Yeˬlaˬmiˇ 50 - Akha

Baˬbuˇloˬ meuˬ aˬ cawˬ neh bi deuˆ gʼaˬ-eu

¹ Baˬbuˇloˬ meuˬ hawˇ-eu kʼoeˇ gaˇ jawˇ-eu tsawˇ haˬ deuˬ-ahˇ taꞈ leˇ-awˇ, Sahˬpaˬ Miˬyehˇ neh ngaˬ-ahˇ biꞈ laꞈ-euˬ dawˬ heu loꞈ-ehˇ meh.

² “Miˇ kʼahˬ tsawˇ jeuˬ dawˬ tawˆ luꞈ-ahˇ, gaˇ kawˆ heu dzawˇ gaˬ-awˇ. Gaˇ kawˆ tiˬ jeˬ-iˬ maˬ zaꞈ ni, paˇ loˬ paˇ lehˇ baꞈ tuˇ-awˇ guˇ gaˬ-awˬ. Baˬbuˇloˬ meuˬ bi deuˆ gʼaˬ-awˇ, Maˬduˆ miˬ yehˇ nui ma cawˆ luꞈ-eu meh. Baˬbuˇloˬ tahˬ pahˬ aˬ ma deuˬ daˬ ga daˬ nyoeˇ kuˇ ni, kʼehꞈ jiˇ kʼoeˆ jiˇ-euˬ meh.

³ “Laꞈ taˆ paw pyawˬ-ahˇ jawˇ-eu tsawˇ jeuˬ tiˬ jeuˬ Baˬbuˇloˬ miˇ kʼahˬ-ahˇ guiˇ deuˆ le-awˇ, kʼaˇ shuiꞈ deh ga laˆ pyeuꞈ nehˬ yaꞈ tehꞈ-a. Tsawˇ haˬ hawˇ-eu jeˬ zaˬ dawˬ tawˆ luꞈ cehˆ byoˆ jiˇ-awˇ, tiˬ gʼaˬ-iˬ maˬ jawˇ ni pyeuꞈ-iˇ tehꞈ-a.”

Iˇsaˬleˬlaˆ tsawˇ jeuˬ gʼoꞈ doˆ laˇ-eu

⁴ Sahˬpaˬ Miˬyehˇ heu loꞈ-ehˇ ehˇ-eu meh. “Aˇ yamˬ kʼoeˇ yamˬ keuˆ le ngeh, Yuˇdaˆ tsawˇ haˬ hawˇ-eu Iˇsaˬleˬlaˆ tsawˇ haˬ deuˬ ngoeˇ ngoeˇ-ehˇ, aˬ yawꞈ maꞈ-euˬ Miˬyehˇ pyeuꞈ-eu ngaˬ-ahˇ poˆ laˇ tehꞈ-a.

⁵ Aˬ yawꞈ maꞈ Ziˇoˬ meuˬ-ahˇ le-eu gaˇ ma naˇ haˬ naˇ haˬ-ehˇ laˇ tehꞈ-a. Mˬ maˬ maˬ byaˆ zaˇ ziˇ ziꞈ-eu saˇ jaˇ ngaˬ nehˬ-ehˇ aˬ yawꞈ maꞈ dzaˬ-awˇ, tiˬ jawˇ-iˬ maˬ paˇ puiˬ ni dehꞈ tehꞈ-a.

⁶ “Ngaˬ-euˬ tsawˇ haˬ deuˬ-aˬ, yawˇ bo-eu deuˬ neh gawˬ jawˬ gawˬ duˇ doe ni bi byoˆ-iˇ-euˬ yawˇ deuˬ-ahˇ duˇ-eu meh. Gawˬ jawˬ tiˬ jawˬ saˇ-iˬ ti jawˬ iˇ kaˬ gʼeh-awˇ, iˇ kahˇ-ahˇ maˬ gʼoꞈ doˆ laˇ nya-a.

