daoˇ aˇ bawˇ aˇ baˇ taꞈ boꞈ taˬ-euˬ meh. Lahˇ kʼehˬ kʼoeˇ kʼehˬ-ahˇ le-eu dawˬ dzm yehꞈ tehꞈ jaˆ-eu meh.

Nahˇ ma doˆ kʼehˬ paw pyawˬ lahˇ kʼehˬ-ahˇ neh uˇ leˇ-eu laꞈ kʼoeˇ pu kaˬ

³² Nahˇ ma doˆ kʼehˬ paw jaˆ-eu lahˇ kʼehˬ gaˇ ma-ahˇ neh, laꞈ kʼoeˇ pu kaˬ paw tsawˇ haˬ kʼoeˇ gʼaˬ ngaˬ-ahˇ sheuˬ uˆ gʼeh nehˬ laꞈ-euˬ meh. Lahˇ kʼehˬ gaˇ ma kʼoeˇ aˬ yawꞈ dza haw ngeh, laꞈ nyiˇ lahˇ kʼehˬ gaˇ ma deuˬ hui ni ahˇ-eu meh.

³³ Kʼoeˇ gaˇ jaˆ-eu loꞈ-eu kuˆ lawˆ deuˬ maˬ ehˇ, kuˆ lawˆ lawˆ ma kʼoeˇ lawˆ maˬ ehˇ, laꞈ kʼoeˇ kaˇ pyawˇ deuˬ maˬ ehˇ, lahˇ kʼehˬ nui deuˬ-ahˇ kʼaˇ jaˆ-eu deuˬ nehˬ-ehˇ, tiˬ kawˆ mah ni ahˇ-awˇ, tiˬ kawˆ hui ni ahˇ-eu meh. Yawˬ paw yawˬ na luꞈ laˇ gʼoˆ zaˬ dahˇ-awˇ, kuˆ lawˆ lawˆ ma-ahˇ kʼawꞈ laˇ gʼoˆ zaˬ dahˇ-eu meh. Lahˇ kʼehˬ gaˇ ma kʼoeˇ tiˬ li yaw mahˇ paw tseˇ nyiꞈ lmˇ nui paˆ byah-awˇ, yaw jeˇ paw koꞈ lmˇ uˬ taꞈ tiˬ caˆ byah-eu meh.

³⁴ Kuˆ lawˆ lawˆ ma kʼoeˇ lawˆ-aˬ, pu kaˬ yawˬ hmˬ yawˬ-euˬ mehˬ shi nyiˬ paˆ-ehˇ jaˆ-eu meh. Lahˇ kʼehˬ gaˇ ma gaˇ dzeˇ caw caw-ehˇ jaˆ-eu kaˇ pyawˇ deuˬ-ahˇ daoˇ aˇ bawˇ aˇ baˇ taꞈ boꞈ taˬ-euˬ meh. Lahˇ kʼehˬ kʼoeˇ kʼehˬ-ahˇ le-eu dawˬ dzm yehꞈ tehꞈ jaˆ-eu meh.

Laꞈ taˆ paw pyawˬ lahˇ kʼehˬ-ahˇ neh uˇ leˇ-eu laꞈ kʼoeˇ pu kaˬ

³⁵ Kʼoeˇ naˇ, laꞈ taˆ paw pyawˬ-ahˇ jaˆ-eu lahˇ kʼehˬ-ahˇ, tsawˇ haˬ kʼoeˇ gʼaˬ ngaˬ-ahˇ sheuˬ gʼeh nehˬ laꞈ-euˬ meh. Lahˇ kʼehˬ kʼoeˇ kʼehˬ-ahˇ aˬ yawꞈ daˇ dza dehˬ haw ngeh, lahˇ kʼehˬ nui deuˬ hui ni ahˇ-eu meh.

³⁶ Lahˇ kʼehˬ nui deuˬ-ahˇ kʼaˇ jaˆ-eu loꞈ-ehˇ, loꞈ-eu kuˆ lawˆ deuˬ maˬ ehˇ, laꞈ kʼoeˇ pyawˬ-ahˇ aˇ baˇ taꞈ boꞈ taˬ-euˬ kaˇ pyawˇ deuˬ maˬ ehˇ, kuˆ lawˆ lawˆ ma maˬ ehˇ, kʼoeˇ gaˇ jaˆ-awˇ, yawˬ pyawˬ na luꞈ laˇ gʼoˆ zaˬ kʼawꞈ jahˇ ahˇ taˬ-euˬ meh. Lahˇ kʼehˬ gaˇ ma kʼoeˇ tiˬ li, yaw mahˇ paw tseˇ nyiꞈ lmˇ nui paˆ byah-awˇ, yaw jeˇ paw koꞈ lmˇ uˬ taꞈ tiˬ caˆ byah-eu meh.

