Yeˬlaˬmiˇ 46 - Akha

Iˇjiˇtuˆ tsawˇ haˬ deuˬ guiˇ deuˆ smˬ-euˬ

¹ Miˇ kʼahˬ tsawˇ jeuˬ deuˬ-ahˇ taꞈ leˇ-awˇ, Sahˬpaˬ Miˬyehˇ-euˬ dawˬ ngaˇ jawˇ gaˇ keuˆ le-euˬ meh.

² Yeˬhawˇyaˬkmˬ Yuˇdaˆ sahˬ paˬ geuꞈ-euˬ oeˬ kʼoꞈ tiˬ kʼoꞈ-ahˇ, Uˇpaˬlaˇ lawˇ baˬ dawˬ peh jaˆ-eu Kaˬsheˬmiˇ meuˬ-ahˇ Baˬbuˇloˬ sahˬ paˬ Neˬbuˬkaˬneˬzaˬ neh guiˇ bi deuˆ gʼaˬ-euˬ Iˇjiˇtuˆ sahˬ paˬ Neˬkawˇ-euˬ guiˇ maꞈ deuˬ-ahˇ taꞈ leˇ-awˇ, heu loꞈ-ehˇ ehˇ-eu meh.

³ “Iˇjiˇtuˆ tsawˇ haˬ yaw huiˬ yaw mahˇ deuˬ ehˇ-eu, ‘Naw maꞈ dehˬ daˬ duˬ lehˬ hmˬ-awˇ, guiˇ deuˆ duˬ-ahˇ iˇ-awˬ.

⁴ Mahˬ dziˬ gʼa laˆ dawˆ-awˇ dziˬ-awˬ. Jawˇ duˬ yuˇ-awˇ shmˇ uˬ kʼoˆ kʼoˆ taˬ-awˬ. Gahˬ siˬ taˆ-awˇ guiˇ deuˆ-eu mehˬ tsoeˬ dm taˬ-awˬ’ lehˇ ehˇ-eu meh.

⁵ Sahˬpaˬ Miˬyehˇ heu loꞈ-ehˇ ehˇ-eu, “Ehˇ kʼawꞈ, ngaˇ heu loꞈ-ehˇ ya mawˇ-euˬ ma. Aˬ yawꞈ maꞈ guˆ-awˇ cehˆ gʼoꞈ leꞈ-euˬ meh. Aˬ yawꞈ maꞈ-euˬ yehˇ deuˬ bi deuˆ gʼaˬ-awˇ, laˇ baˇ-iˇ-euˬ miˇ neh nahˇ gʼoꞈ maˬ gʼoꞈ haw ni, cehˆ coeˬ coeˬ doˇ kʼoꞈ leꞈ-eu meh.

⁶ Yaw kawˇ deuˬ maˬ cehˆ dzeuˇ nya-ehˇ, yehˇ deuˬ maˬ buˬ-iˇ-a. Kʼoeˇ taˆ paw Uˇpaˬlaˇ lawˇ baˬ lawˇ dzeˇ, sahˬ tiꞈ tiꞈ-awˇ coˬ-iˇ-eu meh.

⁷ Niˬlaˇ lawˇ baˬ loꞈ-ehˇ tuˇ laˇ luꞈ-eu aˬ suˇ gʼaˬ-a. Iˇ jeuˬ oe-eu loꞈ-ehˇ daˆ laˇ luꞈ-eu aˬ suˇ gʼaˬ-a.

⁸ Niˬlaˇ lawˇ baˬ loꞈ-ehˇ tuˇ laˇ luꞈ-eu Iˇjiˇtuˆ meh. Iˇ jeuˬ oe-eu loꞈ-ehˇ daˆ laˇ luꞈ-eu Iˇjiˇtuˆ meh. Iˇjiˇtuˆ heu loꞈ-ehˇ ehˇ meh. Ngaˇ luˆ laˇ-awˇ miˇ tsaˬ tahˬ kʼawˇ tiˬ gʼoeˬ iˇ ma. Meuˬ deuˬ hawˇ-eu meuˬ laꞈ kʼoeˇ jawˇ-eu tsawˇ haˬ deuˬ, dawˬ tawˆ luꞈ ngaˇ laˆ cawˆ jiˇ ma.

