Yeˬsaˬgeˬlaˇ 20 - Akha

Tsawˇ haˬ zaˬ naˬ lehˬ lehˬ-eu

¹ Nga maꞈ aˬ cawˬ miˇ kʼahˬ-ahˇ bi nyehꞈ gʼeh-euˬ shiꞈ kʼoꞈ tiˬ kʼoꞈ, ba la ngaˬ siˬ tiˬ siˬ tseˇ nah-ahˇ, Iˇsaˬleˬlaˆ tsawˇ haˬ aˬ yuiꞈ aˬ tsu tiˬ paˆ na deuˬ ngaˇ jawˇ gaˇ laˇ-awˇ, Sahˬpaˬ Miˬyehˇ nui ma tsaˬ-eu jeˬ gaˇ kawˆ naˇ haˬ laˇ-euˬ meh. Aˬ yawꞈ maꞈ ngaˬ-euˬ mehˬ shi nuiˇ luꞈ-eu meh.

² Kʼoeˇ ngeh, Sahˬpaˬ Miˬyehˇ ngaˬ-ahˇ heu loꞈ-ehˇ ehˇ-eu meh.

³ “Tsawˇ haˬ zaˬ-oˇ, Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ heu loꞈ-ehˇ ehˇ-eu meh lehˇ, tsawˇ haˬ teu deuˬ-ahˇ ehˇ nehˬ-awˬ. Naw maꞈ ngaˇ nui ma tsaˬ-eu jeˬ gaˇ kawˆ naˇ haˬ laˇ-eu maˬ ngeuˇ loˇ. Ngaˇ dehꞈ luꞈ-eu Miˬyehˇ kʼaˇ pyeuꞈ kʼoeˇ keuˆ ni, naw maꞈ ngaˬ-ahˇ tiˬ jeˬ-iˬ maˬ bi naˇ haˬ lehˇ, Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ pyeuꞈ-eu ngaˇ ehˇ-eu ma.

⁴ “Tsawˇ haˬ zaˬ-oˇ, nawˇ aˬ yawꞈ maꞈ-ahˇ yaˇ kʼaˬ daˇ-eu lehˇ noeˬ tsehˆ gʼaˬ maˬ loˇ. Noeˬ tsehˆ gʼaˬ-euˬ ngeuˇ naˇ, daˇ nehˬ-awˬ. Aˬ yawꞈ maꞈ-euˬ aˬ da deuˬ neh mˇ-euˬ jawꞈ dui dui-eu jeˬ aˬ yawꞈ maꞈ-ahˇ ja noeˬ nehˬ-awˬ.

⁵ Ngaˇ heu loꞈ-ehˇ ehˇ-eu gaˇ kawˆ aˬ yawꞈ maꞈ-ahˇ dzawˇ nehˬ-awˬ. Iˇsaˬleˬlaˆ-ahˇ ngaˇ tseˇ doˆ ngeh, heu loꞈ-ehˇ saˇ jaˇ dzaˬ taˬ-eu jaˆ ma. Iˇjiˇtuˆ miˇ kʼahˬ laꞈ kʼoeˇ ngaˬ-euˬ gʼawˇ mawˇ aˬ yawꞈ maꞈ-ahˇ pah mehˬ nehˬ-awˇ, ngaˇ-aˬ, naw maꞈ-euˬ Miˬyehˇ pyeuꞈ-eu Sahˬpaˬ Miˬyehˇ ma lehˇ ehˇ nehˬ-euˬ ma.

⁶ Kʼoeˇ ngeh jawˇ, aˬ yawꞈ maꞈ-ahˇ Iˇjiˇtuˆ miˇ kʼahˬ laꞈ kʼoeˇ neh sheuˬ doˆ nehˬ-awˇ, aˬ yawꞈ maꞈ gʼaˇ duˬ ngaˬ neh tseˇ doˆ taˬ-euˬ miˇ kʼahˬ-ahˇ sheuˬ gʼeh nehˬ ma lehˇ, ngaˇ saˇ jaˇ dzaˬ-euˬ ma. Miˇ kʼahˬ kʼoeˇ kʼahˬ-aˬ, miˇ tsaˬ miˇ muiˬ muiˬ dui dui-awˇ, baw le za le-eu miˇ kʼahˬ pyeuꞈ-eu miˇ neh, miˇ kʼahˬ dawˬ tawˆ luꞈ naˆ maˬ tseˇ muiˬ dzehˬ-eu meh.

