Yeˬsaˬgeˬlaˇ 17 - Akha

Kʼaˬ dzeˇ hawˇ-eu aˬ gaꞈ baw duˆ gaˇ kawˆ yaw jeˬ ma jeˬ dawˬ

¹ Sahˬpaˬ Miˬyehˇ ngaˬ-ahˇ heu loꞈ-ehˇ ehˇ-eu meh.

² “Tsawˇ haˬ zaˬ-oˇ, Iˇsaˬleˬlaˆ tsawˇ haˬ deuˬ-ahˇ yaw jeˬ ma jeˬ gaˇ kawˆ tiˬ hmˬ ja mehˬ nehˬ-awˬ.

³ Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ pyeuꞈ-eu ngaˇ, aˬ yawꞈ maꞈ-ahˇ heu loꞈ-ehˇ ehˇ-eu gaˇ kawˆ bi siˬ-awˬ. Muiˬ dui dui-eu caꞈ hm tsoꞈ-awˇ, aˬ dahˇ mahˇ dui dui-eu kʼaˬ dzeˇ dzeˇ ma tiˬ mawˇ jawˇ-eu meh. Leˬbaˬnoˬ gawˬ jawˬ-ahˇ aˬ yawꞈ zaw gʼeh-awˇ, shuˬ liˇ aˇ bawˇ-euˬ uˬ dzo toˆ tsehˆ-euˬ meh.

⁴ Shuˬ liˇ uˬ dzo kʼoeˇ, jeˬ gaꞈ jeˬ ka mˇ-eu miˇ kʼahˬ-ahˇ aˬ yawꞈ tsi kʼoꞈ leꞈ-awˇ, baw gaꞈ deuˬ-euˬ meuˬ-ahˇ tsi taˬ-euˬ meh.

⁵ Kʼoeˇ naˇ, Iˇsaˬleˬlaˆ miˇ kʼahˬ-ahˇ jaˆ-eu aˇ bawˇ aˇ ji tiˬ ji aˬ yawꞈ tsi-awˇ iˇ cuꞈ maˬ tsehˆ leˇ ni jaˆ-eu miˇ tsaˬ miˇ muiˬ muiˬ-eu jawˇ duˬ-ahˇ ka taˬ-euˬ meh.

⁶ Aˇ bawˬ kʼoeˇ mehˇ laˇ-awˇ, yaw awˆ awˆ-ehˇ gʼeh-eu huiˬ dui dui-eu aˬ gaꞈ baw duˆ pyeuꞈ laˇ-euˬ meh. Uˬ pyaˬ uˬ laꞈ deuˬ kʼoeˇ taˆ paw kʼaˬ dzeˇ jawˇ paw ciˬ pyawˇ-awˇ, duˬ ciˇ yaw naꞈ-ahˇ toeˬ-iˇ-euˬ meh. Aˬ gaꞈ ciˇ ni-ahˇ uˬ pyaˬ uˬ laꞈ hawˇ-eu aˇ paꞈ tiˬ gʼoeˬ tsoꞈ kaˬ taˬ-euˬ meh.

⁷ “Caꞈ hm tsoꞈ myaˬ dui dui-awˇ, aˬ dahˇ mahˇ dui dui-eu kʼaˬ dzeˇ dzeˇ ma tiˬ mawˇ paˇ jawˇ-eu meh. Aˬ gaꞈ baw duˆ kʼoeˇ duˆ-aˬ, aˬ yawꞈ dehꞈ luꞈ-eu yaˇ kmˇ-ahˇ jaˆ-eu iˇ cuꞈ myaˆ maˬ tseˇ, kʼaˬ dzeˇ kʼoeˇ mawˇ iˇ cuꞈ biꞈ laꞈ tehꞈ-a lehˇ, noeˬ tmˬ-awˇ aˬ yawꞈ-euˬ duˬ ciˇ maˬ ehˇ, aˇ paꞈ maˬ ehˇ, kʼaˬ dzeˇ kʼoeˇ mawˇ jawˇ paw ciˬ pyawˇ-euˬ meh.

⁸ Ehˇ kʼawꞈ, miˇ muiˬ muiˬ-eu jawˇ duˬ-ahˇ ka taˬ-euˬ miˇ neh, aˇ paꞈ sahˇ le, aˇ siˬ loˆ le-awˇ, yaw shehꞈ kʼahˬ sehˇ jaˆ-eu aˬ gaꞈ baw duˆ pyeuꞈ laˇ nya-eu meh.

⁹ “Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ pyeuꞈ-eu ngaˇ heu loꞈ-ehˇ naˇ haˬ mawꞈ-eu ma. Aˬ gaꞈ baw duˆ kʼoeˇ maˬ shiˇ ni mehˇ laˇ nya tehꞈ-a loˇ. Kʼaˬ dzeˇ yaw beh mawˇ aˬ gaꞈ baw duˆ kʼoeˇ-ahˇ maˬ gʼawˇ lehˆ doˆ ni byehˇ tehꞈ-a loˇ. Aˇ siˬ shawˆ dzeh-awˇ, uˬ laꞈ ngawˬ kʼehꞈ-awˇ bi nyoeˬ-iˇ ni maˬ jahˇ-ehˇ byehˇ nehˬ tehꞈ-a loˇ. Baw duˆ kʼoeˇ gʼawˇ lehˆ doˆ-eu gʼaˇ duˬ gʼaˬ teu naˆ naˆ-ehˇ maˬ jiˇ-aˇ. Tsawˇ haˬ gʼawˬ mya ni maˬ loˬ-aˇ.

