Yeˬsaˬgeˬlaˇ 23 - Akha

Gʼawˇ mawˇ ahˬ-eu aˬ buˇ nyiˬ mehˇ nmˇ

¹ Sahˬpaˬ Miˬyehˇ ngaˬ-ahˇ heu loꞈ-ehˇ ehˇ-eu meh.

² “Tsawˇ haˬ zaˬ-oˇ, aˇ hu aˬ buˇ nyiˬ mehˇ nmˇ jawˇ-euˬ meh.

³ Aˬ yawꞈ nyaꞈ zaˬ guˬ guˬ ngeh, miˬ shuiꞈ maˬ shuiꞈ ni, meh maˬ laˇ geuꞈ-euˬ meh.

⁴ Aˬ yuiꞈ gʼaˬ Oˬhoˬlaˬ lehˇ myahˇ-awˇ, aˬ nyiˇ gʼaˬ Oˬhoˬliˇbaˬ lehˇ myahˇ-euˬ meh. Aˬ yawꞈ nyaꞈ nyiˬ mehˇ nmˇ luꞈ-ahˇ ngaˇ sheuˬ-awˇ, aˬ buˇ aˬ li jawˇ le-euˬ ma. Oˬhoˬlaˬ gʼaˬ Saˬmaˬliˆ meuˬ pyeuꞈ-awˇ Oˬhoˬliˇbaˬ-aˬ, Yeˬluˇsaˬlehˬ meuˬ meh.

⁵ Oˬhoˬlaˬ gʼaˬ ngaˬ nehˬ-ehˇ jawˇ luꞈ ngeh neh meh maˬ laˇ geuꞈ-awˇ, Aˬshuˇliˆ tsawˇ haˬ deuˬ nehˬ-ehˇ kʼaˬ miˬ sheu-euˬ meh.

⁶ Aˬshuˇliˆ tsawˇ haˬ kʼoeˇ deuˬ-aˬ, neˇ naˆ naˆ-eu mehˬ tsoeˬ dm luꞈ-eu yehˇ deuˬ, yaw huiˬ yaw mahˇ deuˬ hawˇ-eu, sahˬ paˬ sahˬ ma geuꞈ-eu deuˬ meh. Aˬ yawꞈ maꞈ dawˬ tawˆ luꞈ aˇ gʼehˇ muiˬ-eu mahˬ dziˬ-eu yehˇ deuˬ meh.

⁷ Aˬ yawꞈ-aˬ, Aˬshuˇliˆ tsawˇ jeuˬ yaw huiˬ yaw mahˇ dawˬ tawˆ luꞈ gʼaˇ duˬ meh maˬ laˇ pyeuꞈ-awˇ, aˬ yawꞈ kʼaˬ miˬ sheu gaˇ gaˬ-eu miˇ neh, Aˬshuˇliˆ tahˬ pahˬ aˬ ma mawˇ kawˇ deuˬ-ahˇ uˬ duˬ tahˬ-eu laꞈ kʼoeˇ, yawˬ haˇ yawˬ ha maˬ shawˇ-eu tsawˇ haˬ dehꞈ pyeuꞈ-euˬ meh.

⁸ Aˬ yawꞈ miˬ daꞈ daꞈ ngeh Iˇjiˇtuˆ miˇ kʼahˬ laꞈ kʼoeˇ meh maˬ laˇ geuꞈ-euˬ loꞈ-ehˇ, iˬ nah keuˆ ni maˬ byehˇ ni geuꞈ luꞈ-eu meh. Aˬ yawꞈ aˬ buˇ zaˬ guˬ pyeuꞈ ngeh neh, kʼaˬ dzeˇ zaˬ deuˬ aˬ yawꞈ nehˬ-ehˇ yuꞈ-awˇ meh maˬ laˇ bi geuꞈ-euˬ meh.

