Yeˬsaˬgeˬlaˇ 22 - Akha

Yeˬluˇsaˬlehˬ-euˬ yaw lehˬ

¹ Sahˬpaˬ Miˬyehˇ ngaˬ-ahˇ heu loꞈ-ehˇ ehˇ-eu meh.

² “Tsawˇ haˬ zaˬ-oˇ, tsawˇ haˬ-ahˇ sehꞈ-eu deuˬ tiˬ byah ni jawˇ-eu meuˬ-ahˇ yaˇ kʼaˬ daˇ-eu gʼaˇ duˬ nawˇ lehˬ hmˬ taˬ maˬ loˇ. Meuˬ kʼoeˇ neh kʼaˇ mˇ-euˬ jawꞈ dui dui-eu jeˬ meuˬ kʼoeˇ meuˬ-ahˇ ehˇ duˬ nehˬ jiˇ-awˬ.

³ Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ pyeuꞈ-eu ngaˇ heu loꞈ-ehˇ ehˇ-eu meh lehˇ, meuˬ kʼoeˇ meuˬ-ahˇ ehˇ nehˬ-awˬ. Nawˬ-euˬ tsawˇ haˬ gʼawˬ mya ni nawˇ sehꞈ-awˇ,tahˬ pahˬ aˬ ma mawˇ kawˇ deuˬ-ahˇ uˬ duˬ tahˬ-eu laꞈ kʼoeˇ nawˇ yawˬ haˇ yawˬ ha laˆ jawꞈ-euˬ miˇ neh, nawˬ-euˬ aˇ yamˬ keuˆ le luꞈ meh.

⁴ Tsawˇ haˬ-ahˇ sehꞈ-eu laꞈ kʼoeˇ nawˇ mˇ bahˬ-awˇ, nawˬ neh jahˇ-euˬ tahˬ pahˬ aˬ ma mawˇ kawˇ neh yawˬ haˇ yawˬ ha laˆ jawꞈ-euˬ baˬ da neh, nawˬ-euˬ aˇ nah keuˆ le luꞈ-awˇ, nawˬ-euˬ aˇ yamˬ jiˇ le luꞈ meh. Kʼoeˇ miˇ neh, tsawˇ jeuˬ dawˬ tawˆ luꞈ nawˬ-ahˇ ja doeˇ-awˇ, miˇ kʼahˬ dawˬ tawˆ luꞈ nawˬ-ahˇ ehˇ niˇ gʼa ni ngaˇ jahˇ-euˬ ma.

⁵ Dawˬ peh gaˇ mahˇ jaˆ-eu miˇ kʼahˬ dawˬ tawˆ luꞈ, nawˇ zahˇ sahˇ kʼoꞈ maˬ baw ni dehꞈ gaˇ ehˇ doeˇ dui dui luꞈ meh.

⁶ Iˇsaˬleˬlaˆ tsawˇ haˬ aˬ yuiꞈ aˬ tsu dawˬ tawˆ luꞈ yawˬ ha-euˬ baoˬ-ahˇ nui ma huiˬ-awˇ, tsawˇ haˬ sehꞈ luꞈ meh.

⁷ Meuˬ laꞈ kʼoeˇ jawˇ-eu tsawˇ haˬ tiˬ gʼaˬ-iˬ, yawˬ ha-euˬ aˬ ma aˬ da-ahˇ yaw zeu maˬ baw-a. Aˬ cawˬ tsawˇ jeuˬ-ahˇ nawˇ mehˇ shuiˇ shuiˇ dzaˬ-awˇ, miˬ coeˬ miˬ ma hawˇ-eu muˇ coe aˬ nmˇ deuˬ-ahˇ nawˇ yehˬ bawˬ-ehˇ gʼeh nehˬ-euˬ meh.

⁸ Ngaˬ-euˬ muiˬ-eu shawˇ-eu jawˇ duˬ deuˬ-ahˇ nawˇ yaw zeu maˬ baw-ehˇ, jawˇ nah kʼawꞈ maˬ tawˬ-a.

