Yeˬsaˬgeˬlaˇ 39 - Akha

Gawˇgaˆ guiˇ deuˆ sm-eu

¹ Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ heu loꞈ-ehˇ ehˇ-eu meh. “ Tsawˇ haˬ zaˬ-oˇ, Meˬshehˆ miˇ kʼahˬ hawˇ-eu Tuˇbaˬlaˇ miˇ kʼahˬ laꞈ kʼoeˇ, sahˬpaˬ dawˬ tawˆ kʼoeˇ taˆ huiˬ dzehˬ-eu sahˬpaˬ pyeuꞈ-eu Gawˇgaˆ-ahˇ deuˬ leˇ ni dawˬ ngehˬ-awˇ, ngaˇ aˬ yawꞈ-ahˇ muiˇ-eu meh lehˇ ehˇ nehˬ-awˬ.

² Aˬ yawꞈ-ahˇ ngaˇ tsahˇ pyawˇ-awˇ, kʼoeˇ taˆ paw sheuˬ daˆ leꞈ-awˇ, Iˇsaˬleˬlaˆ gawˬ jawˬ deuˬ-ahˇ sheuˬ keuˆ gʼeh ma.

³ Aˬ yawꞈ-euˬ aˇ caˇ laꞈ-ahˇ tuˆ tehˬ luꞈ-eu kaˆ ngaˇ deh dzeh-awˇ, aˇ maˇ laꞈ-ahˇ tuˆ tehꞈ taˬ-euˬ kaˆ myaˬ deuˬ ngaˇ tehˆ dzeh jiˇ ma.

⁴ Gawˇgaˆ hawˇ-eu aˬ yawꞈ-euˬ guiˇ maꞈ deuˬ maˬ ehˇ, aˬ yawꞈ jawˇ paw kʼaˇ pyawˬ-eu deuˬ maˬ ehˇ, Iˇsaˬleˬlaˆ gawˬ jawˬ deuˬ kʼoeˇ taˆ coˬ sehꞈ jiˇ-awˇ, aˬ yawꞈ maꞈ-euˬ gʼawˇ mawˇ, aˇ jiˇ hawˇ-eu bawˇ tsahˬ jeˬ zaˬ deuˬ neh bi dzaˬ ma.

⁵ Bawˇ tsahˬ deh ga-ahˇ aˬ yawꞈ maꞈ yaw shiˇ-ehˇ ga tehꞈ-a lehˇ, Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ pyeuꞈ-eu ngaˇ ehˇ-eu ma.

⁶ Maˬgawˇgaˆ miˇ kʼahˬ hawˇ-eu iˬ ma laˆ shaˆ lawˇ deh caw caw-ehˇ jaˆ-eu nui ma saˇ lehˆ ni jawˇ luꞈ-eu miˇ kʼahˬ deuˬ-ahˇ ngaˇ miˬ dzaˬ bi doꞈ laˇ-awˇ, ngaˇ Sahˬpaˬ Miˬyehˇ pyeuꞈ-eu yawˬ gʼaˬ na luꞈ ya siˬ duˬ tehꞈ-a.

⁷ Ngaˬ-euˬ tsawˇ jeuˬ Iˇsaˬleˬlaˆ tsawˇ haˬ deuˬ ngaˬ-euˬ muiˬ-eu shawˇ-eu tsawˇ myahˇ-ahˇ siˬ nya-eu gaˇ kawˆ duˬ laˇ ni ngaˇ jahˇ-awˇ, ngaˬ-euˬ tsawˇ myahˇ tiˬ jawˇ-iˬ maˬ paˇ bi cawˆ-iˇ ma. Kʼoeˇ ngeh jawˇ, Sahˬpaˬ Miˬyehˇ pyeuꞈ-eu ngaˇ-aˬ, Iˇsaˬleˬlaˆ-euˬ muiˬ-eu shawˇ-eu Miˬyehˇ ngaˇ lehˇ, tsawˇ jeuˬ dawˬ tawˆ luꞈ-ahˇ siˬ duˬ leˇ tehꞈ-a.”

⁸ Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ ehˇ-eu “Ngaˇ ehˇ-eu aˇ nah kʼoeˇ nah aˬ diˇ keuˆ le tehꞈ-a.

⁹ Iˇsaˬleˬlaˆ meuˬ deuˬ laꞈ kʼoeˇ jawˇ-eu tsawˇ haˬ deuˬ doˆ le-awˇ, byehˇ dzeh taˬ-euˬ guiˇ deuˆ-eu keu ka deuˬ gʼoˆ-awˇ, miˬ dzaˬ geuꞈ tehꞈ-a. Dehˬ daˬ duˬ, kaˆ myaˬ, gahˬ hawˇ-eu, diˬ duˇ deuˬ aˬ yawꞈ maꞈ gʼoˆ uiˬ-awˇ miˬ dzaˬ geuꞈ ngeh, shiꞈ kʼoꞈ keuˆ ni doꞈ loꞈ tehꞈ-a.

