Yeˬsaˬgeˬlaˇ 15 - Akha

Aˬ gaꞈ baw duˆ gaˇ kawˆ yaw jeˬ ma jeˬ

¹ Sahˬpaˬ Miˬyehˇ ngaˬ-ahˇ heu loꞈ-ehˇ ehˇ-eu meh.

² “Tsawˇ haˬ zaˬ-oˇ, aˬ gaꞈ baw duˆ tiˬ duˆ, aˇ bawˇ tiˬ bawˇ-ahˇ aˬ joˆ-ehˇ shaˇ cehˆ nya nmˇ. Aˬ gaꞈ ciˇ ni ni zaˬ tiˬ ni-aˬ, aˇ bawˇ sahˬ kʼaˆ-ahˇ dehꞈ-eu aˇ bawˇ tiˬ bawˇ-ahˇ ciˬ cehˆ haw naˇ, aˬ jeˬ gaˇ dahˇ tsoeˬ nmˇ.

³ Aˬ gaꞈ ciˇ ni kʼoeˇ nawˇ yuˇ-awˇ tiˬ jeˬ paˬ jahˇ gaˇ geuꞈ nya te loˇ. Daˇ taꞈ geuꞈ-awˇ tiˬ jeˬ paˬ ciˬ ceuˬ nya ta loˇ.

⁴ Miˬ dzaˬ gʼoˆ doꞈ-eu maˬ ngeuˇ naˇ gaˇ dahˇ maˬ tsoeˬ-a. Kʼoeˇ dzeˇ heu dzeˇ puiˆ dzaˬ jiˇ-awˇ, gʼahˇ ceh puiˆ jawˬ jawˬ-awˇ puiˆ kuˇ taˬ-euˬ kʼoeˇ nawˇ yuˇ-awˇ tiˬ jeˬ paˬ jahˇ gaˇ geuꞈ nya meh loˇ.

⁵ Maˬ puiˆ mi naˆ-ehˇ kʼawꞈ, tiˬ jeˬ-iˬ gaˇ dahˇ tsoeˬ-eu maˬ ngeuˇ-eu-aˬ, puiˆ kuˇ gʼaˬ miˇ tsa aˬ jeˬ paˇ geuꞈ nya nmˇ.”

⁶ Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ heu loꞈ-ehˇ ehˇ-eu meh. “Bawˇ tsahˬ-ahˇ dehꞈ-eu aˬ gaꞈ ciˇ ni yuˇ-awˇ miˬ dzaˬ-ahˇ dzeh puiˆ-eu loꞈ-ehˇ, Yeˬluˇsaˬlehˬ meuˬ-ahˇ jawˇ-eu tsawˇ haˬ deuˬ-ahˇ ngaˇ jahˇ nehˬ ma.

⁷ Aˬ yawꞈ maꞈ-ahˇ ngaˇ myaˆ haw maˬ cawˬ nehˬ. Aˬ yawꞈ maꞈ miˬ dzaˬ-ahˇ cehˆ dzeuˇ-euˬ kʼawꞈ, miˬ dzaˬ neh paˇ bi puiˆ dzaˬ tehꞈ-a. Aˬ yawꞈ maꞈ-ahˇ ngaˇ kʼehˬ nehˬ ngeh, ngaˇ Sahˬpaˬ Miˬyehˇ pyeuꞈ-eu gaˇ kawˆ naw maꞈ ya siˬ duˬ tehꞈ-a.

⁸ Aˬ yawꞈ maꞈ ngaˬ-ahˇ saˇ jaˇ maˬ ziꞈ-eu miˇ neh, aˬ yawꞈ maꞈ-euˬ miˇ kʼahˬ bawˇ tsahˬ bawˇ dahˇ pyeuꞈ-iˇ ni ngaˇ jahˇ nehˬ ma” lehˇ, Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ ehˇ-eu meh.