Yeˬsaˬgeˬlaˇ 34 - Akha

Iˇsaˬleˬlaˆ-ahˇ bo-eu yawˇ bo-eu deuˬ

¹ Sahˬpaˬ Miˬyehˇ ngaˬ-ahˇ heu loꞈ-ehˇ ehˇ-eu meh.

² “Tsawˇ haˬ zaˬ-oˇ, Iˇsaˬleˬlaˆ tsawˇ jeuˬ kʼoeˇ taˆ aˬ yuiꞈ aˬ tsu geuꞈ luꞈ-eu deuˬ-ahˇ, dawˬ heu deuˬ ciˬ pi nehˬ-awˬ. Aˬ yawꞈ maꞈ-ahˇ ngaˬ-euˬ gʼaˇ duˬ ngehˬ dah nehˬ-awˇ, Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ pyeuꞈ-eu ngaˇ, heu loꞈ-ehˇ ehˇ-eu meh lehˇ ehˇ nehˬ-awˬ. Iˇsaˬleˬlaˆ-ahˇ bo-eu yawˇ bo-eu yaw sahˇ deuˬ-oˇ, naw maꞈ kʼoeˇ taˆ doeˇ dui dui-eu jeˬ keuˆ le tehꞈ-a. Naw maꞈ yawˬ ha gʼawˇ mawˇ gaˇ kawˆ tehꞈ-ehˇ shaˇ noeˬ-awˇ, yawˇ deuˬ-ahˇ maˬ haw-a.

³ Naw maꞈ yawˇ-euˬ aˬ coeˇ dawˇ-awˇ, yawˇ caꞈ hm neh zaꞈ-euˬ mehˬ tsoeˬ dm-awˇ, muiˬ dui dui-eu yawˇ deuˬ sehꞈ dzaˬ-eu meh. Ehˇ kʼawꞈ, yawˇ deuˬ-ahˇ yaw muiˬ-ehˇ maˬ haw-aˬ.

⁴ Gʼaˬ maˬ ahˇ-eu yawˇ deuˬ-ahˇ maˬ bo saˆ-ehˇ, naˇ-eu yawˇ deuˬ-ahˇ jaˆ gʼaˬ maˬ laˆ saˆ-eu uˬ taꞈ, laˆ tahˬ laˆ naˇ-euˬ yawˇ deuˬ-ahˇ jaˆ gʼaˬ maˬ uꞈ nehˬ-ehˇ, gaˇ ma iˇ bahˬ-euˬ yawˇ deuˬ maˬ teh kʼoꞈ ni, byoˆ-iˇ-euˬ yawˇ deuˬ-ahˇ maˬ poˆ kʼoꞈ-ehˇ jawˇ coeˇ-eu meh. Kʼoeˇ uˬ taꞈ, yawˇ deuˬ-ahˇ naw maꞈ yehˬ bawˬ-ehˇ gʼeh-euˬ meh.

⁵ Yawˇ bo-eu yaw sahˇ maˬ jawˇ-eu miˇ neh, tiˬ paw tiˬ mawˇ iˇ byoˆ-awˇ, bawˇ tsahˬ jeˬ zaˬ neh bi kawꞈ sehꞈ dzaˬ-euˬ meh.

⁶ Ngaˬ-euˬ yawˇ deuˬ gawˬ jawˬ yaw goˇ paw gaˆ byoˆ jiˇ-euˬ meh. Miˇ kʼahˬ doe ni iˇ byoˆ laˇ byoˆ jiˇ-euˬ kʼawꞈ, haw piˇ nehˬ-awˇ poˆ kʼoꞈ-eu gʼaˬ maˬ jawˇ-a.

⁷ “Nymˬ-mˇ poˆ jawˇ yawˇ bo-eu deuˬ-oˇ, Sahˬpaˬ Miˬyehˇ pyeuꞈ-eu ngaˇ naw maꞈ-ahˇ ehˇ gaˇ naˇ haˬ-awˬ.

⁸ Ngaˇ dehꞈ luꞈ-eu Miˬyehˇ kʼaˇ pyeuꞈ kʼoeˇ keuˆ ni, naw maꞈ ngaˬ-euˬ dawˬ-ahˇ naˇ haˬ-eu tsaˬ meh. Yawˇ bo-eu gʼaˬ maˬ jawˇ-eu miˇ neh, bawˇ tsahˬ jeˬ zaˬ deuˬ ngaˬ-euˬ yawˇ deuˬ-ahˇ kawꞈ luꞈ meh. Ngaˬ-euˬ yawˇ bo-eu deuˬ yawˇ maˬ poˆ kʼoꞈ-a. Aˬ yawꞈ maꞈ yawˬ ha gʼaˇ duˬ tehꞈ-ehˇ shaˇ noeˬ-awˇ, yawˇ deuˬ-ahˇ byehˇ dzeh taˬ-euˬ meh.