¹⁰ Aˬ yawꞈ maꞈ deh ga-ahˇ miˬ dzaˬ gʼoˆ-eu maˬ loˬ-ehˇ, sahˬ kʼaˆ-ahˇ aˇ bawˇ tuˇ-awˇ miˬ dzaˬ kʼehꞈ-eu maˬ loˬ-a. Aˬ jeˬ miˇ neh ehˇ naˇ, miˬ dzaˬ doꞈ-eu gʼaˇ duˬ byehˇ dzeh taˬ-euˬ guiˇ deuˆ-eu keu ka deuˬ ga-eu meh. Aˬ yawꞈ maꞈ-ahˇ pyuˇ shuiˇ myawˬ gahˬ ceh geuꞈ laˇ-euˬ tsawˇ haˬ deuˬ-euˬ pyuˇ shuiˇ myawˬ gahˬ deuˬ, aˬ yawꞈ maꞈ paˇ ya ceh geuꞈ tehꞈ-a” lehˇ, Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ ehˇ-eu meh.

Gawˇgaˆ-ahˇ baꞈ pahˬ-euˬ

¹¹ Sahˬpaˬ Miˬyehˇ ehˇ-eu, “Gaˇ kawˆ kʼoeˇ dawˬ tawˆ luꞈ pyeuꞈ laˇ ngeh, Gawˇgaˆ gʼaˇ duˬ, Iˇsaˬleˬlaˆ miˇ kʼahˬ laꞈ kʼoeˇ Shiˇ-eu iˬ ma laˆ shaˆ-euˬ nahˇ ma doˆ kʼehˬ paw jaˆ-eu, Daˬyah-euˬ deh kʼawꞈ lehˇ kuˇ-eu tsahˇ-ahˇ lmˬ bymˇ miˇ tsaˬ tiˬ tsahˇ biꞈ ma. Gawˇgaˆ hawˇ-eu aˬ yawꞈ-euˬ guiˇ maꞈ maꞈ lah-ehˇ, kʼoeˇ gaˇ bi baꞈ pahˬ-awˇ, deh kʼawꞈ kʼoeˇ kʼawꞈ-ahˇ Gawˇgaˆ guiˇ maꞈ-euˬ Deh kʼawꞈ lehˇ kuˇ tehꞈ-a.

¹² Tsawˇ shiˇ dawˬ tawˆ luꞈ baꞈ pahˬ jiˇ-awˇ, miˇ kʼahˬ shawˇ laˇ ni jahˇ-eu gʼaˇ duˬ, Iˇsaˬleˬlaˆ tsawˇ haˬ deuˬ ba la shiꞈ siˬ ya ga gʼeh tehꞈ-a.

¹³ Miˇ kʼahˬ zaˬ yawˬ gʼaˬ na luꞈ tsawˇ haˬ kʼoeˇ deuˬ baꞈ pahˬ gaˇ caw ba le-awˇ, kʼoeˇ loꞈ-ehˇ jahˇ-euˬ aˇ poeˬ, ngaˇ gʼaˬ leˇ-eu aˇ nah kʼoeˇ nah-ahˇ aˬ yawꞈ maꞈ-ahˇ taˬ huiˬ taˬ mahˇ nehˬ ma lehˇ, Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ pyeuꞈ-eu ngaˇ ehˇ-eu ma.

¹⁴ Ba la shiꞈ siˬ kʼoeˇ dzeuˇ-iˇ ngeh jawˇ, miˇ kʼahˬ kʼoeˇ kʼahˬ doe ni cah-awˇ miˇ tsa kʼaˇ ga-eu tsawˇ shiˇ bi duˬ pahˬ jiˇ-eu gʼaˇ duˬ tsawˇ haˬ tseˇ doˆ-awˇ, miˇ kʼahˬ shawˇ laˇ ni paˇ ya mˇ tehꞈ-a.

¹⁵ Miˇ kʼahˬ kʼoeˇ tsawˬ toeˬ tsawˬ daˆ-ehˇ aˬ yawꞈ maꞈ cah luꞈngeh, tsawˇ haˬ shaˬ yoeˬ kʼaˇ ga gaˇ aˬ yawꞈ maꞈ byaꞈ byaꞈ taˬ yaꞈ-awˇ, tsawˇ haˬ duˬ pahˬ-eu deuˬ oe-awˇ, Gawˇgaˆ guiˇ maꞈ-euˬ deh kʼawꞈ lehˇ kuˇ gaˇ bi duˬ pahˬ-iˇ tehꞈ-a.