⁹ Mahˬ pyehˬ teh sehˇ gʼeh-awˇ, laˆ lawˬ teh coeˬ coeˬ-awˬ. Yehˇ deuˬ mehˬ hu paw pyehˬ gʼeh-awˬ. Suˬdaˬ yehˇ deuˬ hawˇ-eu Liˆbyaˇ yehˇ deuˬ, dehˬ daˬ duˬ baꞈ-awˇ bi iˇ-awˬ. Kaˆ beuˆ yaw dziˇ Luˇdaˆ yehˇ deuˬ, mehˬ hu paw pyehˬ gʼeh-awˬ.”

¹⁰ Aˇ nah heu Dawˬ tawˆ kʼoeˇ taˆ uˆ lahˇ-eu-aˬ, Baoˬ huiˬ-eu Sahˬpaˬ Miˬyehˇ-euˬ aˇ nah meh. Iˬ nah aˬ yawꞈ laꞈ poˆ poˆ-awˇ, muiˇ-eu deuˬ-ahˇ kʼehˬ nehˬ tehꞈ-a. Aˬ yawꞈ mi cehˇ aˬ yawꞈ maꞈ-euˬ shaˬ jiˇ tiˬ dehˆ dzaˬ-awˇ, aˬ yawꞈ maꞈ-euˬ shiˬ tiˬ dehˆ dawˇ tehꞈ-a. Iˬ nah kʼoeˇ taˆ paw Uˇpaˬlaˇ lawˇ baˬ dawˬ peh, Baoˬ huiˬ-eu gʼaˬ tsawˇ shiˇ kʼoeˇ deuˬ lawˇ tehꞈ-a.

¹¹ Iˇjiˇtuˆ tsawˇ haˬ-oˇ, Giˇlaˆ miˇ kʼahˬ-ahˇ jaˆ gʼaˬ poˆ leˇ sheˇ. Naw maꞈ-euˬ jaˆ gʼaˬ deuˬ gaˇ dahˇ maˬ paˇ tsoeˬ-ehˇ, naw maꞈ naˇ gawˇ maˬ paˇ yaˇ taˬ nya meh.

¹² Miˇ kʼahˬ tsawˇ jeuˬ mehˬ shi naw maꞈ daˬ ya ga-awˇ, naw maꞈ ngoeˇ-eu yawˬ gʼaˬ na luꞈ gaˬ jiˇ-euˬ meh. Yehˇ deuˬ tiˬ gʼaˬ tiˇ gʼaˬ coeˬ tuˆ sehꞈ-awˇ, tiˬ gm-ehˇ ya shiˇ jiˇ tehꞈ-a.

Neˬbuˬkaˬneˬzaˬ oe-euˬ

¹³ Baˬbuˇloˬ sahˬ paˬ Neˬbuˬkaˬneˬzaˬ Iˇjiˇtuˆ miˇ kʼahˬ-ahˇ guiˇ deuˆ le ngeh, Sahˬpaˬ Miˬyehˇ ngaˬ-ahˇ dawˬ ngehˬ cawˬ le-euˬ meh. Aˬ yawꞈ ehˇ-eu,

¹⁴ “Iˇjiˇtuˆ miˇ kʼahˬ-ahˇ jaˆ-eu meuˬ deuˬ pyeuꞈ-eu, Miˇgaˬdawˇlaˆ, Meˬpiˇ hawˇ-eu, Taˬpaˬneˬ laꞈ kʼoeˇ, heu loꞈ-ehˇ ehˇ gaˬ-awˬ. ‘Yawˬ haˇ yawˬ ha deuˆ piˇ nya ni lehˬ hmˬ taˬ-awˬ. Naw maꞈ guiˇ deuˆ-awˇ ya shiˇ jiˇ tehꞈ-a.

¹⁵ Naw maꞈ-euˬ baoˬ huiˬ-eu miˬ yehˇ Aˬpiˇ, aˬ jeˬ miˇ neh ya coˬ-iˇ ta. Sahˬpaˬ Miˬyehˇ neh dehˬ coˬ-euˬ maˬ ngeuˇ-a loˇ’ lehˇ guˬ-awˬ.