³⁷ Kuˆ lawˆ lawˆ ma kʼoeˇ lawˆ-aˬ, pu kaˬ yawˬ hmˬ yawˬ-euˬ mehˬ shi nyiˬ paˆ-ehˇ jaˆ-eu meh. Lahˇ kʼehˬ gaˇ ma gaˇ dzeˇ caw caw-ehˇ jaˆ-eu kaˇ pyawˇ deuˬ-ahˇ, daoˇ aˇ bawˇ aˇ baˇ taꞈ boꞈ taˬ-euˬ meh. Lahˇ kʼehˬ kʼoeˇ kʼehˬ-ahˇ le-eu dawˬ dzm yehꞈ tehꞈ jaˆ-eu meh.

Laꞈ taˆ paw pyawˬ lahˇ kʼehˬ dawˬ peh tsoˆ taˬ-euˬ nymˇ deuˬ

³⁸ Laꞈ taˆ paw pyawˬ-ahˇ jaˆ-eu laꞈ kʼoeˇ lahˇ kʼehˬ gaˇ ma-ahˇ tawꞈ-ehˇ, laꞈ nyiˇ pu kaˬ paw-ehˇ mehˬ shi pyawˇ-awˇ tsoˆ doˆ taˬ-euˬ aˇ lawˆ tiˬ lawˆ jaˆ-eu meh. Aˇ lawˆ kʼoeˇ lawˆ pu kaˬ mehˬ shi jaˆ-eu kuˆ lawˆ lawˆ ma-ahˇ laˇ gʼoˆ dahˇ tawꞈ-awˇ, mawˇ lah-ehˇ miˬ dzaˬ-ahˇ dzah puiˆ-awˇ lawˇ-eu lehˇ sehꞈ-euˬ jeˬ zaˬ deuˬ-ahˇ aˇ lawˆ kʼoeˇ lawˆ laꞈ kʼoeˇ tsiˬ shawˇ-eu meh.

³⁹ Kuˆ lawˆ lawˆ ma kʼoeˇ lawˆ laꞈ kʼoeˇ, tiˬ pyawˬ-ahˇ nyiˬ jeh baꞈ taˬ-euˬ hawˬ jeh oeˬ jeh jaˆ-awˇ, mawˇ lah-ehˇ miˬ dzaˬ-ahˇ dzah puiˆ-awˇ lawˇ-eu gʼaˇ duˬ maˬ ehˇ, iˬ baˇ shawˇ-eu lawˇ-eu jeˬ gʼaˇ duˬ maˬ ehˇ, mˇ lehˬ-euˬ baˬ da neh dziˇ dzoˆ tsoeˬ-eu lawˇ-eu jeˬ gʼaˇ duˬ maˬ ehˇ, jeˬ zaˬ sehꞈ ngeh hawˬ jeh kʼoeˇ deuˬ kʼoeˇ taˆ sehꞈ-eu meh.

⁴⁰ Kuˆ lawˆ laꞈ nyiˇ paw jaˆ-eu laꞈ taˆ paw pyawˬ lahˇ kʼehˬ-ahˇ uˇ leˇ kʼehˬ kʼoeˇ dzeˇ heu dzeˇ kʼawꞈ, kʼoeˇ gaˇ duˇ leˇ-eu hawˬ jeh, tiˬ paw-euˬ nyiˬ jeh jaˆ-eu meh.

⁴¹ Lawˇ gaˇ shehˇ gaˇ geuꞈ-eu jeˬ zaˬ sehꞈ-eu gʼaˇ duˬ hawˬ jeh dawˬ tawˆ luꞈ yehꞈ jeh jaˆ-eu meh. Kuˆ lawˆ laꞈ kʼoeˇ oeˬ jeh jaˆ-awˇ, laꞈ nyiˇ oeˬ jeh jaˆ-eu meh.

⁴² Laꞈ kʼoeˇ lahˇ kʼehˬ gaˇ ma-ahˇ tsoˆ tawꞈ taˬ-euˬ aˇ lawˆ kʼoeˇ lawˆ-ahˇ jaˆ-eu, miˬ dzaˬ dzah puiˆ-awˇ lawˇ-eu jeˬ laˆ saˆ duˬ pyeuꞈ-eu hawˬ jeh oeˬ jeh-aˬ, kʼaˬ lo taꞈ taˬ-euˬ hawˬ jeh pyeuꞈ-eu meh. Tiˬ caˆ goˇ-awˇ, tiˬ caˆ tiˬ toˇ oeˬ bawˬ byah-eu meh. Lawˇ gaˇ shehˇ gaˇ geuꞈ-eu jeˬ zaˬ deuˬ-ahˇ sehꞈ-eu keu ka dawˬ tawˆ luꞈ, hawˬ jeh kʼoeˇ oeˬ jeh kʼoeˇ taˆ jaˆ-eu meh.

