Yeˬlaˬmiˇ 7 - Akha

Uˬ duˬ tahˬ nymˇ nymˇ ma laꞈ kʼoeˇ Yeˬlaˬmiˇ dawˬ mehˬ mehˬ-eu

¹ Sahˬpaˬ Miˬyehˇ-euˬ dawˬ Yeˬlaˬmiˇ jawˇ gaˇ heu loꞈ-ehˇ keuˆ le-euˬ meh.

² “Uˬ duˬ tahˬ nymˇ nymˇ ma-euˬ gʼoˆ kʼehˬ-ahˇ yawꞈ-awˇ, dawˬ heu deuˬ dzawˇ gaˬ nehˬ-awˬ. Sahˬpaˬ Miˬyehˇ-ahˇ uˬ duˬ tahˬ-eu gʼaˇ duˬ, gʼoˆ kʼehˬ heu kʼehˬ-ahˇ kʼaˇ uˇ laˇ-eu Yuˇdaˆ tsawˇ haˬ dawˬ tawˆ luꞈ-oˇ, Sahˬpaˬ Miˬyehˇ-euˬ dawˬ-ahˇ naˇ haˬ-awˬ.

³ Baoˬ huiˬ-eu Sahˬpaˬ Miˬyehˇ pyeuꞈ-eu Iˇsaˬleˬlaˆ-euˬ Miˬyehˇ heu loꞈ-ehˇ ehˇ-eu meh. ‘Naw maꞈ dehꞈ jeˬ dehꞈ kawˆ paˇ naˇ, miˇ kʼahˬ heu kʼahˬ laꞈ kʼoeˇ bi jawˇ daˆ leꞈ ma.

⁴ Heu-aˬ, Sahˬpaˬ Miˬyehˇ-euˬ Uˬ duˬ tahˬ nymˇ nymˇ ma meh. Sahˬpaˬ Miˬyehˇ-euˬ Uˬ duˬ tahˬ nymˇ nymˇ ma meh. Sahˬpaˬ Miˬyehˇ-euˬ Uˬ duˬ tahˬ nymˇ nymˇ ma meh. Aˬ dui maꞈ tiˬ jeˬ-iˬ kʼahˬ lahˇ kʼaˇ maˬ za-a’ lehˇ ehˇ-awˇ jaˬ myawꞈ myawꞈ gaˇ taˬ paˇ naˇ haˬ.

⁵ “Naw maꞈ dehꞈ jeˬ dehꞈ kawˆ paˇ-awˇ, naw maꞈ mˇ luꞈ shaˇ luꞈ-eu jeˬ-ahˇ byehˇ-awˬ. Tiˬ gʼaˬ tiˇ gʼaˬ dehꞈ tsaˬ dehꞈ tsahˇ geuꞈ-awˬ.

⁶ Boeˇ miˬ siˬ kʼaˬ deuˬ, muˇ coe aˬ nmˇ deuˬ hawˇ-eu, miˬ coeˬ miˬ ma deuˬ-ahˇ taˬ kʼehˬ taˬ kʼaˆ. Iˬ baˇ maˬ ahˇ-eu tsawˇ haˬ deuˬ-ahˇ sehꞈ-eu jeˬ, miˇ kʼahˬ heu kʼahˬ laꞈ kʼoeˇ taˬ paˇ mˇ. Miˬ yehˇ nui deuˬ-ahˇ uˬ duˬ tahˬ-eu jeˬ kʼawꞈ byehˇ dzeh-awˬ. Aˬ jeˬ miˇ neh ehˇ naˇ, kʼoeˇ loꞈ-ehˇ mˇ-eu baˬ da neh nawˇ ya luˬ ya seˇ-iˇ tehꞈ-a.

⁷ Naw maꞈ dehꞈ paˇ naˇ, naw maꞈ-euˬ aˬ poeˬ aˬ bawˇ deuˬ-ahˇ ngaˬ neh biꞈ tsehˆ tsehˆ taˬ-euˬ miˇ kʼahˬ heu kʼahˬ laꞈ kʼoeˇ, naw maꞈ-ahˇ ngaˇ bi jawˇ daˆ leꞈ ma.

⁸ “Haw yawˬ. Jaˬ myawꞈ myawꞈ-eu dawˬ-ahˇ naw maꞈ naˇ haˬ-awˇ jah-euˬ meh.

