Yeˬsaˬgeˬlaˇ 27 - Akha

Duˇlu meuˬ gʼaˇ duˬ tsawˇ ngoeˇ ngoeˇ-eu caˇ dawˬ

¹ Sahˬpaˬ Miˬyehˇ ngaˬ-ahˇ heu loꞈ-ehˇ ehˇ-eu meh.

² “Tsawˇ haˬ zaˬ-oˇ, Duˇlu meuˬ gʼaˇ duˬ tsawˇ ngoeˇ ngoeˇ-eu caˇ dawˬ caˇ nehˬ-awˬ.

³ Iˬ ma laˆ shaˆ dawˬ peh jaˆ-awˇ, iˬ ma laˆ shaˆ lawˇ deh-ahˇ kʼaˇ jawˇ-eu tsawˇ haˬ deuˬ nehˬ-ehˇ jeˬ gaꞈ taꞈ-eu meuˬ kʼoeˇ meuˬ-ahˇ, Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ heu loꞈ-ehˇ ehˇ-eu meh lehˇ ehˇ nehˬ-awˬ. Yawˬ ha aˇ gʼehˇ muiˬ-eu gaˇ kawˆ, Duˇlu nawˇ kʼahˬ sehˇ jehˆ-euˬ meh.

⁴ Nawˬ-euˬ jawˇ zaˇ laˆ shaˆ kʼahˬ deh, muiˬ-eu saˇ baoˬ-ahˇ duˇ leˇ ni, nawˬ-ahˇ tsoˆ muiˬ nehˬ taˬ-euˬ meh.

⁵ Heˬlaˬmoˬ gawˬ jawˬ-ahˇ dehꞈ-eu, shuˬ liˇ paꞈ muˆ neh tsoˆ-euˬ meh. Saˇ baoˬ saˬ paˇ gʼeu taw duˬ gʼeh, Leˬbaˬnoˬ gawˬ jawˬ-ahˇ dehꞈ-eu, siˬ daˬ daˇ kawˬ neh jahˇ-euˬ meh.

⁶ Baˬshaˬ-euˬ tsuiꞈ kʼaˆ aˇ bawˇ neh, saˇ baoˬ heu-eu daˇ laˆ jahˇ-awˇ, Guˇbaˬluˇ-euˬ miˬ shuˬ yuˇ-awˇ, ya ma juiˇ taꞈ-ahˇ-eu laꞈ kʼoeˇ, saˇ baoˬ guiˇ ga kʼawˬ taˬ-euˬ meh.

⁷ Iˇjiˇtuˆ-euˬ saˬ paˇ paˇ shawˇ, aˇ boꞈ aˇ yehˆ yehˆ-awˇ guꞈ-euˬ, nawˬ-euˬ saˇ baoˬ saˬ paˇ kʼoeˇ-ahˇ, gaˇ mahˇ jawˇ-awˇ haw siˬ nya meh. Nawˬ-euˬ saˇ baoˬ joe shmˇ-euˬ-aˬ, Guˇbaˬluˇ-ahˇ neh yuˇ leꞈ-euˬ, neˇ nyoeˇ nyoeˇ-eu saˬ paˇ neh meh.

⁸ Nawˬ-euˬ saˇ baoˬ heu-euˬ deuˬ-aˬ, Siˇdoˬ meuˬ-euˬ tsawˇ haˬ hawˇ-eu, Aˬbaˬdiˇ meuˬ-euˬ tsawˇ haˬ meh. Nawˬ-euˬ tsawˇ haˬ yaw nya deuˬ neh, saˇ baoˬ-ahˇ bi sheuˬ gʼeh-euˬ meh.

⁹ Saˇ baoˬ-euˬ laꞈ saˇ maˇ deuˬ-aˬ, Biˇbaˬlawˆ meuˬ-ahˇ neh oe-euˬ, nya dui dui-eu tsawˇ haˬ deuˬ meh. Laˆ shaˆ saˇ baoˬ kʼaˇ dziˬ-eu deuˬ, nawˬ-ahˇ jeˬ gaꞈ taꞈ-eu tehꞈ meh.

¹⁰ Paˇshaˇ miˇ kʼahˬ, Luˇdeˬ miˇ kʼahˬ hawˇ-eu, Liˆbyaˇ miˇ kʼahˬ-ahˇ jawˇ-eu yehˇ deuˬ, nawˬ-euˬ guiˇ guiˇ maꞈ laꞈ kʼoeˇ gaˇ mˇ luꞈ-eu meh. Aˬ yawꞈ maꞈ-euˬ dehˬ daˬ duˬ hawˇ-eu shmˇ uˬ kʼoˆ deuˬ nawˬ-euˬ taˆ-ahˇ ciˬ ceuˬ-awˇ, nawˬ-ahˇ yaw shehꞈ kʼahˬ sehˇ bi huiˬ-euˬ meh.

