Yeˬlaˬmiˇ 51 - Akha

Baˬbuˇloˬ miˇ kʼahˬ-ahˇ yaˇ kʼaˬ paˇ daˇ nehˬ-euˬ

¹ Sahˬpaˬ Miˬyehˇ heu loꞈ-ehˇ ehˇ-eu meh. “Baˬbuˇloˬ miˇ kʼahˬ hawˇ-eu Baˬbuˇloˬ tsawˇ haˬ deuˬ kʼoeˇ taˆ, laˆ cawˆ-eu jaˬ lehˇ tiˬ bahˬ bi oe-eu lehˇ ngaˇ gʼeh-eu ma.

² Gʼo yoeˬ-ahˇ jaˬ lehˇ baw byoˆ gʼeh-eu loꞈ-ehˇ, Baˬbuˇloˬ miˇ kʼahˬ-ahˇ bi laˆ cawˆ-eu gʼaˇ duˬ, aˬ cawˬ tsawˇ jeuˬ ngaˇ pyehˬ gʼeh-ma. Luˬ-iˇ seˇ-iˇ-eu aˇ nah kʼoeˇ nah keuˆ le ngeh, yawˬ pyawˬ na luꞈ aˬ yawꞈ maꞈ guiˇ deuˆ ahˇ leꞈ-awˇ, miˇ kʼahˬ kʼahˬ lah-ehˇ juˇ tsui ni jahˇ nehˬ yaꞈ tehꞈ-a.

³ Baˬbuˇloˬ yehˇ deuˬ kaˆ beuˆ-eu maˬ dah-ehˇ, guiˇ deuˆ-eu shmˇ mehˬ tsoeˬ deuˬ gʼoˆ dm-eu maˬ dah ni jahˇ nehˬ-awˬ. Zaˬ guˬ deuˬ-ahˇ keuˆ ni maˬ bi dzeuˇ-iˇ-ehˇ, guiˇ maꞈ maꞈ lah-ehˇ laˆ byoˆ nehˬ-awˬ.

⁴ Aˬ yawꞈ maꞈ bi deuˆ tahˬ bi deuˆ naˇ jiˇ-awˇ, aˬ yawꞈ maꞈ-euˬ meuˬ deuˬ laꞈ kʼoeˇ, gaˇ ma doe ni ya shiˇ tehꞈ-a.

⁵ Baoˬ huiˬ-eu Sahˬpaˬ Miˬyehˇ pyeuꞈ-eu ngaˇ Miˬyehˇ-aˬ, Iˇsaˬleˬlaˆ miˇ kʼahˬ hawˇ-eu Yuˇdaˆ miˇ kʼahˬ-ahˇ maˬ byehˇ dzeh. Iˇsaˬleˬlaˆ-euˬ muiˬ-eu shawˇ-eu gʼaˬ pyeuꞈ-eu ngaˬ-ahˇ aˬ yawꞈ maꞈ mˇ lehˬ kʼawꞈ, ngaˇ maˬ byehˇ dzeh.

⁶ Baˬbuˇloˬ miˇ kʼahˬ-ahˇ neh cehˆ doˆ-awˬ. Uˬ kʼawˇ buˬ ni cehˆ-awˬ. Baˬbuˇloˬ miˇ kʼahˬ-euˬ iˬ baˇ baˬ da neh shiˇ gaˇ taˬ bi keuˆ. Miˇ kʼahˬ kʼoeˇ kʼahˬ-ahˇ oꞈ-eu geuˇ-eu loꞈ-ehˇ, nymˬ-mˇ ngaˇ kʼehˬ nehˬ luꞈ-eu ma.

⁷ Baˬbuˇloˬ miˇ kʼahˬ-aˬ, ngaˬ-euˬ aˬ laꞈ-ahˇ ciˬ luꞈ-eu shuiˇ kʼmˬ maˬ-ahˇ duˇ-eu ma. Kʼmˬ maˬ kʼoeˇ miˇ tsaˬ dawˬ tawˆ luꞈ-ahˇ bi yehꞈ leˇ-eu meh. Miˇ kʼahˬ tsawˇ jeuˬ deuˬ kʼoeˇ gaˇ dahˬ-eu aˬ gaꞈ dzaˇ uiˇ dawˇ-awˇ, nui ma-ahˇ maˬ noeˬ ni pyeuꞈ jiˇ-euˬ meh.

⁸ Baˬbuˇloˬ meuˬ ja pyuˬ ni coˬ-iˇ-awˇ bi laˆ cawˆ-euˬ meh. Tsawˇ ngoeˇ ngoeˇ nehˬ-awˬ. Maˇ kʼehˬ maˇ naˇ-ahˇ jaˆ gʼaˬ dawˆ nehˬ haw sheˇ. Taˬ leˇ nya-eu baw le.

