Yeˬlaˬmiˇ 52 - Akha

Yeˬluˇsaˬlehˬ meuˬ cawˆ-iˇ-euˬ

¹ Zeˬdaˬkiˇ Yuˇdaˆ sahˬ paˬ pyeuꞈ laˇ ngeh, nyiˬ tseˇ tiꞈ kʼoꞈ kʼawˆ-awˇ, Yeˬluˇsaˬlehˬ meuˬ-ahˇ jawˇ-awˇ tseˇ tiꞈ kʼoꞈ uˆ lahˇ-euˬ meh. Aˬ yawꞈ-euˬ aˬ ma-aˬ, Liˇbaˬnahˬ meuˬ-ahˇ jawˇ-eu Yeˬlaˬmiˇ-euˬ aˬ buˇ Haˬmuˇtaˬlaˇ meh.

² Sahˬ paˬ Zeˬdaˬkiˇ-aˬ, sahˬ paˬ Yeˬhawˇyaˬkmˬ loꞈ-ehˇ, Sahˬpaˬ Miˬyehˇ mehˬ shi iˬ baˇ mˇ-euˬ meh.

³ Yeˬluˇsaˬlehˬ meuˬ hawˇ-eu Yuˇdaˆ miˇ kʼahˬ laꞈ kʼoeˇ jawˇ-eu tsawˇ haˬ deuˬ-ahˇ Sahˬpaˬ Miˬyehˇ nui ma pehˇ dui dui-eu miˇ neh, aˬ yawꞈ-euˬ mehˬ shi maˬ bi jawˇ ni teh dzeh nehˬ-euˬ meh. Baˬbuˇloˬ sahˬ paˬ Neˬbuˬkaˬneˬzaˬ-ahˇ Zeˬdaˬkiˇ puiˬ-euˬ meh.

⁴ Kʼoeˇ miˇ neh, Zeˬdaˬkiˇ sahˬ paˬ geuꞈ-eu gʼoeˬ kʼoꞈ tiˬ kʼoꞈ, ba la tseˇ siˬ tiˬ siˬ, tseˇ nah tiˬ nah-ahˇ, Neˬbuˬkaˬneˬzaˬ guiˇ maꞈ dawˬ tawˆ luꞈ sheuˬ-awˇ, Yeˬluˇsaˬlehˬ meuˬ-ahˇ guiˇ deuˆ le-euˬ meh. Meuˬ-euˬ laꞈ nyiˇ paw aˬ yawꞈ maꞈ sehˬ gʼawˆ gʼawˆ-awˇ jawˇ-awˇ, meuˬ-euˬ tiˬ jawˬ guiˇ deuˆ-eu lahˇ ciˬ-euˬ meh.

⁵ Zeˬdaˬkiˇ sahˬ paˬ geuꞈ-euˬ tseˇ tiꞈ kʼoꞈ tiˬ kʼoꞈ-ahˇ keuˆ ni, meuˬ kʼoeˇ meuˬ-ahˇ aˬ yawꞈ maꞈ loꞈ jawˬ taˬ-euˬ meh.

⁶ Kʼoeˇ ngeh kʼoꞈ ba la oeˬ siˬ tiˬ siˬ gʼoeˬ nah tiˬ nah-ahˇ, mehꞈ dui shuꞈ dui dui-eu miˇ neh, dzaˬ-eu tiˬ jeˬ-iˬ maˬ jaˆ-ehˇ pyeuꞈ laˇ ngeh,

⁷ meuˬ meuˬ lahˇ pehꞈ-iˇ-euˬ meh. Baˬbuˇloˬ tsawˇ haˬ deuˬ neh meuˬ-ahˇ loꞈ jawˬ taˬ-euˬ kʼawꞈ, yehˇ dawˬ tawˆ luꞈ uˬ ciꞈ paw cehˆ dzeuˇ jiˇ-euˬ meh. Sahˬ paˬ-euˬ yaˇ kmˇ paw neh aˬ yawꞈ maꞈ iˇ-awˇ, meuˬ lahˇ nyiˬ tiˆ aˇ kaˬ-ahˇ dahˇ-eu lahˇ kʼehˬ-ahˇ neh cehˆ doˆ-awˇ, Yawˇdaˬ lawˇ baˬ deh kʼawꞈ paw cehˆ-euˬ meh.