¹¹ Nawˬ-euˬ meuˬ meuˬ lahˇ-ahˇ, Aˬbaˬdiˇ meuˬ-ahˇ jawˇ-eu yehˇ deuˬ loꞈ piˇ-awˇ, Gaˬmaˆ meuˬ-ahˇ jawˇ-eu tsawˇ haˬ deuˬ nawˬ-euˬ loꞈ-eu nymˇ goˇ-ahˇ loꞈ-eu meh. Aˬ yawꞈ maꞈ-euˬ dehˬ daˬ duˬ nawˬ-euˬ meuˬ lahˇ-ahˇ ciˬ ceuˬ-awˇ, nawˇ aˇ gʼehˇ muiˬ ni aˬ yawꞈ maꞈ jahˇ-euˬ meh.

¹² “Saˬbeˬ miˇ kʼahˬ nehˬ-ehˇ nawˇ jeˬ gaꞈ taꞈ-awˇ, aˇ poeˬ kʼaˆ-eu nawˬ-euˬ myawˬ gʼawˬ mya jeˬ yuˇ gʼeh-awˇ, pyuˇ, shmˇ, shmˇ ba, za siˬ heu deuˬ nawˇ paˇ geuꞈ-euˬ meh.

¹³ Giˇliˇ meuˬ, Tuˇbaˬlaˇ meuˬ, Meˬshehˆ meuˬ heu deuˬ nehˬ-ehˇ nawˇ jeˬ gaꞈ taˬ-awˇ, nawˬ-euˬ myawˬ gahˬ deuˬ neh, zaˬ kʼaˆ deuˬ hawˇ-eu guiˬ shuiˇ neh jahˇ-euˬ mˇ myawˬ deuˬ nawˇ paˇ doˆ geuꞈ-euˬ meh.

¹⁴ Behˬtawˇgaˬmaˬ meuˬ nehˬ-ehˇ nawˇ gaꞈ taꞈ ka taꞈ-eu laꞈ kʼoeˇ, nawˬ-euˬ myawˬ gahˬ ahˬ ahˇ nehˬ-awˇ, myawˬ tawˬ-eu mahˬ deuˬ, guiˇ deuˆ-eu mahˬ deuˬ hawˇ-eu, mahˬ tahˬ laˆ deuˬ nawˇ zeuˇ geuꞈ-euˬ meh.

¹⁵ Loˇdiˇ meuˬ-ahˇ jawˇ-eu tsawˇ haˬ deuˬ nawˬ nehˬ-ehˇ jeˬ gaꞈ taꞈ-euˬ meh. Laˆ shaˆ lawˇ deh-ahˇ jaˆ-eu miˇ kʼahˬ deuˬ-ahˇ jawˇ-eu tsawˇ haˬ deuˬ ya ma juiˇ hawˇ-eu aˇ poeˬ kʼaˆ-awˇ ziꞈ dui dui-eu saˆ laˆ tiˬ jeˬ ahˬ laˇ-awˇ, nawˬ-euˬ myawˬ gahˬ zeuˇ geuꞈ laˇ-euˬ meh.

¹⁶ Suˇliˆ tsawˇ haˬ deuˬ nawˬ nehˬ-ehˇ jeˬ gaꞈ jeˬ ka gʼeh-awˇ, nawˬ neh jahˇ doˆ-euˬ myawˬ gahˬ deuˬ zeuˇ-euˬ meh. Nawˬ-euˬ myawˬ gahˬ deuˬ paˇ geuꞈ-eu gʼaˇ duˬ, nyoeˇ naˆ naˆ-eu kʼaˬ lo sehˇ, neˇ nyoeˇ nyoeˇ-eu saˬ paˇ, aˇ boꞈ aˇ yehˆ yehˆ taˬ-euˬ saˬ paˇ, muiˬ dui dui-eu shawˇ jehˆ ni gʼeh-eu saˬ paˇ, laˆ shaˆ kʼaˬ lo aˇ yehˆ, neˇ tseuˆ ni gʼeh-eu kʼaˬ lo sehˇ heu deuˬ, aˬ yawꞈ maꞈ yuˇ leꞈ-euˬ meh.

¹⁷ Yuˇdaˆ miˇ kʼahˬ hawˇ-eu Iˇsaˬleˬlaˆ miˇ kʼahˬ-aˬ, cehˇ, byaˬ byaˬ uiˇ, saˬ loˬ tsiˇ hawˇ-eu tsiˇ yaw saw gʼawˬ mya jeˬ yuˇ leꞈ-awˇ, nawˬ-euˬ myawˬ gahˬ deuˬ paˇ geuꞈ le-eu meh.

