Yeˬlaˬmiˇ 8 - Akha

¹ “Aˇ nah aˇ yamˬ kʼoeˇ keuˆ laˇ ngeh, Yuˇdaˆ sahˬ paˬ deuˬ hawˇ-eu yaw huiˬ yaw mahˇ deuˬ-euˬ shaˬ yoeˬ deuˬ maˬ ehˇ, piˇ ma deuˬ, Miˬyehˇ gʼaˇ duˬ ngehˬ dah-eu deuˬ hawˇ-eu Yeˬluˇsaˬlehˬ meuˬ laꞈ kʼoeˇ jawˇ-eu tsawˇ haˬ deuˬ-euˬ shaˬ yoeˬ deuˬ maˬ ehˇ, lmˬ bymˇ laꞈ kʼoeˇ neh bi beuˬ doˆ jiˇ tehꞈ-a.

² Shaˬ yoeˬ kʼoeˇ deuˬ-ahˇ gʼoˆ uiˬ-awˇ maˬ duˬ pahˬ nehˬ ni, aˬ nyoˬ mawˇ neˇ keˬ ga-eu loꞈ-ehˇ miˇ tsa ga tehꞈ-a. Tsawˇ haˬ kʼoeˇ deuˬ yaw dehꞈ dehꞈ ngeh uˬ duˬ tahˬ-awˇ caw teh-euˬ nahˇ ma, ba la, aˬ guiˇ, kʼoeˇ deuˬ-euˬ mehˬ shi, shaˬ yoeˬ kʼoeˇ deuˬ bya cehˆ ni ga tehꞈ-a.

³ Haiˬ-eu tsawˇ jeuˬ heu jeuˬ laꞈ kʼoeˇ, maˬ shiˇ-ehˇ dzeuˇ-iˇ-awˇ, ngaˬ neh kʼaˇ teh dzeh nehˬ-euˬ gaˇ dehꞈ gʼawˬ-awˇ jawˇ-eu deuˬ kʼawꞈ, dehꞈ-eu naˆ maˬ tseˇ shiˇ mawꞈ dzehˬ tehꞈ-a lehˇ Baoˬ huiˬ-eu Sahˬpaˬ Miˬyehˇ pyeuꞈ-eu ngaˇ ehˇ-eu ma.”

Iˬ baˇ hawˇ-eu kʼehˬ-eu kʼaˆ-eu jeˬ

⁴ Sahˬpaˬ Miˬyehˇ ngaˬ-ahˇ kʼehˇ-awˇ, aˬ yawꞈ maꞈ-euˬ tsawˇ haˬ-ahˇ heu loꞈ-ehˇ bi ehˇ nehˬ laꞈ-euˬ meh. “Tsawˇ haˬ zaˬ coˬ-iˇ ngeh, maˬ tuˇ laˇ kʼmˬ ta loˇ. Tsawˇ haˬ tiˬ gʼaˬ mehˬ shiˬ ciˬ pyawˇ-awˇ doˆ-iˇ ngeh, maˬ paˇ gʼoꞈ kʼoꞈ laˇ kʼmˬ ta loˇ.

⁵ Toˆ-ehˇ ngeuˇ naˇ aˬ jeˬ miˇ neh naw maꞈ mehˬ shiˬ ciˬ pyawˇ-awˇ doˆ-iˇ-euˬ, maˬ gʼoꞈ kʼoꞈ laˇ ni iˇ byoˆ te. Naw maꞈ tahˬ pahˬ aˬ ma mawˇ kawˇ maˬ byehˇ coeˇ-ehˇ, ngaˇ jawˇ gaˇ maˬ gʼoꞈ poˆ laˇ-a.

⁶ Ngaˇ yaw muiˬ-ehˇ naˇ haˬ duˬ ngeh, naw maꞈ ngehˬ-eu tmˇ-eu laꞈ kʼoeˇ, yaw tsaˬ yaw dawˇ jeˬ maˬ ahˇ nya. Yawˬ ha mˇ-euˬ yaw haiˬ jeˬ-ahˇ, nui ma laꞈ kʼoeˇ maˬ noeˬ shaˬ-ehˇ, yawˬ ha mˇ-euˬ lehˬ nga loˇ lehˇ, naˇ haˬ-eu tsawˇ haˬ maˬ jawˇ-a. Guiˇ deuˆ gaˇ coeˬ gʼeh-eu dziˬ mahˬ loꞈ-ehˇ, yawˬ gʼaˬ na luꞈ yawˬ ha nui kʼahˇ-ahˇ poˆ-eu meh.

⁷ Yawˬ ha bahˬ-ahˇ ya gʼoꞈ leˇ-eu yamˬ law, uiˇ dzoeˬ deuˬ kʼawꞈ siˬ nya luꞈ meh. Jawˬ jiˇ jawˬ gʼaꞈ hawˇ-eu kʼaˬ guˬ, miˇ kʼahˬ jawˇ paˇ yamˬ siˬ nya meh. Ehˇ kʼawꞈ, ngaˬ-euˬ tsawˇ haˬ pyeuꞈ-eu naw maꞈ, ngaˬ-euˬ zahˇ dawˬ maˬ siˬ nya-a.