⁷ Kʼaˇ mawˇ le-eu deuˬ aˬ yawꞈ maꞈ-ahˇ kawꞈ sehꞈ dzaˬ-awˇ, aˬ yawꞈ maꞈ Sahˬpaˬ Miˬyehˇ-ahˇ mˇ bahˬ-euˬ miˇ neh, kʼoeˇ loꞈ-ehˇ jahˇ nehˬ-eu iˬ baˇ maˬ ahˇ-aˇ lehˇ, muiˇ-eu deuˬ ehˇ-eu meh. Aˬ yawꞈ maꞈ-euˬ aˬ poeˬ aˬ bawˇ deuˬ Sahˬpaˬ Miˬyehˇ-ahˇ saˇ jaˇ ziꞈ-euˬ loꞈ-ehˇ, aˬ yawꞈ maꞈ kʼawꞈ ziꞈ-eu tsaˬ tehꞈ-a lehˇ, muiˇ-eu deuˬ ehˇ-eu meh.

⁸ “Iˇsaˬleˬlaˆ tsawˇ haˬ deuˬ-oˇ, Baˬbuˇloˬ miˇ kʼahˬ-ahˇ neh cehˆ dzeuˇ-awˬ. Miˇ kʼahˬ kʼoeˇ kʼahˬ-ahˇ neh aˬ cawˬ mehˬ hu cehˆ doˆ-awˬ.

⁹ Laꞈ taˆ paw pyawˬ-ahˇ jawˇ-eu gʼaˬ kʼaˆ-eu tsawˇ jeuˬ deuˬ-ahˇ ngaˇ laˆ luˆ-awˇ, Baˬbuˇloˬ miˇ kʼahˬ-ahˇ guiˇ bi deuˆ le ma. Baˬbuˇloˬ miˇ kʼahˬ mehˬ shi aˬ yawꞈ maꞈ guiˇ daˬ daˬ cehˆ gʼeh-awˇ, deuˆ gʼaˬ tehꞈ-a. Aꞈ yawꞈ maꞈ guiˇ deuˆ-eu nya dui dui-awˇ, kaˆ beuˆ-eu tiˬ laꞈ-iˬ maˬ lehˬ-iˇ-a.

¹⁰ Baˬbuˇloˬ miˇ kʼahˬ myawˬ gahˬ bi ya jiˇ-awˇ, kʼaˇ geuꞈ mawꞈ-eu jeˬ bi yuˇ geuꞈ jiˇ tehꞈ-a lehˇ, Sahˬpaˬ Miˬyehˇ pyeuꞈ-eu ngaˇ ehˇ-eu ma.”

Baˬbuˇloˬ meuˬ cawˆ-iˇ-eu

¹¹ Sahˬpaˬ Miˬyehˇ heu loꞈ-ehˇ ehˇ-eu meh. “Baˬbuˇloˬ tsawˇ haˬ deuˬ-oˇ, ngaˬ-euˬ tsawˇ jeuˬ-euˬ myawˬ gahˬ naw maꞈ ceh geuꞈ-euˬ meh. Cehˇ nawˬ-eu mawˇ neˇ mawˇ ma hawˇ-eu, hiˇ hiˇ-ehˇ cah-eu mahˬ mahˬ paˬ-ahˇ nawˇ duˇ-eu meh.

¹² Ehˇ kʼawꞈ, huiˬ dui dui-eu nawˬ-euˬ meuˬ ya shaꞈ dawˇ tehꞈ-a. Baˬbuˇloˬ miˇ kʼahˬ-aˬ, aˬ cawˬ taꞈ-ehˇ nyiˇ teˬ-eu meuˬ pyeuꞈ-iˇ tehꞈ-a. Iˇ cuꞈ maˬ jaˆ-eu gui coˇ ni gʼeh-eu kʼaˇ shuiꞈ deh yaˇ pyeuꞈ-iˇ tehꞈ-a.