⁹ Kʼoeˇ miˇ neh, yawˇ bo-eu deuˬ-oˇ, ngaˇ ehˇ gaˇ naˇ haˬ-awˬ.

¹⁰ Ngaˇ naw maꞈ-ahˇ muiˇ ma lehˇ, Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ pyeuꞈ-eu ngaˇ ehˇ-eu ma. Ngaˬ-euˬ yawˇ deuˬ ngaˇ yuˇ kʼoꞈ jiˇ-awˇ, naw maꞈ-ahˇ tiˬ jawˇ-iˬ yawˇ maˬ paˇ bi bo ma. Naw maꞈ-ahˇ muiˬ leˇ ni, ngaˬ-euˬ yawˇ tiˬ jawˇ-iˬ maˬ paˇ bi bo ma. Ngaˬ-euˬ yawˇ deuˬ yuˇ kʼoꞈ jiˇ-awˇ, naw maꞈ neh maˬ paˇ bi sehꞈ dzaˬ ma.

Muiˬ-eu yawˇ bo-eu yaw sahˇ

¹¹ “Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ pyeuꞈ-eu ngaˇ heu loꞈ-ehˇ ehˇ-eu ma. Ngaˬ-euˬ gʼawˇ mawˇ ngaˬ-euˬ yawˇ deuˬ-ahˇ poˆ-awˇ, bo saˆ ma.

¹² Cah byaˆ jiˇ-euˬ yawˇ deuˬ-ahˇ yawˇ bo-eu yaw sahˇ poˆ kʼoꞈ uiˬ-eu loꞈ-ehˇ, ngaˬ-euˬ yawˇ deuˬ-ahˇ ngaˇ poˆ kʼoꞈ uiˬ ma. Juˬ kʼoeˬ tmˬ-awˇ mˬ zahˇ tsui ni gʼeh ngeh nah aˬ yawꞈ maꞈ kʼaˇ cehˆ byaˆ taˬ-euˬ gaˇ, ngaˇ poˆ mawˆ kʼoꞈ ma.

¹³ Aˬ cawˬ miˇ kʼahˬ-ahˇ neh sheuˬ kʼoꞈ doˆ laꞈ-awˇ, tiˬ gaˇ sheuˬ uiˬ jiˇ-awˇ, aˬ yawꞈ maꞈ-euˬ miˇ kʼahˬ-ahˇ sheuˬ kʼoꞈ laꞈ ma. Iˇsaˬleˬlaˆ gawˬ jawˬ hawˇ-eu lawˇ gawˆ deuˬ jaˆ gaˇ paˇ sheuˬ kʼoꞈ keuˆ laꞈ-awˇ, nui saˇ za-eu gaˆ dzaˬ duˬ-ahˇ bi gaˆ ma.

¹⁴ Iˇsaˬleˬlaˆ miˇ kʼahˬ laꞈ kʼoeˇ, gawˬ jawˬ-ahˇ yaˇ moꞈ nmˬ gaˇ maˬ ehˇ, deh kʼawꞈ-ahˇ maˬ ehˇ, nyoeˇ jawꞈ ni gʼeh-eu gaˆ dzaˬ duˬ kʼaˇ jaˆ gaˇ, aˬ yawꞈ maꞈ-ahˇ guˆ kʼaˇ maˬ zaˬ ni bi gaˆ ma.

¹⁵ Ngaˬ-euˬ gʼawˇ mawˇ ngaˬ-euˬ yawˇ deuˬ-ahˇ bo-eu gʼaˬ geuꞈ-awˇ, muiˬ-eu gʼaˬ naˬ naˬ duˬ-ahˇ bi naˬ ma lehˇ, Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ pyeuꞈ-eu ngaˇ ehˇ-eu ma.