¹⁰ Baw duˆ kʼoeˇ duˆ ka dehꞈ-euˬ kʼawꞈ, dehꞈ-iˇ nya tehꞈ-a loˇ. Nahˇ ma doˆ kʼehˬ paw neh baw gʼeh laꞈ-euˬ jaˬ lehˇ zaw leˇ ngeh, maˬ nyoeˬ-iˇ ni jaˆ coeˇ tehꞈ-a loˇ. Aˬ yawꞈ-ahˇ ka dehꞈ-euˬ tsahˇ-ahˇ maˬ nyoeˬ-iˇ ni jaˆ coeˇ tehꞈ-a loˇ.”

Yaw jeˬ ma jeˬ kʼoeˇ-euˬ dawˬ tsuiꞈ

¹¹ Sahˬpaˬ Miˬyehˇ ngaˬ-ahˇ heu loꞈ-ehˇ ehˇ-eu meh.

¹² “Yaw jeˬ ma jeˬ kʼoeˇ-euˬ gaˇ kawˆ dawˬ tsuiꞈ siˬ nya ma loˇ lehˇ, ngaˬ-ahˇ puiˬ-eu tsawˇ haˬ kʼoeˇ deuˬ-ahˇ naˇ haˬ-iˬ sheˇ. Baˬbuˇloˬ sahˬpaˬ Yeˬluˇsaˬlehˬ meuˬ-ahˇ oe-awˇ, Yuˇdaˆ sahˬpaˬ hawˇ-eu gaˇ mˇ-eu yaw huiˬ yaw mahˇ deuˬ-ahˇ Baˬbuˇloˬ miˇ kʼahˬ-ahˇ nyehꞈ ka gʼeh-euˬ meh.

¹³ Sahˬpaˬ-euˬ aˇ jeuˬ aˇ ca nymˇ jiˇ tiˬ nymˇ-ahˇ aˬ yawꞈ tseˇ doˆ-awˇ, saˇ jaˇ dzaˬ-awˇ bi kamˬ-eu laꞈ kʼoeˇ sahˬpaˬ ka nehˬ yaꞈ-euˬ meh. Miˇ kʼahˬ kʼoeˇ taˆ aˬ yuiꞈ aˬ tsu kʼaˇ geuꞈ-euˬ deuˬ-ahˇ aˬ yawꞈ nyehꞈ gʼeh jiˇ-euˬ meh.

¹⁴ Miˇ kʼahˬ kʼoeˇ kʼahˬ maˬ paˇ tuˇ laˇ nya-ehˇ, aˬ yawꞈ nehˬ-ehˇ dzaˬ taˬ yaꞈ-eu saˇ jaˇ-ahˇ maˬ bi puiˬ-eu gʼaˇ duˬ aˬ yawꞈ kʼoeˇ loꞈ-ehˇ jahˇ yaꞈ-euˬ meh.

¹⁵ Ehˇ kʼawꞈ, Yuˇdaˆ sahˬpaˬ puiˬ-awˇ, mahˬ deuˬ hawˇ-eu yehˇ deuˬ gʼawˬ mya ni caw ba nehˬ laꞈ gaˇ noeˬ tmˬ-awˇ, Iˇjiˇtuˆ sahˬpaˬ jawˇ gaˇ tsawˇ haˬ pyehˬ gʼeh-euˬ meh. Aˬ yawꞈ kʼoeˇ loꞈ-ehˇ leh jeh pyeuꞈ nya tehꞈ-a loˇ. Aˬ yawꞈ kʼoeˇ loꞈ-ehˇ teuˆ-awˇ teuˆ buˬ nya tehꞈ-a loˇ. Aˬ yawꞈ saˇ jaˇ puiˬ-euˬ baˬ da neh, kʼehˬ-eu kʼaˆ-eu jeˬ-ahˇ maˬ dzeuˇ-iˇ nya-a.”

¹⁶ Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ ehˇ-eu, “Ngaˇ dehꞈ luꞈ-eu Miˬyehˇ kʼaˇ pyeuꞈ kʼoeˇ keuˆ ni, sahˬpaˬ heu gʼaˬ Baˬbuˇloˬ miˇ kʼahˬ-ahˇ ya shiˇ-eu yaw duˬ baw tehꞈ-a. Aˬ jeˬ miˇ neh ehˇ naˇ, yawˬ ha neh kamˬ tsehˆ-euˬ dawˬ-ahˇ maˬ caw teh-eu uˬ taꞈ, aˬ yawꞈ-ahˇ sahˬpaˬ ka nehˬ yaꞈ-euˬ Baˬbuˇloˬ sahˬpaˬ nehˬ-ehˇ dzaˬ-euˬ saˇ jaˇ-ahˇ, aˬ yawꞈ puiˬ-euˬ meh.