⁹ Kʼoeˇ gaˇ jawˇ-eu aˬ cawˬ tsawˇ jeuˬ deuˬ ehˇ-eu, Baˬbuˇloˬ miˇ kʼahˬ-ahˇ caw ba-eu lehˇ nga maꞈ leh jeh haw-euˬ ma. Ehˇ kʼawꞈ, jeˬ nahˬ ga-iˇ miˇ-a. Miˇ kʼahˬ heu kʼahˬ-ahˇ byehˇ dzeh-awˇ, aˬ dui-euˬ miˇ kʼahˬ-ahˇ gʼoꞈ-iˇ kaˇ-euˇ. Miˬyehˇ gʼaˬ kʼaˇ ahˇ-eu yuˇ doˆ-awˇ, Baˬbuˇloˬ miˇ kʼahˬ-ahˇ nui kʼahˇ tiˬ shiˇ laˆ cawˆ nehˬ-euˬ nga.’ ”

¹⁰ Sahˬpaˬ Miˬyehˇ ehˇ-eu, “ ‘Aˬ dui maꞈ tsaˬ-euˬ gaˇ kawˆ Sahˬpaˬ Miˬyehˇ bi siˬ duˬ laꞈ-euˬ meh. Aˬ dui-euˬ Miˬyehˇ pyeuꞈ-eu Sahˬpaˬ Miˬyehˇ neh jahˇ-euˬ jeˬ gaˇ kawˆ, Yeˬluˇsaˬlehˬ meuˬ-ahˇ jawˇ-eu tsawˇ haˬ deuˬ-ahˇ ehˇ nehˬ leˇ kaˇ-euˇ’ lehˇ, ngaˬ-euˬ tsawˇ haˬ deuˬ ehˇ-eu meh.”

¹¹ Baˬbuˇloˬ miˇ kʼahˬ-ahˇ Sahˬpaˬ Miˬyehˇ laˆ cawˆ mawꞈ-eu miˇ neh, Meˬdiˇ sahˬ paˬ deuˬ uˇ laˇ ni aˬ yawꞈ jahˇ-euˬ meh. Aˬ yawꞈ-euˬ Uˬ duˬ tahˬ nymˇ nymˇ ma-ahˇ laˆ cawˆ-euˬ aˇ poeˬ aˬ yawꞈ kʼoeˇ loꞈ-ehˇ jahˇ kʼoꞈ nehˬ tehꞈ-a. Guiˇ maꞈ kʼoeˇ taˆ uˆ lahˇ-eu deuˬ heu loꞈ-ehˇ dawˬ biꞈ tehꞈ-a. “Naw maꞈ-euˬ kaˆ myaˬ shiˬ taˆ-awˬ. Dehˬ daˬ duˬ lehˬ hmˬ-awˬ.

¹² Baˬbuˇloˬ meuˬ lahˇ-ahˇ deuˆ-eu gʼaˇ duˬ paˇ loˬ paˇ lehˇ baꞈ tuˇ nehˬ-awˬ. Guiˇ daˬ daˬ-eu deuˬ hawˇ-eu guiˇ loꞈ loꞈ-eu deuˬ bi iˇ lahˬ-awˬ. Tsawˇ haˬ pyehˬ gʼeh-awˇ, guiˇ deuˆ kʼoeˬ bi kʼoeˬ-awˬ.” Baˬbuˇloˬ miˇ kʼahˬ-ahˇ jahˇ nehˬ ma lehˇ ehˇ taˬ-euˬ loꞈ-ehˇ Sahˬpaˬ Miˬyehˇ jahˇ-euˬ meh.

¹³ Miˇ kʼahˬ kʼoeˇ kʼahˬ lawˇ baˬ gʼawˬ mya gawˆ yoeˇ-awˇ, pyuˇ shuiˇ myawˬ gahˬ gʼawˬ mya ni jaˆ kʼawꞈ, aˬ yawꞈ-euˬ aˇ yamˬ jiˇ le-awˇ, shaꞈ gʼawˇ caˆ tsehˆ-iˇ-euˬ gaˇ duˇ-eu meh.

¹⁴ Sahˬpaˬ Miˬyehˇ neh heu loꞈ-ehˇ kamˬ tsehˆ taˬ-euˬ jaˆ meh. Baˬbuˇloˬ miˇ kʼahˬ-ahˇ nyehˇ bahˇ baˬ maꞈ loꞈ-ehˇ tsawˇ haˬ gʼawˬ mya ni guiˇ bi deuˆ le-awˇ, aˬ yawꞈ maꞈ guiˇ deuˆ gʼaˬ-awˇ guˇ-eu teˇ saˇ ya gaˬ tehꞈ-a.

Miˬyehˇ-ahˇ ja ceuˬ-eu caˇ dawˬ

¹⁵ Sahˬpaˬ Miˬyehˇ aˬ yawꞈ-euˬ baoˬ hawˇ-eu, aˬ yawꞈ-euˬ zaˬ siˬ tsawˇ gahˇ-ahˇ gʼoe-awˇ, miˇ tsaˬ tahˬ kʼawˇ beh-awˇ mˬ sheu taw taˬ-euˬ meh.

¹⁶ Aˬ yawꞈ dawˬ biꞈ nehˬ ngeh mˬ taˆ iˇ cuꞈ, mˬ jeˬ jeˬ-eu loꞈ-ehˇ mahˇ-awˇ, mˬ dzeˇ miˇ dzeˇ jaˆ-eu mˬ dmˇ, aˬ yawꞈ neh tsahˇ daˆ laꞈ-euˬ meh. Uˬ yehˇ yehˇ ngeh mˬ myawꞈ myawꞈ ni jahˇ-awˇ, piˬ lahˇ taˬ-euˬ jaˬ lehˇ aˬ yawꞈ pyehˬ doˆ-eu meh.