⁷ Aˬ yawꞈ maꞈ nui kʼahˇ jaˆ-eu nui daˆ daˆ laˇ paˬ-ehˇ gʼeh-eu tahˬ pahˬ aˬ ma mawˇ kawˇ deuˬ biˬ dzeh jiˇ-awˇ, Iˇjiˇtuˆ miˬyehˇ deuˬ-ahˇ uˬ duˬ tahˬ-eu laꞈ kʼoeˇ yawˬ haˇ yawˬ ha maˬ shawˇ-ehˇ pyeuꞈ-iˇ ni taˬ paˇ jahˇ lehˇ, aˬ yawꞈ maꞈ-ahˇ ngaˇ ehˇ nehˬ-euˬ ma. Aˬ jeˬ miˇ neh ehˇ naˇ, ngaˇ-aˬ, aˬ yawꞈ maꞈ-euˬ Miˬyehˇ pyeuꞈ-eu Sahˬpaˬ Miˬyehˇ ma.

⁸ Ehˇ kʼawꞈ, aˬ yawꞈ maꞈ ngaˬ-ahˇ puiˬ-awˇ, ngaˬ-euˬ ehˇ dawˬ maˬ naˇ haˬ geuꞈ-a. Nui daˆ daˆ laˇ paˬ-ehˇ gʼeh-eu aˬ yawꞈ maꞈ-euˬ tahˬ pahˬ aˬ ma mawˇ kawˇ kʼoeˇ deuˬ-ahˇ maˬ biˬ dzeh-ehˇ, nui daˆ daˆ laˇ paˬ-ehˇ gʼeh-eu Iˇjiˇtuˆ miˬyehˇ deuˬ-ahˇ kʼawꞈ, aˬ yawꞈ maꞈ maˬ byehˇ coeˇ-a. Kʼoeˇ gaˇ, Iˇjiˇtuˆ miˇ kʼahˬ laꞈ kʼoeˇ, aˬ yawꞈ maꞈ-ahˇ ngaˬ-euˬ nui ma bi mawˇ-eu lehˇ ngaˇ noeˬ tsehˆ-euˬ ma.

⁹ Ehˇ kʼawꞈ, ngaˬ-euˬ tsawˇ myahˇ cawˆ-iˇ gaˇ yahˇ-eu miˇ neh, aˬ yawꞈ maꞈ-ahˇ ngaˇ kʼoeˇ loꞈ-ehˇ maˬ jahˇ nehˬ-aˬ. Aˬ jeˬ miˇ neh ehˇ naˇ, aˬ yawꞈ maꞈ-ahˇ Iˇjiˇtuˆ miˇ kʼahˬ laꞈ kʼoeˇ neh ngaˇ sheuˬ doˆ nehˬ-eu lehˇ gʼeh-eu gaˇ kawˆ, aˬ yawꞈ maꞈ nehˬ-ehˇ jawˇ luꞈ-eu aˬ cawˬ tsawˇ jeuˬ kʼoeˇ myaˆ ni gʼeh-eu mehˬ shi, aˬ yawꞈ maꞈ-ahˇ ngaˬ neh ehˇ gaˬ taˬ-euˬ jaˆ-eu ma.

¹⁰ “Kʼoeˇ naˇ, aˬ yawꞈ maꞈ-ahˇ Iˇjiˇtuˆ miˇ kʼahˬ laꞈ kʼoeˇ neh sheuˬ doˆ-awˇ, bawˇ tsahˬ bawˇ dahˇ-ahˇ sheuˬ gʼeh-euˬ ma.

¹¹ Aˬ yawꞈ maꞈ-ahˇ ngaˬ-euˬ dawˬ biꞈ-awˇ, ngaˬ-euˬ zahˇ dawˬ kʼoꞈ dawˬ mehˬ nehˬ tsoˆ nehˬ-euˬ ma. Ngaˬ-euˬ zahˇ dawˬ kʼoꞈ dawˬ mehˬ nah kʼaˇ caw teh-eu tsawˇ haˬ yaw dehꞈ ya dehꞈ-eu meh.

