Yeˬlaˬmiˇ 9 - Akha

¹ Aˬ cawˬ neh bi sehꞈ-euˬ ngaˬ-euˬ tsawˇ jeuˬ gʼaˇ duˬ, uˬ ciꞈ nah gʼahˇ ngaˇ ngoeˇ coeˇ ni, uˬ duˬ iˇ cuꞈ lah duˬ pyeuꞈ-awˇ, myaˆ biˇ iˇ beuˆ yoeˇ nmˇ duˇ nya.

² Ngaˬ-euˬ tsawˇ haˬ maˬ mawˇ gaˇ cehˆ zaꞈ duˬ, bawˇ tsahˬ bawˇ dahˇ tiˬ tsahˇ jaˆ nmˇ duˇ nya. Aˬ yawꞈ maꞈ baˬ maꞈ puˇ jeˬ-ehˇ, saˇ jaˇ puiˬ-eu tsawˇ haˬ tehꞈ meh.

³ Aˬ yawꞈ maꞈ aˬ myah luꞈ jaˬ myawꞈ myawꞈ-awˇ, yaw sui yaw dawˇ jeˬ uˆ lahˇ-eu dah zaˇ, maˬ sui maˬ dawˇ-eu jeˬ miˇ kʼahˬ heu-ahˇ uˆ lahˇ luꞈ meh. Sahˬpaˬ Miˬyehˇ ehˇ-eu, “Ngaˬ-euˬ tsawˇ haˬ heu deuˬ yaw haiˬ kʼoeˇ taˆ yaw haiˬ jeˬ mˇ daˆ-awˇ, ngaˬ-ahˇ aˬ yawꞈ maꞈ-euˬ Miˬyehˇ lehˇ maˬ sawˇ-a.”

⁴ Mehˇ nmˇ kʼaˇ ngeuˇ-eu deuˬ Yaˬkoˆ loꞈ-ehˇ tsawˇ gahˇ gahˇ-awˇ, cawˬ kʼaˇ ngeuˇ-eu jaˬ myawꞈ mehˇ shuiˇ myaˬ-eu miˇ neh, yawˬ ha-euˬ cawˬ-ahˇ ya yahˇ-awˇ, mehˇ nmˇ yaw kaˬ maˬ jah coeˇ-a.

⁵ Yawˬ gʼaˬ na luꞈ yawˬ ha-euˬ cawˬ-ahˇ myawꞈ dzaˬ-awˇ, yaw tsaˬ yaw dawˇ ngehˬ-eu tmˇ-eu tiˬ gʼaˬ-iˬ maˬ jawˇ-a. Jaˬ myawꞈ myawꞈ-eu mehˬ laˇ laˆ sheuˆ taˬ-awˇ, iˬ baˇ mˇ dehˆ-euˬ maˬ baw-ehˇ, dehꞈ poˆ dehꞈ paˇ-eu maˬ noeˬ tsehˆ coeˇ-a.

⁶ Kʼehˬ-eu kʼoeˇ taˆ kʼaˆ-eu jeˬ baꞈ bymˇ-awˇ, jaˬ myawꞈ kʼoeˇ taˆ mehˇ shuiˇ geu daˆ-eu meh. “Aˬ yawꞈ maꞈ ngaˬ-ahˇ maˬ haw nahˇ-a” lehˇ, Sahˬpaˬ Miˬyehˇ ehˇ luꞈ-eu meh.

⁷ Kʼoeˇ miˇ neh Baoˬ huiˬ-eu Sahˬpaˬ Miˬyehˇ ehˇ-eu, “Shmˇ puiˆ neˇ-awˇ tsehˬ ka haw-eu loꞈ-ehˇ, ngaˬ-euˬ tsawˇ haˬ deuˬ-ahˇ ngaˇ lawˬ haw ma. Ngaˬ-euˬ tsawˇ haˬ iˬ baˇ mˇ-euˬ miˇ neh, ngaˇ aˬ jeˬ paˇ gʼeh nehˬ nya nmˇ.

⁸ Aˬ yawꞈ maꞈ-euˬ mehˬ laˇ shaˆ shiˇ kaˆ myaˬ, jaˬ myawꞈ mehˇ shuiˇ mˇ-eu maˬ naˬ leˇ-a. Yawˬ gʼaˬ na luꞈ dawˬ muiˬ ngehˬ gaˇ duˇ kʼawꞈ, nui ma laꞈ kʼoeˇ lahˇ ju kʼmˇ luꞈ-eu meh.

