Yeˬsaˬgeˬlaˇ 30 - Akha

Iˇjiˇtuˆ miˇ kʼahˬ-ahˇ Sahˬpaˬ Miˬyehˇ kʼehˬ tehꞈ-a

¹ Sahˬpaˬ Miˬyehˇ ngaˬ-ahˇ heu loꞈ-ehˇ ehˇ-eu meh.

² “Tsawˇ haˬ zaˬ-oˇ, Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ pyeuꞈ-eu ngaˬ-euˬ dah zaˇ heu loꞈ-ehˇ ngehˬ dah-awˬ. “Guˆ-eu aˇ nah keuˆ le luꞈ meh.

³ Sahˬpaˬ Miˬyehˇ nui ma pehˇ gaˇ, ya mawˇ-eu nah keuˆ le luꞈ meh. Miˇ kʼahˬ tsawˇ jeuˬ dawˬ tawˆ kʼoeˇ taˆ, shaˬ zahˬ mˬ dmˇ ciˬ tehˬ le-eu aˇ nah kʼoeˇ nah keuˆ le luꞈ meh.

⁴ Iˇjiˇtuˆ-ahˇ guiˇ deuˆ le-awˇ, Suˬdaˬ shaˬ zahˬ ya mˇ tehꞈ-a. Iˇjiˇtuˆ tsawˇ haˬ shiˇ myaˬ-awˇ, pyuˇ shuiˇ myawˬ gahˬ bi yuˇ jiˇ-awˇ, miˇ kʼahˬ cawˆ-iˇ gaˇ keuˆ tehꞈ-a.

⁵ “Guiˇ kʼoeˇ poˆ deuˆ-euˬ baˬ da neh, Suˬdaˬ miˇ kʼahˬ Luˇdeˬ miˇ kʼahˬ, Liˆbyaˇ miˇ kʼahˬ, Aˬleˬbyaˇ miˇ kʼahˬ hawˇ-eu Kuˇbaˆ miˇ kʼahˬ-ahˇ jawˇ-eu yehˇ deuˬ ya shiˇ-eu uˬ taꞈ, ngaˬ-euˬ tsawˇ jeuˬ laꞈ kʼoeˇ tiˬ paˆ na deuˬ kʼawꞈ ya shiˇ tehꞈ-a.”

⁶ Dawˬ tawˆ koeˇ taˆ uˆ lahˇ luꞈ-eu Sahˬpaˬ Miˬyehˇ ehˇ-eu dawˬ-aˬ, “Iˇjiˇtuˆ-ahˇ caw ba-euˬ deuˬ, dawˬ tawˆ luꞈ coˬ-iˇ jiˇ tehꞈ-a. Nui ma huiˬ-eu Iˇjiˇtuˆ yehˇ deuˬ, laꞈ taˆ Miˇgaˬdawˇlaˆ-ahˇ neh, laꞈ oˆ Aˬsaˬgʼawˬ-ahˇ keuˆ ni, mi cehˇ laꞈ-ahˇ ya shiˇ meh lehˇ, Dawˬ tawˆ kʼoeˇ taˆ Sahˬpaˬ Miˬyehˇ ngehˬ gʼaˬ tmˇ gʼaˬ jiˇ taˬ-euˬ meh.

⁷ Miˇ kʼahˬ dawˬ tawˆ luꞈ naˆ maˬ tseˇ, Iˇjiˇtuˆ miˇ kʼahˬ byoˆ le-awˇ, meuˬ kʼaˇ cawˆ-iˇ-euˬ deuˬ kʼoeˇ taˆ, Iˇjiˇtuˆ meuˬ cawˆ dzehˬ tehꞈ-a.

⁸ Iˇjiˇtuˆ-ahˇ ngaˇ dzah puiˆ-awˇ, caw ba le-eu deuˬ coˬ jiˇ ngeh, ngaˇ Sahˬpaˬ Miˬyehˇ ngeuˇ ngaˇ lehˇ, aˬ yawꞈ maꞈ ya siˬ duˬ tehꞈ-a.

⁹ “Aˇ nah kʼoeˇ nah keuˆ le-awˇ, Iˇjiˇtuˆ miˇ kʼahˬ cawˆ-iˇ ngeh, saˇ baoˬ laꞈ kʼoeˇ ngaˇ tsawˇ haˬ pyehˬ gʼeh-awˇ, saˇ lehˆ ni jawˇ luꞈ-eu Suˬdaˬ miˇ kʼahˬ-ahˇ gaˇ kawˆ bi dzawˇ gaˬ-iˇ-awˇ, guˆ-eu laꞈ kʼoeˇ bi luiˬ gʼa laˇ ma. Ngaˇ kʼoeˇ loꞈ-ehˇ jahˇ-eu aˇ nah keuˆ le luꞈ meh.”