⁹ Nawˬ-euˬ tsawˇ haˬ tiˬ paˆ na deuˬ aˬ cawˬ bi shiˇ-eu toˆ-awˇ, tiˬ paˆ na deuˬ-aˬ, tahˬ pahˬ aˬ ma mawˇ kawˇ deuˬ-ahˇ lawˇ nehˬ-euˬ dzaˇ dzaˬ-eu meh. Tiˬ paˆ na deuˬ kʼaˬ miˬ sheu gaˇ byawˬ gʼa-eu meh.

¹⁰ Tiˬ paˆ na deuˬ yawˬ ha aˬ da-euˬ miˬ zaˬ deuˬ nehˬ-ehˇ bahˬ-awˇ, tiˬ paˆ na deuˬ-aˬ, ba la mawˇ luꞈ-euˬ zaˬ miˬ zaˬ deuˬ-ahˇ dawꞈ-awˇ bahˬ-euˬ meh.

¹¹ Tiˬ paˆ na deuˬ aˬ cawˬ-euˬ miˬ zaˬ-ahˇ bahˬ-awˇ, tiˬ poˆ na deuˬ-aˬ, yawˬ ha-euˬ kuiˬ ma-ahˇ bahˬ-euˬ meh. Tiˬ paˆ na deuˬ yawˬ ha aˬ da-euˬ ma caw-ahˇ bahˬ-euˬ meh.

¹² Nawˬ-euˬ tsawˇ haˬ tiˬ paˆ na deuˬ pyuˇ za laˇ ni tsawˇ haˬ sehꞈ-eu meh. Tiˬ paˆ na deuˬ yawˬ ha tsawˇ jeuˬ Iˇsaˬleˬlaˆ tsawˇ haˬ-ahˇ pyuˇ paˇ nehˬ-awˇ, jiˇ jeuˬ gʼawˬ mya ni yuˇ dzaˬ-eu laꞈ kʼoeˇ, aˬ cawˬ-euˬ uˬ duˬ-ahˇ teuꞈ-awˇ smˇ muiˬ laˆ muiˬ-euˬ meh. Aˬ yawꞈ maꞈ ngaˬ-ahˇ ngehˇ jiˇ-euˬ meh” lehˇ, Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ ehˇ-eu meh.

¹³ “Nawˬ neh tahˇ joe joe za-euˬ jeˬ hawˇ-eu, nawˬ neh shiˬ laˆ yoeˇ-euˬ jeˬ kʼoeˇ taˆ ngaˬ-euˬ aˬ laꞈ laꞈ puˇ tahˬ gʼeh leꞈ ma.

¹⁴ Nawˬ-ahˇ ngaˇ yaw kʼaˆ-ehˇ jahˇ nehˬ le ngeh jawˇ, nawˇ maˬ guˆ ni jawˇ tehˬ coeˇ-awˇ, nawˬ-euˬ aˬ laꞈ baꞈ diˇ-eu gʼaˬ ahˇ tehꞈ-a loˇ. Sahˬpaˬ Miˬyehˇ pyeuꞈ-eu ngaˇ-aˬ, ngaˬ neh kʼaˇ ehˇ-euˬ loꞈ-ehˇ mˇ ma.

¹⁵ Nawˬ-euˬ tsawˇ haˬ deuˬ-ahˇ miˇ kʼahˬ yawˬ kʼahˬ na luꞈ doe ni, aˬ cawˬ tsawˇ jeuˬ kʼaˇ jawˇ gaˇ ngaˇ teh byaˆ nehˬ-awˇ, nawˬ neh mˇ-euˬ yaw haiˬ jeˬ aˇ saˬ bi saˬ ma.

¹⁶ Kʼoeˇ ngeh jawˇ, aˬ cawˬ tsawˇ jeuˬ nawˬ-ahˇ yaw zeu maˬ baw ni pyeuꞈ-iˇ tehꞈ-a. Ehˇ kʼawꞈ, ngaˇ Sahˬpaˬ Miˬyehˇ pyeuꞈ-eu gaˇ kawˆ nawˇ siˬ duˬ laˇ tehꞈ-a.”

Miˬyehˇ-euˬ baw

¹⁷ Sahˬpaˬ Miˬyehˇ ngaˬ-ahˇ heu loꞈ-ehˇ ehˇ-eu meh.