¹⁷ Tsawˇ haˬ dawˬ tawˆ aˬ dzawˬ-ahˇ duˇ-eu meh. Tahˬ pahˬ aˬ ma mawˇ kawˇ saꞈ maˬ gʼawˇ-ehˇ, miˬ yehˇ maˬ ngeuˇ-eu baˬ da neh, mawˇ kawˇ tehˆ-euˬ deuˬ daˬ ga dui dui meh.

¹⁸ Tahˬ pahˬ aˬ ma kʼoeˇ deuˬ tiˬ pawꞈ-iˬ gaˇ dahˇ maˬ tsoeˬ-ehˇ, aˬ cawˬ ja bu duˬ pyeuꞈ-eu meh. Sahˬpaˬ Miˬyehˇ zaꞈ haw le ngeh, dawˬ tawˆ bi laˆ cawˆ jiˇ tehꞈ-a.

¹⁹ Yaˬkoˆ-euˬ Miˬyehˇ kʼoeˇ loꞈ-ehˇ maˬ ngeuˇ-a. Yawˬ jeˬ na luꞈ aˬ yawꞈ beh-awˇ, Iˇsaˬleˬlaˆ aˬ yawꞈ-euˬ tsawˇ jeuˬ pyeuꞈ laˇ ni, aˬ yawꞈ tseˇ doˆ-euˬ meh. Aˬ yawꞈ-euˬ tsawˇ myahˇ Sahˬpaˬ Miˬyehˇ meh.

Sahˬpaˬ Miˬyehˇ-euˬ diˬ puˬ

²⁰ Sahˬpaˬ Miˬyehˇ ehˇ-eu, “Baˬbuˇloˬ nawˇ ngaˬ-euˬ diˬ puˬ pyeuꞈ-awˇ, ngaˬ-euˬ guiˇ deuˆ-eu keu ka ma. Miˇ kʼahˬ tsawˇ jeuˬ-ahˇ laˆ cawˆ-eu gʼaˇ duˬ, nawˬ-ahˇ ngaˇ zmˬ-euˬ ma.

²¹ Mahˬ hawˇ-eu mahˬ dziˬ-eu deuˬ-ahˇ maˬ ehˇ, mahˬ laˆ lawˬ hawˇ-eu laˆ lawˬ teh-eu deuˬ-ahˇ maˬ ehˇ, laˆ cawˆ nehˬ-eu gʼaˇ duˬ nawˬ-ahˇ ngaˇ zmˬ-euˬ ma.

²² Kʼaˬ dzeˇ zaˬ hawˇ-eu zaˬ miˬ zaˬ deuˬ-ahˇ maˬ ehˇ, tsawˇ mawˬ hawˇ-eu zaˬ guˬ deuˬ-ahˇ maˬ ehˇ, aˬ buˇ hawˇ-eu aˬ li deuˬ-ahˇ maˬ ehˇ, sehꞈ-eu gʼaˇ duˬ nawˬ-ahˇ ngaˇ zmˬ-euˬ ma.

²³ Yawˇ bo-eu deuˬ hawˇ-eu yawˇ maꞈ deuˬ-ahˇ maˬ ehˇ, deh yaˇ tsehˬ-eu tsawˇ haˬ hawˇ-eu mahˬ-ahˇ maˬ ehˇ, sahˬ paˬ sahˬ ma geuꞈ-eu deuˬ-ahˇ maˬ ehˇ, sehꞈ-eu gʼaˇ duˬ nawˬ-ahˇ ngaˇ zmˬ-euˬ ma.”

Baˬbuˇloˬ miˇ kʼahˬ-ahˇ kʼehˬ-eu

²⁴ Sahˬpaˬ Miˬyehˇ heu loꞈ-ehˇ ehˇ-eu meh. “Yeˬluˇsaˬlehˬ meuˬ kʼoeˇ taˆ yaw haiˬ jeˬ mˇ taˬ-euˬ aˇ poeˬ, Baˬbuˇloˬ miˇ kʼahˬ hawˇ-eu kʼoeˇ gaˇ kʼaˇ jawˇ-eu tsawˇ haˬ deuˬ-ahˇ ngaˇ kʼehˬ nehˬ gaˇ naw maꞈ ya mawˇ tehꞈ-a.

²⁵ Baˬbuˇloˬ -oˇ, nawˇ-aˬ, miˇ tsaˬ dawˬ tawˆ luꞈ-ahˇ laˆ cawˆ-euˬ gawˬ jawˬ-ahˇ duˇ-eu meh. Ehˇ kʼawꞈ, Sahˬpaˬ Miˬyehˇ pyeuꞈ-eu ngaˇ nawˬ-ahˇ muiˇ-eu ma. Ngaˇ nawˬ-ahˇ tsuˆ-awˇ, miˇ tsa tuˆ ni yaˆ di nehˬ-awˇ, kʼaˬ lehˇ tehꞈ-ehˇ bi jaˆ yaꞈ ma.