⁹ Aˬ yawꞈ maꞈ kʼoeˇ loꞈ-ehˇ dehꞈ doeˇ-eu baˬ da neh, ngaˇ maˬ kʼehˬ ni jawˇ coeˇ nmˇ loˇ. Kʼoeˇ naˆ ni doeˇ-eu tsawˇ jeuˬ-ahˇ, ngaˇ laꞈ poˆ maˬ poˆ ni dzahˬ tehˬ coeˇ nmˇ loˇ lehˇ, Sahˬpaˬ Miˬyehˇ pyeuꞈ-eu ngaˇ ehˇ-eu ma.”

¹⁰ Ngaˇ heu loꞈ-ehˇ ehˇ-euˬ ma. “Gawˬ jawˬ hawˇ-eu jeˬ zaˬ gaˆ kʼahˬ deuˬ-euˬ gʼaˇ duˬ, ngaˇ tsawˇ ngoeˇ ngoeˇ-eu ma. Gawˬ jawˬ hawˇ-eu jeˬ zaˬ gaˆ kʼahˬ deuˬ koˆ jiˇ-awˇ, tsawˇ haˬ maˬ iˇ maˬ laˇ tsehˆ-a. Jeˬ zaˬ teˇ saˇ maˬ ya gaˬ ni ciˬ cuˇ ni pyeuꞈ-iˇ-awˇ, bawˇ tsahˬ jeˬ zaˬ aˇ jiˇ deuˬ pawˇ byoˆ jiˇ-euˬ meh.”

¹¹ Sahˬpaˬ Miˬyehˇ heu loꞈ-ehˇ ehˇ-eu meh. “Yeˬluˇsaˬlehˬ meuˬ-ahˇ meuˬ coeˬ jehˆ bymˇ bi pyeuꞈ-iˇ-awˇ, bawˇ tsahˬ aˬ kuiˬ jawˇ duˬ bi pyeuꞈ-iˇ ma. Yuˇdaˆ miˇ kʼahˬ-euˬ meuˬ deuˬ, bawˇ tsahˬ bawˇ dahˇ bi pyeuꞈ-iˇ ma.”

¹² Ngaˇ heu loꞈ-ehˇ naˇ haˬ-euˬ ma. “Sahˬpaˬ Miˬyehˇ-oˇ, aˬ jeˬ miˇ neh miˇ kʼahˬ heu kʼahˬ kʼaˇ shuiꞈ deh ga loꞈ-ehˇ gui coˇ ni pyeuꞈ-iˇ-awˇ, tsawˇ haˬ tiˬ gʼaˬ-iˬ maˬ cah tsehˆ ni pyeuꞈ-iˇ taˬ ta. Gaˇ kawˆ heu deuˬ-ahˇ siˬ nya-awˇ gʼoˆ shaw nya paˬ-ehˇ zaˬ siˬ tsawˇ gahˇ byah-eu aˬ suˇ gʼaˬ jawˇ ta. Gaˇ kawˆ heu deuˬ aˬ cawˬ-ahˇ dzawˇ mehˬ nehˬ nya paˬ-ehˇ, aˬ suˇ gʼaˬ-ahˇ nawˇ mehˬ duˬ nehˬ-euˬ te.”

¹³ Sahˬpaˬ Miˬyehˇ heu loꞈ-ehˇ ehˇ-eu meh. “Ngaˬ neh mehˬ nehˬ tsoˆ nehˬ-euˬ jeˬ-ahˇ ngaˬ-euˬ tsawˇ haˬ deuˬ maˬ naˇ haˬ geuꞈ-eu miˇ neh, heu loꞈ-ehˇ pyeuꞈ laˇ-euˬ meh. Aˬ yawꞈ maꞈ ngaˬ-euˬ ehˇ dawˬ maˬ naˇ haˬ-ehˇ, ngaˬ neh bi mˇ-euˬ jeˬ maˬ mˇ-a.

¹⁴ Aˬ yawꞈ maꞈ-euˬ aˬ poeˬ aˬ bawˇ deuˬ neh mehˬ nehˬ yaꞈ-euˬ loꞈ-ehˇ, aˬ yawꞈ maꞈ nui ma gʼahˇ-eu laꞈ kʼoeˇ, Baˬlaˇ miˬ yehˇ-euˬ tahˬ pahˬ aˬ ma mawˇ kawˇ deuˬ-ahˇ, uˬ duˬ tahˬ-euˬ meh.

