Yeˬsaˬgeˬlaˇ 36 - Akha

Iˇsaˬleˬlaˆ-ahˇ Miˬyehˇ guiˬ lahˬ biꞈ-eu

¹ Sahˬpaˬ Miˬyehˇ ehˇ-eu, “Tsawˇ haˬ zaˬ-oˇ, Sahˬpaˬ Miˬyehˇ-euˬ dawˬ-ahˇ naˇ haˬ-awˬ lehˇ, Iˇsaˬleˬlaˆ gawˬ jawˬ deuˬ-ahˇ ehˇ nehˬ-awˬ.

² Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ heu loꞈ-ehˇ ehˇ-eu meh lehˇ ehˇ nehˬ-awˬ. ‘Aˇ hu ba neh jaˆ-euˬ gawˬ jawˬ kʼoeˇ deuˬ, nymˬ-mˇ poˆ jawˇ-aˬ nga maꞈ-euˬ ma’ lehˇ Iˇsaˬleˬlaˆ-ahˇ muiˇ-eu deuˬ ehˇ luꞈ-eu meh.

³ “Kʼoeˇ miˇ neh, Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ pyeuꞈ-eu ngaˬ-euˬ gʼaˇ duˬ nawˇ ngehˬ dah-eu laꞈ kʼoeˇ, heu loꞈ-ehˇ ehˇ nehˬ-awˬ. Dawˬ peh jawˇ-eu aˬ cawˬ tsawˇ jeuˬ kʼoeˇ deuˬ Iˇsaˬleˬlaˆ gawˬ jawˬ deuˬ-ahˇ deuˆ gʼaˬ-awˇ, pyuˇ shuiˇ myawˬ gahˬ deuˬ ceh geuꞈ ngeh, aˬ yawꞈ maꞈ dawˬ tawˆ luꞈ Iˇsaˬleˬlaˆ miˇ kʼahˬ-ahˇ kʼaˇ ehˇ doeˇ mawꞈ-eu ehˇ doeˇ-euˬ meh.

⁴ Gawˬ jawˬ gawˬ duˇ deuˬ, lawˇ gawˆ gʼaˬ lawˬ deuˬ bi laˆ cawˆ-euˬ jawˇ duˬ deuˬ hawˇ-eu, dawˬ peh jawˇ-eu tsawˇ jeuˬ deuˬ neh pyuˇ shuiˇ myawˬ gah bi ceh geuꞈ jiˇ-awˇ, kʼaˇ ehˇ doeˇ mawꞈ-eu bi ehˇ doeˇ bi ehˇ doeˇ-ehˇ, ciˬ cuˇ ni jaˆ-euˬ meuˬ deuˬ-oˇ, Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ pyeuꞈ-eu ngaˇ ehˇ gaˇ naˇ haˬ-awˬ.

⁵ “Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ pyeuꞈ-eu ngaˇ nui ma pehˇ dui dui-eu laꞈ kʼoeˇ, dawˬ peh jawˇ-eu tsawˇ jeuˬ deuˬ-ahˇ heu loꞈ-ehˇ ehˇ-eu ma. Eˬdoˬ miˇ kʼahˬ-ahˇ ngaˇ kʼaˆ kʼaˆ ni ehˇ mawꞈ-eu ma. Aˬ yawꞈ maꞈ myaˆ naˆ-eu laꞈ kʼoeˇ, ngaˬ-euˬ miˇ kʼahˬ deuˆ geuꞈ-awˇ, jeˬ zaˬ gaˆ kʼahˬ yuˇ geuꞈ-euˬ meh.

⁶ “Kʼoeˇ miˇ neh, Iˇsaˬleˬlaˆ miˇ kʼahˬ-ahˇ ngaˬ-euˬ gʼaˇ duˬ heu loꞈ-ehˇ ngehˬ dah nehˬ-awˬ. Tsawˇ jeuˬ kʼoeˇ deuˬ kʼaˇ ehˇ doeˇ mawꞈ-eu ehˇ doeˇ-awˇ, myaˆ pyawˬ naˇ mehˇ cawˆ ni jahˇ-euˬ baˬ da neh, ngaˇ nui kʼahˇ maˬ shiˇ-ehˇ nui ma pehˇ dui dui-eu laꞈ kʼoeˇ heu loꞈ-ehˇ ehˇ-eu meh lehˇ, gawˬ jawˬ gawˬ duˇ deuˬ hawˇ-eu lawˇ gawˆ gʼaˬ lawˬ deuˬ-ahˇ ehˇ nehˬ-awˬ.