⁹ Kʼoeˇ miˇ neh, aˬ yawꞈ mawꞈ dui dui leˇ-eu Aˬshuˇliˆ tsawˇ haˬ deuˬ-euˬ laꞈ-ahˇ aˬ yawꞈ-ahˇ ngaˇ a ahˇ nehˬ-euˬ ma.

¹⁰ Aˬ yawꞈ maꞈ aˬ yawꞈ-ahˇ mehˬ tsoeˬ neˇ myawˆ ni lehˆ dzeh nehˬ-awˇ, aˬ yawꞈ-euˬ aˬ buˇ aˬ li deuˬ-ahˇ nyehꞈ-awˇ, aˬ yawꞈ-ahˇ mi cehˇ neh sehꞈ-euˬ meh. Aˬ yawꞈ guiˬ lahˬ doeˇ-eu gaˇ kawˆ, zaˬ miˬ zaˬ deuˬ yawˬ gaˇ na luꞈ ja byah-euˬ meh.

¹¹ “Aˬ nyiˇ gʼaˬ pyeuꞈ-eu Oˬhoˬliˇbaˬ-aˬ, aˬ yawꞈ-euˬ aˬ yuiꞈ kʼoeˇ loꞈ-ehˇ gʼeh-eu mawˇ-euˬ kʼawꞈ, kʼoeˇ naˆ maˬ tseˇ doeˇ dzehˬ-eu meh maˬ laˇ paˇ geuꞈ-euˬ meh.

¹² Aˬ yawꞈ kʼawꞈ muiˬ dui dui-eu yehˇ-euˬ mehˬ tsoeˬ dm luꞈ-eu Aˬshuˇliˆ tsawˇ haˬ yaw huiˬ yaw mahˇ deuˬ, sahˬ paˬ sahˬma deuˬ hawˇ-eu, guiˇ maꞈ kʼoeˇ taˆ aˬ yuiꞈ geuꞈ-eu deuˬ nehˬ-ehˇ kʼaˬ miˬ sheu-euˬ meh. Aˬshuˇliˆ tsawˇ haˬ kʼoeˇ deuˬ dawˬ tawˆ luꞈ aˇ gʼehˇ muiˬ-eu zaˬ guˬ tehꞈ meh.

¹³ Aˬ yawꞈ dehꞈ doeˇ dui dui-awˇ, nyiˬ mehˇ nmˇ luꞈ aˬ yawꞈ tiˬ gʼaˬ-ahˇ duˇ gaˇ ngaˇ ya mawˇ-euˬ ma.

¹⁴ Aˬ yawꞈ meh maˬ laˇ geuꞈ-eu ngehˬ jawˇ ngehˬ naꞈ-eu meh. Kʼaˇ pyawˇ-ahˇ mehˬ tsoeˬ neˇ tseuˆ ni dm taˬ-eu Baˬbuˇloˬ tsawˇ haˬ aˇ baˇ aˬ yawꞈ mawˇ-euˬ meh.

¹⁵ Tsawˇ haˬ kʼoeˇ deuˬ joꞈ paꞈ paꞈ luꞈ-awˇ, uˬ dzahˬ yoe loe ya la-ehˇ jahˬ taˬ-euˬ meh. Aˬ yawꞈ maꞈ dawˬ tawˆ luꞈ Baˬbuˇloˬ miˇ kʼahˬ-ahˇ jawˇ-eu yaw huiˬ yaw mahˇ deuˬ meh.

¹⁶ Aˬ yawꞈ maꞈ-euˬ aˇ baˇ kʼoeˇ deuˬ-ahˇ aˬ yawꞈ ya mawˇ ngeh, mawꞈ dui dui leˇ-awˇ, Baˬbuˇloˬ miˇ kʼahˬ-ahˇ aˬ yawꞈ maꞈ jawˇ gaˇ tsawˇ kʼaˬ pyehˬ gʼeh-euˬ meh.