¹² Sahˬpaˬ Miˬyehˇ pyeuꞈ-eu ngaˇ aˬ yawꞈ maꞈ-ahˇ bi muiˬ bi shawˇ laˇ-euˬ gaˇ kawˆ, ngaˇ hawˇ-eu aˬ yawꞈ maꞈ yaw kaˬ-ahˇ saˇ kiˇ pyeuꞈ ni, jawˇ nah tawˬ-awˇ bi lah bi daw-euˬ ma.

¹³ Ehˇ kʼawꞈ, bawˇ tsahˬ bawˇ dahˇ laꞈ kʼoeˇ aˬ yawꞈ maꞈ ngaˬ-ahˇ puiˬ-euˬ meh. Ngaˬ-euˬ zahˇ dawˬ kʼoꞈ dawˬ-ahˇ aˬ yawꞈ maꞈ puiˬ-awˇ, ngaˬ neh dawˬ biꞈ-euˬ gaˇ maˬ naˇ haˬ geuꞈ-a. Ngaˬ-euˬ zahˇ dawˬ kʼoꞈ dawˬ mehˬ nah kʼaˇ caw teh-eu tsawˇ haˬ yaw dehꞈ ya dehꞈ-eu meh. Jawˇ nah-ahˇ aˬ yawꞈ maꞈ laˆ jawꞈ-euˬ meh. Bawˇ tsahˬ bawˇ dahˇ kʼoeˇ tsahˇ-ahˇ, aˬ yawꞈ maꞈ-ahˇ ngaˬ-euˬ nui ma bi mawˇ-awˇ, laˆ cawˆ nehˬ ma lehˇ ngaˇ lehˬ hmˬ-euˬ ma.

¹⁴ Ehˇ kʼawꞈ, kʼoeˇ loꞈ-ehˇ maˬ jahˇ nehˬ-aˬ. Aˬ jeˬ miˇ neh ehˇ naˇ, kʼoeˇ loꞈ-ehˇ jahˇ-eu baˬ da neh, ngaˬ neh Iˇsaˬleˬlaˆ tsawˇ jeuˬ-ahˇ Iˇjiˇtuˆ miˇ kʼahˬ laꞈ kʼoeˇ neh sheuˬ doˆ nehˬ-euˬ gaˇ kʼaˇ ya mawˇ-euˬ tsawˇ jeuˬ deuˬ mehˬ shi, ngaˬ-euˬ tsawˇ myahˇ cawˆ laˇ gaˇ ngaˇ yahˇ-euˬ ma.

¹⁵ Kʼoeˇ miˇ neh, ngaˬ neh aˬ yawꞈ maꞈ-ahˇ biꞈ taˬ-euˬ miˇ kʼahˬ laꞈ kʼoeˇ, aˬ yawꞈ maꞈ-ahˇ ngaˇ maˬ sheuˬ gʼeh nehˬ lehˇ, bawˇ tsahˬ bawˇ dahˇ laꞈ kʼoeˇ ngaˇ ehˇ tsehˆ nehˬ-euˬ ma. Miˇ kʼahˬ kʼoeˇ kʼahˬ-aˬ, miˇ tsaˬ miˇ muiˬ muiˬ dui dui-awˇ baw le za le-eu miˇ kʼahˬ pyeuꞈ-eu miˇ neh, miˇ kʼahˬ dawˬ tawˆ luꞈ naˆ maˬ tseˇ muiˬ dzehˬ-eu meh.

¹⁶ Aˬ yawꞈ maꞈ ngaˬ neh dawˬ biꞈ-euˬ gaˇ maˬ naˇ haˬ geuꞈ-ehˇ, ngaˬ-euˬ zahˇ dawˬ kʼoꞈ dawˬ-ahˇ byehˇ dzeh-awˇ jawˇ nah-ahˇ laˆ jawꞈ-euˬ miˇ neh, ngaˇ kʼoeˇ loꞈ-ehˇ ehˇ tsehˆ nehˬ-euˬ ma. Aˬ yawꞈ maꞈ tahˬ pahˬ aˬ ma mawˇ kawˇ-ahˇ uˬ duˬ tahˬ mawꞈ dzehˬ-eu meh.

¹⁷ “Ehˇ kʼawꞈ, aˬ yawꞈ maꞈ-ahˇ gʼawˬ shaˬ gaˬ-eu laꞈ kʼoeˇ, bawˇ tsahˬ bawˇ dahˇ laꞈ kʼoeˇ aˬ yawꞈ maꞈ-ahˇ maˬ sehꞈ lehˇ noeˬ tsehˆ-euˬ ma.

