Yeˬsaˬgeˬlaˇ 37 - Akha

Shaˬ yoeˬ yaw koˆ deh kʼawꞈ

¹ Sahˬpaˬ Miˬyehˇ-euˬ aˬ laꞈ ngaˬ-euˬ kʼoeˇ taˆ keuˆ le-awˇ, shaˬ yoeˬ yaw koˆ ga byah taˬ-euˬ deh kʼawꞈ-ahˇ, aˬ yawꞈ-euˬ yaw sahˇ ngaˬ-ahˇ sheuˬ gʼeh nehˬ laꞈ-euˬ meh.

² Deh kʼawꞈ kʼoeˇ tiˬ jawˬ, ngaˬ-ahˇ aˬ yawꞈ sheuˬ doe nehˬ laꞈ-awˇ, shaˬ yoeˬ ga dui dui gaˇ ngaˇ ya mawˇ-euˬ ma. Shaˬ yoeˬ kʼoeˇ deuˬ koˆ kaˆ ni gʼeh-eu meh.

³ “Tsawˇ haˬ zaˬ-oˇ, shaˬ yoeˬ heu deuˬ paˇ dehꞈ poˆ laˇ nya tehꞈ-a loˇ” lehˇ, aˬ yawꞈ ngaˬ-ahˇ naˇ haˬ ngeh, “Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ-oˇ, gaˇ kawˆ heu nawˇ maˬ ngeuˇ naˇ aˬ suˇ gʼaˬ siˬ nya nmˇ” lehˇ, ngaˇ ehˇ kʼoꞈ nehˬ-euˬ ma.

⁴ Aˬ yawꞈ ngaˬ-ahˇ heu loꞈ-ehˇ paˇ ehˇ-eu meh. “Shaˬ yoeˬ heu deuˬ-ahˇ ngaˬ-euˬ gʼaˇ duˬ ngehˬ dah nehˬ-awˇ, Sahˬpaˬ Miˬyehˇ-euˬ dawˬ-ahˇ naˇ haˬ-awˬ lehˇ ehˇ nehˬ-awˬ.

⁵ Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ pyeuꞈ-eu ngaˇ aˬ yawꞈ maꞈ-ahˇ heu loꞈ-ehˇ ehˇ-eu meh lehˇ ehˇ nehˬ-awˬ. Naw maꞈ-ahˇ ngaˇ saꞈ baw ahˇ nehˬ-awˇ paˇ bi dehꞈ laˇ ma.

⁶ Naw maꞈ-ahˇ shaˬ guˬ shaˬ caˆ hawˇ-eu shaˬ jiˇ bi dawꞈ laˇ-awˇ, baˆ kʼoˆ bi tsoꞈ gʼoeˬ laˇ ma. Naw maꞈ-ahˇ ngaˇ saꞈ paˇ baw ahˇ nehˬ-awˇ bi dehꞈ laˇ ma. Kʼoeˇ ngeh jawˇ, ngaˇ Sahˬpaˬ Miˬyehˇ pyeuꞈ-eu naw maꞈ ya siˬ duˬ tehꞈ-a lehˇ ehˇ nehˬ-awˬ.”

⁷ Kʼoeˇ naˇ, ngaˬ-ahˇ kʼaˇ ehˇ nehˬ laꞈ-euˬ loꞈ-ehˇ, Miˬyehˇ gʼaˇ duˬ ngaˇ ngehˬ dah nehˬ-euˬ ma. Ngaˇ dawˬ ngehˬ luꞈ ngeh, toeˆ toeˆ tawˆ tawˆ-ehˇ mahˇ-eu teˇ saˇ ya gaˬ-euˬ ma. Shaˬ yoeˬ kʼoeˇ deuˬ tiˬ hmˬ tiˇ hmˬ toeˆ toeˆ tawˆ tawˆ-ehˇ tsawˬ tsaꞈ leˇ-euˬ meh.

⁸ Ngaˇ haw haw-ehˇ jawˇ ngeh, shaˬ yoeˬ-ahˇ shaˬ guˬ shaˬ caˆ hawˇ-eu shaˬ jiˇ tsoꞈ laˇ-awˇ, shaˬ jiˇ baˆ kʼoˆ tsoꞈ laˇ-euˬ meh. Ehˇ kʼawꞈ, saꞈ maˬ gʼawˇ-a siˬ.