⁴³ Hawˬ jeh kʼoeˇ-euˬ tiˬ jawˬ, laꞈ zaˬ tiˬ daˬ byah-eu daˇ bahˇ laˆ tsoꞈ taˬ-euˬ meh. Lawˇ-eu gʼaˇ duˬ kʼaˇ lehˬ hmˬ taˬ-euˬ shaˬ jiˇ dawˬ tawˆ luꞈ, hawˬ jeh kʼoeˇ oeˬ jeh kʼoeˇ taˆ bi jaˆ-euˬ meh.

⁴⁴ Kʼoeˇ naˇ, tsawˇ haˬ kʼoeˇ gʼaˬ ngaˬ-ahˇ laꞈ kʼoeˇ pu kaˬ-ahˇ sheuˬ ahˇ gʼeh nehˬ laꞈ-euˬ meh. Laꞈ kʼoeˇ pu kaˬ kʼoeˇ tsahˇ-ahˇ kuˆ lawˆ nyiˬ lawˆ jaˆ-eu meh. Tiˬ lawˆ-aˬ, laꞈ oˆ paw pyawˬ-ahˇ mehˬ shi pyawˇ-ehˇ laꞈ taˆ paw pyawˬ lahˇ kʼehˬ dawˬ peh jaˆ-awˇ, tiˬ lawˆ-aˬ, laꞈ taˆ paw pyawˬ-ahˇ mehˬ shi pyawˇ-ehˇ, laꞈ oˆ paw pyawˬ lahˇ kʼehˬ dawˬ peh jaˆ-eu meh.

⁴⁵ Laꞈ oˆ paw pyawˬ-ahˇ mehˬ shi pyawˇ-ehˇ jaˆ-eu lawˆ-aˬ, Uˬ duˬ tahˬ nymˇ nymˇ ma laꞈ kʼoeˇ gaˇ mˇ-eu piˇ ma deuˬ gʼaˇ duˬ meh lehˇ, tsawˇ haˬ kʼoeˇ gʼaˬ ehˇ-eu meh.

⁴⁶ Laꞈ taˆ paw pyawˬ-ahˇ mehˬ shi pyawˇ-ehˇ jaˆ-eu lawˆ-aˬ, lawˇ duˬ-ahˇ gaˇ mˇ-eu piˇ ma deuˬ gʼaˇ duˬ meh lehˇ, aˬ yawꞈ ehˇ-eu meh. Piˇ ma dawˬ tawˆ luꞈ Zaˬdoˆ-euˬ zaˬ deuˬ uˆ deuˬ pyeuꞈ-awˇ, Leˬbiˇ tsawˇ jeuˬ laꞈ kʼoeˇ, Sahˬpaˬ Miˬyehˇ dawˬ peh le-awˇ, gaˇ mˇ leˇ kʼmˬ-eu, aˬ yawꞈ pehˬ aˇ jeuˬ tiˬ jeuˬ jawˇ-eu tehꞈ meh lehˇ, tsawˇ haˬ kʼoeˇ gʼaˬ ngaˬ-ahˇ ehˇ-eu meh.

Laꞈ kʼoeˇ pu kaˬ hawˇ-eu Uˬ duˬ tahˬ nymˇ nymˇ ma

⁴⁷ Laꞈ kʼoeˇ pu kaˬ-ahˇ tsawˇ haˬ kʼoeˇ gʼaˬ daˇ dza dehˬ haw ngeh, nyiˬ tseˇ ngaˬ lmˇ oeˬ bawˬ byah-eu meh. Uˬ duˬ tahˬ nymˇ nymˇ ma aˬ yawꞈ hmˬ-aˬ, nahˇ ma ga kʼehˬ paw-ehˇ jaˆ-awˇ, mehˬ shi paw lawˇ duˬ tiˬ tsahˇ jaˆ-eu meh.

⁴⁸ Kʼoeˇ naˇ, Uˬ duˬ tahˬ nymˇ nymˇ ma-ahˇ uˇ leˇ-eu lawˆ-ahˇ, aˬ yawꞈ ngaˬ-ahˇ sheu gʼeh nehˬ laꞈ-euˬ meh. Uˇ leˇ duˬ kʼoeˇ tsahˇ-ahˇ aˬ yawꞈ dza haw ngeh, yaw goˇ paw tiˬ lmˇ uˬ taꞈ tiˬ caˆ byah-awˇ, yaw jeˇ paw smˬ lmˇ nui paˆ byah-eu meh. Nyiˬ paw dzeˇ pyawˬ luꞈ jaˆ-eu kaˇ pyawˇ yaw tuˇ smˬ caˆ byah-eu meh.

⁴⁹ Yaw jeˇ paw ngaˬ lmˇ hawˇ-eu yaw mahˇ paw smˬ lmˇ byah-eu uˇ leˇ duˬ aˇ lawˆ-ahˇ le-eu dawˬ dzm dawˬ tehꞈ jaˆ-eu meh. Uˇ leˇ duˬ-euˬ kʼoeˇ paˆ ma paˆ-ehˇ, tiˬ paw dzeˇ-euˬ kʼawˇ zeuˇ nyiˬ zeuˇ jaˆ-eu meh.