¹⁸ Kʼoeˇ naˇ, aˬ yawꞈ maꞈ-euˬ zaˬ deuˬ-ahˇ ngaˇ heu loꞈ-ehˇ mehˬ nehˬ tsoˆ nehˬ-euˬ ma. Naw maꞈ-euˬ aˬ poeˬ aˬ bawˇ deuˬ-euˬ zahˇ sahˇ kʼoꞈ-ahˇ taˬ caw teh. Aˬ yawꞈ maꞈ dehꞈ-euˬ loꞈ-ehˇ taˬ dehꞈ. Aˬ yawꞈ maꞈ-euˬ tahˬ pahˬ aˬ ma mawˇ kawˇ-ahˇ uˬ duˬ tahˬ-eu laꞈ kʼoeˇ, naw maꞈ yawˬ haˇ yawˬ ha maˬ muiˬ maˬ shawˇ ni taˬ mˇ.

¹⁹ Ngaˇ-aˬ, naw maꞈ-euˬ Miˬyehˇ pyeuꞈ-eu Sahˬpaˬ Miˬyehˇ ma. Ngaˬ-euˬ zahˇ dawˬ kʼoꞈ dawˬ hawˇ-eu ngaˬ-euˬ dawˬ-ahˇ naˇ haˬ geuꞈ-awˬ.

²⁰ Jawˇ nah ngeh nah-ahˇ, nah muiˬ nah shawˇ aˇ nah bi pyeuꞈ-awˬ. Kʼoeˇ-aˬ, ngaˇ hawˇ-eu naw maꞈ yaw kaˬ-ahˇ dzaˬ taˬ-euˬ dawˬ ma saˇ jaˇ gaˇ kawˆ saˇ kiˇ pyeuꞈ-awˇ, Sahˬpaˬ Miˬyehˇ pyeuꞈ-eu ngaˇ-aˬ, naw maꞈ-euˬ Miˬyehˇ pyeuꞈ-eu gaˇ kawˆ saˇ kiˇ pyeuꞈ-eu meh lehˇ mehˬ nehˬ tsoˆ nehˬ-euˬ ma.

²¹ “Ehˇ kʼawꞈ, aˬ yawꞈ maꞈ-euˬ zaˬ kʼoeˇ deuˬ kʼawꞈ, ngaˬ-ahˇ puiˬ-eu laꞈ kʼoeˇ, tsawˇ haˬ zaˬ-ahˇ yaw dehꞈ bi dehꞈ-eu ngaˬ-euˬ zahˇ dawˬ kʼoꞈ dawˬ deuˬ-ahˇ byehˇ dzeh-euˬ meh. Jawˇ nah-ahˇ aˬ yawꞈ maꞈ laˆ jawꞈ-euˬ meh. Bawˇ tsahˬ bawˇ dahˇ kʼoeˇ tsahˇ-ahˇ, ngaˬ-euˬ nui ma aˬ yawꞈ maꞈ-ahˇ bi mawˇ-awˇ, sehꞈ-eu lehˇ gʼeh-euˬ ma.

²² Ehˇ kʼawꞈ, Iˇsaˬleˬlaˆ tsawˇ jeuˬ-ahˇ Iˇjiˇtuˆ miˇ kʼahˬ laꞈ kʼoeˇ neh ngaˇ sheuˬ doˆ nehˬ-euˬ gaˇ ya mawˇ-euˬ tsawˇ jeuˬ deuˬ-euˬ mehˬ shi, ngaˬ-euˬ tsawˇ myahˇ cawˆ laˇ gaˇ yahˇ-eu miˇ neh, ngaˇ kʼoeˇ loꞈ-ehˇ maˬ jahˇ-aˬ.

²³ Kʼoeˇ miˇ neh, bawˇ tsahˬ bawˇ dahˇ laꞈ kʼoeˇ aˬ yawꞈ maꞈ-ahˇ ngaˇ heu loꞈ-ehˇ saˇ jaˇ paˇ dzaˬ-euˬ ma. Aˬ yawꞈ maꞈ-ahˇ miˇ kʼahˬ doe ni teh byaˆ nehˬ ma lehˇ ngaˇ ehˇ tsehˆ nehˬ-euˬ ma.