¹⁶ (Deh kʼawꞈ kʼoeˇ-euˬ dawˬ peh, guiˇ maꞈ kʼoeˇ maꞈ-euˬ tsawˇ myahˇ biꞈ taˬ-euˬ meuˬ tiˬ meuˬ jaˆ tehꞈ-a.) Aˬ yawꞈ maꞈ kʼoeˇ loꞈ-ehˇ jahˇ-eu laꞈ kʼoeˇ miˇ kʼahˬ kʼoeˇ kʼahˬ paˇ shawˇ laˇ tehꞈ-a.”

¹⁷ Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ ngaˬ-ahˇ heu loꞈ-ehˇ ehˇ-eu meh. “Tsawˇ haˬ zaˬ-oˇ, ngaˬ neh lawˇ-euˬ shehˇ-euˬ jeˬ-ahˇ dzaˬ laˇ-awˬ lehˇ, yawˬ paw na luꞈ jawˇ-eu aˇ jiˇ hawˇ-eu jeˬ zaˬ deuˬ kuˇ uiˬ jiˇ-awˬ. Kʼoeˇ-aˬ, Iˇsaˬleˬlaˆ gawˬ jawˬ deuˬ kʼoeˇ taˆ huiˬ dui dui-eu bawˬ-iˬ tiˬ hmˬ pyeuꞈ-awˇ, aˬ yawꞈ maꞈ shaˬ jiˇ dzaˬ-awˇ shiˬ ya dawˇ dehˆ tehꞈ-a.

¹⁸ Yawˇ deuˬ, ciꞈ myehꞈ deuˬ hawˇ-eu, tsuˇ dui dui-eu mawˇ neˇ mawˇ gaw deuˬ sehꞈ-eu loꞈ-ehˇ bi sehꞈ-eu yehˇ deuˬ-euˬ shaˬ jiˇ aˬ yawꞈ maꞈ ya dzaˬ-awˇ, miˇ tsaˬ kʼoeˇ taˆ sahˬpaˬ sahˬ ma geuꞈ-eu deuˬ-eu shiˬ, aˬ yawꞈ maꞈ ya dawˇ tehꞈ-a.

¹⁹ Lawˇ-eu shehˇ-eu jeˬ mˇ-eu loꞈ-ehˇ tsawˇ haˬ kʼoeˇ deuˬ-ahˇ ngaˇ sehꞈ ngeh, aˇ jiˇ hawˇ-eu jeˬ zaˬ kʼoeˇ deuˬ shaˬ tsuˇ ya dzaˬ yehꞈ-awˇ, shiˬ ya dawˇ yehꞈ tehꞈ-a.

²⁰ Ngaˬ-euˬ hawˬ jeh kʼoeˇ taˆ mahˬ hawˇ-eu mahˬ dziˬ-eu tsawˇ haˬ deuˬ-euˬ shaˬ jiˇ maˬ ehˇ, yehˇ deuˬ hawˇ-eu guiˇ deuˆ-eu tsawˇ haˬ deuˬ-euˬ shaˬ jiˇ maˬ ehˇ, aˬ yawꞈ maꞈ kʼaˇ dzaˬ coeˇ-eu ya dzaˬ tehꞈ-a lehˇ, Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ pyeuꞈ-eu ngaˇ ehˇ-eu ma.”

Iˇsaˬleˬlaˆ miˇ kʼahˬ paˇ dehꞈ dzaˬ laˇ tehꞈ-a

²¹ Sahˬpaˬ Miˬyehˇ heu loꞈ-ehˇ ehˇ-eu meh. “Miˇ kʼahˬ tsawˇ jeuˬ deuˬ-ahˇ ngaˬ-euˬ yaw shehꞈ kʼahˬ sehˇ bi mawˇ-awˇ, ngaˬ-euˬ baoˬ-ahˇ gʼoe-eu laꞈ kʼoeˇ, ngaˬ neh noeˬ tsehˆ taˬ-euˬ yaw tsaˬ yaw dawˇ jeˬ ngaˇ mˇ doˆ nya-eu gaˇ kawˆ, aˬ yawꞈ maꞈ-ahˇ ngaˇ bi siˬ duˬ ma.

²² Kʼoeˇ ngeh nah taꞈ naˇ, ngaˇ-aˬ, aˬ yawꞈ maꞈ-euˬ Miˬyehˇ pyeuꞈ-eu Sahˬpaˬ Miˬyehˇ ngaˇ lehˇ, Iˇsaˬleˬlaˆ tsawˇ haˬ deuˬ-ahˇ siˬ duˬ leˇ tehꞈ-a.

