Yeˬlaˬmiˇ 6 - Akha

Yeˬluˇsaˬlehˬ meuˬ-ahˇ muiˇ-eu deuˬ loꞈ jawˬ-euˬ

¹ Beˬyaˬmiˬ tsawˇ jeuˬ-oˇ, ya buˬ ya law-iˇ ni cehˆ-awˬ. Yeˬluˇsaˬlehˬ meuˬ laꞈ nyiˇ cehˆ doˆ-awˬ. Teˬkawˬ meuˬ-ahˇ daˇ heh baw gaˬ-awˇ, aˬ cawˬ bi haw siˬ-eu gʼaˇ duˬ, Behˬhaˬsheˬleˬ meuˬ-ahˇ miˬ dzaˬ jehˆ bymˇ bymˇ-awˬ. Guˆ-eu gaˆ-eu hawˇ-eu luˬ-iˇ seˇ-iˇ-eu jeˬ, laꞈ taˆ paw neh oe luꞈ-eu meh.

² Ziˇoˬ meuˬ-euˬ aˇ gʼehˇ yaw zawˇ muiˬ kʼawꞈ, luˬ-iˇ seˇ-iˇ tehꞈ-a.

³ Sahˬ paˬ deuˬ guiˇ maꞈ sheuˬ uiˬ-awˇ, kʼoeˇ gaˇ bui le tehꞈ-a. Meuˬ-euˬ tiˬ jawˬ sehˬ gʼawˆ gʼawˆ-awˇ, yawˬ ha kʼaˇ mawꞈ-eu tsahˇ-ahˇ jawˇ duˬ yuˇ tehꞈ-a.

⁴ “Yeˬluˇsaˬlehˬ meuˬ-ahˇ guiˇ deuˆ-eu lehˬ hmˬ-awˬ. Nah gʼahˇ paw guiˇ deuˆ ma” lehˇ aˬ yawꞈ maꞈ ehˇ kʼawꞈ, heu loꞈ-ehˇ paˇ ehˇ paˇ tehꞈ-a. “Uˬ ciꞈ ciꞈ le-awˇ aˇ yamˬ dzeuˇ-iˇ ngaˇ. Uˬ ciꞈ yaw zahˇ maˬ paˇ dawˬ bya coeˇ ngaˇ.

⁵ Uˬ ciꞈ paw aˬ dui guiˇ deuˆ-awˇ, ziꞈ-eu nymˇ deuˬ laˆ cawˆ jiˇ ma.”

⁶ Baoˬ huiˬ-eu Sahˬpaˬ Miˬyehˇ-aˬ, Sahˬ paˬ kʼoeˇ deuˬ-ahˇ heu loꞈ-ehˇ ehˇ-eu meh. “Yeˬluˇsaˬlehˬ meuˬ-ahˇ deuˆ-eu gʼaˇ duˬ, aˇ bawˇ tuˇ-awˇ jeh guiˇ guiˇ-awˬ. Kʼehˬ-eu kʼaˆ-eu jeˬ byah luꞈ-eu miˇ neh. meuˬ heu meuˬ-ahˇ ngaˇ kʼehˬ nehˬ ma.

⁷ Lah duˬ laꞈ kʼoeˇ iˇ cuꞈ iˇ beuˆ doˆ-eu loꞈ-ehˇ, Yeˬluˇsaˬlehˬ laꞈ kʼoeˇ yaw haiˬ jeˬ iˇ beuˆ doˆ-eu meh. Meuˬ laꞈ kʼoeˇ kʼehˬ dzaˬ kʼaˆ dzaˬ-eu jeˬ ya gaˬ-awˇ, maˇ kʼehˬ maˇ naˇ hawˇ-eu naˇ gawˇ maˬ tsehˆ leˇ-a.

⁸ Yeˬluˇsaˬlehˬ meuˬ-ahˇ jawˇ-eu tsawˇ haˬ deuˬ-oˇ, shaˬ zahˬ heu naw maꞈ-ahˇ maˬ mehˬ paˇ nehˬ nya naˇ, naw maꞈ-ahˇ ngaˇ byehˇ dzeh yaꞈ-awˇ, naw maꞈ-euˬ meuˬ-ahˇ tsawˇ haˬ maˬ jawˇ ni, kʼaˇ shuiꞈ deh ga bi pyeuꞈ-iˇ ma.”