¹⁷ Baˬbuˇloˬ tsawˇ haˬ deuˬ aˬ yawꞈ nehˬ-ehˇ kʼaˬ miˬ sheu laˇ-euˬ meh. Aˬ yawꞈ maꞈ aˬ yawꞈ-ahˇ aˇ dzehˬ-ehˇ laˆ jawꞈ nehˬ-euˬ miˇ neh, aˇ saˬ saˬ laˇ ngeh, aˬ yawꞈ maꞈ-ahˇ aˬ yawꞈ nui daˆ daˆ-euˬ meh.

¹⁸ Aˬ yawꞈ meh maˬ laˇ pyeuꞈ-eu gaˇ kawˆ tsawˇ haˬ dawˬ tawˆ luꞈ-ahˇ bi siˬ jiˇ-euˬ meh. Aˬ yuiꞈ gʼaˬ-ahˇ nui daˆ daˆ-euˬ loꞈ-ehˇ, aˬ yawꞈ-ahˇ kʼawꞈ ngaˇ nui daˆ daˆ laˇ-euˬ ma.

¹⁹ Aˬ yawꞈ yaw nyiˇ gʼeh ngeh neh Iˇjiˇtuˆ miˇ kʼahˬ-ahˇ meh maˬ laˇ geuꞈ laꞈ-euˬ loꞈ-ehˇ, meh maˬ laˇ geuꞈ-eu tiˬ jawˇ saˇ-iˬ tiˬ jawˇ kʼaˬ dzehˬ laˇ-euˬ meh.

²⁰ Mahˬ liˬ dzeuˆ loꞈ-ehˇ kʼaˬ dzeˇ zaˬ-euˬ keu ka huiˬ-awˇ, mahˬ mahˬ paˬ loꞈ-ehˇ zaˬ miˬ zaˬ-ahˇ nui ma jaˆ-eu kʼaˬ dzeˇ zaˬ deuˬ-ahˇ aˬ yawꞈ mawꞈ dui dui-eu meh.

²¹ Oˬhoˬliˇbaˬ-oˇ, nawˇ yaw nyiˇ gʼeh ngeh Iˇjiˇtuˆ miˇ kʼahˬ laꞈ kʼoeˇ kʼaˬ dzeˇ zaˬ deuˬ nawˬ-euˬ kʼahˬ-ahˇ nyehꞈ-awˇ, dawˬ kmˬ-ahˇ beuˬ-eu laꞈ kʼoeˇ, maˬ shawˇ-eu miˬ daꞈ pyeuꞈ-iˇ-euˬ loꞈ-ehˇ, iˬ nah keuˆ ni kʼoeˇ loꞈ-ehˇ dehꞈ jawꞈ mawꞈ-eu nui ma ahˇ-eu meh.

Aˬ nyiˇ gʼaˬ-ahˇ Miˬyehˇ yaˇ kʼaˬ daˇ-eu

²² “Oˬhoˬliˇbaˬ-oˇ, Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ pyeuꞈ-eu ngaˇ, nymˬ-mˇ nawˬ-ahˇ heu loꞈ-ehˇ ehˇ-eu ma. Nawˬ-euˬ zaˬ kʼaˬ kʼoeˇ deuˬ-ahˇ nawˇ nui ma byuˇ laˇ taˬ-euˬ meh. Ehˇ kʼawꞈ, aˬ yawꞈ maꞈ nawˬ-ahˇ nui ma pehˇ-awˇ, nawˬ-euˬ dawˬ peh ga jawˬ le ni ngaˇ jahˇ ma.