¹⁸ Nawˇ myawˬ gahˬ gʼawˬ mya jeˬ jahˇ doˆ-awˇ, maˬ ehˇ jiˇ coeˇ ni myawˬ gahˬ jaˆ myaˬ-eu miˇ neh, Daˬmaˬsehˇ meuˬ-ahˇ jawˇ-eu tsawˇ haˬ deuˬ nawˬ nehˬ-ehˇ gaꞈ taꞈ ka taꞈ-awˇ, Heˬlaˬboˬ meuˬ-ahˇ doˆ-eu aˬ gaꞈ dzaˇ uiˇ hawˇ-eu, Saˬhaˬlaˆ meuˬ-ahˇ doˆ-eu yawˇ caꞈ hm hehˇ ahˇ leꞈ-eu meh.

¹⁹ Uˇzaˬlaˇ meuˬ-ahˇ jawˇ-eu Daˬniˇ tsawˇ haˬ hawˇ-eu Heˬlaˬshaˆ tsawˇ haˬ deuˬ, maˇ dui dui-eu shmˇ hawˇ-eu, tsiˇ yaw saw gʼawˬ mya jeˬ hehˇ leꞈ-awˇ, nawˬ-euˬ myawˬ zeuˇ geuꞈ le-eu meh.

²⁰ Deˬdaˬ meuˬ-ahˇ jawˇ-eu tsawˇ haˬ deuˬ-aˬ, dziˬ gʼa saˬ paˇ yuˇ leꞈ-awˇ, nawˬ-euˬ myawˬ gahˬ paˇ geuꞈ le-eu meh.

²¹ Aˬleˬbyaˇ tsawˇ haˬ deuˬ hawˇ-eu, Geˬdaˬ miˇ kʼahˬ-ahˇ uˆ lahˇ-eu sahˬ paˬ sahˬ ma deuˬ, yawˇ hawˇ-eu ciꞈ myehꞈ deuˬ teh leꞈ-awˇ, nawˬ-euˬ myawˬ paˇ geuꞈ le-eu meh.

²² Sheˬba baw gaꞈ deuˬ hawˇ-eu Laˬmaˬ baw gaꞈ deuˬ-aˬ, aˇ poeˬ kʼaˆ-eu kʼaˬ lo sehˇ deuˬ, shuiˇ deuˬ hawˇ-eu muiˬ dui dui-eu yaw saw gʼawˬ mya jeˬ yuˇ leꞈ-awˇ, nawˬ-euˬ myawˬ paˇ geuꞈ le-eu meh.

²³ Haˬlaˬ meuˬ, Gaˬnehˇ meuˬ hawˇ-eu, Eˬdeˬ meuˬ maˬ ehˇ, Sheˬba baw gaꞈ deuˬ maˬ ehˇ, Aˬshuˇliˆ meuˬ hawˇ-eu Ciˇlaˬmaˆ meuˬ maˬ ehˇ, dawˬ tawˆ luꞈ nawˬ nehˬ-ehˇ gaꞈ taꞈ ka taꞈ-eu meh.

²⁴ Aˇ poeˬ kʼaˆ dui dui-eu dm gʼaˬ dm lmˇ deuˬ pyeuꞈ-eu, nyoeˇ neˇ neˇ-eu saˬ paˇ, aˇ boꞈ aˇ yehˆ yehˆ taˬ-euˬ saˬ paˇ, yaw shuiˇ yaw neˇ gʼawˬ mya jeˬ keuˬ keuˬ-ehˇ zaꞈ taꞈ-euˬ gawˬ pu saˬ paˇ hawˇ-eu, yaw muiˬ paˬ-ehˇ yoe taˬ-euˬ aˇ caˆ gʼawˬ mya jeˬ aˬ yawꞈ maꞈ nawˬ-ahˇ ahˬ le-eu meh.

²⁵ Huiˬ dui dui-eu saˇ baoˬ deuˬ aˇ muˇ muˇ muˇ-ehˇ, nawˬ-euˬ myawˬ gahˬ deuˬ tawˬ doˆ gʼeh-eu meh. “Nawˇ-aˬ, myawˬ tawˬ dui dui luꞈ-eu, laˆ shaˆ saˇ baoˬ-ahˇ duˇ-eu meh.

²⁶ Nawˬ-ahˇ heu gʼeh-eu tsawˇ haˬ deuˬ, laˆ shaˆ paw heu-awˇ iˇ luꞈ ngeh, nahˇ ma doˆ kʼehˬ paw-euˬ jaˬ lehˇ, laˆ shaˆ paw nawˬ-ahˇ hehˇ meh.

