Yeˬsaˬgeˬlaˇ 13 - Akha

Miˬyehˇ gʼaˇ duˬ ngehˬ dah-eu maˬ tsaˬ-eu deuˬ

¹ Sahˬpaˬ Miˬyehˇ ngaˬ-ahˇ heu loꞈ-ehˇ ehˇ-eu meh.

² “Tsawˇ haˬ zaˬ-oˇ, yawˬ ha neh kʼaˇ noeˬ doˆ-euˬ jeˬ Iˇsaˬleˬlaˆ tsawˇ haˬ deuˬ-ahˇ ngehˬ dah nehˬ-eu Miˬyehˇ gʼaˇ duˬ ngehˬ dah-eu kʼoeˇ deuˬ-ahˇ, nawˇ tiˬ poˆ paˇ ngehˬ dah nehˬ-awˬ. Sahˬpaˬ Miˬyehˇ ehˇ gaˇ naˇ haˬ-awˬ lehˇ, aˬ yawꞈ maꞈ-ahˇ ehˇ nehˬ-awˬ”

³ Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ heu loꞈ-ehˇ ehˇ-eu meh. “Miˬyehˇ gʼaˇ duˬ ngehˬ dah-eu aˬ dzawˬ aˇ gah heu deuˬ shaˬ zahˬ naꞈ dui dui tehꞈ-a. Aˬ yawꞈ maꞈ yawˬ ha neh kʼaˇ noeˬ doˆ-euˬ jeˬ ngehˬ dah-eu meh.

⁴ Iˇsaˬleˬlaˆ tsawˇ haˬ deuˬ-oˇ, naw maꞈ-ahˇ Miˬyehˇ gʼaˇ duˬ ngehˬ dah nehˬ-eu deuˬ-aˬ, meuˬ meuˬ tsoeˬ-ahˇ jawˇ-eu bawˇ tsahˬ aˬ kuiˬ loꞈ-ehˇ tiˬ jeˬ-iˬ gaˇ dahˇ maˬ tsoeˬ-a.

⁵ Meuˬ meuˬ lahˇ byaˆ-iˇ-euˬ tsahˇ-ahˇ aˬ yawꞈ maꞈ loꞈ piˇ-eu maˬ ngeuˇ-a. Meuˬ meuˬ lahˇ paˇ gawˬ muiˬ-eu kʼawꞈ maˬ geuˇ-a. Kʼoeˇ miˇ neh, Sahˬpaˬ Miˬyehˇ-euˬ aˇ nah keuˆ le-awˇ, guiˇ deuˆ ngeh, Iˇsaˬleˬlaˆ miˇ kʼahˬ-ahˇ maˬ ceh piˇ nya-a.

⁶ Aˬ yawꞈ maꞈ neh yaw sahˇ laꞈ kʼoeˇ ya siˬ ya mawˇ-euˬ jeˬ maˬ tsaˬ-ehˇ, aˬ yawꞈ maꞈ neh ngehˬ dah-euˬ jeˬ jaˬ myawꞈ myawꞈ-eu tehꞈ meh. Ngaˬ neh kʼehˇ gʼeh leꞈ-euˬ maˬ ngeuˇ gaˇ, ngaˬ-euˬ gʼaˇ duˬ ngehˬ dah-eu ma lehˇ aˬ yawꞈ maꞈ ehˇ-eu meh. Ehˇ kʼawꞈ, aˬ yawꞈ maꞈ neh kʼaˇ ehˇ-euˬ loꞈ-ehˇ pyeuꞈ laˇ tehꞈ-a lehˇ aˬ yawꞈ maꞈ noeˬ tmˬ-eu meh.

⁷ Aˬ yawꞈ maꞈ-ahˇ ngaˇ heu loꞈ-ehˇ ehˇ nehˬ-euˬ ma. Naw maꞈ neh yaw sahˇ laꞈ kʼoeˇ ya mawˇ-euˬ jeˬ maˬ tsaˬ-ehˇ, naw maꞈ neh mehˬ hu paw pyeuꞈ laˇ-eu gaˇ kawˆ ngehˬ dah taˬ-eu jeˬ jaˬ myawꞈ myawꞈ-euˬ tehꞈ meh. Ngaˬ-euˬ dawˬ ngehˬ dah-eu ma lehˇ naw maꞈ ehˇ kʼawꞈ, naw maꞈ-ahˇ ngaˬ neh dawˬ ngehˬ nehˬ-euˬ maˬ jaˆ lehˇ ehˇ nehˬ-euˬ ma.”