²³ Iˇsaˬleˬlaˆ tsawˇ haˬ deuˬ aˬ cawˬ miˇ kʼahˬ-ahˇ bi nyehꞈ gʼeh-awˇ jawˇ byoˆ-euˬ-aˬ, aˬ yawꞈ maꞈ-euˬ iˬ baˇ baˬ da neh ngaˇ lehˇ, miˇ kʼahˬ tsawˇ jeuˬ deuˬ ya siˬ duˬ tehꞈ-a. Iˇsaˬleˬlaˆ tsawˇ haˬ deuˬ-ahˇ ngaˇ byehˇ dzeh-awˇ, muiˇ-eu deuˬ neh aˬ yawꞈ maꞈ-ahˇ bi deuˆ gʼaˬ-awˇ, bi deuˆ sehꞈ-euˬ ma.

²⁴ Aˬ yawꞈ maꞈ neh mˇ-euˬ maˬ muiˬ maˬ shawˇ-eu jeˬ hawˇ-eu yaw haiˬ jeˬ baˬ da neh, aˬ yawꞈ maꞈ-ahˇ oꞈ-eu geuˇ-eu loꞈ-ehˇ bi daˬ-awˇ, aˬ yawꞈ maꞈ-ahˇ ngaˇ byehˇ dzeh nehˬ-euˬ ma.”

²⁵ Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ heu loꞈ-ehˇ ehˇ-eu meh. “Ehˇ kʼawꞈ, nymˬ-mˇ ngaˇ Yaˬkoˆ-euˬ zaˬ deuˬ uˆ deuˬ pyeuꞈ-eu Iˇsaˬleˬlaˆ tsawˇ haˬ deuˬ-ahˇ gʼawˬ shaˬ gaˬ-awˇ, paˇ bi dehꞈ dzaˬ laˇ ma. Ngaˬ-euˬ muiˬ-eu shawˇ-eu tsawˇ myahˇ maˬ ya cawˆ ni ngaˇ jeˬ hmˬ bo saˆ ma.

²⁶ Aˬ yawꞈ maꞈ aˬ cawˬ-ahˇ guˆ kʼaˇ maˬ za ni aˬ yawꞈ maꞈ-euˬ miˇ kʼahˬ laꞈ kʼoeˇ nui saˇ oꞈ-awˇ paˇ ya dehꞈ ngeh jawˇ, aˬ yawꞈ maꞈ ngaˬ-ahˇ mˇ bahˬ-euˬ miˇ neh, aˇ naˆ ni ya shaꞈ dawˇ-euˬ gaˇ kawˆ -ahˇ ngehˇ tehꞈ-a.

²⁷ Ngaˇ muiˬ-eu shawˇ-eu gaˇ kawˆ, miˇ kʼahˬ tsawˇ jeuˬ heu myaˆ ni gʼeh gaˇ bi siˬ duˬ-eu gʼaˇ duˬ, muiˇ-eu deuˬ-euˬ miˇ kʼahˬ deuˬ-ahˇ kʼaˇ jawˇ luꞈ-eu ngaˬ-euˬ tsawˇ haˬ deuˬ-ahˇ, ngaˇ sheuˬ kʼoꞈ doˆ nehˬ ma.

²⁸ Kʼoeˇ ngeh jawˇ, ngaˇ aˬ yawꞈ maꞈ-euˬ Miˬyehˇ pyeuꞈ-eu Sahˬpaˬ Miˬyehˇ ngaˇ lehˇ, ngaˬ-euˬ tsawˇ haˬ deuˬ-ahˇ siˬ duˬ leˇ tehꞈ-a. Ngaˇ aˬ yawꞈ maꞈ-ahˇ aˬ cawˬ-euˬ miˇ kʼahˬ-ahˇ teh dzeh nehˬ-awˇ, nymˬ-mˇ tiˬ gʼaˬ-iˬ maˬ bi dzeuˇ-iˇ ni aˬ yawꞈ maꞈ-euˬ miˇ kʼahˬ-ahˇ paˇ sheuˬ kʼoꞈ doˆ nehˬ-euˬ miˇ neh, aˬ yawꞈ maꞈ kʼoeˇ loꞈ-ehˇ siˬ duˬ tehꞈ-a.

²⁹ Iˇsaˬleˬlaˆ tsawˇ jeuˬ kʼoeˇ taˆ ngaˬ-euˬ Yaw sahˇ shehˬ daˆ nehˬ-awˇ, aˬ yawꞈ maꞈ-ahˇ tiˬ jawˇ-iˬ maˬ paˇ byehˇ dzeh ma lehˇ, Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ pyeuꞈ-eu ngaˇ ehˇ-eu ma.”