²⁶ Nawˇ cawˆ-iˇ-awˇ dzeˇ yaꞈ-euˬ kʼaˬ lo tsaˬ byaˆ deuˬ-ahˇ, tsawˇ haˬ tiˬ gʼaˬ-iˬ nymˇ tsoˆ gaˇ maˬ paˇ zmˬ meh. Nawˇ-aˬ, mˬ maˬ maˬ byaˆ zaˇ ziˇ kʼaˇ shuiꞈ deh ga ya pyeuꞈ-iˇ tehꞈ-a lehˇ, Sahˬpaˬ Miˬyehˇ pyeuꞈ-eu ngaˇ ehˇ-eu ma.

²⁷ “Guiˇ deuˆ-eu gʼaˇ duˬ, paˇ loˬ paˇ lehˇ ka tuˇ nehˬ-awˬ. Tsawˇ jeuˬ dawˬ tawˆ luꞈ-ahˇ gaˬ leˇ ni daˇ heh baw-awˬ. Baˬbuˇloˬ miˇ kʼahˬ-ahˇ guiˇ deuˆ-eu gʼaˇ duˬ, tsawˇ jeuˬ dawˬ tawˆ luꞈ bi lehˬ hmˬ-awˬ. Aˬyaˬyaˇ miˇ kʼahˬ, Miˇniˇ miˇ kʼahˬ hawˇ-eu, Aˬshaˇgaˬnaˆ miˇ kʼahˬ deuˬ-ahˇ, Baˬbuˇloˬ miˇ kʼahˬ-ahˇ guiˇ deuˆ le-awˬ lehˇ ehˇ nehˬ-awˬ. Guiˇ deuˆ gaˇ aˬ yuiꞈ bi geuꞈ-eu tiˬ gʼaˬ tseˇ doˆ-awˬ. Nyehˇ bahˇ baˬ maꞈ oe-eu loꞈ-ehˇ, mahˬ mahˬ maꞈ teh ka laꞈ-awˬ.

²⁸ Baˬbuˇloˬ miˇ kʼahˬ-ahˇ guiˇ deuˆ-eu gʼaˇ duˬ, miˇ kʼahˬ tsawˇ jeuˬ deuˬ bi lehˬ hmˬ jiˇ-awˬ. Meˬdiˇ sahˬ paˬ deuˬ hawˇ-eu aˬ yuiꞈ aˬ tsu geuꞈ-eu yaw huiˬ yaw mahˇ deuˬ dawˬ tawˆ luꞈ-ahˇ maˬ ehˇ, aˬ yawꞈ maꞈ uˆ lahˇ-eu uˬ moˆ kʼaˇ jawˇ luꞈ-eu miˇ kʼahˬ deuˬ-euˬ guiˇ maꞈ deuˬ-ahˇ maˬ ehˇ, bi kuˇ laˬ-iˇ-awˬ.

²⁹ Sahˬpaˬ Miˬyehˇ aˬ yawꞈ neh noeˬ taˬ-euˬ loꞈ-ehˇ, Baˬbuˇloˬ miˇ kʼahˬ-ahˇ tsawˇ haˬ tiˬ gʼaˬ-iˬ maˬ jawˇ-eu kʼaˇ shuiꞈ deh yaˇ pyeuꞈ-iˇ ni jahˇ nehˬ-eu lehˇ gʼeh-eu miˇ neh, miˇ tsaˬ tahˬ kʼawˇ yaw dzuˬ dzuˬ-eu meh.

³⁰ Baˬbuˇloˬ yehˇ deuˬ guiˇ maˬ deuˆ ni naˬ leˇ-awˇ, aˬ yawꞈ maꞈ-euˬ taˆ laꞈ kʼoeˇ uˇ luꞈ-eu meh. Aˬ yawꞈ maꞈ nui ma baˬ dui dui-iˇ-awˇ, zaˬ miˬ zaˬ loꞈ-ehˇ pyeuꞈ laˇ taˬ-euˬ meh. Meuˬ lahˇ laˇ gʼoˆ deuˬ pyaˆ-iˇ jiˇ-awˇ, nymˇ deuˬ miˬ dzaˬ puiˆ luꞈ-eu meh.

³¹ Aˬ yawꞈ-euˬ meuˬ yawˬ pyawˬ na luꞈ aˬ cawˬ neh bi deuˆ gʼaˬ-euˬ gaˇ kawˆ, tsawˇ haˬ tiˬ gʼaˬ saˇ-iˬ tiˬ gʼaˬ Baˬbuˇloˬ sahˬ paˬ-ahˇ cehˆ tsaꞈ gaˬ laˇ-eu meh.

³² Lawˇ baˬ tsehˆ daˬ-ahˇ muiˇ-eu deuˬ neh deuˆ gʼaˬ-awˇ, taˆ taˆ lah-ehˇ miˬ dzaˬ bi dzah puiˆ-awˇ, Baˬbuˇloˬ yehˇ deuˬ laˇ baˇ-iˇ-euˬ meh.