¹³ Ngaˇ nui ma pehˇ-eu jeˬ baˬ da neh, Baˬbuˇloˬ miˇ kʼahˬ tsawˇ haˬ tiˬ gʼaˬ-iˬ maˬ jawˇ gaˇ keuˆ ni cawˆ-iˇ-awˇ, kʼaˇ iˇ kʼaˇ laˇ tsehˆ-eu tsawˇ haˬ deuˬ zahˬ leˇ-awˇ tsawˬ guˆ-iˇ tehꞈ-a.

¹⁴ “Kaˆ baꞈ-awˇ guiˇ deuˆ-eu deuˬ-oˇ, Baˬbuˇloˬ meuˬ-ahˇ deuˆ-eu gʼaˇ duˬ guiˇ daˬ daˬ-awˇ loꞈ jawˬ-awˬ. Naw maꞈ-euˬ kaˆ myaˬ dawˬ tawˆ luꞈ, Baˬbuˇloˬ meuˬ-ahˇ beuˆ-awˬ. Aˬ jeˬ miˇ neh ehˇ naˇ, Sahˬpaˬ Miˬyehˇ pyeuꞈ-eu ngaˬ-ahˇ aˬ yawꞈ maꞈ mˇ lehˬ-euˬ meh.

¹⁵ Meuˬ-euˬ tiˬ jawˬ guˇ guˇ-ehˇ guiˇ deuˆ-awˬ. Nymˬ-mˇ poˆ jawˇ Baˬbuˇloˬ meuˬ guiˇ deuˆ sm-awˇ aˬ cawˬ laꞈ oꞈ awꞈ-euˬ meh. Meuˬ lahˇ bi deuˆ pehꞈ-awˇ byaˆ-iˇ-euˬ meh. Baˬbuˇloˬ tsawˇ haˬ deuˬ-ahˇ ngaˇ laꞈ poˆ poˆ nehˬ luꞈ-eu ma. Kʼoeˇ miˇ neh, naw maꞈ Baˬbuˇloˬ tsawˇ haˬ deuˬ-ahˇ laꞈ poˆ poˆ kʼoꞈ nehˬ-awˇ, aˬ yawꞈ maꞈ aˬ cawˬ-ahˇ jahˇ nehˬ taˬ-euˬ loꞈ-ehˇ, aˬ yawꞈ maꞈ-ahˇ paˇ jahˇ kʼoꞈ nehˬ-awˬ.

¹⁶ Miˇ kʼahˬ kʼoeˇ kʼahˬ laꞈ kʼoeˇ siˬ yoeˬ sehˬ-awˇ cehˇ yehˬ dzaˬ-eu jeˬ bi byoˆ tsehˆ-awˬ. Kʼoeˇ gaˇ kʼaˇ jawˇ-eu aˬ cawˬ tsawˇ jeuˬ dawˬ tawˆ luꞈ, guiˇ deuˆ le-euˬ guiˇ maꞈ kʼoeˇ deuˬ-ahˇ guˆ-iˇ-awˇ, yawˬ ha-euˬ miˇ kʼahˬ-ahˇ gʼoꞈ-iˇ jiˇ tehꞈ-a.”

Iˇsaˬleˬlaˆ tsawˇ jeuˬ gʼoꞈ doˆ le-eu

¹⁷ Sahˬpaˬ Miˬyehˇ heu loꞈ-ehˇ ehˇ-eu meh. “Iˇsaˬleˬlaˆ tsawˇ haˬ deuˬ-aˬ, aˇ laˬ jaˬ shiˇ neh bi teh byaˆ-euˬ yawˇ deuˬ-ahˇ duˇ-eu meh. Yaw beh Aˬshuˇliˆ sahˬ paˬ neh bi kawꞈ sehꞈ dzaˬ-awˇ, kʼoeˇ naˇ, Baˬbuˇloˬ sahˬ paˬ Neˬbuˬkaˬneˬzaˬ neh shaˬ yoeˬ bi teuꞈ byoˆ jiˇ-euˬ meh.