¹⁰ Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ heu loꞈ-ehˇ ehˇ-eu meh. “Baˬbuˇloˬ miˇ kʼahˬ-euˬ sahˬ paˬ Neˬbuˬkaˬneˬzaˬ-ahˇ gʼoe-awˇ, Iˇjiˇtuˆ-euˬ pyuˇ shuiˇ myawˬ gahˬ, aˇ saˬ bi saˬ-eu gʼeh-eu ma.

¹¹ Miˇ tsaˬ dawˬ tawˆ guˆ dui dui-eu, aˬ yawꞈ hawˇ-eu yawꞈ-euˬ guiˇ maꞈ, Miˇ kʼahˬ heu kʼahˬ laˆ cawˆ-eu lehˇ, baꞈ maꞈ puˇ jeˬ-ehˇ oe tehꞈ-a. Aˬ yawꞈ maꞈ mi cehˇ gʼawˇ doˆ-awˇ, Iˇjiˇtuˆ miˇ kʼahˬ-ahˇ deuˆ-awˇ, tsawˇ shiˇ bi ga byah yaꞈ tehꞈ-a.

¹² Niˬlaˇ lawˇ baˬ ngaˇ laˆ tsiˇ-awˇ, haiˬ-eu tsawˇ haˬ deuˬ-euˬ laꞈ-ahˇ, miˇ kʼahˬ kʼoeˇ kʼahˬ ahˬ ahˇ nehˬ ma. Aˬ cawˬ tsawˇ jeuˬ aˬ laꞈ laꞈ kʼoeˇ, miˇ kʼahˬ kʼoeˇ bi laˆ byoˆ meh lehˇ, Ngaˇ Sahˬpaˬ Miˬyehˇ ehˇ-eu ma.”

¹³ Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ ehˇ-eu, “Tahˬ pahˬ aˬ ma mawˇ kawˇ hawˇ-eu, Mehˇpiˇ meuˬ-ahˇ jaˆ-eu mawˇ kawˇ, ngaˇ laˆ cawˆ byoˆ jiˇ-eu lehˇ ma. Iˇjiˇtuˆ sahˬ paˬ maˬ baw-ehˇ, miˇ kʼahˬ zaˬ deuˬ bi guˆ sehꞈ ma.

¹⁴ Iˇjiˇtuˆ laꞈ oˆ dzaˬ byoˆ le-awˇ, laꞈ taˆ paw jaˆ-eu zoˇ naˆ meuˬ, miˬ dzaˬ neh keuˬ puiˆ dzeh nehˬ ma. Deˬbiˇ meuˬ-ahˇ ngaˇ kʼehˬ nehˬ ma.

¹⁵ Iˇjiˇtuˆ-euˬ ziꞈ dui dui-eu, Peˬluˇsiˆ meuˬ kʼoeˇ meuˬ kʼoeˇ taˆ, ngaˬ-euˬ nui pehˇ tahˬ daˆ nehˬ-awˇ, Deˬbiˇ meuˬ-euˬ pyuˇ shuiˇ myawˬ gahˬ, ngaˇ laˆ cawˆ byoˆ jiˇ-eu lehˇ ma.

¹⁶ Iˇjiˇtuˆ-ahˇ miˬ dzaˬ keuˬ ngeh, Peˬluˇsiˆ meuˬ ya gawˇ tehꞈ-a. Deˬbiˇ meuˬ lahˇ coˬ byaˆ dzeh-awˇ, meuˬ-ahˇ iˇ jeuˬ jeuˬ pymˬ tehꞈ-a.

¹⁷ Heˬliˬpawˇliˆ, Buˬbaˬtiˇ meuˬ, heu nyiˬ meuˬ-ahˇ jawˇ-eu zaˬ guˬ, guiˇ deuˆ gaˇ bi sehꞈ byoˆ jiˇ-awˇ, zaˬ miˬ zaˬ deuˬ bi nyehꞈ tehꞈ-a.

¹⁸ Iˇjiˇtuˆ-euˬ baoˬ ngawˬ kʼehꞈ-awˇ, gʼaˬ gʼaˬ siˬ nyehꞈ paˆ dzeh nehˬ ngeh, Taˬpaˬnehˇ meuˬ zahˬ leˇ tehꞈ-a. Iˇjiˇtuˆ-ahˇ juˬ kʼoeˬ tmˬ-awˇ, Iˇjiˇtuˆ meuˬ doe ni jawˇ-eu, tsawˇ haˬ deuˬ bi nyehꞈ jiˇ tehꞈ-a.