⁸ Ehˇ kʼawꞈ, Baˬbuˇloˬ guiˇ maꞈ sahˬ paˬ Zeˬdaˬkiˇ-euˬ mehˬ nah teh-awˇ, Yeˬliˇkoˇ meuˬ dawˬ peh jaˆ-eu deh ga-ahˇ nyehꞈ mi-euˬ meh. Kʼoeˇ ngeh, aˬ yawꞈ-euˬ yehˇ dawˬ tawˆ luꞈ, aˬ yawꞈ-ahˇ byehˇ dzeh-awˇ cehˆ-euˬ meh.

⁹ Haˬmaˆ gahˬ kaˬ-ahˇ jaˆ-eu Yiˇbaˬlahˬ meuˬ-ahˇ jawˇ luꞈ-eu sahˬ paˬ Neˬbuˬkaˬneˬzaˬ jawˇ gaˇ, Zeˬdaˬkiˇ-ahˇ nyehꞈ gʼeh-awˇ, Neˬbuˬkaˬneˬzaˬ neh aˬ yawꞈ-ahˇ kʼoeˇ gaˇ yaˇ kʼaˬ daˇ nehˬ-euˬ meh.

¹⁰ Yiˇbaˬlahˬ meuˬ-ahˇ, Zeˬdaˬkiˇ-euˬ mehˬ shi Zeˬdaˬkiˇ-euˬ aˬ li deuˬ-ahˇ aˬ yawꞈ sehꞈ-awˇ, Yuˇdaˆ tsawˇ haˬ yaw huiˬ yaw mahˇ deuˬ-ahˇ kʼawꞈ, aˬ yawꞈ sehꞈ-euˬ meh.

¹¹ Kʼoeˇ naˇ, Zeˬdaˬkiˇ-euˬ myaˆ nuiˆ laˆ behꞈ nehˬ-awˇ, shmˇ caˆ bi daˬ-awˇ, Baˬbuˇloˬ miˇ kʼahˬ-ahˇ sheuˬ daˆ gʼeh-euˬ meh. Zeˬdaˬkiˇ-aˬ, shiˇ ngeh keuˆ ni Baˬbuˇloˬ meuˬ-ahˇ jaˆ-eu paꞈ kuˆ-ahˇ uˇ-euˬ meh.

Uˬ duˬ tahˬ nymˇ nymˇ ma cawˆ-iˇ-euˬ

¹² Sahˬ paˬ Neˬbuˬkaˬneˬzaˬ Baˬbuˇloˬ miˇ kʼahˬ-ahˇ uˆ lahˇ-euˬ tseˇ gʼoeˬ kʼoꞈ tiˬ kʼoꞈ ba la ngaˬ siˬ tiˬ siˬ tseˇ nah tiˬ nah-ahˇ, sahˬ paˬ-ahˇ nui noeˬ nui duˇ biꞈ-awˇ, sahˬ paˬ-euˬ guiˇ maꞈ deuˬ kʼoeˇ taˆ uˆ lahˇ-eu gʼaˬ pyeuꞈ-eu Neˬbuˬzaˬlaˬdaˬ, Yeˬluˇsaˬlehˬ meuˬ-ahˇ uˇ laˇ-euˬ meh.

¹³ Uˬ duˬ tahˬ nymˇ nymˇ ma maˬ ehˇ, sahˬ paˬ-euˬ hawˇ nymˇ maˬ ehˇ, nymˇ yaw muiˬ dawˬ tawˆ luꞈ-ahˇ maˬ ehˇ, aˬ yawꞈ miˬ dzaˬ keuˬ dzeh-euˬ meh.

¹⁴ Aˬ yawꞈ-euˬ yehˇ deuˬ meuˬ meuˬ lahˇ laˆ byaˆ-euˬ meh.