⁸ Kʼoeˇ miˇ neh, Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ aˬ yawꞈ maꞈ-ahˇ heu loꞈ-ehˇ ehˇ-eu meh. “Naw maꞈ neh ngehˬ-euˬ dawˬ maˬ tsaˬ-ehˇ, naw maꞈ neh yaw sahˇ laꞈ kʼoeˇ ya siˬ ya mawˇ-euˬ jeˬ-aˬ, jaˬ myawꞈ myawꞈ-eu jeˬ pyeuꞈ-eu miˇ neh, naw maꞈ-ahˇ ngaˇ muiˇ-eu ma.

⁹ Yaw sahˇ laꞈ kʼoeˇ maˬ tsaˬ-eu jeˬ ya mawˇ-awˇ, aˬ cawˬ gaˇ ma bahˬ-iˇ ni aˬ kaˇ pyeuꞈ laˇ-eu gaˇ kawˆ ngehˬ dah luꞈ-eu Miˬyehˇ gʼaˇ duˬ ngehˬ dah-eu tsawˇ haˬ ma lehˇ yawˬ haˇ yawˬ ha tsaˬ geuꞈ luꞈ-eu naw maꞈ-ahˇ ngaˇ kʼehˬ nehˬ kʼaˆ nehˬ-eu aˇ yamˬ peh le luꞈ meh. Ngaˬ-euˬ tsawˇ haˬ deuˬ mehˬ bawˬ mˇ gaˇ naw maꞈ maˬ ya uˇ leˇ-ehˇ, Iˇsaˬleˬlaˆ miˇ kʼahˬ zaˬ deuˬ-euˬ tsawˇ myahˇ jaˇ laˇ laꞈ kʼoeˇ, naw maꞈ-euˬ tsawˇ myahˇ maˬ ahˇ-a. Naw maꞈ yawˬ ha-euˬ miˇ kʼahˬ-ahˇ tiˬ jawˇ-iˬ maˬ paˇ ya gʼoꞈ leˇ meh. Kʼoeˇ ngeh jawˇ, ngaˇ Sahˬpaˬ Miˬyehˇ pyeuꞈ-eu gaˇ kawˆ naw maꞈ ya siˬ duˬ tehꞈ-a.

¹⁰ “Miˬyehˇ gʼaˇ duˬ ngehˬ dah-eu tsawˇ haˬ kʼoeˇ deuˬ-aˬ, nui saˇ oꞈ-eu jeˬ maˬ jaˆ gaˇ, nui saˇ oꞈ-eu jeˬ jaˆ meh lehˇ ehˇ-awˇ, ngaˬ-euˬ tsawˇ haˬ deuˬ-ahˇ gaˇ ma sheuˬ bahˬ nehˬ-euˬ meh. Ngaˬ-euˬ tsawˇ haˬ deuˬ yaw muiˬ paˬ-ehˇ maˬ gawˬ ziꞈ taˬ-euˬ meuˬ lahˇ-ahˇ, Miˬyehˇ gʼaˇ duˬ ngehˬ dah-eu kʼoeˇ deuˬ lu boeˬ lehꞈ pyuˇ-euˬ meh.

¹¹ Aˬ yawꞈ maꞈ-euˬ meuˬ lahˇ byaˆ-iˇ-eu gʼeh luꞈ meh lehˇ, Miˬyehˇ gʼaˇ duˬ ngehˬ dah-eu kʼoeˇ deuˬ-ahˇ ehˇ nehˬ-awˬ. Ngaˇ uˬ yehˇ yehˇ ma bi yehˇ le-awˇ, uˬ yehˇ aˇ siˬ kʼawꞈ bi ga deh le-awˇ, meuˬ lahˇ kʼoeˇ-ahˇ jaˬ lehˇ lehˇ ma bi baw ma.

¹² Meuˬ lahˇ kʼoeˇ, coˬ pyaˆ-awˇ, lu boeˬ lehꞈ pyuˇ-euˬ aˬ jeˬ gaˇ dahˇ tsoeˬ-eu nga lehˇ, yawˬ gʼaˬ na luꞈ naˇ haˬ laˇ tehꞈ-a.”

