Yeˬsaˬgeˬlaˇ 29 - Akha

Iˇjiˇtuˆ miˇ kʼahˬ-ahˇ ciˬ pi nehˬ-euˬ dawˬ

¹ Nga maꞈ aˬ cawˬ meuˬ-ahˇ bi nyehꞈ gʼeh-awˇ jawˇ luꞈ-eu tseˇ kʼoꞈ tiˬ kʼoꞈ, ba la tseˇ siˬ tiˬ siˬ tseˇ nyiꞈ nah-ahˇ, Sahˬpaˬ Miˬyehˇ ngaˬ-ahˇ heu loꞈ-ehˇ ehˇ-eu meh.

² “Tsawˇ haˬ zaˬ-oˇ, Iˇjiˇtuˆ sahˬ paˬ-ahˇ dawˬ heu deuˬ ciˬ pi nehˬ-awˬ. Aˬ yawꞈ hawˇ-eu Iˇjiˇtuˆ miˇ kʼahˬ kʼahˬ lah ni, kʼehˬ-eu kʼaˆ-eu jeˬ-ahˇ ya daˬ meh lehˇ ehˇ nehˬ-awˬ.

³ Iˇjiˇtuˆ sahˬ paˬ-ahˇ, Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ heu loꞈ-ehˇ ehˇ-eu meh lehˇ ehˇ nehˬ-awˬ. “Niˬlaˇ lawˇ baˬ nawˬ neh beh-awˇ, nawˬ-euˬ lawˇ baˬ ma lehˇ ehˇ-eu, Lawˇ baˬ gʼahˇ ceh yuꞈ-eu byaˆ yahˬ, Iˇjiˇtuˆ miˇ kʼahˬ sahˬ paˬ-oˇ, nawˬ-ahˇ ngaˇ muiˇ-eu ma.

⁴ Nawˬ-euˬ baˬ ngeuˇ kuˆ seuˬ ceuˬ-awˇ, nawˬ-euˬ lawˇ baˬ ngaˬ shaˬ kʼoeˇ deuˬ, nawˬ-ahˇ bi myahˬ tehˬ leˇ jiˇ-awˇ, Ngaˬ shaˬ kʼoeˇ deuˬ nehˬ-ehˇ nawˬ-ahˇ, lawˇ baˬ lawˇ dzeˇ ngaˇ gʼeu doˆ ma.

⁵ Nawˇ hawˇ-eu ngaˬ shaˬ kʼoeˇ deuˬ-ahˇ, kʼaˇ shuiꞈ deh ga-ahˇ biˬ dzeh ma. Nawˬ-ahˇ maˬ duˬ pahˬ ni byehˇ-awˇ, miˇ tsa bi ga yaꞈ-eu laꞈ kʼoeˇ, bawˇ tsahˬ jeˬ zaˬ aˇ jiˇ deuˬ neh, nawˬ-euˬ shaˬ jiˇ bi dzaˬ jiˇ ma.

⁶ Kʼoeˇ ngeh Iˇjiˇtuˆ tsawˇ haˬ deuˬ, ngaˇ Sahˬpaˬ Miˬyehˇ ngeuˇ ngaˇ lehˇ, yaw muiˬ paˬ-ehˇ siˬ duˬ tehꞈ-a.” Sahˬpaˬ Miˬyehˇ heu loꞈ-ehˇ ehˇ-eu meh. “Naw maꞈ Iˇjiˇtuˆ tsawˇ haˬ deuˬ-ahˇ Iˇsaˬleˬlaˆ tsawˇ haˬ deuˬ nui ma huiˬ-eu meh. Ehˇ kʼawꞈ, nawˇ-aˬ, byehˆ dui dui-eu daˇ cuiˇ tiˬ cuiˇ loˆ ni tehꞈ meh.

⁷ Aˬ yawꞈ maꞈ nawˬ-ahˇ kʼawˬ daˇ ngeh, nawˇ kʼehꞈ-iˇ-awˇ, aˬ yawꞈ maꞈ-euˬ dahˇ teˇ-ahˇ tsawˆ leˇ-awˇ, mˇ yeuꞈ mˇ yeuꞈ-ehˇ bi shaˬ-eu meh.

⁸ Nymˬ-mˇ poˆ jawˇ, Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ pyeuꞈ-eu ngaˇ, nawˬ-ahˇ heu loꞈ-ehˇ ehˇ-eu ma. Aˬ cawˬ mi cehˇ baꞈ-awˇ naw maꞈ-ahˇ guiˇ deuˆ le-eu laꞈ kʼoeˇ, nawˬ-euˬ tsawˇ haˬ hawˇ-eu jeˬ zaˬ deuˬ-ahˇ bi sehꞈ ma.