⁸ Naw maꞈ tsawˇ gahˇ ahˇ-eu miˇ neh, ngaˬ-euˬ zahˇ dawˬ kʼoꞈ dawˬ siˬ nya ma lehˇ, aˬ joˆ-ehˇ ehˇ nya te. Haw yawˬ. Ngaˬ-euˬ zahˇ dawˬ kʼoꞈ dawˬ deuˬ-ahˇ, maˬ sui maˬ dawˇ-eu zahˇ dzoeˬ miˬ ma deuˬ, boꞈ poˆ boꞈ paˇ jiˇ taˬ-euˬ meh.

⁹ Zaˬ siˬ tsawˇ gahˇ ahˇ-eu deuˬ ya shaꞈ dawˇ tehꞈ-a. Baw gʼaꞈ-ahˇ teuˆ lahˇ-euˬ loꞈ-ehˇ ya shaˬ tehꞈ-a. Ngaˬ-euˬ zahˇ dawˬ kʼoꞈ dawˬ-ahˇ byehˇ dzeh gʼaˬ-euˬ-aˬ, zaˬ siˬ tsawˇ gahˇ aˬ geu jeˬ paˇ ahˇ nmˇ.

¹⁰ Kʼoeˇ miˇ neh aˬ yawꞈ maꞈ-euˬ deh yaˇ aˬ cawˬ-ahˇ biꞈ-awˇ, aˬ yawꞈ maꞈ-euˬ miˬ zaˬ aˬ cawˬ-ahˇ biꞈ nehˬ ma. Huiˬ zaˬ nyiˇ zaˬ maˬ tseˇ paˆ ni, maˬ sui maˬ dawˇ-eu laꞈ kʼoeˇ pyuˇ shuiˇ poˆ-euˬ meh. Miˬyehˇ gʼaˇ duˬ ngehˬ dah-eu deuˬ hawˇ-eu piˇ ma deuˬ kʼawꞈ, miˇ kʼahˬ zaˬ-ahˇ myawꞈ dzaˬ-eu meh.

¹¹ Ngaˬ-euˬ tsawˇ haˬ deuˬ-euˬ maˇ kʼehˬ maˇ naˇ, aˬ gah heu-euˬ naˆ tehꞈ-ehˇ sawˇ-awˇ, maˬ taˬ leˇ-euˬ gaˇ taˬ leˇ gʼaˬ-euˬ meh lehˇ ehˇ-eu meh.

¹² Ngaˬ-euˬ tsawˇ haˬ deuˬ-oˇ, yaw jawꞈ jeˬ-ahˇ mˇ-euˬ miˇ neh shaꞈ dawˇ baw miˇ-a loˇ. Maˬ ngeuˇ-a. Nawˇ shaꞈ maˬ siˬ nya-ehˇ, baˬ ba neˇ laˇ-euˬ maˬ baw-a. Aˬ cawˬ coˬ dzeh-iˇ-euˬ loꞈ-ehˇ, naw maꞈ kʼawꞈ ya coˬ-iˇ tehꞈ-a. Naw maꞈ-ahˇ ngaˇ kʼehˬ ngeh, naw maꞈ gʼaˇ duˬ aˇ saˬ saˬ-eu jeˬ keuˆ le tehꞈ-a lehˇ, Sahˬpaˬ Miˬyehˇ pyeuꞈ-eu ngaˇ ehˇ-eu ma.

¹³ “Yaˇ kmˇ mˇ-eu deuˬ aˇ siˬ pyaˆ uiˬ-eu loꞈ-ehˇ, ngaˬ-euˬ tsawˇ haˬ deuˬ-ahˇ ngaˇ pyaˆ uiˬ mawꞈ-eu ma. Ehˇ kʼawꞈ, aˇ siˬ maˬ siˬ le-ehˇ aˇ paꞈ nyoeˬ-iˇ taˬ-euˬ, aˬ gaꞈ baw duˆ hawˇ-eu siˬ guˬ aˇ bawˇ-ahˇ duˇ-eu meh. Kʼoeˇ baˬ da neh gʼoˆ baˬ laꞈ nyiˇ-euˬ tsawˇ jeuˬ-ahˇ, aˬ yawꞈ maꞈ-euˬ miˇ kʼahˬ ngaˇ biꞈ-euˬ ma.”