⁷ Dawˬ peh jawˇ-eu tsawˇ jeuˬ ya shaꞈ dawˇ tehꞈ-a lehˇ, Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ pyeuꞈ-eu ngaˇ maˇ jawˆ ni ehˇ tsehˆ-eu ma.

⁸ Ehˇ kʼawꞈ, ngaˬ-euˬ tsawˇ haˬ pyeuꞈ-eu Iˇsaˬleˬlaˆ tsawˇ jeuˬ-oˇ, Iˇsaˬleˬlaˆ gawˬ jawˬ deuˬ kʼoeˇ taˆ dehꞈ-eu aˇ bawˇ deuˬ baw nmˬ paˇ nmˬ laˇ-awˇ, naw maꞈ gʼaˇ duˬ aˇ siˬ siˬ le tehꞈ-a. Naw maꞈ gʼawˬ myahˇ maˬ gʼeh-ehˇ, iˇ kahˇ-ahˇ paˇ ya gʼoꞈ jawˇ laˇ tehꞈ-a.

⁹ Naw maꞈ jawˇ paw ngaˇ pyawˬ-awˇ, naw maꞈ-euˬ deh yaˇ paˇ tsehˬ-awˇ, siˬ yoeˬ paˇ ya sehˬ tehꞈ-a lehˇ, ngaˇ ehˇ tsehˆ-eu ma.

¹⁰ “Naw maꞈ-ahˇ ngaˇ bi jeuˬ bi o le ma. Meuˬ deuˬ laꞈ kʼoeˇ naw maꞈ jawˇ-awˇ, kʼaˇ laˆ cawˆ taˬ-euˬ jeˬ naw maꞈ gawˬ muiˬ tsoˆ muiˬ tehꞈ-a.

¹¹ Tsawˇ haˬ jeuˬ le o le-awˇ, jeˬ zaˬ myaˬ laˇ behˇ laˇ ni ngaˇ jahˇ ma. Dzeuˇ laˇ ngeh naˆ maˬ tseˇ naw maꞈ tsawˇ haˬ myaˬ-awˇ, zaˬ oeˬ sahˇ dui dui tehꞈ-a. Aˇ hu kʼaˇ jawˇ-euˬ loꞈ-ehˇ naw maꞈ-ahˇ kʼoeˇ gaˇ bi jawˇ-awˇ, aˇ hu naˆ maˬ tseˇ bi dehꞈ dzaˬ laˇ ma. Kʼoeˇ ngeh, ngaˇ Sahˬpaˬ Miˬyehˇ meh lehˇ naw maꞈ ya siˬ duˬ tehꞈ-a.

¹² Ngaˬ-euˬ tsawˇ jeuˬ pyeuꞈ-eu naw maꞈ Iˇsaˬleˬlaˆ tsawˇ haˬ deuˬ-ahˇ, miˇ kʼahˬ heu kʼahˬ-ahˇ paˇ bi jawˇ kʼoꞈ laˇ-awˇ, miˇ kʼahˬ heu kʼahˬ naw maꞈ-euˬ pyeuꞈ tsehˆ tehꞈ-a. Miˇ kʼahˬ heu kʼahˬ naw maꞈ-euˬ zaˬ deuˬ uˆ deuˬ-ahˇ tiˬ jawˇ-iˬ maˬ paˇ bi mehꞈ bi shuꞈ-aˇ.

¹³ “Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ pyeuꞈ-eu ngaˇ heu loꞈ-ehˇ ehˇ-eu ma. Ngeuˇ meh. Miˇ kʼahˬ heu kʼahˬ-aˬ, tsawˇ haˬ dzaˬ-eu miˇ kʼahˬ pyeuꞈ-awˇ, yawˬ ha tsawˇ jeuˬ-euˬ zaˬ deuˬ-ahˇ tahˇ joe joe geuꞈ-eu meh lehˇ, aˬ cawˬ ehˇ-eu meh.

¹⁴ Ehˇ kʼawꞈ, iˬ nah taꞈ naˇ, tsawˇ haˬ maˬ paˇ dzaˬ-ehˇ, naw maꞈ-euˬ zaˬ deuˬ-ahˇ tahˇ joe maˬ paˇ joe geuꞈ laˇ-aˇ lehˇ, Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ pyeuꞈ-eu ngaˇ ehˇ-eu ma.

¹⁵ Miˇ kʼahˬ heu kʼahˬ aˬ cawˬ ja bu-eu dawˬ maˬ paˇ ya gaˬ-ehˇ, aˬ cawˬ lmˬ guˆ laˇ gaˇ maˬ paˇ ya mawˇ-aˇ. Miˇ kʼahˬ heu kʼahˬ yawˬ ha tsawˇ jeuˬ-euˬ zaˬ-ahˇ tahˇ joe maˬ paˇ joe geuꞈ-aˇ lehˇ, Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ pyeuꞈ-eu ngaˇ ehˇ-eu ma.”