⁹ Kʼoeˬ-eu gʼehꞈ-eu jeˬ, tsawˇ haˬ-ahˇ sehꞈ-eu jeˬ, aˬ cawˬ-euˬ miˬ zaˬ yo zaˬ-ahˇ bahˬ-eu jeˬ, jaˬ myawꞈ myawꞈ-awˇ kamˬ-eu jeˬ, Baˬlaˇ miˬ yehˇ-ahˇ lawˇ nehˬ shehˇ nehˬ-eu jeˬ, aˇ hu naw maꞈ maˬ siˬ maˬ mawˇ haw-euˬ miˬ yehˇ nui deuˬ-ahˇ uˬ duˬ tahˬ-eu jeˬ, heu deuˬ-ahˇ naw maꞈ mˇ bahˬ taˬ-euˬ meh.

¹⁰ Ngaˇ maˬ haw nahˇ-eu gaˇ heu deuˬ-ahˇ naw maꞈ mˇ kʼawꞈ, ngaˬ-euˬ Uˬ duˬ tahˬ nymˇ nymˇ ma laꞈ kʼoeˇ ngaˬ-euˬ mehˬ shi naw maꞈ yawꞈ laˇ-awˇ, ‘Nga maꞈ kʼahˬ lahˇ duˬ maˬ jaˆ’ lehˇ ehˇ-eu meh.

¹¹ Ngaˬ-euˬ Uˬ duˬ tahˬ nymˇ nymˇ ma heu, smˇ kʼoeˬ tahˇ joe deuˬ-euˬ cehˆ zaꞈ duˬ meh lehˇ naw maꞈ noeˬ te loˇ. Naw maꞈ neh mˇ-euˬ jeˬ ngaˇ mawˇ luꞈ ma.

¹² Ngaˬ-ahˇ uˬ duˬ bi tahˬ-eu gʼaˇ duˬ, ngaˬ neh tseˇ doˆ beh beh-euˬ jawˇ duˬ pyeuꞈ-eu Shiˇloˬ meuˬ-ahˇ haw leˇ-awˬ. Ngaˬ-euˬ tsawˇ jeuˬ Iˇsaˬleˬlaˆ tsawˇ haˬ deuˬ iˬ baˇ mˇ-euˬ baˬ da neh, aˬ yawꞈ maꞈ-ahˇ ngaˇ aˬ joˆ-ehˇ jahˇ nehˬ-euˬ nga lehˇ haw duˬ leˇ-awˬ.

¹³ Iˬ baˇ heu deuˬ dawˬ tawˆ luꞈ naw maꞈ mˇ-awˇ, naw maꞈ-ahˇ ngaˇ tiˬ poˆ saˇ-iˬ tiˬ poˆ dawˬ ngehˬ cawˬ kʼawꞈ, naw maꞈ naˬ bawˇ maˬ ciˬ kʼmˇ-a.

¹⁴ Kʼoeˇ baˬ da neh, Shiˇloˬ meuˬ-ahˇ ngaˬ neh kʼaˇ jahˇ nehˬ-euˬ loꞈ-ehˇ, naw maꞈ gʼoe luꞈ-eu ngaˬ-euˬ Uˬ duˬ tahˬ nymˇ nymˇ ma heu nymˇ-ahˇ ngaˇ jahˇ nehˬ ma. Naw maꞈ-euˬ aˬ poeˬ aˬ bawˇ deuˬ hawˇ-eu, naw maꞈ-ahˇ ngaˬ neh biꞈ taˬ-euˬ jawˇ duˬ heu tsahˇ nyiˬ paˆ-ehˇ, Shiˇloˬ meuˬ kʼoeˇ taˆ keuˆ le-euˬ jeˬ ngaˇ bi keuˆ le ma.

¹⁵ Naw maꞈ-euˬ aˬ yuiꞈ aˬ nyiˇ Iˇsaˬleˬlaˆ tsawˇ haˬ deuˬ-ahˇ ngaˬ neh teh dzeh nehˬ-euˬ loꞈ-ehˇ, naw maꞈ-ahˇ kʼawꞈ maˬ mawˇ laˇ gaˇ ngaˇ teh dzeh ma lehˇ, Sahˬpaˬ Miˬyehˇ pyeuꞈ-eu ngaˇ ehˇ-eu ma.”

Yuˇdaˆ tsawˇ haˬ deuˬ naˬ lehˬ lehˬ-eu

¹⁶ Sahˬpaˬ Miˬyehˇ heu loꞈ-ehˇ ehˇ-eu meh. “Yeˬlaˬmiˇ-oˇ, tsawˇ haˬ heu deuˬ gʼaˇ duˬ guiˬ lahˬ taˬ shaˇ. Aˬ yawꞈ maꞈ-euˬ dah zaˇ ngoeˇ ngoeˇ-ehˇ guiˬ lahˬ taˬ shaˇ. Nawˇ aˬ yawꞈ maꞈ gʼaˇ duˬ tsawˇ kaˬ geuꞈ laˇ gaˇ ngaˇ maˬ naˇ haˬ.

