Yeˬsaˬgeˬlaˇ 3 - Akha

¹ Miˬyehˇ ehˇ-eu, “Tsawˇ haˬ zaˬ-oˇ, sahˬ boꞈ paˇ yoˆ heu yoˆ dzaˬ-awˬ. Kʼoeˇ naˇ, Iˇsaˬleˬlaˆ tsawˇ haˬ deuˬ jawˇ gaˇ dawˬ ngehˬ ngehˬ-iˇ-awˬ.”

² Kʼoeˇ ngeh, ngaˇ kʼaˬ meh mˇ nga-awˇ, aˬ yawꞈ ngaˬ-ahˇ sahˬ boꞈ paˇ yoˆ kʼoeˇ yoˆ bi dzaˬ laꞈ-euˬ meh.

³ “Tsawˇ haˬ zaˬ-oˇ, ngaˬ neh nawˬ-ahˇ biꞈ-euˬ sahˬ boꞈ paˇ yoˆ heu yoˆ dzaˬ-awˬ. Nawˬ-euˬ uˬ maˆ dzaˬ byah gʼeh-awˬ” lehˇ ehˇ-eu meh. Ngaˇ dzaˬ haw ngeh, byaˬ byaˬ uiˇ loꞈ-ehˇ coeˇ-eu meh.

^4-5 Kʼoeˇ naˇ, Miˬyehˇ heu loꞈ-ehˇ ehˇ-eu meh. “Tsawˇ haˬ zaˬ-oˇ, Iˇsaˬleˬlaˆ tsawˇ haˬ deuˬ jawˇ gaˇ iˇ-awˇ, ngaˬ neh kʼaˇ bi ehˇ-euˬ jeˬ ehˇ nehˬ-iˇ-awˬ. Dawˬ maˬ gʼoˆ shaw laˇ-eu tsawˇ jeuˬ jawˇ gaˇ nawˬ-ahˇ ngaˇ pyehˬ gʼeh-eu maˬ ngeuˇ. Iˇsaˬleˬlaˆ tsawˇ haˬ deuˬ jawˇ gaˇ pyehˬ gʼeh-eu ma.

⁶ Dawˬ maˬ duˇ leˇ-eu tsawˇ jeuˬ yaw huiˬ deuˬ jawˇ gaˇ nawˬ-ahˇ ngaˇ pyehˬ gʼeh law nmˇ-aˬ, nawˬ-euˬ dawˬ-ahˇ aˬ yawꞈ maꞈ naˇ haˬ geuꞈ-eu baw tehꞈ-a.

⁷ Ehˇ kʼawꞈ, Iˇsaˬleˬlaˆ tsawˇ haˬ tiˬ gʼaˬ-iˬ nawˬ-euˬ dawˬ-ahˇ maˬ naˇ haˬ mawꞈ-aˇ. Ngaˬ-euˬ dawˬ-ahˇ kʼawꞈ aˬ yawꞈ maꞈ maˬ naˇ haˬ mawꞈ-a. Aˬ yawꞈ maꞈ dawˬ tawˆ luꞈ nui ma gʼahˇ-awˇ, naˬ bawˇ yaw tuˇ meh.

⁸ Nymˬ-mˇ poˆ jawˇ-aˬ, nawˇ kʼawꞈ aˬ yawꞈ maꞈ loꞈ-ehˇ nui ma gʼahˇ ni ngaˇ jahˇ ma.

⁹ Nawˇ kʼaˬ lo loꞈ-ehˇ ziꞈ-awˇ, gʼahˇ dui dui-eu kʼaˬ lo sehˇ loꞈ-ehˇ gʼahˇ laˇ ni ngaˇ jahˇ nehˬ ma. Ngaˬ-ahˇ puiˬ-eu tsawˇ haˬ kʼoeˇ deuˬ-ahˇ taˬ guˆ.”

¹⁰ Miˬyehˇ heu loꞈ-ehˇ paˇ ehˇ-eu meh. “Tsawˇ haˬ zaˬ-oˇ, ngaˬ neh kʼaˇ ehˇ-euˬ jeˬ-ahˇ yaw muiˬ paˬ-ehˇ naˇ haˬ duˬ-awˇ juiˇ uiˬ taˬ-awˬ.

¹¹ Kʼoeˇ naˇ, aˬ cawˬ neh bi nyehꞈ ka gʼeh-euˬ nawˬ-eu tsawˇ jeuˬ jawˇ gaˇ iˇ-awˇ, aˬ yawꞈ maꞈ naˇ haˬ-eu maˬ kaˬ, maˬ naˇ haˬ-eu maˬ kaˬ, Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ pyeuꞈ-eu ngaˬ-euˬ dawˬ ehˇ nehˬ-iˇ-awˬ.”

