Yeˬsaˬgeˬlaˇ 14 - Akha

Tahˬ pahˬ aˬ ma mawˇ kawˇ-ahˇ uˬ duˬ tahˬ gaˇ Miˬyehˇ bye-eu

¹ Iˇsaˬleˬlaˆ tsawˇ haˬ aˬ yuiꞈ aˬ tsu tiˬ paˆ na deuˬ ngaˇ jawˇ gaˇ laˇ-awˇ, Sahˬpaˬ Miˬyehˇ-euˬ nui kʼahˇ gaˇ kawˆ ja uˇ laˇ-euˬ meh.

² Kʼoeˇ ngeh, Sahˬpaˬ Miˬyehˇ ngaˬ-ahˇ heu loꞈ-ehˇ ehˇ-eu meh.

³ “Tsawˇ haˬ zaˬ-oˇ, tsawˇ haˬ heu deuˬ tahˬ pahˬ aˬ ma mawˇ kawˇ deuˬ-ahˇ nui ma gʼawˇ mawˇ a nehˬ taˬ-awˇ, tahˬ pahˬ aˬ ma mawˇ kawˇ neh iˬ baˇ gaˇ ma-ahˇ bi sheuˬ gʼeh-euˬ meh. Aˬ yawꞈ maꞈ-ahˇ ngaˇ dawˬ ngehˬ cawˬ nahˇ tehꞈ-a lehˇ aˬ yawꞈ maꞈ noeˬ-eu ngaˇ.

⁴ “Kʼoeˇ miˇ neh, Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ pyeuꞈ-eu ngaˇ heu loꞈ-ehˇ ehˇ-eu meh lehˇ aˬ yawꞈ maꞈ-ahˇ dzawˇ nehˬ-awˬ. Tahˬ pahˬ aˬ ma mawˇ kawˇ deuˬ-ahˇ nui ma gʼawˇ mawˇ a nehˬ taˬ-awˇ, tahˬ pahˬ aˬ ma mawˇ kawˇ neh iˬ baˇ gaˇ ma-ahˇ bi sheuˬ gʼeh-euˬ Iˇsaˬleˬlaˆ tsawˇ haˬ aˬ geu gʼaˬ maˬ kaˬ, Miˬyehˇ gʼaˇ duˬ ngehˬ dah-eu tsawˇ haˬ jawˇ gaˇ ja uˇ laˇ naˇ, aˬ yawꞈ-euˬ tahˬ pahˬ aˬ ma mawˇ kawˇ deuˬ-ahˇ oꞈ-eu ngaˬ-euˬ dawˬ bi gaˬ kʼoꞈ ma.

⁵ Tahˬ pahˬ aˬ ma mawˇ kawˇ kʼoeˇ deuˬ, Iˇsaˬleˬlaˆ tsawˇ haˬ deuˬ-ahˇ ngaˇ jawˇ gaˇ neh sheuˬ byoˆ gʼeh-euˬ meh. Ehˇ kʼawꞈ, aˬ yawꞈ maꞈ ngaˬ-ahˇ saˇ jaˇ paˇ ziꞈ kʼoꞈ laˇ tehꞈ-a lehˇ ngaˇ noeˬ tmˬ-euˬ ma.

⁶ “Nymˬ-mˇ poˆ jawˇ, Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ pyeuꞈ-eu ngaˬ-eu dawˬ, Iˇsaˬleˬlaˆ tsawˇ haˬ deuˬ-ahˇ ehˇ nehˬ-awˬ. Nui daˆ daˆ laˇ paˬ-ehˇ gʼeh-eu naw maꞈ-euˬ tahˬ pahˬ aˬ ma mawˇ kawˇ deuˬ-ahˇ byehˇ dzeh-awˇ, ngaˇ jawˇ gaˇ gʼoꞈ laˇ-awˬ lehˇ ehˇ nehˬ-awˬ.

⁷ “Iˇsaˬleˬlaˆ tsawˇ haˬ tiˬ gʼaˬ na maˬ ehˇ, Iˇsaˬleˬlaˆ tsawˇ haˬ deuˬ nehˬ-ehˇ jawˇ-eu aˬ cawˬ tsawˇ jeuˬ tiˬ gʼaˬ na maˬ ehˇ, ngaˬ-ahˇ byehˇ dzeh-awˇ tahˬ pahˬ aˬ ma mawˇ kawˇ deuˬ-ahˇ uˬ duˬ tahˬ luꞈ-eu laꞈ kʼoeˇ, Miˬyehˇ gʼaˇ duˬ ngehˬ dah-eu gʼaˬ jawˇ gaˇ ja uˇ laˇ naˇ, Sahˬpaˬ Miˬyehˇ pyeuꞈ-eu ngaˇ aˬ yawꞈ-ahˇ oꞈ-eu dawˬ bi gaˬ kʼoꞈ ma.

