Yeˬsaˬgeˬlaˇ 12 - Akha

Aˬ cawˬ miˇ kʼahˬ-ahˇ bi nyehꞈ gʼeh-euˬ gaˇ kawˆ bi siˬ bi mawˇ-euˬ

¹ Sahˬpaˬ Miˬyehˇ ngaˬ-ahˇ heu loꞈ-ehˇ ehˇ-eu meh.

² “Tsawˇ haˬ zaˬ-oˇ, nawˇ-aˬ ngaˬ-ahˇ puiˬ-eu tsawˇ haˬ deuˬ nehˬ-ehˇ jawˇ luꞈ-eu meh. Aˬ yawꞈ maꞈ myaˆ nuiˆ tsoꞈ kʼawꞈ maˬ mawˇ nya-ehˇ, naˬ bawˇ tsoꞈ kʼawꞈ maˬ gaˬ nya-a. Aˬ jeˬ miˇ neh ehˇ naˇ, aˬ yawꞈ maꞈ ngaˬ-ahˇ puiˬ-euˬ meh.

³ “Tsawˇ haˬ zaˬ-oˇ, aˬ cawˬ miˇ kʼahˬ-ahˇ cehˆ-euˬ tsawˇ haˬ loꞈ-ehˇ, myawˬ kuˬ shaˇ dawˆ-awˇ, uˬ ciꞈ maˬ zahˇ le mi naˆ-ehˇ doˆ-iˇ-awˬ. Nawˇ pawˇ-iˇ-eu yawˬ gʼaˬ na luꞈ-ahˇ bi mawˇ-awˬ. Ngaˬ-ahˇ puiˬ-eu tsawˇ haˬ kʼoeˇ deuˬ mawˇ luꞈ-uˇ.

⁴ Aˬ yawꞈ maꞈ mawˇ nya ni, uˬ ciꞈ maˬ ciꞈ le mi naˆ-ehˇ myawˬ kuˬ shaˇ dawˆ taˬ-awˬ. Kʼoeˇ naˇ, uˬ ciꞈ paw nawˇ aˬ cawˬ miˇ kʼahˬ-ahˇ cehˆ-eu loꞈ-ehˇ aˬ yawꞈ maꞈ mawˇ gaˇ doˆ-iˇ-awˬ.

⁵ Aˬ yawꞈ maꞈ haw haw-ehˇ jawˇ ngeh, nawˬ-euˬ nymˇ kaˇ pyawˇ tsawˆ byoe-awˇ, maˇ byoe kʼoeˇ tsahˇ-ahˇ neh nawˬ-euˬ myawˬ kuˬ sheu doˆ-awˬ.

⁶ Nawˬ-euˬ myaˆ nuiˆ kaꞈ kaˬ-awˇ, nawˬ-euˬ myawˬ kuˬ baꞈ pu kʼoeˇ taˆ baꞈ-awˇ, yaw zahˇ laꞈ kʼoeˇ nawˇ doˆ-iˇ luꞈ gaˇ aˬ yawꞈ maꞈ bi mawˇ-awˬ. Nawˇ kʼoeˇ loꞈ-ehˇ jahˇ-eu-aˬ, Iˇsaˬleˬlaˆ tsawˇ haˬ deuˬ-ahˇ mehˬ nehˬ tsoˆ nehˬ-eu jeˬ pyeuꞈ tehꞈ-a.”

⁷ Sahˬpaˬ Miˬyehˇ neh kʼaˇ ehˇ nehˬ laꞈ-eu loꞈ-ehˇ ngaˇ mˇ-euˬ ma. Kʼoeˇ ngeh nah, aˬ cawˬ miˇ kʼahˬ-ahˇ pawˇ-iˇ-eu tsawˇ haˬ loꞈ-ehˇ ngaˇ myawˬ kuˬ shaˇ dawˆ-awˇ, zahˇ le jawˬ-ehˇ nymˇ kaˇ pyawˇ tsawˆ byoe-awˇ, doˆ-iˇ-euˬ ma. Tsawˇ haˬ yawˬ gʼaˬ na luꞈ haw luꞈ ngeh, myawˬ kuˬ baꞈ pu-ahˇ baꞈ-awˇ ngaˇ doˆ-iˇ-euˬ ma.