⁹ Iˇjiˇtuˆ miˇ kʼahˬ byoˆ-iˇ laˆ-iˇ tehꞈ-a. Kʼoeˇ ngeh, ngaˇ Sahˬpaˬ Miˬyehˇ pyeuꞈ-eu nawˇ ya siˬ duˬ tehꞈ-a. “Niˬlaˇ lawˇ baˬ nawˬ neh beh-awˇ, nawˬ-euˬ lawˇ baˬ ma lehˇ ehˇ-eu miˇ neh,

¹⁰ Nawˇ hawˇ-eu nawˬ-euˬ Niˬlaˇ lawˇ baˬ-ahˇ ngaˇ muiˇ-eu ma. Laꞈ taˆ paw Miˇgaˬdawˇlaˆ meuˬ-ahˇ neh, laꞈ oˆ paw Aˬsaˬgʼawˬ meuˬ-ahˇ keuˆ ni, Suˬdaˬ miˇ kaˬ-ahˇ iˇ-eu gaˇ ma doˆ coˆ-ehˇ, Iˇjiˇtuˆ miˇ kʼahˬ kʼahˬ lah ni bi cawˆ-iˇ ma.

¹¹ Kʼoeˇ gaˇ tsawˇ haˬ hawˇ-eu jeˬ zaˬ cah tsehˆ-eu maˬ jawˇ ni pyeuꞈ-iˇ tehꞈ-a. Oeˬ tseˇ kʼoꞈ byah ni tiˬ jeˬ-iˬ maˬ dehꞈ maˬ jawˇ ni pyeuꞈ-iˇ tehꞈ-a.

¹² Iˇjiˇtuˆ miˇ kʼahˬ-ahˇ, miˇ tsaˬ kʼoeˇ taˆ aˬ cawˬ naˆ maˬ tseˇ cawˆ-iˇ-euˬ miˇ kʼahˬ bi pyeuꞈ-iˇ ma. Iˇjiˇtuˆ meuˬ deuˬ oeˬ tseˇ kʼoꞈ keuˆ ni cawˆ-iˇ-awˇ jaˆ tehꞈ-a. Cawˆ-iˇ-eu kʼoeˇ-aˬ, miˇ tsaˬ kʼoeˇ taˆ maˬ puˬ maˬ mawˇ haw-euˬ cawˆ-iˇ-eu jeˬ pyeuꞈ tehꞈ-a. Iˇjiˇtuˆ tsawˇ haˬ deuˬ bi cehˆ byaˆ jiˇ-awˇ, aˬ cawˬ miˇ kʼahˬ doe ni bi jawˇ byaˆ jiˇ ma.”

¹³ Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ heu loꞈ-ehˇ ehˇ-eu meh. “Oeˬ tseˇ kʼoꞈ byah laˇ ngeh jawˇ, aˬ cawˬ miˇ kʼahˬ-ahˇ jawˇ byaˆ jiˇ-euˬ Iˇjiˇtuˆ tsawˇ haˬ deuˬ-ahˇ ngaˇ paˇ sheuˬ kʼoꞈ uiˬ ma.

¹⁴ Aˬ yawꞈ maꞈ-euˬ nymˇ jiˇ jaˆ-eu Iˇjiˇtuˆ miˇ kʼahˬ laꞈ oˆ dzaˬ-ahˇ paˇ bi jawˇ kʼoꞈ le ma. Aˬ yawꞈ maꞈ-aˬ, gʼaˬ baˬ-eu miˇ kʼahˬ tiˬ kʼahˬ pyeuꞈ tehꞈ-a.

¹⁵ Miˇ kʼahˬ dawˬ tawˆ luꞈ naˆ maˬ tseˇ gʼaˬ baˬ-eu miˇ kʼahˬ tiˬ kʼahˬ pyeuꞈ-awˇ, aˬ cawˬ tsawˇ jeuˬ kʼoeˇ taˆ uˆ lahˇ nya-eu baoˬ maˬ ahˇ ni pyeuꞈ-iˇ tehꞈ-a. Aˬ yawꞈ maꞈ teˬ dui dui-iˇ-awˇ, aˬ cawˬ tsawˇ jeuˬ aˬ yawꞈ maꞈ-euˬ nui noeˬ mehˬ nah caw teh laˇ ni maˬ jahˇ nya-ehˇ pyeuꞈ-iˇ tehꞈ-a.