¹⁶ Naw maꞈ yehˇ deuˬ pehˆ toˆ-awˇ coˬ-iˇ ngeh, ‘Aˬ dui iˇ kahˇ paw yaw kawˇ-ehˇ cehˆ-awˇ, muiˇ-eu deuˬ-euˬ mi cehˇ-ahˇ cehˆ dzeuˇ kaˇ-euˇ’ lehˇ, tiˬ gʼaˬ tiˇ gʼaˬ ja cawˬ tehꞈ-a.

¹⁷ “Iˇjiˇtuˆ sahˬ paˬ-ahˇ tsawˇ myahˇ myahˇ paˇ nehˬ-awˬ. ‘Aˇ yamˬ dawˬ dzeuˇ-eu kʼahˬ sehˇ mehˬ lawꞈ’ lehˇ myahˇ nehˬ-awˬ.

¹⁸ Ngaˇ, Baoˬ huiˬ-eu Sahˬpaˬ Miˬyehˇ-aˬ, dzoeˬ dzaˬ sahˬ paˬ pyeuꞈ-awˇ, dehꞈ luꞈ-eu Miˬyehˇ ma. Gawˬ jawˬ dawˬ tawˆ kʼoeˇ taˆ Taˬbawˬ gawˬ jawˬ goˇ-eu loꞈ-ehˇ, laˆ shaˆ kʼoeˇ taˆ Kaˬlaˬmeˬlaˇ gawˬ jawˬ uˆ-eu loꞈ-ehˇ, naw maꞈ-ahˇ guiˇ deuˆ le-eu gʼaˬ, gʼaˬ kʼaˆ aˬ cawˬ taꞈ-ehˇ dzehˬ ma.

¹⁹ Iˇjiˇtuˆ tsawˇ haˬ-oˇ, bi paꞈ byoˆ gʼeh-eu gʼaˇ duˬ lehˬ hmˬ-awˬ. Meˬpiˇ meuˬ kʼaˇ shuiꞈ deh ga pyeuꞈ-iˇ-awˇ, tsawˇ haˬ maˬ jawˇ nya ni cawˆ-iˇ tehꞈ-a.

²⁰ Iˇjiˇtuˆ miˇ kʼahˬ-aˬ, muiˬ dui dui-eu mawˇ neˇ mawˇ ma-ahˇ duˇ leˇ kʼawꞈ, laꞈ taˆ paw neh oe-euˬ byaˬ neh bi dehˬ tehꞈ-a.

²¹ Aˬ yawꞈ neh aˇ poeˬ biꞈ-awˇ kuˇ-euˬ yehˇ deuˬ kʼawꞈ, mawˇ neˇ mawˇ zaˬ loˆ ni tehꞈ meh. Aˬ yawꞈ maꞈ yawꞈ daˬ-awˇ guiˇ maˬ deuˆ ni, dawˬ tawˆ luꞈ cehˆ byoˆ jiˇ tehꞈ-a. Yaw cawˆ jeˬ oꞈ-eu aˇ nah keuˆ le-awˇ, ya luˬ ya seˇ-iˇ-eu aˇ yamˬ keuˆ le-euˬ meh.

²² Muiˇ-eu deuˬ-euˬ guiˇ maꞈ oe peh luꞈ ngeh, Iˇjiˇtuˆ aˇ lawˇ loꞈ-ehˇ mahˇ-awˇ cehˆ byoˆ tehꞈ-a. Tsawˇ haˬ zaˬ aˇ bawˇ tuˇ coˬ-euˬ loꞈ-ehˇ, muiˇ-eu deuˬ deuˆ haˬ baꞈ-awˇ guiˇ deuˆ le tehꞈ-a.

²³ Sahˬ kʼaˆ kʼaˆ ma tuˆ byoˆ nehˬ-eu loꞈ-ehˇ jahˇ le tehꞈ-a. Aˬ yawꞈ maꞈ-euˬ tsawˇ haˬ-ahˇ maˬ gui jiˇ coeˇ-ehˇ, aˬ yawꞈ maꞈ-euˬ yehˇ deuˬ nyehˇ bahˇ baˬ maꞈ naˆ maˬ tseˇ myaˬ tehꞈ-a.