⁸ Yawˬ shawˬ yawˬ Sahˬpaˬ Miˬyehˇ ngaˬ-ahˇ heu loꞈ-ehˇ ehˇ-eu meh.

⁹ “Tsawˇ haˬ zaˬ-oˇ, nymˬ-mˇ poˆ jawˇ ngaˬ-ahˇ puiˬ-eu Iˇsaˬleˬlaˆ tsawˇ haˬ kʼoeˇ deuˬ, nawˇ aˬ jeˬ jahˇ te lehˇ nawˬ-ahˇ naˇ haˬ luꞈ meh.

¹⁰ Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ pyeuꞈ-eu ngaˇ, heu loꞈ-ehˇ ehˇ-eu meh lehˇ, aˬ yawꞈ maꞈ-ahˇ ehˇ nehˬ-awˬ. Dawˬ heu-aˬ, Yeˬluˇsaˬlehˬ meuˬ-ahˇ uˆ lahˇ luꞈ-eu sahˬ paˬ hawˇ-eu, kʼoeˇ gaˇ kʼaˇ jawˇ-eu tsawˇ haˬ dawˬ tawˆ luꞈ-ahˇ taꞈ leˇ-eu dawˬ meh.

¹¹ Nawˬ neh mˇ-euˬ jeˬ-aˬ, aˬ yawꞈ maꞈ-ahˇ aˬ joˆ-ehˇ keuˆ le-eu gaˇ kawˆ bi siˬ bi mawˇ-eu jeˬ pyeuꞈ-eu ma lehˇ ehˇ nehˬ-awˬ. Aˬ yawꞈ maꞈ-aˬ, aˬ cawˬ-euˬ miˇ kʼahˬ-ahˇ bi nyehꞈ byoˆ gʼeh jiˇ tehꞈ-a.

¹² Aˬ yawꞈ maꞈ-ahˇ uˆ lahˇ luꞈ-euˬ sahˬ paˬ-aˬ, yaw zahˇ laꞈ kʼoeˇ baꞈ pu-ahˇ myawˬ kuˬ baꞈ-awˇ, aˬ yawꞈ maꞈ neh meuˬ lahˇ-ahˇ taꞈ byoe-euˬ maˇ byoe-ahˇ neh ya cehˆ kʼoeˬ tehꞈ-a. Yawˬ ha iˇ-eu gaˇ ma maˬ mawˇ nya ni, aˬ yawꞈ myaˆ nuiˆ kaꞈ kaˬ-awˇ doˆ-iˇ tehꞈ-a.

¹³ Ehˇ kʼawꞈ, ngaˇ baw gʼaꞈ kʼmˇ-awˇ, aˬ yawꞈ-ahˇ kʼmˇ paꞈ ma. Kʼoeˇ naˇ, aˬ yawꞈ-ahˇ ngaˇ Baˬbuˇloˬ meuˬ-ahˇ sheuˬ gʼeh-awˇ, meuˬ kʼoeˇ meuˬ-ahˇ maˬ ya mawˇ-ehˇ ya shiˇ tehꞈ-a.

¹⁴ Aˬ yawꞈ-euˬ saˇ naˇ-ahˇ gaˇ mˇ-eu yaw huiˬ yaw mahˇ deuˬ, aˬ yawꞈ-ahˇ nui noeˬ nui duˇ biꞈ-eu deuˬ hawˇ-eu, aˬ yawꞈ-ahˇ loꞈ piˇ-eu deuˬ-ahˇ tiˬ gʼaˬ tiˬ paw ngaˇ teh byaˆ nehˬ jiˇ-awˇ, aˬ cawˬ aˬ yawꞈ maꞈ-ahˇ sehꞈ-eu lehˇ poˆ tehꞈ-a.