²⁷ Nawˬ-euˬ jeˬ gaꞈ myawˬ gahˬ dawˬ tawˆ, nawˬ-ahˇ yeuꞈ-eu tsawˇ haˬ dawˬ tawˆ, nawˬ-euˬ laꞈ saˇ maˇ deuˬ dawˬ tawˆ, nawˬ-euˬ baw gaꞈ dawˬ tawˆ hawˇ-eu, nawˬ-ahˇ dziˬ-eu yehˇ deuˬ dawˬ tawˆ, nawˇ laˆ shaˆ gʼahˇ ceh cawˆ-iˇ ngeh, dawˬ tawˆ luꞈ shiˇ byoˆ jiˇ-euˬ meh.

²⁸ Saˇ baoˬ ga nuiꞈ-iˇ-awˇ guˇ-eu, laˆ shaˆ lawˇ deh-ahˇ gaˬ keuˆ meh.

²⁹ “Saˇ baoˬ yawˬ laˇ na luꞈ byehˇ-awˇ, saˇ baoˬ heu-eu tsawˇ haˬ hawˇ-eu, saˇ baoˬ teh-eu deuˬ dawˬ tawˆ luꞈ, dahˇ taˆ cehˆ daˆ kʼoꞈ laˇ-euˬ meh.

³⁰ Uˬ duˬ-ahˇ kʼaˬ lehˇ tawˆ daˆ-awˇ, kʼaˬ lehˇ tsahˬ-ahˇ mahˬ poˆ poˆ-awˇ, nawˬ-euˬ gʼaˇ duˬ aˬ yawꞈ maꞈ neh, tsawˇ ngoeˇ ngoeˇ dui dui nehˬ-eu meh.

³¹ Nawˬ-euˬ gʼaˇ duˬ uˬ jehˆ jehˆ-awˇ, guˬ daˇ pehˇ zeuˇ mehˬ tsoeˬ dm-awˇ, Aˬ yawꞈ maꞈ tsawˇ ngoeˇ ngoeˇ-eu kʼoeˇ nui ma shaˬ zahˬ mˇ dui dui meh.

³² Nawˬ-euˬ gʼaˇ duˬ tsawˇ ngoeˇ ngoeˇ dawˬ, aˬ yawꞈ maꞈ heu loˇ caˇ-eu meh. ‘Iˬ ma laˆ shaˆ-ahˇ byoˆ tsehˆ-euˬ, Duˇlu loꞈ-ehˇ aˬ suˇ jawˇ ta.

³³ Nawˬ-euˬ jeˬ gaꞈ myawˬ gahˬ kʼoeˇ deuˬ, laˆ shaˆ kʼoeˇ dzeˇ heu dzeˇ sha ngeh, miˇ kʼahˬ tsawˇ jeuˬ kʼaˇ loˬ-eu jeˬ, nawˇ sha miˇ hehˇ miˇ nehˬ-euˬ meh. Nawˬ-euˬ myawˬ gahˬ kʼoeˇ deuˬ baˬ da, sahˬ paˬ deuˬ smˇ muiˬ muiˬ-euˬ meh.

³⁴ Nymˬ-mˇ laˆ shaˆ-ahˇ cawˆ-iˇ-awˇ, yaw naꞈ-ahˇ nawˇ ga nuiꞈ-euˬ meh. Nawˬ-euˬ myawˬ gahˬ dawˬ tawˆ hawˇ-eu, nawˬ-euˬ gaˇ mˇ-eu deuˬ dawˬ tawˆ, nawˬ nehˬ-ehˇ shiˇ byoˆ jiˇ-euˬ meh.’

³⁵ Laˆ shaˆ lawˇ taw kʼaˇ jawˇ kʼaˇ deuˬ, nawˬ-euˬ guiˬ lahˬ doeˇ dui dui gaˇ, tsawˬ guˆ-awˇ laˇ baˇ-iˇ-euˬ meh. Yawꞈ maꞈ sahˬ paˬ deuˬ kʼawꞈ guˆ-awˇ, myaˆ pyawˬ tiˬ pawꞈ-iˬ maˬ muiˬ-a.

³⁶ Nawˬ-euˬ guiˬ lahˬ kʼoeˇ naˆ tehꞈ meh. Nawˬ-euˬ ziˇ kʼoeˇ gaˇ jiˇ-euˬ meh. Miˇ tsaˬ kʼoeˇ taˆ baw gaꞈ dawˬ tawˆ, nawˇ loꞈ-ehˇ pyeuꞈ laˇ gaˇ guˆ meh.”