¹⁷ Yuˇdaˆ miˇ kʼahˬ laꞈ kʼoeˇ jaˆ-eu meuˬ deuˬ hawˇ-eu Yeˬluˇsaˬlehˬ meuˬ laꞈ kʼoeˇ, aˬ yawꞈ maꞈ mˇ luꞈ shaˇ luꞈ-eu jeˬ-ahˇ nawˇ maˬ mawˇ teˬ loˇ.

¹⁸ Mˬ taˆ-euˬ sahˬ ma lehˇ aˬ yawꞈ maꞈ kuˇ-eu miˬ yehˇ ma kʼoeˇ gʼaˬ-ahˇ lawˇ nehˬ-eu kaˬ muˇ jahˇ-eu gʼaˇ duˬ, zaˬ deuˬ miˬ dzaˬ gʼoˆ uiˬ-awˇ, tsawˇ kʼaˆ aˬ da deuˬ miˬ dzaˬ baw doꞈ nehˬ-awˇ, tsawˇ kʼaˆ aˬ ma deuˬ cehˇ meu nyehꞈ keuˬ-eu meh. Ngaˬ-ahˇ bi coeˬ laˇ-eu gʼaˇ duˬ, miˬ yehˇ nui deuˬ-ahˇ kʼawꞈ, aˬ yawꞈ maꞈ aˬ gaꞈ dzaˇ uiˇ shehˆ-awˇ lawˇ nehˬ-euˬ meh.

¹⁹ Ehˇ kʼawꞈ, ngaˬ-ahˇ bi coeˬ laˇ-eu jeˬ aˬ yawꞈ maꞈ mˇ luꞈ ta loˇ. Maˬ ngeuˇ-a. Yawˬ haˇ yawˬ ha bi coeˬ leˇ-awˇ, yawˬ haˇ yawˬ ha daˬ laˆ ga-eu jeˬ aˬ yawꞈ maꞈ mˇ luꞈ-eu meh.

²⁰ Kʼoeˇ baˬ da neh, Dawˬ tawˆ kʼoeˇ taˆ uˆ lahˇ luꞈ-eu Sahˬpaˬ Miˬyehˇ pyeuꞈ-eu ngaˇ-aˬ, Uˬ duˬ tahˬ nymˇ nymˇ ma heu kʼoeˇ taˆ ngaˬ-euˬ nui pehˇ tahˬ daˆ nehˬ ma. Tsawˇ haˬ hawˇ-eu jeˬ zaˬ kʼoeˇ taˆ maˬ ehˇ, bawˇ tsahˬ sahˬ lahˬ hawˇ-eu dzaˬ la gʼo cehˇ kʼoeˇ taˆ maˬ ehˇ, ngaˬ-euˬ nui pehˇ tahˬ daˆ nehˬ ma. Ngaˇ nui ma pehˇ-eu jeˬ-aˬ, tsawˇ haˬ tiˬ gʼaˬ-iˬ maˬ ceh miˆ nya-eu miˬ dzaˬ-ahˇ duˇ tehꞈ-a.

²¹ “Ngaˬ-euˬ tsawˇ haˬ deuˬ-oˇ, lawˇ-eu shehˇ-eu tiˬ paˆ na deuˬ-ahˇ naw maꞈ dzaˬ kʼmˬ meh. Ehˇ kʼawꞈ, miˬ dzaˬ-ahˇ dzah puiˆ-awˇ lawˇ-eu jeˬ-ahˇ naw maꞈ maˬ dzaˬ ni lawˇ duˬ kʼoeˇ taˆ ya dzah puiˆ jiˇ meh. Naw maꞈ maˬ gaˇ ma lehˇ noeˬ-awˇ, kʼaˇ lawˇ kʼaˇ shehˇ-eu yawˬ jeˬ na luꞈ-ahˇ dzaˬ naˇ kʼawꞈ, naw maꞈ naꞈ-i jaˆ tehꞈ-a lehˇ, Sahˬpaˬ Miˬyehˇ pyeuꞈ-eu ngaˇ ehˇ-eu ma.