¹⁸ “Tsawˇ haˬ zaˬ-oˇ, Iˇsaˬleˬlaˆ tsawˇ haˬ deuˬ ngaˬ-euˬ gʼaˇ duˬ tiˬ jeˬ-iˬ gaˇ dahˇ maˬ tsoeˬ-a. Pyuˇ-ahˇ baw baw-awˇ baw guiˇ shawˇ ngeh doˆ le-euˬ guiˬ guiˬ keˬ, guiˬ ba keˬ, shmˇ shmˇ keˬ hawˇ-eu za siˬ keˬ-ahˇ aˬ yawꞈ maꞈ duˇ leˇ-eu meh.

¹⁹ Aˬ yawꞈ maꞈ kʼoeˇ naˆ ni gaˇ dahˇ tsoeˬ-eu tehꞈ meh lehˇ, Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ pyeuꞈ-eu ngaˇ, nymˬ-mˇ aˬ yawꞈ maꞈ-ahˇ ehˇ-eu ma. Aˬ yawꞈ maꞈ dawˬ tawˆ luꞈ-ahˇ Yeˬluˇsaˬlehˬ meuˬ laꞈ kʼoeˇ ngaˇ sheuˬ uiˬ ma.

²⁰ Pyuˇ kʼaˇ doˆ-eu tsawˇ haˬ deuˬ, pyuˇ, guiˬ shuiˇ, shmˇ hawˇ-eu za siˬ heu deuˬ-ahˇ baw-ahˇ dawˆ ahˇ-awˇ baw guiˇ-eu loꞈ-ehˇ, ngaˇ nui ma pehˇ-eu laꞈ kʼoeˇ naw maꞈ-ahˇ sheuˬ uiˬ-awˇ baw guiˇ ma.

²¹ Ngeuˇ ma. Aˬ yawꞈ maꞈ-ahˇ Yeˬluˇsaˬlehˬ meuˬ-ahˇ sheuˬ uiˬ-awˇ, aˬ yawꞈ maꞈ-euˬ uˬ moˆ miˬ dzaˬ dzah-awˇ, nui ma pehˇ-eu laꞈ kʼoeˇ baw guiˇ nehˬ ma.

²² Baw baw gaˇ pyuˇ baw guiˇ-eu loꞈ-ehˇ, aˬ yawꞈ maꞈ-ahˇ Yeˬluˇsaˬlehˬ meuˬ laꞈ kʼoeˇ baw guiˇ nehˬ ma. Kʼoeˇ ngeh, Sahˬpaˬ Miˬyehˇ-euˬ nui ma aˬ yawꞈ maꞈ ya mawˇ duˬ tehꞈ-a.”

Iˇsaˬleˬlaˆ aˬ yuiꞈ aˬ tsu deuˬ-euˬ iˬ baˇ

²³ Sahˬpaˬ Miˬyehˇ ngaˬ-ahˇ heu loꞈ-ehˇ paˇ ehˇ-eu meh.

²⁴ “Tsawˇ haˬ zaˬ-oˇ, Iˇsaˬleˬlaˆ tsawˇ haˬ deuˬ-ahˇ heu loꞈ-ehˇ ehˇ nehˬ-awˬ. Aˬ yawꞈ maꞈ-euˬ miˇ kʼahˬ maˬ muiˬ maˬ shawˇ-ehˇ pyeuꞈ-iˇ-euˬ miˇ neh, ngaˇ nui ma pehˇ-eu laꞈ kʼoeˇ kʼehˬ nehˬ kʼaˆ nehˬ-eu ma.

²⁵ Aˬ yuiꞈ aˬ tsu kʼoeˇ deuˬ-aˬ, jeˬ zaˬ kawꞈ sehꞈ-awˇ joeˬ luꞈ-eu aˇ laˬ jaˬ shiˇ-ahˇ duˇ-eu meh. Aˬ yawꞈ maꞈ tsawˇ haˬ sehꞈ-awˇ pyuˇ shuiˇ myawˬ gahˬ dawˬ tawˆ luꞈ yuˇ geuꞈ jiˇ-eu meh. Aˬ yawꞈ maꞈ kʼoeˇ loꞈ-ehˇ tsawˇ haˬ sehꞈ-euˬ baˬ da neh, miˬ zaˬ gʼawˬ mya gʼaˬ miˬ coeˬ coeˬ-iˇ jiˇ-euˬ meh.