⁹ Miˬyehˇ ngaˬ-ahˇ ehˇ-eu, “Tsawˇ haˬ zaˬ-oˇ, jaˬ lehˇ-ahˇ ngaˬ-euˬ gʼaˇ duˬ ngehˬ dah nehˬ-awˬ. Oeˬ paw oeˬ coeˇ luꞈ jaˬ lehˇ baw ahˇ laꞈ-awˇ, shiˇ taˬ-euˬ gʼawˇ mawˇ heu deuˬ bi dehꞈ laˇ-awˬ lehˇ, Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ dawˬ biꞈ-eu meh lehˇ jaˬ lehˇ-ahˇ ehˇ nehˬ-awˬ.”

¹⁰ Ngaˬ-ahˇ kʼaˇ ehˇ nehˬ laꞈ-euˬ loꞈ-ehˇ ngaˇ ngehˬ dah ngeh, gʼawˇ mawˇ kʼoeˇ deuˬ laꞈ kʼoeˇ saꞈ ahˇ leˇ-euˬ miˇ neh, dehꞈ laˇ jiˇ-awˇ gawˬ yawꞈ yawꞈ laˇ-euˬ meh. Aˬ yawꞈ maꞈ-aˬ, guiˇ guiˇ maꞈ tiˬ maꞈ geuꞈ nya paˬ-ehˇ myaˬ dui dui-eu meh.

¹¹ Miˬyehˇ ngaˬ-ahˇ ehˇ-eu, “Tsawˇ haˬ zaˬ-oˇ, Iˇsaˬleˬlaˆ tsawˇ haˬ deuˬ-aˬ, shaˬ yoeˬ heu deuˬ-ahˇ duˇ-eu meh. Aˬ yawꞈ maꞈ-euˬ shaˬ yoeˬ koˆ jiˇ-awˇ, noeˬ tmˬ kʼaˇ maˬ paˇ za-eu uˬ taꞈ, geuꞈ-eu jeˬ tiˬ pawꞈ-iˬ maˬ paˇ ahˇ miˇ-a lehˇ, aˬ yawꞈ maꞈ ehˇ luꞈ meh.

¹² Kʼoeˇ miˇ neh ngaˬ-euˬ tsawˇ jeuˬ Iˇsaˬleˬlaˆ-ahˇ ngaˬ-euˬ gʼaˇ duˬ ngehˬ dah nehˬ-awˇ, Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ pyeuꞈ-eu ngaˇ, aˬ yawꞈ maꞈ-euˬ lmˬ bymˇ ngawˬ pah ma lehˇ ehˇ-eu meh lehˇ ehˇ nehˬ-awˬ. Aˬ yawꞈ maꞈ-ahˇ ngaˇ tsahˇ tuˇ-awˇ, Iˇsaˬleˬlaˆ miˇ kʼahˬ-ahˇ sheuˬ kʼoꞈ laꞈ ma.

¹³ Ngaˬ-euˬ tsawˇ jeuˬ-ahˇ duˬ pahˬ taˬ-euˬ lmˬ bymˇ ngaˇ ngawˬ pah-awˇ, aˬ yawꞈ maꞈ-ahˇ tsahˇ doˆ laꞈ ngeh, ngaˇ Sahˬpaˬ Miˬyehˇ pyeuꞈ-eu aˬ yawꞈ maꞈ ya siˬ duˬ tehꞈ-a.

¹⁴ Aˬ yawꞈ maꞈ-ahˇ ngaˬ-euˬ saꞈ baw ahˇ nehˬ-eu laꞈ kʼoeˇ paˇ bi gʼoꞈ dehꞈ laˇ-awˇ, aˬ yawꞈ maꞈ-euˬ miˇ kʼahˬ-ahˇ paˇ bi jawˇ ma. Kʼoeˇ ngeh jawˇ, ngaˇ Sahˬpaˬ Miˬyehˇ pyeuꞈ-eu aˬ yawꞈ maꞈ ya siˬ duˬ tehꞈ-a. Ngaˇ heu loꞈ-ehˇ mˇ ma lehˇ saˇ jaˇ dzaˬ taˬ-euˬ loꞈ-ehˇ, aˬ diˇ aˬ maˇ mˇ ma lehˇ, Sahˬpaˬ Miˬyehˇ pyeuꞈ-eu ngaˇ ehˇ-eu ma.”

Yuˇdaˆ miˇ kʼahˬ hawˇ-eu Iˇsaˬleˬlaˆ miˇ kʼahˬ tiˬ gaˇ taꞈ-eu

¹⁵ Sahˬpaˬ Miˬyehˇ ngaˬ-ahˇ heu loꞈ-ehˇ paˇ ehˇ-eu meh.

