Yeˬsaˬgeˬlaˇ 24 - Akha

Shmˇ kaw kaw-eu oeˬ lahˬ

¹ Nga maꞈ aˬ cawˬ miˇ kʼahˬ-ahˇ bi nyehꞈ gʼeh-awˇ jawˇ luꞈ-eu gʼoeˬ kʼoꞈ tiˬ kʼoꞈ, ba la tseˇ siˬ tiˬ siˬ, tseˇ nah tiˬ nah-ahˇ, Sahˬpaˬ Miˬyehˇ ngaˬ-ahˇ heu loꞈ-ehˇ ehˇ-eu meh.

² “Tsawˇ haˬ zaˬ-oˇ, aˇ nah heu nah boꞈ ahˇ taˬ-awˬ. Aˬ jeˬ miˇ neh ehˇ naˇ, iˬ nah neh dahˬ beh-awˇ, Baˬbuˇloˬ sahˬ pa Yeˬluˇsaˬlehˬ meuˬ-ahˇ loꞈ jawˬ-euˬ meh.

³ Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ pyeuꞈ-eu ngaˇ, yaw jeˬ ma jeˬ heu loꞈ-ehˇ ehˇ-eu meh lehˇ, ngaˬ-ahˇ puiˬ-eu tsawˇ haˬ kʼoeˇ deuˬ-ahˇ ehˇ nehˬ-awˬ. Heu-aˬ, aˬ yawꞈ maꞈ gʼaˇ duˬ ngaˬ-euˬ dawˬ ma. Tsawˬ bu-ahˇ oeˬ lahˬ ciˬ dahˇ-awˇ, iˇ cuꞈ shehˆ ahˇ-awˇ bi dahˇ-awˬ.

⁴ Muiˬ dui dui-eu shaˬ jiˇ pyeuꞈ-eu, laꞈ byaˆ hawˇ-eu shaˬ pyaˬ shaˬ jiˇ, oeˬ lahˬ-ahˇ jehˆ ahˇ-awˇ puꞈ-awˇ, shaˬ yoeˬ yoeˬ nahˬ deuˬ dawˆ puꞈ-awˬ.

⁵ Muiˬ-eu yawˇ shaˬ jiˇ jehˆ puꞈ-awˇ, dawˬ dah miˬ dzaˬ baw doꞈ nehˬ-awˬ. Oeˬ lahˬ kʼoeˇ iˇ buiˇ buiˇ laˇ-awˇ, shaˬ yoeˬ kʼoeˇ deuˬ puꞈ nahˬ luꞈ-uˇ.”

⁶ Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ heu loꞈ-ehˇ ehˇ-eu meh. “Tsawˇ haˬ-ahˇ sehꞈ-euˬ meuˬ kʼoeˇ taˆ noeˬ shaˬ noeˬ zahˬ-eu jeˬ keuˆ le luꞈ-uˇ. Meuˬ kʼoeˇ-aˬ, tiˬ jawˇ-iˬ maˬ joˆ shawˇ-ehˇ shmˇ kaw kaw leˇ taˬ-euˬ oeˬ lahˬ-ahˇ duˇ-eu meh. Shaˬ jiˇ tiˬ jehꞈ saˇ-iˬ tiˬ jehꞈ tsi doˆ jiˇ-awˇ, tiˬ jehꞈ iˬ maˬ dzeˇ-a.

⁷ Meuˬ laꞈ kʼoeˇ tsawˇ haˬ sehꞈ-awˇ, nyiꞈ-iˇ byoˆ-iˇ nya-eu miˇ tsaˬ kʼaˬ lehˇ kʼoeˇ taˆ shiˬ maˬ yoeˇ kʼaˇ-ehˇ, kʼaˬ lo uˬ du yoeˇ daˆ taˬ-euˬ meh.

⁸ Nui ma pehˇ laˇ-awˇ laꞈ poˆ poˆ kʼoꞈ nehˬ-eu gʼaˇ duˬ, maˬ laˆ zaꞈ nya ni mawˇ laˇ-eu tsahˇ-ahˇ, shiˬ kʼoeˇ ngaˇ bi yoeˇ kʼaˇ-euˬ ma.”

⁹ Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ heu loꞈ-ehˇ ehˇ luꞈ-eu meh. “Tsawˇ haˬ sehꞈ-eu meuˬ kʼoeˇ taˆ noeˬ shaˬ noeˬ zahˬ-eu jeˬ keuˆ le tehꞈ-a. Ngaˇ miˬ dzaˬ geu daˆ nehˬ ma.

¹⁰ Miˬ dzaˬ gahˬ tehˬ-awˇ, miˬ dzaˬ ciˆ doꞈ nehˬ ma. Shaˬ jiˇ puꞈ jaꞈ-awˇ, shmˇ kaw puꞈ shawˇ-awˇ, shaˬ yoeˬ puiˆ kuˇ jiˇ tehꞈ-a.