²³ Baˬbuˇloˬ tsawˇ haˬ hawˇ-eu Kaˬlaˬdehˇ tsawˇ haˬ dawˬ tawˆ luꞈ maˬ ehˇ, Peˬkawˇ meuˬ, Shoˇaˬ meuˬ hawˇ-eu, Koˬaˬ meuˬ-ahˇ jawˇ-eu tsawˇ haˬ deuˬ maˬ ehˇ, Aˬshuˇliˆ tsawˇ haˬ dawˬ tawˆ luꞈ maˬ ehˇ, ngaˇ sheuˬ uiˬ leꞈ ma. Aˇ gʼehˇ muiˬ-eu zaˬ guˬ pyeuꞈ-eu sahˬ paˬ sahˬ ma deuˬ hawˇ-eu, mahˬ dziˬ-eu guiˇ maꞈ deuˬ kʼoeˇ taˆ uˆ lahˇ-eu aˬ yuiꞈ aˬ tsu deuˬ hawˇ-eu yaw huiˬ yaw mahˇ dawˬ tawˆ luꞈ ngaˇ kuˇ uiˬ ma.

²⁴ Mahˬ laˆ lawˬ teh-awˇ, guiˇ deuˆ-eu keu ka tiˬ byah ni tawˬ luꞈ-eu guiˇ maꞈ maꞈ ma sheuˬ-awˇ, laꞈ taˆ paw kʼahˬ-ahˇ neh aˬ yawꞈ maꞈ oe ka-awˇ, nawˬ-ahˇ guiˇ deuˆ le tehꞈ-a. Dehˬ daˬ duˬ baꞈ-awˇ shmˇ uˬ kʼoˆ kʼoˆ kaˬ-eu laꞈ kʼoeˇ, aˬ yawꞈ maꞈ nawˬ-ahˇ jawˬ lahˇ tehꞈ-a. Ngaˇ nawˬ-ahˇ aˬ yawꞈ maꞈ-euˬ aˬ laꞈ laꞈ kʼoeˇ a nehˬ-awˇ, aˬ yawꞈ maꞈ-euˬ zahˇ sahˇ kʼoꞈ jaˆ-eu loꞈ-ehˇ nawˬ-ahˇ yaˇ kʼaˬ daˇ tehꞈ-a.

²⁵ Ngaˇ nawˬ-ahˇ nui ma pehˇ-eu miˇ neh, aˬ yawꞈ maꞈ neh nawˬ-ahˇ kʼaˇ jahˇ mawꞈ-eu bi jahˇ ma. Aˬ yawꞈ maꞈ nawˬ-euˬ naˬ paꞈ hawˇ-eu naˇ mehˇ yehˬ tsehˆ-awˇ, nawˬ-euˬ aˬ buˇ aˬ li deuˬ-ahˇ sehꞈ tehꞈ-a. Nawˬ-euˬ laꞈ-ahˇ neh aˬ buˇ aˬ li kʼoeˇ deuˬ aˬ yawꞈ maꞈ tsahˇ doˆ-awˇ, yaw dehꞈ-ehˇ miˬ dzaˬ keuˬ sehꞈ tehꞈ-a.

²⁶ Aˬ yawꞈ maꞈ nawˬ-euˬ mehˬ tsoeˬ nyehꞈ lehˆ-awˇ, nawˇ geuꞈ luꞈ-eu myawˬ guˇ deuˬ lehˆ doˆ geuꞈ tehꞈ-a.

²⁷ Kʼaˬ miˬ sheu mawꞈ-eu nawˬ-euˬ nui ma hawˇ-eu, nawˇ Iˇjiˇtuˆ miˇ kʼahˬ-ahˇ jawˇ ngeh neh mˇ daˆ shaˇ daˆ laꞈ-euˬ meh maˬ laˇ geuꞈ-eu jeˬ-ahˇ, ngaˇ aˇ saˬ bi saˬ ma. tahˬ pahˬ aˬ ma mawˇ kawˇ -ahˇ nawˇ maˬ paˇ haw nahˇ-ehˇ, Iˇjiˇtuˆ miˇ kʼahˬ gaˇ kawˆ maˬ paˇ shaˇ noeˬ mawꞈ ni pyeuꞈ-iˇ tehꞈ-a.”