¹² Kʼoeˇ naˇ, Miˬyehˇ-euˬ yaw sahˇ ngaˬ-ahˇ ciˬ tuˇ-awˇ, ngaˬ-euˬ naˇ kʼah paw dzeˇ, “Mˬ kʼoeˇ taˆ Sahˬpaˬ Miˬyehˇ-euˬ yaw shehꞈ kʼahˬ sehˇ-ahˇ ja ceuˬ-awˬ” lehˇ yaw kʼaˆ-ehˇ ehˇ-eu dawˬ ngaˇ ya gaˬ-euˬ ma.

¹³ Jeˬluˇbeˬ aˇ mawˇ kʼoeˇ deuˬ jaˬ lehˇ laꞈ kʼoeˇ dahˇ diˬ diˬ-eu teˇ saˇ hawˇ-eu, aˇ beuˆ kʼoeˇ deuˬ-euˬ teˇ saˇ miˇ luˆ luˆ-eu loꞈ-ehˇ mahˇ gaˇ ya gaˬ-euˬ ma.

¹⁴ Gʼaˬ kʼaˆ dui dui-eu Sahˬpaˬ Miˬyehˇ-euˬ baoˬ ngaˬ-euˬ kʼoeˇ taˆ oe-awˇ, aˬ yawꞈ-euˬ yaw sahˇ ngaˬ-ahˇ ciˬ gʼeh ngeh, ngaˇ nui ma naˇ-awˇ, nui ma pehˇ-euˬ ma.

¹⁵ Kʼoeˇ naˇ, aˬ cawˬ neh bi nyehꞈ ka leꞈ-awˇ jawˇ-eu Iˇsaˬleˬlaˆ tsawˇ haˬ deuˬ jawˇ-eu Ceˬbaˬ lawˇ baˬ daw peh jaˆ-eu Teˬlaˬbiˇ meuˬ-ahˇ ngaˇ oe keuˆ-awˇ, ngaˬ neh ya gaˬ ya mawˇ yaꞈ-euˬ gaˇ kawˆ deuˬ-ahˇ zahˬ leˇ-awˇ, shiꞈ nah jawˇ-euˬ ma.

Iˇsaˬleˬlaˆ tsawˇ jeuˬ-ahˇ bi haw-eu gʼaˇ duˬ Yeˬsaˬgeˬlaˇ-ahˇ Sahˬpaˬ Miˬyehˇ tseˇ doˆ-euˬ

¹⁶ Shiꞈ nah byah laˇ ngeh jawˇ, Sahˬpaˬ Miˬyehˇ ngaˬ-ahˇ heu loꞈ-ehˇ ehˇ-eu meh.

¹⁷ “Tsawˇ haˬ zaˬ-oˇ, ngaˇ nawˬ-ahˇ Iˇsaˬleˬlaˆ tsawˇ jeuˬ-ahˇ haw-eu gʼaˬ bi geuꞈ ma. Aˬ yawꞈ maꞈ nui ma paˇ laˇ ni ngaˬ neh mehˬ-euˬ dawˬ deuˬ aˬ yawꞈ maꞈ-ahˇ nawˇ ya biꞈ meh.

¹⁸ Haiˬ-eu tsawˇ haˬ tiˬ gʼaˬ shiˇ-eu keuˆ laˇ shaw-iˬ meh lehˇ ngaˇ ehˇ ngeh, aˬ yawꞈ yawˬ haˇ yawˬ ha ka kʼoꞈ nya ni bi dehꞈ paˇ-eu gʼaˇ duˬ nawˇ maˬ mehˬ maˬ tsoˆ-ehˇ iˬ baˇ pi-awˇ bi shiˇ naˇ, nawˬ-ahˇ ngaˇ do yuˇ ma.

¹⁹ Haiˬ-eu tsawˇ haˬ tiˬ gʼaˬ-ahˇ nawˇ mehˬ nehˬ tsoˆ nehˬ-awˇ, iˬ baˇ mˇ-eu maˬ byehˇ-ehˇ iˬ baˇ pi-awˇ shiˇ naˇ, nawˬ-euˬ gaˇ nawˇ mˇ gʼaˬ-euˬ miˇ neh, nawˇ maˬ shiˇ ni ya dzeuˇ-iˇ tehꞈ-a.

