Yeˬsaˬgeˬlaˇ 19 - Akha

Tsawˇ ngoeˇ ngoeˇ-eu caˇ dawˬ

¹ Iˇsaˬleˬlaˆ sahˬ paˬ zaˬ yo nyiˬ gʼaˬ gʼaˇ duˬ, caˇ dawˬ heu bymˇ caˇ-awˬ lehˇ Miˬyehˇ ngaˬ-ahˇ ehˇ-eu meh.

² Nawˬ ha aˬ ma aˇ laˬ jaˬ shiˇ, haiˬ-eu jaˬ shiˇ deuˬ yaw kaˬ-ahˇ, aˬ yawꞈ-euˬ zaˬ sheuˬ huiˬ-euˬ meh.

³ Aˬ yawꞈ-euˬ zaˬ jaˬ shiˇ tiˬ mawˇ, bo saˆ huiˬ-awˇ loˆ laˇ-euˬ meh. Jeˬ zaˬ kawꞈ sehꞈ-eu dzaw bym-awˇ, tsawˇ haˬ-ahˇ kawꞈ sehꞈ dzaˬ-euˬ meh.

⁴ Miˇ kʼahˬ tsawˇ jeuˬ tsawˇ ca dawˬ tawˆ, aˬ yawꞈ gaˇ kawˆ luiˬ gʼa laˇ-awˇ, shaˬ duˬ duˬ-awˇ laˆ mi-euˬ meh. Shmˇ kuˆ seuˬ neh gʼeu doˆ laꞈ-awˇ, Iˇjiˇtuˆ-ahˇ tsahˇ gʼeh-euˬ meh.

⁵ Aˬ ma kʼoeˇ mawˇ noeˬ tmˬ-euˬ jeˬ, cawˆ-iˇ shaw-euˬ gaˇ ya mawˇ ngeh, zaˬ tiˬ mawˇ paˇ bo saˆ huiˬ-awˇ, jaˬ shiˇ yaw loˆ huiˬ laˇ-euˬ meh.

⁶ Aˬ yawꞈ huiˬ loꞈ loˆ loꞈ laˇ ngeh, jaˬ shiˇ baˬ maꞈ nehˬ-ehˇ gaˆ-awˇ, jeˬ zaˬ kawꞈ sehꞈ-eu dzaw bym ngeh, tsawˇ haˬ paˇ kawꞈ sehꞈ dzaˬ-euˬ meh.

⁷ Ziꞈ-eu taˆ deuˬ laˆ byaˆ nehˬ-awˇ, meuˬ deuˬ laˆ cawˆ jiˇ nehˬ-euˬ meh. Aˬ yawꞈ joeˬ gaˇ kʼaˇ ya gaˬ ngeh, miˇ kʼahˬ zaˬ laˇ baˇ-iˇ-eu meh.

⁸ Miˇ ma oeˬ coeˇ jawˇ byah taˬ-euˬ, miˇ kʼahˬ tsawˇ jeuˬ dawˬ tawˆ dawˬ lawˆ, yawꞈ-ahˇ nyehꞈ-eu uiˬ laˇ-euˬ meh. Aˬ yawꞈ maꞈ bawˆ gʼa sheu taw-awˇ, aˬ yawꞈ kʼoeˇ gaˇ paꞈ leˇ-euˬ meh.

⁹ Aˬ yawꞈ-ahˇ kuˆ kaꞈ lahˇ taˬ-awˇ, Baˬbuˇloˬ-euˬ sahˬ paˬ jawˇ gaˇ, bi nyehꞈ ha keuˆ nehˬ-iˇ-euˬ meh. Iˇsaˬleˬlaˆ gawˬ jawˬ doe ni, aˬ yawꞈ joeˬ-eu maˬ bi gaˬ ni, yaw muiˬ-ehˇ kaꞈ lahˇ taˬ-euˬ meh.

¹⁰ Nawˬ ha aˬ ma aˬ gaꞈ baw duˆ, lawˇ baˬ gawˆ taw dehꞈ luꞈ-eu meh. Iˇ cuꞈ tiˬ loꞈ za-eu miˇ neh, aˇ paꞈ sahˇ-awˇ aˇ siˬ loˆ meh.

¹¹ Uˬ pyaˬ uˬ laꞈ yaw deuˇ miˇ neh, dzoeˬ dzaˬ gawˬ yoeˬ pyeuꞈ laˇ-euˬ meh. Mˬ dmˇ tuˆ ni goˇ-eu miˇ neh, aˇ paꞈ sahˇ-awˇ goˇ dui dui gaˇ, yawˬ gʼaˬ na luꞈ mawˇ nya-eu meh.

¹² Ehˇ kʼawꞈ nui ma pehˇ-eu jeˬ neh gʼawˇ lehˆ-awˇ biˬ dzeh nehˬ-euˬ meh. Nahˇ ma doˆ kʼehˬ paw neh oe-euˬ lahˇ dui dui-eu jaˬ lehˇ baˬ da, aˇ siˬ nyoeˬ jiˇ koˆ jiˇ-euˬ meh. Uˬ pyaˬ uˬ laꞈ koˆ-iˇ jiˇ-awˇ, miˬ dzaˬ bi keuˬ puiˆ dzeh-euˬ meh.

¹³ Kʼaˇ shuiꞈ deh yaˇ koˆ dui dui-awˇ, iˇ cuꞈ tiˬ pawꞈ-iˬ maˬ jaˆ gaˇ, nymˬ-mˇ bi ka paˇ taˬ-euˬ meh.

¹⁴ Uˬ neh-ahˇ miˬ dzaˬ myawꞈ keuˆ-awˇ, uˬ pyaˬ hawˇ-eu aˇ siˬ deuˬ-ahˇ, miˬ dzaˬ neh bi puiˆ dzaˬ-euˬ meh. Uˬ pyaˬ uˬ laꞈ maˬ paˇ deuˇ-ehˇ, dzoeˬ dzaˬ gawˬ yoeˬ maˬ paˇ pyeuꞈ meh. Heu-aˬ, tsawˇ ngoeˇ ngoeˇ-eu caˇ dawˬ meh. Caˇ dawˬ heu bymˇ aˬ myah luꞈ caˇ luꞈ-eu meh.