²⁸ Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ heu loꞈ-ehˇ ehˇ-eu meh. “Nawˇ bye-awˇ nui daˆ daˆ-eu tsawˇ haˬ deuˬ-euˬ aˬ laꞈ laꞈ kʼoeˇ, nawˬ-ahˇ ngaˇ a ahˇ nehˬ ma.

²⁹ Aˬ yawꞈ maꞈ nawˬ-ahˇ bye-eu miˇ neh, nawˇ meh maˬ laˇ geuꞈ-awˇ, mehˬ tsoeˬ neˇ myawˆ ni lehˆ dzeh-eu laꞈ kʼoeˇ kʼaˇ mˇ kʼaˇ shaˇ za taˬ-euˬ yawˬ jeˬ na luꞈ, aˬ yawꞈ maꞈ yuˇ geuꞈ jiˇ tehꞈ-a. Nawˇ kʼaˬ miˬ sheu gaˇ gaˬ-awˇ, meh maˬ laˇ geuꞈ-euˬ-aˬ,

³⁰ kʼoeˇ loꞈ-ehˇ gʼeh-eu jeˬ keuˆ le ni mˇ-euˬ gaˇ duˇ meh. Miˇ kʼahˬ tsawˇ jeuˬ deuˬ gʼaˇ duˬ nawˇ meh maˬ laˇ geuꞈ-awˇ, aˬ yawꞈ maꞈ-euˬ tahˬ pahˬ aˬ ma mawˇ kawˇ neh yawˬ haˇ yawˬ ha laˆ jawꞈ-euˬ meh.

³¹ Nawˬ-euˬ aˬ yuiꞈ-euˬ pehˬ zaˇ-ahˇ nawˇ caw teh-eu miˇ neh, aˬ yawꞈ-ahˇ bi dawˇ-euˬ kʼehˬ-eu kʼaˆ-eu kʼmˬ maˬ kʼoeˇ, nawˬ-ahˇ kʼawꞈ ngaˇ bi dawˇ ma.”

³² Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ heu loꞈ-ehˇ ehˇ-eu meh. “Nawˬ-euˬ aˬ yuiꞈ neh dawˇ dzeuˇ-euˬ, huiˬ-eu naꞈ-eu kʼmˬ maˬ kʼoeˇ kʼmˬ, nawˇ ciˬ-awˇ paˇ dawˇ poˆ tehꞈ-a. Kʼmˬ maˬ tiˬ byah dahˬ-eu miˇ neh, aˬ cawˬ nawˬ-ahˇ naˬ gʼa tehꞈ-a.

³³ Aˬ yuiꞈ Saˬmaˬliˆ-euˬ kʼmˬ maˬ, guˆ gaˆ hawˇ-eu yaw cawˆ dahˬ-eu nawˇ dawˇ yehꞈ-awˇ noeˬ shaˬ tehꞈ-a.

³⁴ Kʼmˬ maˬ kʼoeˇ nawˇ shuˆ gui leꞈ-awˇ, kʼmˬ maˬ paˆ-iˇ pyehˬ-iˇ-euˬ kʼoeˇ, nawˬ-euˬ kʼahˬ dzm tsawˆ paˆ meh lehˇ, Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ pyeuꞈ-eu ngaˇ ehˇ-eu ma.”

³⁵ Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ heu loꞈ-ehˇ ehˇ-eu meh. “Nawˇ ngaˬ-ahˇ ngehˇ-awˇ naˇ kʼah ciˬ pyawˇ-euˬ miˇ neh, nawˬ neh kʼaˬ miˬ sheu gaˇ gaˬ-awˇ meh maˬ laˇ geuꞈ-euˬ aˇ poeˬ nawˇ ya shaˬ duˬ tehꞈ-a.