¹⁴ Miˬyehˇ-euˬ tsawˇ haˬ deuˬ ehˇ-eu, “Aˬ jeˬ miˇ neh aˬ dui maꞈ dzuˇ dzuˇ-ehˇ jawˇ te. Ziꞈ dah ni gʼeh-eu meuˬ deuˬ-ahˇ cehˆ-awˇ, kʼoeˇ gaˇ shiˇ leˇ kaˇ-euˇ. Aˬ dui-euˬ Miˬyehˇ pyeuꞈ-eu Sahˬpaˬ Miˬyehˇ-aˬ, aˬ dui kʼoeˇ taˆ shiˇ-eu jeˬ bi keuˆ le-euˬ meh. Aˬ dui aˬ yawꞈ-ahˇ mˇ lehˬ-euˬ miˇ neh, aˬ dui-ahˇ dzaˇ doꞈ bi dawˇ laꞈ-euˬ meh.

¹⁵ Jawˇ saˇ doˆ-awˇ nui saˇ oꞈ gaˇ aˬ dui noeˬ tmˬ-euˬ kʼawꞈ, guˆ-eu gaˆ-eu jeˬ bi keuˆ le-euˬ meh.

¹⁶ Aˬ dui-ahˇ muiˇ-eu deuˬ Daˬ meuˬ-ahˇ oe keuˆ-awˇ, mahˬ deuˬ naˇ mehˇ baw-eu gaˬ le miˇ-a. Aˬ yawꞈ maꞈ-euˬ mahˬ deuˬ hiˇ gaˇ, miˇ kʼahˬ kʼahˬ lah ni guˆ-awˇ yaw dzuˬ dzuˬ-eu meh. Aˬ dui miˇ kʼahˬ hawˇ-eu kʼaˇ jaˆ-eu jeˬ dawˬ tawˆ, aˬ dui maꞈ-euˬ meuˬ deuˬ hawˇ-eu tsawˇ haˬ dawˬ tawˆ, laˆ cawˆ-eu lehˇ aˬ yawꞈ maꞈ oe-euˬ meh.”

¹⁷ Sahˬpaˬ Miˬyehˇ heu loꞈ-ehˇ ehˇ-eu meh. “Haw yawˬ. Doꞈ kʼaˆ-eu aˇ lawˇ-ahˇ, naw maꞈ jawˇ gaˇ ngaˇ pyehˬ leꞈ ma. Aˇ lawˇ-ahˇ toˇ naˬ nya-eu deuˬ toˇ gaˇ maˬ naˇ haˬ-ehˇ, aˇ lawˇ kʼoeˇ deuˬ naw maꞈ-ahˇ toˆ tehꞈ-a.”

Yeˬlaˬmiˇ yawˬ ha tsawˇ jeuˬ gʼaˇ duˬ noeˬ shaˬ-euˬ

¹⁸ Ngaˇ noeˬ shaˬ-eu maˬ byoˆ-iˇ nya miˇ-a. Nui ma shaˬ zahˬ mˇ-eu maˬ jiˇ miˇ-a.

¹⁹ Miˇ kʼahˬ kʼahˬ lah ni naˇ haˬ doe haw sheˇ. Ngaˬ-euˬ tsawˇ jeuˬ ngoeˇ-eu gaˬ laˇ miˇ-a. “Sahˬpaˬ Miˬyehˇ Ziˇoˬ-ahˇ maˬ paˇ jawˇ meh loˇ. Ziˇoˬ sahˬ paˬ cehˆ byoˆ mehˬ loˇ.” Sahˬpaˬ Miˬyehˇ heu loꞈ-ehˇ ehˇ-eu meh. “Aˬ jeˬ miˇ neh tahˬ pahˬ aˬ ma mawˇ kawˇ deuˬ-ahˇ uˬ duˬ tahˬ-awˇ, ngaˇ nui ma pehˇ laˇ ni naw maꞈ mˇ teˬ. Gaˇ dahˇ maˬ tsoeˬ leˇ-eu boeˇ miˬ siˬ kʼaˬ miˬ yehˇ mehˬ shi, aˬ jeˬ baˬ da neh awˆ byaˆ te.”

²⁰ Ngaˬ-euˬ tsawˇ jeuˬ ngoeˇ-awˇ ehˇ-eu, “Cehˇ laˆ luiˆ-eu aˇ yamˬ dzeuˇ-awˇ, jawˇ la buˬ-iˇ-euˬ kʼawꞈ, aˬ dui-ahˇ ka kʼoꞈ-euˬ jeˬ maˬ keuˆ le-aˬ siˬ.”

²¹ Ngaˬ-euˬ tsawˇ jeuˬ shaˬ zahˬ naꞈ-eu miˇ neh, ngaˬ-euˬ nui ma shaˬ zahˬ naꞈ-eu miˇ-a. Shaˬ zahˬ maˬ mˇ coeˇ-eu miˇ neh, ngoeˇ dui dui luꞈ-eu ma.

²² Giˇlaˆ miˇ kʼahˬ laꞈ kʼoeˇ jaˆ gʼaˬ maˬ jaˆ-a loˇ. Jaˆ gʼaˬ nya-eu tsawˇ haˬ kʼoeˇ gaˇ maˬ jawˇ-a loˇ. Aˬ jeˬ miˇ neh ngaˬ-euˬ tsawˇ jeuˬ-ahˇ maˬ laˆ taˬ nya ta.