¹⁵ Kʼoeˇ naˇ, meuˬ laꞈ kʼoeˇ kʼaˇ jawˇ luꞈ-eu deuˬ-ahˇ Neˬbuˬzaˬlaˬdaˬ neh Baˬbuˇloˬ miˇ kʼahˬ-ahˇ sheuˬ daˆ gʼeh-euˬ meh. Myawˬ mˇ-eu yaw nya deuˬ hawˇ-eu, Baˬbuˇloˬ tsawˇ haˬ jawˇ paw cehˆ uˇ laˇ-euˬ deuˬ-ahˇ aˬ yawꞈ sheuˬ daˆ gʼeh-euˬ meh.

¹⁶ Ehˇ kʼawꞈ, myawˬ gahˬ tiˬ pawꞈ-iˬ maˬ jaˆ-eu shaˬ dui zahˬ dui dui-eu tsawˇ haˬ deuˬ-ahˇ Yuˇdaˆ miˇ kʼahˬ laꞈ kʼoeˇ bi jawˇ yaꞈ-awˇ, aˬ gaꞈ yaˇ kmˇ hawˇ-eu deh yaˇ-ahˇ gaˇ bi mˇ yaꞈ-euˬ meh.

¹⁷ Uˬ duˬ tahˬ nymˇ nymˇ ma laꞈ kʼoeˇ jaˆ-eu guiˬ shuiˇ kʼawˇ zeuˇ deuˬ, laˆ lawˬ deuˬ hawˇ-eu guiˬ shuiˇ lah-ahˇ aˬ yawꞈ maꞈ ngawˬ pyaˆ jiˇ-awˇ, guiˬ shuiˇ dawˬ tawˆ luꞈ Baˬbuˇloˬ miˇ kʼahˬ-ahˇ yuˇ kʼoꞈ gʼeh-euˬ meh.

¹⁸ Lawˇ duˬ laˆ shawˇ gaˇ zmˬ-eu keu ka deuˬ pyeuꞈ-eu, kʼaˬ lehˇ kuˬ-eu kuˬ tseuˆ, kʼaˬ lehˇ tawˆ ahˇ duˬ hawˇ-eu, tsiˇ kʼmˬ laˆ saˆ doꞈ gaˇ zmˬ-eu keu ka deuˬ, lawˇ ngeh shehˇ ngeh shiˬ ciˬ kʼmˇ-eu naˬ bo, yaw saw jeˬ doꞈ damˬ gaˇ zmˬ-eu naˬ bo hawˇ-eu, Uˬ duˬ tahˬ nymˇ nymˇ ma laꞈ kʼoeˇ kʼaˇ zmˬ-euˬ guiˬ shuiˇ keu ka dawˬ tawˆ luꞈ yuˇ geuꞈ gʼeh-euˬ meh.

¹⁹ Shuiˇ hawˇ-eu pyuˇ neh kʼaˇ jahˇ taˬ-euˬ keu ka deuˬ pyeuꞈ-eu, naˬ bo yaw zaˬ deuˬ, miˬ jiˆ pehˆ ahˇ-eu mui za, lawˇ ngeh shehˇ ngeh shiˬ shehˆ ahˇ-eu naˬ bo deuˬ, kʼaˬ lehˇ tawˆ ahˇ duˬ, tsiˇ kʼmˬ doꞈ taˬ duˬ, yaw saw jeˬ dawˆ ahˇ-eu naˬ bo deuˬ hawˇ-eu, aˬ gaꞈ dzaˇ uiˇ kʼaˇ-awˇ lawˇ gaˇ zmˬ-eu naˬ bo deuˬ-ahˇ, aˬ yawꞈ maꞈ yuˇ geuꞈ gʼeh-euˬ meh.

²⁰ Sahˬ paˬ Sawˇlaˬmoˬ neh Uˬ duˬ tahˬ nymˇ nymˇ ma laꞈ kʼoeˇ bi geuꞈ-eu lehˇ guiˬ shuiˇ neh jahˇ taˬ yaꞈ-euˬ kʼawˇ zeuˇ nyiˬ zeuˇ, laˆ lawˬ deuˬ, lah hawˇ-eu lah-ahˇ tawˬ-eu mawˇ neˇ mawˇ kawˇ tseˇ nyiꞈ kawˇ-aˬ, maˬ saˆ jiˇ coeˇ gaˇ keuˆ ni myaˬ dui dui-eu guiˬ shuiˇ neh jahˇ taˬ-euˬ meh.