Aˬ nyaꞈ nmˇ-ahˇ Miˬyehˇ yaˇ kʼaˬ daˇ-euˬ

³⁶ Sahˬpaˬ Miˬyehˇ ngaˬ-ahˇ heu loꞈ-ehˇ ehˇ-eu meh. “Tsawˇ haˬ zaˬ-oˇ, Oˬhoˬlaˬ hawˇ-eu Oˬhoˬliˇbaˬ aˬ nyaꞈ-ahˇ yaˇ kʼaˬ daˇ-eu gʼaˇ duˬ nawˇ lehˬ hmˬ maˬ loˇ. Aˬ yawꞈ nyaꞈ neh mˇ-euˬ jawꞈ dui dui-eu jeˬ gʼaˇ duˬ, aˬ yawꞈ nyaꞈ-ahˇ yaˇ kʼaˬ daˇ-awˬ.

³⁷ Aˬ cawˬ-euˬ miˬ zaˬ yo zaˬ-ahˇ bahˬ-eu jeˬ hawˇ-eu, tsawˇ haˬ-ahˇ sehꞈ-eu jeˬ aˬ yawꞈ nyaꞈ mˇ-euˬ meh. Tahˬ pahˬ aˬ ma mawˇ kawˇ nehˬ-ehˇ bahˬ-awˇ, aˬ yawꞈ nyaꞈ o neh dehꞈ le-euˬ ngaˬ-euˬ aˬ li deuˬ-ahˇ sehꞈ-euˬ meh.

³⁸ Kʼoeˇ naˆ tehꞈ maˬ ngeuˇ-a siˬ. Ngaˬ-euˬ Uˬ duˬ tahˬ nymˇ nymˇ ma-ahˇ laˆ jawꞈ-awˇ, ngaˬ neh taˬ taˬ-euˬ jawˇ nah-ahˇ maˬ lah maˬ daw-a.

³⁹ Aˬ yawꞈ nyaꞈ ngaˬ-euˬ zaˬ deuˬ-ahˇ sehꞈ-awˇ tahˬ pahˬ aˬ ma mawˇ kawˇ-ahˇ lawˇ nehˬ ngeh nah, ngaˬ-euˬ Uˬ duˬ tahˬ nymˇ nymˇ ma-ahˇ aˬ yawꞈ nyaꞈ laˇ-awˇ paˇ laˆ jawꞈ laˇ-euˬ meh.

⁴⁰ “Gaˇ mahˇ kaˬ gaˇ jawˇ-eu tsawˇ haˬ deuˬ jawˇ gaˇ aˬ yawꞈ nyaꞈ tsawˇ haˬ pyehˬ gʼeh-awˇ bi kuˇ laˬ-iˇ-eu meh. Kʼoeˇ naˇ, aˬ yawꞈ nyaꞈ iˇ cuꞈ dzuiꞈ buˇ-awˇ, myaˆ nuiˆ lehꞈ muiˬ-awˇ, myawˬ guˇ geuꞈ-eu meh.

⁴¹ Muiˬ dui dui-eu ja ciˬ kʼoeˇ taˆ aˬ yawꞈ nyaꞈ nuiˇ-awˇ, aˬ yawꞈ nyaꞈ-euˬ mehˬ shi hawˬ jeh ciˬ taˬ-awˇ, ngaˬ neh biꞈ taˬ-euˬ tsiˇ yaw saw jeˬ hawˇ-eu saˬ loˬ tsiˇ ciˬ daˆ-awˇ yaw muiˬ jeˬ gʼawˬ mya ni ciˬ daˆ taˬ-euˬ meh.

⁴² Kʼaˇ shuiꞈ deh ga miˇ kʼahˬ paw neh oe-euˬ, kʼaˇ dehꞈ mawꞈ-eu dehꞈ-eu tsawˇ haˬ deuˬ kʼoeˇ gaˇ byawˬ gʼa luꞈ-eu teˇ saˇ, lawꞈ lawꞈ-ehˇ jaˆ-eu meh. Zaˬ miˬ zaˬ kʼoeˇ nyiˬ mehˇ nmˇ-ahˇ aˬ yawꞈ maꞈ laꞈ duꞈ nyehꞈ duꞈ nehˬ-awˇ, uˬ duˬ-ahˇ haw muiˬ dui dui-eu shuiˇ uˬ kʼoˆ bi kʼoˆ-euˬ meh.