²² Naw maꞈ-euˬ aˬ poeˬ aˬ bawˇ deuˬ-ahˇ Iˇjiˇtuˆ miˇ kʼahˬ laꞈ kʼoeˇ neh, ngaˇ sheuˬ doˆ laꞈ ngeh, miˬ dzaˬ dzah puiˆ-awˇ lawˇ-eu jeˬ hawˇ-eu lawˇ-eu shehˇ-eu aˬ geu jeˬ maˬ kaˬ, maˬ lawˇ-ehˇ maˬ gʼeh nya-a lehˇ ngaˬ neh dawˬ biꞈ taˬ-euˬ maˬ jaˆ.

²³ Ehˇ kʼawꞈ ni, ngaˇ aˬ yawꞈ maꞈ-euˬ Miˬyehˇ pyeuꞈ-awˇ, aˬ yawꞈ maꞈ ngaˬ-euˬ tsawˇ haˬ pyeuꞈ ni, ngaˬ-euˬ ehˇ dawˬ-ahˇ ya naˇ haˬ geuꞈ meh lehˇ, aˬ yawꞈ maꞈ-ahˇ ngaˬ neh biꞈ taˬ-euˬ dawˬ jaˆ ma. Yawˬ jeˬ na luꞈ laꞈ kʼoeˇ aˬ yawꞈ maꞈ guiˬ lahˬ za nya ni, ngaˬ neh dawˬ biꞈ-euˬ loꞈ-ehˇ dehꞈ-eu gʼaˇ duˬ, aˬ yawꞈ maꞈ-ahˇ ngaˇ ehˇ nehˬ-euˬ ma.

²⁴ Ehˇ kʼawꞈ, aˬ yawꞈ maꞈ naˬ bawˇ maˬ gaˬ leˇ-ehˇ, aˬ yawꞈ maꞈ-euˬ gʼahˇ-eu nui ma hawˇ-eu haiˬ-eu nui ma laꞈ kʼoeˇ kʼaˇ noeˬ doˆ laˇ-euˬ jeˬ mˇ-awˇ, muiˬ laˇ jaˬ laˇ-eu jeˬ maˬ jaˆ-eu uˬ taꞈ, tiˬ jawˇ saˇ-i tiˬ jawˇ doeˇ dzehˬ laˇ-euˬ meh.

²⁵ Naw maꞈ-euˬ aˬ poeˬ aˬ bawˇ deuˬ Iˇjiˇtuˆ miˇ kʼahˬ laꞈ kʼoeˇ neh doˆ laˇ-euˬ tiˬ nah neh iˬ nah keuˆ ni, ngaˬ-euˬ gʼaˇ duˬ bi ngehˬ dah-euˬ ngaˬ-euˬ zaˬ kʼaˆ deuˬ-ahˇ, naw maꞈ jawˇ gaˇ maˬ tsehˆ leˇ ni ngaˇ pyehˬ leꞈ-euˬ ma.

²⁶ Ehˇ kʼawꞈ, tsawˇ haˬ tiˬ gʼaˬ-iˬ naˬ bawˇ gaˬ leˇ gaˇ maˬ duˇ-ehˇ, naw maꞈ-euˬ aˬ poeˬ aˬ bawˇ deuˬ naˆ maˬ tseˇ naw maꞈ nui ma gʼahˇ-awˇ, ngaˬ-ahˇ puiˬ mawꞈ-eu jeˬ aˇ dzehˬ dzeuˇ meh.

²⁷ “Kʼoeˇ miˇ neh Yeˬlaˬmiˇ-oˇ, dawˬ heu deuˬ dawˬ tawˆ luꞈ ngaˬ-euˬ tsawˇ haˬ deuˬ-ahˇ nawˇ ehˇ nehˬ kʼawꞈ, nawˬ-euˬ ehˇ dawˬ-ahˇ aˬ yawꞈ maꞈ maˬ naˇ haˬ-aˇ. Aˬ yawꞈ maꞈ-ahˇ nawˇ kuˇ kʼawꞈ, nawˬ-ahˇ oˬ maˬ toˬ nehˬ laꞈ-aˇ.

²⁸ Yawˬ ha-euˬ Miˬyehˇ pyeuꞈ-eu Sahˬpaˬ Miˬyehˇ-euˬ ehˇ dawˬ-ahˇ yawˬ ha tsawˇ jeuˬ maˬ naˇ haˬ ehˇ, kʼehˬ nehˬ kʼaˆ nehˬ-eu jeˬ-ahˇ ya daˬ kʼawꞈ, maˬ paˇ laˇ nya nga lehˇ, aˬ yawꞈ maꞈ-ahˇ nawˇ ya ehˇ nehˬ meh. Saˇ jaˇ ziꞈ-eu jeˬ shiˇ tsehˆ-euˬ meh. Saˇ jaˇ ziꞈ-eu gaˇ kawˆ ja-eu tsawˇ haˬ tiˬ gʼaˬ-iˬ maˬ jawˇ-a.