¹⁵ “Aˬ cawˬ miˇ kʼahˬ-ahˇ aˬ cawˬ tsawˇ jeuˬ yaw kaˬ-ahˇ, aˬ yawꞈ maꞈ-ahˇ ngaˇ teh byaˆ nehˬ ngeh, ngaˇ Sahˬpaˬ Miˬyehˇ pyeuꞈ-eu gaˇ kawˆ aˬ yawꞈ maꞈ ya siˬ tehꞈ-a.

¹⁶ Aˬ cawˬ tsawˇ jeuˬ yaw kaˬ-ahˇ ya dehꞈ ngeh, aˬ yawꞈ maꞈ neh mˇ dzeuˇ yaꞈ-euˬ gaˇ deuˬ jawꞈ dui dui law hawˇ ngaˬ lehˇ siˬ leˇ-awˇ, ngaˇ Sahˬpaˬ Miˬyehˇ pyeuꞈ-eu gaˇ kawˆ siˬ duˬ leˇ ni, guiˇ deuˆ-eu jeˬ, mehꞈ-eu shuꞈ-eu jeˬ hawˇ-eu, naˇ-eu gawˇ-eu jeˬ laꞈ kʼoeˇ aˬ yawꞈ maꞈ tsawˇ haˬ maˬ bi shiˇ byoˆ jiˇ ni, ui cuiˆ bi dzeuˇ-iˇ ma.”

Miˬyehˇ gʼaˇ duˬ ngehˬ dah-eu gʼaˬ yaw dzuˬ dzuˬ-euˬ

¹⁷ Sahˬpaˬ Miˬyehˇ ngaˬ-ahˇ heu loꞈ-ehˇ ehˇ-eu meh.

¹⁸ “Tsawˇ haˬ zaˬ-oˇ, nawˇ dzaˬ ngeh dawˇ ngeh, guˆ-awˇ yaw dzuˬ dzuˬ-awˬ.

¹⁹ Heu-aˬ, maˬ jiˆ maˬ pawˇ-ehˇ yawˬ ha-euˬ miˇ kʼahˬ laꞈ kʼoeˇ ya jawˇ luꞈ-eu Yeˬluˇsaˬlehˬ meuˬ-ahˇ jawˇ-eu tsawˇ haˬ deuˬ-ahˇ, Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ neh ehˇ taˬ-euˬ dawˬ meh lehˇ, Iˇsaˬleˬlaˆ miˇ kʼahˬ kʼahˬ lah ni-ahˇ ehˇ gaˬ nehˬ-awˬ. Aˬ yawꞈ maꞈ dzaˬ ngeh dawˇ ngeh, guˆ-awˇ yaw dzuˬ ya dzuˬ tehꞈ-a. Aˬ yawꞈ maꞈ-euˬ miˇ kʼahˬ zaˬ dawˬ tawˆ luꞈ zahˇ sahˇ kʼoꞈ maˬ baw ni dehꞈ-eu miˇ neh, aˬ yawꞈ maꞈ-euˬ miˇ kʼahˬ neˇ myawˆ ni ya pyeuꞈ-iˇ tehꞈ-a.

²⁰ Nymˬ-mˇ tsawˇ haˬ tiˬ byah ni jawˇ luꞈ-eu meuˬ deuˬ cawˆ-iˇ-awˇ, aˬ yawꞈ maꞈ-euˬ miˇ kʼahˬ bawˇ tsahˬ bawˇ dahˇ pyeuꞈ-iˇ tehꞈ-a. Kʼoeˇ ngeh jawˇ, ngaˇ Sahˬpaˬ Miˬyehˇ pyeuꞈ-eu gaˇ kawˆ aˬ yawꞈ maꞈ ya siˬ duˬ tehꞈ-a.”

Maˬ muiˬ-eu dawˬ daˬ

²¹ Sahˬpaˬ Miˬyehˇ ngaˬ-ahˇ heu loꞈ-ehˇ ehˇ-eu meh.