Miˬyehˇ-ahˇ puiˬ-eu Iˇsaˬleˬlaˆ

⁹ Baoˬ huiˬ-eu Sahˬpaˬ Miˬyehˇ heu loꞈ-ehˇ ehˇ-eu meh. “Aˇ siˬ juˆ dzeh jiˇ-euˬ aˬ gaꞈ yaˇ kmˇ loꞈ-ehˇ, Iˇsaˬleˬlaˆ tsawˇ jeuˬ byoˆ-iˇ laˆ-iˇ tehꞈ-a. Kʼoeˇ baˬ da neh aˇ yamˬ jaˆ ngeh, ka kʼoꞈ nya-eu deuˬ-ahˇ nawˇ ya ka kʼoꞈ nehˬ meh.”

¹⁰ Ngaˇ heu loꞈ-ehˇ ehˇ kʼoꞈ nehˬ-euˬ ma. “Ngaˬ neh mehˬ-euˬ dawˬ-ahˇ aˬ suˇ gʼaˬ naˇ haˬ nmˇ. Aˬ yawꞈ maꞈ nui ma gʼahˇ-eu baˬ da neh, nawˬ neh bi ehˇ-euˬ dawˬ deuˬ-ahˇ maˬ naˇ haˬ-ehˇ, nawˬ-euˬ dawˬ-ahˇ naˬ gʼa-eu meh.

¹¹ Sahˬpaˬ Miˬyehˇ nawˇ aˬ yawꞈ maꞈ-ahˇ nui ma pehˇ-eu jeˬ, ngaˬ-euˬ nui ma miˬ dzaˬ doꞈ-eu loꞈ-ehˇ, ngaˬ-ahˇ maˬ dzahˬ tehˬ coeˇ nya.” Sahˬpaˬ Miˬyehˇ ngaˬ-ahˇ ehˇ-eu, “Meuˬ-euˬ lehˆ kawˆ doe ni gʼa-eu zaˬ deuˬ hawˇ-eu, zaˬ guˬ deuˬ uiˬ leˇ bymˇ leˇ taˬ-euˬ gaˇ, ngaˬ-euˬ nui pehˇ shehˆ daˆ nehˬ-awˬ. Miˬ zaˬ yo zaˬ dawˬ tawˆ bi nyehꞈ byoˆ gʼeh jiˇ-awˇ, mawˬ dui dui-eu deuˬ kʼawꞈ maˬ dzeˇ yaꞈ ni pyeuꞈ-iˇ tehꞈ-a.

¹² Aˬ yawꞈ maꞈ-euˬ nymˇ deuˬ aˬ cawˬ-ahˇ ya biꞈ-awˇ, deh yaˇ hawˇ-eu miˬ zaˬ ya a nehˬ gaˇ keuˆ ni, miˇ kʼahˬ heu kʼahˬ-ahˇ ngaˇ kʼehˬ ma.

¹³ Huiˬ zaˬ nyiˇ zaˬ dawˬ tawˆ luꞈ kʼawꞈ, maˬ dawˇ-eu laꞈ kʼoeˇ pyuˇ poˆ-awˇ, Miˬyehˇ gʼaˇ duˬ ngehˬ dah-eu deuˬ hawˇ-eu piˇ ma deuˬ kʼawꞈ, miˇ kʼahˬ zaˬ-ahˇ mehˇ shuiˇ shuiˇ dzaˬ-eu meh.

¹⁴ Ngaˬ-euˬ tsawˇ haˬ deuˬ-euˬ maˇ kʼehˬ maˇ naˇ deuˬ-ahˇ, aˬ gah pyaˆ-eu naˆ ni tehꞈ-ehˇ aˬ yawꞈ maꞈ sawˇ nehˬ-awˇ, maˬ taˬ leˇ gaˇ keuˆ ni taˬ leˇ gʼaˬ mehˬ lehˇ myawꞈ-eu meh.

¹⁵ Gaˇ yaw jawꞈ heu deuˬ mˇ-euˬ baˬ da neh, aˬ yawꞈ maꞈ maˬ shaꞈ dawˇ-a loˇ. Aˬ yawꞈ maꞈ tiˬ pawꞈ-iˬ maˬ shaꞈ dawˇ-ehˇ, myaˆ pyawˬ tiˬ pawꞈ-iˬ maˬ cawˆ-a. Kʼoeˇ baˬ da neh aˬ cawˬ loꞈ-ehˇ aˬ yawꞈ maꞈ kʼawꞈ ya coˬ-iˇ-awˇ, aˬ yawꞈ maꞈ-ahˇ ngaˇ kʼehˬ nehˬ ngeh, aˬ yawꞈ maꞈ-euˬ aˇ nah jiˇ le meh lehˇ, Sahˬpaˬ Miˬyehˇ pyeuꞈ-eu ngaˇ ehˇ-eu ma.”