²¹ Kʼawˇ zeuˇ nyiˬ zeuˇ-aˬ, tiˬ kawˆ hui ni ahˇ-awˇ, tseˇ yehꞈ caˆ goˇ-awˇ, lmˇ paˆ tseˇ nyiꞈ caˆ byah-awˇ laꞈ yaˬ tiˬ daˬ tuˇ-awˇ, kʼehˬ bahˬ dahˇ-eu meh.

²² Kʼawˇ zeuˇ uˬ du guiˬ shuiˇ uˬ kʼoˆ tsahˬ taˬ-awˇ, uˬ kʼoˆ kʼoeˇ ngaˬ caˆ byah ni goˇ-awˇ, jawˬ jawˬ-ehˇ guiˬ shuiˇ neh aˇ boꞈ aˇ yehˆ yehˆ taˬ-euˬ meh. Kʼawˇ zeuˇ yawˬ zeuˇ yawˬ kʼawꞈ, kʼoeˇ loꞈ-ehˇ duˇ ni jahˇ taˬ-euˬ meh.

²³ Kʼawˇ zeuˇ aˬ yawꞈ zeuˇ yawꞈ kʼoeˇ taˆ boꞈ taˬ-euˬ guiˬ shuiˇ aˇ boꞈ aˇ yehˆ tiˬ yaˇ byah-awˇ, miˇ tsa jawˇ-awˇ haw ngeh, gaˇ dzeˇ paw boꞈ taˬ-euˬ gʼoeˬ tseˇ koꞈ boꞈ ya mawˇ-eu meh.

Yuˇdaˆ tsawˇ haˬ deuˬ Baˬbuˇloˬ miˇ kʼahˬ-ahˇ bi nyehꞈ gʼeh-euˬ

²⁴ Kʼoeˇ naˇ, guiˇ maꞈ kʼoeˇ taˆ aˬ yuiꞈ geuꞈ-eu Neˬbuˬzaˬlaˬdaˬ-aˬ, Piˇ ma Yaw huiˬ gʼaˬ pyeuꞈ-eu Seˬlehˇyaˬ, piˇ ma nyiˬ gʼaˬ tiˬ gʼaˬ pyeuꞈ-eu Zeˬpaˬniˇ hawˇ-eu, Uˬ duˬ tahˬ nymˇ nymˇ ma laꞈ kʼoeˇ gaˇ mˇ-eu yaw huiˬ smˇ gʼaˬ-ahˇ sheuˬ gʼeh-euˬ meh.

²⁵ Meuˬ laꞈ kʼoeˇ jawˇ luꞈ-eu tsawˇ haˬ deuˬ laꞈ kʼoeˇ, guiˇ maꞈ kʼoeˇ taˆ uˆ lahˇ-eu yaw huiˬ yaw mahˇ geuꞈ-eu gʼaˬ, maˬ cehˆ ni meuˬ laꞈ kʼoeˇ jawˇ luꞈ-eu sahˬ paˬ-ahˇ nui noeˬ nui duˇ biꞈ-euˬ shiꞈ gʼaˬ, guiˇ maꞈ kʼoeˇ taˆ uˆ lahˇ-eu gʼaˬ-euˬ laꞈ oˆ gaˇ mˇ-awˇ, guiˇ maꞈ-ahˇ taꞈ leˇ-eu gaˇ kawˆ jaˇ laˇ boꞈ-eu gʼaˬ hawˇ-eu, yaw huiˬ yaw mahˇ koꞈ tseˇ gʼaˬ-ahˇ aˬ yawꞈ sheuˬ gʼeh-euˬ meh.

²⁶ Yiˇbaˬlahˬ meuˬ-ahˇ, Baˬbuˇloˬ sahˬ paˬ jawˇ gaˇ, Neˬbuˬzaˬlaˬdaˬ neh aˬ yawꞈ maꞈ-ahˇ sheuˬ gʼeh-euˬ meh.