³³ Gʼawˬ myahˇ maˬ gʼeh-ehˇ muiˇ-eu deuˬ aˬ yawꞈ maꞈ-ahˇ coeˇ tsehˆ-awˇ, cehˇ nawˬ-eu loꞈ-ehˇ nawˬ pahˬ nehˬ tehꞈ-a lehˇ, Iˇsaˬleˬlaˆ-euˬ Miˬyehˇ pyeuꞈ-eu ngaˇ Baoˬ huiˬ-eu Sahˬpaˬ Miˬyehˇ ehˇ-eu ma.”

³⁴ Baˬbuˇloˬ sahˬ paˬ Yeˬluˇsaˬlehˬ meuˬ-ahˇ coeˇ tsehˆ-awˇ dzaˬ-euˬ meh. Ciˬ cuˇ shehˆ ngehꞈ-eu loꞈ-ehˇ, meuˬ kʼoeˇ-ahˇ aˬ yawꞈ shehˆ ngehꞈ-awˇ, aˇ lawˇ myoꞈ-eu loꞈ-ehˇ myoꞈ ahˇ-euˬ meh. Aˬ yawꞈ kʼaˇ geuꞈ mawꞈ-eu jeˬ yuˇ geuꞈ-awˇ, maˬ geuꞈ mawꞈ-eu deuˬ byaˆ dzeh yaꞈ-euˬ meh.

³⁵ Nga maꞈ-ahˇ yaw doeˇ jahˇ taˬ-euˬ iˬ baˇ, Baˬbuˇloˬ kʼoeˇ taˆ keuˆ le luꞈ-uˇ” lehˇ, Ziˇoˬ tsawˇ haˬ deuˬ ehˇ luꞈ-uˇ. “Nga maꞈ-ahˇ shaˬ zahˬ laˆ naꞈ-euˬ iˬ baˇ, Baˬbuˇloˬ kʼoeˇ taˆ keuˆ le luꞈ-uˇ” lehˇ, Yeˬluˇsaˬlehˬ tsawˇ haˬ deuˬ ehˇ luꞈ-uˇ.

Iˇsaˬleˬlaˆ-ahˇ Sahˬpaˬ Miˬyehˇ caw ba tehꞈ-a

³⁶ Kʼoeˇ miˇ neh, Yeˬluˇsaˬlehˬ meuˬ-ahˇ jawˇ-eu tsawˇ haˬ deuˬ-ahˇ Sahˬpaˬ Miˬyehˇ heu loꞈ-ehˇ ehˇ-eu meh. “Naw maꞈ gʼaˇ duˬ ngaˇ shaˇ noeˬ-awˇ, naw maꞈ-ahˇ jahˇ nehˬ-euˬ aˇ poeˬ, naw maꞈ-ahˇ muiˇ-eu deuˬ paˇ bi daˬ poˆ ma. Baˬbuˇloˬ lawˇ baˬ tahˬ mehˇ deuˬ bi tsiˇ leˇ jiˇ-awˇ, lawˇ baˬ bi gui-iˇ ma.

³⁷ Miˇ kʼahˬ kʼoeˇ kʼahˬ-aˬ, yaw cawˆ jeˬ-euˬ duˬ gahˬ pyeuꞈ-iˇ-awˇ, bawˇ tsahˬ jeˬ zaˬ deuˬ-euˬ jawˇ duˬ pyeuꞈ-iˇ tehꞈ-a. Kʼoeˇ-aˬ, guˆ laˇ paˬ-ehˇ gʼeh-eu jawˇ duˬ pyeuꞈ-iˇ-awˇ, tsawˇ haˬ tiˬ gʼaˬ-iˬ maˬ jawˇ-eu uˬ taꞈ, kʼaˇ le mawˇ-euˬ tsawˇ haˬ deuˬ tsawˬ guˆ dui dui iˇ tehꞈ-a.

³⁸ Baˬbuˇloˬ tsawˇ haˬ dawˬ tawˆ luꞈ aˇ laˬ jaˬ shiˇ loꞈ-ehˇ joeˬ-awˇ, aˇ laˬ jaˬ shiˇ zaˬ loꞈ-ehˇ lmˬ-eu meh.

³⁹ Aˬ yawꞈ maꞈ aˇ dzehˬ-ehˇ smˇ ta loˇ. Aˬ yawꞈ maꞈ gʼaˇ duˬ ngaˇ dzaˬ byawˇ shaˇ dahˇ nehˬ-awˇ, bi dzaˬ bi dawˇ yehꞈ-awˇ laˬ kʼaˬ bi cehˇ ma. Aˬ yawꞈ maꞈ yuꞈ kʼaˆ-awˇ, tiˬ jawˇ-iˬ maˬ paˇ noeˬ laˇ-aˇ.

⁴⁰ Yawˇ, ciꞈ myehꞈ hawˇ-eu yawˇ zaˬ deuˬ loꞈ-ehˇ bi sehꞈ-eu gʼaˇ duˬ, aˬ yawꞈ maꞈ-ahˇ ngaˇ tsahˇ doˆ leꞈ ma lehˇ, Sahˬpaˬ Miˬyehˇ pyeuꞈ-eu ngaˇ ehˇ-eu ma.”