Miˬyehˇ-euˬ gaˇ ma-ahˇ Iˇsaˬleˬlaˆ byehˇ-euˬ

¹⁶ Sahˬpaˬ Miˬyehˇ aˬ yawꞈ-euˬ tsawˇ haˬ deuˬ-ahˇ ehˇ nehˬ-eu, “Gaˇ ma gaˇ tsmˇ-ahˇ yawꞈ-awˇ haw duˬ-awˬ. Aˇ hu ba-euˬ gaˇ ma gaˇ oeˇ naˇ haˬ duˬ-awˬ. Gaˇ ma gaˇ muiˬ naˇ haˬ duˬ-awˇ cah naˇ, nui saˇ oꞈ-awˇ ya dehꞈ tehꞈ-a.” Ehˇ kʼawꞈ, “Gaˇ ma gaˇ muiˬ-ahˇ maˬ cah” lehˇ, Sahˬpaˬ Miˬyehˇ-ahˇ aˬ yawꞈ maꞈ ehˇ-eu meh.

¹⁷ Kʼoeˇ naˇ, daˇ heh teˇ saˇ bi naˇ haˬ-eu gʼaˇ duˬ, meuˬ-ahˇ loꞈ-eu tsawˇ haˬ Sahˬpaˬ Miˬyehˇ tseˇ doˆ nehˬ kʼawꞈ, “Maˬ naˇ haˬ” lehˇ aˬ yawꞈ maꞈ ehˇ-eu meh.

¹⁸ Kʼoeˇ baˬ da neh Sahˬpaˬ Miˬyehˇ ehˇ-eu, “Miˇ kʼahˬ tsawˇ jeuˬ dawˬ tawˆ luꞈ naˬ bawˇ ciˬ kʼmˇ-awˇ, ngaˬ-euˬ tsawˇ jeuˬ-ahˇ aˬ jeˬ keuˆ le nga lehˇ haw taˬ-awˬ.

¹⁹ Miˇ tsaˬ tahˬ kʼawˇ-oˇ naˬ bawˇ ciˬ kʼmˇ-awˬ. Tsawˇ haˬ heu deuˬ ngaˬ-euˬ dawˬ-ahˇ maˬ naˇ haˬ-ehˇ, ngaˬ-euˬ zahˇ dawˬ kʼoꞈ dawˬ-ahˇ byehˇ dzeh-euˬ miˇ neh, oꞈ-eu geuˇ-eu loꞈ-ehˇ aˬ yawꞈ maꞈ-ahˇ kʼehˬ-awˇ, luˬ-iˇ seˇ-iˇ-eu jeˬ bi keuˆ le ma.

²⁰ Sheˬba miˇ kʼahˬ-ahˇ jaˆ-eu tsiˇ yaw saw hawˇ-eu, gaˇ mahˇ kaˬ-eu miˇ kʼahˬ-ahˇ jaˆ-eu pawˬ coeˇ yaw saw jeˬ, ngaˬ-ahˇ aˬ yawꞈ maꞈ damˬ laˇ gaˇ laˬ kʼaˬ maˬ cehˇ. Aˬ yawꞈ maꞈ damˬ nehˬ laꞈ-euˬ jeˬ ngaˇ maˬ ha geuꞈ. Aˬ yawꞈ maꞈ lawˇ-eu jeˬ-ahˇ ngaˇ laˬ kʼaˬ maˬ cehˇ.

²¹ Tsawˇ haˬ heu deuˬ sahˬ tiꞈ tiꞈ-awˇ coˬ-iˇ ni ngaˇ jahˇ ma. Aˬ da hawˇ-eu zaˬ tiˬ gaˇ ya shiˇ-awˇ, nymˇ kaˬ taꞈ-eu cawˬ deuˬ tiˬ kawˆ loꞈ-ehˇ ya shiˇ tehꞈ-a.”

Laˬ taˆ paw jawˇ-eu tsawˇ jeuˬ guiˇ deuˆ le-eu

²² Sahˬpaˬ Miˬyehˇ heu loꞈ-ehˇ ehˇ-eu meh. “Laˬ taˆ paw jaˆ-eu miˇ kʼahˬ tiˬ kʼahˬ-ahˇ jawˇ-eu tsawˇ haˬ deuˬ oe luꞈ meh. Gaˇ mahˇ kaˬ gaˇ jawˇ-eu huiˬ-eu tsawˇ jeuˬ tiˬ jeuˬ, guiˇ deuˆ-eu gʼaˇ duˬ lehˬ hmˬ dah luꞈ meh.