¹¹ Kʼoeˇ naˇ, oeˬ lahˬ-ahˇ miˬ jiˆ kʼoeˇ taˆ ciˬ daˆ-awˇ, neˇ tseuˆ ni bi puiˆ neˇ ma. Shmˇ kaw kʼoeˇ deuˬ puiˆ dzaˬ jiˇ ngeh, oeˬ lahˬ kʼoeˇ shawˇ laˇ tehꞈ-a.

¹² Kʼoeˇ naˆ ni jahˇ-euˬ kʼawꞈ yawꞈ ngehꞈ meh. Dzaˬ naꞈ taˬ-eu shmˇ kawˬ maˬ puiˆ shawˇ jiˇ nya-a.

¹³ Yeˬluˇsaˬlehˬ-oˇ, nawˬ neh dehꞈ doeˇ-euˬ jeˬ nawˬ-ahˇ laˆ jawꞈ-euˬ meh. Ngaˇ aˇ naˆ ni leh jeh kʼawꞈ, maˬ laˆ shawˇ jiˇ nya-a. Ngaˇ nui ma pehˇ-eu jeˬ-ahˇ tiˬ li maˬ ya daˬ kʼoeˇ keuˆ ni, nawˇ maˬ shawˇ laˇ luꞈ-a.

¹⁴ Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ pyeuꞈ-eu ngaˇ heu loꞈ-ehˇ ehˇ-eu ma. Ngaˇ nawˬ-ahˇ ya jahˇ nehˬ-eu aˇ yamˬ keuˆ laˇ-euˬ meh. Nawˬ-euˬ iˬ baˇ-ahˇ ngaˇ maˬ ngehˇ-ehˇ, nawˬ-ahˇ ngaˇ gʼawˬ shaˬ maˬ gaˬ nehˬ. Nawˬ neh kʼaˇ mˇ-euˬ loꞈ-ehˇ nawˇ ya daˬ tehꞈ-a” lehˇ, Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ ehˇ-eu meh.

Yeˬsaˬgeˬlaˇ-euˬ miˬ zaˬ shiˇ-euˬ

¹⁵ Sahˬpaˬ Miˬyehˇ ngaˬ-ahˇ heu loꞈ-ehˇ ehˇ-eu meh.

¹⁶ “Tsawˇ haˬ zaˬ-oˇ, nawˇ gaˬ dui dui-eu gʼaˬ-ahˇ ngaˇ tiˬ poˆ tehꞈ-ehˇ yuˇ dzeh ma. Nawˇ maˬ ya noeˬ shaˬ, maˬ ya ngoeˇ-ehˇ, myaˆ biˇ kʼawꞈ maˬ ya bi doˆ le-a.

¹⁷ Nawˇ ngoeˇ-eu teˇ saˇ ngaˬ-ahˇ taˬ bi gaˬ laˇ. Nawˇ shaˬ zahˬ mˇ-eu bi siˬ bi mawˇ-eu gʼaˇ duˬ, uˬ jehˆ jehˆ-awˇ sehˬ nawˆ maˬ nawˬ-ehˇ taˬ cah haw. Nawˬ-euˬ myaˆ pyawˬ taˬ dehˬ kaˬ. Tsawˇ ngoeˇ ngoeˇ-eu deuˬ dzaˬ-eu dzaˇ taˬ dzaˬ.”

¹⁸ Uˬ shawˬ paw ngaˇ aˬ cawˬ-ahˇ dawˬ ja ja cawˬ luꞈ-eu ma. Kʼoeˇ ngeh miˇ ngaˬ-euˬ nymˇ dahˬ shiˇ-awˇ, yawˬ nah yawˬ-aˬ, Sahˬpaˬ Miˬyehˇ neh ehˇ nehˬ laꞈ-euˬ loꞈ-ehˇ ngaˇ jahˇ-euˬ ma.

¹⁹ “Aˬ jeˬ miˇ neh teu loꞈ-ehˇ jahˇ te” lehˇ, aˬ cawˬ ngaˬ-ahˇ naˇ haˬ-eu meh.

²⁰ Kʼoeˇ ngeh, aˬ yawꞈ maꞈ-ahˇ ngaˇ heu loꞈ-ehˇ ehˇ nehˬ-euˬ ma. “Sahˬpaˬ Miˬyehˇ ngaˬ-ahˇ heu loꞈ-ehˇ ehˇ-eu meh.

