Yeˬsaˬgeˬlaˇ 1 - Akha

YAW SAHˇ LAꞈ KʼOEˇ MIˬYEHˇ-AHˇ Yeˬsaˬgeˬlaˇ MAWˇ BEH BEH-EUˬ POˆ ( 1.1—7.27 ) Miˬyehˇ-euˬ nuiˇ mahˬ

¹ Aˇ kʼoꞈ smˬ tseˇ kʼoꞈ tiˬ kʼoꞈ, ba la oeˬ siˬ tiˬ siˬ, aˇ nah ngaˬ nah tiˬ nah-ahˇ, Buˇziꞈ-euˬ aˬ li pyeuꞈ-eu ngaˇ piˇ ma Yeˬsaˬgeˬlaˇ-aˬ, Baˬbuˇloˬ miˇ kʼahˬ-ahˇ bi nyehꞈ daˆ gʼeh-euˬ Yuˇdaˆ tsawˇ haˬ deuˬ nehˬ-ehˇ, Baˬbuˇloˬ miˇ kʼahˬ-ahˇ jaˆ-eu Ceˬbaˬ lawˇ baˬ dawˬ peh jawˇ luꞈ-eu ma. Mˬ pah dzeh le-awˇ, yaw sahˇ laꞈ kʼoeˇ Miˬyehˇ-ahˇ ngaˇ ya mawˇ-euˬ ma.

² (Kʼoeˇ ngeh, sahˬ paˬ Yeˬhawˇyaˬciˬ-ahˇ Baˬbuˇloˬ miˇ kʼahˬ-ahˇ nyehꞈ daˆ gʼeh-euˬ ngaˬ kʼoꞈ byah laˇ-euˬ meh.)

³ Baˬbuˇloˬ miˇ kʼahˬ Ceˬbaˬ lawˇ baˬ lawˇ dzeˇ kʼoeˇ gaˇ, Sahˬpaˬ Miˬyehˇ ngaˬ-ahˇ dawˬ ngehˬ cawˬ le-euˬ ngaˇ ya gaˬ-awˇ, aˬ yawꞈ-euˬ baoˬ ngaˬ-euˬ kʼoeˇ taˆ keuˆ le-euˬ meh.

⁴ Ngaˇ haw daˆ gʼeh ngeh, laꞈ taˆ paw pyawˬ-ahˇ neh jaˬ lehˇ lehˇ ma oe luꞈ-eu mawˇ-euˬ ma. Huiˬ dui dui-eu mˬ dmˇ laꞈ kʼoeˇ mˬ myawꞈ myawꞈ luꞈ-awˇ, kʼoeˇ-euˬ tiˬ jawˬ mˬ bya cehˆ ni jaˆ luꞈ-eu meh. Mˬ myawꞈ myawꞈ-eu laꞈ kʼoeˇ, guiˬ shuiˇ loꞈ-ehˇ guiˇ nyiˬ ni tiˬ jeˬ mawˇ laˇ-eu meh.

⁵ Jaˬ lehˇ lehˇ ma-euˬ gʼahˇ ceh nyiˬ paˆ-ehˇ, tsawˇ haˬ zaˬ-ahˇ duˇ leˇ-eu Jeˬluˇbeˬ oeˬ mawˇ ahˇ-eu meh.

⁶ Ehˇ kʼawꞈ, aˬ yawꞈ mawˇ yawꞈ myaˆ pyawˬ oeˬ pyawˬ tsoꞈ-awˇ, aˬ dahˇ oeˬ dahˇ tsoꞈ-eu meh.

⁷ Aˬ kuiˇ dawˇ coe ni tsoꞈ-awˇ, mawˇ neˇ loꞈ-ehˇ kuiˇ sehˬ tsoꞈ-eu meh. Aˬ yawꞈ maꞈ jeˬ ba taˬ-euˬ guiˬ shuiˇ loꞈ-ehˇ yaw shehꞈ bya-eu meh.

⁸ Myaˆ pyawˬ oeˬ pyawˬ hawˇ-eu aˬ dahˇ oeˬ dahˇ uˬ taꞈ, aˬ yawꞈ mawˇ yawꞈ tsawˇ haˬ-euˬ aˬ laꞈ-ahˇ duˇ-eu aˬ laꞈ oeˬ laꞈ tsoꞈ-eu meh. Aˬ dahˇ tiˬ dahˇ uˬ moˆ tiˬ laꞈ tsoꞈ-eu meh.

⁹ Aˬ yawꞈ mawˇ yawꞈ-euˬ aˬ dahˇ nyiˬ dahˇ mˇ pyeh taˬ-awˇ, aˬ dahˇ mehˬ dzaˬ tiˬ mawˇ tiˇ mawˇ tuˆ-eu miˇ neh, oeˬ coeˇ oeˬ bawˬ loꞈ-ehˇ jaˆ-eu meh. Aˬ yawꞈ maꞈ oe ngeh, gʼawˇ mawˇ maˬ zeuˆ pyawˇ ni oeˬ mawˇ luꞈ tiˬ kawˆ loꞈ-ehˇ oe-eu meh.