²³ Aˬ yawꞈ maꞈ kaˆ hawˇ-eu mi cehˇ baꞈ-awˇ, gʼawˬ shaˬ gaˬ-eu maˬ siˬ nya-a. Aˬ yawꞈ maꞈ mahˬ pyehˬ teh sehˇ-awˇ oe-eu, iˬ ma laˆ shaˆ mahˇ gaˇ duˇ-awˇ, Yeˬluˇsaˬlehˬ meuˬ-ahˇ deuˆ-eu lehˇ gʼeh-eu meh.

²⁴ Yeˬluˇsaˬlehˬ-ahˇ jawˇ-eu tsawˇ haˬ deuˬ ehˇ-eu, “Gaˇ kawˆ heu deuˬ nga maꞈ ya gaˬ gʼaˬ-awˇ, nga maꞈ laꞈ guˬ shiˇ-euˬ gaˇ duˇ miˇ-a. Zaˬ miˬ zaˬ zaˬ baw ngeh loꞈ-ehˇ, shaˬ zahˬ naꞈ dui dui luꞈ-eu ma.

²⁵ Muiˇ-eu deuˬ guiˇ deuˆ-eu keu ka baꞈ-awˇ, nga maꞈ-euˬ tiˬ jawˬ jawˇ luꞈ-eu miˇ neh, myawˬ kʼahˬ yaˇ kʼahˬ-ahˇ maˬ iˇ doˆ peuˬ-eu uˬ taꞈ, gaˇ jawˬ-ahˇ kʼawꞈ maˬ cah peuˬ nya.”

²⁶ Sahˬpaˬ Miˬyehˇ aˬ yawꞈ-euˬ tsawˇ haˬ deuˬ-ahˇ heu loꞈ-ehˇ ehˇ-eu meh. “Guˬ daˇ pehˇ zeuˇ mehˬ tsoeˬ dm-awˇ, kʼaˬ lehˇ tsahˬ-ahˇ mahˬ poˆ poˆ-awˬ. Aˬ li tiˬ gʼaˬ tehꞈ-euˬ gʼaˇ duˬ tsawˇ ngoeˇ ngoeˇ-eu loꞈ-ehˇ, nui ma shaˬ zahˬ mˇ dui dui-awˬ. Aˬ jeˬ miˇ neh ehˇ naˇ, naw maꞈ-ahˇ laˆ cawˆ le-eu muiˇ-eu deuˬ, ja pyuˬ ni guiˇ deuˆ le tehꞈ-a.

²⁷ Yeˬlaˬmiˇ-oˇ, shmˇ puiˆ neˇ-awˇ tsehˬ ka haw-eu loꞈ-ehˇ, ngaˬ-euˬ tsawˇ haˬ deuˬ-ahˇ nawˇ lawˬ haw-awˇ, aˬ joˆ-ehˇ gʼeh nga lehˇ pyehˆ tseˇ duˬ-awˬ.

²⁸ Guiˬ shuiˇ hawˇ-eu shmˇ byaˆ gʼahˇ-eu loꞈ-ehˇ, aˬ yawꞈ maꞈ nui ma gʼahˇ-awˇ ngaˬ-ahˇ puiˬ-euˬ meh. Aˬ yawꞈ maꞈ yaw lehˬ mˇ doe- awˇ maˬ muiˬ-eu jeˬ ja byah-eu meh.

²⁹ Baw aˇ naˆ ni baw neˇ kʼawꞈ, shmˇ shmˇ keˬ maˬ baw shawˇ nya-eu loꞈ-ehˇ, ngaˬ-euˬ tsawˇ haˬ deuˬ ahˇ baw shawˇ-eu-aˬ, haiˬ-eu jeˬ maˬ byoˆ-iˇ nya-eu miˇ neh, tiˬ jeˬ-iˬ gaˇ dahˇ maˬ tsoeˬ-a.

³⁰ Sahˬpaˬ Miˬyehˇ pyeuꞈ-eu ngaˇ byehˇ dzeh-euˬ miˇ neh, gaˇ dahˇ maˬ tsoeˬ-eu shmˇ shmˇ keˬ meh lehˇ aˬ yawꞈ maꞈ-ahˇ ya kuˇ tehꞈ-a.