²⁷ Yiˇbaˬlahˬ meuˬ-aˬ, Haˬmaˆ gahˬ kaˬ-ahˇ jaˆ-eu meh. Kʼoeˇ gaˇ, Baˬbuˇloˬ sahˬ paˬ aˬ yawꞈ maꞈ-ahˇ kʼehˬ-awˇ sehꞈ-euˬ meh. Kʼoeˇ loꞈ-ehˇ Yuˇdaˆ tsawˇ haˬ deuˬ aˬ cawˬ neh bi nyehꞈ byoˆ gʼeh-euˬ meh.

²⁸ Neˬbuˬkaˬneˬzaˬ neh bi nyehꞈ gʼeh-euˬ tsawˇ haˬ jaˇ laˇ-aˬ, heu loꞈ-ehˇ meh. Aˬ yawꞈ sahˬ paˬ geuꞈ-euˬ shiꞈ kʼoꞈ tiˬ kʼoꞈ-ahˇ smˬ heˇ nyiˬ tseˇ smˇ gʼaˬ nyehꞈ gʼeh-euˬ meh.

²⁹ Aˬ yawꞈ sahˬ paˬ geuꞈ-eu tseˇ yehꞈ kʼoꞈ tiˬ kʼoꞈ-ahˇ, Yeˬluˇsaˬlehˬ meuˬ-ahˇ jawˇ-eu tsawˇ haˬ yehꞈ yaˇ smˬ tseˇ nyiꞈ gʼaˬ nyehꞈ gʼeh-euˬ meh.

³⁰ Aˬ yawꞈ sahˬ paˬ geuꞈ-eu nyiˬ tseˇ smˇ kʼoꞈ tiˬ kʼoꞈ-ahˇ Neˬbuˬzaˬlaˬdaˬ neh shiꞈ yaˇ oeˬ tseˇ ngaˬ gʼaˬ nyehꞈ gʼeh-euˬ meh. Dawˬ tawˆ luꞈ oeˬ heˇ koꞈ yaˇ gʼaˬ nyehꞈ gʼeh-euˬ meh.

³¹ Iˇbiˇlaˆmeˬyawˇdaˆ Baˬbuˇloˬ sahˬ paˬ pyeuꞈ laˇ ngeh kʼoꞈ, Yuˇdaˆ sahˬ paˬ Yeˬhawˇyaˬciˬ-ahˇ aˬ yawꞈ gʼawˬ shaˬ gaˬ nehˬ-awˇ, paꞈ kuˆ laꞈ kʼoeˇ neh pyehˬ doˆ nehˬ-euˬ meh. Yeˬhawˇyaˬciˬ-ahˇ nyehꞈ ka gʼeh-euˬ smˬ tseˇ shiꞈ kʼoꞈ tiˬ kʼoꞈ, ba la tseˇ nyiꞈ siˬ tiˬ siˬ, nyiˬ tseˇ ngaˬ nah tiˬ nah-ahˇ, kʼoeˇ loꞈ-ehˇ pyehˬ nehˬ-euˬ meh.

³² Aˬ yawꞈ-ahˇ Iˇbiˇlaˆmeˬyawˇdaˆ yaw muiˬ paˬ-ehˇ haw nehˬ-awˇ, Baˬbuˇloˬ miˇ kʼahˬ-ahˇ bi nyehꞈ ka gʼeh-euˬ sahˬ paˬ nui deuˬ naˆ maˬ tseˇ taˬ huiˬ taˬ mahˇ nehˬ-euˬ meh.

³³ Kʼoeˇ miˇ neh, Yeˬhawˇyaˬciˬ-ahˇ paꞈ kuˆ-ahˇ uˇ-eu deuˬ dm-eu mehˬ tsoeˬ lehˆ dzeh-awˇ, mehˬ tsoeˬ yaw muiˬ dm paˇ-eu a kawˬ-aˬ biꞈ-awˇ, ziˇ jiˇ ngeh keuˆ ni sahˬ paˬ nehˬ-ehˇ bi dzaˬ bi dawˇ taꞈ-euˬ meh.

³⁴ Aˬ yawꞈ kʼaˇ dehꞈ kʼoeˇ keuˆ ni, aˬ yawꞈ nah yawꞈ kʼaˇ loˬ-eu jeˬ tiˬ byah tiˬ loꞈ biꞈ nehˬ-euˬ meh.