¹⁵ Teu baˬ da neh Iˇsaˬleˬlaˆ-euˬ Miˬyehˇ, Baoˬ huiˬ-eu Sahˬpaˬ Miˬyehˇ pyeuꞈ-eu ngaˇ heu loꞈ-ehˇ ehˇ gaˇ naˇ haˬ sheˇ. Ngaˇ heu loꞈ-ehˇ jahˇ ma. Ngaˬ-euˬ tsawˇ haˬ deuˬ-ahˇ kʼaˬ jehꞈ ni gʼeh-eu aˇ bawˇ bi teuꞈ-awˇ, dzaˇ doꞈ bi dawˇ ma.

¹⁶ Aˬ yawꞈ maꞈ-euˬ aˬ poeˬ aˬ bawˇ deuˬ-euˬ ziˇ-ahˇ neh maˬ gaˬ haw maˬ mawˇ haw-euˬ tsawˇ jeuˬ deuˬ-euˬ yaw kaˬ-ahˇ aˬ yawꞈ maꞈ-ahˇ ngaˇ teh byaˆ-awˇ, guiˇ maꞈ deuˬ pyehˬ gʼeh leꞈ-eu laꞈ kʼoeˇ, geuꞈ-eu jeˬ maˬ ahˇ gaˇ keuˆ ni aˬ yawꞈ maꞈ-ahˇ bi laˆ cawˆ ma.”

Yeˬluˇsaˬlehˬ tsawˇ haˬ deuˬ ngoeˇ-awˇ caw ba nehˬ laꞈ lehˇ shaˇ-eu

¹⁷ Baoˬ huiˬ-eu Sahˬpaˬ Miˬyehˇ heu loꞈ-ehˇ ehˇ-eu meh. “Aˬ jeˬ keuˆ le teuˇ le-euˬ nga lehˇ shaˇ noeˬ-awˬ. Tsawˇ ngoeˇ ngoeˇ-eu tsawˇ haˬ deuˬ kuˇ uiˬ-awˬ. Kuiˇ deuˇ bi gui-eu zaˬ miˬ zaˬ deuˬ kuˇ uiˬ-awˬ.”

¹⁸ Aˬ yawꞈ-euˬ tsawˇ haˬ deuˬ ehˇ-eu, “Nga maꞈ myaˆ nuiˆ myaˆ biˇ dahˬ byah jiˇ-awˇ, myaˆ nuiˆ myaˆ shehˆ jaˇ yoe ni ngoeˇ pyeuꞈ jiˇ ngeh keuˆ, yaw kawˇ ma-ehˇ laˇ-awˇ kuiˇ deuˇ gui laˇ-awˬ lehˇ, aˬ yawꞈ maꞈ-ahˇ ehˇ gaˬ nehˬ-awˬ.”

¹⁹ Ziˇoˬ meuˬ-ahˇ tsawˇ ngoeˇ ngoeˇ luꞈ gaˇ naˇ haˬ sheˇ. “Nga maꞈ cawˆ-iˇ jiˇ-euˬ miˇ-a. Myaˆ pyawˬ maˬ ciˬ diˇ coeˇ miˇ-a. Nga maꞈ-euˬ nymˇ jiˇ bi laˆ byoˆ jiˇ-awˇ, yawˬ ha miˇ kʼahˬ-ahˇ ya byehˇ dzeh gaˇ keuˆ miˇ-a” lehˇ ngoeˇ luꞈ meh.

²⁰ Ngaˇ heu loꞈ-ehˇ ehˇ-euˬ ma. “Zaˬ miˬ zaˬ deuˬ Sahˬpaˬ Miˬyehˇ-euˬ dawˬ-ahˇ naˇ haˬ-awˇ, aˬ yawꞈ maꞈ dawˬ ngehˬ gaˇ naˬ bawˇ ciˬ kʼmˇ-awˬ. Zaˬ miˬ deuˬ-ahˇ tsawˇ ngoeˇ dawˬ kawˬ mehˬ-awˇ, aˬ nmˇ deuˬ-ahˇ kuiˇ deuˇ gui-eu mehˬ-awˬ.

