Yeˬlaˬmiˇ 45 - Akha

Baˬluˆ-ahˇ Miˬyehˇ saˇ jaˇ biꞈ-euˬ

¹ Yawˇshiˆ-euˬ aˬ li Yeˬhawˇyaˬkmˬ Yuˇdaˆ sahˬ paˬ geuꞈ-euˬ oeˬ kʼoꞈ tiˬ kʼoꞈ-ahˇ, ngaˬ neh gui ka nehˬ-euˬ dawˬ-ahˇ Baˬluˆ boꞈ doˆ-euˬ meh. Kʼoeˇ naˇ aˬ yawꞈ-ahˇ ngaˇ heu loꞈ-ehˇ ehˇ nehˬ-euˬ ma.

² “Baˬluˆ-oˇ, Iˇsaˬleˬlaˆ-euˬ Miˬyehˇ pyeuꞈ-eu Sahˬpaˬ Miˬyehˇ heu loꞈ-ehˇ ehˇ-eu meh.

³ ‘Ngaˇ maˬ paˇ gʼeh nya miˇ-a. Ngaˬ-euˬ shaˬ zahˬ naꞈ dzehˬ laˇ ni Sahˬpaˬ Miˬyehˇ jahˇ-euˬ nga. Shaˬ zahˬ naꞈ-eu gʼaˬ doeˇ maˬ dah laˇ coeˇ miˇ-a’ lehˇ nawˇ ehˇ-eu meh.

⁴ “Ehˇ kʼawꞈ Sahˬpaˬ Miˬyehˇ pyeuꞈ-eu ngaˇ-aˬ, ngaˬ neh tsoˆ doˆ taˬ-euˬ jeˬ deh pyaˆ-awˇ, ngaˬ neh ka dehꞈ taˬ-euˬ jeˬ gʼawˇ lehˆ-eu ma. Miˇ kʼahˬ kʼahˬ lah ni ngaˇ kʼoeˇ loꞈ-ehˇ jahˇ nehˬ ma.

⁵ Nawˬ-ahˇ muiˬ laˇ-eu jeˬ-ahˇ nawˇ poˆ te loˇ. Kʼoeˇ loꞈ-ehˇ taˬ gʼeh. Tsawˇ haˬ dawˬ tawˆ luꞈ kʼoeˇ taˆ, luˬ-iˇ seˇ-iˇ-eu jeˬ ngaˇ bi keuˆ le ma. Ehˇ kʼawꞈ, nawˇ aˬ geu gaˇ jawˇ-eu maˬ kaˬ, maˬ ya shiˇ ni dzeuˇ-iˇ tehꞈ-a lehˇ, Sahˬpaˬ Miˬyehˇ pyeuꞈ-eu ngaˇ ehˇ-eu ma.”