²⁴ Aˬ yawꞈ maꞈ ngaˬ-euˬ ehˇ dawˬ leuˇ-awˇ, ngaˬ-euˬ zahˇ dawˬ kʼoꞈ dawˬ-ahˇ byehˇ dzeh-euˬ uˬ taꞈ, jawˇ nah-ahˇ laˆ jawꞈ-awˇ, aˬ yawꞈ maꞈ-euˬ aˬ poeˬ aˬ bawˇ deuˬ uˬ duˬ tahˬ-euˬ tahˬ pahˬ aˬ ma mawˇ kawˇ deuˬ-ahˇ uˬ duˬ tahˬ-eu miˇ neh, kʼoeˇ loꞈ-ehˇ mˇ nehˬ-euˬ ma.

²⁵ “Kʼoeˇ naˇ, maˬ muiˬ-eu zahˇ dawˬ kʼoꞈ dawˬ hawˇ-eu, yaw dehꞈ maˬ bi dehꞈ-eu dawˬ deuˬ, aˬ yawꞈ maꞈ-ahˇ ngaˇ biꞈ-euˬ ma.

²⁶ Aˬ yawꞈ maꞈ-euˬ lawˇ-eu shehˇ-eu jeˬ neh aˬ yawꞈ maꞈ-ahˇ bi laˆ jawꞈ ni ngaˇ jahˇ-awˇ, aˬ yawꞈ maꞈ-euˬ aˬ li aˬ yuiꞈ deuˬ lawˇ ni ngaˇ jahˇ nehˬ-euˬ ma. Aˬ yawꞈ maꞈ-ahˇ kʼehˬ nehˬ kʼaˆ nehˬ-awˇ, ngaˇ Sahˬpaˬ Miˬyehˇ pyeuꞈ-eu siˬ leˇ ni, kʼoeˇ loꞈ-ehˇ jahˇ nehˬ-euˬ ma.

²⁷ “Tsawˇ haˬ zaˬ-oˇ, nymˬ-mˇ poˆ jawˇ-aˬ, Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ pyeuꞈ-eu ngaˇ heu loꞈ-ehˇ ehˇ-eu meh lehˇ, Iˇsaˬleˬlaˆ tsawˇ haˬ deuˬ-ahˇ ehˇ nehˬ-awˬ. Aˬ yawꞈ maꞈ-euˬ aˬ da deuˬ ngaˬ-ahˇ saˇ jaˇ puiˬ-euˬ laꞈ kʼoeˇ, yehˬ bawˬ sehˇ lu-ehˇ gʼeh nehˬ laꞈ-euˬ heu loꞈ-ehˇ jaˆ-a siˬ.

²⁸ Ngaˬ neh aˬ yawꞈ maꞈ-ahˇ biꞈ ma lehˇ ehˇ taˬ-euˬ miˇ kʼahˬ-ahˇ aˬ yawꞈ maꞈ-ahˇ ngaˇ sheuˬ gʼeh nehˬ ngeh, gawˬ duˇ yaw goˇ deuˬ hawˇ-eu aˇ paꞈ sahˇ-eu aˇ bawˇ kʼaˇ mawˇ le gaˇ aˬ yawꞈ maꞈ lawˇ-euˬ shehˇ-euˬ meh. Aˬ yawꞈ maꞈ neh lawˇ-euˬ miˬ dzaˬ-ahˇ dzah puiˆ-awˇ lawˇ-eu jeˬ hawˇ-eu, aˬ gaꞈ dzaˇ uiˇ lawˇ-eu jeˬ baˬ da neh, ngaˇ nui ma ya pehˇ-euˬ ma.

²⁹ Naw maꞈ le-eu jawˇ duˬ yaw goˇ teu aˬ jeˬ-a lehˇ, aˬ yawꞈ maꞈ-ahˇ ngaˇ naˇ haˬ-euˬ ma. Kʼoeˇ miˇ neh, iˬ nah keuˆ ni jawˇ duˬ kʼoeˇ deuˬ-ahˇ ‘jawˇ duˬ yaw goˇ’ lehˇ kuˇ-eu meh.