²⁰ “Yaw tsaˬ yaw dawˇ tsawˇ haˬ iˬ baˇ mˇ dahˬ beh laˇ-awˇ, ngaˬ neh shaˬ zahˬ laˆ naꞈ nehˬ ngeh, aˬ yawꞈ-ahˇ nawˇ maˬ mehˬ maˬ tsoˆ nehˬ ni aˬ yawꞈ shiˇ naˇ, aˬ yawꞈ-euˬ iˬ baˇ baˬ da neh shiˇ-euˬ jeˬ pyeuꞈ-eu meh. Aˬ yawꞈ neh mˇ-euˬ yaw muiˬ jeˬ dawˬ tawˆ luꞈ-ahˇ ngaˇ ngehˇ byoˆ nehˬ jiˇ-eu uˬ taꞈ, nawˬ-ahˇ kʼawꞈ ngaˇ do yuˇ ma.

²¹ Yaw tsaˬ yaw dawˇ tsawˇ haˬ tiˬ gʼaˬ-ahˇ iˬ baˇ maˬ ya mˇ ni nawˇ mehˬ nehˬ tsoˆ nehˬ-awˇ, nawˬ-euˬ ehˇ dawˬ-ahˇ naˇ haˬ-eu laꞈ kʼoeˇ, iˬ baˇ maˬ mˇ ni jawˇ naˇ, aˬ yawꞈ maˬ ya shiˇ-ehˇ, nawˇ kʼawꞈ shiˇ gaˇ ya buˬ-iˇ tehꞈ-a.”

Yeˬsaˬgeˬlaˇ dawˬ maˬ ngehˬ doˆ nya ni pyeuꞈ-iˇ tehꞈ-a

²² Sahˬpaˬ Miˬyehˇ-euˬ baoˬ ngaˬ nehˬ-ehˇ jawˇ-eu meh lehˇ ngaˬ-ahˇ siˬ laˇ-awˇ, aˬ yawꞈ ngaˬ-ahˇ ehˇ-eu, “Tuˇ-awˇ, deh kʼawꞈ-ahˇ iˇ-awˬ. Kʼoeˇ gaˇ, nawˬ-ahˇ ngaˇ dawˬ ngehˬ cawˬ le ma.”

²³ Kʼoeˇ naˇ, deh kʼawꞈ-ahˇ ngaˇ iˇ ngeh, Ceˬbaˬ lawˇ baˬ dawˬ peh ya mawˇ-euˬ poˆ loꞈ-ehˇ, Sahˬpaˬ Miˬyehˇ-euˬ yaw shehꞈ kʼahˬ sehˇ-ahˇ ngaˇ ya mawˇ-euˬ ma. Kʼoeˇ ngeh, ngaˇ moꞈ tsahˬ-ehˇ miˇ tsa coˬ-iˇ-euˬ ma.

²⁴ Ehˇ kʼawꞈ, Miˬyehˇ-euˬ yaw sahˇ ngaˬ-euˬ laꞈ kʼoeˇ uˇ le-awˇ, ngaˬ-ahˇ ciˬ tuˇ nehˬ laꞈ-euˬ meh. Sahˬpaˬ Miˬyehˇ ngaˬ-ahˇ ehˇ-eu, “Iˇ kahˇ gʼoꞈ leˇ-awˇ, yawˬ haˇ yawˬ ha nymˇ laꞈ kʼoeˇ piˬ lahˇ-awˇ jawˇ leˇ-awˬ.

²⁵ Tsawˇ haˬ zaˬ-oˇ, nawˬ-ahˇ bi paꞈ cuꞈ bi paꞈ lah-awˇ, aˬ cawˬ mehˬ shi maˬ doˆ-iˇ nya ni ya jawˇ tehꞈ-a.

²⁶ Ngaˬ-ahˇ puiˬ-eu tsawˇ haˬ heu deuˬ-ahˇ nawˇ maˬ mehˬ maˬ tsoˆ nya-ehˇ pyeuꞈ-iˇ ni, nawˬ-euˬ mehˬ laˇ ngaˇ bi kʼaˆ-iˇ ma.

²⁷ Kʼoeˇ naˇ, ngaˇ nawˬ-ahˇ dawˬ paˇ ngehˬ cawˬ le-awˇ, dawˬ ngehˬ nya-eu baoˬ paˇ biꞈ kʼoꞈ nehˬ ngeh, Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ pyeuꞈ-eu ngaˬ neh ehˇ-euˬ dawˬ deuˬ, aˬ yawꞈ maꞈ-ahˇ nawˇ paˇ ya ehˇ nehˬ tehꞈ-a. Tiˬ paˆ na deuˬ naˇ haˬ geuꞈ kʼawꞈ, tiˬ paˆ na deuˬ maˬ naˇ haˬ ni jawˇ tehꞈ-a. Aˬ jeˬ miˇ neh ehˇ naˇ, aˬ yawꞈ maꞈ-aˬ, ngaˬ-ahˇ puiˬ-eu tsawˇ jeuˬ meh.”