¹⁶ “Byoˆ-iˇ-euˬ yawˇ deuˬ-ahˇ ngaˇ poˆ-awˇ, gaˇ bahˬ iˇ bahˬ taˬ-euˬ deuˬ-ahˇ teh kʼoꞈ laꞈ-awˇ, laˆ tahˬ laˆ naˇ-euˬ deuˬ-ahˇ jaˆ gʼaˬ kaˬ uꞈ nehˬ-eu uˬ taꞈ, naˇ luꞈ-eu deuˬ-ahˇ jaˆ gʼaˬ laˆ saˆ nehˬ ma. Ehˇ kʼawꞈ, yaw tsuˇ tsuˇ-awˇ gʼaˬ kʼaˆ-eu yawˇ deuˬ-ahˇ, ngaˇ laˆ cawˆ ma. Aˬ jeˬ miˇ neh ehˇ naˇ, ngaˇ-aˬ, yaw tsaˬ yaw dawˇ dawˇ-ehˇ mˇ-eu yawˇ bo-eu gʼaˬ ma.

¹⁷ “Ngaˬ-euˬ yawˇ yawˇ maꞈ-oˇ, Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ pyeuꞈ-eu ngaˇ, nymˬ-mˇ naw maꞈ-ahˇ heu loꞈ-ehˇ ehˇ-eu ma. Naw maꞈ yawˬ gʼaˬ na luꞈ-ahˇ ngaˇ yaˇ kʼaˬ daˇ-awˇ, yaw muiˬ hawˇ-eu yaw doeˇ biˇ paˆ-awˇ, yawˇ hawˇ-eu ciꞈ myehꞈ biˇ paˆ ma.

¹⁸ Naw maꞈ tiˬ paˆ na deuˬ muiˬ dui dui-eu yaˇ moꞈ ya dzaˬ luꞈ-eu tehꞈ-ehˇ maˬ gʼaˬ ni, naw maꞈ maˬ dzaˬ nahˇ-eu yaˇ moꞈ deuˬ-ahˇ nawˬ pahˬ nehˬ-eu meh. Shawˇ jehˆ ni gʼeh-eu iˇ cuꞈ naw maꞈ dawˇ-awˇ, naw maꞈ maˬ dawˇ-eu iˇ cuꞈ-ahˇ iˇ neˇ laˆ neˇ-eu meh.

¹⁹ Ngaˬ-euˬ yawˇ nui deuˬ-aˬ, naw maꞈ neh nawˬ pahˬ-euˬ yaˇ moꞈ ya tseuˆ dzaˬ-awˇ, naw maꞈ neh iˇ neˇ laˆ neˇ-euˬ iˇ cuꞈ ya dawˇ-eu meh.

²⁰ “Kʼoeˇ miˇ neh, Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ pyeuꞈ-eu ngaˇ, nymˬ-mˇ naw maꞈ-ahˇ heu loꞈ-ehˇ ehˇ-eu ma. Naw maꞈ gʼaˬ kʼaˆ-eu yawˇ deuˬ hawˇ-eu, gʼaˬ baˬ-eu yawˇ deuˬ-ahˇ ngaˇ yaˇ kʼaˬ daˇ ma.

²¹ Naˇ luꞈ-eu deuˬ-ahˇ yawˇ yawˇ maꞈ-ahˇ maˬ bi uˇ ni naw maꞈ tahˬ dzeh-eu meh.

²² Ehˇ kʼawꞈ, ngaˬ-euˬ yawˇ-ahˇ ngaˇ ka kʼoꞈ-awˇ, yehˬ bawˬ-ehˇ maˬ paˇ bi jahˇ ma. Ngaˬ-euˬ yawˇ aˬ yawꞈ mawˇ yawꞈ ngaˇ yaˇ kʼaˬ daˇ-awˇ, yaw muiˬ hawˇ-eu yaw doeˇ biˇ paˆ ma.

²³ Ngaˬ-euˬ zaˬ kʼaˆ Daˬbiˇ-ahˇ duˇ-eu sahˬ paˬ tiˬ gʼaˬ tehꞈ-ehˇ aˬ yawꞈ maꞈ-ahˇ ngaˇ biꞈ-awˇ, aˬ yawꞈ maꞈ-ahˇ bo-eu yawˇ bo-eu yaw sahˇ bi geuꞈ ma.

²⁴ Sahˬpaˬ Miˬyehˇ-aˬ, aˬ yawꞈ maꞈ-euˬ Miˬyehˇ pyeuꞈ-awˇ, ngaˬ-euˬ zaˬ kʼaˆ Daˬbiˇ-ahˇ duˇ-eu sahˬ paˬ tiˬ gʼaˬ, aˬ yawꞈ maꞈ-ahˇ uˆ lahˇ tehꞈ-a lehˇ ngaˇ ehˇ taˬ-euˬ ma.