¹⁶ “Tsawˇ haˬ zaˬ-oˇ, daˇ kawˬ tiˬ kawˬ yuˇ-awˇ, Yuˇdaˆ miˇ kʼahˬ lehˇ boꞈ-awˬ. Daˇ kawˬ yawˬ kawˬ yawˬ paˇ yuˇ-awˇ, Iˇsaˬleˬlaˆ miˇ kʼahˬ lehˇ paˇ boꞈ-awˬ.

¹⁷ Daˇ kawˬ kʼoeˇ nyiˬ kawˬ yuˇ-awˇ, daˇ kawˬ tiˬ kawˬ tehꞈ ngaˇ lehˇ aˬ cawˬ haw mawˇ ni, tahˬ tsaꞈ mehˬ nehˬ-awˬ.

¹⁸ Kʼoeˇ loꞈ-ehˇ jahˇ-eu dawˬ tsuiꞈ aˬ jeˬ-a lehˇ, nawˬ-euˬ tsawˇ haˬ deuˬ nawˬ-ahˇ naˇ haˬ laˇ tehꞈ-a.

¹⁹ Aˬ yawꞈ maꞈ-ahˇ heu loꞈ-ehˇ ehˇ nehˬ-awˬ. Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ pyeuꞈ-eu ngaˇ-aˬ, Iˇsaˬleˬlaˆ miˇ kʼahˬ-euˬ dah zaˇ pyeuꞈ-eu daˇ kawˬ hawˇ-eu, Yuˇdaˆ miˇ kʼahˬ-euˬ dah zaˇ pyeuꞈ-eu daˇ kawˬ yuˇ-awˇ, tiˬ gaˇ tahˬ tsaꞈ-awˇ, daˇ kawˬ tiˬ kawˬ tehꞈ-ehˇ bi pyeuꞈ-iˇ ma lehˇ ehˇ-eu meh lehˇ ehˇ nehˬ-awˬ.

²⁰ “Daˇ kawˬ kʼoeˇ nyiˬ kawˬ nawˬ-euˬ aˬ laꞈ-ahˇ tuˆ tehˬ taˬ-euˬ aˬ yawꞈ maꞈ-ahˇ bi mawˇ-awˬ.

²¹ Kʼoeˇ naˇ, Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ pyeuꞈ-eu ngaˇ heu loꞈ-ehˇ ehˇ-eu meh lehˇ, aˬ yawꞈ maꞈ-ahˇ ehˇ nehˬ-awˬ. Aˬ cawˬ miˇ kʼahˬ doe ni cehˆ jawˇ-iˇ-euˬ ngaˬ-euˬ tsawˇ haˬ dawˬ tawˆ luꞈ-ahˇ ngaˇ sheuˬ kʼoꞈ doˆ uiˬ-awˇ, aˬ yawꞈ maꞈ-euˬ miˇ kʼahˬ-ahˇ sheuˬ kʼoꞈ laꞈ ma.

²² Miˇ kʼahˬ heu kʼahˬ laꞈ kʼoeˇ, Iˇsaˬleˬlaˆ gawˬ jawˬ deuˬ kʼoeˇ taˆ, aˬ yawꞈ maꞈ-ahˇ miˇ kʼahˬ tiˬ kʼahˬ bi pyeuꞈ laˇ ma. Aˬ yawꞈ maꞈ sahˬ paˬ tiˬ gʼaˬ tehꞈ-ehˇ uˆ lahˇ-eu uˬ moˆ tiˬ kawˆ loꞈ-ehˇ jawˇ-awˇ, tsawˇ jeuˬ nyiˬ jeuˬ maˬ paˇ bi baw-ehˇ, miˇ kʼahˬ nyiˬ kʼahˬ maˬ paˇ bi dehꞈ paˆ ma.