Baˬbuˇloˬ meuˬ cawˆ-iˇ-eu

⁴¹ Baˬbuˇloˬ meuˬ gaˇ kawˆ Sahˬpaˬ Miˬyehˇ heu loꞈ-ehˇ ehˇ-eu meh. “Miˇ kʼahˬ dawˬ tawˆ luꞈ maˬ ja ceuˬ jiˇ coeˇ-eu Baˬbuˇloˬ meuˬ aˬ cawˬ neh bi deuˆ gʼaˬ-euˬ meh. Miˇ kʼahˬ tsawˇ jeuˬ deuˬ aˇ naˆ ni tsawˬ guˆ-iˇ paˬ-ehˇ gʼeh-eu meuˬ tiˬ meuˬ nga.

⁴² Iˬ ma laˆ shaˆ iˇ cuꞈ Baˬbuˇloˬ meuˬ-ahˇ yoeˇ daˆ leꞈ-awˇ, iˇ luˆ dzeh pymˬ-euˬ meh.

⁴³ Meuˬ deuˬ guˆ dui dui laˇ paˬ-ehˇ pyeuꞈ-iˇ-awˇ, tsawˇ haˬ tiˬ gʼaˬ-iˬ maˬ jawˇ-eu uˬ taꞈ, maˬ iˇ maˬ laˇ tsehˆ-eu iˇ cuꞈ maˬ jaˆ-eu kʼaˇ shuiꞈ deh yaˇ loꞈ-ehˇ pyeuꞈ-iˇ taˬ-euˬ meh.

⁴⁴ Baˬbuˇloˬ miˇ kʼahˬ-euˬ Beˇleˇ miˬ yehˇ-ahˇ ngaˇ kʼehˬ nehˬ-awˇ, aˬ yawꞈ neh kʼoeˬ uiˬ taˬ-euˬ myawˬ gahˬ deuˬ bi smˬ-iˇ jiˇ ma. Tsawˇ jeuˬ tiˬ jeuˬ-iˬ aˬ yawꞈ-ahˇ uˬ duˬ maˬ tahˬ ni pyeuꞈ-iˇ tehꞈ-a. “Baˬbuˇloˬ meuˬ lahˇ byaˆ-iˇ-euˬ meh.

⁴⁵ Iˇsaˬleˬlaˆ tsawˇ haˬ deuˬ-oˇ, kʼoeˇ gaˇ maˬ jawˇ ni cehˆ-awˬ. Sahˬpaˬ Miˬyehˇ nui ma pehˇ-eu jeˬ-ahˇ dzeuˇ-iˇ nya ni cehˆ-awˬ.

⁴⁶ Aˬ cawˬ ja gaˇ naˇ haˬ-awˇ, guˆ-awˇ gʼaˬ taˬ baˬ. Aˬ yawꞈ kʼoꞈ yawꞈ, tiˬ kʼoꞈ tiˬ jeˬ ja byah luꞈ-eu ya gaˬ meh. Miˇ kʼahˬ cawˆ-iˇ-eu gaˇ kawˆ hawˇ-eu sahˬ paˬ tiˬ gʼaˬ tiˇ gʼaˬ guiˇ deuˆ-eu gaˇ kawˆ ya gaˬ luꞈ meh.

⁴⁷ Kʼoeˇ miˇ neh, Baˬbuˇloˬ-euˬ tahˬ pahˬ aˬ ma mawˇ kawˇ deuˬ-ahˇ ngaˇ kʼehˬ nehˬ kʼaˆ nehˬ-eu aˇ yamˬ keuˆ le luꞈ meh. Miˇ kʼahˬ kʼoeˇ kʼahˬ kʼahˬ lah ni ya shaꞈ dawˇ-iˇ-awˇ, miˇ kʼahˬ zaˬ dawˬ tawˆ luꞈ ya bi sehꞈ jiˇ tehꞈ-a.

⁴⁸ Laꞈ taˆ paw pyawˬ-ahˇ neh oe-awˇ laˆ cawˆ le-euˬ deuˬ-euˬ laꞈ-ahˇ Baˬbuˇloˬ miˇ kʼahˬ cawˆ-iˇ ngeh, mˬ hawˇ-eu miˇ kʼoeˇ taˆ kʼaˇ jawˇ kʼaˇ jaˆ-eu jeˬ dawˬ tawˆ luꞈ, laˬ kʼaˬ cehˇ-awˇ guˇ tehꞈ-a.

⁴⁹ Baˬbuˇloˬ baˬ da neh, miˇ tsaˬ doe ni jawˇ-eu tsawˇ haˬ deuˬ shiˇ-euˬ meh. Nymˬ-mˇ poˆ jawˇ-aˬ, Iˇsaˬleˬlaˆ tsawˇ haˬ deuˬ ya shiˇ myaˬ-euˬ baˬ da neh, Baˬbuˇloˬ miˇ kʼahˬ ya cawˆ-iˇ tehꞈ-a lehˇ, Sahˬpaˬ Miˬyehˇ pyeuꞈ-eu ngaˇ ehˇ-eu ma.