²⁵ Aˬ yawꞈ maꞈ guˆ kʼaˇ maˬ za-ehˇ ya dehꞈ ni, aˬ yawꞈ maꞈ nehˬ-ehˇ ngaˇ dawˬ ma saˇ jaˇ dzaˬ ma. Ngaˬ-euˬ yawˇ deuˬ deh ga-ahˇ nui ma saˇ lehˆ ni ya gaˆ-awˇ, sahˬ kʼaˆ uˬ moˆ ciˬ cuˇ ni ya yuꞈ-eu gʼaˇ duˬ, bawˇ tsahˬ jeˬ zaˬ yaw haiˬ dawˬ tawˆ luꞈ ngaˇ laˆ byoˆ ma.

²⁶ “Aˬ yawꞈ maꞈ-ahˇ ngaˇ guiˬ lahˬ biꞈ-awˇ, ngaˬ-euˬ muiˬ-eu shawˇ-eu gawˬ duˇ jawˬ jawˬ-ehˇ bi jawˇ ma. Aˇ yamˬ tsaˬ ni, aˬ yawꞈ maꞈ gʼaˇ duˬ ngaˇ uˬ yehˇ bi yehˇ le ma.

²⁷ Aˇ bawˇ deuˬ aˇ siˬ siˬ le-awˇ, deh yaˇ-ahˇ dzaˬ la gʼo cehˇ loˆ le-eu uˬ taꞈ, yawˬ gʼaˬ na luꞈ yawˬ ha-euˬ miˇ tsaˬ-ahˇ guˆ kʼaˇ maˬ za ni ya jawˇ tehꞈ-a. Ngaˬ-euˬ tsawˇ haˬ deuˬ daˬ luꞈ-eu shmˇ caˆ ngaˇ gʼeu tsehˆ-awˇ, aˬ yawꞈ maꞈ-ahˇ zaˬ kʼaˆ bi geuꞈ-euˬ deuˬ-euˬ laꞈ-ahˇ bi buˬ-iˇ ngeh, ngaˇ Sahˬpaˬ Miˬyehˇ pyeuꞈ-eu gaˇ kawˆ aˬ yawꞈ maꞈ siˬ duˬ tehꞈ-a.

²⁸ Aˬ cawˬ tsawˇ jeuˬ deuˬ aˬ yawꞈ maꞈ-ahˇ maˬ paˇ kʼaˆ dzaˬ nya-ehˇ, bawˇ tsahˬ jeˬ zaˬ yaw haiˬ deuˬ aˬ yawꞈ maꞈ-ahˇ maˬ paˇ kawꞈ sehꞈ dzaˬ nya ni pyeuꞈ-iˇ tehꞈ-a. Aˬ yawꞈ maꞈ nui saˇ oꞈ-eu laꞈ kʼoeˇ ya dehꞈ-awˇ, guˆ kʼaˇ maˬ za ni pyeuꞈ-iˇ tehꞈ-a.

²⁹ Miˇ tsaˬ miˇ muiˬ muiˬ dui dui-eu deh yaˇ deuˬ aˬ yawꞈ maꞈ-ahˇ ngaˇ biꞈ-awˇ, aˬ yawꞈ maꞈ-euˬ miˇ kʼahˬ laꞈ kʼoeˇ mehꞈ-eu shuꞈ-eu jeˬ byoˆ tsehˆ tehꞈ-a. Aˬ cawˬ tsawˇ jeuˬ deuˬ aˬ yawꞈ maꞈ-ahˇ maˬ paˇ laˆ guˆ nya ni pyeuꞈ-iˇ tehꞈ-a.

³⁰ Iˇsaˬleˬlaˆ tsawˇ jeuˬ-ahˇ ngaˇ haw piˇ-awˇ, aˬ yawꞈ maꞈ ngaˬ-euˬ tsawˇ jeuˬ pyeuꞈ-eu gaˇ kawˆ, tsawˇ haˬ yawˬ gʼaˬ na luꞈ siˬ nya tehꞈ-a lehˇ, Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ pyeuꞈ-eu ngaˇ ehˇ taˬ-eu ma.

³¹ “Naw maꞈ ngaˬ-euˬ yawˇ ma. Ngaˬ-euˬ gaˆ dzaˬ duˬ-ahˇ gaˆ-eu naw maꞈ-aˬ, ngaˬ-euˬ yawˇ, ngaˬ-euˬ tsawˇ jeuˬ pyeuꞈ-awˇ, ngaˇ naw maꞈ-euˬ Miˬyehˇ ma” lehˇ, Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ ehˇ-eu meh.