¹³ Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ heu loꞈ-ehˇ ehˇ-eu meh. “Ngaˇ nui ma pehˇ-eu laꞈ kʼoeˇ, jaˬ lehˇ lehˇ ma bi baw leꞈ-awˇ, uˬ yehˇ yehˇ ma bi yehˇ le-awˇ, uˬ yehˇ aˇ siˬ kʼawꞈ bi ga le-eu laꞈ kʼoeˇ, meuˬ meuˬ lahˇ kʼoeˇ-ahˇ laˆ cawˆ nehˬ ma.

¹⁴ Aˬ yawꞈ maꞈ neh lu boeˬ lehꞈ pyuˇ taˬ-euˬ meuˬ lahˇ kʼoeˇ, bi coˬ pyaˆ bi coꞈ shaˆ jiˇ-awˇ, dawˬ pehˬ buˇ law ni bi mawˇ laˇ ma. Meuˬ lahˇ kʼoeˇ coˬ le-awˇ, naw maꞈ-ahˇ deh sehꞈ jiˇ tehꞈ-a. Kʼoeˇ ngeh jawˇ, ngaˇ Sahˬpaˬ Miˬyehˇ pyeuꞈ-eu gaˇ kawˆ naw maꞈ ya siˬ duˬ tehꞈ-a.

¹⁵ Meuˬ lahˇ kʼoeˇ lahˇ-ahˇ maˬ ehˇ, meuˬ lahˇ-ahˇ lu boeˬ lehꞈ pyuˇ-euˬ tsawˇ haˬ kʼoeˇ deuˬ-ahˇ maˬ ehˇ, ngaˬ-euˬ nui ma pehˇ-eu jeˬ gaˇ kawˆ siˬ leˇ tehꞈ-a. Kʼoeˇ naˇ meuˬ lahˇ kʼoeˇ maˬ paˇ jaˆ-ehˇ, lu boeˬ lehꞈ pyuˇ-euˬ tsawˇ haˬ kʼoeˇ deuˬ kʼawꞈ maˬ paˇ jawˇ meh lehˇ naw maꞈ-ahˇ ngaˇ ehˇ nehˬ ma.

¹⁶ Nui saˇ oꞈ-eu jeˬ maˬ jaˆ gaˇ nui saˇ oꞈ-eu jeˬ jaˆ meh lehˇ ehˇ-eu Miˬyehˇ gʼaˇ duˬ ngehˬ dah-eu kʼoeˇ deuˬ maˬ paˇ jawˇ meh lehˇ, naw maꞈ-ahˇ ngaˇ ehˇ nehˬ ma” lehˇ, Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ ehˇ-eu meh.

Maˬ ngeuˇ gaˇ Miˬyehˇ gʼaˇ duˬ ngehˬ dah-eu zaˬ miˬ zaˬ deuˬ

¹⁷ Sahˬpaˬ Miˬyehˇ heu loꞈ-ehˇ ehˇ-eu meh. “Tsawˇ haˬ zaˬ-oˇ, naw maꞈ-euˬ tsawˇ haˬ deuˬ-ahˇ, mehˬ hu paw pyeuꞈ laˇ-eu gaˇ kawˆ mehˬ luꞈ-eu zaˬ miˬ zaˬ deuˬ-ahˇ haw sheˇ. Aˬ yawꞈ maꞈ-euˬ gaˇ kawˆ nawˇ ngehˬ dah nehˬ-awˬ.

¹⁸ Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ aˬ yawꞈ maꞈ-ahˇ heu loꞈ-ehˇ ehˇ-eu meh lehˇ ehˇ nehˬ-awˬ. “Aˬ cawˬ-ahˇ ja maw laꞈ tuiˆ paꞈ nehˬ-awˇ, naˇ kʼawˇ-ahˇ ja maw paˇ dzeh lahˇ nehˬ-eu naw maꞈ zaˬ miˬ zaˬ deuˬ, ya noeˬ shaˬ dui dui tehꞈ-a. Aˬ cawˬ -euˬ saꞈ laˇ kʼoeˇ taˆ dzoeˬ nya-eu baoˬ ahˇ laˇ ni, naw maꞈ kʼoeˇ loꞈ-ehˇ jahˇ nehˬ-euˬ meh. Ngaˬ-euˬ tsawˇ haˬ deuˬ-euˬ saꞈ laˇ shiˇ ni jahˇ-awˇ, aˬ cawˬ-euˬ saꞈ laˇ dehꞈ ni jahˇ-eu laꞈ kʼoeˇ, naw maꞈ-ahˇ muiˬ laˇ ni, mˇ mawꞈ-eu meh.