¹⁹ Iˇjiˇtuˆ-ahˇ kʼoeˇ naˆ kʼehˬ ngeh, ngaˇ Sahˬpaˬ Miˬyehˇ ngeuˇ ngaˇ lehˇ, aˬ yawꞈ maꞈ ya siˬ duˬ tehꞈ-a.”

Iˇjiˇtuˆ sahˬ paˬ baoˬ ga-iˇ-euˬ

²⁰ Nga maꞈ aˬ cawˬ miˇ kʼahˬ-ahˇ bi nyehꞈ gʼeh-awˇ jawˇ-euˬ tseˇ tiˬ kʼoꞈ tiˬ kʼoꞈ, ba la yaw beh siˬ shiꞈ nah-ahˇ, Sahˬpaˬ Miˬyehˇ ngaˬ-ahˇ heu loꞈ-ehˇ ehˇ-eu meh.

²¹ “Tsawˇ haˬ zaˬ-oˇ, Iˇjiˇtuˆ sahˬ paˬ-euˬ aˬ laꞈ ngaˇ ngawˬ kʼehꞈ-euˬ ma. Aˬ laꞈ kʼoeˇ taˬ leˇ-awˇ mi cehˇ paˇ baꞈ nya laˇ ni, jaˆ gʼaˬ uꞈ-awˇ kaꞈ dawˇ nehˬ-eu tiˬ gʼaˬ-iˬ maˬ jawˇ-a.

²² Nymˬ-mˇ poˆ jawˇ, Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ pyeuꞈ-eu ngaˇ heu loꞈ-ehˇ ehˇ-eu ma. Iˇjiˇtuˆ sahˬ paˬ-ahˇ ngaˇ muiˇ-eu ma. Aˬ yawꞈ-euˬ aˬ laꞈ nyiˬ pyawˬ luꞈ ngaˇ ngawˬ kʼehꞈ-eu lehˇ gʼeh-eu ma. Tiˬ poˆ kʼehꞈ-iˇ gʼaˬ-euˬ laꞈ maˬ ehˇ, maˬ kʼehꞈ-iˇ-euˬ laꞈ maˬ ehˇ, ngaˇ paˇ ngawˬ kʼehꞈ nehˬ-awˇ, aˬ yawꞈ-euˬ aˬ laꞈ-ahˇ tuˆ tehˬ taˬ-euˬ mi cehˇ, miˇ tsa bi ga ka ma.

²³ Iˇjiˇtuˆ tsawˇ haˬ deuˬ-ahˇ, miˇ kʼahˬ doe ni ngaˇ bi jawˇ byaˆ ma.

²⁴ Kʼoeˇ naˇ, Baˬbuˇloˬ sahˬ paˬ-euˬ laꞈ du bi deuˇ laˇ-awˇ, aˬ yawꞈ-euˬ aˬ laꞈ-ahˇ ngaˬ-euˬ mi cehˇ dawˆ ahˇ nehˬ ma. Ehˇ kʼawꞈ, Iˇjiˇtuˆ sahˬ paˬ-euˬ aˬ laꞈ ngaˇ ngawˬ kʼehꞈ-awˇ, aˬ yawꞈ-ahˇ muiˇ-eu deuˬ-euˬ mehˬ shi mahˇ mahˇ-ehˇ shiˇ leˇ tehꞈ-a.

²⁵ Aˬ yawꞈ-ahˇ ngaˇ gʼaˬ bi baˬ-iˇ-awˇ, Baˬbuˇloˬ sahˬ paˬ-ahˇ gʼaˬ bi kʼaˆ dzehˬ laˇ ma. Baˬbuˇloˬ sahˬ paˬ-ahˇ ngaˬ-euˬ mi cehˇ biꞈ nehˬ-awˇ, Iˇjiˇtuˆ miˇ kʼahˬ paw bi baꞈ pyawˇ ngeh, ngaˇ Sahˬpaˬ Miˬyehˇ pyeuꞈ-eu yawˬ gʼaˬ na luꞈ siˬ nya tehꞈ-a.

²⁶ Iˇjiˇtuˆ tsawˇ haˬ deuˬ-ahˇ miˇ kʼahˬ doe ni ngaˇ bi jawˇ byaˆ jiˇ ma. Kʼoeˇ ngeh jawˇ, ngaˇ Sahˬpaˬ Miˬyehˇ pyeuꞈ-eu aˬ yawꞈ maꞈ siˬ duˬ tehꞈ-a.”