¹⁰ Aˬ yawꞈ mawˇ yawꞈ myaˆ pyawˬ oeˬ jeˬ tsoꞈ-awˇ, mehˬ shi paw tsawˇ haˬ myaˆ pyawˬ, aˇ maˇ paw aˇ laˬ jaˬ shiˇ myaˆ pyawˬ, aˇ caˇ paw mawˇ neˇ mawˇ gaw myaˆ pyawˬ hawˇ-eu, naˇ kʼah paw kʼaˬ dzeˇ myaˆ pyawˬ tsoꞈ-eu meh.

¹¹ Aˬ yawꞈ mawˇ yawꞈ-euˬ aˬ dahˇ nyiˬ pyawˬ-aˬ, mˇ pyeh taˬ-awˇ, tiˬ mawˇ tiˇ mawˇ aˬ dahˇ mehˬ dzaˬ tuˆ-eu meh. Dzeˇ-eu aˬ dahˇ nyiˬ pyawˬ-aˬ, gʼawˇ mawˇ-ahˇ byaˆ dmˇ kʼoꞈ taˬ-euˬ meh.

¹² Aˬ yawꞈ mawˇ yawꞈ oeˬ paw luꞈ mehˬ shi pyawˇ-eu miˇ neh, oeˬ mawˇ luꞈ gʼawˇ mawˇ zeuˆ pyawˇ-eu maˬ loˬ ni, kʼaˇ iˇ mawꞈ-eu paw iˇ nya-eu meh.

¹³ Jeˬluˇbeˬ kʼoeˇ oeˬ mawˇ yaw kaˬ-ahˇ, maˬ naˬ leˇ ni iˇ luꞈ-eu miˬ dzaˬ doꞈ luꞈ-eu tsiˇ kʼmˬ-ahˇ duˇ-eu tiˬ jeˬ ahˇ-eu meh. Miˬ lmˇ kʼoeˇ mˬ myawꞈ pyehˬ doˆ-eu meh.

¹⁴ Aˇ mawˇ kʼoeˇ deuˬ, mˬ myawꞈ kʼaˇ myawꞈ-eu loꞈ-ehˇ mehˬ shi naˇ kʼah jiˆ luꞈ-eu meh.

¹⁵ Jeˬluˇbeˬ kʼoeˇ oeˬ mawˇ-ahˇ ngaˇ haw luꞈ ngeh, aˇ beuˆ oeˬ beuˆ miˇ tsa tuˆ gaˇ ngaˇ ya mawˇ-euˬ ma.

¹⁶ Tiˬ mawˇ-euˬ gaˇ dzeˇ tiˬ beuˆ jaˆ-eu meh. Aˇ beuˆ kʼoeˇ oeˬ beuˆ luꞈ, aˬ yawꞈ tiˬ beuˆ-ahˇ duˇ-eu meh. Aˇ beuˆ aˬ yawꞈ beuˆ yawꞈ aˇ poeˬ kʼaˆ-eu kʼaˬ lo sehˇ loꞈ-ehˇ yaw shehꞈ bya-awˇ, aˬ yawꞈ beuˆ yawꞈ byaˇ gʼaˇ paw pyawˇ-eu aˇ beuˆ tiˬ beuˆ paˇ tsoꞈ-eu meh.

¹⁷ Kʼoeˇ miˇ neh, aˇ beuˆ kʼoeˇ deuˬ kʼaˇ iˇ mawꞈ-eu paw iˇ nya-eu meh.

¹⁸ Aˇ beuˆ daˇ kʼahˇ-ahˇ, myaˆ nuiˆ tiˬ gʼoeˬ tsoꞈ-eu meh.

¹⁹ Jeˬluˇbeˬ kʼoeˇ deuˬ kʼaˇ luˆ-iˇ ngeh, aˇ beuˆ kʼoeˇ deuˬ kʼawꞈ luˆ iˇ-eu meh. Jeˬluˇbeˬ kʼoeˇ deuˬ miˇ tsaˬ-ahˇ neh tuˇ laˇ ngeh, aˇ beuˆ kʼoeˇ deuˬ kʼawꞈ tuˇ laˇ-eu meh.

²⁰ Jeˬluˇbeˬ kʼoeˇ deuˬ kʼaˇ iˇ mawꞈ-eu paw iˇ-awˇ, aˇ beuˆ kʼoeˇ deuˬ kʼawꞈ aˬ yawꞈ maꞈ kʼaˇ iˇ-eu paw iˇ-eu meh. Aˬ jeˬ miˇ neh ehˇ naˇ, Jeˬluˇbeˬ kʼoeˇ deuˬ-euˬ nui ma aˇ beuˆ kʼoeˇ deuˬ-ahˇ uˆ lahˇ-eu meh.