²⁴ Iˇjiˇtuˆ tsawˇ haˬ-aˬ, laꞈ taˆ paw-euˬ tsawˇ haˬ deuˬ neh bi deuˆ gʼaˬ-awˇ, daˬ ya ga tehꞈ-a lehˇ, Sahˬpaˬ Miˬyehˇ pyeuꞈ-eu ngaˇ ehˇ-eu ma.”

²⁵ Iˇsaˬleˬlaˆ-euˬ Miˬyehˇ pyeuꞈ-eu Baoˬ huiˬ-eu Sahˬpaˬ Miˬyehˇ heu loꞈ-ehˇ ehˇ-eu meh. “Deˬbiˇ miˬ yehˇ Aˬmo-ahˇ ngaˇ kʼehˬ-eu lehˇ gʼeh-eu ma. Iˇjiˇtuˆ sahˬ paˬ maˬ ehˇ, Iˇjiˇtuˆ miˬ yehˇ deuˬ maˬ ehˇ, Iˇjiˇtuˆ sahˬ paˬ-ahˇ gʼoe-eu miˇ kʼahˬ zaˬ deuˬ-ahˇ maˬ ehˇ, ngaˇ kʼehˬ-eu lehˇ gʼeh-eu ma.

²⁶ Aˬ yawꞈ maꞈ-ahˇ sehꞈ mawꞈ-eu Baˬbuˇloˬ sahˬ paˬ Neˬbuˬkaˬneˬzaˬ hawˇ-eu aˬ yawꞈ-euˬ guiˇ maꞈ-euˬ aˬ laꞈ laꞈ kʼoeˇ, aˬ yawꞈ maꞈ-ahˇ ngaˇ a nehˬ ma. Ehˇ kʼawꞈ, aˇ yamˬ paˇ myahˇ laˇ ngeh jawˇ, dzeuˇ laˇ ngeh loꞈ-ehˇ, Iˇjiˇtuˆ miˇ kʼahˬ laꞈ kʼoeˇ tsawˇ haˬ paˇ jawˇ laˇ tehꞈ-a lehˇ Sahˬpaˬ Miˬyehˇ pyeuꞈ-eu ngaˇ ehˇ-eu ma.”

Sahˬpaˬ Miˬyehˇ aˬ yawꞈ-euˬ tsawˇ haˬ deuˬ-ahˇ ka kʼoꞈ tehꞈ-a

²⁷ “Ngaˬ-euˬ tsawˇ jeuˬ-oˇ, taˬ guˆ. Iˇsaˬleˬlaˆ-oˇ, nui ma taˬ cawˆ. Naw maꞈ-ahˇ bi nyehꞈ byoˆ gʼeh-euˬ, gaˇ mahˇ kaˬ-eu miˇ kʼahˬ kʼoeˇ-euˬ laꞈ-ahˇ, naw maꞈ-ahˇ ngaˇ ka kʼoꞈ nehˬ ma. Naw maꞈ iˇ kahˇ gʼoꞈ keuˆ laˇ-awˇ, nui saˇ oꞈ-eu laꞈ kʼoeˇ ya dehꞈ tehꞈ-a. Nawˬ-ahˇ laˆ guˆ-eu tsawˇ haˬ maˬ jawˇ ni, kʼaˬ duˬ ni nawˇ ya dehꞈ tehꞈ-a.

²⁸ Naw maꞈ-ahˇ ngaˇ ka kʼoꞈ le ma. Ngaˬ neh naw maꞈ-ahˇ bi jawˇ byaˆ luꞈ-eu, miˇ kʼahˬ tsawˇ jeuˬ kʼoeˇ deuˬ-ahˇ laˆ cawˆ kʼawꞈ, naw maꞈ-ahˇ maˬ laˆ cawˆ ni bi dehꞈ ma. Naw maꞈ-ahˇ maˬ kʼehˬ-ehˇ-aˬ, maˬ bi dzeuˇ-iˇ nya-a. Ehˇ kʼawꞈ, naw maꞈ-ahˇ ngaˇ kʼehˬ ngeh, aˇ dzehˬ maˬ dzeuˇ ni jahˇ ma lehˇ, Sahˬpaˬ Miˬyehˇ pyeuꞈ-eu ngaˇ ehˇ-eu ma.”