⁸ Aˬ yawꞈ-ahˇ ngaˇ myaˆ maˬ haw cawˬ nehˬ ni, aˬ yawꞈ-ahˇ haw-awˇ aˬ cawˬ-ahˇ siˬ leˇ paˬ-ehˇ ngaˇ jahˇ nehˬ ma. Ngaˇ Sahˬpaˬ Miˬyehˇ pyeuꞈ-eu naw maꞈ-ahˇ siˬ leˇ ni, ngaˬ-euˬ tsawˇ haˬ-euˬ baꞈ dzah laꞈ kʼoeˇ, aˬ yawꞈ-ahˇ paˬ tseuˆ tseuˆ dzeh nehˬ ma.

⁹ “Miˬyehˇ gʼaˇ duˬ ngehˬ dah-eu gʼaˬ mehˇ shuiˇ bi shuiˇ-awˇ maˬ tsaˬ-eu jeˬ ehˇ kʼoꞈ nehˬ naˇ, mehˇ shuiˇ shuiˇ-euˬ gʼaˬ-aˬ, Sahˬpaˬ Miˬyehˇ pyeuꞈ-eu ngaˇ ma. Iˇsaˬleˬlaˆ tsawˇ jeuˬ laꞈ kʼoeˇ aˬ yawꞈ-ahˇ paˬ tseuˆ tseuˆ dzeh ma.

¹⁰ Miˬyehˇ gʼaˇ duˬ ngehˬ dah-eu gʼaˬ maˬ ehˇ, aˬ yawꞈ-ahˇ ja uˇ leˇ-euˬ gʼaˬ maˬ ehˇ, nyiˬ gʼaˬ luꞈ-ahˇ tiˬ kawˆ loꞈ-ehˇ kʼehˬ nehˬ ma.

¹¹ Iˇsaˬleˬlaˆ tsawˇ haˬ deuˬ ngaˬ-ahˇ maˬ bi byehˇ dzeh-eu gʼaˇ duˬ maˬ ehˇ, aˬ yawꞈ maꞈ iˬ baˇ mˇ-eu laꞈ kʼoeˇ yawˬ haˇ yawˬ ha maˬ bi laˆ jawꞈ-eu gʼaˇ duˬ maˬ ehˇ, ngaˇ kʼoeˇ loꞈ-ehˇ jahˇ mehˬ nehˬ ma. Aˬ yawꞈ maꞈ ngaˬ-euˬ tsawˇ haˬ ya bi pyeuꞈ-awˇ ngaˇ aˬ yawꞈ maꞈ-euˬ Miˬyehˇ pyeuꞈ-eu meh” lehˇ, Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ ehˇ-eu meh.

Noˇaˬ, Daˬneˬlaˇ, Yawˇbaˆ

¹² Sahˬpaˬ Miˬyehˇ ngaˬ-ahˇ heu loꞈ-ehˇ ehˇ-eu meh.

¹³ “Tsawˇ haˬ zaˬ-oˇ, miˇ kʼahˬ tiˬ kʼahˬ iˬ baˇ mˇ-awˇ ngaˬ-ahˇ saˇ jaˇ maˬ ziꞈ naˇ, ngaˬ-euˬ aˬ laꞈ cawˬ ja-awˇ, aˬ yawꞈ maꞈ dzaˬ dzaˬ dawˇ dawˇ sha ahˇ-eu gaˇ ma ngaˇ laˆ tsoeˬ nehˬ ma. Mehꞈ-eu shuꞈ-eu jeˬ bi keuˆ le-awˇ, tsawˇ haˬ maˬ ehˇ, jeˬ zaˬ maˬ ehˇ, bi shiˇ ma.

¹⁴ Noˇaˬ, Daˬneˬlaˇ hawˇ-eu Yawˇbaˆ aˬ ha smˇ gʼaˬ paˇ dehꞈ law hawˇ kʼawꞈ, aˬ yawꞈ ha neh mˇ-euˬ yaw muiˬ jeˬ baˬ da neh, aˬ yawꞈ ha smˇ gʼaˬ-ahˇ maˬ ngeuˇ naˇ, aˬ cawˬ-ahˇ maˬ ka kʼoꞈ nehˬ nya-aˇ” lehˇ, Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ ehˇ-eu meh.

¹⁵ “Maˬ ngeuˇ naˇ, tsawˇ haˬ-ahˇ laˆ sehꞈ-eu jeˬ zaˬ yaw haiˬ deuˬ ngaˇ pyehˬ gʼeh leꞈ-awˇ, miˇ kʼahˬ kʼoeˇ kʼahˬ laꞈ kʼoeˇ tsawˇ haˬ tiˬ gʼaˬ-iˬ maˬ iˇ maˬ laˇ nya ni bi laˆ shaˬ ma.

¹⁶ Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ pyeuꞈ-eu ngaˇ, dehˬ luꞈ-eu Miˬyehˇ kʼaˇ pyeuꞈ kʼoeˇ keuˆ ni, tsawˇ haˬ kʼoeˇ smˇ gʼaˬ paˇ dehꞈ law hawˇ kʼawꞈ, yawˬ ha-euˬ uˬ kʼawˇ taꞈ-ehˇ dzeuˇ naˇ, yawˬ ha-euˬ zaˬ-ahˇ keuˆ ni maˬ ka kʼoꞈ nehˬ nya-aˇ lehˇ ehˇ tsehˆ-eu ma. Aˬ yawꞈ maꞈ yawˬ haˇ yawˬ ha ka kʼoꞈ gʼaˬ-euˬ taꞈ naˇ, miˇ kʼahˬ kʼoeˇ kʼahˬ kʼahˬ lah ni bawˇ tsahˬ bawˇ dahˇ ya pyeuꞈ tsehˆ gaˇ keuˆ tehꞈ-a.