²¹ Kʼoeˇ miˇ neh, Jeˬluˇbeˬ kʼoeˇ deuˬ kʼaˇ luˆ-iˇ ngeh, aˇ beuˆ kʼoeˇ deuˬ luˆ-iˇ-awˇ, Jeˬluˇbeˬ kʼoeˇ deuˬ kʼaˇ naˬ leˇ ngeh, aˇ beuˆ kʼoeˇ deuˬ kʼawꞈ naˬ leˇ-eu meh. Jeˬluˇbeˬ kʼoeˇ deuˬ zaw diˇ naˇ, aˇ beuˆ kʼoeˇ deuˬ kʼawꞈ zaw diˇ-eu meh. Aˬ jeˬ miˇ neh ehˇ naˇ, Jeˬluˇbeˬ kʼoeˇ deuˬ-euˬ nui ma aˇ beuˆ kʼoeˇ deuˬ-ahˇ uˆ lahˇ-eu meh.

²² Jeˬluˇbeˬ kʼoeˇ deuˬ-euˬ uˬ duˬ uˬ taˆ, mˬ-ahˇ duˇ-awˇ, kʼaw teuꞈ ba la loꞈ-ehˇ guiˇ nyiˬ ni gʼeh-eu jeˬ jaˆ-eu meh.

²³ Mˬ kʼoeˇ-euˬ uˬ moˆ Jeˬluˇbeˬ kʼoeˇ deuˬ yawꞈ luꞈ-awˇ, aˬ yawꞈ mawˇ yawꞈ tiˬ mawˇ tiˇ mawˇ tuˆ ni aˬ dahˇ nyiˬ pyawˬ mˇ pyeh taˬ-awˇ, dzeˇ-eu aˬ dahˇ nyiˬ pyawˬ neh gʼawˇ mawˇ-ahˇ dehˬ kaˬ taˬ-euˬ meh.

²⁴ Aˬ yawꞈ maꞈ zaw luꞈ ngeh, aˬ dahˇ kʼoeˇ deuˬ teˇ saˇ mahˇ-eu ngaˇ gaˬ-euˬ ma. Teˇ saˇ kʼoeˇ-aˬ, iˬ ma laˆ shaˆ iˇ cuꞈ mahˇ-eu teˇ saˇ, guiˇ maꞈ maꞈ ma laˇ luꞈ-eu teˇ saˇ hawˇ-eu, baoˬ huiˬ-eu Miˬyehˇ-euˬ teˇ saˇ-ahˇ duˇ-eu meh. Aˬ yawꞈ maꞈ maˬ zaw ni naˬ leˇ ngeh, aˬ dahˇ mˇ cuꞈ taˬ-euˬ meh.

²⁵ Ehˇ kʼawꞈ, aˬ yawꞈ maꞈ-euˬ uˬ duˬ uˬ taˆ jaˆ-eu mˬ kʼoeˇ siˬ, teˇ saˇ mahˇ-eu maˬ naˬ leˇ-a.

²⁶ Mˬ kʼoeˇ siˬ-euˬ kʼoeˇ taˆ, nyoeˇ naˆ naˆ-eu kʼaˬ lo sehˇ neh jahˇ taˬ-euˬ nuiˇ mahˬ-ahˇ duˇ-eu tiˬ jeˬ jaˆ-awˇ, tsawˇ haˬ-ahˇ duˇ-eu tiˬ gʼaˬ kʼoeˇ-euˬ kʼoeˇ taˆ nuiˇ luꞈ-eu meh.

²⁷ Tsawˇ haˬ-ahˇ duˇ-eu kʼoeˇ gʼaˬ miˬ dzaˬ gʼahˇ ceh guiˬ shuiˇ loꞈ-ehˇ guiˇ nyiˬ ni jaˆ-awˇ, dawˬ tawˆ luꞈ kʼoeˇ taˆ yaw shehꞈ bya-eu meh.

²⁸ Yaw shehꞈ kʼoeˇ laꞈ kʼoeˇ, aˇ deˇ leˇ kʼah loꞈ-ehˇ gʼeh-eu yaw shehꞈ gʼawˬ mya jeˬ ahˇ-eu meh. Kʼoeˇ-aˬ, Sahˬpaˬ Miˬyehˇ jawˇ-eu gaˇ kawˆ bi siˬ-eu naˇ guiˇ guiˇ laˇ-eu yaw shehꞈ pyeuꞈ-eu meh. Kʼoeˇ gaˇ ya mawˇ ngeh, ngaˇ moꞈ tsahˬ-ehˇ ga-iˇ-awˇ, dawˬ ngehˬ-eu teˇ saˇ ya gaˬ-euˬ ma.