³⁰ Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ pyeuꞈ-eu ngaˇ heu loꞈ-ehˇ ehˇ-eu gaˇ kawˆ, nymˬ-mˇ, Iˇsaˬleˬlaˆ tsawˇ haˬ deuˬ-ahˇ ehˇ nehˬ-awˬ. Aˬ jeˬ miˇ neh naw maꞈ-euˬ aˬ da deuˬ neh mˇ-euˬ iˬ baˇ naw maꞈ paˇ mˇ-awˇ, aˬ yawꞈ maꞈ-euˬ tahˬ pahˬ aˬ ma mawˇ kawˇ deuˬ-euˬ mehˬ nah caw teh te.

³¹ Iˬ nah keuˆ ni lawˇ-eu shehˇ-eu kʼoeˇ jeˬ naw maꞈ damˬ-awˇ lawˇ-awˇ, tahˬ pahˬ aˬ ma mawˇ kawˇ kʼoeˇ deuˬ-ahˇ naw maꞈ-euˬ zaˬ deuˬ lawˇ nehˬ-eu laꞈ kʼoeˇ, kʼoeˇ deuˬ baˬ da neh naw maꞈ yawˬ haˇ yawˬ ha laˆ jawꞈ dui dui luꞈ meh. Naw maꞈ Iˇsaˬleˬlaˆ tsawˇ haˬ deuˬ kʼoeˇ naˆ naˆ-ehˇ dehꞈ doeˇ luꞈ-eu kʼawꞈ, ngaˇ nui ma tsaˬ-eu jeˬ-ahˇ paˇ naˇ haˬ laˇ-eu nga laˬ. Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ pyeuꞈ-eu ngaˇ, dehꞈ luꞈ-eu Miˬyehˇ kʼaˇ pyeuꞈ kʼoeˇ keuˆ ni, naw maꞈ ngaˬ-ahˇ tiˬ jeˬ-iˬ maˬ bi naˇ haˬ laˇ.

³² Aˇ bawˇ hawˇ-eu lo guˇ doe ni uˬ duˬ tahˬ-eu aˬ cawˬ miˇ kʼahˬ-ahˇ jawˇ-eu tsawˇ jeuˬ deuˬ-ahˇ dehꞈ duˇ ma lehˇ, naw maꞈ noeˬ tsehˆ taˬ-euˬ meh. Kʼoeˇ loꞈ-ehˇ tiˬ jawˇ-iˬ maˬ dehꞈ pyeuꞈ nya-a.

Miˬyehˇ yaˇ kʼaˬ daˇ-eu jeˬ hawˇ-eu iˬ baˇ pyehˬ-eu jeˬ

³³ “Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ pyeuꞈ-eu ngaˇ dehꞈ luꞈ-eu Miˬyehˇ kʼaˇ pyeuꞈ kʼoeˇ keuˆ ni, ngaˇ nui ma pehˇ-eu laꞈ kʼoeˇ, baoˬ dawˬ tawˆ luꞈ yuˇ doˆ-awˇ, gʼaˬ kʼaˆ dui dui-eu ngaˬ-euˬ aˬ laꞈ neh naw maꞈ-ahˇ uˆ lahˇ ma lehˇ ngaˇ ehˇ-eu ma.

³⁴ Naw maꞈ cehˆ byaˆ taˬ-euˬ miˇ kʼahˬ deuˬ laꞈ kʼoeˇ neh, naw maꞈ-ahˇ ngaˇ paˇ sheuˬ kʼoꞈ uiˬ laꞈ ngeh, ngaˬ-euˬ baoˬ hawˇ-eu ngaˇ nui ma pehˇ-eu jeˬ naw maꞈ-ahˇ bi mawˇ ma.

³⁵ Miˇ kʼahˬ tsawˇ jeuˬ-euˬ bawˇ tsahˬ bawˇ dahˇ laꞈ kʼoeˇ naw maꞈ-ahˇ ngaˇ sheuˬ gʼeh-awˇ, kʼoeˇ gaˇ naw maꞈ-ahˇ ngaˇ myaˆ pyawˬ ciˬ daˬ-awˇ yaˇ kʼaˬ daˇ nehˬ ma.

³⁶ Naw maꞈ-euˬ aˬ poeˬ aˬ bawˇ deuˬ-ahˇ Siˇnaˆ bawˇ tsahˬ bawˇ dahˇ laꞈ kʼoeˇ ngaˇ yaˇ kʼaˬ daˇ nehˬ-euˬ loꞈ-ehˇ, naw maꞈ-ahˇ yaˇ kʼaˬ daˇ ma” lehˇ, Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ ehˇ-eu meh.