Baˬbuˇloˬ miˇ kʼahˬ-ahˇ jawˇ-eu Iˇsaˬleˬlaˆ tsawˇ haˬ deuˬ gʼaˇ duˬ Miˬyehˇ-euˬ dawˬ

⁵⁰ Baˬbuˇloˬ miˇ kʼahˬ laꞈ kʼoeˇ jawˇ-eu aˬ yawꞈ-euˬ tsawˇ haˬ deuˬ-ahˇ, Sahˬpaˬ Miˬyehˇ heu loꞈ-ehˇ ehˇ-eu meh. “Shiˇ-eu jeˬ-ahˇ naw maꞈ dzeuˇ-iˇ-euˬ meh. Maˬ nyi naˬ ni nymˬ-mˇ doˆ-iˇ-awˬ. Naw maꞈ gaˇ mahˇ kaˬ gaˇ jawˇ luꞈ kʼawꞈ, naw maꞈ-euˬ Sahˬpaˬ Miˬyehˇ pyeuꞈ-eu ngaˬ-ahˇ noeˬ mawˇ-awˇ, Yeˬluˇsaˬlehˬ meuˬ-ahˇ taˬ ngehˇ,

⁵¹ ‘Nga maꞈ daˬ ga-awˇ shaꞈ dawˇ dui dui nya. Uˬ duˬ tahˬ nymˇ nymˇ ma laꞈ kʼoeˇ jaˆ-eu muiˬ-eu shawˇ-eu jawˇ duˬ-ahˇ aˬ cawˬ tsawˇ jeuˬ uˇ laˇ-euˬ miˇ neh, tiˬ pawꞈ-iˬ gaˇ dahˇ maˬ paˇ tsoeˬ miˇ-a’ lehˇ naw maꞈ ehˇ luꞈ meh.

⁵² Kʼoeˇ miˇ neh, Baˬbuˇloˬ tahˬ pahˬ aˬ ma mawˇ kawˇ deuˬ-ahˇ ngaˇ kʼehˬ nehˬ kʼaˆ nehˬ-eu aˇ yamˬ paˇ keuˆ laˇ-awˇ, bi deuˆ tahˬ-euˬ tsawˇ haˬ deuˬ miˇ kʼahˬ kʼoeˇ kʼahˬ doe ni mahˇ luꞈ gaˇ ya gaˬ tehꞈ-a lehˇ ngaˇ ehˇ-eu ma.

⁵³ Baˬbuˇloˬ meuˬ mˬ-ahˇ keuˆ ni daˆ keuˆ leˇ nya-awˇ, ziꞈ dui dui-eu taˆ tsoˆ leˇ nya kʼawꞈ, tsawˇ haˬ pyehˬ gʼeh-awˇ bi laˆ cawˆ ma lehˇ, Sahˬpaˬ Miˬyehˇ pyeuꞈ-eu ngaˇ ehˇ-eu ma.”

Baˬbuˇloˬ meuˬ-ahˇ laꞈ lahˬ ka nehˬ-eu

⁵⁴ Sahˬpaˬ Miˬyehˇ heu loꞈ-ehˇ ehˇ-eu meh. “Baˬbuˇloˬ meuˬ ngoeˇ gaˇ naˇ haˬ sheˇ. Miˇ kʼahˬ cawˆ-iˇ-euˬ baˬ da neh, tsawˇ ngoeˇ ngoeˇ luꞈ gaˇ naˇ haˬ sheˇ.

⁵⁵ Baˬbuˇloˬ meuˬ ngaˇ laˆ cawˆ-awˇ, ciˬ cuˇ ni bi pyeuꞈ-iˇ-eu gʼeh-eu ma. Guiˇ maꞈ deuˬ iˇ kʼawˇ loꞈ-ehˇ oe keuˆ-awˇ, guiˇ deuˆ-eu lawꞈ gʼa luꞈ-eu meh.

⁵⁶ Baˬbuˇloˬ meuˬ aˬ yawꞈ maꞈ laˆ cawˆ le-euˬ meh. Baˬbuˇloˬ yehˇ bi nyehꞈ jiˇ-awˇ, aˬ yawꞈ maꞈ-euˬ kaˆ kʼehꞈ-iˇ jiˇ-euˬ meh. Ngaˇ-aˬ yaw haiˬ jeˬ-ahˇ kʼehˬ-eu Miˬyehˇ pyeuꞈ-awˇ, Baˬbuˇloˬ meuˬ-ahˇ geuˇ-eu loꞈ-ehˇ kʼehˬ nehˬ ma.

⁵⁷ Aˬ yawꞈ maꞈ-euˬ sahˬ paˬ sahˬ ma hawˇ-eu, zaˬ siˬ tsawˇ gahˇ byah loꞈ-eu deuˬ, aˬ yuiꞈ aˬ tsu hawˇ-eu yehˇ deuˬ, jiˇ baˬ dawˇ yehꞈ ni ngaˇ jahˇ ma. Aˬ yawꞈ maꞈ yuꞈ kʼaˆ-awˇ maˬ paˇ noeˬ laˇ meh lehˇ, dzoeˬ dzaˬ sahˬ paˬ pyeuꞈ-eu ngaˇ ehˇ-eu ma. Ngaˇ-aˬ, Baoˬ huiˬ-eu Sahˬpaˬ Miˬyehˇ ma.