¹⁸ Kʼoeˇ baˬ da neh, Iˇsaˬleˬlaˆ-euˬ Miˬyehˇ pyeuꞈ-eu ngaˇ Baoˬ huiˬ-eu Sahˬpaˬ Miˬyehˇ-aˬ, Aˬshuˇliˆ sahˬ paˬ-ahˇ kʼehˬ nehˬ-euˬ loꞈ-ehˇ, sahˬ paˬ Neˬbuˬkaˬneˬzaˬ hawˇ-eu aˬ yawꞈ-euˬ miˇ kʼahˬ-ahˇ kʼawꞈ kʼehˬ nehˬ ma.

¹⁹ Ehˇ kʼawꞈ, Iˇsaˬleˬlaˆ tsawˇ haˬ deuˬ-ahˇ-aˬ, aˬ yawꞈ maꞈ-euˬ miˇ kʼahˬ-ahˇ sheuˬ kʼoꞈ gʼeh nehˬ ma. Gaˬlaˬmeˬlaˇ gawˬ jawˬ hawˇ-eu Baˬshaˬ gahˬ kaˬ-ahˇ dehꞈ-eu dzaˇ deuˬ aˬ yawꞈ maꞈ dzaˬ-awˇ, Eˇpaˬleˬ miˇ kʼahˬ hawˇ-eu Giˇlaˆ miˇ kʼahˬ laꞈ kʼoeˇ dehꞈ-eu dzaˬ la gʼo cehˇ deuˬ, aˬ yawꞈ maꞈ kʼaˇ dzaˬ mawꞈ-eu dzaˬ tehꞈ-a.

²⁰ Aˇ yamˬ kʼoeˇ yamˬ keuˆ laˇ ngeh, Iˇsaˬleˬlaˆ miˇ kʼahˬ laꞈ kʼoeˇ iˬ baˇ maˬ poˆ mawˇ nya ehˇ, Yuˇdaˆ miˇ kʼahˬ laꞈ kʼoeˇ yaw haiˬ jeˬ maˬ jaˆ ni pyeuꞈ-iˇ tehꞈ-a. Aˬ jeˬ miˇ neh ehˇ naˇ, ngaˬ neh bi buˬ bi law-iˇ-euˬ tsawˇ haˬ kʼoeˇ deuˬ-ahˇ ngaˇ iˬ baˇ pyehˬ nehˬ ma lehˇ, Sahˬpaˬ Miˬyehˇ pyeuꞈ-eu ngaˇ ehˇ-eu ma.”

Baˬbuˇloˬ miˇ kʼahˬ-ahˇ Sahˬpaˬ Miˬyehˇ yaˇ kʼaˬ daˇ-euˬ

²¹ Sahˬpaˬ Miˬyehˇ heu loꞈ-ehˇ ehˇ-eu meh. “Meˬlaˬdeˬ miˇ kʼahˬ hawˇ-eu Peˬkawˇ miˇ kʼahˬ-ahˇ jawˇ-eu tsawˇ haˬ deuˬ-ahˇ guiˇ deuˆ-awˇ, aˬ yawꞈ maꞈ-ahˇ sehꞈ-awˇ laˆ cawˆ nehˬ-awˬ. Ngaˬ neh dawˬ kʼaˇ biꞈ nehˬ-euˬ loꞈ-ehˇ mˇ-awˬ lehˇ, Sahˬpaˬ Miˬyehˇ pyeuꞈ-eu ngaˇ ehˇ taˬ-euˬ ma.

²² Miˇ kʼahˬ kʼoeˇ kʼahˬ laꞈ kʼoeˇ guiˇ deuˆ luꞈ-eu teˇ saˇ gaˬ laˇ-awˇ, guˆ dui dui laˇ paˬ-ehˇ gʼeh-eu yaw cawˆ jeˬ keuˆ le-euˬ meh.