Iˇsaˬleˬlaˆ tsawˇ jeuˬ yaw shuiꞈ dehꞈ paˇ-eu

¹⁶ Sahˬpaˬ Miˬyehˇ ngaˬ-ahˇ heu loꞈ-ehˇ ehˇ-eu meh.

¹⁷ “Tsawˇ haˬ zaˬ-oˇ, Iˇsaˬleˬlaˆ tsawˇ haˬ deuˬ yawˬ ha-euˬ miˇ kʼahˬ laꞈ kʼoeˇ jawˇ ngeh, miˇ kʼahˬ jawꞈ-iˇ ni dehꞈ doeˇ jawˇ doeˇ-euˬ meh. Zaˬ miˬ zaˬ tiˬ gʼaˬ ba la mawˇ ngeh, zahˇ sahˇ kʼoꞈ-ahˇ taꞈ leˇ-awˇ maˬ shawˇ-eu loꞈ-ehˇ, aˬ yawꞈ maꞈ-euˬ dehꞈ jeˬ dehꞈ kawˆ-ahˇ ngaˇ kʼoeˇ loꞈ-ehˇ sawˇ taˬ-euˬ ma.

¹⁸ Miˇ kʼahˬ heu kʼahˬ laꞈ kʼoeˇ tsawˇ haˬ sehꞈ-eu jeˬ aˬ yawꞈ maꞈ mˇ-euˬ miˇ neh maˬ ehˇ, tahˬ pahˬ aˬ ma mawˇ kawˇ-ahˇ uˬ duˬ tahˬ-eu laꞈ kʼoeˇ miˇ kʼahˬ heu kʼahˬ-ahˇ aˬ yawꞈ maꞈ laˆ jawꞈ-euˬ miˇ neh maˬ ehˇ, ngaˬ-euˬ nui ma aˬ yawꞈ maꞈ-ahˇ bi mawˇ-euˬ ma.

¹⁹ Aˬ yawꞈ maꞈ-euˬ dehꞈ jeˬ dehꞈ kawˆ maˬ muiˬ-eu baˬ da neh, aˬ yawꞈ maꞈ-ahˇ ngaˇ maˬ haw nahˇ-ehˇ, aˬ cawˬ miˇ kʼahˬ doe ni teh byaˆ nehˬ-euˬ ma.

²⁰ Aˬ yawꞈ maꞈ kʼaˇ iˇ kʼaˇ laˇ keuˆ gaˇ, ngaˬ-euˬ muiˬ-eu shawˇ-eu tsawˇ myahˇ laˆ cawˆ-euˬ meh. Aˬ jeˬ miˇ neh ehˇ naˇ, ‘Tsawˇ haˬ heu deuˬ Sahˬpaˬ Miˬyehˇ-euˬ tsawˇ haˬ pyeuꞈ kʼawꞈ, aˬ yawꞈ-euˬ miˇ kʼahˬ-ahˇ maˬ ya jawˇ nga’ lehˇ, aˬ cawˬ ehˇ-eu meh.

²¹ Iˇsaˬleˬlaˆ tsawˇ haˬ deuˬ kʼaˇ iˇ kʼaˇ laˇ gaˇ, ngaˬ-euˬ tsawˇ myahˇ maˬ bi laˆ cawˆ mawꞈ nya.

²² “Kʼoeˇ miˇ neh, Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ pyeuꞈ-eu ngaˬ-euˬ dawˬ heu, Iˇsaˬleˬlaˆ tsawˇ haˬ deuˬ-ahˇ ehˇ nehˬ-awˬ. Ngaˇ mˇ-eu lehˇ gʼeh-eu heu-aˬ, naw maꞈ baˬ da neh mˇ-eu maˬ ngeuˇ. Naw maꞈ kʼaˇ iˇ kʼaˇ laˇ gaˇ laˆ cawˆ luꞈ-eu ngaˬ-euˬ muiˬ-eu shawˇ-eu tsawˇ myahˇ baˬ da neh mˇ-eu ma.