²¹ Shiˇ-eu jeˬ laˇ gʼoˆ zaˬ-ahˇ neh daˆ ahˇ laˇ-awˇ, nymˇ ma paw uˇ keuˆ laˇ-euˬ meh. Meuˬ-euˬ pu ka gʼa-eu zaˬ yaw nyiˇ deuˬ hawˇ-eu, lehˆ kawˆ doe ni cah-eu zaˬ guˬ deuˬ-ahˇ coeˇ tsehˆ-euˬ meh.

²² Deh ga-ahˇ mawˇ neˇ ceˬ ga-eu loꞈ-ehˇ, cehˇ yehˬ dzeh-awˇ cehˇ diꞈ maˬ ya uiˬ-euˬ loꞈ-ehˇ, yawˬ gaˇ na luꞈ tsawˇ haˬ yaw shiˇ ga tehꞈ-a lehˇ, Sahˬpaˬ Miˬyehˇ ngaˬ-ahˇ bi ngehˬ laꞈ-euˬ meh.”

²³ Sahˬpaˬ Miˬyehˇ ehˇ-eu, “Tsawˇ gahˇ ahˇ-eu tsawˇ haˬ tsawˇ gahˇ kʼahˬ sehˇ taˬ jehˆ. Baoˬ ahˇ-eu tsawˇ haˬ baoˬ kʼahˬ sehˇ taˬ jehˆ. Pyuˇ shuiˇ jaˆ-eu tsawˇ haˬ pyuˇ shuiˇ kʼahˬ sehˇ taˬ jehˆ.

²⁴ Ngaˬ-euˬ gʼoeˇ-eu gaˬ-eu jeˬ aˬ myah luꞈ ziꞈ-awˇ, ngaˇ yaw tsaˬ yaw dawˇ jeˬ mˇ-eu miˇ neh, kʼahˬ sehˇ kʼaˇ jehˆ mawꞈ-eu tsawˇ haˬ, ngaˬ-ahˇ siˬ nya-eu jeˬ gaˇ kawˆ kʼahˬ sehˇ jehˆ-awˬ. Kʼoeˇ loꞈ-ehˇ mˇ gaˇ ngaˇ nui kʼahˇ shiˇ-eu ma lehˇ, Sahˬpaˬ Miˬyehˇ pyeuꞈ-eu ngaˇ ehˇ-eu ma.”

²⁵ Sahˬpaˬ Miˬyehˇ ehˇ-eu, “Nui ma laꞈ kʼoeˇ keuˆ ni baˆ kʼoˆ mehˬ dzaˬ maˬ yehˬ-ehˇ, zahˇ kʼaˇ deˬ maˬ deˬ laꞈ nyiˇ paw tehꞈ-ehˇ baˆ kʼoˆ mehˬ dzaˬ yehˬ taˬ-euˬ tsawˇ haˬ deuˬ-ahˇ, ngaˇ kʼehˬ nehˬ kʼaˆ nehˬ-eu aˇ yamˬ keuˆ le luꞈ meh.

²⁶ Iˇjiˇtuˆ miˇ kʼahˬ, Yuˇdaˆ miˇ kʼahˬ, Eˬdoˬ miˇ kʼahˬ, Aˬmoˬ miˇ kʼahˬ, Mawˇbaˆ miˇ kʼahˬ hawˇ-eu gaˇ mahˇ kaˬ gaˇ jaˆ-eu kʼaˇ shuiꞈ deh ga miˇ kʼahˬ-ahˇ kʼaˇ jawˇ-eu tsawˇ haˬ dawˬ tawˆ luꞈ-ahˇ, ngaˇ kʼehˬ nehˬ kʼaˆ nehˬ ma. Gaˇ mahˇ kaˬ-eu kʼaˇ shuiꞈ deh ga miˇ kʼahˬ-ahˇ jawˇ-eu tsawˇ jeuˬ heu deuˬ dawˬ tawˆ luꞈ, nui ma keuˆ-awˇ uˬ jehˆ jehˆ dzeh-eu maˬ ngeuˇ-a. Iˇsaˬleˬlaˆ tsawˇ ha dawˬ tawˆ luꞈ kʼawꞈ, nui ma laꞈ kʼoeˇ keuˆ ni baˆ kʼoˆ mehˬ dzaˬ yehˬ taˬ-euˬ tiˬ gʼaˬ-iˬ maˬ ahˇ-a.”