Yeˬsaˬgeˬlaˇ 4 - Akha

Yeˬluˇsaˬlehˬ meuˬ bi jawˬ lahˇ-eu gaˇ kawˆ yaw jeˬ ma jeˬ jahˇ mehˬ-euˬ

¹ Miˬyehˇ ngaˬ-ahˇ heu loꞈ-ehˇ ehˇ-eu meh. “Tsawˇ haˬ zaˬ-oˇ, nawˬ-euˬ mehˬ shi tsaˬ byaˆ tiˬ siˬ gʼoˆ taˬ-awˇ, Yeˬluˇsaˬlehˬ meuˬ-euˬ aˇ baˇ kawˆ boꞈ-awˬ.

² Kʼoeˇ naˇ, meuˬ-ahˇ loꞈ jawˬ-awˇ, guiˇ deuˆ ngeh kʼaˇ jahˇ-eu loꞈ-ehˇ, tsaˬ byaˆ kʼoeˇ-euˬ tiˬ jawˬ, kuˬ kaˬ duˬ-eu, miˇ tsaˬ ciˬ goˇ-eu, sehˬ gʼawˆ gʼawˆ-eu hawˇ-eu meuˬ lahˇ tuˆ byaˆ-eu keu ka deuˬ baꞈ taˬ-awˇ jaˆ-eu, heu loꞈ-ehˇ gʼeh-eu yawˬ jeˬ na luꞈ-euˬ aˇ baˇ jahˇ kuꞈ taˬ-awˬ.

³ Kʼoeˇ naˇ, shmˇ shmˇ byaˆ tiˬ byaˆ yuˇ-awˇ, nawˇ hawˇ-eu meuˬ-euˬ yaw kaˬ-ahˇ ciˬ taw taˬ-awˬ. Meuˬ-ahˇ mehˬ shiˬ pyawˇ-awˇ jawˇ-awˬ. Nawˇ-aˬ, meuˬ-ahˇ loꞈ jawˬ-eu gʼaˬ meh. Heu-aˬ, Iˇsaˬleˬlaˆ tsawˇ jeuˬ gʼaˇ duˬ yaw jeˬ ma jeˬ pyeuꞈ-eu meh.

⁴ Kʼoeˇ naˇ, aˇ caˇ pyawˬ miˇ tsa kʼawˬ daˇ-awˇ, biˇ hiˇ-ehˇ yuꞈ-awˬ. Iˇsaˬleˬlaˆ tsawˇ jeuˬ-euˬ iˬ baˇ nawˬ-euˬ kʼoeˇ taˆ ngaˇ baꞈ daˆ ma. Nawˇ kʼoeˇ loꞈ-ehˇ aˇ myaˆ nah yuꞈ naˇ kʼoeˇ myaˆ nah, aˬ yawꞈ maꞈ-ahˇ oꞈ-eu kʼehˬ-eu kʼaˆ-eu jeˬ-ahˇ nawˇ ya daˬ meh.

⁵ Ngaˇ nawˬ-ahˇ smˬ yaˇ gʼoeˬ tseˇ nah keuˆ ni kʼoeˇ loꞈ-ehˇ bi daˬ ma. Iˇsaˬleˬlaˆ miˇ kʼahˬ-aˬ, smˬ yaˇ gʼoeˬ tseˇ kʼoꞈ keuˆ ni kʼehˬ-eu kʼaˆ-eu jeˬ-ahˇ ya daˬ tehꞈ-a. Nawˬ neh tiˬ nah daˬ-eu jeˬ-ahˇ aˬ yawꞈ maꞈ tiˬ kʼoꞈ ya daˬ tehꞈ-a. Iˇsaˬleˬlaˆ miˇ kʼahˬ-ahˇ kʼehˬ nehˬ kʼaˆ nehˬ-eu jeˬ gʼaˇ duˬ, nawˇ kʼoeˇ myah ni ya daˬ tehꞈ-a.

⁶ Nawˇ kʼoeˇ loꞈ-ehˇ daˬ gʼaˬ ngeh, aˇ maˇ paw paˇ poˆ pyaˆ-awˇ, Yuˇdaˆ miˇ kʼahˬ gʼaˇ duˬ oeˬ tseˇ nah keuˆ ni paˇ daˬ poˆ-awˬ. Nawˬ neh tiˬ nah daˬ-euˬ jeˬ-ahˇ aˬ yawꞈ maꞈ tiˬ kʼoꞈ ya daˬ tehꞈ-a.

⁷ “Yeˬluˇsaˬlehˬ meuˬ-ahˇ loꞈ jawˬ taˬ-euˬ gaˇ nawˬ-euˬ myaˆ nuiˆ haw tsoˆ taˬ-awˬ. Nawˬ-euˬ laꞈ du cawˬ doˆ-awˇ, Yeˬluˇsaˬlehˬ meuˬ gaˇ kawˆ ngehˬ dah-awˬ.