²³ Naw maꞈ neh aˬ cawˬ tsawˇ jeuˬ kʼoeˇ myaˆ ni gʼeh-eu mehˬ shi laˆ cawˆ taˬ-euˬ ngaˬ-euˬ tsawˇ myahˇ kʼoeˇ muiˬ-eu shawˇ-eu gaˇ kawˆ, aˬ yawꞈ maꞈ siˬ duˬ leˇ ni ngaˇ jahˇ ngeh, ngaˇ Sahˬpaˬ Miˬyehˇ pyeuꞈ-eu aˬ yawꞈ maꞈ ya siˬ tehꞈ-a lehˇ, Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ pyeuꞈ-eu ngaˇ ehˇ-eu ma. Ngaˇ muiˬ-eu shawˇ-eu gaˇ kawˆ aˬ cawˬ tsawˇ jeuˬ deuˬ-ahˇ siˬ leˇ ni ngaˇ jahˇ ngeh, naw maꞈ-ahˇ ngaˇ zmˬ maˬ.

²⁴ Miˇ kʼahˬ yawˬ kʼahˬ na luꞈ laꞈ kʼoeˇ naw maꞈ-ahˇ ngaˇ sheuˬ doˆ-awˇ, naw maꞈ-euˬ miˇ kʼahˬ-ahˇ sheuˬ kʼoꞈ laꞈ nehˬ ma.

²⁵ Shawˇ jehˆ ni gʼeh-eu iˇ cuꞈ naw maꞈ-ahˇ ngaˇ byaˆ shehˬ-awˇ, bi shawˇ laˇ ma. tahˬ pahˬ aˬ ma mawˇ kawˇ-ahˇ uˬ duˬ tahˬ-eu jeˬ hawˇ-eu, naw maꞈ-ahˇ kʼaˇ bi jawꞈ-iˇ-euˬ yawˬ jeˬ na luꞈ laꞈ kʼoeˇ, naw maꞈ-ahˇ ngaˇ bi shawˇ laˇ ma.

²⁶ Naw maꞈ-ahˇ nui ma saꞈ laˇ yaw shuiꞈ biꞈ nehˬ ma. Gʼahˇ dui dui-eu naw maꞈ-euˬ kʼaˬ lo nui ma yuˇ dzeh-awˇ, naˇ haˬ geuꞈ-eu nui ma biꞈ paˇ nehˬ ma.

²⁷ Ngaˬ-euˬ yaw sahˇ naw maꞈ laꞈ kʼoeˇ bi jawˇ le-awˇ, ngaˬ-euˬ zahˇ dawˬ kʼoꞈ deuˬ hawˇ-eu ngaˬ neh biꞈ-euˬ dawˬ deuˬ-ahˇ naw maꞈ caw teh ni bi laˆ noeˬ ma.

²⁸ Kʼoeˇ naˇ, ngaˬ neh naw maꞈ-euˬ aˬ poeˬ aˬ bawˇ deuˬ-ahˇ biꞈ taˬ-euˬ miˇ kʼahˬ laꞈ kʼoeˇ naw maꞈ ya jawˇ tehꞈ-a. Naw maꞈ ngaˬ-euˬ tsawˇ haˬ pyeuꞈ-awˇ, ngaˇ naw maꞈ-euˬ Miˬyehˇ pyeuꞈ tehꞈ-a.

²⁹ Naw maꞈ-ahˇ kʼaˇ bi jawꞈ-iˇ-eu yawˬ jeˬ na luꞈ laꞈ kʼoeˇ ngaˇ ka kʼoꞈ ma. Naw maꞈ tiˬ jawˇ-iˬ maˬ paˇ ya mehꞈ ya shuꞈ-eu gʼaˇ duˬ, dzaˬ la gʼo cehˇ za le ni ngaˇ dawˬ biꞈ ma.

³⁰ Aˬ cawˬ tsawˇ jeuˬ heu myaˆ ni gʼeh-eu mehˬ shi, naw maꞈ hawˬ mehꞈ shaˬ-awˇ daˬ maˬ ya ga ni, naw maꞈ-euˬ aˇ siˬ aˇ bawˇ deuˬ aˇ siˬ bi sahˇ le-awˇ, naw maꞈ-euˬ deh yaˇ deuˬ dzaˬ la gʼo cehˇ bi za le ma.

³¹ Naw maꞈ neh mˇ-euˬ yaw haiˬ jeˬ hawˇ-eu naw maꞈ-euˬ yaw lehˬ yaw ca-ahˇ naw maꞈ noeˬ mawˇ laˇ-awˇ, naw maꞈ-euˬ iˬ baˇ baˬ da neh, yawˬ haˇ yawˬ ha nui daˆ daˆ tehꞈ-a.