⁴³ Aˬ cawˬ-euˬ miˬ zaˬ yo zaˬ-ahˇ bahˬ dui dui-euˬ zaˬ miˬ zaˬ-ahˇ aˬ yawꞈ maꞈ meh maˬ laˇ loꞈ-ehˇ byawˬ gʼa-eu ngaˇ lehˇ, ngaˬ-euˬ nui ma laꞈ kʼoeˇ ngaˇ ehˇ-euˬ ma.

⁴⁴ Meh maˬ laˇ kʼoeˇ nyiˬ gʼaˬ jawˇ gaˇ aˬ yawꞈ maꞈ tiˬ kʼehˬ maˬ taˬ ni iˇ poˆ-eu meh. Cawˆ dui dui-eu zaˬ miˬ zaˬ pyeuꞈ-eu Oˬhoˬlaˬ hawˇ-eu Oˬhoˬliˇbaˬ aˬ nyaꞈ jawˇ gaˇ, aˬ yawꞈ maꞈ paˇ iˇ poˆ-eu meh.

⁴⁵ Yaw tsaˬ yaw dawˇ tsawˇ haˬ deuˬ-aˬ, aˬ yawꞈ maꞈ aˬ cawˬ miˬ zaˬ-ahˇ bahˬ-awˇ, tsawˇ haˬ-ahˇ sehꞈ-eu jeˬ mˇ gaˇ noeˬ doeˇ-eu meh. Aˬ jeˬ miˇ neh ehˇ naˇ, aˬ yawꞈ maꞈ aˬ cawˬ-euˬ miˬ zaˬ-ahˇ bahˬ dui dui-awˇ, aˬ laꞈ-ahˇ tsawˇ haˬ-euˬ shiˬ lehꞈ-eu meh.”

⁴⁶ Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ heu loꞈ-ehˇ ehˇ-eu meh. “Aˬ yawꞈ nyaꞈ-ahˇ bi laˆ guˆ-awˇ tahˇ joe bi joe-eu tsawˇ haˬ tiˬ muˇ sheuˬ leꞈ-awˬ.

⁴⁷ Tsawˇ haˬ kʼoeˇ deuˬ aˬ yawꞈ nyaˬ-ahˇ kʼaˬ lo biˬ-awˇ, mi cehˇ law-awˇ, aˬ yawꞈ nyaꞈ-euˬ zaˬ deuˬ-ahˇ sehꞈ-awˇ, aˬ yawꞈ nyaꞈ-euˬ nymˇ-ahˇ miˬ dzaˬ keuˬ dzeh luꞈ-uˇ.

⁴⁸ Zaˬ miˬ zaˬ deuˬ aˬ yawꞈ nyaꞈ loꞈ-ehˇ aˬ cawˬ-euˬ kʼaˬ dzeˇ zaˬ nehˬ-ehˇ maˬ ya bahˬ-eu gʼaˇ duˬ, miˇ kʼahˬ heu kʼahˬ kʼahˬ lah ni laꞈ kʼoeˇ, kʼoeˇ loꞈ-ehˇ dehꞈ cawˆ-eu jeˬ maˬ bi jaˆ ni ngaˇ laˆ byoˆ ma.

⁴⁹ Saˇ jaˇ maˬ jawˇ ni dehꞈ-awˇ, tahˬ pahˬ aˬ ma mawˇ kawˇ-ahˇ uˬ duˬ tahˬ-euˬ miˇ neh, naw nyaꞈ nmˇ-ahˇ ngaˇ kʼehˬ ma. Kʼoeˇ ngeh jawˇ, ngaˇ Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ pyeuꞈ-eu gaˇ kawˆ, naw nyaꞈ nmˇ ya siˬ duˬ tehꞈ-a.”