⁸ Yeˬluˇsaˬlehˬ meuˬ-ahˇ loꞈ jawˬ-awˇ guiˇ deuˆ-eu maˬ jiˇ kʼoeˇ keuˆ ni, nawˇ maˬ luˆ paˇ nya ni nawˬ-ahˇ ngaˇ paꞈ cuꞈ-awˇ bi ga ma.

⁹ “Cehˇ pyuˇ, lawˬ loeˇ, aˇ behˆ, nuiˆ pahˬ, saˇ lahˬ, heu deuˬ-euˬ cehˇ meu laˆ keuˬ-awˇ hawˬ tahˬ jahˇ-awˬ. Nawˇ aˇ caˇ paw miˇ tsa kʼawˬ daˇ-awˇ biˇ hiˇ-ehˇ smˬ yaˇ gʼoeˬ tseˇ nah yuꞈ ngeh, kʼoeˇ ya dzaˬ meh.

¹⁰ Tiˬ nah-euˬ hawˬ tahˬ tiˬ kaˇ ngaˬ ja dzaˬ-awˇ, yawˬ nah yawˬ-ahˇ keuˆ ni ya dzahˬ keuˆ meh.

¹¹ Tiˬ nah iˇ cuꞈ nyiˬ kʼmˬ taꞈ-ehˇ nawˇ maˬ ya dawˇ-a.

¹² Tsawˇ haˬ zaˬ-euˬ keˬ keˬ gaˆ koˆ-iˇ-euˬ miˬ dzaˬ gʼoˆ doꞈ-awˇ, kʼoeˇ-euˬ kʼoeˇ taˆ hawˬ tahˬ ba jaꞈ-awˇ, tsawˇ haˬ yawˬ gʼaˬ na luꞈ mawˇ gaˇ nawˇ ya dzaˬ meh.”

¹³ Sahˬpaˬ Miˬyehˇ ehˇ-eu, “Heu-aˬ, Iˇsaˬleˬlaˆ tsawˇ haˬ deuˬ-ahˇ, aˬ cawˬ-euˬ miˇ kʼahˬ-ahˇ ngaˇ teh byaˆ nehˬ ngeh, zahˇ sahˇ kʼoꞈ laꞈ kʼoeˇ maˬ dzaˬ kʼmˬ-a lehˇ ehˇ taˬ-euˬ dzaˇ deuˬ-ahˇ aˬ yawꞈ maꞈ ya dzaˬ-eu gaˇ kawˆ, dawˬ yehˆ pyeuꞈ-eu ma.”

¹⁴ Ehˇ kʼawꞈ, ngaˇ heu loꞈ-ehˇ ehˇ kʼoꞈ nehˬ-euˬ ma. “Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ-oˇ, ngaˬ-euˬ gʼawˇ mawˇ maˬ muiˬ maˬ shawˇ-eu jeˬ ngaˇ tiˬ jawˇ-iˬ maˬ mˇ haw-aˬ. Nyiˇ ngeh neh, aˬ yawˇ yawꞈ shiˇ-euˬ jeˬ zaˬ hawˇ-eu, bawˇ tsahˬ jeˬ zaˬ neh bi laˆ sehꞈ-euˬ jeˬ zaˬ shaˬ jiˇ ngaˇ maˬ dzaˬ haw-aˬ. Maˬ muiˬ maˬ shawˇ-a lehˇ kʼaˇ ehˇ taˬ-euˬ dzaˇ tiˬ jeˬ-iˬ ngaˇ maˬ dzaˬ haw-aˬ.”

¹⁵ Kʼoeˇ ngeh, “Toˆ-ehˇ ngeuˇ naˇ, tsawˇ haˬ-euˬ keˬ dah zaˇ, mawˇ neˇ keˬ gʼoˆ doꞈ-awˇ hawˬ tahˬ puiˆ dzaˬ-awˬ” lehˇ, Miˬyehˇ ehˇ-eu meh.

¹⁶ Kʼoeˇ naˇ, aˬ yawꞈ heu loꞈ-ehˇ paˇ ehˇ-eu meh. “Tsawˇ haˬ zaˬ-oˇ, Yeˬluˇsaˬlehˬ meuˬ-ahˇ dzaˬ dzaˬ dawˇ dawˇ sha ahˇ-eu gaˇ ma ngaˇ laˆ tsoeˬ ma. Yawˬ ha dzaˬ-eu gʼaˇ duˬ dzaˬ dzaˬ dawˇ dawˇ hawˇ-eu iˇ cuꞈ nym le-eu gaˇ haw haw-ehˇ, kʼoeˇ gaˇ jawˇ-eu tsawˇ haˬ deuˬ noeˬ shaˬ-awˇ nui ma cawˆ dui dui tehꞈ-a.

¹⁷ Aˬ yawꞈ maꞈ dzaˬ dzaˬ dawˇ dawˇ hawˇ-eu iˇ cuꞈ maˬ jaˆ-ehˇ pyeuꞈ laˇ-awˇ, noeˬ shaˬ noeˬ zahˬ dui dui-eu laꞈ kʼoeˇ, liˬ-iˇ koˆ-iˇ jiˇ gaˇ keuˆ tehꞈ-a.”