³² Iˇsaˬleˬlaˆ tsawˇ jeuˬ-oˇ, naw maꞈ baˬ da neh ngaˇ heu loꞈ-ehˇ mˇ-eu gʼeh-eu maˬ ngeuˇ lehˇ, naw maꞈ bi siˬ duˬ mawꞈ miˇ-a. Naw maꞈ neh dehꞈ doeˇ-euˬ aˇ poeˬ, daˬ ga-awˇ shaꞈ dawˇ-eu jeˬ naw maꞈ bi daˬ mawꞈ miˇ-a lehˇ, Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ pyeuꞈ-eu ngaˇ ehˇ-eu ma.”

³³ Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ heu loꞈ-ehˇ ehˇ-eu meh. “Naw maꞈ-euˬ iˬ baˇ dawˬ tawˆ luꞈ ngaˇ tsiˬ shawˇ gʼaˬ ngeh, naw maꞈ-euˬ meuˬ deuˬ laꞈ kʼoeˇ paˇ bi jawˇ-awˇ, kʼaˇ cawˆ-iˇ taˬ-euˬ jeˬ bi gawˬ bi tsoˆ muiˬ ma.

³⁴ Kʼaˇ iˇ kʼaˇ laˇ tsehˆ-eu tsawˇ haˬ deuˬ, naw maꞈ-euˬ deh yaˇ deuˬ yaˇ saˬ kʼehˬ ma pyeuꞈ-iˇ taˬ-euˬ gaˇ ya mawˇ-eu meh. Ehˇ kʼawꞈ, naw maꞈ-ahˇ kʼoeˇ gaˇ paˇ bi tsehˬ dzaˬ ma.

³⁵ Bawˇ tsahˬ bawˇ dahˇ dahˇ-iˇ-euˬ miˇ kʼahˬ heu kʼahˬ, Eˬdeˬ yaˇ kmˇ loꞈ-ehˇ muiˬ laˇ-euˬ gaˇ kawˆ hawˇ-eu, aˬ cawˬ neh pyuˇ shuiˇ myawˬ gahˬ bi yuˇ geuꞈ jiˇ-euˬ uˬ taꞈ, bi deh pyaˆ bi deh shaˆ-awˇ yaw cawˆ-ehˇ byehˇ dzeh yaꞈ-euˬ meuˬ deuˬ, tsawˇ haˬ paˇ jawˇ byah-awˇ laˆ ziꞈ taˬ-euˬ gaˇ kawˆ, tsawˇ haˬ yawˬ gʼaˬ na luꞈ ja tehꞈ-a.

³⁶ Kʼoeˇ ngeh jawˇ, naw maꞈ dawˬ peh jawˇ-eu maˬ byoˆ maˬ laˆ jiˇ-ehˇ kʼaˇ dehꞈ luꞈ-eu tsawˇ jeuˬ kʼoeˇ deuˬ, cawˆ-iˇ-euˬ meuˬ deuˬ-ahˇ, Sahˬpaˬ Miˬyehˇ pyeuꞈ-eu ngaˇ paˇ laˆ saˆ muiˬ-awˇ, byehˇ dzeh-euˬ deh yaˇ deuˬ paˇ ka-euˬ nga lehˇ siˬ nya tehꞈ-a. Kʼoeˇ loꞈ-ehˇ mˇ ma lehˇ, Sahˬpaˬ Miˬyehˇ pyeuꞈ-eu ngaˇ ehˇ gʼaˬ-euˬ loꞈ-ehˇ, aˬ diˇ aˬ maˇ mˇ ma.”

³⁷ Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ ehˇ-eu, “Iˇsaˬleˬlaˆ tsawˇ haˬ deuˬ ngaˬ-ahˇ laꞈ jeuˬ paˇ bi shaˇ-awˇ, yawˇ yawˇ maꞈ myaˬ laˇ behˇ laˇ-eu loꞈ-ehˇ, aˬ yawꞈ maꞈ tsawˇ haˬ bi jeuˬ bi o le ma.

³⁸ Aˇ hu Yeˬluˇsaˬlehˬ meuˬ bawˬ-iˬ gʼeh ngeh, lawˇ-eu shehˇ-eu gʼaˇ duˬ yawˇ tiˬ teuˇ teh uiˬ taˬ-euˬ loꞈ-ehˇ, nymˬ-mˇ cawˆ-iˇ taˬ-euˬ meuˬ heu deuˬ tsawˇ haˬ tiˬ teuˇ jawˇ laˇ tehꞈ-a. Kʼoeˇ ngeh jawˇ, ngaˇ Sahˬpaˬ Miˬyehˇ pyeuꞈ-eu gaˇ kawˆ aˬ yawꞈ maꞈ ya siˬ tehꞈ-a.”