¹⁷ “Maˬ ngeuˇ naˇ, miˇ kʼahˬ kʼoeˇ kʼahˬ kʼoeˇ taˆ guiˇ deuˆ-eu jeˬ bi keuˆ le-awˇ, tsawˇ haˬ hawˇ-eu jeˬ zaˬ deuˬ bi sehꞈ cuˆ-eu gʼaˇ duˬ, laˆ sehꞈ laˆ naˇ-eu keu ka deuˬ bi hehˇ ahˇ leꞈ ma.

¹⁸ Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ pyeuꞈ-eu ngaˇ dehꞈ luꞈ-eu Miˬyehˇ kʼaˇ pyeuꞈ kʼoeˇ keuˆ ni, tsawˇ haˬ kʼoeˇ smˇ gʼaˬ paˇ dehꞈ law hawˇ kʼawꞈ, yawˬ ha-euˬ uˬ kʼawˇ taꞈ-ehˇ dzeuˇ naˇ, yawˬ ha-euˬ zaˬ-ahˇ keuˆ ni maˬ ka kʼoꞈ nehˬ nya-aˇ lehˇ ehˇ tsehˆ-eu ma.

¹⁹ “Miˇ kʼahˬ kʼoeˇ kʼahˬ laꞈ kʼoeˇ yaw jaw naˇ-eu naˇ gawˇ gawˇ ma bi keuˆ le-awˇ, ngaˇ nui ma pehˇ-eu laꞈ kʼoeˇ tsawˇ haˬ hawˇ-eu jeˬ zaˬ gʼawˬ mya ni bi shiˇ naˇ,

²⁰ Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ pyeuꞈ-eu ngaˇ dehꞈ luꞈ-eu Miˬyehˇ kʼaˇ pyeuꞈ kʼoeˇ keuˆ ni, Noˇaˬ, Daˬneˬlaˇ hawˇ-eu Yawˇbaˆ aˬ ha smˇ gʼaˬ paˇ dehꞈ law hawˇ kʼawꞈ, yawˬ ha-euˬ uˬ kʼawˇ taꞈ-ehˇ dzeuˇ naˇ, yawˬ ha-euˬ zaˬ-ahˇ keuˆ ni maˬ ka kʼoꞈ nehˬ nya-aˇ lehˇ ehˇ tsehˆ-eu ma. Aˬ yawꞈ maꞈ neh mˇ-euˬ yaw muiˬ jeˬ-aˬ, yawˬ haˇ yawˬ ha ka kʼoꞈ nehˬ nya-eu tehꞈ meh.”

²¹ Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ heu loꞈ-ehˇ ehˇ-eu meh. “Doeˇ dui dui-eu kʼehˬ-eu kʼaˆ-eu oeˬ jeˬ pyeuꞈ-eu, guiˇ deuˆ-eu, mehꞈ-eu shuꞈ-eu, jeˬ zaˬ yaw haiˬ deuˬ hawˇ-eu, naˇ-eu gawˇ-eu heu oeˬ jeˬ Yeˬluˇsaˬlehˬ meuˬ kʼoeˇ taˆ ngaˇ bi keuˆ le-awˇ, tsawˇ haˬ hawˇ-eu jeˬ zaˬ deuˬ bi shiˇ ma.

²² Tsawˇ haˬ tiˬ gʼaˬ na dzeuˇ-iˇ-awˇ, aˬ yawꞈ-euˬ zaˬ deuˬ kʼawꞈ laˆ dzeuˇ nya naˇ, nawˇ jawˇ gaˇ laˇ doˆ tehꞈ-a. Aˬ yawꞈ maꞈ-ahˇ nawˇ ya mawˇ ngeh, aˬ yawꞈ maꞈ aˇ naˆ ni haiˬ-eu gaˇ kawˆ hawˇ-eu, Yeˬluˇsaˬlehˬ meuˬ-ahˇ ngaˬ neh kʼehˬ nehˬ kʼaˆ nehˬ-euˬ tsaˬ dui dui-eu gaˇ kawˆ, nawˇ ya siˬ duˬ tehꞈ-a.

²³ Kʼoeˇ ngeh jawˇ, ngaˬ neh kʼaˇ mˇ kʼaˇ shaˇ-euˬ jeˬ-aˬ, gaˇ kawˆ jaˆ-eu miˇ neh yaw muiˬ paˬ-ehˇ shaˇ noeˬ-awˇ mˇ-euˬ ngaˇ lehˇ, nawˇ ya siˬ duˬ tehꞈ” lehˇ, Baoˬ huiˬ-eu Sahˬpaˬ Miˬyehˇ ehˇ-eu meh.