²³ Baˬbuˇloˬ miˇ kʼahˬ-aˬ, miˇ tsaˬ dawˬ tawˆ luꞈ-ahˇ diˬ puˬ neh kʼoˆ meuˇ jiˇ-euˬ meh. Nymˬ-mˇ poˆ jawˇ diˬ puˬ kʼoeˇ kʼehꞈ-iˇ kʼoeˆ-iˇ-awˇ, miˇ kʼahˬ kʼoeˇ kʼahˬ kʼoeˇ taˆ kʼoeˇ loꞈ-ehˇ keuˆ le-euˬ gaˇ, tsawˇ jeuˬ dawˬ tawˆ luꞈ tsawˬ guˆ-iˇ-eu meh.

²⁴ Baˬbuˇloˬ-oˇ, nawˇ ngaˬ-ahˇ guiˇ deuˆ-awˇ, ngaˬ neh kʼmˇ taˬ-euˬ lahˇ ju-ahˇ nawˇ coeˬ paꞈ-euˬ nya lehˇ, nawˇ maˬ siˬ nya-a.

²⁵ Ngaˬ-euˬ guiˇ deuˆ-eu keu ka deuˬ jeˬ hmˬ taˬ-euˬ ngaˇ pah dzeh-awˇ, nui ma pehˇ-eu laꞈ kʼoeˇ keu ka kʼoeˇ deuˬ yuˇ doˆ-euˬ ma. Aˬ jeˬ miˇ neh ehˇ naˇ, Dawˬ tawˆ kʼoeˇ taˆ uˆ lahˇ-eu Baoˬ huiˬ-eu Sahˬpaˬ Miˬyehˇ pyeuꞈ-eu ngaˇ, Baˬbuˇloˬ miˇ kʼahˬ laꞈ kʼoeˇ mˇ paˬ-ehˇ gʼeh-eu jeˬ jaˆ-eu ma.

²⁶ Yawˬ paw yawˬ coeˇ na luꞈ lehˬ hmˬ-awˇ, guiˇ deuˆ uˇ gʼeh-awˇ, cehˇ jeˬ hmˬ taˬ-euˬ jawˇ duˬ deuˬ ngawˬ pah dzeh jiˇ-awˇ, cehˇ pi cu taˬ-euˬ loꞈ-ehˇ, pyuˇ shuiˇ myawˬ gahˬ deuˬ yuˇ uiˬ geuꞈ-awˬ. Miˇ kʼahˬ kʼahˬ lah-ehˇ tiˬ jeˬ-iˬ maˬ bi jaˆ yaꞈ ni laˆ cawˆ nehˬ-awˬ.

²⁷ Aˬ yawꞈ maꞈ-euˬ yehˇ deuˬ-ahˇ jeˬ zaˬ sehꞈ-eu loꞈ-ehˇ sehꞈ gahˬ gʼeh-awˬ. Baˬbuˇloˬ tsawˇ haˬ kʼoeˇ taˆ yaw cawˆ jeˬ keuˆ le-euˬ meh. Aˬ yawꞈ maꞈ-ahˇ yaw kʼaˆ-ehˇ kʼehˬ nehˬ-eu aˇ yamˬ tsaˬ laˇ taˬ-euˬ meh.”

²⁸ Baˬbuˇloˬ miˇ kʼahˬ-ahˇ neh cehˆ doˆ laˇ-euˬ tsawˇ haˬ deuˬ Yeˬluˇsaˬlehˬ meuˬ-ahˇ cehˆ laˇ-awˇ, aˬ yawꞈ-euˬ Uˬ duˬ tahˬ nymˇ nymˇ ma-ahˇ Baˬbuˇloˬ tsawˇ haˬ deuˬ yehˬ bawˬ sehˇ lu-ehˇ jahˇ yaꞈ-euˬ baˬ da neh, aˬ dui-euˬ Miˬyehˇ pyeuꞈ-eu Sahˬpaˬ Miˬyehˇ aˬ yawꞈ maꞈ-ahˇ aˬ joˆ-ehˇ paˇ jahˇ poˆ nehˬ-euˬ gaˇ kawˆ dzawˇ le-euˬ meh.