²⁶ Piˇ ma deuˬ ngaˬ-euˬ zahˇ dawˬ kʼoꞈ dawˬ-ahˇ puiˬ-awˇ, yaw muiˬ yaw shawˇ jeˬ-ahˇ yaw zeu maˬ baw-a. Yaw muiˬ yaw shawˇ jeˬ hawˇ-eu maˬ muiˬ maˬ shawˇ-eu jeˬ aˬ yawꞈ maꞈ maˬ tseˇ paˆ mehˬ nehˬ-a. Jawˇ nah-ahˇ maˬ lah maˬ daw-a. Aˬ yawꞈ maꞈ kʼoeˇ loꞈ-ehˇ jahˇ-eu baˬ da neh, miˇ kʼahˬ zaˬ deuˬ ngaˬ-ahˇ yaw zeu maˬ baw-a.

²⁷ Sahˬpaˬ sahˬ ma geuꞈ-eu deuˬ-aˬ, jeˬ zaˬ kawꞈ sehꞈ-awˇ, pyaˆ dzaˬ luꞈ-eu kʼaˬ yehˇ-ahˇ duˇ-eu meh. Aˬ yawꞈ maꞈ smˇ muiˬ muiˬ laˇ ni tsawˇ haˬ sehꞈ-eu meh.

²⁸ Kaˇ pyawˇ-ahˇ lu boeˬ lehꞈ ba-eu loꞈ-ehˇ, Miˬyehˇ gʼaˇ duˬ ngehˬ dah-eu deuˬ iˬ baˇ kʼoeˇ deuˬ-ahˇ dehˬ kaˬ-eu meh. Aˬ yawꞈ maꞈ neh yaw sahˇ laꞈ kʼoeˇ ya mawˇ-euˬ jeˬ maˬ tsaˬ-ehˇ, yaw lehˬ jeˬ aˬ yawꞈ maꞈ ngehˬ dah-eu meh. Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ gʼaˇ duˬ aˬ yawꞈ maꞈ ngehˬ dah-eu ma lehˇ ehˇ kʼawꞈ, Sahˬpaˬ Miˬyehˇ pyeuꞈ-eu ngaˇ aˬ yawꞈ maꞈ-ahˇ dawˬ ngehˬ cawˬ-euˬ maˬ jaˆ.

²⁹ Smˇ muiˬ smˇ baw deuˬ mehˇ shuiˇ shuiˇ-awˇ, tahˇ joe joe-eu meh. Shaˬ zaˬ zahˬ zaˬ kʼoeˇ taˆ kʼaˆ dzaˬ-awˇ, aˬ cawˬ tsawˇ jeuˬ-euˬ uˬ duˬ-ahˇ dzaˬ-eu meh.

³⁰ Meuˬ meuˬ lahˇ gawˬ nya-awˇ, ngaˇ nui ma pehˇ-eu laꞈ kʼoeˇ miˇ kʼahˬ heu kʼahˬ-ahˇ laˆ cawˆ-eu lehˇ gʼeh ngeh, byaˆ-iˇ-euˬ meuˬ lahˇ yaw kaˬ-ahˇ yawꞈ-awˇ miˇ kʼahˬ heu kʼahˬ maˬ bi cawˆ-iˇ ni laˆ tsoeˬ nya-eu tsawˇ haˬ-ahˇ ngaˇ poˆ luꞈ-eu ma.

³¹ Ehˇ kʼawꞈ, maˬ poˆ mawˇ nya nya. Kʼoeˇ miˇ neh, ngaˇ nui ma pehˇ-eu jeˬ aˬ yawꞈ maꞈ kʼoeˇ taˆ bi keuˆ le-awˇ, aˬ yawꞈ maꞈ neh mˇ-euˬ jeˬ aˇ poeˬ, miˬ dzaˬ loꞈ-ehˇ aˬ yawꞈ maꞈ-ahˇ ngaˇ laˆ cawˆ nehˬ ma” lehˇ, Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ ehˇ-eu meh.