²³ Nui daˆ daˆ laˇ paˬ-ehˇ gʼeh-eu tahˬ pahˬ aˬ ma mawˇ kawˇ deuˬ-ahˇ uˬ duˬ tahˬ-euˬ laꞈ kʼoeˇ, maˬ shawˇ-eu tsawˇ haˬ pyeuꞈ-iˇ ni aˬ yawꞈ maꞈ maˬ paˇ dehꞈ-ehˇ, iˬ baˇ baˬ da neh yaw cawˆ jeˬ doˆ laˇ ni maˬ paˇ mˇ-aˇ. Iˬ baˇ mˇ-awˇ ngaˬ-ahˇ byehˇ dzeh-eu dehꞈ jeˬ dehꞈ kawˆ laꞈ kʼoeˇ, aˬ yawꞈ maꞈ-ahˇ ngaˇ bi buˬ-iˇ ma. Aˬ yawꞈ maꞈ-ahˇ ngaˇ bi muiˬ bi shawˇ laˇ ma. Aˬ yawꞈ maꞈ ngaˬ-euˬ tsawˇ haˬ bi pyeuꞈ laˇ-awˇ, ngaˇ aˬ yawꞈ maꞈ-euˬ Miˬyehˇ pyeuꞈ ma.

²⁴ Ngaˬ-euˬ zaˬ kʼaˆ Daˬbiˇ-ahˇ duˇ-eu sahˬ paˬ tiˬ gʼaˬ, aˬ yawꞈ maꞈ-ahˇ uˆ lahˇ tehꞈ-a. Sahˬ paˬ tiˬ gʼaˬ uˆ lahˇ-eu uˬ moˆ, aˬ yawꞈ maꞈ dawˬ tawˆ luꞈ nui ma gm-awˇ, ngaˬ-euˬ zahˇ dawˬ kʼoꞈ dawˬ deuˬ-ahˇ saˇ jaˇ ziꞈ tehꞈ-a.

²⁵ Aˬ yawꞈ maꞈ-euˬ aˬ poeˬ Yaˬkoˆ-ahˇ ngaˬ neh biꞈ-euˬ miˇ kʼahˬ pyeuꞈ-eu, aˬ yawꞈ maꞈ-euˬ aˬ poeˬ aˬ bawˇ deuˬ jawˇ-eu miˇ kʼahˬ-ahˇ, aˬ yawꞈ maꞈ jawˇ tehꞈ-a. Aˬ yawꞈ maꞈ-euˬ ziˇ-ahˇ neh, zaˬ deuˬ uˆ deuˬ-euˬ ziˇ ahˇ keuˆ ni, mˬ maˬ maˬ byaˆ zaˇ ziˇ kʼoeˇ gaˇ ya jawˇ tehꞈ-a. Ngaˬ-euˬ zaˬ kʼaˆ Daˬbiˇ-ahˇ duˇ-eu sahˬ paˬ tiˬ gʼaˬ, mˬ maˬ maˬ byaˆ zaˇ ziˇ aˬ yawꞈ maꞈ-ahˇ uˆ lahˇ tehꞈ-a.

²⁶ Aˬ yawꞈ maꞈ-ahˇ mˬ maˬ maˬ byaˆ zaˇ ziˇ nui saˇ bi oꞈ-eu dawˬ ma saˇ jaˇ ngaˇ dzaˬ ma. Aˬ yawꞈ maꞈ-ahˇ bi dehꞈ dzaˬ laˇ-awˇ, bi jeuˬ bi o le ma. Aˬ yawꞈ maꞈ-euˬ miˇ kʼahˬ laꞈ kʼoeˇ, ngaˬ-euˬ uˬ duˬ tahˬ nymˇ nymˇ ma mˬ maˬ maˬ byaˆ zaˇ ziˇ bi jaˆ ma.

²⁷ Aˬ yawꞈ maꞈ nehˬ-ehˇ ngaˇ jawˇ ma. Ngaˇ aˬ yawꞈ maꞈ-euˬ Miˬyehˇ pyeuꞈ-awˇ, aˬ yawꞈ maꞈ ngaˬ-euˬ tsawˇ haˬ pyeuꞈ tehꞈ-a.

²⁸ Ngaˬ-euˬ Uˬ duˬ tahˬ nymˇ nymˇ ma aˬ yawꞈ maꞈ jawˇ gaˇ mˬ maˬ maˬ byaˆ zaˇ ziˇ bi jaˆ ngeh, Sahˬpaˬ Miˬyehˇ pyeuꞈ-eu ngaˇ, Iˇsaˬleˬlaˆ tsawˇ jeuˬ-ahˇ ngaˬ-euˬ tsawˇ haˬ bi geuꞈ-eu lehˇ tseˇ doˆ-euˬ gaˇ kawˆ, tsawˇ jeuˬ dawˬ tawˆ luꞈ-ahˇ siˬ duˬ leˇ tehꞈ-a.”