³⁷ “Naw maꞈ-ahˇ ngaˇ zuiˆ gʼaˬ-awˇ, ngaˬ-euˬ dawˬ ma saˇ jaˇ mehˬ nah bi caw teh ma.

³⁸ Naw maꞈ laꞈ kʼoeˇ ngaˬ-ahˇ puiˬ-awˇ iˬ baˇ mˇ-eu deuˬ ngaˇ yuˇ dzeh ma. Kʼoeˇ loꞈ-ehˇ gʼeh-eu tsawˇ haˬ deuˬ-ahˇ, nymˬ-mˇ aˬ yawꞈ maꞈ ya jawˇ luꞈ-eu miˇ kʼahˬ laꞈ kʼoeˇ neh ngaˇ sheuˬ doˆ nehˬ ma. Ehˇ kʼawꞈ, Iˇsaˬleˬlaˆ miˇ kʼahˬ laꞈ kʼoeˇ aˬ yawꞈ maꞈ maˬ bi gʼoꞈ jawˇ laˇ. Kʼoeˇ ngeh, ngaˇ Sahˬpaˬ Miˬyehˇ pyeuꞈ-eu gaˆ kawˆ naw maꞈ ya siˬ duˬ tehꞈ-a.”

³⁹ Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ ehˇ-eu “Iˇsaˬleˬlaˆ tsawˇ haˬ deuˬ-oˇ, nymˬ-mˇ naw maꞈ-euˬ nui kʼahˇ mˇ-awˬ. Tahˬ pahˬ aˬ ma mawˇ kawˇ deuˬ-ahˇ uˬ duˬ tahˬ tahˬ-ehˇ jawˇ tawˬ-awˬ. Tahˬ pahˬ aˬ ma mawˇ kawˇ deuˬ-ahˇ damˬ nehˬ-eu laꞈ kʼoeˇ ngaˬ-euˬ muiˬ-eu shawˇ-eu tsawˇ myahˇ-ahˇ yehˬ bawˬ-ehˇ maˬ gʼeh nya-eu aˇ yamˬ keuˆ le tehꞈ-a lehˇ, naw maꞈ-ahˇ ngaˇ yaw kʼaˆ kʼaˆ-ehˇ ehˇ-eu ma.

⁴⁰ Ngaˬ-euˬ muiˬ-eu shawˇ-eu gawˬ jawˬ pyeuꞈ-eu Iˇsaˬleˬlaˆ gawˬ jawˬ yaw goˇ kʼoeˇ taˆ, naw maꞈ Iˇsaˬleˬlaˆ tsawˇ haˬ dawˬ tawˆ luꞈ ngaˬ-ahˇ uˬ duˬ tahˬ tehꞈ-a. Naw maꞈ-ahˇ ngaˇ nui kʼahˇ shiˇ-awˇ, naw maꞈ-euˬ lawˇ-eu shehˇ-eu jeˬ, damˬ-eu jeˬ hawˇ-eu, muiˬ-eu shawˇ-eu laꞈ sawˬ deuˬ-ahˇ ngaˇ ha geuꞈ ma.

⁴¹ Naw maꞈ cehˆ byaˆ taˬ-euˬ miˇ kʼahˬ deuˬ laꞈ kʼoeˇ neh, naw maꞈ-ahˇ ngaˇ sheuˬ kʼoꞈ uiˬ laꞈ ngeh, naw maꞈ neh lawˇ-euˬ miˬ dzaˬ-ahˇ dzah puiˆ-awˇ lawˇ-eu jeˬ-ahˇ ngaˇ ha geuꞈ-awˇ, ngaˇ muiˬ-eu shawˇ-eu gaˇ kawˆ miˇ kʼahˬ tsawˇ jeuˬ deuˬ ya mawˇ duˬ tehꞈ-a.

⁴² Naw maꞈ-euˬ aˬ poeˬ aˬ bawˇ deuˬ-ahˇ biꞈ ma lehˇ, ngaˬ neh saˇ jaˇ dzaˬ taˬ-euˬ miˇ kʼahˬ pyeuꞈ-eu Iˇsaˬleˬlaˆ miˇ kʼahˬ laꞈ kʼoeˇ naw maꞈ-ahˇ ngaˇ sheuˬ kʼoꞈ keuˆ nehˬ ngeh, ngaˇ Sahˬpaˬ Miˬyehˇ pyeuꞈ-eu naw maꞈ ya siˬ duˬ tehꞈ-a.