¹⁷ Tsawˇ haˬ gʼawˬ mya ni sehꞈ-eu gʼaˇ duˬ, Baˬbuˇloˬ tsawˇ haˬ deuˬ miˇ tsaˬ ciˬ goˇ-awˇ kuˬ kaˬ duˬ le ngeh jawˇ, gʼaˬ kʼaˆ dui dui-eu Iˇjiˇtuˆ guiˇ maꞈ kʼawꞈ aˬ yawꞈ-ahˇ maˬ caw ba nehˬ nya-a.

¹⁸ Aˬ yawꞈ neh kamˬ taˬ-euˬ dawˬ hawˇ-eu, aˬ yawꞈ neh dzaˬ taˬ-euˬ saˇ jaˇ-ahˇ aˬ yawꞈ puiˬ-euˬ meh. Heu deuˬ dawˬ tawˆ luꞈ-ahˇ aˬ yawꞈ mˇ-euˬ miˇ neh, nymˬ-mˇ aˬ yawꞈ maˬ paˇ law-iˇ nya meh.”

¹⁹ Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ ehˇ-eu, “Ngaˬ-euˬ tsawˇ myahˇ uˬ moˆ aˬ yawꞈ neh dzaˬ taˬ-euˬ saˇ jaˇ-ahˇ aˬ yawꞈ puiˬ-euˬ miˇ neh, ngaˇ dehꞈ luꞈ-eu Miˬyehˇ kʼaˇ pyeuꞈ kʼoeˇ keuˆ ni, aˬ yawꞈ-ahˇ ngaˇ maˬ kʼehˬ-ehˇ maˬ byehˇ.

²⁰ Shaˬ jiˇ beuˆ-eu tsawˇ haˬ zmˬ-euˬ za neh, aˬ yawꞈ-ahˇ dzeh pymˬ-awˇ nyehꞈ ma. Aˬ yawꞈ ngaˬ-ahˇ saˇ jaˇ puiˬ-euˬ miˇ neh, Baˬbuˇloˬ miˇ kʼahˬ-ahˇ nyehꞈ gʼeh-awˇ, kʼoeˇ gaˇ kʼehˬ nehˬ ma.

²¹ Nya dui kʼaˬ dui dui-eu aˬ yawꞈ-euˬ yehˇ deuˬ guiˇ deuˆ gaˇ bi sehꞈ jiˇ-awˇ, maˬ bi sehꞈ ni dzeuˇ-iˇ-euˬ yehˇ deuˬ tiˬ paw tiˬ gʼaˬ-ehˇ cehˆ byaˆ jiˇ tehꞈ-a. Kʼoeˇ ngeh jawˇ, Sahˬpaˬ Miˬyehˇ pyeuꞈ-eu ngaˬ neh ngehˬ-euˬ dawˬ naw maꞈ-ahˇ siˬ duˬ laˇ tehꞈ-a.”

Miˬyehˇ biꞈ-euˬ noeˬ tmˬ duˬ

²² Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ heu loꞈ-ehˇ ehˇ-eu meh. “Shuˬ liˇ aˇ bawˇ bawˇ goˇ, uˬ duˬ baw nmˬ ngaˇ tseuˆ tsehˆ-awˇ, gawˬ jawˬ yaw goˇ-ahˇ ngaˇ ka ma.

²³ Iˇsaˬleˬlaˆ gawˬ jawˬ laꞈ kʼoeˇ, goˇ dzehˬ-eu jawˬ kʼoeˇ taˆ ka ma. Uˬ laꞈ sahˇ-awˇ aˇ siˬ loˆ-eu, kʼahˬ sehˇ za-eu siˬ daˬ pyeuꞈ-awˇ, aˇ jiˇ yawˬ jeˬ na luꞈ kuꞈ ni, aˇ bawˇ naˇ shmˇ awˆ le tehꞈ-a.

²⁴ Ngaˇ Sahˬpaˬ Miˬyehˇ ngeuˇ meh lehˇ, miˇ kʼahˇ laꞈ kʼoeˇ dehꞈ-eu aˇ bawˇ, dawˬ tawˆ luꞈ siˬ duˬ jiˇ tehꞈ-a. Bawˇ goˇ deuˬ-ahˇ ngaˇ tuˇ cuˬ-awˇ, bawˇ awˆ deuˬ-ahˇ bi goˇ laˇ ma. Bawˇ nyoeˇ deuˬ-ahˇ bi nyoeˬ-iˇ-awˇ, baw guˇ deuˬ-ahˇ bi nyoeˇ laˇ ma. Sahˬpaˬ Miˬyehˇ pyeuꞈ-eu ngaˇ heu loꞈ-ehˇ ehˇ-eu ma. Ngaˬ neh kʼaˇ ehˇ taˬ-euˬ jeˬ ngaˇ mˇ ma.