²¹ Naw maꞈ Iˇsaˬleˬlaˆ tsawˇ haˬ deuˬ-ahˇ heu loꞈ-ehˇ ehˇ nehˬ-awˬ lehˇ, aˬ yawꞈ ngaˬ-ahˇ ehˇ-eu meh. Naw maꞈ Uˬ duˬ tahˬ nymˇ nymˇ ma-ahˇ nui ma huiˬ-eu meh. Naw maꞈ kʼoeˇ gaˇ haw-awˇ nui kʼahˇ shiˇ-eu laꞈ kʼoeˇ kʼoeˇ gaˇ le le-ehˇ jawˇ-eu meh. Ehˇ kʼawꞈ, Uˬ duˬ tahˬ nymˇ nymˇ ma kʼoeˇ-ahˇ ngaˇ laˆ jawꞈ nehˬ-eu lehˇ gʼeh-eu ma. Yeˬluˇsaˬlehˬ meuˬ-ahˇ jawˇ yaꞈ-euˬ naw maꞈ-euˬ aˬ buˇ aˬ li deuˬ, mi cehˇ kʼehˬ-ahˇ ya shiˇ tehꞈ-a.

²² Kʼoeˇ ngeh, nymˬ-mˇ kʼaˇ jahˇ luꞈ-eu loꞈ-ehˇ naw maꞈ jahˇ tehꞈ-a. Naw maꞈ myaˆ pyawˬ maˬ dehˬ kaˬ ni, tsawˇ ngoeˇ ngoeˇ-eu deuˬ dzaˬ-eu dzaˇ maˬ dzaˬ ni jawˇ tehꞈ-a.

²³ Naw maꞈ uˬ jehˆ maˬ jehˆ dzeh-ehˇ, sehˬ nawˆ lehˆ-awˇ maˬ cah-eu uˬ taꞈ, tsawˇ ngoeˇ maˬ ngoeˇ ni jawˇ tehꞈ-a. Naw maꞈ-euˬ iˬ baˇ baˬ da neh naw maꞈ liˬ-iˇ koˆ-iˇ-awˇ, tiˬ gʼaˬ tiˇ gʼaˬ mahˇ cawˬ mahˇ cawˬ-ehˇ ya jawˇ tehꞈ-a.

²⁴ Naw maꞈ gʼaˇ duˬ bi siˬ bi mawˇ-eu jeˬ pyeuꞈ-eu ma. Ngaˬ neh kʼaˇ jahˇ-euˬ loꞈ-ehˇ naw maꞈ ya jahˇ tehꞈ-a. Kʼoeˇ loꞈ-ehˇ pyeuꞈ laˇ ngeh jawˇ, aˬ yawꞈ Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ pyeuꞈ-eu gaˇ kawˆ naw maꞈ ya siˬ duˬ tehꞈ-a lehˇ, Sahˬpaˬ Miˬyehˇ ehˇ-eu meh.”

²⁵ Sahˬpaˬ Miˬyehˇ ehˇ-eu, “Tsawˇ haˬ zaˬ-oˇ, nymˬ-mˇ poˆ jawˇ-aˬ, aˬ yawꞈ maꞈ nui ma huiˬ duˬ, laˬ kʼaˬ cehˇ duˬ hawˇ-eu, aˬ yawꞈ maꞈ tiˬ kʼehˬ maˬ taˬ ni ciˬ pyawˇ haw-awˇ dawˬ deh gʼa leˇ-eu jawˇ duˬ pyeuꞈ-eu Uˬ duˬ tahˬ nymˇ nymˇ ma kʼoeˇ ngaˇ yuˇ dzeh ma. Aˬ yawꞈ maꞈ-euˬ aˬ buˇ aˬ li deuˬ, ngaˇ sheuˬ byoˆ jiˇ ma.

²⁶ Ngaˇ kʼoeˇ loꞈ-ehˇ jahˇ ngeh neh, luˬ-iˇ seˇ-iˇ-eu jeˬ-ahˇ cehˆ dzeuˇ-euˬ tsawˇ haˬ tiˬ gʼaˬ na, gaˇ kawˆ kʼoeˇ naw maꞈ jawˇ gaˇ cehˆ gaˬ laˇ tehꞈ-a.

²⁷ Kʼoeˇ ngeh nah, naw maꞈ jawˇ gaˇ maˬ jaˆ-ehˇ pyeuꞈ-iˇ-euˬ dawˬ ngehˬ-eu baoˬ naw maꞈ paˇ za kʼoꞈ-awˇ, aˬ yawꞈ nehˬ-ehˇ dawˬ ya ngehˬ cawˬ tehꞈ-a. Kʼoeˇ loꞈ-ehˇ gʼeh-eu laꞈ kʼoeˇ, naw maꞈ aˬ cawˬ gʼaˇ duˬ bi siˬ bi mawˇ-eu jeˬ pyeuꞈ-awˇ, ngaˇ Sahˬpaˬ Miˬyehˇ pyeuꞈ-eu gaˇ kawˆ aˬ cawˬ ya siˬ tehꞈ-a.