²⁹ “Kaˆ baꞈ-awˇ guiˇ deuˆ-eu deuˬ-ahˇ Baˬbuˇloˬ meuˬ-ahˇ deuˆ-awˬ lehˇ ehˇ nehˬ-awˬ. Kaˆ kʼaˇ beuˆ nya-eu deuˬ bi iˇ-awˬ. Tiˬ gʼaˬ-iˬ maˬ bi dzeuˇ-iˇ ni meuˬ-ahˇ loꞈ jawˬ-awˬ. Aˬ yawꞈ neh aˬ cawˬ-ahˇ kʼaˇ jahˇ nehˬ-euˬ jeˬ, aˬ yawꞈ-ahˇ paˇ jahˇ kʼoꞈ nehˬ-awˬ. Aˬ jeˬ miˇ neh ehˇ naˇ, aˬ yawꞈ nui ma huiˬ-eu laꞈ kʼoeˇ, Iˇsaˬleˬlaˆ-euˬ Muiˬ dui shawˇ dui dui-eu Gʼaˬ pyeuꞈ-eu ngaˬ-ahˇ jahˇ gʼeh haw-euˬ meh.

³⁰ Kʼoeˇ miˇ neh, aˬ yawꞈ-euˬ aˬ li deuˬ meuˬ-euˬ gaˇ ma doe ni bi sehꞈ dzeh-awˇ, aˬ yawꞈ-euˬ yehˇ dawˬ tawˆ luꞈ kʼoeˇ ngeh nah bi sehꞈ jiˇ tehꞈ-a lehˇ, Sahˬpaˬ Miˬyehˇ pyeuꞈ-eu ngaˇ ehˇ-eu ma.

³¹ “Baˬbuˇloˬ miˇ kʼahˬ-oˇ, nawˇ-aˬ, nui ma huiˬ dui mahˇ dui dui-eu meh. Kʼoeˇ miˇ neh, Dawˬ tawˆ kʼoeˇ taˆ uˆ lahˇ-eu ngaˇ, Baoˬ huiˬ-eu Sahˬpaˬ Miˬyehˇ-aˬ, nawˬ-ahˇ muiˇ-eu ma. Ngaˇ nawˬ-ahˇ kʼehˬ nehˬ kʼaˆ nehˬ-eu aˇ nah keuˆ le-euˬ meh.

³² Nui ma huiˬ-eu mahˇ-eu naw maꞈ tsawˇ jeuˬ coˬ-iˇ-awˇ, tsahˇ tuˇ nehˬ-eu gʼaˬ maˬ jawˇ-ehˇ pyeuꞈ-iˇ tehꞈ-a. Nawˬ-euˬ meuˬ deuˬ-ahˇ ngaˇ miˬ dzaˬ keuˬ dzeh-awˇ, tahˬ gʼoꞈ tahˬ jawˇ kʼaˇ jaˆ-eu jeˬ dawˬ tawˆ luꞈ cawˆ-iˇ jiˇ tehꞈ-a.”

³³ Baoˬ huiˬ-eu Sahˬpaˬ Miˬyehˇ heu loꞈ-ehˇ ehˇ-eu meh. “Iˇsaˬleˬlaˆ tsawˇ haˬ hawˇ-eu Yuˇdaˆ tsawˇ haˬ-ahˇ aˬ cawˬ kʼehˬ nehˬ kʼaˆ nehˬ-euˬ meh. Aˬ yawꞈ maꞈ-ahˇ kʼaˇ nyehꞈ mi ngeh, maˬ bi cehˆ dzeuˇ ni yaw muiˬ paˬ-ehˇ loꞈ jawˬ taˬ-euˬ meh.