Hiˬnoˬ deh kʼawꞈ-ahˇ iˬ baˇ mˇ-euˬ

²⁹ “Yeˬluˇsaˬlehˬ tsawˇ haˬ deuˬ-oˇ, ngoeˇ-awˬ. Uˬ duˬ tsehˇ kʼahˇ tehˬ tsehˆ-awˇ biˬ dzeh-awˬ. Gawˬ duˇ uˬ du doe ni tsawˇ ngoeˇ ngoeˇ-awˬ. Aˬ jeˬ miˇ neh ehˇ naˇ, Sahˬpaˬ Miˬyehˇ pyeuꞈ-eu ngaˇ-aˬ, ngaˬ-euˬ tsawˇ haˬ deuˬ-ahˇ nui ma pehˇ-awˇ byehˇ dzeh-euˬ ma.

³⁰ “Yuˇdaˆ tsawˇ haˬ deuˬ haiˬ dui dui-eu jeˬ mˇ-euˬ meh. Ngaˇ bye dui dui-eu jeˬ pyeuꞈ-eu aˬ yawꞈ maꞈ-euˬ tahˬ pahˬ aˬ ma mawˇ kawˇ deuˬ-ahˇ ngaˬ-euˬ Uˬ duˬ tahˬ nymˇ nymˇ ma laꞈ kʼoeˇ aˬ yawꞈ maꞈ baꞈ taˬ-awˇ, Uˬ duˬ tahˬ nymˇ nymˇ ma-ahˇ laˆ jawꞈ-euˬ meh.

³¹ Aˬ yawꞈ maꞈ-euˬ aˬ buˇ aˬ li deuˬ-ahˇ miˬ dzaˬ dzah puiˆ-awˇ lawˇ-eu gʼaˇ duˬ, Hiˬnoˬ deh kʼawꞈ-ahˇ Tawˇpehˆ lehˇ myahˇ-euˬ lawˇ duˬ tiˬ tsahˇ aˬ yawꞈ maꞈ tsoˆ-euˬ meh. Kʼoeˇ loꞈ-ehˇ bi mˇ-eu gʼaˇ duˬ, aˬ yawꞈ maꞈ-ahˇ ngaˇ dawˬ biꞈ-euˬ maˬ ngeuˇ. Noeˬ-euˬ tehꞈ-ehˇ kʼawꞈ maˬ shaˇ noeˬ haw-aˬ.

³² Jawˇ duˬ kʼoeˇ tsahˇ-ahˇ Tawˇpehˆ hawˇ-eu Hiˬnoˬ deh kʼawꞈ lehˇ maˬ paˇ kuˇ nya-eu aˇ nah aˇ yamˬ keuˆ le tehꞈ-a. Tsawˇ haˬ-ahˇ sehꞈ-eu deh kʼawꞈ lehˇ ya kuˇ paˇ gaˇ keuˆ tehꞈ-a. Tsawˇ haˬ baꞈ pahˬ kʼaˇ maˬ za ni pyeuꞈ-iˇ-awˇ, kʼoeˇ tsahˇ-ahˇ ya baꞈ pahˬ tehꞈ-a.

³³ Tsawˇ haˬ zaˬ shiˇ taˬ-awˇ ga gaˇ, bawˇ tsahˬ jeˬ zaˬ hawˇ-eu aˇ jiˇ deuˬ dzaˬ le-awˇ, teh piˇ nehˬ-eu gʼaˬ maˬ jawˇ ni pyeuꞈ-iˇ tehꞈ-a.

³⁴ Miˇ kʼahˬ heu kʼahˬ kʼaˇ shuiꞈ deh ga pyeuꞈ jiˇ tehꞈ-a. Yuˇdaˆ miˇ kʼahˬ laꞈ kʼoeˇ jaˆ-eu meuˬ deuˬ hawˇ-eu, Yeˬluˇsaˬlehˬ meuˬ-euˬ lehˆ kawˆ doe ni, byawˬ gʼa-eu teˇ saˇ hawˇ-eu, jiˇ cehˇ gʼeh-awˇ laˬ kʼaˬ cehˇ luꞈ-eu teˇ saˇ deuˬ-ahˇ, ngaˇ bi byoˆ-iˇ jiˇ ma.