⁴³ Kʼoeˇ ngeh jawˇ, naw maꞈ neh mˇ dzeuˇ yaꞈ-euˬ shaꞈ dawˇ paˬ-ehˇ gʼeh-eu gaˇ deuˬ hawˇ-eu, naw maꞈ yawˬ haˇ yawˬ ha laˆ jawꞈ-euˬ gaˇ kawˆ-ahˇ noeˬ mawˇ laˇ tehꞈ-a. Naw maꞈ neh mˇ dzeuˇ yaꞈ-euˬ yaw haiˬ jeˬ baˬ da neh, naw maꞈ yawˬ haˇ yawˬ ha nui daˆ daˆ tehꞈ-a.

⁴⁴ Naw maꞈ neh mˇ-euˬ yaw haiˬ jeˬ-ahˇ geuˇ ni ngaˇ maˬ jahˇ nehˬ-ehˇ, ngaˬ-euˬ tsawˇ myahˇ maˬ ya cawˆ-iˇ ni yahˇ-awˇ ngaˇ mˇ ngeh, ngaˇ Sahˬpaˬ Miˬyehˇ pyeuꞈ-eu naw maꞈ ya siˬ duˬ tehꞈ-a” lehˇ, Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ ehˇ-eu meh.

Laꞈ oˆ kʼahˬ-ahˇ doꞈ-eu miˬ dzaˬ

⁴⁵ Sahˬpaˬ Miˬyehˇ ngaˬ-ahˇ heu loꞈ-ehˇ ehˇ-eu meh.

⁴⁶ “Tsawˇ haˬ zaˬ-oˇ, laꞈ oˆ paw kʼahˬ-ahˇ haw gʼeh-iˬ sheˇ. Laꞈ oˆ paw kʼahˬ-ahˇ zaw leˇ-eu dawˬ ngehˬ-awˇ, laꞈ oˆ paw kʼahˬ-euˬ aˇ bawˇ sahˬ kʼaˆ-ahˇ ngaˬ-euˬ gʼaˇ duˬ ngehˬ dah nehˬ sheˇ.

⁴⁷ Laꞈ oˆ paw kʼahˬ-euˬ aˇ bawˇ sahˬ kʼaˆ-ahˇ, Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ aˬ joˆ-ehˇ ehˇ luꞈ-eu gaˇ kawˆ ehˇ nehˬ-iˬ sheˇ. Haw taˬ yawˬ. Ngaˇ miˬ dzaˬ keuˬ-awˇ, nawˬ-euˬ laꞈ kʼoeˇ kʼaˇ dehꞈ-eu aˇ bawˇ yaw jmˬ yaw gui dawˬ tawˆ luꞈ bi puiˆ dzaˬ jiˇ ma. Miˬ dzaˬ kʼoeˇ-ahˇ tiˬ jeˬ neh-iˬ maˬ laˆ miˆ nya-ehˇ, laꞈ oˆ kʼahˬ-ahˇ neh laꞈ taˆ kʼahˬ-ahˇ keuˆ ni doꞈ nyawˬ leˇ-awˇ, miˬ lmˇ kʼoeˇ yawˬ gʼaˬ na luꞈ-ahˇ lahˇ leˇ tehꞈ-a.

⁴⁸ Sahˬpaˬ Miˬyehˇ pyeuꞈ-eu ngaˬ neh miˬ dzaˬ kʼoeˇ keuˬ-euˬ yawˬ gʼaˬ na luꞈ mawˇ-awˇ, tiˬ gʼaˬ-iˬ maˬ laˆ miˆ nya ni ya shaˬ tehꞈ-a.”

⁴⁹ Ehˇ kʼawꞈ, ngaˇ heu loꞈ-ehˇ shaˇ ju-euˬ ma. “Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ-oˇ, ngaˬ-ahˇ kʼoeˇ loꞈ-ehˇ taˬ bi ehˇ-iˇ neh laꞈ. Ngaˇ aˬ myah luꞈ dawˬ yehˆ tehꞈ-ehˇ yehˆ yehˆ-ehˇ jawˇ meh lehˇ aˬ yawꞈ maꞈ ehˇ luꞈ meh.”