⁵⁸ Baoˬ huiˬ-eu Baˬbuˇloˬ meuˬ lahˇ, miˇ tsa ga byaˆ le tehꞈ-a. Goˇ dui dui-eu meuˬ lahˇ laˇ gʼoˆ deuˬ kʼawꞈ, miˬ dzaˬ puiˆ dzeh tehꞈ-a. Miˇ tsaˬ tsawˇ jeuˬ mˇ-euˬ gaˇ deuˬ, tiˬ jeˬ-iˬ gaˇ dahˇ maˬ tsoeˬ-a. Aˬ yawꞈ maꞈ neh yuˇ doˆ-euˬ gʼaˬ, miˬ lmˇ laꞈ kʼoeˇ byoˆ jiˇ meh lehˇ, Baoˬ huiˬ-eu Sahˬpaˬ Miˬyehˇ pyeuꞈ-eu ngaˇ ehˇ ma.”

Yeˬlaˬmiˇ-euˬ dawˬ Baˬbuˇloˬ miˇ kʼahˬ-ahˇ gaˬ keuˆ leˇ-euˬ

⁵⁹ Sahˬ paˬ Zeˬdaˬkiˇ-euˬ dawˬ peh jawˇ-awˇ, aˬ yawꞈ-ahˇ caw ba nehˬ luꞈ-eu gʼaˬ-aˬ, Seˬlehˇyaˬ meh. Seˬlehˇyaˬ-euˬ aˬ da-aˬ, Neˬliˇyaˆ pyeuꞈ-awˇ, aˬ bawˇ-aˬ, Maˬseˬyaˇ meh. Zeˬdaˬkiˇ Yuˇdaˆ sahˬ paˬ geuꞈ-euˬ oeˬ kʼoꞈ tiˬ kʼoꞈ-ahˇ, Seˬlehˇyaˬ gʼaˬ aˬ yawꞈ nehˬ-ehˇ Baˬbuˇloˬ miˇ kʼahˬ-ahˇ iˇ gaˇ, ngaˇ heu loꞈ-ehˇ mehˬ nehˬ-euˬ ma.

⁶⁰ Baˬbuˇloˬ miˇ kʼahˬ kʼoeˇ taˆ keuˆ le-eu lehˇ gʼeh-eu yaw cawˆ jeˬ dawˬ tawˆ luꞈ hawˇ-eu, Baˬbuˇloˬ miˇ kʼahˬ gaˇ kawˆ nui jeˬ dawˬ tawˆ luꞈ sahˬ boꞈ tiˬ dmˬ laꞈ kʼoeˇ ngaˇ boꞈ-euˬ ma.

⁶¹ Seˬlehˇyaˬ-ahˇ ngaˇ heu loꞈ-ehˇ ehˇ nehˬ-euˬ ma. “Nawˇ Baˬbuˇloˬ miˇ kʼahˬ-ahˇ iˇ keuˆ ngeh, heu gaˇ kʼaˇ boꞈ taˬ-euˬ jeˬ tsawˇ haˬ kʼoeˇ deuˬ-ahˇ maˬ gui mehˬ-ehˇ taˬ byehˇ.

⁶² Kʼoeˇ naˇ, heu loꞈ-ehˇ guiˬ lahˬ shaˇ-awˬ. ‘Sahˬpaˬ Miˬyehˇ-oˇ, jawˇ duˬ heu tsahˇ-ahˇ nawˇ laˆ cawˆ-awˇ, tsawˇ haˬ zaˬ hawˇ-eu jeˬ zaˬ maˬ jawˇ-eu uˬ taꞈ, yaw dehꞈ kʼaˇ dehꞈ-eu tiˬ jeˬ-iˬ maˬ jawˇ-ehˇ, mˬ maˬ maˬ byaˆ zaˇ ziˇ kʼaˇ shuiꞈ deh ga bi pyeuꞈ-iˇ ma lehˇ, nawˬ neh ehˇ taˬ-euˬ meh’ lehˇ shaˇ-awˬ.

⁶³ Seˬlehˇyaˬ-oˇ, tsawˇ haˬ kʼoeˇ deuˬ-ahˇ sahˬ boꞈ heu nawˇ gui nehˬ gʼaˬ ngeh, kʼaˬ lo-ahˇ paꞈ tawꞈ-awˇ, Uˇpaˬlaˇ lawˇ baˬ-ahˇ biˬ puꞈ-awˬ.

⁶⁴ Kʼoeˇ naˇ, heu loꞈ-ehˇ ehˇ-awˬ. ‘Baˬbuˇloˬ miˇ kʼahˬ-ahˇ heu loꞈ-ehˇ gʼeh-eu jeˬ keuˆ le tehꞈ-a. Baˬbuˇloˬ miˇ kʼahˬ ga nuiꞈ-awˇ maˬ paˇ doˆ laˇ nya-aˇ. Aˬ jeˬ miˇ neh ehˇ naˇ, Sahˬpaˬ Miˬyehˇ luˬ-iˇ seˇ-iˇ-eu jeˬ bi keuˆ le-eu’ lehˇ lehˬ hmˬ luꞈ meh lehˇ ehˇ-awˬ.” Yeˬlaˬmiˇ-euˬ dawˬ heu gaˇ jiˇ-euˬ meh.