¹⁶ Iˇsaˬleˬlaˆ miˇ kʼahˬ kʼawꞈ, aˬ yawꞈ maꞈ-ahˇ maˬ gʼoe ni pyeuꞈ-iˇ tehꞈ-a. Iˇjiˇtuˆ miˇ kʼahˬ kʼoeˇ loꞈ-ehˇ pyeuꞈ-iˇ-euˬ baˬ da neh, Iˇjiˇtuˆ miˇ kʼahˬ-ahˇ nui ma huiˬ-euˬ lehˬ dui dui law hawˇ ngaˬ lehˇ, Iˇsaˬleˬlaˆ miˇ kʼahˬ-ahˇ siˬ leˇ tehꞈ-a. Kʼoeˇ ngeh jawˇ, ngaˇ Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ pyeuꞈ-eu gaˇ kawˆ, Iˇsaˬleˬlaˆ tsawˇ jeuˬ-ahˇ siˬ duˬ leˇ tehꞈ-a.”

Sahˬ paˬ Neˬbuˬkaˬneˬzaˬ Iˇjiˇtuˆ miˇ kʼahˬ-ahˇ deuˆ gʼaˬ tehꞈ-a

¹⁷ Nga maꞈ aˬ cawˬ miˇ kʼahˬ-ahˇ bi nyehꞈ gʼeh-awˇ jawˇ luꞈ-eu nyiˬ tseˇ shiꞈ kʼoꞈ tiˬ kʼoꞈ, ba la yaw beh siˬ, aˇ nah yaw beh nah-ahˇ, Sahˬpaˬ Miˬyehˇ ngaˬ-ahˇ heu loꞈ-ehˇ ehˇ-eu meh.

¹⁸ “Tsawˇ haˬ zaˬ-oˇ, Baˬbuˇloˬ sahˬ paˬ Neˬbuˬkaˬneˬzaˬ Duˇlu meuˬ-ahˇ guiˇ deuˆ le-euˬ meh. Aˬ yawꞈ-euˬ yehˇ deuˬ pi-euˬ myawˬ kah dui dui-eu miˇ neh, uˬ duˬ pi deˬ-awˇ, baꞈ pu yawˆ-iˇ jiˇ-euˬ meh. Kʼoeˇ naˆ naˆ-ehˇ shaˬ-euˬ kawꞈ, sahˬ paˬ hawˇ-eu aˬ yawꞈ-euˬ guiˇ maꞈ gʼaˇ duˬ jiˇ jeuˬ tiˬ jeˬ-iˬ maˬ ahˇ-a.

¹⁹ Kʼoeˇ miˇ neh, Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ pyeuꞈ-eu ngaˇ, nymˬ-mˇ heu loꞈ-ehˇ ehˇ-eu ma. Iˇjiˇtuˆ miˇ kʼahˬ kʼoeˇ sahˬ paˬ Neˬbuˬkaˬneˬzaˬ-ahˇ ngaˇ a nehˬ ma. Aˬ yawꞈ-euˬ guiˇ maꞈ neh guiˇ deuˆ-euˬ aˇ poeˬ, Iˇjiˇtuˆ miˇ kʼahˬ-ahˇ kʼaˇ jaˆ-eu pyuˇ shuiˇ myawˬ gahˬ dawˬ tawˆ luꞈ, aˬ yawꞈ deuˆ geuꞈ gʼeh jiˇ tehꞈ-a.

²⁰ Aˬ yawꞈ-euˬ guiˇ maꞈ ngaˬ-euˬ gʼaˇ duˬ gaˇ mˇ-eu miˇ neh, Iˇjiˇtuˆ miˇ kʼahˬ aˬ yawꞈ-ahˇ ngaˇ sawˇ nehˬ ma lehˇ, Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ pyeuꞈ-eu ngaˇ ehˇ-eu ma.

²¹ Kʼoeˇ loꞈ-ehˇ pyeuꞈ laˇ ngeh jawˇ, Iˇsaˬleˬlaˆ tsawˇ jeuˬ gʼaˬ kʼaˆ laˇ ni ngaˇ jahˇ-awˇ, ngaˇ Sahˬpaˬ Miˬyehˇ pyeuꞈ-eu gaˇ kawˆ siˬ leˇ ni, tsawˇ haˬ yawˬ gʼaˬ na luꞈ gaˬ gaˇ nawˬ-ahˇ dawˬ bi ngehˬ ma.”