²² “Tsawˇ haˬ zaˬ-oˇ, aˬ jeˬ miˇ neh Iˇsaˬleˬlaˆ tsawˇ haˬ deuˬ, ‘Aˇ yamˬ dzeuˇ kʼawꞈ ehˇ taˬ-euˬ dawˬ maˬ byah laˇ nga’ lehˇ daˬ taˬ-euˬ dawˬ daˬ-ahˇ ehˇ poˆ poˆ poˆ-ehˇ jawˇ ta.

²³ Nymˬ-mˇ poˆ-aˬ, gaˇ kawˆ kʼoeˇ-ahˇ taꞈ leˇ-awˇ, Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ pyeuꞈ-eu ngaˇ heu loꞈ-ehˇ ehˇ-eu meh lehˇ ehˇ nehˬ-awˬ. Dawˬ daˬ kʼoeˇ dawˬ byoˆ-iˇ ni ngaˇ jahˇ ma. Iˇsaˬleˬlaˆ miˇ kʼahˬ laꞈ kʼoeˇ dawˬ daˬ kʼoeˇ dawˬ maˬ paˇ daˬ poˆ nya ni pyeuꞈ-iˇ tehꞈ-a. Aˇ yamˬ tsaˬ laˇ-awˇ, ehˇ taˬ-euˬ dawˬ byah laˇ luꞈ meh lehˇ, aˬ yawꞈ maꞈ-ahˇ ehˇ nehˬ-awˬ.

²⁴ “Iˇsaˬleˬlaˆ tsawˇ haˬ deuˬ gʼaˇ duˬ, maˬ tsaˬ-eu yaw sahˇ laꞈ kʼoeˇ ya siˬ ya mawˇ-eu jeˬ hawˇ-eu, Miˬyehˇ gʼaˇ duˬ ngehˬ dah-eu lehˬ-iˇ-euˬ jeˬ maˬ paˇ baw meh.

²⁵ Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ pyeuꞈ-eu ngaˇ aˬ yawꞈ maꞈ-ahˇ dawˬ ngehˬ-awˇ, ngaˬ neh kʼaˇ ehˇ-euˬ jeˬ maˬ nyi naˬ ni keuˆ le tehꞈ-a. Ngaˬ-ahˇ puiˬ-eu tsawˇ haˬ deuˬ-oˇ, ngaˬ neh jahˇ ma lehˇ ehˇ taˬ-euˬ jeˬ naw maꞈ maˬ shiˇ mi naˆ-ehˇ bi keuˆ le ma lehˇ ngaˇ ehˇ-eu ma” lehˇ, Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ ehˇ-eu ma.”

²⁶ Sahˬpaˬ Miˬyehˇ ngaˬ-ahˇ heu loꞈ-ehˇ ehˇ-eu meh.

²⁷ “Tsawˇ haˬ zaˬ-oˇ, nawˬ neh yaw sahˇ laꞈ kʼoeˇ ya siˬ ya mawˇ-euˬ jeˬ hawˇ-eu, nawˬ neh Miˬyehˇ gʼaˇ duˬ ngehˬ dah-euˬ jeˬ-aˬ, aˬ kaˇ aˇ yamˬ-ahˇ maˬ ngeuˇ naˇ maˬ keuˆ le luꞈ-a lehˇ Iˇsaˬleˬlaˆ tsawˇ haˬ deuˬ noeˬ luꞈ-eu meh.

²⁸ Kʼoeˇ miˇ neh, Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ pyeuꞈ-eu ngaˇ heu loꞈ-ehˇ ehˇ-eu meh lehˇ ehˇ nehˬ-awˬ. Aˇ yamˬ gʼawˬ myahˇ ni maˬ paˇ nyi naˬ ma. Ngaˬ neh ehˇ taˬ-euˬ jeˬ bi keuˆ le ma lehˇ, Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ pyeuꞈ-eu ngaˇ ehˇ-eu ma.”