¹⁹ Lawˬ loeˇ hawˇ-eu kaˬ muˇ ui cuiˆ za laˇ gaˇ haw-awˇ, ngaˬ-euˬ tsawˇ haˬ deuˬ-euˬ mehˬ shi, naw maꞈ ngaˬ-ahˇ yehˬ bawˬ sehˇ lu-ehˇ gʼeh-eu meh. Maˬ bi shiˇ paˬ-ehˇ gʼeh-eu tsawˇ haˬ deuˬ-ahˇ naw maꞈ laˆ sehꞈ-awˇ, bi shiˇ paˬ-ehˇ gʼeh-eu tsawˇ haˬ deuˬ-ahˇ naw maꞈ bi dehꞈ-euˬ meh. Ngaˬ-euˬ tsawˇ haˬ deuˬ naw maꞈ-ahˇ jah laˇ ni, naw maꞈ mehˇ shuiˇ shuiˇ-euˬ meh.”

²⁰ Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ heu loꞈ-ehˇ ehˇ-eu meh. “Tsawˇ haˬ-euˬ saꞈ laˇ-ahˇ gʼaˬ leˇ nya ni naw maꞈ laꞈ tuiˆ paꞈ gaˇ, ngaˇ maˬ haw nahˇ nya. Naw maꞈ-euˬ laꞈ tuiˆ ngaˇ tseuˆ tsehˆ dzeh-awˇ, naw maꞈ neh laˆ lahˇ taˬ-euˬ tsawˇ haˬ deuˬ-ahˇ ngaˇ pyehˬ nehˬ ma.

²¹ Naw maꞈ neh lahˇ taˬ-euˬ ja maw paˇ dzeh ngaˇ gʼeu lehˆ-awˇ, ngaˬ-euˬ tsawˇ haˬ deuˬ mˬ maˬ maˬ byaˆ zaˇ ziˇ naw maꞈ-euˬ baoˬ-ahˇ dzeuˇ-iˇ ni ngaˇ jahˇ ma. Kʼoeˇ ngeh jawˇ, ngaˇ Sahˬpaˬ Miˬyehˇ pyeuꞈ-eu gaˇ kawˆ naw maꞈ ya siˬ duˬ tehꞈ-a.

²² “Ngaˇ maˬ bi mˇ coeˬ mawꞈ-eu tsawˇ muiˬ deuˬ-ahˇ, naw maꞈ jaˬ myawꞈ mehˇ shuiˇ neh guˆ tsiˬ nyehꞈ-euˬ meh. Haiˬ-eu tsawˇ haˬ deuˬ yaw haiˬ jeˬ byehˇ dzeh-awˇ, saꞈ laˇ buˬ-iˇ ni maˬ bi mˇ-eu gʼaˇ duˬ, naw maꞈ laˆ tsoeˬ-euˬ meh.

²³ Kʼoeˇ miˇ neh, naw maꞈ neh yaw sahˇ laꞈ kʼoeˇ ya mawˇ-euˬ maˬ tsaˬ-eu jeˬ hawˇ-eu, tsawˇ haˬ zaˬ-ahˇ sheuˬ bahˬ-eu mehˬ hu paw pyeuꞈ laˇ-eu gaˇ kawˆ mehˬ-eu jeˬ, nymˬ-mˇ neh dahˬ beh-awˇ, naw maꞈ maˬ paˇ bi mˇ ma. Ngaˇ Sahˬpaˬ Miˬyehˇ pyeuꞈ-eu gaˇ kawˆ naw maꞈ-ahˇ siˬ duˬ leˇ ni, naw maꞈ-euˬ baoˬ uˬ moˆ ngaˬ-euˬ tsawˇ haˬ deuˬ-ahˇ ngaˇ ka kʼoꞈ ma.”