³⁴ Ehˇ kʼawꞈ, aˬ yawꞈ maꞈ-ahˇ ka kʼoꞈ nehˬ le-eu lehˇ gʼeh-eu gʼaˬ, gʼaˬ kʼaˆ dui dui-eu meh. Aˬ yawꞈ-euˬ tsawˇ myahˇ-aˬ, Baoˬ huiˬ-eu Sahˬpaˬ Miˬyehˇ meh. Aˬ yawꞈ maꞈ dehꞈ doˆ laˇ nya ni aˬ yawꞈ yaw muiˬ paˬ-ehˇ ngehˬ gʼeh nehˬ-awˇ, miˇ tsaˬ kʼoeˇ taˆ nui saˇ oꞈ-eu jeˬ bi keuˆ le tehꞈ-a. Ehˇ kʼawꞈ, Baˬbuˇloˬ miˇ kʼahˬ kʼoeˇ taˆ shaˬ zahˬ bi keuˆ le tehꞈ-a.”

³⁵ Sahˬpaˬ Miˬyehˇ ehˇ-eu, “Baˬbuˇloˬ-ahˇ mi cehˇ keuˆ le luꞈ-uˇ. Aˬ yawꞈ-euˬ tsawˇ haˬ deuˬ hawˇ-eu, sahˬ paˬ sahˬ ma, zaˬ siˬ tsawˇ siˬ dawˬ tawˆ kʼoeˇ taˆ, mi cehˇ keuˆ le luꞈ-uˇ.

³⁶ Nyiˇ paˬ shaˆ ma yaw uˬ kʼoeˇ deuˬ kʼoeˇ taˆ, mi cehˇ keuˆ le luꞈ-uˇ. Yehˇ deuˬ kʼoeˇ taˆ mi cehˇ oe-awˇ, laˇ bi baˇ-iˇ luꞈ-uˇ.

³⁷ Mahˬ deuˬ hawˇ-eu mahˬ laˆ lawˬ deuˬ kʼoeˇ taˆ maˬ ehˇ, aˬ yawꞈ neh kuˇ taˬ-euˬ aˬ cawˬ-euˬ yehˇ deuˬ-ahˇ maˬ ehˇ, mi cehˇ bi keuˆ le-awˇ, zaˬ miˬ zaˬ bi pyeuꞈ jiˇ luꞈ-uˇ. Pyuˇ shuiˇ myawˬ gahˬ kʼoeˇ taˆ mi cehˇ bi keuˆ le-awˇ, bi yuˇ geuꞈ jiˇ luꞈ-uˇ.

³⁸ Aˬ yawꞈ miˇ kʼahˬ mˬ gʼmˇ gʼmˇ-awˇ, lawˇ baˬ gui jiˇ luꞈ-uˇ. Miˇ kʼahˬ kʼoeˇ kʼahˬ tahˬ pahˬ aˬ ma mawˇ kawˇ byah -awˇ, miˇ kʼahˬ zaˬ deuˬ bi laˆ uˬ jiˇ tehꞈ-a.

³⁹ “Kʼoeˇ naˇ, Baˬbuˇloˬ miˇ kʼahˬ-aˬ, nehꞈ hawˇ-eu haiˬ-eu yaw sahˇ deuˬ jawˇ-awˇ, jawꞈ dui dui-eu aˇ jiˇ deuˬ jawˇ tehꞈ-a. Miˇ tsaˬ li-iˇ ngeh keuˆ ni, kʼoeˇ gaˇ tsawˇ haˬ maˬ jawˇ ni pyeuꞈ-iˇ tehꞈ-a.

⁴⁰ Sawˇdoˬ hawˇ-eu Gawˇmawˇlaˆ meuˬ-ahˇ, dawˬ peh jaˆ-eu meuˬ deuˬ nehˬ-ehˇ tiˬ kawˆ loꞈ-ehˇ ngaˇ laˆ cawˆ nehˬ ngeh keuˆ le-euˬ jeˬ, Baˬbuˇloˬ meuˬ kʼoeˇ taˆ keuˆ le tehꞈ-a. Tsawˇ haˬ tiˬ gʼaˬ-iˬ kʼoeˇ gaˇ maˬ paˇ jawˇ-aˇ lehˇ, Sahˬpaˬ Miˬyehˇ pyeuꞈ-eu ngaˇ ehˇ-eu ma.

⁴¹ “Laꞈ taˆ pyawˬ-ahˇ jaˆ-eu miˇ kʼahˬ-ahˇ neh, tsawˇ haˬ zaˬ yoeˇ ka leꞈ tehꞈ-a. Huiˬ-eu miˇ kʼahˬ hawˇ-eu sahˬ paˬ tiˬ deuˬ, guiˇ deuˆ-eu lehˇ lehˬ hmˬ luꞈ meh.

⁴² Kaˆ hawˇ-eu mi cehˇ-ahˇ tuˆ tehˬ taˬ-awˇ, gʼawˬ shaˬ gaˬ-eu maˬ siˬ nya-a. Aˬ yawꞈ maꞈ mahˬ dziˬ-awˇ oe ngeh, laˆ shaˆ iˇ kʼawˇ mahˇ laˇ gaˇ duˇ-eu meh. Baˬbuˇloˬ miˇ kʼahˬ-ahˇ deuˆ-eu gʼaˇ duˬ, aˬ yawꞈ maꞈ lehˬ hmˬ dah-euˬ meh.

⁴³ Gaˇ kawˆ kʼoeˇ Baˬbuˇloˬ sahˬ paˬ-ahˇ gaˬ leˇ ngeh, aˬ yawꞈ aˬ laꞈ laꞈ shiˇ shiˇ shaw-euˬ meh. Aˬ yawꞈ nui noeˬ shaˬ-eu kʼoeˇ-aˬ, zaˬ baw luꞈ-eu aˬ ma naˆ maˬ tseˇ meh.

⁴⁴ “Yawˇdaˬ lawˇ baˬ gawˆ taw sahˬ kʼaˆ uˬ moˆ jawˇ-eu aˇ laˬ jaˬ shiˇ, jeˬ zaˬ gaˆ kʼahˬ-ahˇ tsawˬ doˆ laꞈ-eu loꞈ-ehˇ ngaˇ oe-awˇ, Baˬbuˇloˬ tsawˇ haˬ deuˬ tehˬ law tsaˇ law-ehˇ bi cehˆ byaˆ ma. Kʼoeˇ naˇ, ngaˬ neh tseˇ doˆ-euˬ tsawˇ haˬ, miˇ kʼahˬ kʼoeˇ kʼahˬ-ahˇ paˇ bi uˆ lahˇ ma. Ngaˬ-ahˇ yawꞈ cehˆ haw laˇ peuˬ-eu aˬ suˇ gʼaˬ jawˇ ta. Ngaˬ-ahˇ ciˬ daˬ laˇ peuˬ-eu aˬ suˇ gʼaˬ jawˇ ta. Ngaˬ-ahˇ jahˇ gʼeh haw peuˬ-eu sahˬ paˬ sahˬ ma aˬ gaˇ jawˇ ta.

⁴⁵ Kʼoeˇ miˇ neh, Baˬbuˇloˬ meuˬ hawˇ-eu aˬ yawꞈ-euˬ tsawˇ haˬ deuˬ-ahˇ ngaˇ jahˇ nehˬ mawꞈ-eu gaˇ kawˆ-ahˇ naˇ haˬ-awˬ. Aˬ yawꞈ maꞈ-euˬ zaˬ deuˬ-ahˇ keuˆ ni bi tsahˇ byoˆ gʼeh gaˇ keuˆ-awˇ, tsawˇ haˬ yawˬ gʼaˬ na luꞈ guˆ dui dui-iˇ tehꞈ-a.

⁴⁶ Baˬbuˇloˬ meuˬ byaˆ-iˇ ngeh, teˇ saˇ kʼaˆ dui dui-eu miˇ neh, miˇ tsaˬ tahˬ kʼawˇ nyeh laˇ-awˇ, tsawˇ haˬ zaˬ guˆ-awˇ, ngoeˇ-eu teˇ saˇ aˬ cawˬ miˇ kʼahˬ doe ni gaˬ keuˆ-iˇ tehꞈ-a.”